|
|
 **** يا وطني يا المي و جرحي النازف ما بسكت ****
|
انا روان فاروق ؛ عمري 17 سنة .. حصل لي حادث حركه
يوم 31/10/2012 وبسببو حصل لي الاتى :
- كسر في الفخذ والساق بالرجل اليمين ..
- كسر مفتوح في الفخذ الايسر (جرح + كسر) ..
الحادث كان الساعه 10 م ؛ كان معاي امي و2 من اخواتي ..
اختى الاصغير مني حصل ليها كسر في الترقوه الشمال والفخذ الشمال ..
اختى الاكبر مني حصل ليها كسر في الترقوه ..
شالونا ناس الشارع ودونا مستشفي ام درمان الحوادث وعملو لينا الإسعافات ..
بالنسبة لي :
كسر الفخذ الشمال كان مفتوح وحصل للعضم فقد حوالي 2-3 سم بسبب شئ جرحنى ووصل لحدي العظم وكسر وهرس جزو منو ..
بعد الإسعافات مشينا م شرق النيل (ودا طبعا علي حسب إنو قالو فيها دكاتره سودانين اصحاب شآن وعندهم عيادات بره السودان ) ..
يامؤمن ياصديق خمينا عفشنا ومشينا ..
دخلونا عمليات انا واختى الصغيره ..
انا عملو لي مساطر في الرجل اليمين ؛ والرجل الشمال (الفيها الجرح) الدكتور (والله حرام اطلق عليك لقب دكتور)
قال إنو غسل الجرح وشال جزو من عظم الحوض وختاو مكان العضم المفقود بسبب الحادث وعمل مسطره وقفل الجرح (الغلط الاول)* ..
اختى الصغيره طبعا ماعندها جرح ؛ فقام عمل ليها مسطره في الفخذ الشمال وفي الترقوه الشمال ..
وطلعنا عنايه مكثفه لمده يوم او إتنين وبعديها طلعنا الغرف ..
في الغرف من اليوم التاني تقريبا انا جاتني حمي ..
حمي البتخليك تهضرب ديك ..
(وشالو دم وفحصوهو وقالو ملاريا وتايفيد) ..!
اي دكتور بقرا في كلامي دا ح يكون فاهم الحاصل ؛ الناس المادكاتره ح اوريكم بس واصلو قرايه ..
بعد إسبوع جا المدعو بالدكتور ماري بالعيانين وجا غرفتى انا واختى ؛ كشف علي اختى وقال ليها كويسه (غلطه 3) ..
جانى انا ..
قال لي وبكل بساطة ..!
"إنتى لحدي الان ماقمتى مشيتي لي " ..؟!
مدلعه شكلك ..!
فانا قلتا ليو بكل براءه انا رجلي الشمال ماحاسه بيها يادكتور ..
هنا كانو سهم الله نزل عليو ..!
وإنفجر فينى ..!
كانو نبذتو ..!
واشتغل المسمي بالدكتور وبدا يهرج ..
"انا عامل ليك شغل عالمي ؛ وانتى مدلعة ؛ وانتى وانتى وانتى وانتى وانتى ..الخ ..!
وهو "بنبح" وبردح وبكورك وبشاكل فينى ؛ اذا به يقوم يفتح الجرح بتاع العمليه في الرجل اليمين ويلقاهو كووويس وتممام ؛ ويواصل وهو بكورك بكل شده
(بعد ما طرد ناس البيت من الغرفه وبقيت انا واختى الراقده في السرير الجمبي وحضرتو ومعاهو الاسطاف المعاو) ؛
وفتح جرح الرجل الشمال وهنا انا شفتا نظرة في وشو عمرى ما ح انساها ..!
كان بعااين للجرح وهو مصدوم ..!
وساق الناس المعاو وطلع بره ..
ودخلنى عملية طوالي في نفس اليوم ؛
وطبعا ؛ لقي انو الجرح التهب ؛ وعشان هو ماكان فاضي ؛ وجانى بعد اسبوووووووع من العمليه ؛ الالتهاب اتفشي ووصل العضم ..!
دخلنى عملية وطلع المسطرة الكان عاملها وطلع معاها العضم الشالو وزرعو ؛ وقص من العضم لانو لقا الالتهاب نتهي منو ؛
وعمل لي حاجه اسمها تثبيت خارجي عشان يعالج الجروح والالتهاب ..!
وبعد دا حولنى لي ناس التجميلية عشان يعالجو لي الجروح ؛
والهم اساسا كانو فرحانين بعلاج امريكي جايبنو جديد بخلي الجروح تقفل عشان بحفذ اللحم يبنى ..
عشان طبعا الخياطه وكدا بتشوه الجسم ..!!!!!!!
المهم ؛
مواصله معاهم فتره بتاعت شهرين واكتتتتتتر ؛
وكل خميس بمشي المستشفي للمتابعه وبقولو لي كوووويسة والجروح ماشه كويس ؛
وكان في جرحبطلع ماده بيضاء طووووالي ؛ وكل مره بنسالهم بقولو دا طبيعي وعادي ..!
ويامؤمن ياصديق صدقنا ..!
الملاحظ طبعا انو طوال الفتره بتاعت ناااس التجميلية ديل وانا متابعه معاهم ؛ دكتورى بتاع العظام كان مافيش ..!
حتى من قبل ما احولونى لي ناس التجميل ..
عمك دا مالاقياو ..!
بمشي المستشفي مقابله ومابلقاو ..!
وزميلو الاساسا خشي معاهو اووووول عملية انا عملتها وعارف الحاله برررضو ماكان في ؛ ولمن نمشي ونلقاو بقول انى ماعيانتو ومابشوفنى ..!
وانى عيانة داك ..!!!
ههههههههه يعنى داك ماعندو اخلاق وطفش ؛ وهو طلع العن منو ..!!!
المهم ؛
بعد خلصتا من ناسالتجميل الدكتور قال لي بعد دا امشي لاقي دكتورك بتاع العظام لانو شغلنا انتهي ..
قلنا ليهو اساااااسا دكتور فلان دا مالاقينو ..!
مافيش ..!
ماقاعد ..!
سافر ..!
طشا ..!
اتنسف ..!
مات ..!
قام هو مشى للدكتور القبيييل قال انا ماعيانتو ..
وقال لى اعملي اشعه وانا بخليو يجي ويشوفك ..
لمن داك (المتبري منك) جا وشاف الصور ؛
بكل بساطة قال لي :
"انتى لسه عندك التهاب ؛ العضم ملتهب ؛ تقومى تخشي عملية ونشيل ليك العضم الملتهب وبعد داك نرجع ليك التثبيت الخارجي " ؛ وخت الورق ومرق ..!
غايتو نا في اللحظه ديك حسيت روحي عربيه بعملو ليها في عمره وقاعدين في دكان اسبيرات ..!
طوووووالي من دربنا داك وعلي العربيه وعلي البيت وتانى يوم غيرنا المستشفي ومشينا مستشفي بست كير "قدامى المحاربين" ..
مشينا دخلنا الطوارئ واستنينا الدكتور يجي ويكشف علي ..
طبعا انا الوقت داك مابمشي علي رجلي ..
بشيلونى شيل اخوانى وابوي ..
من العربيه للنقااله ومن الناقله للعربيه للسرير في البيت ؛ وهكذا ..
المهم ؛ الدكتور لمن جا وشاف رجلي ؛
دى نظره انا ماح انساها في حياتى ..!
انا حسيت انو ح يموت ..!
عاين لي وساق اختى (بحكم انها طبيبه) وطلع بره الطوارئ ..
بعد فترة جااا اختى وقالت لي انو خلاص ح يرقدونى وح يعمل لي عملية بكره ..
وفيما بعد طبعا عرفتا انو كان مستاء جدا وقال ليها الحاله صعبه لدرجه في العملية لو لقيت مافي امل رجلها ممكن تتبتر ..!
اللهم دخلنا العملية والحمد لله عملتا العمليه وطلعتا سليمه ..
كل العملو الدكتور دا انو طلع لي القرف الكانو عاملنو ناس شرق النيل ؛ التثبيت الخارجي ؛ وقص العضم الملتهب ؛ ونضف جوووه كووويس
وقفل بي ابره وخيط ؛ موووش تقول لي علاج جاى من امريكا ..!!!
بعد 5 يوم طلعتا من المستشفي وبقيت متابعه مع الغيار ..
يوم مشيت المستشفي لي غيار وانتهى بي المطاف جوه غرفه العمليات منهاره ..!
انهار قلبي ووقف ..!
ووقفت كل الوظائف الحيويه ..
رجعو لي قلبي بالكهرباء ؛ وعملو لي انبوب للتنفس ..
ورقدتا عنايه مكثفه 72 ساعه ؛ بي انبوب تنفس لمده 48 ساعه واليوم التالت بدون انبوب ..
بعد طلعتا البيت كنتا فاقده منطق ما اقل من اسبوعين وماواعيه وحالتى بالبلا ..!
المهم ؛
بعد داك قررنا نسافر مصر ؛
وسافرنا ؛
وعملتا عملتين وقعدتا لمده شهر ..
تصدقو وتامنو بالله ..؟؟!
نففففففس الغلطة العملها بتاع شرق النيل عملها بتاع مصر ..!
والعملتين بعد جيت من مصر فشلو واضطريت الغيهم وعملتا عملية تانيه طلعتا فيها المساطر العملوها ناس مصر ..
دي كانت اخر عمليه لي ؛ ودا الماضي ..
الحاضر
بعانى من التهاب عظم ..
بعانى من كسر في الفخذ الايسر ..
بعانى من فقد بتاع عظم حوالي 10سم ..
بعانى من مشكله في الحوض من الجهه الشمال بسبب الالتهاب ..
بعانى من تيبس في الركبة الشمال ..
بعانى من تلف عضلات الفخذ الايسر ..
مهددده بي انو السلسلة الفقرية تزح من مكانها وتسبب لي اعاقه شلل مستديمه ..
اتعالج ؛ ودا ابسسسسسسط حقوقي ..!
الحاله معقده جدا من الناحيه الطبيه والعلاج ح ياخد سنين ؛ وبالتالي التكلفه المبدئيه للعلاج بالخارج هى 800 مليون ج سودانى ( والح يقول ليك اتعالجي في السودان يطلع بره صفحتى) ..
الســـــادة ناس القمسيون الطبي رفضو العلاج بالخارج ؛ وكتبو لي علاج في مستشفي بحري وكتبو لي اسم دكتور معين عشان نودى ليهو خطاب القمسيون الذي محتاهو هو :
يادكتور فلان الفلانى ؛ المريضه دي عايزة تتعالج ؛ ياريت توضح لينا هل يمكن العلاج بالداخل ولا الا بالخارج ..؟!
مشينا للدكتور المذكور في م بحرى وكشف علي وقال ماممكن اتعالج هنا ؛ وكتب ليهم الكلام دا في خطاب ومضي عليهو وكل شئ ..
اها تانى في شئ ..؟؟
موش مفروض خلاص المووضوع انتهى ..؟؟!
ابـــــــــدا ..!
كتبو لي قالو لي خلاص ؛ مادام الدكتور فلان الفلانى قال كدا ؛ يبقي تمشي تتعالجي في شرق النيل confused_rev رمز تعبيري ..
شرق النيل ..؟!!!؟!؟!؟!
شرق النيل ..؟!؟!؟!؟!؟!؟!؟!؟!؟!؟
شرق النيل البسبب انو عملياتها مانضيفه ومامعقمه ؛ ودكاترتها مسيبين ومالاقين زول يشكمهم انا بقيت في الحال دا ..!
بسببهم انا معطله قرايتى وشهاده سودانية ما امتحنتا ..!
البسببهم انا لي يوم الليلة بعانى معاناه راجل عمرو 50 سنه مابستحملها ..!
شرق النيل ياناس القمسيون ...!!!!!
دقيقه دقيقه ..
انتو ياناس القمسيون كشفتو علي ..؟؟
شفتو الحاله ..؟؟
ولا بس علي تقرير الدككاتره ..؟؟
علي تقريرهم ..؟؟
طيب موش 2 من اكبر دكاتره العظام في السودان قالو العلاج بره ماا هنا ..؟!؟!
طيب في شنو تانى ..؟!؟!؟
فهمونى ف شنو ..؟!؟!؟!؟!
مشينا قطعنا تذكره ومشينا للدكتور الفلانى اللهو رئيس لجنة القمسيون اللهم بحددو علاجك وين في عيادتو ؛ وكشف علي وشاف الحاله ..!
وكتب لي علاج في مصر ..
تانى ..؟!؟!
مصر ..!!!!!!
مصر ...!!!!!!!!!!!!
_ ___________ _
حسبي الله ونعم الوكيل ..
حسبي اللله ونعم الوكيل ..
حسبي الله ونعم الوكيل ..
وتم رفع شكوه ضد دكاتره م شرق النيل ..
وما ح نسكت ..
وانا ماعندى شئ في يدي غير دعائي وغير فيسي البكتب فيو دا ..
وماعافيه ليكم ..!
وربنا فوق الكل ..!
وربنا كرييييييم ورحيم بي عبادو ..!
وانا متوووكلة عليهو ..!
|
|
 
|
|
|
|
|
| |
وضاحة
abas
علي محمد الفكي
سليمان القرشي
فيس بوك
تويتر
انستقرام
يوتيوب
بنتيريست