|
|
|
 Re: **** ده بوست عن الناس البيغالطو وجنهم غلاط ** (Re: الهادي الشغيل)
|
واحد غالاط شديييييييييييد قالو لاقاهو واحد ..قال ليه يازول انت مالك غالاط كدا...والله انا ما شفت زول غالاط اكتر منك الا حسنين,,,
الغالاط قال ليه: لالا كضاب حسنين بتاعك ده ما غالاط اكتر مني ...
قال يا زول غالاط اكتر منك انا اوريك بالدليل تعال معاي لبيت حسنين... القلتو ليك دا
اها مشو ليه... اول ما دقوا الباب جاهم صوت حسنين من جوة: منو الفي الباب؟؟
الراجل قال ليه : دا انا...
- حسنين: لالا ما انت .
| |
  
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
ههههههههههه
يغالطوك في اسمك
السيد الشغيل سلام عليكم
قبل تلاتة شهور وانا واققداخل محل يمني
ببيع منتجات سودانية
فااا فيسوداني قال لليمني عاوز ليهو (سروال)
قال عاوزو بي (تكه) فااااا في واحد اقف
قال ليهو لا ياخي بتاع التكة ما كويس
احسن تشتري ليك بتاع لستك
ف اليمني صاحب المحل قال ليهو
(حصلت) كمان تختار ليهو سروالو
جننا كما (شبير) مع المغالطة
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: محمد البشرى الخضر)
|
Quote: طيب هاك المغالطة دي يا الشغيل
Quote: Al-Shegail
ما بتتكتب كدا
مفروض في h بعد الـ g عشان تتنطق غ !
أها رأيك شنو في اسمك نغالطك :) |
ههههههههه والله انت زول ختير خلاص ودخلت موسوعة الغالاطين وحققت ريكورد قياسي
- نسخة لعبد العزيز أخوي ده زميل المنبر وبرضو خريج آداب لغة انجليزية جامعة الخرطوم ..
- برضو نسخة لأحمد الصادق ود عمنا برضو خريج لغة انجليزية جامعة الخرطوم
تعالوا ود البشرى داير يغالطنا في اسمنا .
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
Quote: ما بتتكتب كدا
مفروض في h بعد الـ g عشان تتنطق غ !
أها رأيك شنو في اسمك نغالطك :) |
المشكلة يا الهادي الزول دا جيتو بجنب كراعه الشمال... فيا الكورة .... يا الاوت ... زي باكات الحكومة
كلام ود البشرى صحيح .... زمان بنقول ناس الرياضيات ( مجليين في الإنجليزي )
ودي طلعت نظرية ما صحيحة مؤخراً.... على الأقل في سودانيز دي
.
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: عبد العزيز محمد عمر)
|
حبيبنا الهادي الشغيل .. مودتي
بوست جميل وخفيف الظل ..
حاولت أن أشارك بموضوع لكن صعب
لأن نوعية هذه البوستات تحتاح الكتابة بالعامية السودانية
دي صعبة لناس ضواحي الدنيا .. أخخخخخخ لو كانت بالنوبية
كنت حكيت عشرات القصص .. (ههه)
بصراحة بوست جميل .. متابعين ..
يادوب فهمت عمق أغنية ( أقول يمكن أنا ما جيت ) مبالغة
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: حيدر حسن ميرغني)
|
حيدر حسن ميرغني
Quote: الهادي ياولدنا
الوهم مرات غالب على أهل الغلاط وبزيَن ليهم الغلط صح
كبَر دماغك وإتجاوزهم .. |
كيف يا جارنا وود الحلة الجنبنا الامتداد الشرقي الجميل
أشكر مرورك العطر ... وكلامك صحيح .. مرات الوهم يقلب الموازين لدى الشخص
الغالاط وحب الانتصار للنفس والذات يخلي الواحد يغالط ظله .
كدي تعال الماسنجر عندي ليك حاجة حلوة
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
كتب أحدهم :
عندي واحد صاحبي و ود جيراننا اسمو عايد ..و لقبه ((عايد غلات )) ..
مره مشى معاي المطار عشان استقبل امي جايه من السودان و طبعا القزاز بتاع صالة الاستقبال ما صافي
يعني تشوف الناس الجوة رهاب رهاب .. انا شفت الوالدة من بعيد و عرفتها طوالي .. و قلت ليهو ..ديك امي
يا عايد لابسة توب بني .. عاين شديد .. و بمنتهى الاستهزاء من شوفي .. قال لي ..امك شنو يازول .. انا امك
ما باعرفها .. انت عميان و لا شنو دي لا امك و لاحاجة ..
اتخيل زول يغالتك في امك زاتها ..
--------
معقول في ناس بالصورة دى ....تعرف لو انا مكان الزول ده كان خليت ليه المطار ومشيت ....
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
نعم في الإنجليزي مافي غ ولا في العربي في g
هل ح نكتب الإنجليزي كذا (الإنغليزي) ؟ ما ينفع طبعا, ليه لأنو تعارف الناس على طريقة معينة لكتابة الحروف غير الموجودة في لغة ما حين كتابة كلمات خاصة بلغة أخرى
في الإنجليزي لا يوجد حرف الظاء, طيب ابو ظبي و الظهران بتتكتب كيف؟تعارف الناس على اضافة حرف h لـ حرف الـ d
كذا الحال في كتابة حرف الـ غ
خذ مثال: 
الفكرة شنو انو الناطق بالعربية يقرا الحروف بطريقة صحيحة عند كتابتها بالإنجليزية, الخواجة ما فارقة معاه أصلو كدا كدا ما ح ينطق حرف الغين, لكن انت يا الشغيل لو ما كتبتها كدا واكتفيت بالـ g لوحدها ح تقراها الشقيل
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: محمد البشرى الخضر)
|
طيب يا ود البشرى اوريك الغلاط على اصوله :
ليه اذا كتبت ( gh ) في وسط الكلمة فانها تكون silent لا تنطق
زي Sight و Night و Right .. واذا جات في آخر الكلمة فاننا ننطقهاf
laugh و Tough و cough.
وفي كلمة High بنجليها عديل كده ..؟
قاعدتك القلتها فوق ضيعناها شمار في مرقة
اوعك تغالطني هههههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: احمد الشيخ)
|
الحاجة المتعارف عليها بين العرب دي يا محمد البشرى ابداً ما مقياس
أي نقل transliteration للحرف العربي الى اللغة الانجليزية دائماً تقريبي يعني مهارات فردية
عشان كده بتلقى اختلاف كبير بالذات في الاسماء
يعني مثلاً Mohammed, Mohamed, Muhammad
و نحن في السودان بنكتب غ والقاف ( g) ) (ده يمكن عشان بنطقهم بطريقة واحدة )
ونكتب عبد الله ,Abdallah في بعض الدول العربية بتكتب Abdullah يمكن تاثراً بالاسيوييين
هسه انت عليك الله بتكتب الخضر كيف؟ بال dh ولا بال d ؟ (مطلوب صورة من الجواز ههههههه)
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
كتب أحمد الصادق الشغيل :
Quote: لحاجة المتعارف عليها بين العرب دي يا محمد البشرى ابداً ما مقياس
أي نقل transliteration للحرف العربي الى اللغة الانجليزية دائماً تقريبي يعني مهارات فردية
عشان كده بتلقى اختلاف كبير بالذات في الاسماء
يعني مثلاً Mohammed, Mohamed, Muhammad
و نحن في السودان بنكتب غ والقاف ( g) ) (ده يمكن عشان بنطقهم بطريقة واحدة )
ونكتب عبد الله ,Abdallah في بعض الدول العربية بتكتب Abdullah يمكن تاثراً بالاسيوييين
هسه انت عليك الله بتكتب الخضر كيف؟ بال dh ولا بال d ؟ (مطلوب صورة من الجواز ههههههه) |
الشغيل أحمد :
جابت ليها صور جواز ههههه فعلا انتو يالشغيلاب غالاطين هههههه
الاسماء طبعا لا تترجم ولا يمكن أن نكتبها بالأحرف التي تشبهها وكل شخص بيكتبها حسب ثقافته وجغرافية بلده ..
ياريت يكون في نظام موحد وبرنامج في هذا الخصوص لكن أكان الإسم فيهو تشكيل تبقى عوجه.
كسرة :
اسمك ده يا احمد ذاتو عامل لي سافوتة
Ahmed ولا Ahmad
شذى نكتبها
Shaza ولا Shadha
بنتي ملاذ مكرهاني تقول لي الصاح شنو اسمي اكتبه كيف
Malaz ولا Malath
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
قال ليك مرة الهادي الشغيل وود ابشرى متغالطين في طريق التحدي.
الهادي قال الطريق دا من عطبرة ماشي الخرطوم بحري .
ود البشرى قال ليهو ابدا دا من بحري ماشي عطبرة .
واحد صاحبهم قال ليهم انتو بدل تتغالطو بدون فايدة امشو لي ود الشيخ هداك بيتوفاتح على الشارع.
مشوا دقوا الباب جاهم ود الشيخ طالع.
" ان شاء الله خير؟"
الهادي: والله عاوزين نعرف الشارع دا ماشي من عطبرة لبحري ولا من بحري لعطبرة؟"
رد ود الشيخ: " هو الشارع حسي وينو زاتو؟"
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: MOHAMMED ELSHEIKH)
|
MOHAMMED ELSHEIKH
Quote: قال ليك مرة الهادي الشغيل وود ابشرى متغالطين في طريق التحدي.
الهادي قال الطريق دا من عطبرة ماشي الخرطوم بحري .
ود البشرى قال ليهو ابدا دا من بحري ماشي عطبرة .
واحد صاحبهم قال ليهم انتو بدل تتغالطو بدون فايدة امشو لي ود الشيخ هداك بيتوفاتح على الشارع.
مشوا دقوا الباب جاهم ود الشيخ طالع.
" ان شاء الله خير؟"
الهادي: والله عاوزين نعرف الشارع دا ماشي من عطبرة لبحري ولا من بحري لعطبرة؟"
رد ود الشيخ: " هو الشارع حسي وينو زاتو؟" |
حبيبنا محمد الشيخ :
ههههههه أضحكالله سنك
أها شفت ود البشرى ده زول غالاط غلاطن شين جاي يغالطنا في شارعنا الطالع من مدينتنا عطبرة ..
وه وه وه هو طالع من مدينتنا ولا طالع من بحري ههههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
ههههههههههههههه
الله اجازي منك ي الشغيل
هاك دي
عندنا واحد جنو سؤال وغلاااط غلاط شديد في واحد صاحبنا عندو موضوع حارقو وداير احكي وعاين لقي زولنا قاااااعد
وما عارف اعمل شنو قبل عليو قاليو يا فلان عندي موضوع داير احكي لي الناس ديل لكن ما تغالطني وتسالني سؤال تعسفي
صحابنا الغلاط رده ليو وقال ليو تعسفي يعني شنو . هههههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: ابراهيم تون)
|
ابراهيم تون
Quote: ههههههههههههههه
الله اجازي منك ي الشغيل
هاك دي
عندنا واحد جنو سؤال وغلاااط غلاط شديد في واحد صاحبنا عندو موضوع حارقو وداير احكي وعاين لقي زولنا قاااااعد
وما عارف اعمل شنو قبل عليو قاليو يا فلان عندي موضوع داير احكي لي الناس ديل لكن ما تغالطني وتسالني سؤال تعسفي
صحابنا الغلاط رده ليو وقال ليو تعسفي يعني شنو . هههههههه |
حلوة أخونا تون ... الغالاط الناس بتخاف منو ويحجر عليك أي كلمة تطلع منك بيعمل منها موضوع ويقعد يغالطك
كتب أحدهم :
عندى واحد قريبى هنا لم أر مثله فى الغلات ، ياخى ده ركب معاى مرة فى عربيتى وسالنى الخزين دى
موديل كم؟ قلت له 95 ، زويلك نط فى حلقى طوالى وحلف بالتقطعو إنها موديل 94 ،فرحت جداً وقلت دى
فرصة سانحة وبالضربة القاضية ياولد ياخزين طلع الاستمارة وافحم الجنى ، عليك أمان الله الزول تمعن فى
الاستمارة وأصر على موقفه، انتقلنا بعدها لى ناس المرور وناس تويوتا وبرضو مصر انه حصل خطا ما فى
محل ما ، غايتو يازول يومنا راح وريقنا نشف بدون نتيجة .
دليل دامغ ووثيقة تثبت موديل السيارة ويقعد يغالط .
أنا لو في محل الخزين بفتح باب السيارة وأقول ليهو أنزل هههههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
زمان عندنا أعماماً لينا و هم أبناء عمومة رحمة الله عليهم جميعاً و أموات المسلمين
يكونوا ماشين من أم درمان زيارة للأهل في الكلاكلة
يوصلوا الخرطوم يبدوا يتغالطوا الآمن البص و لا البرنسة
كل واحد يصر على رأيو يختلفوا و يرجعوا أم درمان و يتفارقوا
الغريبة حبهم لي بعض إلى أن توفاهم الله كان مضرب المثل
بمناسبة غلاط ود البشر(ي ) في الإنجليزي
كان قبل كده في بوست طلع أسماء السودانيين المكتوبة بالإنجليزي في الجوازات دي كلها غلط
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: kamal omer)
|
الشغيل وضيوفك الأفاضل،
شكراً على تلك الاستراحة اللطيفة..
الشيء بالشيء يذكر .. سأحاول أن أحكي تلك النكتة القديمة (بتصرف) طبعاً..
قالوا في واحد غالاط شديد لدرجة قف.. ونفسوا عاجبهو خالص..
أهها جاهم مرة في حلتهم ضيف سمع بيهو.. فقام قال لي لأخينا الغالاط دة .. في واحد أخطر منك في حلة x..
وإذا عاوز تراهن على أنو بيتفوق عليك في المغالطة ..
باختصار تم الرهان على أن يقوم أخونا الغالاط بزيارة هذا الشخص الذي ادعو بأنه يفوقه غلاطاً....
أها أخونا الغالاط - المتحدىَِّ- شد الرحال إلى قرية X ..
وصل إلى منزل غريمه اللدود .. وطرق بابه .. كو .. كو .. كو .. فدار بينهم الحوار التالي:
- الغريم اللدود: مين في الباب؟
- المتحدىَّ: دة أنا فلان
الغريم اللدود: علي الطلاق دة ما إنت!!!
فبهت المتحدى وكر متقهقراً منهزماً لا يلوي على شيء..
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: نصر الدين عثمان)
|
Quote: احد غالاط شديييييييييييد قالو لاقاهو واحد ..قال ليه يازول انت مالك غالاط كدا...والله انا ما شفت زول غالاط اكتر منك الا حسنين,,,
الغالاط قال ليه: لالا كضاب حسنين بتاعك ده ما غالاط اكتر مني ...
قال يا زول غالاط اكتر منك انا اوريك بالدليل تعال معاي لبيت حسنين... القلتو ليك دا
اها مشو ليه... اول ما دقوا الباب جاهم صوت حسنين من جوة: منو الفي الباب؟؟
الراجل قال ليه : دا انا...
- حسنين: لالا ما انت .
|
معليش .. جات مكررة ..
--
قالوا (ذكر البعض بأنها حكاية واقعية - واحد شاب .. في مقتبل عمره .. زول بسيط وعلى نياتو..
وكان بيسف تمباك بالدس...
مرة أمو .. بتلف في الفرش عشان تدخلوا من الحوش .. لقت ليها كيس تمباك تحت فرشو!
وعندما واجهته:
الأم: إنت بتسف تمباك؟
الابن: لا .. ما بسف .. والله ما بسف!
الأم: ما تكضب أنا لقيت كيس تمباك تحت لحافك؟
الابن: والله دة ما حقي .. أنا ما بسف
الام: طيب كيس التمباك دة حق منو!.
الأبن: والله ما عارفوا .. إمكن ختاهو الحرامي!
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: نصر الدين عثمان)
|
Quote: قالوا في واحد غالاط شديد لدرجة قف.. ونفسوا عاجبهو خالص..
أهها جاهم مرة في حلتهم ضيف سمع بيهو.. فقام قال لي لأخينا الغالاط دة .. في واحد أخطر منك في حلة x..
وإذا عاوز تراهن على أنو بيتفوق عليك في المغالطة ..
باختصار تم الرهان على أن يقوم أخونا الغالاط بزيارة هذا الشخص الذي ادعو بأنه يفوقه غلاطاً....
أها أخونا الغالاط - المتحدىَِّ- شد الرحال إلى قرية X ..
وصل إلى منزل غريمه اللدود .. وطرق بابه .. كو .. كو .. كو .. فدار بينهم الحوار التالي:
- الغريم اللدود: مين في الباب؟
- المتحدىَّ: دة أنا فلان
الغريم اللدود: علي الطلاق دة ما إنت!!!
فبهت المتحدى وكر متقهقراً منهزماً لا يلوي على شيء.. |
ههههههههه رائعة أخي نصر الدين
حكاية التحدي ذي ذكرتني النكتة الشهيرة ( هي بعيدة من الغلاط لكن الشيء بالشيء يذكر) :
أشهر نشال في السودان عاجباهو روحو اشتهر على نطاق واسع بخفة يده والنشل في أصعب المواقف دون أن يحس به المنشول ..
واحد قال ليهو والله انت قدام المصريين ولا حاجة ديل ينشلوا الكحل من العين وديل ... وديل ...
يازول صاحبك اتغاظ وأخذ معاه شلة وسافر لمصر للتحدي وسأل هناك ودلوه على قهوة المواردي ولاقى المعلم كبير النشالين وتحداه فأومأ المعلم لصبي صغير وأرسله معه فوصلوا لشجرة عليها قمرية جالسة على بيض .. فقال الصبي للسوداني ..
أنا عايزك تسحب البيض من تحت القمرية من غير القمرية ما تطير ..
يا زول زولك قبل التحدي وأخذ يزحف متسلقاً الشجرة بهدوء ويرفع رجله براحة وينزلها براحه خوفا من الفضيحة وطيران القمرية وخسارة التحدي .. ساعتين وهو يتحرك ببطء وتمكن من سحب البيض دون أن تطير القمرية ونزل وهو يضحك ويمشي متبختراً وقال ( مصريين بتاع إيه شوف البيض والقمرية قاعدة في محلها ) ..
ضحك الصبي وقال ليه ( شوف نفسك يابيه ) فنظر صاحبنا لنفسه فوجد نفسه عاري منفكو بدون سروال على الشاسيه...
يعني الولد الصبي كان وراهو في الشجرة يزحف ويسحب في بنطلونه بشويش شوية شوية إلى أن عراه دون أن يحس ..
برك النشال السوداني من الخجل وقال ( والله انتو يا المصريين ما بتتقدروا)
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: Adam Youssif)
|
اول مرة اجي الدوحة استقبلني ود عمي في المطار
واحنا ماشين على البيت قلت ليه الليلة شكلها حتجيب ليها مطرة قال لي ليه
قلت ليه شفت برق قال لي لا دا ما برق قلت ليه برق انا شفته اها شوف تاني برقت
قال لي لا دا برج اتصالات وفي راسه لمبة بتومض عشان الطيارات
قلت ليه لا لا انا البرق ما بعرفه؟
قال لي انت ليك ساعتين في البلد وبتغالطني فيها كان تميت ليك سنتين خايف تمرقني منها
ههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: Adam Youssif)
|
Adam Youssif
Quote: الحبيب الهادي الشغيل
لك التحية
انت اثرت موضوع رائع
واحد ما سوداني بيغالطني في كتابة اسمي
انا كتب (آدم) بالالف الممدودة (آ) قال لي لا ما بتنكتب كدة بتنكتب كدة: (أدم)
قلت ليهو والله عجائب تغالطني حتى في اسمي
والامثلة كتيييير
دمت |
حبيبنا آ (أ)دم يوسف :
فعلاً بعض الناس غالاط خلاص يغالطك حتى في اسمك لو لاقاك واقف تحت عمود بيتكم بدق معاك (غلاط )يقول ليك ده ما انت بعد ساعه ونص بيقنعك انك انت ما انت ... دا زول ساي لابس بس قميصك .
يقعد يغالط فيك ويكرهك ويخليك تشك في قميصك ذاتو ههههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
كتب الهادي الشغيل :
(جابت ليها صور جواز ههههه فعلا انتو يالشغيلاب غالاطين هههههه
الاسماء طبعا لا تترجم ولا يمكن أن نكتبها بالأحرف التي تشبهها وكل شخص بيكتبها حسب ثقافته وجغرافية بلده ..
ياريت يكون في نظام موحد وبرنامج في هذا الخصوص لكن أكان الإسم فيهو تشكيل تبقى عوجه.
كسرة :
اسمك ده يا احمد ذاتو عامل لي سافوتة
Ahmed ولا Ahmad
شذى نكتبها
Shaza ولا Shadha
بنتي ملاذ مكرهاني تقول لي الصاح شنو اسمي اكتبه كيف
Malaz ولا Malath)
الشغيلاب شغلهم بالاوراق الثبوتية هههههههه
اسمي انا هين كدي شوف إسم ابوي بتكتب كيف ( ,Elsadiq , Alsadig , Alsadiq )
وفي ناس عمليين بشيلو اللام الشمسية دي وبكتبوه Asadiq
اسم ملاذ (ربنا يحفظها ) اظن أقرب بالزد لانه th من النادر تنطق / ز / او / ذ/
في ناس بنطقو th دي /ت/ زي خوانا الهنود
وديل بضيعو نطق الاسم خالص هههههههه
كسرة :
الناس البتغالط دائما أنوع :
في نوع بغالط وبكون هذفه المعلومة وتصحيح المعلومة وده غلاط ايجابي (زي حق ود البشرى ده )
ونوع بغالط بكون عارف نفسة غلط لكان عشان ما بتكسر يستمر في الغلاط خصوصاً قدام الناس
نوع بغالط ويغلطك عشان يعرف منك معلومة (دي بالذات زي مديرنا المباشر)
نوع بغالط من اجل الغلاط وديل زي متعصبين الكور مرات نهاية غلاطهم بنتهي بمستشفى ولا سجن
بلنتي ما بلنتي ، والله اوف سايد ... ما اوف سايد، قاصد يضربة ويستحق طرد ...لا ما يستحق وعيييك
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: Ahmed Elsadig)
|
كتب Ahmed Elsadig
Quote: في نوع بغالط وبكون هذفه المعلومة وتصحيح المعلومة وده غلاط ايجابي (زي حق ود البشرى ده )
ونوع بغالط بكون عارف نفسة غلط لكان عشان ما بتكسر يستمر في الغلاط خصوصاً قدام الناس
نوع بغالط ويغلطك عشان يعرف منك معلومة (دي بالذات زي مديرنا المباشر)
نوع بغالط من اجل الغلاط وديل زي متعصبين الكور مرات نهاية غلاطهم بنتهي بمستشفى ولا سجن
بلنتي ما بلنتي ، والله اوف سايد ... ما اوف سايد، قاصد يضربة ويستحق طرد ...لا ما يستحق وعيييك |
أحمد الشغيل :
والله تصنيفك ده عجبني بالحيل فهو شامل جامع لجميع الغالاطين فلم يكن هناك غالاط إلا وينضوي تحت هذه التصنيفات ههههههه
تصنيفك ده على وزن ( رجل يدري ويدري أنه يدري هههههههه )
لكن مديرك ده فقري وبينوم بدري ...
وأنا عارفك غتيت ما بتملكه المعلومة
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: احمد الشيخ)
|
بوست ظريف وخفيف الدم يا ود الشغيل..
لكني مستغربة اشد الإستغراب ليه عبد العزيز ود الفاضلاب
ما ظهر يدافع عن الفاضلاب,,,,
انا في زيارتي القادمة إن شاء الله سأزور الفاضلاب واحكي ليهم
عن هذا البوست وكيف عبد العزيز ود الفاضلاب ما دافع عنهم..
ودمت بالف خير وصحة وعافية
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: Basamat Alsheikh)
|
العطبراوية الرائعة بسمات :
Quote: بوست ظريف وخفيف الدم يا ود الشغيل..
لكني مستغربة اشد الإستغراب ليه عبد العزيز ود الفاضلاب
ما ظهر يدافع عن الفاضلاب,,,,
انا في زيارتي القادمة إن شاء الله سأزور الفاضلاب واحكي ليهم
عن هذا البوست وكيف عبد العزيز ود الفاضلاب ما دافع عنهم..
ودمت بالف خير وصحة وعافية |
ههههه حرام عليك الظاهر مريتي على البوست بسرعة 120 كلم / ساعة .. ارجعي فوق ستجدي مداخلة للرائع عبد العزيز الفاضلابي وتعليق بعدها مني على مداخلته .
كما وقد وضع الفاضلابي رابط لموضوع افترعه قبل سنوات يحمل نفس المضمون .. بوست ظريف ودمه خفيف ثلاث صفحات انصحك بقراءته.
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
اخونا الهادي وضيوفو الكرام - سلام ...
حقيقة بوست يسافر بنا مع ملح وطرائف اهلنا الافاضل ويخرج بنا من عنت ساس يسوس ... مشكور اخي ..
قلت اشارك بكلام اهلنا الرباطاب، ففيهم الاصالة والملحة والطرفة المحببة...
داير واحد رباطبي يغالطني في الشرح ده:
--------------------------------------
رباطابي وجعان مشي يكشف عند دكتور...
الدكتور سألو: الضربة الفي عينك دي من شنو ؟
الرباطابي : والله يا دكتور انا كنت طالع فوق ضكرا, لي ناس عمي فوق عصبة الجدول داير لي سعون اللات قراع،
وانا طالع وطالع وطالع لامن وصلت اللبة، لكن بلا الحلبوصة تتملص بي، اكان العراقي مو نصيح وكرن في الكروقة
انا كنت اتجكنت في الخشة...؟
******
الشرح:
طلعت فوق ضكر: يعني في نخلة ضكر (النخل فيه ذكر وانثى).
فوق عصبة الجدول: النخلة في طرف جدول ماء ري النخيل.
داير لي سعون اللات قراع: عاوز يقطع لقاح من الضكر لتلقيح النخلة الاثني.
وصلت اللبة: وصل قمة الخلة الضكر،
الخلبوص: حبل من الالياف، يستعين به الشخص لتسلق النخل.
الكرنيف : الجزء المقصوص من جريد النخل يضع الشخص عليه ارجله في التسلق.
لكن الخلبوص انقطع وفقد الزول توازنه لكن انقذه من السقوط تشابك عراقيه بكرانيف الجريد.
* يقال ان معظم الكلمات هذه لها اصل نوبي.
والله اعلم ...
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: حمد إبراهيم محمد)
|
وكت حمد فتح باب الرباطاب هاكم دى:
شافع رباطاب راح حوض السباحة لقاهو متروس شفَّع سوريين
قال اديهم ساعة وارجع ,, بعد ساعة رجع لقا الشفع لسَّه يجلبِغو
ومهَيِّجين الحوض ,, قال للكابتن الـبعلِّم فيهم:
شنو ياكابتن الزلابيا دى لى هسع مانجضت؟
قالوا الشفع مسكهم برجم وبتمسحوا بطين البحر.
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: ابو جهينة)
|
.
عمنا السر طه سليمان كان قاعد مع الوالد في الدكان، وكان حاج السر بيوصف ليهو حاجة في الخرطوم
قاليهو : وانت جاي من غرب بي شارع القصر ... ابوي قاليهو قول يا جنوب .. يا شمال. شارع القصر شمال جنوب
حاج السر مصر أنه شارع القصر شرق غرب... ( دا أكبر غلاط في التاريخ )..
لمن النقاش احتد حاج السر قاليهو : أنت شن عرفك بالخرطوم يا حاج محمد... انت زول ضهاري ساكت..
انا شغال في الخرطوم دي لي خمستاشر سنة..
ابوي قاليهو : أكان كدا أنت خمستاشر سنة ( راسك لافي )..
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: عبد العزيز محمد عمر)
|
حمد إبراهيم محمد
| Quote: حقيقة بوست يسافر بنا مع ملح وطرائف اهلنا الافاضل ويخرج بنا من عنت ساس يسوس ... مشكور اخي .. |
أشكرك أخي على الإطراء والبوست وحلاوته أنتم من تصنعونها .
Quote: داير واحد رباطبي يغالطني في الشرح ده:
--------------------------------------
رباطابي وجعان مشي يكشف عند دكتور...
الدكتور سألو: الضربة الفي عينك دي من شنو ؟
الرباطابي : والله يا دكتور انا كنت طالع فوق ضكرا, لي ناس عمي فوق عصبة الجدول داير لي سعون اللات قراع،
وانا طالع وطالع وطالع لامن وصلت اللبة، لكن بلا الحلبوصة تتملص بي، اكان العراقي مو نصيح وكرن في الكروقة
انا كنت اتجكنت في الخشة...؟ |
ياأخي عليك أمان الله نحن رباطاب وبكلامك المكتوب باللغة الهيروغليفية الفوق ده طلعتنا رباطاب تايوان ..
والله ما فهمت منه أي حاجة إلا رجعت للترجمة تحت هههههههه
لك التحايا ..
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
كتب أبو جهينة
Quote: تحياتي لك ايها الاتبراوي الاصيل
بوست دسم ويغري بالمتابعة اللصيقة والادلاء بدلو الغلاط.
اما بعد
فان لافتة وعنوان الغلاط في السودان هو
- كان طارت غنماية
والقصة معروفة
نواصل |
أستاذنا المبجل أبو جهينة العطبراوي أو (الأتبراوي كما تحب ان تنطقها أنت ) الذي يقطر نداوة وحلاوة ..
فأنا أستلذ بمايخطه حرفك وما يجمعه فكرك لأنك مميز ...
يلا يا حبيب أدلو بدلو الغلاط الغلاد ودعنا نستمتع
كسرة :
(الغلاط الغلاد ) دي يخيل لي فيها جناس تام ( أنا كنت شاطر في البلاغة والمحسنات البديعية ) ما في واحد يجي يغالطني
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
كتب عبد العزيز محمد عمر :
Quote: عمنا السر طه سليمان كان قاعد مع الوالد في الدكان، وكان حاج السر بيوصف ليهو حاجة في الخرطوم
قاليهو : وانت جاي من غرب بي شارع القصر ... ابوي قاليهو قول يا جنوب .. يا شمال. شارع القصر شمال جنوب
حاج السر مصر أنه شارع القصر شرق غرب... ( دا أكبر غلاط في التاريخ )..
لمن النقاش احتد حاج السر قاليهو : أنت شن عرفك بالخرطوم يا حاج محمد... انت زول ضهاري ساكت..
انا شغال في الخرطوم دي لي خمستاشر سنة..
ابوي قاليهو : أكان كدا أنت خمستاشر سنة ( راسك لافي ).. |
يا سلام رحم الله والدي وحفظ عمنا السر طه فكم كنت أحس بالأنس وأنا أسمع لمساجلاتهما ومغالطاتهما مع بعضهما البعض .
جيل ذهبي لن يتكرر .
لكن 15 سنة راسك لافي دي مبااااااااالغة هههههههه
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
.
أخونا إبراهيم عبد الكريم خليل من أولاد كوستي .. زول سمح بالحيل .. ودوما ما يأتينا بالجديد .. أها قام ذات مرة أدانا علاج للغلاط
كنا جماعة بنتغالط في حدث قديم أيام الجامعة .. الكلام دا كان في الدمام. والطرف البيغالط فيني كان اخونا يونس عبد الحليم كبوش ...
إبراهيم زهج من الغلاط الكتير دا .. وكان هو متفق مع يونس ..في صحة قوله ..
فقام سأل يونس : إنت يا يونس ( متضرر ) من كلام عبد العزيز دا لو صاح؟
يونس قاليهو : أبدا ما متضرر ... ولا أي حاجة
إبراهيم قاليهو : أي مغالطة مع عبد العزيز دا ... وأنت ما متضرر من النتيجة ( مشيها ليهو بالله )..
من ديك بقينا نمشي في حالة نكون ما متضررين ..
.
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: عبد العزيز محمد عمر)
|
تقول يا الصادق| Quote: و نحن في السودان بنكتب غ والقاف ( g) ) (ده يمكن عشان بنطقهم بطريقة واحدة ) |
طيب كدا انت حسمتها :) لأنو نطق القاف و الغين بطريقة واحدة خطأ طبعا و الأفدح منه الخطأ في الكتابة كمان
لذا من يكتب الـ غ بالإنجليزي g فهو نقل خطأ المتابة الفادح من العربي للإنجليزي
لو واحد عربي ما عنده فكرة عن اسم الشغيل قرأ التالي shigail ح ينطقها كيف؟
خضر بكتبها بالـ d لأنو لو اضفت h ح تبقى ظ بالإضافة لأنو بالعربي زاته الاسم خدر يمشي
يا الشغيل فرق بين الغلاط الساي و المحاققة, الغلاط الساي بفوّر الدم خاصة لامن تتضح الحقيقة ولسّة تلقى الزول بغالط مكابرة
أمّا المحاققة لابد منها لتثبيت الناس البتطلع بالآخرين العالي وهي برضو بتفوّر الدم لكن دم الكضّاب
في قصة في احد القرى التي يعزلها الخريف بالشهور كان في القعدة واحد من النوع البطلع العالي بالشباب بحكي في قصص عن الخرطوم و دا نظام هو الوحيد الشافها قال ليهم في الخرطوم في سجاير اسمه مور زي القصبة الواحدة طولها كذا و مثّل بيديه الطول المعني واصعا سبابة يد على الأخرى ممدودة السبابة
واحد من الشباب في القعده النوع الحاقاق داك قاليه قلت قدر كيف؟ قاله كدي واعاد الإشارة, داك طب مسك إيده وقال ليه دقيقة بس, عاين كدا و قطع حبل دبارة من العنقريب القاعد فيه و عبّر المقاس القاله الزول و قطع عليه الدبارة و قاله دا مقاسك القلته قاله نعم, لف الدبارة ختاها في جزلانه
الدنيا خريف الدرب مقطوع كم شهر, أول ما فتح زولك تاني يوم كان في الخرطوم ومشى نمرة اتنين اشترى السجاير القال عليه جا راجع الحلة تالت يوم بالليل في القعدة اول حاجة قال للزول داك انت كضّاب و طلّع ليه السجاير و الدبارة القبل كم شهر 
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
الحماقة هي بنت عم الغلاط ( والإتنين أحيانا يا إما سبب لضحك أو للدهشة أو الإتنين معا )
****
في قريتنا بالشمالية ، في سبعينيات القرن المنصرم ، قام سكان القرية بإقتناء مركب شراعي كبير ، نظام معدية بين ضفتي النهر.
ثم وقع الإختيار على زول معروف بدرايته بالإبحار في لجة النهر ( ولكنه ( خليط بين الحماقة والغلاط ) و سيجارته ( الخدرا ) لا تفارق شفتيه
قال شيخ القرية للرجل : المركب دي ما تحركها بعد آذان المغرب كلو كلو
فوضع ريس المركب كلام الشيخ ( حلق في الأضان )
ذات يوم ، كانت المركب وريسها بالضفة الشرقية وأراد الريس الرجوع لقريتنا بالضفة الغربية ، عندما جاءه أحد تجار قريتنا مهرولا وهو يحمد الله بأن لحق به قبل أن ينطلق ، فقد كان موعد صلاة المغرب على وشك
إنطلقت المركب تتهادي ، ولكن لا تأتي الرياح بما تشتهي المراكب
حيث خمدتْ الرياح وتهادى المركب ببطء ، ثم إنطلق صوت المؤذن بنداء صلاة المغرب.
فقام الريس بطى الشراع ، وأوقف المركب في جزيرة رملية بوسط النهر
فقال التاجر : يا زول مالك ؟ ما تواصل
فقال الريس : المغرب أذّن ، وتعليمات الشيخ واضحة.
فقال التاجر : طيب نصل القرية كيف ؟
هنا كانت إجابة الريس عمليا ، فقد خلع جلابيته وعراقيه وجزمته ثم لفهم جميعا على رأسه بعماته وأنزلق في الماء سابحا للقرية والتاجر يصيح :
المروة ... عوووك ... يا ناس أنا ما بعرف العوم
تدافع أهل القرية نحو الشاطيء وظلوا يتوسلون الريس للعودة للمركب والعودة بها ، إلا أنه قال :
والله إلا الشيخ يجي هنا ويقول لى الكلام دة
وقد كان
***
نواصل
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: الهادي الشغيل)
|
انا غايتو زى اللتبراوى ده مالاقانى:
واحد من ناس اتبره سمع كورة هلال مريخ في الرادي
الهلال مغلوب ـ قال لا هو ما مقتنع الا تجي الجرايد بكره!!!
بالمناسبة يالشغيل ,, الجماعة ديل كانوا بحضروا فى الكورة
دى فى نادى النسر ,, وحكاها لى اخونا احمد عبدالرحمن البشير
حنتبلى ,,{وبالمناسبة هو عضو فى المنبر لكنه ذهب مغاضباً مثل غيره}
وياريت يالشغيل توثق لينا عن مكتبة حنتبلى والطير الابيض ,,
ومكتبة الثقافة والمكتبة العامة الـ فى المجلس البلدى وماذا حلَّ بهم ,,
| |
|
|
|
|
|
|
|
|
|
Re: **** ده بوست عن الناس البيغالطو وجنهم غلاط ** (Re: عبدالعزيز الفاضلابى)
|
كتب عبد العزيز الفاضلابي :
Quote: انا غايتو زى اللتبراوى ده مالاقانى:
واحد من ناس اتبره سمع كورة هلال مريخ في الرادي
الهلال مغلوب ـ قال لا هو ما مقتنع الا تجي الجرايد بكره!!!
بالمناسبة يالشغيل ,, الجماعة ديل كانوا بحضروا فى الكورة
دى فى نادى النسر ,, وحكاها لى اخونا احمد عبدالرحمن البشير
حنتبلى ,,{وبالمناسبة هو عضو فى المنبر لكنه ذهب مغاضباً مثل غيره}
وياريت يالشغيل توثق لينا عن مكتبة حنتبلى والطير الابيض ,,
ومكتبة الثقافة والمكتبة العامة الـ فى المجلس البلدى وماذا حلَّ بهم ,, |
حبيبنا الفاضلابي :
حكاية سماع مباراة هلال مريخ بالرادي عاصرناها وكنا أطفال ...
أسمع الواقعة دي في نفس السياق :
============
المتعصب المريخابي (فيصل دبوره) ومن منا لا يعرف مكتبة دبورة .. جارنا في السوق والذي كان له سجالات مع شقيقي الأكبر مدثر وكان هلالابي أيام الزمن الجميل للهلال والمريخ (أيام الهادي سليم والطيب سند وأحمد سالم وبشارة أبضان وسليمان عبد القادر وكاوندا وبشرى وبشارة والجيلي وجاد الله وفيصل الكوري والفاضل سانتو وكمال عبد الوهاب من المريخ .. ومن الهلال زغبير وخضر الكوري وفوزي المرضي وشوقي عبد العزيز ومحجوب الضب وعبد الله موسى (المر) وشواطين وشيخ إدريس وعبده مصطفى والفاتح النقر وعز الدين الدحيش وعلي قاقارين) . وكنا نسمع المباريات عبر الراديو ولم تكن التلفزيونات آنذاك .. وذات مرة وفي مباراة شهيرة بين العملاقين كان يذيعها المعلق المرحوم (علي الحسن مالك) فبدأ يردد بشارة ماشي والدفاع راجع بشارة ماشي والدفاع راجع بشارة ماشي والدفاع راجع بشارة ماشي والدفاع راجع ثم صرخ قوووووووون وهنا ما كان مدثر شقيقي الهلالابي المتعصب إلا وأن ضرب الراديو ضربة كاراتيه حتى أسكته . المهم حضرنا الصبح للسوق وأخوي تبدو عليه علامات الغضب والتجهم نتيجة هزيمة الهلال وكأن مصيبة كبرى حدثت فظهر من بعيد فيصل دبورة وأخذ يردد وهو يتراقص فرحاً بشارة ماشي والدفاع راجع بشارة ماشي والدفاع راجع .. يا مدثر نحن عرفنا أنو بشارة ماشي على القون لكن الدفاع بتاع الهلال ده راجع وين .. ..
=======
بالنسبة للتوثيق لمكتبة حنتبلى والطير الابيض ,,
ومكتبة الثقافة والمكتبة العامة الـ فى المجلس البلدى
سأسعى جاهداً للتوثيق لها وقول يا مسهل .
كسرة :
ما ناسيك رقم هاتف وصور شلوفة ستصلك ومعليش سامحنا على التأخير .
| |
|
|
|
|
|
|
| |
ابراهيم عبد الوهاب
محمد البشرى الخضر
علي عبدالوهاب عثمان
حيدر حسن ميرغني
Ahmed Elsadig
احمد الشيخ
عبدالعزيز الفاضلابى
MOHAMMED ELSHEIKH
kamal omer
نصر الدين عثمان
Adam Youssif
وضاح عبدالرحمن جابر
ابو جهينة
فيس بوك
تويتر
انستقرام
يوتيوب
بنتيريست