دعواتكم لزميلنا المفكر د.الباقر العفيف بالشفاء العاجل
|
|
 أبوذر بابكر..حالة إستثنائية ..وموضوع دراسة ..!!
|
02:02 PM Apr, 01 2015
سودانيز اون لاين
عمر الفاروق-
مكتبتى فى سودانيزاونلاين
الزول ده حالة إستثنائية ..تحتاج دراسة ..وبتحتاج الناس تقيف عندها ..
عن نفسي من زمان بقول الزول ده أحسن زول بيكتب في سودانيز ..
ولو ما أخاف الكضب مرة قلت أبوذر أحسسسن زول بيختار عنوان البوست ..
زمان كنت بعيب عليهو إنو بيكتب موضوعه كلللو مرة واحدة فبيطلع طوييل فبيقومو معظم الناس ممكن يزهجو من تتمة الموضوع ..لكن كمان كتابة أبو ذر بتسوقك لدرجة إنك بتكلفت السطر البتقرا فيهو عشان تنط للسطر البعدو ..
للأمانة كتابتي للموضوع ده هي دعوة لمناقشة الظاهرة الإسمها أبوذر ده أكتر من إنو بوست بغرض الشكر وكسّير التلج ..
النقاش المرة دي بصراحة من جانب دخلتني فيهو خوفة من ما يكتب اباذر ومن الإسلوب البيستخدمه ..وعليه ح أشركك معاي يا أباذر في إنك تنتشلني من المخاوف دي..
إقتباسك من القران الكريم !!!
دي النقطة المجهجهاني صراحة ..مكيييفاني شديييد ومخوفاني شديييد ..
واضح جداً من خلال كل ما تكتب طيلة هذه السنوات إنك زول دارس للقرأن أو حافظ ليهو بصورة ممتازة.. ما حا أنظر وأقول التربية الصوفية ظاهرة فيك وفي إسلوبك زي ما بيكرر كلو السودانيين في جميع محافلهم إنهم صوفيين لكن صراحة في حالتك إنت فهي ظاااهرة من خلال ما تكتب..
النص الأخير القريتو ليك بتاع إنا أعطيناك النيل قريتو بمتعة وإندهاش ما بعدو متعة ..لكن والله يا اباذر وانا بقرة قلبي إنقبض كده ومسكتني خوفة ..فججججأة كده ..لاوزت ووقفت ..يا ربي أسة البيسوي فيهو ابوذر ده صاح؟؟ لدرجة إني شطحت ودخلت في قصة يا ربي حلال ولا حرام !! :)
ما تتخلع يا حبوب ..ما دخلني شك تجاه ما تكتب ولا تجاه أفكارك ..الشك دخلني مني انا وانا بستمتتع بالكتابة الجمييييلة دي..
النص بتاع النيل ده فعل فيني فعايلو والله يا اباذر كوني محب جددداً للنيل ووالله يا اباذر ما حصل مشيت إجاز السودان وما مشيت قعدت في النيل برااااي في حتة كده بتاعت تأمل وإستنشاق هوا النيل ..الغريبة بسرح وجواي بيتردد نفس كلامك الإنت كتبتو ده لكن طبعاً انا بيغلبني أعبر زييك كده لكن والله ياها الحوارات الداخلية الجواي..
فدحين يا حبوب ويا باقي الاعضاء عشان ما أنداح وأسرح وأطلع من موضوعي الأساسي انا عايز أخدك كحالة إستثنائية يتم تشريح ما تكتب في المنبر من ناس المنبر ديل..
وبرضو تفيدني في قصة إقتباسك من القرأن لدرجة تقارب للتطابق دي وضعها شنو من الإعراب ..
معليش يا صاحب ورطّتك معاي وختيتك تحت المجهر وانا عارفك زول ما بتحب الأضواء والفلاشات ..
بالمناسبة المحيّر برضو إنو ابوذر في الرياضة وفي الفن أخطر من في الثقافة ..
تخريمة :
عن نفسي إنا أعطيناك النيل دي مفروض تتحول لي رواية ..وبصراااحة كتابة أفضل مليون مرة من الحاجات البتفوز بي جوائز ناس شوق الدرويش وما عارف شنو كده جائزة الطيب صالح..
|
|
  
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
لا حولاااااااااااااااااا
عمر ! الفاروق !؟
ما بصدق ...
أجري يا دينا خالد .. صاحبك فك طريق أساسي واخد الطريق من ابوذر
يازول طريق أبوذر ده طريق زلق ما بتقدر عليهو
استمتع إنت بالدهشة ، واسكت ..
واللهيا عمر إنت مشروع بتاع زول كويس ، لكن أهلنا بيقولوا : خسّرت جلدا يبقى سقو
لكن يمكن غلب عليك الكتاب وطفقت تعمل بعمل أهل الجنة ..
ما بخلي البوست ده نهائي .. ده بوست لازم يستمر حتى بعد الأرشفة
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: Hololy)
|
Hololy
اقسم بالله الواحد امتلأ فرحا وزهوا
وازداد وسامة كمان
ما فضل لى الا امرق الشارع
زى زول استاذنا دكتور بشرى الفاضل داك
البخلى الناس يتغزلو فيهو
فيا صديقى
حياك الخالق وزاد روحك اخضرارا وجمالا
وسقى ايامك بمدرار العافية وهميم السعد
وشكرا بلا حد
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: ودقاسم)
|
ازيك يا ود قاسم
صباحاتك انسام
ولحظاتك فرح وانغام
عمر ده يا ود قاسم مش مشروع زول كويس وبس
الزول ده زى ما قال اخونا حيدر
من فاكهة الدنيا الحلوة
مش فى المنبر هنا وبس
قول مثلا كده "تفاح اخدر"
حاجة حلوة وشهية وشكلها جميل ومفيدة وكله
يكون فى زول مثلا برضو
ما بحب التفاح اللخدر ده
ولا حتى اللحمر كمان
لكين بحب البرتكان وبموت فيهو
هههههههه
وهكذا دواليك
انتو دواليك دى عندها علاقة بالدواليب او الدلاليك ؟
والله يا ود قاسم كنت عايز اقول لى كلام كتير جدا عن عمر الفاروق
لكن اكيد لو قلته هسه بقولو عشان هو كتر خيره فتح ليهو دكان عنى أنا
عشان كده نخليهو وقت تانى
لكن عموما
هو زول كويس والله
كويس خالس
بس كيف الزول يكلمه ويحاول يحس بيهو
زى ما قال محمد ميرغنى
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
عارف يا عمر
الواحد زى فجأة كده حس انه زى الزول الكويس
الاحساس ده ما قاعد يجينى كتير والله
غاين
كان فى واحد من اهلك العرب زمان قبل الإسلام اسمه
حاجب بن زرارة التميمى
زول مسلط جدا
القصه انه كسرى عظيم الفرس وفى قمة عز الفرس وسلطانهم
كسرى قام منع اهل حاجب ده من منطقة معينة فى العراق
قام حاجب مشى عشان يقابل كسرى ويشوف الفهم شنو
المهم زولنا وصل قصر كسرى والجماعة وقفوه بره على بال ما كسرى يأذن ليه بالدخول
جا الحارس وقال ل حاجب كسرى قال ليك انت سيد العرب ؟
قال ليه لا ما سيد العرب
مشى وتانى رجع قال ليه انت سيد قبيلتك ؟
قال ليه لا ما سيد قبيلتى
تانى برضو مشى ورجع قال ليه طيب ياخ انت سيد اهلك وبيتك ؟
قال ليه ولا دى كمان برضو
المهم كسرى لما زهج منه قال ليهم نادو الزول ده النشوف موضوعه شنو
لما دخل على كسرى سأله قال ليه انت منو يا زول ؟
حاجب بن زرارة قال ليه
أنا سيد العرب
الله، طيب ياخ نحن ما سالناك قلنا ليك انت سيد العرب
قلت لا انا ما سيد العرب
حاجب بن زرارة رد وقال ل كسرى
قبيل ما كنت سيد العرب
لكن هسه وبعد ما دخلت عليك واتشرفت بحضرتك
بقيت سيد العرب
قال ليك يا فاروق كسرى ده نط على حيله وقرب يدردق بالواطا
طبعا الوصف ده بعد سودنة كلام شيخنا بن عبد ربه فى العقد الفريد
كسرى اتهجم وقال لجماعته
املو خشمه در و لؤلؤ ودهب لامن يفضل
فا شنو
عليك امان الله انا، هذا العبد الفقير الى رحمة مولاه، لا استثنائى ولا موضوع دراسة
لكين بقيت كده بعد نضميك ده
شكرا يا كسرى عظيم المنبر
بجى تانى اتم ليك النضمى
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
نتشارك ؟
انت عايز تورطنى عارفك
ذكرتنى حكاية عشه الفلاتيه مع ابو داود
لما قال ليها عندنا صندوق تعالى ادخلى معانا
وعشه ابت
هههههههههه
لكين خلينى النوريك موضوع الإقتباس من القرآن الكريم
أو الشى الإنت سميته اقتباس، وهو ما اقتباس طبعا بالمعنى البلاغى البيانى
القصة ببساطة يا عمر فى الخصوص ده كما يلى
طالما نحن بنكتب بالعربية، وابلغ ما فى اللغة العجيبة دى هو القرآن الكريم
وغير كده هو كلام الله ربنا
انا بحاول اقلد كلام الله
فى احسن واجمل واعلى وارفع من كلام ربنا ؟
مافى طبعا
اشيل تعابيره ومعانيه ومفرداته وتراكيبه
اسرقها واستعملها زى ما انا عاوز ولا زول بسالنى مافى
مش بتلقى الناس كل واحد بقلد الزول الشايف انه نموذج بالنسبة ليه فى المجال المعين ؟
بس الفكرة كده
القرآن الكريم فيه لغة رفيعة وبيان عجيب والله يا عمر
وكل ما تتمعن فيه تكتشف اشياء جديدة كل مره
بالنسبة للصوفية
النوريك طيب
الشيخ أحمد ارباب العقائد الورد ذطره فى الكتابة دى
والعدى من توتى وقعد وعمل الخرتوم دى
هو جدى أنا
ايوه جدى عديل كده
لحم ودم من جيهة والد الوالده
لأنه ولده، الشيخ محمد الأمين صاحب القبة الظاهرة مقابر البشاقرة غرب على شارع مدنى الخرطوم
هو جد الوالدة من جيهة ابوها
ثم
الشيخ حياتى حاج حمد العربى
راجل الصقيعة
الراوى الكبير والمجيد وشاعر اجمل مدائح النبى الأكرم
هو عم الوالدة برضو
تانى شنو يا ربى
عاين
عايز حاجة قبل ما امشى ؟
هههههه
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: أبوذر بابكر)
|
المشكلة في صحبة عمر واساسي من جهة
وصحبة عمر ودينا خالد من جهة
ومعادلة ملخبطة كده عشان يدخل فيها ابوذر
ياخ لو ابوذر ده بقى صاحب هناي داك أنا تاني ما بقرأ ليهو حرف
موش لو كتب إنا أعطيناك لو كتب إنا أنطيناك ذاتو
تاني ياعمر بقول ليك إنت ممكن تبقى زول كويس ، بس ، خلي بالك من بس دي
أول حاجة الحاجات الما قدرك ما تحاول تتشعلق ليها ، زي محاولة نقدك لأبوذر
تاني حاجة الناس الما سمحين ما تصاحبهم زي صحبتك مع فلان داك
تالت حاجة ما تدعي إنك صاحب اي بت من بنات البورد لأنك إنت فاتح بوست بالجهة التانية ضدهم
الحاجات دي خلي بالك منها ولو اتذكرت حاجة تاني بجيك .. وما تعمل فيها صاحبي وما تحاول تحيدني
ما بخليك إن بقيت حي .. إنت قايل دي للحب بس ، للاحب أيضا ..
حبك برص
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عبدالحفيظ ابوسن)
|
يا ود اب سن
ان شاء الله يا بت عمنا احمد تجيبى ولد بإذن واحد أحد
وكان جا ولد
يا سميهو محمد شمس الفلاح يا محمد تاج الأصفياء
ده كان جزء من الحوار بين الوالده الله يديها العافية والعمر الطويل
وبين اعمامها ابناء الشيخ حياتى وابناء اخيه الشيخ المبارك
كانو فى زيارة لأهلهم فى ودراوة والعيدج
والولد الجاى ده هو العبد لله أنا
وللأسف ما كان لى نصيب فى الإسمين
لا شمس الفلاح ولا تاج الأصفياء
نحن صلتنا يا عبد الحفيظ من جيهة جدنا أب الوالده
وهو بن عم الشيخ حياتى واخوانه الشيخ المبارك والشيخ المختار
واكيد بنفرح بيك ونفخر لما انت تطلع قريبنا ومن اهلنا
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: ودقاسم)
|
ود قاسم..
جيب لي حتة وااااحدة ادتك احساس اني عايز اصاحبك واحييدك دي..
وما طالبني حليفة بقطع تذكرة بييي ليلي ده اجي ابوس راسك من فوق لييي اخمص رجليك..اها قصرت معاك؟
لكن شكلك انت بتنقل ما يشعر به عقلك الباطن وبدون ما تشعر بتسقطه علي الواقع..
كدي قول بسم الله واشرب سحلب وادمدم نوم..النومة بتريحك السهر مع الكبر ما كويس انت لسة مشوارك طويل مع الرطوبة والموية البيضا والذي منو ..
النقطة المهمة شديد يا ود قاسم..طووول عمري ما قاعد انتظر زول يقييمني سواء سلب او ايجاب..انا ادرى بي نفسي تماااما كان كويس ولا كعب..ما تفتكر اني من النوع البنتظر يثني علي زول ...
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
نرجع لي ود قاسم..
مش قلت ليك المرة الفاتت انو لو في تلاتة انفار كتابين في المنبر فاساسي واحد منهم؟
اها المنبر ده لو فيو خمسة انفار ضكرانين والزول يفتخر بانه صحابهم فاساسي جوووة الجك في الخمسة ديل..
كونو الزول ده قلبو اباك وما صاحبك فدي ما مشكلتي..
لكن اوعدك بتوسط ليك اساسي بسمع كلامي وبقدرو..
بس انت خليك جاهز عشان لمن يوافق يصاحبك تقالدو وتبكي..
| |
|
|
|
|
|
|
|
|
الكاتب الروائي حبيب نورة هنا ؟
أهل ومرحب بالكاتب الروائي
......
يا روحي حرام عيك ...
أنا الحار في دواي حُكمة وأطباء
....
| |
|
|
|
|
|
|
|
|
|
Re: أبوططذر بابكر..حالة إستثنائية ..وموضوع دراسة (Re: أبوذر بابكر)
|
Quote: اشيل تعابيره ومعانيه ومفرداته وتراكيبه
اسرقها واستعملها زى ما انا عاوز ولا زول بسالنى مافى |
قصدك مافى قانون يشكمك ؟ ولا حقوق مؤلف ؟
ولا حق ترتيل ولا الارغام على اضغام بغنه ؟
لو محكمة فى الدنيا مافى الحساب يوم العدل يا ابو زر
لما تعرف انو كان احسن ليك محكمة امبدة ياشين ...
------------
السورى قالوا ليهو يوم القيامة عينك دى تشهد عليك
واضانك ويدك تقول سويت وسويت ورجلك
تقول كنت بمشى وبمشى وانفك ووووو
قال ليهم خليهم يروحوا يحرق (.....) يومهم .. وانا عم بدافع عن مييين ؟ لووووووب ..
| |
|
|
|
|
|
|
|
|
 Re: أبوذر بابكر..حالة إستثنائية ..وموضوع درا (Re: يحي قباني)
|
الشاعر أبو ذر بابكر : كاتب تعشقه اللغة
يظل المثقفون والمبدعون في إهمال تام ، وأصحاب الإثارة بكلمة أو كلمتين يستأثرون بالاهتمام ، الموضوعات التي تهدف الإضافة الحقيقية للمعارف ، تظل بعيدة عن اهتمام العامة من أعضاء المنتدى وأيضاً عامة القراء .
للشعر تاريخ ، ومراحل وتقنيات ، وتطوير . مرت عليه الحداثة بكل ألوانها . وكان النقد كمرادف لتطور الشعر كائن موجود ، وكانت كتب وأسفار عربية منذ ألف عام تتحدث عن النحل في الشعر ، والتقليد والاقتباس والسرقة ، وتم الحديث عن الركاكة والفخامة والجزالة والبساطة والتقليد ، والشعر الذي بلا روح وبلا عاطفة متأججة .
وشاعر مثل الأستاذ أبو ذر يحتاج منصة عامرة بتحليل رؤاه الشعرية ، في مدارس النقد الشعري ، الذي نحن أحوج إليه . ولكني ما وجدت من تجاسر على ذلك ، ربما من عدم الاهتمام ، أو عدم التخصص ، فالراي في الشعر على بساطته يُعطي مؤشر حول القصيدة وانعكاسها في واقع القراء.
أنا بعيد عن نقد الشعر ، لأنه مجال صعب ، ولكن ألا يوجد ناقد للشعر في عضوية أكثر من 10 آلاف عضو في سودانيزأونلاين ، فهي قضية كُبرى ، خاصة وأن الشعر العربي يدرس في كافة مراحل الدراسة الأولية وفي الثانويات !!!
أبوذر شاعر فخم ، في حاجة ليتعرف على أثر شعره في القراء .
الشكر الجزيل لمُبتدر الملف فقد أصاب أيما إصابة في اختياره .
*
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع درا (Re: عبدالله الشقليني)
|
Quote: أول حاجة الحاجات الما قدرك ما تحاول تتشعلق ليها ، زي محاولة نقدك لأبوذر
تاني حاجة الناس الما سمحين ما تصاحبهم زي صحبتك مع فلان داك
تالت حاجة ما تدعي إنك صاحب اي بت من بنات البورد لأنك إنت فاتح بوست بالجهة التانية ضدهم
الحاجات دي خلي بالك منها ولو اتذكرت حاجة تاني بجيك .. وما تعمل فيها صاحبي وما تحاول تحيدني
ما بخليك إن بقيت حي .. إنت قايل دي للحب بس ، للاحب أيضا ..
حبك برص |
اخونا ود قاسم سلام
ياخي عمرنا ده من الناس الحلوة جدا في المنبر ، ومافي ناقد بتولد ناقد من يومو رغم ان عمر لم يدعي المامه بالنقد ، ولا بتسلبط في صحوبية الناس
صدقني تناولوا لابداعات ابوذر بطريقتو المعهودة حاجة مفروض نعلي من شأنها لا نقلل منها لانها بتساعد في لفت الانتباه لكتابات ابوذر وليس العكس
اجمل النقد ما كان قائم على محبة وهذا دأب عمر دائما .. وانا بالجد بتابع كمحب بس بوستات ابوذر واكتفي بالاعجاب ... عمر فاتنا في الحاجة دي وفتح بوست كمان
زوجة انشتاين سألوها مرة ما ذا تعرفي عن نظرية النسبية بتاعة راجلك دي .. قالت تكفيني عشرتو و معرفتو ... قوموا لفو بلا نسبية بلا خرابيط معاكم .. او كما قالت
تحية لعمر ولابوذر وليك كمان
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع درا (Re: عمر الفاروق)
|
عبد الله يا شقليني ..
لمثل قولك والله إبتدرت البوست ..
انا متأكد الناس البتقرا أبوذر كتييرة ومن غير الاعضاء حتى ..
البوست محاولة شجاعة منّي لي إنو الناس تجي تفضفض عن مكنوناتها بعد تقرا للزول ده ..لأني متأكد إنو الناس جواها شي عايزة تقولو وما قادرة منهم البيكون ملاوز ومنهم البيكون مكسل ومنهم البيقول خليها للأيام ..
ويكفيني جداً واحدة من نجاحات البوست إنو جاب زول زييك عشان ده نوع الكلام الانا عايز أسمعو ..مش بس ناس تشكّر ابو ذر نوووو ..ناس تقول رأيها فيما يكتب وتدي إنطباعها ..فالرجل في نظري ظاهرة منبرية تحتاج الوقوف عندها..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع درا (Re: عمر الفاروق)
|
أنت الذي أسمت أمك (حيدرا)..
إزيييك يا صاحب ..
أها زي كلامك ده بيتوّر العصبي للزول فياخ الدنيا صباح رووق :) :)
ود قاسم عدو لنجاح الاخرين وواضح إنو فيو خصلة ما حبابا ..خصلة الجكس زاااتو خلّاها اللي هي الغيرة ..ياخ زول يغير منك لمجرد إنو أساسي صاحبك وما صاحبو هو ..أها هو أسة إستكتر علي الإشادة الحتجي من إفتراع البوست ده وبيكون في سرّو بيقول يارييتني لو الكنت فتحت البوست ده انا ..
أسة هو خايف جداً إنو ابوذر ظاااطو يطلع صاحبي وتلقاو أسة ردود ابوذر العني فوق دي عاملة ليهو حيرقان في الأوورطي بتاعو ..
انا أخدت عهد على نفسي وأديت ودقاسم وعد إنو أعيد ليهو بريقه المنبري السابق و أخليهو ينعنش وينتعش بالحياة لأنو واضح جداً الراجل أصابه الملل حاله حال أي مغترب بيرجع السودان مستصحب معاهو وداعات الناس الكانو معاو هناك وهم يكيلو ليهو عبارات المدح والإعجاب وذكر المحاسن ثم بالاحتفاء بإستقبال الناس المشتاقة ليو في السودان .. بيعيش الإحساس الجميل ده لمدة شهرين ثم بعدذلك تطير السكرة وتأتي الفكرة فينفضّ سامر الناس وتنقطع أخبار ورسائل اصدقاء الغربة لينتبه بعد ذلك لل (قاب) الحاصل ليو في التواصل مع الاخرين فلا الجيران هم الجيران ولا ناس الحلة هم ناس الحلة ولا أصحاب العمل هم أصحاب العمل
والأخطر إنو بيكتشف إنو لغتو ما بتشبه لغة الناس الحولو حينها يكتشف إنو بقا بلا قيمة ..انا متأكد ود قاسم من السابقون ونحن اللاحقون عشان كده قادر أفهم نفسياته وبحاول بقدر المستطاع أنتشله من الإحساس البايخ ده عسى ولعل بعدين لمن كمان انا أرجع السودان ألقا البينتشلني ويقيف معاي ..
ما تخاف يا ودقاسم سأعيدك سيرتك الأولى ثم أتركك في حال سبيلك تقول العايز تقولو ..
وأهو ماشين كويس الأسبوع الفات ده بس أكتر من 49 عضو بقو يجيبو سيرتك وإسمك ..صاح مقرون بي إسمي لكن العافية درجات شوية شوية
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع درا (Re: عمر الفاروق)
|
سلام
معظم النصوص القريتها هنا لي ابوذر يا عمر فيها سحر، وبتشدك وبتخليك تقراها بي رهبة، يمكن لي الاستدلال والإشارة والإقتباس من القرآن زي ما إنت قلت
ونفس الشي دا زمان كان حبيب نورا بستخدمو ــ زمان لأنو بقى متكاسل حالياً من الكتابة في المنبر ـــ ويخليك مجهجه ما بين المتعة والرهبة
في انتظار من يفض الاشتباك أعلاه
نقداً زي ما قال الأستاذ الشقليني
ويدينا الإذن بالإبحار في لجج كتابات أبوذر دون رهبة
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع درا (Re: عبدالله الشقليني)
|
عبد الله
والقول ما أتى به الشقلينى
وكأنما طلع قمر أزرق من بين سدف الزمان وثنايا المكان
أطل وهو يبشر أن
من زاره الطيف الشقلينى فهو آمن
ومن تفيأ ظله المديد فهو سعيد
وليت قومى يعرفون
ليتهم يفقهون حديثك يا شقلينى
فوالله ما جئنا الى هنا والى غير هنا سعيا وراء نوال
إن هو إلا محض بذل لا نبتغى منه عطاءا ولا جزاء
فهو حبر يخرج من صلب المحبة وترائب الرغبة فى الوصال
نودعه المقام هنا عله يستطيل ويثمر ويكون فيه بعض خير للناس
وبعض جمال، هكذا نتمنى دوما
أما اذا وجد العناية، نقدا وقراءة وتمعنا وبحثا لإدراك مواضع الخلل ورتقها
ولملاحظة مواقع الحسن، إن وجد، تشجيعا ودفعا
فهذا غاية الأمل ومبتغى الرجاء
حياك الخالق يا سيدى
فإنك قد سربلتنا بما هو اوسع منا
لكنه منحك الجزيل ومتحك الهميل
فلك اسمى التقدير و اعمق الود
ولك السلام
| |
|
|
|
|
|
|
|
|
|
Re: أبوططذر بابكر..حالة إستثنائية ..وموضوع درا (Re: دينا خالد)
|
يا دينا
انتى كمان ما تحكيها شديد كده لغاية ما
تطلع الرحيق
اخير لى محكمة هناك
بلقى لى شفيع
وبالعدم بستعمل "الجوكر" عشان اتفك من الورطة القياماويه
وبرضو كان لاقيتك هناك
بجيبك شاهده
واكون انونى براى فى سرى
يا دينا ابقى لى شاهد على نار
الخ الخ الخ
المهم بتصرف
ههههههههههههه
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
عارفك يا عمر
لما تمسك فى حاجة
عشان كده وقبل ما تتوكر لى جوه
النوريك حكاية الإقتباس من القرآن دى
عارفها عامله ليك شوشره
وعشان اريحك منها وتاخد راحتك تماما
طيب
حكم الإقتباس من القرآن، وبإجماع المذاهب كلها تقريبا
جبته ليك من الموسوعة
وحكم الاقتباس من القرآن أو السنة في الشعر الجوازُ إذا استعمل في معنى شريف، وفي مقام رفيع
ويكون محظوراً إذا جاء في معرض الهزل أو السخرية أو لَبس حقٍ بباطل ونحو ذلك
كما يجب مراعاة اللفظ المقتبَس عند إيراده في أي سياق بحيث لا يُوقِع السامعَ في فهم يخالف دلالتَه
ده الإقتباس
لكن الأهم من كده شنو
انه زى الشى الأنا بعمل فيه ده اصلا هو ما اقتباس
ولو بالغ يمكن يكون قريب من شى اسمه
الإقتباس غير المباشر أو التضمين
لأنه تعريف الاقتباس هو
أن يضمّن المتكلمُ منثورَه، أو منظومه، شيئاً من القرآن، أو الحديث، على وجه لا يشعر بأنه منهما فلو أسند الكلام المقتبس إلى الله تعالى أو إلى الرسول صلى الله عليه وسلم فلا يسمى اقتباساً.
وأما التضمين فقيل هو الاقتباس نفسه والمشهور التفريق بينهما، فالتضمين هو أن يضمِّن الشاعرُ كلامَه شيئاً من مشهور شعر الغير مع التنبيه عليه إن لم يكن مشهوراً لدى نقّاد الشعر.
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: أبوذر بابكر)
|
ود أبسن ..
النصيييحة قرابتك بي ابوذر بتجيب البغر (والبقر)..
لكن دي ما فطفطة ردود بس لأنو إنت كلامك موجه لي أبوذر فانا ما إتشوبرت ..
لاحظ برضو ما رديت لي يحى لأنو برضو موجه كلامو لي دينا ..
انا ما من أنصار عبارات شكراً للمرور وطلّتك أبهجتني ..وحضورك أسعدني ووو ..وما بستخدما إلا مضطر ..
أها إنتو من الناس الما أظن أضطر ليكم لأنو ما أظن بتكتبو عشان بس يردّو ليكم ..عشان كد رخيتكم :)
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
تمام يا أباذر .. ح أتلّب من الحتة دي لأنو كمان صعب أطلق على البتكتبو ده مجاراة بإفتراض إنو وكما تفضلت إنو ده ما إقتباس ..
عارف انا الكان بيلاوز بي شنو ؟ قصة أبو جهل (حسب ما درسونا) وإنو حاول يحاكي نسق القرأن وقرأ مجارياً سورة الفيل تقريباً ..
أها انا لمن لقيت أبو جهل وأبوذر النصيييحة لاوزت :) :) :) :) :) (دي ساي ما جادي فيها سمح؟ )
بالمناسبة سؤالي كان برضو من منظور إيجابي عشان أفهم فلسفتك من القصة دي لأنو الإختيار للكلمات في ح ذاته موهبة ..علماً بأنو المصحف متاح للجميع و ممكن يكون الزول بيقراهو يومي لكن بيجي ماشي فيهو فووووكده وما بيقيف ويتدبّر..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
والله يا عمر انا شكلى كده فشلت فى حكاية الردود دى
ما قادر انظم الموضوع كويس
وما قادر برضو اتبين ارد وين وما ارد وين
عشان كده قررت ارد واسلم على اى زول هنا
عايز اقول ليك شنو
فى شى انت ما عارفه طبعا بخصوص الإقتباسات المتكررة من القرآن الكريم
وهو انى ما زول متدين
مسلم عادى جدا وما حافظ كتير من سور القرآن
يمكن عشان اصلا ملكة الحفظ دى ما عندى
وزمان فى المدرسة ما بجلدونى الا فى الحفظ بس
لكن قاعد اقرا القرآن كتير جدا
شى جميل بالجد والله
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: حيدر حسن ميرغني)
|
يا خال ..
سودانيز أون لاين ده فرصة لا تعوض..التلج ده لي قدام بيفيدك..يعني زي أبوذر ده ساكن في جدة أها تقوم يوم تقول تمشي عمرة نزلتك من المطار كده تضرب ليهو وتقول ليهو أسمع انا عمر بتاع البوست داك تتذكرني؟؟ بس عايز أمشي مكة لو في طريقة مرني ..
والعجب كان لحقت كسرت ليك ICE ..أوووو أوو أووو..تلج الناس القاعدة عند الخواجات ديل أقققل شي بتطلع منو بي لوتري..
أسة انا الفترة الجاية عايز أركز مع ناس حيدر ديل شرق اسيا دي ما جربناها لحدي أسة ..
أسة إنت زاااتك يا خال لو كنت بضمن أطلع منك بي حاجة كان بذلت ليك ثلوج لمن تحتار ..لكن عااارفك لاحقني وممكن عاادي بعد البوست البكتبو تضرب لي تقول لي دييني 700 ريال .. :)
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
شايقك مجتهد كتير في إيجاد علاقات قرابة وصداقة مع عدد من الناس
قلان صاحبي وفلان خالي
وعايز تتوسط كمان
ده طبعا غير سعيك للتقرب من أبوذر .. وهو يستحق ...
غايتو دي محاولة جادة منك للحاق بالأنسنة
أنا شخصيا ما بصاحبك ولا بصاحب أصحابك
يمكن أتنازل شوية مه صاحباتك عشان اصلا عندي مساحة واسعة للمرأة
وطبعا دي إنت بتفتقدها
أنا ما حاسدك ، لكن واجبي كزول كبير لازم أنصحك وأوريك الشغلة البتقدر عليها من الما بتقدر عليها
عليك الله يا عمر خلي البوست ده - ما دام اتورطت فيهو - يبقى نضيف من وساخاتك المكررة
عشان الناس تكتب لينا عن أبوذر ، وعن حبهم ليهو .. خاصة الناس الجميلين زي المهندس عبدالله الشقليني
اوعى تقول لي الزول ده صاحبك ، اصلا أنا بعرف أصحابو كلهم
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: ودقاسم)
|
العم محمد عبد الباقي..:
أوولاً بالتبادي جيت تووشك قلت
| Quote: ، لكن أهلنا بيقولوا : خسّرت جلدا يبقى سقو |
ثم جيت قلت
Quote: ما بخليك إن بقيت حي .. إنت قايل دي للحب بس ، للاحب أيضا ..
حبك برص |
ثم فجججعتن كده تكتب :
| Quote: يبقى نضيف من وساخاتك المكررة |
أجججي يا أخواني ..!!!
أسة ده يسموهو شنو؟؟
خرفك كعب يا محمد عبد الباقي..
براااك تجي توسخ المكان وبعد داك يغلبك القعاد فيو !!!
ذكرتني نكات زمااان ديك بتاعت كان في حسني ومبارك ونميري قامو مشو مصر قام نميري في الطريق سأل مبارك نحن وين؟ قال ليهو نحن "فسينا"..فقال نميري شماها اللي فساها.. تيتي هاااي هااي هاااي..
أها إنت براك العرفت الوساخة دي لأنك براااك العملتها ..انا كل البعملو برجع ليك بضاعتك ..أو كما تقول الأعراب بضاعتك ردّت إليك..
يا عمنا محمد عبد الباقي صحوبية شنو تاني الليك للبنات؟؟ يا زول إنت بعد ده زول الأردن ساااي أبقا مارق بس وجرّ التبروقة وقول يا الله ..
إنت وصلت مرحلة في المواصلات ممكن واحدة من موظفات وزارة المالية الشغالات من سنة 84 لابسة توبا الأبيض وقاعدة في بص الوالي لو جيت إنت ركبت بتقيف ليك ومعاها تعال أقعد هنا يا عمي..
كان تصاحبن ما بعرفو ليك ..
عمي محمد عبد الباقي ..دي سنة 2015 !! تسارع الزمن ما ينسيكوتبقا زي الناس البيقولو اثناء الونسة والله الكلام ده حصل قريييب ده سنة تسعين ..وهو لا يدري أن سنة 90 ليها الان 25 سنة ..فما بالك بي سنو 80 وسنة 70 وسنة 60 و سنة 50 وفي رواية سنة 40..
قال أصاحبن قال..
أجججي يااا البرقش ..
بري منكم يا رجال الزمن ده ..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: ودقاسم)
|
إزيكم ..
أنا من المعجبين شديد بكتابات أبا ذر الله لا يحرمنا منه ..
و لعمر الفاروق الورد و النرجس و الكادي ..
ـ
ود قاسم
السلام عليكم ..
ما أقراه في مداخلاتك بيديني إحساس إنه عمر دة زي الختاها ليك في ( فؤادك )، و ربما أداك بالحتة الفيها الحديدة ..
أستغفر و قول بسم الله ياخي و ورينا الحاصل شنو ؟؟
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عصام دهب)
|
ياعصام دهب إنت زمان حاولت تكبّر راس اساسي
وهسة بتحاول تكبّر راس عمر
وأنا عايز اقول ليك والله الاتنين ديل ما عندهم خوّة
ولا منّهم فايدة
المهم أنا ما داير أخليك محايد أو تجي في صفي
لكن أحسن ليك تشوف ليك ناسا فيهم خير
وده عملا لله لأني ما عشمان في خوّتك
بس ممكن يوم تتذكر نصيحتي دي وتقول ياريت .. ياريييييت
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
الخيلان
عمر و ود قاسم
الخيلان دى كده صاح ؟
جايه من خال
هههههههههههه
مع انه شكلكم ممتع وظريف
لكين يا ود قاسم حقو تخلى عمر ده هسه
ياخ أنا اول مره القى لى زول يقول على كويس
خلينى التستمتع باللحظات دى
الله اعلم تانى تتكرر متين
الكلام ده شوفتى ليهو زمان ايام المدرسة
كنت لامن اجى الأول أو التالت
الغريبة ما حصل جيت التانى كلو كلو
كان بحتفل بى الوالد الله يرحمه
وباقى الناس، خصوصا المكجننى وشامنى، بقولو لى
ها اتا ما شاطر
لكين المعاك بس بليدين
هههههههههههههههه
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: ابو جهينة)
|
صديقي الصدوق عصام دهب..
ما عارف لكن باقي لي عمنا محمد عبد الباقي قصة صحبتي ليك دي ما حتزعلو بعد كلامك الأخير ده..حيخليك أنت وأساسي كهاتين .. ثم أشار للأوسطى من اليدين الإتنين ..
دهب ياخ انت عااارف جدعاتك دي بتضحكني وبترييحني في كنكوجي فياخ خف علينا :)
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
والله يا أبو جهينة ده حالي زمان مع بوستات أبوذر ..بيغلبني الكلام ومتّع روحي بي الدهشة ..لكن غلبني النصييحة و أبوذر كتترا شدييد الصراحة فما قدرت أتحمل أكتر من كده..
وعلى نفسها جنت براقش وبت خالتا وأولاد جيرانا ..فعليه أن يتحمّل هذا الحب من البورداب..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
الغريبة يا أبا ذر انا أصصصلو ما حصل جيت الأول..
أول أمبارح أصحابي الصغار محمد وصلاح سألوني بابا إنت كنت بتجي الأول؟؟
قلت ليهم نهااائي ..جيت التاني مرة واحدة والتالت كتيير..
ثم جال في خاطري كيف أن كللل السودانيين بيقولوا ليك نحن زمان كنا شطّار وبنجي الأوائل للدرجة التي جعلتني أسأل وييين الطيش داك ؟؟
بعدين يا حبوب تذكّر وحسب الراوي في سودانيز إني من المكروهين وعليه فشكري لك خصماً عليك فتريّث يا صاحب ..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
نعم أبو ذر رجل له أسلوب متفرد في الكتابة
أسلوب خاص به
بصمة خاصة به ، و ( البصمة ) الخاصة بكل فرد هى الخاصية التي يفتقدها السودانيون ( إلا قليلاً ) ...
فقد قلت في غير موضع أننا شعب ينقصه الخيال المبدع الخلاق ......
ونحب على الدوام ( اللعب على المضمون ) .... ونهوى السير في الطريق ( المجرب ) حتى لو إختلفت الأسباب المحيطة به ... إذ أن ما ينفع ( س ) من الناس لا يعني بالضرورة أن ينفع ( ص ) حتى ولو تشابهت ظروفهما ...
لذلك ( تتشابه ) كل أشيائنا .... سيارات ومنازل ... وأكل ... ولبس ... وهوايات ....ولغة............
والحال هكذا
يكون للإحتفاء به معنى وقيمة
أقول هذا والصدق يلزمني أن أقول أنني لم أجد نفسي متفقاً مع بعض أطروحاته وآرائه لكنني حمدت له ( أسلوب ) عرضه لأشيائه....
أما عن الصديق عمر الفاروق
أقول غير هياب أنني من أشد القارئين لبوستاته ومداخلاته وليس هذا بجديد فقد ذكرت أكثر من مرة أنه من ( أشجع ) الأقلام و( يجهر ) بما ( يهمس ) به الآخرون .....
لكنني لم أجده في هذا البوست ..." وش البامية مااااااااااا ياهو "
رأيته مثل الكابتن عزالدين الدحيش في خانة ( الثيردباك )
فكرة ومساحة هذا البوست من ( إحتفاء ) وربما ( شكر ومجاملة المتداخلين ) ليست هى المساحة والميدان التي يجيد عمر تقديم ( تابلوهاته ) المثيرة فيها
يتجلى عمر الفاروق في مساحة ( الشناف ) ........
ويتجلى عمر الفاروق في مساحة تقديم الرأى المخالف ......
الخصائص الشخصية التي وهبها له الله تعالى من شجاعة وجرأة لقول ما يراه حقاً ومعارفه المكتسبة ولغته البسيطة غير المتكلفة تجعله أقرب لعقول وقلوب المتابعين للحوارات .....
وللأمانة فقد كان مقنعاً لحد كبير في كل ( كجاراته ) .... على الأقل لى أنا ....
ولعلها مناسبة طيبة لأقول له فيها أنني تابعت ( بدافع من إعجابي المذكور أعلاه ) تابعت بعض حواراته في الفيسبوك ( خاصة مع العزيزة سمارت ومريم الحسين ) وأيضاً كان ..." وش البامية مااااااااااا ياهو "
ربما لأن فاروقنا عمر مثل الكابتن علي قاقارين يحتاج لمساحات طويلة ليركض قبل تسجيل الهدف..... والفيسبوك يحتاج لمهارة الكابتن كمال عبدالوهاب في المحاورة ......
______________
ثم
تحياتي وسلامات
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عاطف عمر)
|
واطاتنا أصبحت !!
أو أخشى ما أخشاه يا عملات "تأمل" ..
أن يكون هذا البوست باكورة بوستات عمر الفاروق في النقد الأدبي بعد الفراغ من النقد الكروي والفني/الغنائي ..
المهم
البوست جميل وشيق .. وأبوذر حالة إستثنائية في هذا البورد بالتأكيد ..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: محمد حيدر المشرف)
|
حبيبنا عاطف ..
أبصم بالعشرة وأصادق علي كلامك في عمومه..بس في نقطة بخالفك فيها بدون استرسل..كتاباتي في الفيس لأسمارت ومريم.. دي خستكات ساي ما تركز فيها شديد..
فيما يتعلق بالبوست ده فالغرض الاساااسي هو لفت الانتباه ولو انو متاكد الناس منتبهة لي اباذر لكن عايز اشجع الناس تتحرر وتكتب عن الزول ده..لأنك زي ما قلت انا ما بجيد اللعب في المنطقة دي..
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
هو رجل ضلالي ... فكل صورة محدثة يرسمها بحرفه.. لا توافق كتاب السابقين ولا سنة المحدثين ضلالة
وكل ضلالاته أنه يزاوج بين حروف برباط محرم في قوانين التشبيه والبلاغة.. وكم من مرة يتّم برعم الدهشة
بإيلاجه وإيراده لتصاوير وضعت على سور صين رصين أحاطت به جاذبية لم يقدر عليها صاحب التفاحة.
وهو رجل مخادع... فالمشهد الذي تتصور أنه سوف يأتيك، لن تجده، وإنما يقودك إلى منتجع آخر تتعرى فيه
الكلمات عن ملابسها الرسمية، وترتدى ما هو أجمل .. ثم تبحث عن عرى واثقة للربط، لتجدها إنها قد افلتت
تجوب مهابط قدر لها أن تعبر إليها ...
في النهاية هو ... غفاري الهوى ... ونسيج وحده
لقد أقحل لنا مكاناً في جحانين البورد ... وسكن إليكم ها هنا
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عبد العزيز محمد عمر)
|
تعرف يا عمر زمان كان كورتنا سمحة لامن كان في مكتشفي نجوم يوكل اليهم أختيار اللاعبين أمثال الكابتن محمد بابكر الله يمد في ايامه . مكتشف منتخب الشباب جيل الراحل مرتضى الجنيد الله يرحمه وهيثم مصطفى وهيثم كمال وحمد كمال .. فكان نتاج أكتشافاته منتخب أوصلنا الى مصاف الكبار ولعب السودان في نهايات كأس العالم للشباب في ايطاليا ..
وكانت كتباتنا سمحة لامن كان في أمثال علي المك والحسين الحسن ..أذكر في مطلع التسعينات ونحن طلاب في جامعة الجزيرة زارنا الراحل علي المك وعمل ندوة عن أغاني الحقيبة بصحبة الفنان المبدع والزميل المهندس سعد بنا .. وقسما بالله حببنا في الحقيبة وفي ناس عتيق وود الرضي وسيد عبد العزيز وبقية العقد الفريد .كان يتناول موضوع ويذكر الأغنيات التي تطرقت له .وفي أثناء الحديث يقطع حديثه بعد آهة طويلة يقول لسعد البنا ( يا سعد ما تسمعنا ليها ياخ ) كانت ليلة لا تدري أيهما أكثر طربا الحديث أم الغناء ..
الآن تحس أن حياتنا أتلفها السماسرة الذين غزوا كل شئ وانزوى ذوي الأختصاص فأصبح كل شئ ذو صبغة تجارية فلا الفن يطرب ولا الأدب يؤدب .
فعلا نحن نحتاج مختصين يتمتعون بحس راقي من أمثال علي المك ومحمد بابكر يقولون لنا ماذا نقرأ وماذا نسمع ومن يجب أن يكون في منتخبنا القومي ولماذا ؟
أنا شخصيا أستبشرت خيرا ببوست عمر هذا وهذه القدره الهائلة التي يظهرها في كل مرة يقتحم فيها باب ليس من الأبواب المسكوت عنها كما يقال .. بل أبواب سهلة ومتاقية لكن نحن نتخطاها سهوا نبحث عن التعقيد عند أبو رزة وأبو طبلة وأبو ضبة ..
شكرا لك وشكرا لأبي ذر وهذا بالتأكيد أرقى كرت دعوة تلقيته هذا الأسبوع .
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
درديري يا كباشي..
طبعاً انا الشي الوحيد البعرفو وبقرا عنو وبتجدع فيهو الكورة عشان كده خلّيني اصلحك حبة في حاجة ما ضرورية بس للعلم..الفريق البتتكلم عنو هو جيل عاكف عطا وعقيد وخالد المصطفى وإبراهومة وكومي (طبعاً وليد المبارك ماف زول بيعرفو :) ..) وده كان منتخب للناشئين لاحقاً سموهو أولاد ماسا ناس هيثم وحمد جو بعدهم ..
المهم دي حاجة عرضية كده عشان ده الأتو حقي فقلت أحتتو :)
بالنسبة للسمارة والتهجم فياخ يكفيك مثال إنو تعرف زول إسمو هيثم كابو بقا يكتب في الرياضة ..وزول إسمو مزمل أبو القاسم بقا يكتب في السياسة ويمتلك جريدة ..زول إسمو معتصم محمود بقا عامل فيها بحب الهلال أكتر من أسيادو وزولة إسمها فاطنة الصادق عاملة فيها صحفية ..
تخيّل لو أبو ذر ده مثلاً مسك جريدة حكايات وبقا يكتب فيها عمود بدل هيثم كابو ...
تفتكر شكل إلعامنا كان حيكون عامل كيف؟
| |
|
|
|
|
|
|
|
|
|
Re: أبوذر بابكر..حالة إستثنائية ..وموضوع دراسة (Re: عمر الفاروق)
|
من أبوذر بابكر
"طبعا المذيعة ما بتعرف حكاية الأسماء الخمسة ديك عشان كده بدل تقول من أبى ذر بتقول من أبوذر
شغل واسطات ساى"
هههههههههههه
المهم
من أبوذر بابكر بودراوة يهدى الفرحة الى عاطف عمر بزحل والى درديرى كباشى بعطارد وعبد العزيز محمد بنبتون
مع اجمل الأمنيات
الأيام دى يا عمر أنا نفسياتى فى السماء التاسعة
ما عشان المديح والعظمة الأنا فيها دى حاليا
دى سببت لحضرتنا فرح وزهو كتير كترة شديدة
لكن عشان بقينا فايتين المدريداب ب أربعة نقاط
اكرر اربعة نقاط ما تلاتة، بتفرق كتير طبعا لو كانت ترتة نقاط
وغير كده السبب التانى انه سواريز "أب عضة" سلك ودخل الفورمة خلاص مع انى قربت اكجنه
زى ابراهيموفيتش زمان لما جانا
يعنى هسه بعد مثلث برمودا الخطير ده "ميسى + سواريز + نيمار" تانى مافى زول بقدر علينا
برشلونيه دهمشية
يا عين يا عنيه
يا كافره يا نصارنيه
ههههههههههههه
نسيت اقول ليك
قود مورنغ
| |
|
|
|
|
|
|
|
عمر الفاروق
ودقاسم
Hololy
أبوذر بابكر
عبدالحفيظ ابوسن
حبيب نورة
عبدالله الشقليني
دينا خالد
يحي قباني
حيدر حسن ميرغني
ياسر منصور عثمان
ابو جهينة
عاطف عمر
محمد حيدر المشرف
فيس بوك
تويتر
انستقرام
يوتيوب
بنتيريست