ست شاي تحرق محلية الخرطوم انتقاما: عفارم عليها ... ( صور + فيديو )

Quote: تمكنت قوات شرطة الدفاع المدني من السيطرة علي حريق شب عصر اليوم بحوش محلية الخرطوم شرق بمنطقة اركويت . واكد العميد شرطة عثمان عطا مصطفي الناطق الرسمي لقوات الدفاع المدني بولاية الخرطوم لـ "سونا" ان الحريق نتج اثر مصدر حراري خارجي تمثل فى عملية حرق لبعض النفايات التي كانت تحتوي علي قطع لساتك واسكراب بعض الاخشاب موضحا انه لم تحدث اي خسائر في الارواح . واشار العميد عثمان الى ان التدخل السريع لقوات الدفاع المدني وشرطة المحلية جنب المنطقة كارثة اذ ان المنطقة تكتظ بالمباني السكانية . من جانبه اوضح الملازم شرطة سمير حامد بقسم شرطة منطقة الخرطوم شرق انه تم فتح بلاغ وعلي اثره تحركت القوات التي احتوت الموقف وتمت السيطرة علي النيران في وقت وجيز .

Quote: الموضوع ما فيه ست شاي ولا غيره الموضوع بيكون اشاعة فكوها ناس الامن وناس المحلية بيكونوا دايرين يغطوا اللهف بتاعهم الغريبة جادات لمن استخدم دماغه كان تحليله اقرب للواقع لكن متعود على مسك ضنب الككو نقول شنو عاد؟ ههههههه

Quote: قامت بائعة شاي شريفة عفيفة من الاحرار قبل قليل باشعال النار داخل مباني محلية الخرطوم باركويت مما ادى لاحتراق المحلية بالكامل واصابة عدد من موظفي وعمال المحلية بحروق مختلفة... وكان عمال المحلية قد قاموا اليوم بعمل حملات علي بائعات الشاي بمنطقة اركويت واخذوا كل معداتهم وادواتهم... فحضرت احداهن الي المحلية وطالبتهم بارجاع المعدات لانها تعول اطفالا وايتام ومهنة الشاي هي مصدر دخلها الوحيد... ولكن موظفي المحلية طالبوها بدفع مبلغ مية جنيه للافراج عن العدة ولكنها لم تكن تملكها اصلا وبعدها قرروا طردها من داخل المحلية بعد انتهاء الدوام وقام احد رجال المحلية بضربها ً.. فخرجت وعادت بعد قليل وهي تحمل باقة جاز وقامت بصبه بالكامل داخل المبني واشعال النار في مبني المحلية مما ادي لاحتراقه بالكامل وهروب عدد من الموظفين المتواجدين داخله...

Quote: دي مداخلة الصادق اسماعيل الحرامي المشاطة

Quote: الحكامة ,, نطالب بارجاع الشريط ده للصادق وعدم تنزيل رتبته دون مسوغ قانونى ,, هو عمل شنو يعنى ياصلاح عشان تخليهو بى شريطين بعد كانن تلاتة ,, إنت يالصادق كمان شوية ضبط وربط عشان تلحق دفعتك

Quote: الحريق حدث اليوم في مقر محلية الخرطوم شرق ( مدرسة أم المؤمنين سابقاً ) باركويت 61 . وتوقيت الحريق بعد الساعة الخامسة تقريباً واستمر حتى موعد أذان المغرب حين اتت سيارات الدفاع المدني واطفأت النيران التي اشتعلت بسبب وجود اسطوانات غاز واطارات سيارات متواجدة بالمبنى .

Quote: مش يمكن يكون اشاعة انو ست الشاي هي الحرقت المحلية مصدرها ناس المحلية نفسهم للتغطية على سبب الحريق ؟ وممكن يكون حادث عرضي كالحرائق التي حدثت سابقا قريب وكت الجرد

Quote: اذا فعلا ثبت ان ست الشاي هي التي حرقت مكاتب محلية الخرطوم وقبضوا عليها فنحن نحيها من هنا ونقول ليها : "عافيت منك... لانك عرفت ان القانون في السودان ظالم وما لقيتي واحد يرجع ليكي حقك... فعندك حق تعملي اكتر من كده .. وكفاية ظلم..." واذا فعلا في قاضي عادل في السودان.. مفروض يطلق سراحها فورا ويديها وسام الشجاعة ويطلب لها بتعويض كبير من الحكومة لانها ظلمت من ناس المحلية وصادروا منها ما كانت تأكل منها أولادها وتكسب بيها الرزق الشريف.... وناس البلدية شايفين الحرامية الكبار الذين ينهبون بالملايين ولكنهم لا يفعلون شيئا .. بس هم شاطرين على الضعفاء والمقهورين من أبناء الشعب السوداني المغلوب على امره... ( والله انا أساسا بكره السياسة لانها بتجيب المغصة ... لكني هنا زعلت شديد .. وفي نفس الوقت فرحت شديد .. زعلت لان ناس المحلية صادروا أدوات العمل لستات الشاي.. وحرموهن من كسب الرزق الشريف وفرحت شديد من تصرف ست الشاي الحرقت المحلية... وعافيت منها...) ودمت بالف خير...

Quote: ياجاكات .. أنت ما داير تخلى اللفحى من قروبات الواتساب دى لسع ..؟ الحريق ده فى حلتنا وعلى بعد أمتار قليلة من البيت ، لا فى ست شاى لا يحزنون .. ما تجيب من الواتساب وتلصق لينا هنا بدون ما تتأكد وتهبل روحك ! ___ مزمل خيرى المزوراتى الغبى :) عشان ماتتعب روحك هههههه

Quote: سلام صلاح جادات الحريق تبين ان السبب فيه هو عامل النظافة وليس ست الشاي . وانا كنت حاضر وقت الحادث ، لأنه مخازن المحلية ما بعيدة من بيتنا . المخازن في مربع 61 وانا في مربع 63 ، والحريق شاهدت بدايته وانا في البيت ، وبعدها انتقلت لمكان الحادث ، ولم أجد أي اشارة لموضوع قيام ست الشاي باشعال النار . ولكن ما عرفته ان العامل المسؤول عن النظافة قام باشعال النار بعد ان جمع الاوساخ ، فاشتعلت النار في بعض الاشياء ، ومن حسن الحظ أن البعض قد نجح في اخراج اسطوانات الغاز من داخل مكان الحريق .

Quote: يا جماعه خلو ستات الشاي في حالهم كفايه عليهم البهدله الحاصله ليهم مصادرة ومطارده وغرامات كمان جابت ليها حريق يا سبحان الله يجب ان نتوخي الدقة فيما نكتب