دعواتكم لزميلنا المفكر د.الباقر العفيف بالشفاء العاجل
|
|
 السفارة دي جنت ول شنو ؟
|
02:06 PM Oct, 06 2015
سودانيز اون لاين
عبدالله ود البوش-محل تمسا ترسا
مكتبتى فى سودانيزاونلاين
أمس النهار كلو كنت في حالة استعداد مية في المية للذهاب للسفارة حقتنا في الرياض بكرة اللهو الليلة
اولك يا بادي جبت شنطتي الكبيرة الخاتي فيها اوراقي كلها من شهادة اولى ابتدائي الفترة التانية الجيت فيها الحداشر
والحمد لله طلعت من العشرة اللوايل الكانوا بنجلدو جلد جد وضاعت مني شهادة الفترة اللولى الجيت فيها الطلاطاشر
وشهادات تانية وتالتة ورابعة وجت عليهن لحدي شهادة الجامعة الجبتها بتلتلة شديدة خلاس بعد قربت اخليها واجي عمرة سرحة كان اسع لاشفتم لاريتكم
اها طلعت ظرف كبير كاتب عليهو السفالة السودانية والتسمية دي حكيت قصتها هنا مية مرة
وانا اصلي فايق ساهي كل مرة بقصها ليكم انا خسران حاجة قبل كم سنة كدا كنت ماش السفارة محمد ولدي كان صغير
وكلما امشي مكان ببراني اليوم داك من الصباح قلت ماش السفارة وقاعد اشرب في شاهي اللبن باللقيمات جاني قال لي انا ماش معاك السفالة
فقلت له كما قال عبدالله الطيب اصبت حين اخطأت
طلعت ظرف السفارة وشلت منو كلو الايصالات المالية ارانيك خمسطاشر من سنة 1996 ولحدي سنة 2013
وشلت معاي الجنسية الخدرا القديمة ديك المكتوبة بالالة الكاتبة حروفها نصها زرق ونصها حمر والجوازات القديمة جت عليها
والجواز الحالي اللخدر كان شفتو بخدر زولي اللخر كان شفتو بخدر والرقم الوطني اي فور مجلد ببلاستيك
وصورتهن جت عليهن وختيتن في ظرف كبير مكتوب عليهو شبه الجزيرة للاستخدام الخارجي
دي المستندات القانونية
وعملت كل التحوطات من الادوات اللازمة جلابية ومركوب وسديري وسكين يا سمح يا قاري يا زين حلو الكلام ؟
واتوكلت على الحي الدائم وكوووووووف جوة السفارة
السلام عليكم
داير جواز الكتروني اديني الاستمارة
مافي استمارة ولا حاجة حمرت فيهو طوالي قلت امك من قولة تيت دورت ؟
قال لي المطلوب صورة الرقم الوطني وصورة الجواز وامشي المكتب العلي يمينك دا
تلاتة دقايق تم التصديق
تلاتة اربعة دقايق دفعت الرسوم
لقيت شاب جميل مبتسم قال لي اقعد يا حاج وجر جر جر اتصورت وطق طرق بصمت
واداني ايصال للاستلام بعد شهرين لكن قال لي راجع الرابط المكتوب في الايصال دا وان شا ء الله قبل الشهرين اكون الجواز جاهز
طلعت من السفارة عاينت للساعة لقيت كل الزمن كان في حدود نص ساعة
وطلعت مندهشا مستغربا قلت يا ربي امكن دي ما سفارتنا
ول تكون سفارتنا لكن تكون جنت ؟
بالجد شكرا جزيلا للشباب العاملين بالسفارة السودانية بالرياض بالله اتقول ما كيزان
|
|
 
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
| Quote: بالجد شكرا جزيلا للشباب العاملين بالسفارة السودانية بالرياض بالله اتقول ما كيزان |
هههههههههه قلت هجموك باللطافه والتعامل السمح.... بالروح سوادنية تب جلت منهم الكوزنه
في ناس تعرف قدرهم جابهم مع الكيزان ولا بكون من الكيزان المنظمين ..منتفع بأدب
| |
|
|
|
|
|
|
|
|
|
Re: السفارة دي جنت ول شنو ؟ (Re: اباذر عبد العال)
|
| Quote: قلت هجموك باللطافه والتعامل السمح |
والله يا أبو ذر الكيزان ديل عدمانين حتة السماحة وقدر الفي عند الناس محقوها
لكن الحصل دا اياهو زي ما قلتو امكن تكون فلتة ول امكن عشان انا جيت متخيل نفسي داخل حرب
ولقيتم فاضين اضاحكو
لمن قربوا اجيبو لي شاهي
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
الجميل ود البوش
خشمك فيهو اللبن
نص ساعة وتخلص ووش مبتسم
يا سلام احلى كلام
يعني يا سيد الامانتي ليك
باكر ان شاء الله من صباح الرحمن نتوجه السفارة
باقي انا جني وجن كشير الوشوش ووقوف الصفوف
بس ان شاء الله جنهم دا يصبر معاهم لي باكر
| |
|
|
|
|
|
|
|
|
|
Re: السفارة دي جنت ول شنو ؟ (Re: علي محمد الفكي)
|
حبيبنا علي محمد الفكي
| Quote: باكر ان شاء الله من صباح الرحمن نتوجه السفارة |
طوالي امشي ودا هدف البوست عشان الناس المخلوعين من الزحمة زيك كدا امشوا
والأيام دي فاضية ومحتاجين قريشاتك
رسوم الجواز 530 ريال
والمساهمة 282 ريال لفئة المحاسبين التانيين ما بعرفهم
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
ههههههههههههههه
وآلله يا ود البوش يا اخوي حكم
قصتك دي ذكرتني قصة مشهورة
لمقطوعة الطارئ سودانير
المعرووووف عنها التأخير الدائم
والكلام العائم
المهم الحضور المطار كان ستة الصبح
كل الركاب حضروا. في الموعد
وكل يمني نفسه. بعدم تاخر الرحلة
ولو مرة وااااحدة تصدق وتقوم في مواعيدا المبيريكة
فإذا ب الموظف المسعول بلملم في اوراقه وماشي بيتم
انتو منو يا ناس،،،،!!!!!!!!
نحن يا اخينا ركاب الرحلة الفلانية بالرقم كذا !!!!
وهدي تظاكرنا
بس الرحلة دي اقلعت من نصف ساعة كدا
،،،،،
وحاتك ات لليلة
اقلعت بمنو وكيف
مافي زول عارف
| |
|
|
|
|
|
|
|
|
|
Re: السفارة دي جنت ول شنو ؟ (Re: اسامة الامام)
|
شكرا ضيوفي الاعزاء المتداخلين
الهدف من البوست لتشجيع الناس المترددين من الزحمة
واوصيهم بنص الاسبوع واختو بداية الاسبوع واخرو
.
.
وتبا للكيزان من اسع دي عشان ما اجوا اسوا لي سافونة
لانو دي حقوقنا واصلا مفروض اكون الوضع كدا
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
اداني ايصال للاستلام بعد شهرين لكن قال لي راجع الرابط المكتوب في الايصال دا وان شا ء الله قبل الشهرين اكون الجواز جاهزQUOTE
>>>
>>>>
<<<<\
عزيزي الفاضل عبد الله ود البوش
كويس كلامك كله زين عن ناس السفارة السودانية في السعودية وكانوا سريعين في تكملة الاجراءات
والسؤال المهم ليه الجواز يطلعوه بعد شهرين .. ليه ما يكون بعد يومين او ثلاثة ايام.. وكمان اقول ليك حاجة
ليه ما يكون في نفس اليوم.. اذا كان في ضابط من وزارة الداخلية عنده مكتب في السفارة وعنده الجوازات جاهزة
وما عليه الا يطبع فيه اسمك ومعلوماتك ويقول ليك تعال المساء استلم جواز السفر.. وتوقم تمشي لقهوة استار بكس
في نفس الحي الفيه السفارة وبعدما تكمل قهواتك ترجع السفارة وتستلم جاوز السفر,,
طبعا انت حتقول الكلام ده مستحيل .. لكنه ما مستحيل .. عشان السفارة السودانية في امريكا بتطلع ليك جاز السفر في نفس اليوم
لانهم عندهم ضابط من وزارة الداخلية عنده مكتب في السفارة,,,
واذا كان عملوا كده يستاهلوا الشكر والعرفان والتقدير.. لكن يسلموك جواز السفر بعد شهرين حنصدق ليهم بنص شكر بس..
وكمان ان شاء الله الشهرين ديل ما يكونوا اربعة شهور ولا ستة شهور..
ودمت بالف خير وصحة وعافية
| |
|
|
|
|
|
|
|
|
|
Re: السفارة دي جنت ول شنو ؟ (Re: Basamat Alsheikh)
|
العزيزة بت الناس العزاز بسمات بت ابونا الشيخ
مرورك هنا بس له طعم خاص خليك من أي حاجة تانية
| Quote: طبعا انت حتقول الكلام ده مستحيل |
طبعا مستحيل ونص وخمسة
.
.
عندنا راعي في الحلة يا بسمات بسرح بغنم الناس
يوم ضيع نص الغنم
الناس قاليهو ضيعت الغنم وين يا زول ؟
قاليهم ديل كان حمدتو الله عليهن ما شوية
.
.
الجواز الالكتروني ما بطبعوهو هنا ..... بطبعوهو في السودان وعيييييييييييييييك
انا دا ما موضوعي ان شا ء الله اجي بعد ستة شهور ما بهمني
كل الموضوع انا مشيت وفي بالي داخل حرب
ايوة حرب عديل كدا لكن كنت متحوط ليها والسكين في الضراع والطاقية حمرا مشنقة فوق للحاجب شوية كدا
لكن لمن جيت أتصور الود اللذيذ داك قال لي نزل الطاقية يا حاج
بس دا كل الحاصل يا بت اخوي
| |
|
|
|
|
|
|
|
|
|
Re: السفارة دي جنت ول شنو ؟ (Re: محمد البشرى الخضر)
|
Quote: شحتا الله وسيدي عبدالله ود سيدي اللمين هكرة اطلع ليك غلت في البيانات ويكتبوك عبدالاله عشان تشيل شكرك ده تبلو بي ابري ابيض وتجغمو
كلو سنة واتا طيب يامنقه |
عليك الله يا ود البوش رد علي بتاع الضهاري ده
قال جيت الرياض ونزلت في شقة مفروشة ليهم حق
يعملوا فيك كده
| |
|
|
|
|
|
|
|
|
|
Re: السفارة دي جنت ول شنو ؟ (Re: اسامه العريفي)
|
Quote: باللقيمات جاني قال لي انا ماش معاك السفالة
فقلت له كما قال عبدالله الطيب اصبت حين اخطأت |
ههههههه ــــ كدى الـ نَوَقِّعك فى شر أعمالك
ممكن تحكى لينا حكاية عبدالله الطيب دى؟
إنتى كمان يابسمات فى امريكا اللنتى فيها دى
شوفتيلك جواز بطلع فى يومين ,, يمين زواج مايتم فى يومين
خليك من جواز ,, ـ
ود البوش شرابك للجبنة معانا مو عاجبنى
| |
|
|
|
|
|
|
|
|
|
Re: السفارة دي جنت ول شنو ؟ (Re: محمد حمزة الحسين)
|
نتى كمان يابسمات فى امريكا اللنتى فيها دى
شوفتيلك جواز بطلع فى يومين ,, يمين زواج مايتم فى يومين
خليك من جواز ,, ـ
,,,,
,,,
عزيزي الفاضل ود الفاضلاب
انا بذات نفسي قبال سنة ونصف طلعت جواز السفر ( القديم) في واشنطن
في يوم واحد.. مشيت السفارة الصباح ورجعت بعد الظهر لقيت جواز السفر جاهز
لانه في مكتب لوزارة الداخلية داخل السفارة...
اما الناس العندهم جوازات سفر امريكية فممكن يستخرجو جواز السفر في ساعة واحدة فقط اذا دفعوا
رسوم زيادة واثبتوا بوثائق ان هناك حالة عاجلة تستدعي استخراج جواز السفر في نفس اليوم..
وقبال شهرين مشيت مع صديقة وعاوزة تطلع جواز السفر في نفس اليوم ومشينا شارع هدسون في
downtown منهاتن ومعاها تذكرة سفر في اليوم التالي وطلعوا ليها جواز السفر بعد ساعة واحدة
بس دفعت رسوم زيادة...
وبعدين منو القال ليك الزواج ما بيتم في يومين.. هسع الزواج سمعنا انه في السودان بيتم في يوم واحد
خفضا للمصاريف.. اما زواج زمان الكان بيستمر اسبوع ده خلوهو .. لكن احتمال في القرى مكن الزواج يستمر 3 ايام..
ودمت بالف خير
| |
|
|
|
|
|
|
|
|
|
Re: السفارة دي جنت ول شنو ؟ (Re: Basamat Alsheikh)
|
الأخ عبدالله ود البوش,
كلام ده شكله أضغاث أحلام وما نحن بتأويل الأحلام بعالمين .... السفارة حقتنا الواحدة دي معقولة تعمل العمل ده كله؟ انا غايتو ما مصدقك أبدا إلا أشوف شوف, طبعا ده ما معناهو إنت كضاب لكن في الشيئ الأنا شفته وعايشته بقيت ما أصدق أي حاجة حلوة في سفارتنا في الرياض ولا نقول سبحان الله مغير الأحوال من حال إلي حال ..... الحمدلله رب العالمين
| |
|
|
|
|
|
|
|
|
 Re: السفارة دي جنت ول شنو ؟ (Re: aosman)
|
Quote:
بعد دا اريتو يسلم ...
ومن حسي غواصة .... باقي مرتن حاول يحرف لي بوستي |
هههههههههههههههههههههه،
يا قريبي والله ختفتها من كِي بوردي .
أنا أصلي من زمان تاهمو ...
| |
|
|
|
|
|
|
|
|
|
Re: السفارة دي جنت ول شنو ؟ (Re: معاوية المدير)
|
هلا بي ود البُوش... وحمدلالك بالسلامي يا اخوي...
وحقيقي السفارة في الفترة الأخيرة كتير ناس مشولا امورُن ظبطت في نفس اليوم... وأنا قبلك حصلتلي مشيت عاوز ورقة توكيل للسودان وفي نفس اليوم قدمت للجواز وجيت مارق بي ورقتين... التوكيل + ورقة مواعيد الاستلام البعد شهرين...
لكن تقريرك ناقص ماااااااااا عرجت علي بوفيه حبيبنا ود الباوقة وفولُو البقى طااااااااااااااعم داك...
Quote: نتى كمان يابسمات فى امريكا اللنتى فيها دى
شوفتيلك جواز بطلع فى يومين ,, يمين زواج مايتم فى يومين
خليك من جواز ,, ـ
,,,,
,,,
عزيزي الفاضل ود الفاضلاب
انا بذات نفسي قبال سنة ونصف طلعت جواز السفر ( القديم) في واشنطن
في يوم واحد.. مشيت السفارة الصباح ورجعت بعد الظهر لقيت جواز السفر جاهز
لانه في مكتب لوزارة الداخلية داخل السفارة...
|
الفاضلابي وبسمات سلامات...
الجواز الأخضر القديم يا بتنا كان بيطلع في خَمِسْ دقائق في سفارتنا دي... تقوليلِي يوم...
الجواز الاليكتروني دا في الدُول المتقدمة "أقصد الباكستان والبنجلاديش والهند وشرق آسيا" بيدوهُم برضو مدة لكن ماااااااااااا أظن شهرين...
| |
|
|
|
|
|
|
|
|
Re: السفارة دي جنت ول شنو ؟ (Re: أبو الحسين)
|
والحق يقال :
الازدحام في كل المواقع يحدث الربكة والتأخير ، وخلال الأشهر الماضية شهدت السفارة إزدحاما منقطع النظير وأكيد عانى المراجعين وعاني أيضا الموظفين .
حدث أنني راجعت السفارة في العام 2012م لتجديد جوازي وجواز أم العيال وكانت المفاجأة منذ أن تعتبت بوابة السفارة وحتى خروجي أخذ من وقتي عشرة دقائق فقط .
وحدث أنني جلست من السابعة والنصف صباحا إلى الخامسة مساء لاستخراج الجواز الالكتروني ، وكما وصى شيخ العرب ، عليكم التجنب الحضور في بداية الأسبوع ونهايته .
بالجد في ناس بتشتغل وتنجز ..............
| |
|
|
|
|
|
|
|
|
|
Re: السفارة دي جنت ول شنو ؟ (Re: Mohamed Yassin Khalifa)
|
Quote: ود البوش دفعتا ليهم كم؟
ولييه شهرين؟
حالتو عاملينو بمكنة!
|
دفعت 530 ريال رسوم الجواز جواز الهنود عشرة سنين بمية ريال
282 ريال ضريبة
ابقن ليهم باربحا وعقاب شهر
وحكاية شهرين دي ما عارف سرها شنو يا محمد اخوي
وهذا مع التحية والاحترام اخي محمد يس خليفة
| |
|
|
|
|
|
|
|
|
|
Re: السفارة دي جنت ول شنو ؟ (Re: ولياب)
|
| Quote: عليكم تجنب الحضور في بداية الأسبوع ونهايته |
هي دي الرسالة القصدت اوصلها للناس الساكنين في الرياض
ليتيحو الفرصة للناس البجو من خارج الرياض في بداية الأسبوع ونهايته عشان ما نتزاحم كلنا في ضُلُف
شكرا استاذي ولياب لمرورك الكريم
مع التحية وكل عام وانتم بخير
| |
|
|
|
|
|
|
|
|
 Re: السفارة دي جنت ول شنو ؟ (Re: أبو الحسين)
|
| Quote: لكن تقريرك ناقص ماااااااااا عرجت علي بوفيه حبيبنا ود الباوقة وفولُو البقى طااااااااااااااعم داك... |
يا مراحب الزعيم أبو الحسين
كلامك دا وقفتا فيهو كتير خلاس والحكاية دي اظنها ملعوبة
قول لي كيف ؟
بعد طق طرق كل الإجراءات اكتملت زي الصاروخ
قت انمشي افطر وانا طالع لاقاني واحد صاحبي اسمو طبيز ههههههههه
حلفت عليهو افطر معاي كرامة وسلامة ساهي
قت لبتاع بوفيه ود الباوقة ادينا تلاتة سندوتشات فول .... عشان للضمان طبيز دا ما مضمون واتنين كردكي
واديتو خمسين ريال رجع لي الباقي لقيتو واحد وأربعين ريال قلت البوفيه دا برضو جن ول شنو ؟
كلمت طبيز وقال لي الحكاية دي فيها ملعوبية وبكون ود الباوقة عامل ليك كمين
لكن برضو تبا له عشان ما اجيني هنا كع كرع والدحيشة عنفضت
لكن النصيحة انا جاي زول لبع ولابس طاقية حمرا وعيوني ذاتن حمر
قلت الليلة يا هم يا انا يا الجواز يا اللوري ادردق بينا كلنا اودينا ود الماجدي
| |
|
|
|
|
|
|
|
|
|
Re: السفارة دي جنت ول شنو ؟ (Re: aosman)
|
| Quote: انا غايتو ما مصدقك |
والله يا الحبيب عثمان ليك الحق ما تصدقني
لانو انا ذاتي الشفت بعيني ما مصدق لكن دا الحصل
وبرضو حسنة ولازم نعترف بيها ونقولها امكن تستمر
| |
|
|
|
|
|
|
|
|
|
Re: السفارة دي جنت ول شنو ؟ (Re: Basamat Alsheikh)
|
Quote: انا بذات نفسي قبال سنة ونصف طلعت جواز السفر ( القديم) في واشنطن
في يوم واحد |
كلامك صاح يا بسمات بخصوص الجواز القديم وهنا برضو كان بطلع في نفس اليوم
ولكن هذا الجواز الالكتروني وما ادراك ما الالكتروني وفي جدة حصل ما حصل فيهو من مشاكل اظنك ما كنتي متابعة الحاصل
كان لو جيت لجواز الكتروني بدقوك عديل كدا وكان الناس بنوموا في القنصلية عديل كدا الواحد ياخد دقتو واشيل جوازو ابكي في بيتو
لانو لو بكيت في القنصلية بدقوك تاني عشان نحن اصلنا متعودين ندق الشافع الببكي عشان اسكت
اها انا مشيت زول دق ساهي قلت اخد دقتي واشيل جوازي اكان القى ليك الناس تتبسم اتقول نحن في سفارة موروتانيا
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالعزيز الفاضلابى)
|
Quote: ههههههه ــــ كدى الـ نَوَقِّعك فى شر أعمالك
ممكن تحكى لينا حكاية عبدالله الطيب دى؟
|
هههههههههههههه
حلاة لِق لِق عشان بقع ليك انا يا الفاضلابي ونحن في حضرة بسمات بت ابونا الشيخ عبدالرحيم
وان كان نحن لسنا اكثر تهذيبا من من الأستاذ عبدالله الطيب ولكنه كان منفعلا نكاية بالشوش
ووقتها بنت سكسون لسانا لسع ما انطلق سمح وتنطق التلفون تفلون والجزمة جمزة وهكذا الخ الخ
فنطقتها بما هو معلوم وقال الأستاذ قولته الشهيرة أصبتي حين أخطأتي يا بنت سكسون
دا كلو عشان ما اعود كيبوري على الهوبان يا الرضعان فوق الصرار
وهذا مع كل الود
| |
|
|
|
|
|
|
|
|
|
Re: السفارة دي جنت ول شنو ؟ (Re: اسامه العريفي)
|
Quote: عليك الله يا ود البوش رد علي بتاع الضهاري ده
قال جيت الرياض ونزلت في شقة مفروشة ليهم حق
يعملوا فيك كده |
هو كان بتاع ضهاري اصلي يا العريفي كان قال عوووووووووووك سلامة سلامة حضروا الكرامة انا جيتكم رامياني الجبنة
لكن طلع بتاع حلاوة جكسا ساهي
| |
|
|
|
|
|
|
|
|
|
Re: السفارة دي جنت ول شنو ؟ (Re: محمد البشرى الخضر)
|
| Quote: لحقتها يا ود البوش في آخر لحظة, الليلة كان امنجي وكوز و انتهازي ما تديك الدرب |
لا لا يا ود البشرى انا ما خايف من زول
ولا تابع لزول في الدنيا دي كلها
ولافي زول اقدر أقول لي تلات التلاتة كم
لكن بس عشان مافي كوز اجي هنا اغني لي يا رحل الكحل الفيهو موازنو تقيل
| |
|
|
|
|
|
|
|
|
|
Re: السفارة دي جنت ول شنو ؟ (Re: حامد بدري)
|
| Quote: ليك غلت في البيانات ويكتبوك عبدالاله |
قايلني بدفع ليهم رسوم دبل زيك يا أبو قروشن كتار لمن تسكن شقة مفروشة ونحن جنبك
علي الليمان والرحمن ما عندك خوة ولا عندك عشرة بتعريفة
لكن البركة في حجة الحاجة وكل عام وانتم بخير لكن الفيك اتعرفت
| |
|
|
|
|
|
|
|
|
|
Re: السفارة دي جنت ول شنو ؟ (Re: اسامة الامام)
|
Quote: قصتك دي ذكرتني قصة مشهورة
لمقطوعة الطارئ سودانير
|
وقصتك دي يا أسامة ذكرتني قصة موظف معانا كل يوم بجي متأخر وما بهمو اقطعوا من ماهيتو واتعود علي كدا
يوم جا بدري
المدير قاليهو عافية نعل ما عندك عوجة ؟
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
هلا ود البوش ... سلام
حسبتها صااح يا نجييض ..
وخليت زحمة الصيف تنتهي .. والناس كلها قضت ..
ولقيت السفاره فاااضيه ... وخلصت في نص ساعه ..
وياريت كمان .. لو كان ادوك الجواز في نفس اليوم ... عشان تكون ماشه معاك باسطه ...
ونحن لا نبخس الناس اشياؤهم ... والصراحه ناس السفاره متعاونين جدا لو لقت الناس منظمه ..
فالتحية لهم ...
انا قبل اسبوعين .. حصل معااي موقف مع السفاره ..
عندي رضيعه ومطلع ليها جواز اخدر وصلاحيتو حتى 25/11/2015
اها الجوازات السعوديه رفضوا منحها تاشيرة خروج وعوده لان النظام لازم تكون صلاحية الجواز 3 شهور ..
ضربت لصديق في السفاره .. قال لي رسل الجواز ... ورسلتو بال دي اتش ال ( لانني في الدمام )
وتاني يوم كان الجواز مجدد لغاية مايو 2016 .. وبدون رسوم ..
فالشكر لهم ..
تحياتي ,,
| |
|
|
|
|
|
|
|
|
|
Re: السفارة دي جنت ول شنو ؟ (Re: محمد العامري)
|
Quote:
قايلني بدفع ليهم رسوم دبل زيك يا أبو قروشن كتار لمن تسكن شقة مفروشة ونحن جنبك
علي الليمان والرحمن ما عندك خوة ولا عندك عشرة بتعريفة
لكن البركة في حجة الحاجة وكل عام وانتم بخير لكن الفيك اتعرفت |
وحات الله عندك حق ماعندي عذر
اها التالتة ثابتة
| |
|
|
|
|
|
|
|
|
|
Re: السفارة دي جنت ول شنو ؟ (Re: محمد العامري)
|
| Quote: يابوش الناس كاشفنك، ومابيني جيهتك عديل كده قالوا أحسن نخارج الزول بدري بدري |
النصيحة انا بتاع كواريك لمن ادخل الجيهات الحكومية مرات بتخارجني الكواريك ومرات بتغتس حجري
اظنها امس ظبطت لكن انشوف ود الفكي نشى الليلة ياريت اجي انورنا بالحاصل
هذا مع التحية والاشتياق محمد العامري
| |
|
|
|
|
|
|
|
|
|
Re: السفارة دي جنت ول شنو ؟ (Re: محمد مجيدو)
|
Quote: حسبتها صااح يا نجييض ..
وخليت زحمة الصيف تنتهي .. والناس كلها قضت ..
ولقيت السفاره فاااضيه ... وخلصت في نص ساعه ..
|
مجيدو يا مجيدو النصيح حديدو
النجاضة ورثناها من كبارنا نجضونا نجاض لمن حرقنا حريق
ولكننا ما عرفنا ننجض عيالنا
.
.
ايوة دا الحصل تقريبا
وهذا مع التحية والاشتياق
| |
|
|
|
|
|
|
|
|
|
Re: السفارة دي جنت ول شنو ؟ (Re: حامد بدري)
|
عبد الله ود البوش والحكي الطاعم
والتفاصيل الصغيرة الجميلة والشاهي باللبن
وتكرار القصص أصلاً ... ما ورانا شئ ...
روائي شعبي من الطراز الأول يقول لتوفيق الحكيم وينك وين
أحمد الشايقي
| |
|
|
|
|
|
|
|
|
 Re: السفارة دي جنت ول شنو ؟ (Re: أحمد الشايقي)
|
| Quote: روائي شعبي من الطراز الأول يقول لتوفيق الحكيم وينك وين |
كلامك دا يا احمد الشايقي كان ذكرني قصة الزول السايق تيس ضعيف رابطو بدلقان ميت موديهو السوق ابيعو
بعد ما رجع من السوق تلاتة مرات مافي زول قاليهو تلت التلاتة كم
اليوم داك اول مرة اجيهو زول وقاليهو التيس دا ادوك فيهو كم ؟
الزول قبل لغادي قصاد الهوا وبزق سفتو وقاليهو ادوني فوقو تلاتة تالاف
التيس خت يدو فوق خشمو وضحك لكن معاها نحنحة عشان لايفشل صاحبو هههههههههه
.
.
الله اجبر بخاطرك يا احمد الشايقي الحبيب
وجنس كلامك دا برضو بذكرني قصة القعونجات التلاتة والرجال العشرة البلهاء هههههههه الرجال العشرة البلهاء دي جات قافية ساهي
وبالمناسبة تكرار القصص دا موروث سقافي ههههههههه زمان لا تلفزيون ولا تلفون إياها قصص ود ام بلعوا وترب البنية
واب لماس أهلنا كل يوم اكرروها لينا وكاننا نسمعها اول مرة
اها قاليك القعونجات التلاتة وقعن في حفرة وقرب باظ الروصيرص افجخن وبرضو باظ الروصيرص دي جملة اعتراضية طرطشة ساهي
وحلاة ونسة معاك ساهي
اها بعد القعونجات التلاتة يا سيد اللمنتي ليك وقعن في الحفرة وغلبتن الطلعة برة
القعونج ببرا بضحك عليهن غييغ غييييييييييييغ غاااااااااااغ موتن موتكن ساهي يا لديحات ما بتسمعن الكلام مشيتن براكن وقعتن في الحفرة
اليأس أصاب قعونجتين وماتن من الخوف والياس بحكم انو باقي القونج قاليهن مافي طريقة استنن موتكن قبلكن
ولكن القعوجة التالتة كانت مصرة تطلع وبذلت جهدا كبيرا ومن اجل الجهود المبذولة طلعت بره بسلام
استغربن القعونجات الفوق وقالن ليها غريبة كيف طلعتي ونحن كنا بنقول مستحيل تطلعوا
قالت ليهن انا اضاني تقيلة وكنت فاكراكم بشجعوا في عشان اطلع عشان كدا كنت مصرة ما اخذلكم
.
.
وهكذا وهكذا الخ الخ الخ
شكرا أيها الجميل
| |
|
|
|
|
|
|
|
|
|
Re: السفارة دي جنت ول شنو ؟ (Re: حامد بدري)
|
| Quote: ايو خطا ضربة جزاء طوالي والعجب اورنيك خمستاشر الالكتروني مافيو تعديل تدفع نرفع ماتدفع تاكل نارك |
دا كلام بقولوهو لزول مستنير زيك كدا
انا بمشي ليهم في شكل زول عميكة لكة ما بعرف اتفاهم
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
وقصتك دي يا أسامة ذكرتني قصة موظف معانا كل يوم بجي متأخر وما بهمو اقطعوا من ماهيتو واتعود علي كدا
يوم جا بدري
المدير قاليهو عافية نعل ما عندك عوجة ؟
.........,,,,,,,,,,,,,,,,,,,,,,,,,,,,,,,..........
اوسكار يا ود البوش...
ولمن تستلم الجواز الالكتروني بعد شهرين ادينا خبر... لاني متوقعة ان ناس السفارة ديل حيخذلوك
ويسلموك الجواز شهر 3 سنة 2016م بدل شهر 12 سنة 2015م بحجة ان شهر 12 آخر السنة
ومشغولين بتقفيل الحسابات في وزارة الداخلية .. وفي اول السنة الجديدة مشغولين بفتح الحسابات الجديدة
والتجهيز للانتخابات....
والله يديك الصحة والعافية
| |
|
|
|
|
|
|
|
|
|
Re: السفارة دي جنت ول شنو ؟ (Re: اميرة السيد)
|
سلام للجميع و
غايتو يا ود البوش اجمل ما في حكايتك دي طريقة الحكي والمفردات الفكهة ,
وكلو كوم ووليدك الفالح القال عليها ( سفالة ).
غايتو المرة الجاية لو سوقتوا معاك بتلقوا نفسكم في بيت اشباح تحت ساس السفالة ( حيث لا يخلو جحر الضبع من عظم) !
ولن يشفع لكما لا البوست لا صغر سن الوليد !!
ست البنات.
| |
|
|
|
|
|
|
|
|
|
Re: السفارة دي جنت ول شنو ؟ (Re: ست البنات)
|
ست البنات وست الناس جت عليهم
مرورك وحده هنا محل احتفاء وتقدير
مع التحية والاحترام
Quote: غايتو يا ود البوش اجمل ما في حكايتك دي طريقة الحكي والمفردات الفكهة ,
|
وماتنسي باقي الموضوع كلو سخرية وهلم جرا
.
.
Quote: وكلو كوم ووليدك الفالح القال عليها ( سفالة ).
|
نطقها هكذا ببراءة الأطفال وقد كان صادقا حين اخطأ لكن اسع تيا دي نطقها صحيحا حين أخطأ
| Quote: غايتو المرة الجاية لو سوقتوا معاك بتلقوا نفسكم في بيت اشباح تحت ساس السفالة |
وانتوا تنددوا وتشجبوا وتعملوا ساين اوت وتاكلو البتيخ الساقط
المابجيب لينا عمودو مليان سلات ورغيف وباسطة لا بينو لابينو بعد نمرق
| |
|
|
|
|
|
|
|
|
|
Re: السفارة دي جنت ول شنو ؟ (Re: اميرة السيد)
|
اميرتنا اميرة بت السيد
سلام وشوق شديد
Quote: ولمن تستلم الجواز الالكتروني بعد شهرين ادينا خبر... لاني متوقعة ان ناس السفارة ديل حيخذلوك
ويسلموك الجواز شهر 3 سنة 2016م بدل شهر 12 سنة 2015م |
وانا متوقع بعد شهر بس وامكن اقل من كدا اها شنو ليك دقش ول ما دقش ؟
ودي فرصة للسفالة بسم الله السفارة تثبت ليكم يا ناس أمريكا نحن برضو اطورنا خالص خالص
وهذا مع التحية والاحترام وأيضا كذلك الود الذي نعلمين مع تحياتي لبت عبدالرحيم
| |
|
|
|
|
|
|
|
|
|
Re: السفارة دي جنت ول شنو ؟ (Re: عبدالله ود البوش)
|
| Quote: يا ود البوش اديت دورك على الوجه الاكمل خاصة واننا قبايل حوار واندغام وثاب |
فيصل من نواحي الفيس بوك
عليك الله كلمن لي كان بتعرف ليهم درب خليني اخد لي اندغامة اندغامتين ول وثبة وثبتين تلاتة اطلع وجع النوايط المعسمني دا
لحدي دي الوكتي مافي زول اشتغل بي الشغلة
يا حليلي انا كنت قايل السفارة بتقرا كلامي دا واقولوا لي تعال اخد ليك اندغامة بملاح لوبا ساكت ان شا ء الله
كنت متوقعم اجيبوني في التلفزيون واعمل ليهم دعاية تسليم الجواز السريع
واغني ليهم اغنية بايدي عمل حقننا امل والرقم وصل مليون سجم رماد
الله لا كسبن ولا غزا فيهم بركة
بركة من جعل محمد نبي
بس ادوني جوازي دا وخلوني اشوف لي غراب اجزو
| |
|
|
|
|
|
|
| |
عبدالله ود البوش
اباذر عبد العال
علي محمد الفكي
اسامة الامام
حامد بدري
محمد البشرى الخضر
اسامه العريفي
عبدالعزيز الفاضلابى
محمد حمزة الحسين
aosman
معاوية المدير
أبو الحسين
ولياب
Mohamed Yassin Khalifa
محمد مجيدو
ابو جهينة
مني عمسيب
ست البنات
فيس بوك
تويتر
انستقرام
يوتيوب
بنتيريست