الشيالين أو الكورس أو الكورال المصاحب حسب التسمية الجديدة، أو الصفاقين زى ما بقول اهلنا الشايقية
أو حتى السنيدة على حسب تسمية المصريين
هم جزء أصيل ومكون رئيسى ومؤثر فى تركيبة الفعل الإبداعى الغنائى الصوتى الإنشادى أداءا وصوتا وحضورا وما حصل كانو عنصر ثانوى غير فاعل أو فرع هامشى فى انجاز فن التصويت سواء بمصاحبة آلات ايقاعية او موسيقية او بدونها وحتى فى فن االمدائح النبوية الراسخ والتليد عندنا فى السودان، وبداية من صنوف وانواع الغناء الشعبى، والشعبى هنا مقصودة لذاتها بمعنى غناء المجموعات المختلفة فى كل مناطق السودان وبمختلف المناسبات
أما المقصود هنا تحديدا فهم الشيالين أو الكورس المصاحب للفنانين والمؤديين بداية من يوم استغناء العميد الحاج محمد أحمد سرور عن "الطنابرة" بعد الحادثة المشهورة فى زواج السيد بشير الشيخ فى امدرمان مرورا بفترة المدرسة الغنائية الأولى أو ما عرف بفترة الحقيبة و وصولا الى راهن اللحظة
اتذكر قبل فترة كان اخونا الجميل "عمر الفاروق" الزول الذواق والفنان، عطر الخالق ايامه وين ما كان، اتذكر كان عنده موضوع فى ذات المعنى او قريب منه جدا، واعتقد كان محوره الفنان كمال ترباس، ونضمنا فيه عن احوال الشيالين كلها
ولكن ولأهمية الموضوع، من وجهة نظرى، قلت نفتح ليه نافذة تانية للمزيد من الضوء والنضمى لأنه موضوع غزير ومتشعب وغنى جدا والله
يتبع
03-15-2015, 09:05 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
اعتقد ومع بداية فنون الغناء والأداء الصوتى مع بداية تكون المجتمعات السكانية، كان فى غناء حسب ثقافة ومكونات كل مجموعة، ولغاية اليوم بنشوف ونسمع مختلف انواع الغناء الشعبى الفولكلورى عند كل المجتمعات وبتظهر فيه تنويعات الأداء من أداء جماعى كامل أو اداء فردى بمشاركة جوقة مغنيين تانين الخ الأشكال الغنائية حسب مقتضى او مطلب الحالة الحاضرة
وبما انه فن المديح النبوى بشكله الحالى المعروف بدأ بالتأكيد قبل تشكيل مجموعة الغناء العادى المعروف، يمكن القول انه هو الأصل وبعد ظهور شكل الغناء العادى بوجود مؤدى مع مجموعة اشخاص مشاركين، زى ما بدأ مع سرور مثلا، ممكن نعتبره تقليد لأداء المدائح بوجود مؤدى رئيسى فى المديح ومشاركة شخصين او اكتر فى "الشيل" وممكن برضو يكون تقليد أو نقل لأساليب الغناء الشعبى فى المجتمعات الأصلية فى اماكن تواجدها، وياريت المختصين فى تواريخ الفنون الغنائية يفيدونا فى الحتة دى ويصححو لينا أى معلومة
يتبع
03-15-2015, 09:16 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
بعد جية الفنان "محمد ود الفكى بابكر" من منطقة الجعلييين، واعتقد من البجراوية تحديدا، بعد جيته لأمدرمان فى العقد الأول من القرن العشرين، وفى صحبته نوع وطريقة غناء المنطقة القائم على أداء المؤدى ومصاحبة "الطنابر’" واستخدام التصويت الحلقى "الكرير" استمر النمط والنوع ده قرابة العقد، وبرضه كان فى نوع مشابه وقريب جدا من طريقة الأداء ده فى بعض مناطق غرب السودان وفى اغنيات الجرارى تقريبا، يا ريت اخونا كبر والزملاء من اهلنا هناك يفيدونا ويدعمو لينا الكلام ده، بعد استمرار طريقة الطنابرة فى الغناء وبداية نهايتها على يد محمد احمد سرور والشاعر ابراهيم العبادى، بدت مرحلة جديدة تماما وكانت ثورة ونقلة نوعية فاعلة ومؤثرة فى غناء الوسط الأصبح تقريبا قاسم مشترك اعظم لكل المجموعات السكانية فى نواحى السودان المختلفة بحكم التقاء المجموعات دى وانصهارها التام فى امدرمان
استعان المطرب سرور بمجموعة من الشيالين بعد الاستغناء عن الطنابرة، وبقت الطريقة الجديدة هى ترديد مطلع الأغنية مع او بعد اداء المغنى لكل مقطع، وما زال نفس الأسلوب ونفس الطريقة متبعة لغاية اليوم، وحصل فيها تطوير او تنويع زيادة زى ما ظهر لاحقا عند الفنان محمد احمد عوض تحديدا الأدخل اداء ومشاركة الشيالين فى مناطق مختلفة من الأغنية بدلا من الاقتصار بس على ترديد المذهب او ترويسة الأغنية ومقطعها الآستهلالى الأول
مجموعة سرور من الشيالين كانت بتتكون من احمد حسن محمد، عطا محمدوانضم ليهم لاحقا عبد الرؤوف عطية و عبد العزير المامون اخو ميرغنى المامون فردة أحمد حسن جمعة و بشير سليمان
يتبع
03-15-2015, 09:24 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
من اجمل التنويعات الحصلت خصوصا فى فترة الحقيبة، مشاركة فنانين فى شكل شيالين او كورس مع الفنان، يعنى تلقى الفاضل احمد وكرومة شيالين مع الأمين برهان، وتلقى برهان وكرومة شيالين مع سرور وده يمكن وصل لينا فى تسجيلات الأسطوانات الإتعملت فى مصر عند شركات التسجيل الكانت فى الأيام ديك فى مصر زى شركة اوديون وشركة ميشيان وغيرها، وده ربما يكون حصل بسبب وجود مجموعة الفنانين ديل كلهم مع بعض فى مصر لنفس الغرض، وربما ما يكونو اصطحبو معاهم شيالين محترفين عشان كده كل اتنين او تلاتة بشيلو مع الفنان العايز يسجل، وده جا من حسن حظنا نحن أكيد
ولاحقا بتلقى عوض وابراهيم شمبات الاتنين بشيلو مع اولاد الموردة، والعكس صحيح برضو، وده الأنتج لينا روائع عجيبة واسطورية عديل والله
بالله اسمع اغنية "هواى وهواك بى جارو" عند اولاد الموردة وبشيل معاهم اولاد شمبات، خليط عجيب وبديع من الأصوات والأداء او أغنية "يا رشا يا كحيل" و أغنية "الناعسات عيونن" عند اولاد شمبات ومعاهم اولاد االموردة شيالين فى الأغنيتين
النماذج كتيرة جدا فى اغنيات الحقيبة وبنفس الطريقة الجميلة
03-15-2015, 09:34 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
ومن ابدع التجارب فى اداء ومشاركة الكورس، النقلة الجميلة العملها العبقرى ابراهيم الكاشف فى انه استعان بكورس نسائى سجل معاه مجموعة من الأعمال الغنائية البديعة وبعد شارك نفس الكورس مع مطربين آخرين وتحديدا فى فترة الخمسينات كلها وبداية الستينات اصوات نسائية جميلة وطروبة وادت الأغنيات طعم جديد وسمح ويا ريت لو أى زول عنده معلومات عن المجموعة النسائية دى، الأسماء مثلا وما شابه لأنه ما لقيت ليهن ذكر مفصل او حتى اشارة ليهن
03-15-2015, 09:44 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
ومن مبدعى المدرسة الوترية الجات بعد فترة الحقيبة، اكتر مطرب تقريبا استعان بمشاركة كورس وإن كان بشكل وطريقة جديدة مختلفة عن الطريقة التقليدية، هو المطرب عثمان حسين زى ما بنلقى مثلا فى اغنية "عاهدتنى" وأغنية "عشرة الأيام" بنلقى فى مجموعة شيالين وبيؤدو اجزاء محددة وصغيرة فى الأغنية وفى توقيت معين محدود برضو
وبرضو المبدع محمد وردى استعان بالكورس وبنفس الطريقة المحدودة فى اغنية "الطير المهاجر" وبرضو فى اغنية "لو بالصد ابيتينى"
ومطربين كتار استعانو بالكورس وادخلوه فى اغنياتهم، خصوصا الكورس النسائى
03-15-2015, 09:49 AM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
المبدع محمد أحمد عوض هو اكتر مطرب وظف الكورس توظيف جميل ومختلف وعمل نقلة كبيرة جدا فى طريقة الأداء
واخونا عمر الفاروق الله يطراه بكل الخير والعافية كان ذكر لينا نفس كلامك ده
ومن بعد محمد أحمد عوض برضو ترباس وعبد الوهاب الصادق اخدو منه نفس الأسلوب تقريبا، خصوصا ترباس الكان عنده ابداعات جميلة بخصوص توظيف اداء الكورس وكانت ابداعات سمحة جدا والله زى "ست اللهيج السكرى" و "عينيا ما تبكى" و "الشبه باين" و "جاى تفتش الماضى"
قبل ما يرتد ويفقد طابعه السمح واسلوبه المبدع ويخت نفسه فى حتة باهتة جدا ومسيخة
03-16-2015, 04:53 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
بعد قيام وتكوين اتحاد فن الغناء الشعبى، بقى فى مجموعة معروفة من الكورس بكونو حافظين أغنيات كل فنان وممكن يشتغلو معاه كلما كان عنده تسجيل أو مناسبة غناء تانية وعلى الرغم من كده بكون فى فنان عنده مجموعة شيالين خاصة بيه هو فقط والوضع بياخد شكل ومفهوم الفرقة الخاصة زى ما كان الحال مع محمد أحمد عوض ولاحقا عند النور الجيلانى ونسبيا عند كمال ترباس
03-16-2015, 06:54 AM
ياسر السر ياسر السر
تاريخ التسجيل: 08-06-2010
مجموع المشاركات: 3204
بوست معطر بعبق الماضي التليد والفن الاصيل ,,,, التحية لك اخي الاستاذ اباذر على نبش هذا الخيط الجميل الذي يقودنا لمساحات ابداعية جميلة اثرت الساحة الفنية باعمال خالدات في دواخلنا جميعا ,, ولا تنسى ملك الحماسة خلف الله حمد فقد كان ايضا ذا مدرسة فنية راقية في توظيف الكورس بصورة جميلة وراقية ,,, وواصل من غير فواصل ونحن منتظرين نعاين ,,,
تحياتي : ياسر العيلفون
03-16-2015, 07:29 AM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
كلامك صحيح فعلا فى انتشار كبير لإعتماد طريقة واسلوب اغنيات ما عرف مجازيا ب "الغناء الشعبى" حسب طريقة محمد أحمد عوض ومن بعده مجموعة عوض الكريم عبد الله ومحمود على الحاج و عبد الله محمد و عبد الله الحاج وكل الفنانين البدو مشوارهم من دار فلاح
نقلة جميلة فعلا أو عودة جميلة بالأحرى، وربنا رحمنا من فنانين الأورغن أو الكيبورد الكانو مسيطرين فى الفترة الفاتت خصوصا فى حفلات المناسبات الخاصة
واعتقد انه ظهور احمد هاشم ليه نصيب كبير فى جذب الشباب وتكوين الفرق الزى دى
03-16-2015, 10:37 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
فعلا المبدع خلف الله حمد وظف الكورس بشكل جميل ومطرب
خصوص فى اغنية "الكان داك" وده إسمها الصحيح طبعا، ومع فتح حرف الكاف فى "داك" بتتسمع عند الناس "داكا" حسب نطقنا الدارجى الحلو
خلف الله وبدون ما يقصد طبعا قسم الكورس لتلاتة مجموعات كل مجموعة تردد جزء من استهلال القصيدة بطريقة صوتية مختلفة انتجت لينا الابداع العجيب ده وخلف الله وبدون ما يكون عنده أى خلفية اكاديمية او علمية فى توظيف الفوكالز بالطريقة المدهشة دى، طلع لوحة جميلة لدرجة عجيبة، وفعلا عكست و وصلت طبيعة "المناحة" فى الأغنية والأصلا هى مناحة طبعا فى رثاء شيخنا الخليفة حسب الرسول ود محمد ود بدر "أب آمنة"
وبالنسبة لكورس خلف الله، كان فيه عمنا الصديق واعتقد انه كان الوحيد من بين المجموعة الملتزم بالمشاركة فقط مع خلف الله، اما بقية الكورس فكانو اعضاء فى اتحاد الغناء الشعبى وبشاركو مع كل الفنانين
شكرا ليك يا سر تانى
وليك التحية والتقدير
03-16-2015, 10:43 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
زى ما قلت انه اكتر الفنانين تميزا فى اسلوب الكورس وطريقة مشاركتهم فى الأغنية كان المبدع محمد احمد عوض، وكان عنده فرقته الخاصة الما بتشارك مع اى فنان تانى واشهرهم طبعا "الطيب عبده" وبكون واقف اول واحد على يسار المجموعة، ومعاهم "عبد العزيز قسم" عازف الدومبا الأشهر وصاحب الصوت المغرد
ومن الشيالين المميزين برضو "دفع الله محمد الطيب" وهو الشخص طويل القامة البشارك فقط مع اخوه المطرب بادى محمد الطيب وما بشارك مع اى فنان تانى
وبالمناسبة دفع الله محمد الطيب فنان حقيقى وصوته مجاز فى الإذاعة
وحسب ما عرفت من الصديق عبد المنعم الزين الطيب وهو ابن عمهم، انه دفع الله قال مستحيل انه يتجرأ ويغنى طالما فى مطرب زى بادى محمد الطيب بغنى وده طبعا بسبب التقدير والإحترام والإعجاب الشديد بأخوه بادى
03-16-2015, 11:54 AM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
تعرف يا ابوذر .. معظم اعضاء فرقة الاستاذ محمد احمد عوض كانوا يعملون معه في مطعمه في الثورة الحارة السادسة والمشهور باسم الكشك الابيض ..ولعل ذلك هو سبب الانسجام الواضح بينهم..
مع ودي
03-17-2015, 05:00 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
لدي صديق لا يطرب إلا للأغاني التي يكون بها كورس. ومن أغنياته المفضلة أغنية يقول مطلعها "سلوى يا سلوى يا نسرين يا زهرة ويا ياسمين"، لم يكن يعرف اسم الفنان الذي يؤديها ولكنه يستمتع بأداء الكورس خاصة عندما يرددوا: يا يا. :):):)
لاحظت أن الشيالين (خاصة لمطربي دار فلاح) في عصرنا الحالي بدأوا يميلوا لإدخال حركات راقصة ومتناسقة وبعضهم بدأ يكتفي بالأداء (والرقص) بدون التصفيق.
03-17-2015, 06:59 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
ملاحظة هامة للغاية يا شتات وخاصة قيمة الوفاء التي تجسدت قبل عشرات الأعوام عندما انتقل أحد أفراد الكورس لرحمة الله وتأثر النور الجيلاني ونجم عن تأثره أغنية تخلد الفقيد بعنوان صحو الذكرى المنسية.
أداء الكورس مع كمال ترباس في "الفطن الوسيم" أيضاً قمة الروعة.
03-24-2015, 12:42 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا أباذر.. زمان عندنا أستاذ فيزيا إسمو رحمة الله في مسائل الدوائر الكهربية عندو نظرية إسمها نظرية " كش من ورا " .. أها انا اسة ح ابدا موضوع الشيالين ده بي نظرية كش من ورا وح أبدا ليك من شيالين الزمن ده .. شيالين أسة واقعين في غلط كبييير جداً جداً وبيفتكروا قصة إنك تكون شيال أو كورس دي حاجة ساااهلة جداً ..وأي تلاتة من أولاد الحلة بيكفكفو القميص ويصفقو بي شفتنة معناها مؤهلين يبقو كورس.. ومفتكرين إنو الشيال ما محتاج يكون صوتو سمح لأنو الجماعية حتغطي على الصوت .. عشان كده بقا أي زول عامل فيها شيال .. وده أكبر غلط وقعو فيهو فنانين أسة .. عن دراية وعن معرفة أكاد أجزم بل أحلف معظم شيالين زمان كان فيهم (لو ما كلهم) شوتو بيكون أجمل من الفنان ..بل أمشي ليك أبعد من كده ولا أخفيك سراً بتكون عارفو إنو معظم فنانين زمان بيكون في شيّال صوتو بيكون مطابق تماااماً لي صوت الفنان الأساسي.. يعني انا بعرف شيّال في فرقة ترباس صوتو تيبيكال لي ترباس..وبعرف واحد في فرقة النور الجيلاني بيغني للنور زي ما قال الكتاب..وبعرف واحد مع عبد الله البعيو صوتو البعيو زاااتو .. وديل مهمتهم الأساسية يسندو ويشيلو الفنان في لحظات كده لمن يقع أو يدقس ينسى حتة في الاغنية ومرات ممكن يكملو ليك الحفلة عديييل.. شيالين أسة قايلين القصة كوراك ..وهجيج ..وصفيق.. ووالله ن الموضوع لأكبر من ذلك بكثييير ..
03-24-2015, 01:22 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
عارفك بتكون مدكن الحاجات السمحة جوه وما بتمرق منك بالساهل
وصدقا لكلامك يا عمر
وزى ما انت قلت، ودى حاجة مهمة جدا، انه اصوات معظم الشيالين بتكون اصوات مطربين عديل كده والشغلانة ما بس مسألة ترديد وخمج كم صوت مع بعض
وانا ذكرت هنا فى نفس الموضوع احسن مثل وهو "دفع الله محمد الطيب" شقيق العبقرى بادى وكيف انه، دفع الله يعنى، فنان حقيقى وصوته مجاز فى الأذاعة كمان وزول مطرب عديل
وكيف انه "عبد الله محمد" اصلا كان شيال مع اولاد شمبات
وفى كتير من النوع ده
حاليا موضوع الشيالين بقى محتاج مراجعة
ولو لاحظت معاى
من بعد ظهور برنامج "خلاصة الحوارى" فى قناة امدرمان، وخصوصا بعد ظهور "الظاهرة" احمد هاشم
بدت مجموعات كتيرة جدا جدا تتكون وتؤدى بنفس الأسلوب والطريقة بتاعة احمد هاشم
انا من وجهة نظرى المتوااضعة، شايف انها حاجة ايجابية كويسة واحسن من الهرجلة بتاعة الأورج او الأورغن السدت نفسنا من الغناء واستمرت حوالى عقدين من الزمن
بس بشرط
انه زى المجموعات الشبابية دى تتأسس على قواعد ودعائم حقيقية، يعنى اهم شى صوت المؤدى، وأهم منه كمان اصوات الشيالين
واكيد حيكونو ماسكين فى نفس الأغنيات الجميلة، وفى اغنيات والله يا عمر عمرها بكون قريب مية سنة عديل كده من اغنيات الحقيبة القدية
ما مشكلة خليهم يقلدو، بس برضو بشرط انهم ما يغيرو اللحن ولا اى واحد منهم ينطق مفردات بطريقة غلط
والشرط الأهم من الأهم كمان
انهم بعد ما خلاص يثبتو مواهبهم ويتمكنو ويعرفو مداخل ومخارج فن الغناء
انهم يغنو انتاجهم الخاص بيهم بعد داك
ولا شنو
03-24-2015, 01:45 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
غايتو ( احمد هاشم) دا بيفقع لي مرارتي هو قايل القصة بوب مارلي للشعر !!؟
فعلاً في شيالين من ناس زمان صوتهم اخطر من الفنان ذاتو المهم من اخر الشيالين البقوا فنانين اخونا ( حسن شرف الدين) و كان شيال مع عمنا المعلم عبد الوهاب الصادق ( ربنا يديهو العافية)
سلام يا ابو ذر و بوست سمح يمكن يخلينا نرجع لهذا المنبر الشرير
03-24-2015, 02:28 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أها يا اباذر انا مع أخوي الكاشف سفيان فيما يتعلق بي أحمد هاشم.. انا شايفو مكتتتر المحلبية شوية فيما يتعلق بي غنا الحقيبة ..صاح هو إحساسه عالي ومعظم الأوقات بيكون هايم مع الأغنية لكن انا شايف مشكلتو الأساسييية في صوتو .صزتز ما سمح ..صوت عادي وما صوت ناس الغنا الشعبي البعرفهم ..بس ده ما بيمنع إنو قدم أسلوب جديد لفت بيهو الإنتباه .. طبعاً واحد من البرامج المفضلة عندي وما بقوتو برنامج خلاصة الحواري (شايف غيرو الإسم لي غصن الرياض ).. بالمناسبة متفق معاك شدييييد جداً في إنو الغنا الشعبي أرحم وأجمل وأفضل مليون مرة من كركبة الأورغن ..عن نفسي البنقز مع الطبلة مع الدلوكة بتهييجني عدييل وبقرررب أدخل في حالة هيستيرية طربية لمن أسمعهم ..وبالرغم من إنو الواحد شبه عقل وبطل الرقيص لكن ما بكضب عليك الايقاعات الشعبية دي بتستفزني طوالي.. بالنسبة للشيالين فانا عندي جدي عم الوالد (عمر الشريف) كان الشيال الأساسي مع ترباس (إمكن ذكرت الحتة دي قبل كده هنا) ..ووالله يا اباذر هذه العمر الشريف عليه الرحمة صوتو أجمل من كمال ترباس وزول غنااااي ..ترباس كان بيختو في النص والمايك الرئيسي قصادو .. في الجيل الجديد ده في زول ولو إنو مقلد لكن لو كان ركز مع الغنا الشعبي كان عبر ..مصطفى ود أمبلينة أو كما يعرف بي ود أمبلينة البيغني لي محمد أحمد عوض.. أما الزول المبدع جد وضييع روحو فهو خالد نحل ..ولو إنو فيو لمسة من ترباس لكن برضو إحساسه عااالي جداً .. بالمناسبة الشيالين ديل ناس جميلين جداً يا اباذر وعندهم قصص ونوادر وحكايات ممتتتعة..معظم الشيالين عبارة عن مراجع قصصية وموثقين ..عايز تستمتع بالحكي قوم يوم أقعد معاهم واسمع قصصهم..معظم حفلات ترباس زمان كنت شاهد عليها وكنت محظوظ كم مرة ركبت معاهم في حافلة العازفين .. برضو جارنا في الحي في العباسية (يعقوب) أبو نضارات وهو شيال لي محمد احمد عوض .. شلاضيمو برضو لو بترعفو .. وعيون كديس جارنا .. والقائمة تطوووول ..
تخريمة : متفائل بي إنو البوست ده حيجيب ناس حلوين ونستمتع بالونسة فيو برانا ..
03-24-2015, 03:14 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
اها انا لما دخلته هنا كنت عايز اتكلم عن النفرين ديل تحديداً ( نحل و ود ام بلينة) ياخ نحل دا زول الله خلقوا فنان من غير الغناء ذاتو زول عجيب و ونااااس و بتاع قصص اعجب من عجيبة و في الغناء غنااااااااي لما بهناك بس مهمل شديد اي فيهو حاجة من ترباس نعم لكن الزول دا عندو طريقة غناء حقتو براااااهو و عندو فرقة و كورس اعوذ بالله اصلي ما شفته ناس شفوت زيهم قريب دا في الغناء و الغناء الجماعي ياخ حفلة بخالد نحل و مجموعتو معناها بهجة لما تحيرك و مافي جنس مخلوق بكون تاكل ساااي .
مصطفي بخيت ( ود ام بلينة) دفعتي من الابتدائي في فصل واااحد و فردتي لا يزال و اصلاً الغنائي في بيتهم اخوهو ( محمد) - اكبر منو لكن برضو كان معانا في نفس الفصل- و مصطفي من الابتدائية في الجمعية الادبية كان بيغني لمحمد احمد عوض و كانو الكورس بتاعنو هم مجموعة من شلة الفصل - جمال الناقش و السادة و غيرهم- و ديل للأمانة اول كورس اشتغلوا معاهو لما بدأ يظهر جد جد لحدي ما جاء اخونا ( عثمان محمد احمد عوض) دقه جرس و وقفهم و اقنع مصطفي انو يشتغل مع الكورس الرئيسي بتاع محمد احمد عوض. طبعا يا عمر الفاروق و ابو زر عمنا محمد احمد عوض في اياموا الاخيرة صدق لمصطفي انو يتغنى باغانيه هو حي او ميت مصطفي يغني ودي كانت قصة عجيبة لانو مصطفي و معاهو الشلة بتاعتو سجلوا شريط براهم كده و بطريقة تقليدية و مصطفي شال الشريط سمعو لمحمد احمد عوض عمنا محمد احمد قال ليهو التسجيل دا انا غنيتو في سنة ٨٠ بس في حاجة عجيبة الكورس دا ماهو الكورس حقي ... مصطفي حكي ليهو القصة و عمنا صدق ليهو يغني .
03-25-2015, 05:07 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
لأنه قطعا المقلد بكسر اللام، ما حيكون زى المقلد بفتح اللام مهما عمل
تجربة مصطفى بخيت تجربة عجيبة، خصوصا فى بداية تغنيه بأغنيات المبدع محمد احمد عوض لأنه صوته فى المرحلة ديك كان قريب جدا من صوت محمد احمد عوض، ولو متابع مصطفى كويس، حتكتشف انه صوته اتغير شويه فى السنين الأخيرة
ويا ريت لو حاول يطلع من جلباب محمد احمد عوض، ويحاول يعمل اعمال جديدة بنفس اسلوب المرحوم، خصوصا وانه مدعوم من أسرة محمد احمد عوض، وحتى انه كان فى جزء من الكورس الأساسى بشاركو معاه فى البدايات، قبل ما السنين والعمر يعمل عمايله فى الناس المبدعين ديل
قريب ده شفت عمنا "الطيب عبده" وهو زى ما تقول زعيم مجموعة الكورس، والله ما صدقت لما شفته، ربنا يديه الصحة والعافية ان شاء الله عمنا الطيب كبر جدا واتقدم بيه العمر وأكيد برضو باقى المجموعة
03-24-2015, 04:43 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
بالزبط يا ابو زر قصة الكورس دي هي حاجة اكبر بكتير من انهم شيالين و هي في اعتقادي انو عندها اساس فكري عديل كده لاني بعتقد انو طبيعة المجتمع السوداني المحافظ جداً و الرافض و السمى الفنانين بصعاليك لابد انه كان يتواجه باكتر من فرد مغنى ولابد يكون هناك مجموع يودي الاغنية الواحدة غايتو انا بتخيل لي كده ولا شنو ؟ هاهاهاها
بالمناسبة فكرة جماليات الكورس دي عايز تشوف عالميتها شوفها عند عمنا راي شارلز ياخ دا زول مجنون جن .
03-25-2015, 05:44 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أبو ذر يا حبوب.. عارف عندي مرات مشاترة كده ..قصة فنان مثقف وواعي دي ما قاعدة تظبط معاي لكن ممكن أقبل فكرة فنان عارف روحو بيعمل في شنو .يعني بصراحة كده ما أعتقد ترباس أو الراحل محمد أحمد عوض كانوا مثقفين لكن كانو عارفين روحم بيعملو في شنو وصبرو على المبدأ والقناعة حقتهم لحدي ما وصلو الحتة العايزنها.. النقطة الأهم في الغنا ده إنو يكون عندك العبقرية عشان تتميز..ما لازم العبقرية في إنك تفكر تجيب شي جديد ومختلف بالرجااالة كده ..لكن في عبقرية فطرية كده بيديك ليها ربنا .. محمد أحمد عوض الله يرحمه كان عندو طاقم شيالين كبير جداً مقارنة بي الكورس المعتاد أبو تلاتة وأربعة لي درجة إنو شيالين محمد أحمد عوض كانو بيتقسمو مجموعتين ولو وقفو مع بعض بيعملوا (كيرف) أو نص دائرة عدييل..وده بيوريك إنو الشغلانة ما ساي .. من أجمل الشغل العجبني في قصة تبادل الشيالين مع الفنان أغنية يا عيوني ما قلتي من الريدة تبتي للفنان ترباس ..فيها مجادعات لطييفة جداً والشيالين لعبو فيهو دور أسااااسي وأخدو راحتهم .. في تسجيل جميييل جداً لي محمد أحمد عوض في البيت جلسة أسرية مع التجاني حاج موسى بيغني فيها انا فاكرك معايا ..فتشو وأستمتتتع بالاداء الخرااافي ولاحظ كيييف الشيالين غرقانين مع الاغنية ..
03-25-2015, 06:11 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
يعنى ما ضرورى الفنان والمغنى يتكلم ليك عن الديالكتيك او تأثير الوجودية السارترية فى فكر ما بعد الحداثة او يحكى ليك عن علاقة البروليتاريا بالواقعية الإشتراكية
هههههههه
المهم بس زى ما قلت ليك
الفنان يكون "ناقش" وفارز الشغلانة كويس
الكورس برضو ابدع وتجلى فى "الشبه باين" مع ترباس
وبرضو فى "عينيا ما تبكى"
كدى خلينى النشوفن ليك كان القاهن
03-25-2015, 06:03 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
يعنى من بداية تكون المجتمعات البشرية، فى أى مكان ومع بدايات التعبير عن حياتهم فى كل الأنشطة
كان الغناء الجماعى هو البداية
عشان كده حضور الكورس أو الجوقة المصاحبة أكيد جا كتطور طبيعى لشى مألوف ومعروف
بمناسبة "الصعاليك" أو "الصيع" حسب نظرة الناس فى مجتمعاتنا السودانية يمكن لغاية بداية االقرن العشرين واعتقد انه النظرة دى كانت محصورة فى مناطق معينة فى السودان لأنه فى مناطق تانية الغناء كان طقس ضرورى وجزء من الحياة نفسها لأنه ارتبط بممارسة الحياة نفسها زى ما بنلقى فى مناطق جنوب السودان سابقا وفى غرب السودان برضو الى حد ما يعنى النظرة للغناء، وغناء الرجال تحديدا، ما كانت سلبية ولا يمكن حتى فى انسان فكر فيها مجرد فكرة على انها شى ما كويس
كل فنون الغناء فى العالم تقريبا لا تخلو من الكورس المصاحب
فعلا عمنا "راى تشارلز" بديع مع الكورس
سمعت Unchain my heart
الكورس مبالغة بالجد
03-25-2015, 06:26 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
والله يا خال الكحلاوي ده حالة إستثنائية جداً شديييد خاااالص أوي.. انا ما شوفت لي زول بيستمتع ويمتع روحو بالغنا قدر الكحلاوي ده .. ياخ الزول ده بيغني وهو مبتسم طوااالي..وبيكون مرتااااح ..للدرجة البتخليك إنت زاااتك ترتاح معاهو .. بمناسبة الثقافة دي قبل كم يوم حضرت إعادة لي حلقة دنيا دبنقا بتاعت محمد سليمان ..كان مستضيف فيها ناس الغناء الشعبي في وجود الشعراء عمر البنا وعتيق .. ياخ عتيق ده طلع مثقف ثقافة تحيير..وكلامو رااايق ومقعععد ..الزول ده كان فايت الناس مسافة عديييل.. الغريبة كل ما أشوف عتيق بتذكر الكحلاوي ..وزمان كنت بلخبت بيناتهم ..
03-25-2015, 06:52 AM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
غايتو الكحلاوي ده عندو بتو غناية غنا ..موبااالغة ..كحلاوية بس .. :) بعدين كان ما بحب الكاشف عليك الله انا يا طير دي كان عذبا قدر العذاب ده ؟؟؟ يا طير ..يا طير ..يا طير يا طيير يا طييير ..اااخخخخخ انا .. ويعضي معاها شلفتو ويبتسم ..ويمشي بعييد من المايك ويلغي وجود كل الحاضرين حولو ويمتتع روحو ..
أشترا ليك بي حاجة غريبة يا أباذر ؟ عارف أجمل شيالين سمعتهم وين ؟ وإمكن تتخلع وتقول عمر ده عوير ؟ :) الحقيقة هم ما شيالين ..شيالات .. عندي تسجيل لي حفلة عرس تقريباً لي عثمان حسين .. أها واضح من التسجيل إنو عثمان حسين كان بيغني وحوالينو بنات العرس .. ياخ ديل شالو معاهو بي طريقة جميييلة خلاص..عفوية في الغنا وأصوات متناسقة للحضور .. أها ديل أجمل شيالين..الناس البيشيلو معاك وهم طربانين .. ياخ ديل شالو معاهو أغنية أوعديني بي كلمة منك يا سلااام ياخ.. وفي مسامحك يا حبيبي بيعملو شغل لطييف شديد..ابو عفان يقول ليهم إنت ليي ..وهن بي صفقتن وعيونن المكسورة والباروكة (ده خيال مني) يقولن نور عينية .. يقول ليهن غيروك..ويقولن ليو بدلوك.. ياخ مااالك يا اباذر يااخ .. عشان كده مرات تفاعل الجمهور معاك بيخلي الجمهور زيو وزي الشيالين ..وبينتج ليك نوع من الغنا السمح والاداء اللذيذ..
شكلي فتلت ليك فكرة البوست :)
03-25-2015, 09:02 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
ابوذر.. غايتو للضمان كده اليوتيوب ما بيشتغل عندي في المكتب عشان كده ما شايف.. لكن عيون كديس ده زول طويل وكما تغني حنان بلو بلو شنبو غزير .. :) طبعاً من التسمية فمفروض العيون تكون فيها نطيطة وكده :)
03-25-2015, 01:42 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
فيروز دي السهل الممتنع البيقولها زاااتا .. انا ما لقيت لي زول مريح وبيغني اغاني مريحة زي الكائنة دي .. لحدددي أسة محتار منو القال أم كلثوم سيدة الغناء العربي ومحمد عبده فنان العرب؟؟
03-26-2015, 07:32 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
النصييحة الشيالين الما اتوفقو ابداً وخصمو من رصيد الاغنية هم الشيالين الشوايقة.. ما طوورو روحم وفي نفس الوقت طريقة تغيير صوتهم بتعولق الاغنية ..علماً باني محب جدا لغنا الشوايقة..
03-26-2015, 09:59 AM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
اصوات مصنوعة وزى اصوات اولاد الإبتدائى فى الجمعية الأدبية
المجنوعة القديمة البدت مع النعام واسحق كرم الله وبعدهم مع اليمنى ومحمد كرم الله والباقين كانو كورس حقيقى ومالين ايدهم فى الغناء واصواتهم سمحة ومماليه مركزها
لكين شيالين الشايقية فى السنين الأخيرة ما عندهم اى طعم
اتذكر محمد كرم الله ربنا يرحمه بعد رجع من بره السودان ورجع للغناء تانى
اشترك معاهو نفس الكورس القديم الأولانى
وده دليل على انه عارف الحاصل
عندى موضوع كامل عن غناء الشايقية الحالى
كتبته فى سودان دوت نت
ده نخليهو موضوع براهو
03-26-2015, 09:57 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
هاهاهاهاهاهاهاهاهاهاها و صلتو ( شيالين الاغنية الشايقية) هاهاهاها ديل عايزين زول يشيلهم عديل كده ياخ كعبين و بيستلفوا اصوات كعبة و لو مدو يديهم قدام و صفقوا وراء بتظهر حاجات ما كويسه هاهاهاهاها و لو جمعوا يديهم علي صدورهم وصفقوا مدني بتغرق من قدام لووووووووووب . بالزبط يا عمر الاغنية بتاعة ( الشوايقة) سمحة لكن بوظه الكورس بشكل كاااامل عايزين تتاكدو من الكلام دا في فديو يوتيوب للعملاق ( محمد جبارة) بيغني فيهو اغنيته الشهيرة للأم بس الكورس بتاعو ولدين شابين لابسين ( تشيرتات و بنطلون) كان طعم الاداء عندهم جميل لانو اختلف من الطريقة التقليدية بتاعة الشوايقة.
بالمناسبة انا ما عايز احرف البوست لكن طالما القصة ( كورس و شيالين) بتمنى انكم تجيبو فديوهات للشيخ المادح ( على المبارك او علي الجذار كما هو معروف) - الله يرحمه و يدخله الجنة بغير حساب- الزول دا عندو مجموعة بتشتغل معاهو عجيييييبة . علي المبارك ذاتو هو اسطورة في روحو دي .
03-27-2015, 03:41 PM
عبد المنعم سيد احمد عبد المنعم سيد احمد
تاريخ التسجيل: 10-13-2003
مجموع المشاركات: 11824
فعلا حضور الكورس مع النور الجيلانى اساسى جدا ومكون رئيسى لأى أغنية عنده
يمكن لأنه النور لما بدأ كان ماخد اسلوب الفنانين الشعبيين زى ما بيطلق عليهم يعنى ناس عبد الوهاب الصادق وترباس، فى عدم استعمال اوركسترا موسيقية كبيرة والنور طبعا اصلا بدأ من دار فلاح
بهدى ليك تجربتين من النور الجيلانى
الأولى مع الكورس الأصلى البدأ معاه من البداية والتانية مع المجموعة الجديدة
وفى التجربتين ابداع حقيقى وتوظيف عجيب للكورس
03-29-2015, 08:39 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8759
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
ياسر منصور عثمان
ياسر السر
hassan bashir
عمر الفاروق
سفيان بشير نابرى
عبد المنعم سيد احمد
الصادق اسماعيل
فيس بوك
تويتر
انستقرام
يوتيوب
بنتيريست