دعواتكم لزميلنا المفكر د.الباقر العفيف بالشفاء العاجل
|
|
 جك الفول
|
سنة أربعة وتزعين كنت شغال في شمبات المرسى، ومؤجر في شمبات الأراضي مع صديق صيدلي إسمو عماد عبد العزيز عندو هايلكس موديل تزعة وتمنين. تقريباً تقريباً، كل يوم بعد المغرب ما عدا الخميس والجمعة، كنا بنمشي نزور صيدلي تاني بأبي روف إسمو نادر حُسين إبراهيم، بيتم فاتح على البحر.
بمجرد وصولنا لبيت نادر قاعدين نلقى الكراسي مطلعة قدام البيت، والواطة مرشوشة، والشاي باللبن جاهز. أول ما باب الهايلكس بتاع السائق ينقفل؛ صوتو بجيب حسين الصغير ود أخت نادر لبرا البيت ومعاهو ألعابو وبطلع ضهر البوكس يلعب. حسين دا، كان عندو ميزة في كلامو وهي إدخال كلمة "جنّكم" في أي جملة يقولها، مثلا:
أول ما نكب الشاي يقول بنص إنتباه وهو بلعب في ضهر البوكس: جنّكم تشفطوا الشاي باللبن!
أو أول ما نكورك لعمك بانقا بتاع الدكان عشان يصلح الفتة، يقول: جنّكم تضربوا الفتة بالزيت!
أو أول ما نبدأ الونسة، يقول: جنّكم تتونسوا بالدويات (الأدوية)!
|
|
 
|
|
|
|
|
|
|
|
Re: جك الفول (Re: أبوبكر عباس)
|
إستمرّ هذا البرنامج بنفس هذه التفاصيل لثلاثة شهور إلا انو كان في تفصيل آخر شال ملل التكرار وساعد على إدماني للروتين دا، وخلى الأحداث دي ممكن تبقى موضوع ونسة تتحكي، وهو خروج رحاب عصام العاقب بت جيران ناس نادر متلفحة بتوب الصلاة وشايلة جك بلاستيك أصفر تجيب فوقو فول من بانقا. كان حسين الصغير ينبهنا بمرورها بقوله: جنّكم تشتروا الفول فوق الجكاكة!
طبعا الزمن داك، الصعلكة لسع ما كانت إتمكنت، وكونك تشوف ليك بنوتة بهذا المشهد الرومانسي المتكرر؛ بتحبا بتحبا...
واحد ح يقول لي ما دام عشتوا زمن قبل التمكين، كيف عرفت إسمها بالكامل؟
مرة، بعد فتات كتيرة، أصريت أدفع، وأنا بحاسب في عمك بانقا خليت ليهو الباقي وسألتو عنها حتى كمان قال لي باقي ليها شهر تتخرج من كلية الاداب.
إنتهى الجزء الثاني والظاهر تاني باقي جزء صغير أخير
| |
|
|
|
|
|
|
|
|
|
Re: جك الفول (Re: أبوبكر عباس)
|
آخر أربعاء جينا فيها راجعين من أبي روف كانت باردة وتخيلت نفسي حزينا، لا أدري بسبب كآبة البرد ولّ غياب رحلة رحاب من البرنامج لأكثر من أسبوعين؟؟
يوم الخميس العصر عماد جدع لي مفتاح البوكس وقال لي: عليك الله، يا بلبل* قبل تمشي السينما أغشى بيت ناس نادر رجع لعبات حسين الصغير النساهن في ضهر البوكس أمس، لانو لو إنتظرن للسبت؛ بجننا، وأخوك عارفو جبان ما بقدر يتخلف عن خميس بيت الخالة وبتّها بالصافية!!
قلت ليهو: جنّكم تلخبطوا للناس سينماتم بحبكم!
وقفت العربية قدام بيت ناس نادر ويجي حسين من بعيد قاشر ومعاهو أصحابو شايلين قزاز الببسي، وطلع نزّل لعباتو وهو جاري قال لي: جنّكم تشيلوا لعبات الاولاد الصغار!
قلت ليهو: حسين، أقيف، دا، عرس منو؟ قال لي أسأل بانقا.
مشيت الدكان وقبل أسألو قال لي: صاحبتك
قلت ليهو: جنّهن يعرسن بدون يكلمننا!
اليوم داك بدل السينما قعدت في كبري شمبات أُراقب إنعكاس أنوار الزينة على شاطئ أبروف.
إنتهت
ـــــــــــــــــــــــــــــــ
* إسم الرآوي في القصة نبيل
| |
|
|
|
|
|
|
|
|
|
Re: جك الفول (Re: أبوبكر عباس)
|
أهلا دكتور* ابوبكر
سلامات
تعرف ب"وضوحك" السردي دا، ممكن بعد تساعدها بي جكة جكتين "معرفيتين"،
تكون كاتب اسفيري جيد،
و كاتب تقليدي "لا غبار عليه".
أرقد عافية.
انتهت المداخلة بحمد الله تعالى وتوفيقه،
وما في جزء ثاني.
*بيطري.
| |
|
|
|
|
|
|
|
|
Re: جك الفول (Re: عبدالعزيز عثمان)
|
تحياتي ابوبكر
لم وضيوفك
نحن زمان بنحب حسب المتوفر قدامك ! ونغطي قدحنا بدون حب ونحب بعد داك بحكم الانثي المتوفرة معانا صباح وعشية !
لذا معظمنا معرسين بنات اهلنا او جيرانا او اخوات اصحابنا
او
بنات اهل جيرانا البجو في الاجازات لاهلهم الجيرانا !
شوف كم واحد حب زميلتو حب يتونسو بيهو والجامعة كلها عارفاهو
ويتخرجوا ويقل توفرها لأي سبب .. سافرت اهلها .. بقت ما بتنشاف .. وتسمع بيهو عرس غيرها وعرست غيره وعاش الجميع وانجبوا ولم يتذكروا بعض إلا لماما .. ولماما دي مربوطة بملاقاة واحد من الدفعة يذكرهم بما كان
اها
كان ممكن تحب واحدة غيرها في نفس الحي بتوفرها
| |
|
|
|
|
|
|
|
|
|
Re: جك الفول (Re: أبوبكر عباس)
|
Quote: جنكم تجننونا بالكتابات السمحة دي...
مليون لايك،،نفسي الاقي حسين ده.. |
سلام يا عبد العزبز،
شحصية حسين دي أخذتها من شخصية طفل حقيقي ذكره لي صديقي يزيد السراج في معرض ونسة، وقال لي الشافع دا مرّة نسى كورتو في عربيتي ولمان تاني يوم رجعتها ليهو قال لي:
"جنكم تشيلو كور الأولاد الصغار.
| |
|
|
|
|
|
|
|
|
|
Re: جك الفول (Re: أبوبكر عباس)
|
عزيزي أبابكر
سلام فور يو و سلام فور اول بدون فرز
"بعض الحقوق محفوظة لمصطفى مدثر"ههههههههههههههههههههههههه
قلت سيدي:
| Quote: يا أخي، هسع دي أنا دا لمان أشوف ليك مداخلة إتّا أو مدثر أو الملك؛ بتحسس مسدسي، خلي جمهوري!! |
هههههههههههههههههههههه
بالجد انت مثقف و مشروع مبدع يمكن "يجي منو" لو ساعدتها بالجكة و الجكتين الواردة أعلاه، و"الباصات والشوت في الزوي"ههههههههههه
شوف نهاية البوست، عجبتني جدا وفيها انتقال مشروع و "فني" بالانجليزية" من العامية إلى الفصحى.
تعليقك عن مداخلات "الأخوان"،
يرشحك بجدارة وزيرا للثقافة في أول حكومة نازية قادمة لحكم "السودان الفضل".
أرقد عافية
| |
|
|
|
|
|
|
|
|
|
Re:جك الفول (Re: osama elkhawad)
|
ممتع يا شكّاك, ممتع للحد البخلي الواحد يتجاوز ضرسة الأربعة و"تزعين" و الـ "تزعة" وتمانين كما يتجاوز قصة عدم فهمه لكون الخواض بقرّظ البوست و كاتبه أم بقرّط على كدا :)
| |
|
|
|
|
|
|
|
|
|
Re: Re:جك الفول (Re: محمد البشرى الخضر)
|
أهلا ود البشرى وسلامات
قلت سيدي:
| Quote: ممتع يا شكّاك, ممتع للحد البخلي الواحد يتجاوز ضرسة الأربعة و"تزعين" و الـ "تزعة" وتمانين كما يتجاوز قصة عدم فهمه لكون الخواض بقرّظ البوست و كاتبه أم بقرّط على كدا :) |
وإليك الإجابة "غير الحاسمة":
المسافة البين "بقرِّظ" وبين "بقرِّط" فيها تمتدّ الحكاية.
إلخ مما يقوله الشعراء..........................
أرقد عافية
| |
|
|
|
|
|
|
|
|
|
Re:جك الفول (Re: osama elkhawad)
|
وعليكم السلام استاذ الخواض | Quote: الإجابة "غير الحاسمة" |
وعشان كدا "قرّظت" كتابة أبوبكر و المتعة التي اتاحت لي أن "أقرّط" على كدا لحين الحصول على إجابة حاسمة قد و قد لا تأتي ابدا
| |
|
|
|
|
|
|
|
|
|
Re: Re:جك الفول (Re: محمد البشرى الخضر)
|
يا بكوري، سمح ما تراكا بتكتب قصة، مالك طيب؟
وسيبك من حكاية جكة وجكتين وحركات كوميسارات الثقافة دي!
وبعدين عاين كمية الحموضة هنا:
أنا غايتو ما بتشرّط عليك، بس بطّل غنج وحرد، أديك كدا؟!
وبعدين ما تفضح مصادر قصتك بدري كدا، أديك كدا؟!
| |
|
|
|
|
|
|
|
|
|
Re: Re:جك الفول (Re: mustafa mudathir)
|
Quote: بعدين عاين كمية الحموضة هنا:
Quote: *بيطري.
|
يا درش أرجع لي نجمة الدكتور في "نصه"؟؟؟
هو حاول يسخر مننا نحنا أصحاب "النجمة" في "وطن النجوم" حين أشار إلى "الراوي".
فالعبدلله قال يجاريهو ،ما لقيت حتة تناسب النجمة غير "دكتور".
إمضاء:
كوميسار ثقافة "ما وراء البحار وبلاد الواق واق وما جاورها" ههههههههههههههههههههههههههه
| |
|
|
|
|
|
|
|
|
|
Re: Re:جك الفول (Re: osama elkhawad)
|
سلام يا أب سن،
كلما تجي سيرتك في ونسة مع معاوية الزبير؛ بوصفك بالحنيّة.
بعد مداخلتك دي حاولت أحسب الحبيتن من بعيد، وصلت للرقم 33 ، وأنا بين نائم وصاحي تذكرت الأولى التي كان يشاركني في حبها من بعيد 150 زميل!
| |
|
|
|
|
|
|
|
|
 Re: Re:جك الفول (Re: أبوبكر عباس)
|
00:21 ص Feb 3,2015
سودانيز أون لاين
معاوية المدير
بكندا محافظة البرتا
Quote:
تعرف ب"وضوحك" السردي دا، ممكن بعد تساعدها بي جكة جكتين "معرفيتين"،
تكون كاتب اسفيري جيد، |
برضو ممكن تديها جك جكين، وإيآك تديها كوز أو حتي نُص كوز،
بتلحقا الزينين.
قلنالك ستين مرّة المسغفين ديل اختاهُم بيبوجنُوّك علينا. مالك
ما بتسمع الكلآم ؟.
| |
|
|
|
|
|
|
|
|
|
Re: Re:جك الفول (Re: معاوية المدير)
|
00:59 م Feb 3,2015
سودانيز أون لاين
عبدالحفيظ ابوسن
ماقالوا عليك حنين
ول الصديق الاعز معاوية الاعزاز ولك مثله
هههه
الوالد ربنا يرحمو كان بقول علي اني مسكين .. وبقولها بشكل حزين جدا بحس بيهو ..
والغريبة شايف نفسي ما مسكين تصدق
اها عودة لذي بدء
ود المدير دة ما يخرب بوستك بكلامو الموغل في المحلية ( المحلية دي لزوم المساقفة وكدة ! )
قال السياب
احبيني
احبيني
فكل من احببت قبلك
لم يحبوني
ولا عطفوا علي
ف شنو
لامن نفتش في دهاليز القلب وقبوه بنلقي كميات من القلوب الشاقيها السهم وبني فيها العنكبوت
تصدق وانا صغير رف قلبي لفتاة بتجي يوماتي مارة جمب بيتنا .. اسمع الغناء واذوب علي خيال صورتها
لي الليلة شايفها سمحة واعاين ليها معاينة اكس حبيبة
اها شنو ليك
| |
|
|
|
|
|
|
|
|
|
Re: جك الفول (Re: أبوبكر عباس)
|
03:12 م Feb 3,2015
سودانيز أون لاين
محمد حيدر المشرف
دولة قطر
لا أعلم ما الأمر يا مشاء ..
وإنما عنيت أن في كتابة ابوبكر عباس تأريخ محكي بصورة جيدة لشريحة من المجتمع السوداني .. هكذا فكرت في أمر هذه القصة وحتى أني لا أعلم لماذا !!
كما وأعتقد أن انسان اربعة وتسعين لم يعد موجودا .. ولا موجودات اربعة وتسعين .. ولا رحاب .. ولا جك الفول بالتأكيد !!
| |
|
|
|
|
|
|
|
|
|
Re: جك الفول (Re: osama elkhawad)
|
10:05 م Feb 3,2015
سودانيز أون لاين
أبوبكر عباس
الإمارات
سلام يا ملك،
يا سيدي، وحات سيدي الحسن، ما حردان ولا زعلان من بوستات المدثر؟؟
الحري والزعل بدّن مصطفى نقاط وبعدين أنا معاهد نفسي انو ما في ود مرة في الأسافير دي يقدر يفسد علي متعتي بالحوار.
فقط حسيت انو ممكن أفسد ليكم ولي متعة الإحتفاء بنص مصطفى، لكن زي ما بقول المدرب مجد الدين: "اللعب راقد" وبلقى لي فرقة في مصطفى لقدام أخليهو ليك يجقلب والشكر للخواض
| |
|
|
|
|
|
|
|
|
|
Re: جك الفول (Re: mustafa mudathir)
|
21:49 ص Feb 3,2015
سودانيز أون لاين
osama elkhawad
Monterey,california,USA
مكتبتي في سودانيزاونلاين
Quote: خليها مسرد والد
أو أي كلام!
انت شفت ليك أديب بيجيب سيرة مدرب كورة؟
ياخي سيبنا ياخ! |
يا درش،
سلام فور يو
"نص"؟؟ أبي بكر مكتوب كله بالعامية السودانية،ما عدا الخاتمة.
هنالك تجارب "سردية" أخرى مكتوبة بالعامية السودانية،
هل يعني أنها خارج إطار "الأدب"؟؟؟
حياتنا اليومية كلها قائمة على السرد:
"سمعت آخر خبر عن ...؟ الطقس اليوم سيكون.....، السي في، كيف كانت رحلتي إلى "شعلوها البشاقرة"،
كيف يمكن للسرد اليومي ،أو ذكرياتنا أو....أو....
أن تتحول إلى "أدب"؟
| |
|
|
|
|
|
|
|
|
|
Re: جك الفول (Re: osama elkhawad)
|
01:24 م Feb 4,2015
سودانيز أون لاين
Haytham Ghaly
مكتبتي في سودانيزاونلاين
Quote: اليوم داك بدل السينما قعدت في كبري شمبات أُراقب إنعكاس أنوار الزينة على شاطئ أبروف.
|
ابوبكر ازيك ياخ
والله اتخيلتك قاعد في الكبرى وتعاين في البحر مهموم
وتلاقي وجيها شاقي النيل
اصدق المشاعر وأكثرها ايلاماً الصامت منها والمكتوم في جوف الاصداف
تحياتي للجميع
| |
|
|
|
|
|
|
|
|
|
Re: جك الفول (Re: osama elkhawad)
|
01:25 ص Feb 4,2015
سودانيز أون لاين
Kabar
كـــندا
مكتبتي في سودانيزاونلاين
ول ابا ابوبكر ..حبابك يا صديقي
يازول هوي ، كلام الأول ما بتحول يا عمك..!!
جنكم ، تحذفوا وتعدلوا وتزوغوا كمان كما زاغ بعضنا بابريق النبي..!!
لمن قريت العبارة (المحذوفة) في سري قلت (يا النبي محسن ، المعجنو ربو )..ول ابا في جواهو شبح جنجويد وماجايب خبر ولا شنو يعني؟..
اها سبع وعشرين ساعة ، منتظر صديقنا اسامة الخواض ، يجينا بفتح خطابي جديد لنج عنوانو (حينما يتماهى الضحية في استبطان خطاب الجلاد)..!!
تاني لمن تكتب ، اتذكر منو قاعد يقرا ، ودي اخير من تتحسس مسدسك..لأنو عمر البشير لغاية الليلة قاعد يتحسس مسدسو ، وبرضك الناس بتقول ليهو (ارحل)..!!
كبر
| |
|
|
|
|
|
|
|
|
|
Re: Re:جك الفول (Re: محمد البشرى الخضر)
|
09:08 م Feb 4,2015
سودانيز أون لاين
أبوبكر عباس
الإمارات
مكتبتي في سودانيزاونلاين
Quote:
متع يا شكّاك, ممتع للحد البخلي الواحد يتجاوز ضرسة الأربعة و"تزعين" و الـ "تزعة" وتمانين كما يتجاوز قصة عدم فهمه لكون الخواض بقرّظ البوست و كاتبه أم بقرّط على كدا :) |
الحمد لله الذي قَيَّضَ لنا ود البشرى وود المدير في وجه الخواض ومصطفى
ــــــــــــــــــــــــــــــــــــ
يا كبر سلام،
ما متذكر غيرت شنو في المداخلة الرديت فيها على الخواض، لكن أراهن إنك على خطأ!
جيب التعديل خلينا نشوف اللا وعي الجنجويدي بتاعي كيف إنو
| |
|
|
|
|
|
|
|
|
|
Re: جك الفول (Re: mustafa mudathir)
|
08:37 ص Feb 5,2015
سودانيز أون لاين
أبوبكر عباس - الإمارات
مكتبتي في سودانيزاونلاين
Quote: قلنالك ستين مرّة المسغفين ديل اختاهُم بيبوجنُوّك علينا. مالك
ما بتسمع الكلآم ؟. |
ما بقدروا يا ود الزبير، وكتاباتنا دي بتستفزهم يجوا راجعين ولازم لازم يقريوا المسافة.
هسع دي، كلمتك بتاعت "بيبوجنُوّك" بيكونوا بتأملوا فوقها.
آل لاهوت الوردة آل!
| |
|
|
|
|
|
|
|
|
|
Re: جك الفول (Re: أبوبكر عباس)
|
12:15 م Feb 5,2015
سودانيز أون لاين
Kabar - كـــندا
مكتبتي في سودانيزاونلاين
سلبطة ساكت؟!!
ول ابا ابوبكر..حبابك
وحباب ضيوفك هنا..
يا ود البشري يا صديقي ، الزول ما سحب حاجة ، وانما تكنيك فقه التقية مرات بحتم المجازفة ، من شاكلة (اذهب الى القصر رئيسا ، وانا اذهب الى السجن حبيسا)..عشان الجماهير ما تنتبه..وكده..وكنت اخال ان صديقنا ابابكر سينتبه لعبارته المزحة..ويقوم يسحبها..لكن عمل مصهين وساكي الكيس (ياخي لغاية هسع قاعد يجلد ذاتو من باب النقد الذاتي بتاع الشيوعيين : يا ربي انا سحبت شنو؟)..
اها تحسس المسدس الليلة جاب ليهو خاطرة كتبها الأستاذ جمال محمد ابراهيم (من يتحسس مسدسه امام الثقافة/سودانايل)..وعاينت كل المتوفر من مثاقفات في اليومين الفاتن ديل ولم تقع عيني على تحسس مسدس الإ كلام ول ابا ابوبكر عباس..شفت انت مهم كيف يا ابوبكر؟..
العبارة ، التي حسبتها مزحة خشنة ، هي العبارة التالية:
كتب ابوبكر عباس مخاطبا استاذنا محمد على طه الملك:
Quote:
وبعدين أنا معاهد نفسي انو ما في ود مرة في الأسافير دي يقدر يفسد علي متعتي بالحوار.
|
العهد مع النفس مافيهو مشكلة تب ، لكن المعيار الإستعلائي الإستهزائي بتاع (ود مرة)..!!
ولأن الحاجات بتتقري في سياقها العام ، فالعبارة اخر مرة صدرت بصورة مجهبزة ان كان تفوه بيها قائد الجنجويد سيدنا حميدتي (عليه الملام)..وقالها في معرض مباهاته ومجاهداته في حماية شنو كده ما عارف ، وانو هم حايمين في (الحراية) وناس الضل البارد..ولب لب لب..!
حميدتي قال كلامو ردا على الإمام الصادق المهدي..اها الحيكومة عشان تستلطف حميدتي قامت سجنت الإمام (عليه السلام) وتنت بسجن رئيس المؤتمر السوداني استاذنا ابراهيم الشيخ..وكلو عشان خاطر عيون سيدنا حميدتي اياه..!!
ول ابا ابوبكر ما عندو حيكومة بتخاف منو وبتحاول تسترضيهو وتقوم تسجن ليهو الناس..لكن العبارة بنعدها (خيانة تعبير)..لكن ده ما بيمنع انها بتفصح عن وعي باطن في مكان ما..بيقوم يفصح عن بشاعتو..يعني حكاية الحقارة البتمرق في عبارة (ود مرة)..!!
وناس امسودان ديل يحيروك في دقنوسك..واحد داير يفتخر ويحاول يدخلك في علبك يقول ليك (حوه والدة)..وبرضك العبارة اتقالت بصورة شهيرة في سياق سياسي قديم..وقالها ابراهيم شمس الدين ، ففي اخر الديموقراطية الثالثة في امسودان ، كان الفريق مهدي بابو نمر قايد كبير..وعمل تنوير(فبراير 1989) لوحدات الجيش وقاعد يهدد الناس المفكرة تعمل انقلاب ..فقام قال للعساكر (تلقبوا شنو ، والله كابي ده مافي واحد بيقدر يقلبو..!!) فقام ابراهيم شمس الدين وقال ليهو (ديجانقو انقرع ، حوة والدة)..!!
عبارة (ود مرة) في سياقها المجهبز كانت ، ولازالت ، خطاب جنجويد..يعني خطاب المراجلة وشنو كده ما عارف ، والجنجويد عساكر ، مفهوم الهزيمة عندهم يمسحوك من الوجود ، ويكسروا عينك بالإغتصابات وحرق القرى الخ..اها المثقف لمن يقول ليك (مافي ود مرة..الخ)..ده مش تماهي في خطاب الجلاد؟..هل المثقف قاموسو نضب كلو كلو لدرجة انو يستبطن خطاب الجلاد؟..
والأظرط تحسس المسدس كان شغل علامة نازي..!!
ويا مصطفى امسك عندك ، واحد (بكيرتي ) مظبوط..!!
كبر
| |
|
|
|
|
|
|
|
|
|
Reجك الفول (Re: Kabar)
|
13:01 م Feb 5,2015
سودانيز أون لاين
محمد البشرى الخضر - العين-الإمارات
مكتبتي في سودانيزاونلاين
يا كبر يا قريبك دي لفة بعيدة خالص ياخ
يعني كان حميدتي بدا كلامو بـ سلام عليكم نحردها ليه ونقول دا خطاب جنجويد!!
ود مرة زيّها وزي ود رجال وزي ود مقنّعة وزي ابن أنثى وغيرها من الإشارات التي تفيد التحدي و الثقة بالنفس
| |
|
|
|
|
|
|
|
|
|
Re: جك الفول (Re: محمد حيدر المشرف)
|
21:42 م Feb 5,2015
سودانيز أون لاين
mustafa mudathir - Canada
مكتبتي في سودانيزاونلاين
يا زميل م حيدر المشرف، لعلك طيب،
المسدسات للمسدسين يا دكتور!
بعدين بكوري دا كان ساكن مع صيدلي ومع ذلك لم تهد فيهو أريحية أبو قراط!
--------------------------------
يا بكوري
ياخ والله انت كاواي، لكن برضك محبوب جداً!
مالو يحيى فضل الله ياخ؟ نتعلم منه، فهو قاص وسارد وراوي ودا غير انو شاعر وصديق!
أها هسع لو سمع كلامك دا ح يزعل لأنه نحنا عايشين في مدينة واحدة.
إنتا بس بطل الحرد والغنج (الغنج دي أمش فتشها قبل تزعل!)
| |
|
|
|
|
|
|
|
|
 Re: جك الفول (Re: mustafa mudathir)
|
السلام عليكم ورحمة الله.
--------------------------
شكرا ود المدير أن لفت انتباهي إلى هذا البوست!
----------------------------------
ود البشرى كويس أخيرا الواحد لاقاك خارج البوستات
(المريحة) ديك بقيادة أيمن محمود!
--------------------------
بكري علوم ممكن نرج الأرشيف؟
| |
|
|
|
|
|
|
|
|
|
Re: جك الفول (Re: أبوبكر عباس)
|
03:15 م Feb 6,2015
سودانيز أون لاين
محمد على طه الملك -
مكتبتي في سودانيزاونلاين
يستااااهل ود المدير ..
كدى تاني تعال قول مسقفين وملاسي ..
براك شايف .
اهو كلمتك..
هاك دي منى ليك مراضا..
قالو رئيس محكمة شعبية كان مؤجر منو زول لبط عامل ليهو أرضي..
قدر ما دودرو يخلى البيت ما عرفلو سكة ..
لا خلا محاكم ولا اعفا شهرين ولاجوديات .
كلو والزول راسو والف سيف..
الزول دا يوم على التعترو دور ليك شكلا مع جارو .
ودوهم المحكمة الشعبية.
رئيس المحكمة لمح ليك زولو من الشباك ..
نادى الحاجب - الزول اب طاقية حمرا داك مالو؟
الحاجب - مشاكل جارو ..
رئيس المحكمة - ايوه انا عارفو ..
دخلم ..
اول ما دخلوهم طنقر عمتو وكفكف كم الجلابية وسألم :
- اها مالكم؟
الشاكي - الزول دا ليلة امبارح عمل وفعل..
رئيس المحكمة - صدق بعملا ..
الزول - ياريس تصدقو قبال انضم ؟
رئيس المحكمة - انا كمان نضمك وفعايلك ما خابرا ..
حرم ماني داير فيك شاهد..
حكمت المحكمة عليك بجنيهين غرامة واخلاء المنزل فورا.
:
هسه حكاية دي ما احلى؟
ناس جنها فول
| |
|
|
|
|
|
|
|
|
|
Re: جك الفول (Re: محمد على طه الملك)
|
14:20 م Feb 7,2015
سودانيز أون لاين
osama elkhawad - Monterey,california,USA
مكتبتي في سودانيزاونلاين
الأستاذ أمير
سلامات
وعذرا على تأخير الرد.
قلت سيدي:
Quote: هل نحتاج الى تصنيف كل كتابة ؟
وهل نجد المتعة فقط فى الكتابات المصنفة ؟ |
من حق القارئ أن يقول انه يستمتع بما كُتب،ولا يهمه جنسه الأدبي.
لكن حين تقول قارئة ما مثلا أن "العودة إلى سنار" أفضل من "موسم الهجرة إلى الشمال"،
سنجد أن مقولة عدم الاهتمام بالتجنيس، ليست دائما مقولة صائبة.
أرقد عافية
| |
|
|
|
|
|
|
|
|
|
Re: جك الفول (Re: osama elkhawad)
|
21:55 م Feb 7,2015
سودانيز أون لاين
Haytham Ghaly -
مكتبتي في سودانيزاونلاين
ابوبكر سلامات
ياخ قلنا نقول لينا كلام كبار فيو شوية فلسفة عسى ولعل يوم من الأيام تبقى مقولة
شهيرة يتناولها الادباء ويقولوها وتحت يوثقوها ب ( من اقوال هيثم غالي)
استاذنا الخواض سلام وعوافي
| Quote: سنجد أن مقولة عدم الاهتمام بالتجنيس، ليست دائما مقولة صائبة. |
الجملة دي انت قاصد بيها نسب الرواية الى جهة محددة
وللا شنو؟
| |
|
|
|
|
|
|
|
|
|
Re: جك الفول (Re: معاوية المدير)
|
23:27 م Feb 7,2015
سودانيز أون لاين
mustafa mudathir - Canada
مكتبتي في سودانيزاونلاين
معاوية كيفك؟ مشتاقين.
| Quote: إنت هسّع ماك شايف ابو بكر دا بقى مزوزي !؟... |
العودة إلى سنار، ديوان شعر
موسم الهجرة إلى الشمال، رواية
لكن أبوبكر جنس زوزاية! هو قايل نفسو كوظمونوط؟ ما هو شغّال وسط الحاجات البتزوزي
وأصلو بيزوزي، يا حلات زوزو!
قال مصطفى دا في كل الأحوال تلاقيه ومسدسك محشو، يا سلام، طييب أنا ذاتي في (جعبتي)
ما يكفي من الرصاص!
| |
|
|
|
|
|
|
|
|
|
Re: جك الفول (Re: mustafa mudathir)
|
00:05 م Feb 8,2015
سودانيز أون لاين
osama elkhawad - Monterey,california,USA
مكتبتي في سودانيزاونلاين
عزيزي هيثم
سلامات
قلت سيدي:
Quote: الجملة دي انت قاصد بيها نسب الرواية الى جهة محددة
وللا شنو؟ |
سيدي لقد ضربت مثالين لجنسين أدبين مختلفين،و الرابط بينهما هو المتعة.
فلا يكفي ان نقول اننا استمعنا،
ولذلك لا يمكننا المقارنة بين نصين جلبا لنا المتعة، بناء على "المتعة" فقط.
| |
|
|
|
|
|
|
|
|
|
Re: جك الفول (Re: osama elkhawad)
|
00:13 ص Feb 8,2015
سودانيز أون لاين
Haytham Ghaly -
مكتبتي في سودانيزاونلاين
| Quote: ولذلك لا يمكننا المقارنة بين نصين جلبا لنا المتعة، بناء على "المتعة" فقط. |
بااااااااارك الله فيك يا استاذنا
يادوووووووووبك وقع لي الكلام
معليش الفهم تقييييل لانو الحاجات بقن كتااااااار ؤ مساخ
وللا ما كدي يا معاوية هههههههههههههههه
والله يا معاوية اخوك طووول دايخ لمن اتعود زاتو
| |
|
|
|
|
|
|
|
|
|
Re: جك الفول (Re: أبوبكر عباس)
|
Quote: من حق القارئ أن يقول انه يستمتع بما كُتب،ولا يهمه جنسه الأدبي.
لكن حين تقول قارئة ما مثلا أن "العودة إلى سنار" أفضل من "موسم الهجرة إلى الشمال"،
سنجد أن مقولة عدم الاهتمام بالتجنيس، ليست دائما مقولة صائبة |
سلام استاذى الخواض
قصدت من التصنيف تصنيف كتابات المبتدئين امثال صديقى بابكر عباس (إن رضى بكونه مبتدئاٌ)
الا يكون فيها نوع التعجيز/كسر الخاطر او ترك الكاتبة كلياٌ(لو لم يرق له التصنيف ) او العكس تماما
يحين يكون التصنيف اكثر من استحقاق الكتابة فتصيب الكاتب "الانا المميتة".
التصنيف المبكر فيه ظلم للكاتب فى ظنى الضعيف فهو نوع من انواع framing التى تجعله اسيرا لنوع واحد
من الكتابة . كما تقلل متعة القراءة حين يلجأ العقل من غير وعى الى مقارنته بمن سبقوه فى كتابة النوع المعين/المقصود
تحياتى السمان
| |
|
|
|
|
|
|
|
|
|
Re: جك الفول (Re: امير الامين حسن)
|
Quote: قصدت من التصنيف تصنيف كتابات المبتدئين امثال صديقى بابكر عباس (إن رضى بكونه مبتدئاٌ)
الا يكون فيها نوع التعجيز/كسر الخاطر او ترك الكاتبة كلياٌ(لو لم يرق له التصنيف ) او العكس تماما
يحين يكون التصنيف اكثر من استحقاق الكتابة فتصيب الكاتب "الانا المميتة".
التصنيف المبكر فيه ظلم للكاتب فى ظنى الضعيف فهو نوع من انواع framing التى تجعله اسيرا لنوع واحد
من الكتابة . كما تقلل متعة القراءة حين يلجأ العقل من غير وعى الى مقارنته بمن سبقوه فى كتابة النوع المعين/المقصود
|
سلام أستاذ أمير
لو كان ما طرحته وتطرحه الآن، يتعلق ب"رعاية المواهب" ،فهذا شأن آخر.
أرقد عافية.
| |
|
|
|
|
|
|
|
|
|
Re: جك الفول (Re: osama elkhawad)
|
سلام يا أسامة ويا أمير (وأمير دا لا بيسلم لا بيسأل في زول وبراحته)
أمير بيتحدث عن مفهوم كمي في التصنيف، يعني المسألة دي واقعة ليهو
أكتر منك يا سمسم! فيقول: " يكون التصنيف اكثر من استحقاق الكتابة"
ويستنتج أن ذلك يصيب الكاتبة بحب الأنا وما إلى ذلك!
يا أمير أخوي التصنيف لا تترتب عليه تغيرات كمية لأننا لسنا بصدد فيزياء!
يعني مهما حشد فلان من قراء ومعجبين فإن نصه لن يتعاظم، صح؟!
يعني زي حسين خوجلي ومين ديل عملوا قنوات ولكن هل هذا يدوعل نصوصهم
وخربطاتهم لتطال نصوص الكبار أمثال الدوش والتجاني سعيد وعثمان أبكر وعلي
عبد القيوم، لذا فمفهوم الكثرة دا غريب منك وأنت الأديب والمترجم وربما الناقد
ولكنك جاي براحة براحة....
| |
|
|
|
|
|
|
|
|
|
Re: جك الفول (Re: mustafa mudathir)
|
(معاوية كيفك؟ مشتاقين.
العودة إلى سنار، ديوان شعر
موسم الهجرة إلى الشمال، رواية
لكن أبوبكر جنس زوزاية! هو قايل نفسو كوظمونوط؟ ما هو شغّال وسط الحاجات البتزوزي
وأصلو بيزوزي، يا حلات زوزو!
قال مصطفى دا في كل الأحوال تلاقيه ومسدسك محشو، يا سلام، طييب أنا ذاتي في (جعبتي)
ما يكفي من الرصاص!).
سلآمات أُستاذ مصطفى.
نبادلكم الأشواق، وكيف حالكم ؟.
زِد علي ذلك صحو الكلمات المنسية أروع ما كتب النور عثمان ابكر،
ومريود أروع ما كتب الطيّب صالح لهما الرحمة، وإن كنت لا بُدّ
مُصر علي الزيادة فزِد من جك الفول لُقيمات يقمن صلبك ولا داعي
لنثر جُعبتك...
| |
|
|
|
|
|
|
|
|
|
Re: جك الفول (Re: عبدالحفيظ ابوسن)
|
Quote: مير بيتحدث عن مفهوم كمي في التصنيف، يعني المسألة دي واقعة ليهو
أكتر منك يا سمسم! فيقول: " يكون التصنيف اكثر من استحقاق الكتابة"
ويستنتج أن ذلك يصيب الكاتبة بحب الأنا وما إلى ذلك! |
يا درش
سلامات
امير يتحدث عن الكاتب "المبتدئ"، ودي مسالة داير "مباصرة" ذات "مقاربات" مختلفة.
| |
|
|
|
|
|
|
|
|
|
Re: جك الفول (Re: محمد حيدر المشرف)
|
سلام يا دكتور
لي كم يوم أعاين لجك الفول دا وأزوغ
ليس كرها في الفول ولا حساسية من الجكاكة
لكن الفول دا في حياتنا أصبح من المتلازمات الضرورية التي لا تحتاج لعناء العاطفة والحواس
هو أكثر شئ ينطبق عليه قول الكابلي
يا الكل يوم معانا وما قادرين نقول ليك
إنك في قلوبنا كم نشتاق لعينيك
حنانك يا حالم .
بما أننا عصريون يجذبنا العنوان والإعلان أكثر من المحتوى
يعني لو خليتها كوز الفول
كان تحتاج لقوات تنظم صفوف القراء .
بس القصة كمان طلعت لذيذة جدا بسيطة سهل ممتنع وممتع .. تنقصها الجبنة وزيت السمسم ... وقليل من شمار ..
شمار بمعناها البهاراتي وكذلك بمعناها الشعبي الحرفي .
يعني على الاقل بطلنا يجتهد شوية بدل الحردي ويعرف لينا رحاب منوا تزوجها وهل كانت مخطوبة من أول ..وأصلا هل هو قدم أوراق اعتماده لها ولا أكتفى بالنظرات والابتسامات والمتابعة .
أكثر ما يعجبني في القصة أنك تفهما من قرية واحدة .. فترسخ دون أن تجعلك تصرخ من الغيظ والتركيز .
| |
|
|
|
|
|
|
|
|
|
Re: جك الفول (Re: درديري كباشي)
|
سلام يا أمير الما قاعد يسلم،
مبتدي شنو؟! أنا ما عندي علاقة بالأدب!!
لو تذكر انو الكتابة دي أنا ارتجلتها بمنتدي سودانيات ساخرا تحت مسمى: فن كتابة القصة
الرابط:
http://www.sudanyat.org/vb/showthread.php?t=28811http://www.sudanyat.org/vb/showthread.php?t=28811
ثم نظرت لها مؤخرا؛ ووجدت فيها مفارقة، وممكن تنشر خارج سياق السخرية، ولكي أرى وقعها على الناس هنا.
| |
|
|
|
|
|
|
|
|
 Re: جك الفول (Re: عبدالحفيظ ابوسن)
|
ابداع يا مستنير يشهد الله.. و وحاة سيدي الحسن انا طولت ما انبسطت في قراية زي دي يا جلابييا حلو، سير و عين الله ترعاك و ما يلاوز ليك كلام الذين يريدون النيل من وهج و رونق ابداعك ألثر المشهود،، مصطفى مدثر و من لف لفه..
و التحايا للجميع..
| |
|
|
|
|
|
|
|
|
|
Re: جك الفول (Re: Faisal Saad)
|
أريت كان في زول لف لفي يا فيصل يا ود سعد!
عالم مغرمة بالتحرش، هسع مالك معاي يا فيصل يا ود سعد، أو كما يقول اسمك؟
بعدين الكوظمونوت دا من وين استطاع يستعيد بوست من بعد الهلاك الاخير للمنبر مالم يكن عندو واسطة؟
ياخي بكّو دا في الهلاك القبل الاخير للمنبر قام سرق عنوان بوست حقي ونشره من غير اشارة لي لا منو
ولا من بكرى ابوبكر (وهكذا يكتب اسمه)! عالم لا بتعرف الحقوق ولا بتقر بيها ولذلك انسب شي يكون
دعمها من أمثالك!
| |
|
|
|
|
|
|
|
|
|
Re: جك الفول (Re: mustafa mudathir)
|
من "أمثالك" شنو يا درش، فيصل سعد دا هوَّ هوَّ ابوبكري
أنا شكّيت فيهو لما بدأ يرفع في بوستاتو القديمة
لكن القشة القصمت ظهر الشك هي إشارته لي في كم بوست بـ معاوية الزبير
هكذا حاف، بدون استاذ ولا حاجة
----
"لا حاجة" دي ما ذكّرتك خطاباتي البوَدّيها
| |
|
|
|
|
|
|
|
|
|
Re: جك الفول (Re: معاوية الزبير)
|
طبعا يا "استاذ معاوية" نحن المقاشرين المنبر دا عندنا حالة نفسية بطالة، يا أخي، لمان فيصل رفع البوست دا، أنا نفسي شكيت انو فيصل دا يا هو الكظم جن دا يا هو أبوبكر عباس يا هو!
هسع دي نتحلّ منها كيف؟!
يا أخوانا فيصل دا من أم درمان وهاجر أو شرد لكندا، أرق من النسيم ولا يقل من قباني بخصوص الغنا السوداني
وبعدين يا درش، إتّا ما عامل فوقها عمدة بكندا معقولة ما بتعرف فيصل سعد؟!
كويس برضو التحرش جابك لينا، نحن لو عارفين كدا كان تحرشنا بيك من زمان
| |
|
|
|
|
|
|
|
|
|
Re: جك الفول (Re: mustafa mudathir)
|
يا دكتور مصطفى روق المنقة و قول يا لطيف.. ياخ نحنا بينا عيش و ملح اكان في أتوا اكان في هاملتون
و بينا قهوة تم هورتون في الفيرفيو موول في سانت كاثرن.. و بينا التشجيع الرياضي و تنافس فرق مدن
اونتاريو.. و بينا الاصدقاء المشتركين دكتور عكاشة و كمال الشيخ.. و بينا امدرمان و بينا السودان و
بينا الموسيقي و الانسانية جمعاء.. ما ممكن بعد دا كلو نفسك يقوم في جدلية صاحبي بابكر دا اديب ولا
ما اديب.. يطير الادب و تطير عيشتو .. مالك داير تشمت معاوية الزبير دا ساكت فينا..
ارقدوا عافية..
| |
|
|
|
|
|
|
|
|
|
Re: جك الفول (Re: Faisal Saad)
|
سلام يا فيصل سعد ولا عليك، ما تاخد في خاطرك. لكن تصور لو كنت واضع صورة كان كفيتني لأن أخوك كان ألزهايمر
أو غيره بقى ما بيربط بين الأسماء وذكرى الأشخاص، حماك الله.
| |
|
|
|
|
|
|
|
|
|
Re: جك الفول (Re: mustafa mudathir)
|
Quote: ياخي بكّو دا في الهلاك القبل الاخير للمنبر قام سرق عنوان بوست حقي ونشره من غير اشارة لي لا منو
ولا من بكرى ابوبكر (وهكذا يكتب اسمه)! عالم لا بتعرف الحقوق ولا بتقر بيها ولذلك انسب شي يكون
دعمها من أمثالك! |
الرآبط لو سمحت .
سلآمات يا استاذ معاوية الزبير ؤُ سلّم معاك علي محمد يس خليفة،
يا أُستاذ مصطفى فيصل سعد دا منو ؟...
| |
|
|
|
|
|
|
| |
أبوبكر عباس
osama elkhawad
عبدالعزيز عثمان
عبدالحفيظ ابوسن
محمد على طه الملك
محمد البشرى الخضر
mustafa mudathir
معاوية المدير
محمد حيدر المشرف
Kabar
محمد الطيب محمد
Mohamed E. Seliaman
Faisal Saad
معاوية الزبير
Mohamed Yassin Khalifa
فيس بوك
تويتر
انستقرام
يوتيوب
بنتيريست