|
|
 أنتهت السنه ونحن لسه بتاعين سنة لا كانت ولا جات #
|
في البداية عام سعيد وكل الامنيات الجميلة لكل البوردابيات وبعدهم البورداب الرجال وكمان ما انسي سيد الجلد والراس بكري أبو صلعه
تعرفوا يا ناس نحن أمة جربان في كل شيء من اسلوب الحياة لحدي الافكار وحتي الطرح المعقول لكل معاني الحياة كان بسيطة ولا معقدة
عاملين أخلاقيين ونحن ما عندنا الحبة من الاخلاق بنتكلم عن الانسانية والانسانية عندنا لمة ناس كدا لبسين جلابيات ونسوان بيبكوا
أو حاجة بنعملا ما معروفه كان عصرة قروش أو مجاملة بليدة كدا تكون بارد ولا تقول ولا كلمة وندي بعض حاجات كلها حاجات أكل من السكر لحدي الدقيق واللحم
لما تتكلم وأنت زعلان ح تقول كلام عجيب وصريح أمكن فيهو شوية عقل وأنت أصلا مجنون وقاعد مع كوم مجانين بس لا في زول بيقرا عليهم قرأن ولا حتي هم مقيدين .
·بصراحة كدا حسي نبدا حكاية بلدنا من الكبار المسؤلين أو السياسيين قالوا جيل السودنة جاب لينا الاستقلال أستقلال السودان للسودانيين قام السودانيين ظلموا بعض
والبلد بقت بلدين شمال وجنوب يا خي لو سالت نفسك أنت بتحس أنك سوداني ولا حاجة كدا بتشبه ناس السودان القديم داك أمكن نحن بنحاول نكون زيهم بس فاشلين
لانو لو قارنت أحوال أهل السوادن القديم بالحاصل اليوم مش ح تبكي ح تنتحر بدون مقدمات أو تبرير للانتحار بس تقوم تمشي البحر وترمي جثتك التعيسه دي
كل واحد فينا عاجز وما قادر يقرر حتي في أمور حياتو الخاصة دايما أنت محتاج لصديق أو بتفتش علي نموذج عصري عشان يقولوا فلان والله مميز مميز بتاعت قلبك
دي عملة تقليد ماشغالة في الزمن الحالي حتي الناس الناجحين مننا عندهم أمراض أجتماعية اللهم أبعد أطفال السودان منهم والله دي أمنيه حقيقة تعرفوا كتار مننا متخصصين
في النفاق الاجتماعي والكلام المايع لا تخد منو حق ولا باطل وتكون المسالة حاجة هايفه جدا واحد صاحبي عامل فيها رجل دين ومسلم صميم وهو كل عبر الدنيا فيهو سألتو
أخبارك شنو ؟ كان ردو (ما في جديد بحياتي غير أني إقتنـعت أكتر أن الرضا بالقسمه والقدر شيء لا بد منو) وهو شاغل سمسار في قصة السفر والاغتراب والانضمام للمعارضة
الخارجية والعربية حقتو أخر موديل والهدوم القماش حقها من الهند وكل أسبوعين زولك بيكون ضابح خروف قال الرضا بالقدر بيتكلم عن الاقصاء والظلم الاجتماعي وهو عايش
علي مأسي الاخرين وتجار فنان في ديون الجماعة اللي في السجن وبصلي الفجر حاضر وكمان مرة مرة بيزور قبة بعيدة كدا في منطقة في الصعيد الجوني لانو شيخو هناك قال
بيمشي عشان الفاتحة يا خي الله عارف عيبدو بس أنت أعمل عمايلك دي بعيد من الاضرحة والقبب تجي لو احدة مثقفة وجامعية وشاغلة في بنك وعندها دكتورة في التسويق وكلها
مكتوبة بالعربي المهم بقت بتفتش في عريس من أثرياء عصر الانقاذ لما تقول ليها دا شنو وين التعليم ونعمة التجربة الانسانية بكل بساطة تقول ليك ( يا خي عايزا أعيش ديل عندهم
كل شيء أقل شيء ح أركب حديدة جديدة ويكون عندي شقة في عمارة معتبرة ) بالله شوف الطموح دا قالت عندها phd أمكن في الضحالة والابتزاز حاجة تفرف
واحد متخرج امس عايز يطير يبقي مدير وسيد اللعب في مجمع حكومي بعد ما رابطت أمورو مع ناس المؤتمر الوطني والود معاذ خلا الكلية شاغل بيع دولارات وتسفير رقيق بيض
لمدن الدنيا بقي عندو أموال رهيبه يا ولد دا شنو ب دا بكل برود يقول أنت فقران وبتاع كلام أنا زول عملي ودي كمان جات من أقليم قريب من العاصمة ودخلت الجامعة بس أمكانيات الاسرة
ضعيفة عايزة تلبس وتسكن في داخليات بنات الشهادة العربية عشان قصة الاخلاق والشرف دي دقة قديمة أنت ما حسي بتسكر مالك يعني ما مسلم كويس بس أسكت أنت عايز تسافر دبي بسفرك
أختزلتني في رحلة ترفهية !
وصاحبنا القاضي عايش زي زعماء العشائر والقبايل أخر لحمة وعسل وكل ثلاتة شهور عريس دا من وين يا قاضي الغرام كلام عجيب (هذا رزق ساقه الله لي )
بالله أنا عنواني ما موجود مع جماعة الرزق ديل ولا شنو ديل ما يعمل ليك أزمة نفيسة تعيس في عذاب نفسي عمرك كلو قالوا مسلمين !!!
وكمان مدرس الصغار دا عبقري بيدرس شفع الاساس دروس خصوصية وعندو مجموعات تقوية في كل المواد
وتعال لدكتور الجراحات المعقدة دا عندو مليار كاش أي مريضة عندها وروم خبيث وأي راجل عند و حاجة في المعدة شغال جزر في العالم وعربيتو جيب كوري والبيت في الاندلس خلي الجامعة لانو ما في وقت
كل يوم ما عملية جراحية واحدة بالميت تلاته يا أخي أرحم مرضاك بكل حزم (أنت طبيب ولا عندك علم زي علمي دا انا ما في زول أشتكي من الجراحة حقتي ناس بتمشي الاردن بيرجعوا لي تاني )
تعرفوا لما تتفرج في اللي حوالينك تلقي كل شيء عجيب من البيت اللي انت عايش فيهو للشارع للشغل للساسة للرياضيين حتي عمال الزبالة بتاعين النفبات ناس مرض ومنتهي الثقالة وكان للكبير حكايتو تجيب الطمام
وخمت النفس
أنا ما عايز اي علآقآتَ جديدهَ !
حجم العذاب من العلاقات في البلد دي يكفيَ لحياة عشرة من سكان العالم الراقي .ومآ تقآسيتهو مؤلمَ جدا منهم نسوان وراجال
أظبط حاجة تكون علآقتكَ سطحيهَ معَ الكل
عشان ماتتألم وتتخلع في نومك
ولا تنصدم مْن شخص
كان يوم من الأيام قريب منك
ولا من فراق زول ولازوله ولا كمان كان رفدوك من الشغل هودا شغل دي سخرة وبس قروش شوية ومعها قلة أدب كمان وحقارة
و لآ تبكي ذاتو علي أي حاجة الفصة بقت روكا شديد
وأخيرا أقوليكم كلام في مجنون كان بيحكي لينا عن واحد مجنون قال انو في مجنون بوسط الخرطوم قال انوعاقل , قالوا ليهو الجن دا شنو هو ؟ قال هو عاقل بالله ما تبقوا زي كدا وتكونوا محتارين مابين أنكم عاقلين ولا مجانين
لكين تعرفوا لو عايزين تعيشوا كويس أتمنوا الجن أنتو عارفين البلد دي ما فيها عاقل أبدا ووليها و حاكمها وصاحب قرارها مجنون بدون كترت كلام
عشان أنتهت السنه ونحن لسه بتاعين سنه لا كانت ولا جات تصدقوا جد والله دا الحاصل هنا عندنا .
صباح يوم الاستقلال التاسع والخمسون حسب ما قالوا لينا !.
|
|
  
|
|
|
|
زهير عثمان حمد
فيس بوك
تويتر
انستقرام
يوتيوب
بنتيريست