فنتازيا الغاز

نعى اليم ...... سودانيز اون لاين دوت كم تحتسب الزميل معاوية التوم محمد طه فى رحمه الله
الاستاذ معاوية التوم في ذمة الله
رابطة الاعلاميين بالسعودية تحتسب الاعلامي معاوية التوم محمد طه
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 09-12-2018, 10:59 PM الصفحة الرئيسية

مدخل أرشيف للعام 2015م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
18-03-2015, 05:57 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


فنتازيا الغاز

    05:57 AM Mar, 18 2015
    سودانيز اون لاين
    درديري كباشي-
    مكتبتى فى سودانيزاونلاين



    (1)
    جلست في طرف محل الغاز تتوسط شقيقاتها مطخمة بالغاز تحمد في سيدها وتنتظر دورها وتقول في نفسها يا ترى الى أين هذه المرة .. تتمنى لو تركت يومين ثلاثة لترتاح قليلا محتفظة بغازها في بطنها .. الشعور بالشبع شعور جميل ونبيل .المرة الأخيرة كانت مأموريتها عند رامي الطعمية الذي قضى على نفسها في خلال يومين فقط .. وظل كل ربع ساعة يطرق بطنها بالكمشة ليتأكد أنها لازالت بخير ..
    وكانت وصلته مع الموقد قصيرة جعلتها قريبة من النار لدرجة كادت أن تنفجر فيه تضيعه هو وطعميته وتضيع معهما . حاولت تنبيهه تقول له يا راجل أبعدنا شوية من النار .. لكن بأي صوت أو بأي لغة تحدث هذا الغبي .. جات سليمة والحمد لله استطاع أن يفرغ بطنها خلال يومين,أعادها للمحل من جديد . كانت أصعب يومين طيلة عمرها المديد والحديد .
    تتمنى لو أن مأموريتها القادمة تكون في بيت عزابة .. كل يوم تدور شكلتهم فيمن عليه الدور في الطبخ في الآخر يتصالحوا على كبسة من المطعم ويتركوها مرتاحة .. لو بالغوا يشعلوا منها فحم الشيشة و براد الشاي . تظل شهر تتمتع فيه بالنوم والبطن الممتلئة .
    تتمى الآ تقع في يد عروس شابة فرحانة ببيتها الجديد وانفرادها بالمطبخ طيلة النهار تتابع برامج الطبخ في التلفزيون وتطبق في النظريات . تعجن وتخمج وترمي في الزبالة ..
    أخخخ جبنا سيرة القط وجا ينط ..أهو عريس لازالت باقي الحناء في يديه .
    يتبع
                   |Articles |News |مقالات |بيانات

18-03-2015, 05:58 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: فنتازيا الغاز (Re: درديري كباشي)

    فنتازيا الغاز (2)
    - العريس دا الظاهر عليه يفتش فيك يا الناعمة .
    - أخخخ دا الخايفة منه من قبيل يا خالتي مطرقعة .
    - أنا من زمان أقول ليك أتدردقي في الواطة دي أطرقعي أتملي زيت أتوسخي . ما بتسمعي كلام الأكبر منك . شابكاني قوامي وبشرتي وجني وجن الوساخة أها خمي وصري .
    - لكن أسوي شنو يا خالتي مطرقعة أنا بكره الوساخة وما بحب بشرتي تتشوه بالطرقعة عايزة أكون نضيفة ولا معة .
    - ما كلنا كنا شباب زيك عاجبنا لونا البرتقالي اللامع وبشرتنا الناعمة .. لكن أتدقشنا في الدنيا دي من مطعم لبيت عرس لبيت صدقة .. أنا القدامك دي حتى بيوت الخمرة والعرقي دخلتها واشتغلت فيها .
    - أجي ديل كمان بقوا يستعملوا الغاز ؟
    - ما لازم يتطوروا زي باقي الناس ومال يجيبوا فحم من وين هو الزمن دا فيه فحم ؟.
    - طيب أنا ملاحظة أنت حتى طلوعك نادر وحتى لامن تطلعي بتروحي أما بيت عزابة أو بيت ناس كبار بالكتير يعملوا شوربة وشاي .
    - ما دا لكلام الأنا بقول فيه من قبيل . ديل ناس ما بيهم الشكل ولا خايين هدودمهم تتوسخ ..أما العزابة ديل بيجو تلاتة عشان يشيلوا انبوبة واحدة أكيد ما ممكن توسخ ملابسهم مهما كانت وسخانة لآنهم بيتشايلوها بيناتهم . عايزة ترتاحي لازم تكوني مشوهة .. شوفي أنا آخر أمبوبة تطلع من المحل دا . الا الانابيب كلها تتوزع أو تكون في أزمة غاز وأفضل أنا وشبهي والناس يشيلونا بغيظ وعايزننا متين نفضى عشان يرجعونا .. لكن تكوني نضيفة كدا يشيلك عريس جديد زي الجايي علينا دا ..عشان خايف على هدومه الجديدة ولسان عروسه الجديدة .. ويفضلوا هو وعروسته يصوتوا فيك الليل والناهر .. هي بالنهار تقول ليه عايزة أعمل ليك كفتة بازنجان الله خلقنا ما سمعنا بيها . .وتخمج ليها حاجة ما بتتأكل وتترمي في الزبالة .. هو يجي بالليل يقول ليها عايز أعمل ليك بيض بالطعمية .. وهاك يا خمج .. يكون عندهم باقي لعب وأمهاتهم زمان حارمنهم من دخول المطبخ يجوا يتفشوه فينا .
    - اووب علي يا خالتي مطرقعة شيلتيني هم .أهو دا جايي علي عديل ..
    - ما بوصيك أتدردقي اسمعيني الطرقعة مهمة والظليت يرجى منه .
    - عايز لي حبة نضيفة يا عم جلابيتي جديدة ما عايزها تتوسخ .
    - أتفضل شيل ديك القاعدة جمب المطرقعة ديك .

    يتبع
                   |Articles |News |مقالات |بيانات

18-03-2015, 07:00 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: فنتازيا الغاز (Re: درديري كباشي)

    فنتازيا الغاز
    3
    حمل العريس الانبوبة بعد ما شمر جلبابه وحملها مبتعده عن جسمه قدر الأمكان بصورة أثارت غيظ الناعمة وكادت تنهره لو تستطيع .. يعني هو اختارني من بين عشرات الانابيب عشان نظافتي وأناقتي طيب باعدني من جسمه ليه ؟.. خايف أعاديه ؟ المهم فتح شنطة السيارة والغى بها داخلا بعنف حتى صدمت بجسم معدني أكيد هو مفتاح العجل .صدر منها صوت أشبه بالصرخة .. وحظيت بأول طقعة تحدث في جسدها الناعم .. كادت تبكي وتنفجر .. ولو كان لها يد لفتحت صنبورها وأفرغت الغاز عن بطنها حتى تدفعه ثمن هذه الغلطة .. وهذا العنف غير المبرر .
    أخخخ حسدوك يا الناعمة أكيد دي عين الما بتتسمى الشينة المصدية الما بتشبه الأنابيب .. وحتى قيادة العريس للسيارة بعنف في المطبات كأنه مستعجل لأمر ما .. تدحرجت في صندوق السيارة هنا وهناك جيئة وذهابا .وأحتكت بمفتاح العجل أكثر من مرة كأن بينهما ثأر . كان يخدشها بغيظ وغل في كل مرة تقترب منه .. هوأنت يا مفتاح ما عندك ولايا ؟.. ولا هو دا التحرش البيقولوه .. بري منك .
    أخيرا شعرت بأن السيارة توقفت وفتحت الشنطة تناولها العريس قبل أن ينزلها وردته مكالمة أستمعت لها معه .
    - جبت الغاز يا حبيبي ؟
    - أيوا يا روحي وصلت أهو .
    - أوعى تشيلها تقيلة عليك دردقها في الواطة لغاية ما تصل سلم العمارة .
    ( يدردقوك في الشوك انشاء الله .. شوف الدلوعة الما بفتفهم دي .. حقيقة الما بيعرف للصقر يشويه )
    - لا يا حبيبيتي بقدر أشيلها عادي ما تقيلة شديد .
    ( تسلم أنت يا بطل . خليها تفهم حاجة .)
    يتبع
                   |Articles |News |مقالات |بيانات

18-03-2015, 08:56 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: فنتازيا الغاز (Re: درديري كباشي)

    فنتازيا الغاز
    4
    حمل العريس الأنبوبة بكلتا يديه وهو يعض جلبابه بأسنانه .. صعد بها سلم العمارة مما جعل السرور يتسلل الى دواخلها شعرت بأنها مدللة لأول مرة . بصورة كادت أن تجعلها تغير رأيها في العرسان الجدد لولا أنها تعرف ما ينتظرها بالداخل ..
    - سجمي يا حبيبي شايلها براك قصت ضهرك دي الله يازاها .
    ( الله يا زاك أنت شوف زي دي بالله . هي أنبوبة غاز عايزة ناس الحلة يشيلوها معاه ؟ غايتو جنس أنانية هسع كان شالها هي كانت بقت تضحك بدلال وقلة أدب مع أنها أتقل مني بخمسة مرات )
    - خليني أجي أشيلها معاك .
    - لا لا لا انت تبعدي خالص ممكن تكوني حامل ولا حاجة .
    - هي هي هي حامل شنو أنت متفائل خلاص نحن يداب لينا شهرين ؟
    - ماله طيب الحمل دا ما بيحصل في ثواني ؟
    - أنشاء الله يسمع منك ربنا يكون ولد حلو زيك كدا ؟
    - ليه ما تكون أمورة حلوة زي أمها كدا ؟
    - هي هي هي خجلتني لكن ؟
    ( خجلك ؟ هو أنت بتخجلي زحي ليه من الطريق خليه يدخلنا جوة )
    - ما قلتي لي أنت الغاز عايزاها ليه شنو ؟
    - أجي كيف كمان عايزاه لشنو ؟
    - لا لأنه الانبوبة الأولى لسع ما قطعت طوالي قلتي لي غيرها .
    - لأنه عندي شغل كتير عندي مفاجأة خايفة تقطع لي ؟
    - مافاجأة شنو كمان ؟
    - حا تكون مفاجأة كيف لو حكيتها ليك .
    - أديني بس فكرة عن الموضوع ؟
    - طيب بكرة يوم شنو ؟
    - يوم الخميس .
    - لا قصدي يوم كم
    - يوم تسعتاشر مارس
    - طيب التاريخ دا ما بيعني ليك حاجة ؟
    - ما عارف يوم المرأة العالمي ؟
    - مرأة شنو كمان أنت عاوز تغيظني .
    - ليه أنت ما مرأة ؟
    - طيب أحتفل به أنا ليه ما تحتفل به الدولة ولا المنظمات ؟
    - طيب في شنو يا روحي .؟
    - بكرة ما عيد ميلادك يا حبيبي أنت ناسي ؟
    - عبد ميلادي ؟ .. أول مرة أعرف أنه عندي عيد ميلاد .
    - أجي كيف الكلام دا أنت ما عارف نفسك مولود في تسعتاشر مارس ؟
    - لا عارف طبعا لكن ما قايل في حاجة أسمها عيد ميلاد كنت فاكر الحاجات دي للاطفال فقط .
    - كيف ؟ .. تاني يا حبيبي عيد ميلادك دا هو عيدي أنا الأول في كل سنة .
    - الله يخليك لي يا روحي .
    ( كذابة ما تخمك ساي علي باليمين بعد سنتين ما بتتذكر فطورك . كدي زحي كدا من الطريق خلي الراجل دا يدخلنا جوة ننجمة شوية ونستعد لخمجك وسهر الليل )
    يتبع
                   |Articles |News |مقالات |بيانات

18-03-2015, 02:10 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: فنتازيا الغاز (Re: درديري كباشي)

    .
                   |Articles |News |مقالات |بيانات

18-03-2015, 03:28 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: فنتازيا الغاز (Re: درديري كباشي)

    فنتازيا الغاز
    5
    كأن العروس حست بململة الأنبوبة من الانتظار فتنحت له الطريق معاتبة نفسها .
    - سجمي يا حبيب أنت لسع شايل الداهية دي قطعت قلبك كان تختها في الأرض.
    ( ما من كلامك الكتير دا أنا زاتي يدي قربت تتلمخ )
    - خايفها تخرب الموكيت لكن ما مشكلة يا روحي زحي من الطريق ندخلها المطبخ .
    - حاضر يا روحي ... ما كان تخليني اتشايلها معاك .
    ( بلا لبط معاك أنت لو كنتي عايزة تشيلي كان دخلتي يدك )
    - لكن هي ذاتها ما شاء الله أنبوبة جديدة تقول عارفننا عرسان جداد .. اليشوفها يقول عليها علبة تانق كبيرة .
    ( قولي ما شاء الله أها دايره تسحرينا كمان .. الله أكبر عليك .. ما كفاية راجلك الظلتنا دا )
    - المره الجايه قوليهم عبوها لينا هي ذاتها ماعايزين واحدة تانية غيرها.
    ( يا سلام عليك هو أنا ضايقة متين اتخارج منكم ومن الراجيني كمان قال يعبوها لينا )
    - يعبوها شنو أنت قايلاها جركانة لبن ؟
    ( هاهاهاها عجبني ليك . كان قايلاها جركانة لبن ما عارفة )
    - أها طيب شنو هم ما بيعبوها هي ذاتها ؟ .
    - يا ستي محلات الغاز دي هي محلات بتستبدل الفاضي بالمليان .أما التعبئة دي عندها مكنات خاصة في مستودعات كبيرة عادة بتكون بعيدة خارج البلد .
    ( فهمها بالله التجمة دي هو أنت جبتها من وين ؟)
    - أها البرنامج شنو عايزين حاجة من السوق ؟
    - طبعا أنا جاييني سحر وريم صاحباتي هم طبعا خبرة في الحلويات التركية .. بس لا من يجو بنكتب ليك الطلبات لكن عموما أنا الحاجات العارفاها ومهمة .. هي البيض والدقيق والسمن والسكر والباكنبودر والكربونات .
    - كبرونات شنو هو أنت عايزين تعملوا كيكية ملوخية ؟
    ( هاهاهاها واله حلوة كيكية الملوخية دي قطعت مصاريني أقصد غازي )
    - أنا عارفة زي السمعتهم قالوا كربونات .
    - غايتو انا العارفه الكربونات دي بيفركوا بيها الملوخية ..
    ( الظاهر الليلة أنا وسبت الزبالة حنتعب شديد مع الخمجانة دي )
    - كان كدا خليهم يجوا هم يكتبوا الطلبات . المهم بكرة أنت ما تطلع لازم تحضر طبعا .
    - كيف الكلام دا بكرة في مباراة برشلونة حا أروح أحضرها مع أصحابي .
    - طيب الفايدة شنو أنا الحفلة دي عاملاها لمنو ؟ تعالوا أحضروها هنا .
    - لكن نحن ما عندنا أشتراك في القناة الرياضية المشفرة .
    - ما تعمل الاشتراك .. لازم تكونزا حاضرين ولا أنا بزعل منك .
    - لا لا لا لا كل شئ ولا زعلك خلاص بعمل اشتراك في القناة الرياضية .
    - وبالمرة أصحابك يطفوا معاك الشمعة .
    - شمعة شنو يا مرة هوي أنت عايزة تهبلينا مع الناس .
    - أنا مرة؟ .أنا مرة ؟. تقول لي مرة ونحن ياداب لينا شهرين .
    - الله ؟ ومال أنت راجل ؟
    - كمان راجل ؟
    - طيب أقول ليك شنو ؟
    - ما كنت كويس من قبيل يا حبيبتي ويا روحي
    - طيب خلاص معليش أنا آسف .
    ( غايتو جنس دلع فارغ أنا لو منك أرصها كف لامن تقول أنا مرة آآآآي)
    - بس عليك الله تعفيني من حكاية الشمع دي .. ما تضحكي علي الناس وخاصة عماد دا لو شاف فلم زي دا يمين يصوره وينزله في الواتس ويفضحنا في جميع انحاء الكرة الأرضية .
    - طيب خلاص لكن تقوليهم عندنا شنو .؟
    - نقول ليهم عندنا حفلة شاي .
    - المناسبة شنو ؟
    - أي حاجة نجاحك أنت مثلا نجاح أخوك نجاح أختك .
    - خلاص بطريقتك غايتو انا صاحباتي قلت ليهم عاملة حفلة عيد ميلاد لحبيبي.
    - بطريقتك بس أنا كمان لا اطفي شمع ولا أجيبه البيت حتى .
    - الله كيف ما تجيبه ؟ جيبه عشان نصور التورتة ونتصور معاها .
    - طيب لكن أوعى تنادوني لكن .أطفيها أنت بدلي بعمل ليك توكيل ؟
    - هي هي دمك خفيف لكن .
    ( أعمل ليها توكيل في السفارة .. الله يخارجنا من الدلوعة دي )

    يتبع

                   |Articles |News |مقالات |بيانات

19-03-2015, 04:23 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: فنتازيا الغاز (Re: درديري كباشي)

    فنتازيا الغاز
    6
    في اليوم التالي من العصر حضر الصديقات وكتبوا الطلبات للعريس . راح الى السوق أحضرها . وطلبت منه العروس أن يخرج ويتركها مع صديقاتها ويحضر بعد صلاة العشاء مع أصحابه ليشربوا الشاي ولوازمه .
    أجتمع الصديقات في المطبخ قرب الانبوبة .. وبدأن اللت والعجن واعداد الصواني لادخالها في الفرن . ظلت الانبوبة تسمع في حوارهن وتهم .

    حلل وضعت في عيون البتوجاز من الأعلى وصواني أدخلت الفرن . وبدأ الارهاق الذي تهيبته الانبوبة .. تركن الأمر هكذا ورحن مع العروس الى غرفتها .. لإعادة تشغيل أشرطة العرس والحفلة .. مع الغناء والرقص والزغاريد والاندماج والاندغام والدغمسة.. ظلت النار مشتعله .. لا أحد يتذكرها .. بدأت السوائل تتبخر وتتحول الى كربون .. والدخان ينبعث .. فكرت الأنبوبة في الصراخ وتنبيه هؤلاء الغافلات .. لكن كيف .
    - أنتي تعالي الدخان دا شنو ؟
    - سجمي نسينا الحاجات في النار ؟
    مع الدخاخين والتي لحسن الحظ لم تصل الى مرحلة الحريق .. تحولت الصواني الى ما يشبه شوارع الأسفلت الجديدة قبل أن تطأها أقدام السيارات .. كما أن كل شئ كساه السواد من الدخان..
    - الليلة وب علي نقول شنو لعموري ؟
    - فضيحة اليابا الحالة نحن قلنا الخبيرات .
    - أنت كمان ما شغلتينا بشرايط عرسك دي نسينا نفسنا وعشنا الجو .
    - أنا عندي فكرة أتصلي عليه خليه يجي بسرعة بس ما تخلعيه .. نحن نحاول ننضف السكن دا .
    - ويجي يعمل شنو كمان وووب علي فضيحة اليابا على قولك .
    - ما مشكلة هو ما لسع عريس جديد فرحان بيك .
    - أنا عندي فكرة خليني أنا أتصل بيه .. وبعد يجي أنت تعملي فيها غمرانة شوية غير كدا ما في حل .
    - بعدين نفوقك خليه يكون مشغول بيك أنت ذاتك .
    - أنا كمان رأيي نلصقها في الانبوبة نقول له الانبوبة دي ما كويسة البلف بتاعها ما مظبوط كتر الغاز .
    ( هوي أنا مالي كمان شوف بنات الذين الخمجانات ديل . هو أنا أول مرة أدخل مطبخ ولا أشتغل كيك ؟) ..
    بعد قليل يدخل العريس مهلوعا وخاصة بعد ما شاهد آثار الدخان .
    - في شنو يا جماعة في شنو؟ .. وينه سنوية الليلة حرقت؟ .. في شنو ؟.
    - براحة براحة . أحمد الله قول جات سليمة .. هي كويسة بس الظاهر الدخان غمرها شوية ..
    - سناء سناء اتكلمي معاي . أنت كويسة .؟ بسم الله بسم الله . وبدأ يضربها في خديها بكلتا يديه . جيبوا ريحة يا جماعة ..
    بعد قليل فاقت سناء .أو ادعت أنها فاقت .. في شنو يا جماعة ..أنا وين أمي وينها . هسع دي كانت معاي ..
    - قولي بسم الله الله يرحمها . الله يطول عمرك يا حبيبتي . يضمها اليه تخنقه العبرة .
    الصديقات كل واحدة نظرن لبعض بتعجب ومط الشفاه كادت تفلت منهن ضحكة . لقدرة صديقتهن العروس على التمثيل البارع .
    - الحمد لله أهي فتحت .
    - سناء خير في شنو ؟
    - أسكت ساي يا عموري الليلة أنا ما كنت عايزة أموت .. الانبوبة الشوم دي أنت جبتها من وين .. بهلت فينا الغاز كدا ما قدرنا نقفلها .. بس البوتجاز دا بعد صعوبة طفيناه .
    - الحمد لله على السلامة .. ياخ الحاجات دي الناس بقت ما بتعملها في البيت . في محلات حلويات متخصصة .. تعمل الكيك والجاتوهات ..
    - لا ما نحن قلنا عايزين نضوقك شغل يدنا .
    - تسلم أياديكم .أها انتو بخير كلكم .. الحمد لله .
    - لا لا لا لا الحمد لله اتكتب لينا عمر جديد .
    - ما محتاجة لدكتور ولا أي شئ .؟
    - لا لا لا كويسة الحمد لله .
    - خلاص أنا أمشي السوق أجيب الكيك والبسكويت الجاهز .

    ( ما كان من الأول . مخليني للهبلات ديل هسع انا الخسرانة من جيت عندكم اتهمت بالظلم اتوسخت بالسكن واتظلتت بوهيتي )
    - بس الانبوبة دي بكرة ترجعها تغيرها لينا ما تقوم تضيعنا كمان .
    ( الحمد لله هو الداير خلقتك دي منو .أمشي أرقصي وغني تاني وخلي حاجة في النار ولصقيها في الأنابيب ) .
    - حاضر يا حبيبتي بس أوعى تختوا حاجة في النار كله شي جاهز .
    - أجي الشاي كمان ما نسويه ؟.
    - ولا حتى الشاي هاتوا الترامس الفاضية انا بجيبه من القهوة .
    ( يلا ريحتنا من المجانين ديل نشوف بكرة كمان حا نطير على وين . لكن شكلي أنا بقيت بتاعة عزابة ساي . أها الاتمنيتيه حصل يا خالتي المطرقعة )
    يتبع .
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de