خاتم سليمان

شرح مفصل و معلومات للتقديم للوتري 2020
فتحي الضو في أستراليا
التحالف الديمقراطي بمنطقة ديلمارفا يدعوكم لحضور احتفاله بالذكري 54 لثورة اكتوبر
Etihad Airways APAC
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 17-10-2018, 10:42 PM الصفحة الرئيسية

مدخل أرشيف للعام 2015م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
21-12-2014, 04:16 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


خاتم سليمان

    - ياعمر وقت جيت شيل الجك دا وجيب لينا الفول من عم سليمان عشان اعمل ليكم الفطور قبل الاولاد ما يجوا من المدرسة ..
    وبعد قليل يعود عمر يدخل الفول للمدام ويتكئ في الصالة ليقلب جريده كان يحملها .
    -أجي يا عمر تعال شوف دا .
    -في شنو يا وليه ؟؟
    -فولك الجبتو من سليمان دا لقيت فيه خاتم ؟؟
    - خاتم ؟ خاتم شنو ؟ اصلوا الراجل الفقري دا لازم يسممنا يوم وانا ما حا اخليه الليلة..
    -لا لا لا عليك الله خليه يا عمر راجل غلبان وتلاقيه ما قاصد يكون واقع من يده ..
    -يا وليه خليني الليلة لازم اجيب له ناس الصحة ياخ دا راجل مقرف ..
    شادية تلحق بعمر عند الباب وهي تترجا فيه الا يخلق مشكلة مع عم سليمان الغلبان ..
    -يا شادية دي المرة الكم مرة حجر بطارية ومرة مش عارف شنو ؟؟
    - معليش خليه عشان خاطري ..
    يرجع عمر على مضض وبعد قليل ..
    - أجي يا عمر سجمي ؟
    -في شنو تاني يا وليه ..
    - الخاتم طلع بتاع دهب ومختوم كمان ..
    -شنو كدي وريني ليه .. صحي كلامك يلا اهو رزق ..
    -لا لا لا رزق شنو لازم ترجعوا ليه ..
    -يا وليه هسع ما قلتي لي انسى الموضوع عديه ..
    - بس المرة دي طلع بتاع دهب يعني حق الناس ..
    - يعني لو نحاس نتسمم بيه نحن ولو دهب يظهر ليه أصحاب دي عدالة شنو ؟؟
    - لكن الدهب ما اموال ناس ؟؟
    - وبطنا دي ما اموال ناس ما قعد نصرف عليها الشي الفلاني شي مستشفيات وادوية وكوارع ؟
    -يا عمر حق الناس ما ينفعنا ..
    -خلاص انا برجعوا ليه ولو نكروا قال ما حقي تاني ما تسأليني منو ..
    -موافقه ..
    ويذهب عمر الى دكان سليمان ..
    عمر : دا شنو البتسوي فيه دا يا سليمان ؟؟
    سليمان : في شنو يا راجل الله يكفينا شرك ..
    عمر : تخت لينا خاتم في الفول انت عاوز تسممنا ؟؟
    سليمان : يا راجل يا سلباط خاتم شنو البختو في الفول كمان ..
    عمر : يعني الخاتم اللقيناه في الفول دا ما حقك ..؟
    سليمان : لاحقي ولا بعرف خاتم ولا شفتو يا اخوانا عمركم سمعتو بفول فيه خاتم .. الفول يختو فيه بيض يختو فيه طعميه لكن خاتم دي شنو ..
    عمر : و يختو فيه حجار بطارية ولا نسيت ..؟
    سليمان : يا راجل انت زول بتاع مشاكل وعايز ليك سبب معاي امشي بلا لبط معاك لا شفت خاتم ولا بعرف خاتم ..
    عمر : قدام الرجال ديل يعني الخاتم اللقيناه في الفول دا ما عندك بيه علاقه ..؟
    سليمان : ولا عندي خاتم في الفول وامشي اعمل لبطك دي مع زول تاني ..
    عمر : خلاص متشكر .
    يعود للبيت .
    - اها قال شنو : قال لا حقه ولا يعرف عنه حاجة قدام رجال الحلة ...
    -خلاص الحمد لله ..
    -انت قلتي لي منو من الاولاد قال عاوز عجله جديدة ..
    -كلهم عايزين ..
    - قولي ليهم أبشروا ..ها ها هاهاهاها

    يتبع

    (عدل بواسطة درديري كباشي on 24-04-2015, 07:43 AM)
    (عدل بواسطة درديري كباشي on 02-09-2015, 03:43 PM)

                   |Articles |News |مقالات |بيانات

21-12-2014, 04:24 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    2

    من الصباح يقوم عم عمر قبل الذهاب الى عمله في سوق الخضار يطمئن على الخاتم ينظفه مقررا التوجه الى دكاكين الصاغة لصرفه .. وقبل ذلك مبشرا الوليدات ..
    - أنت يا خالد العجلة داير لونها شنو .
    - تتكلم جد يا ابوي .
    - أشمعنى يا ابوي تجيب لخالد انا نتيجيتي أحسن منه انا جيت الخمستاشر وهو الخمسة وعشرين .
    - أصبر أنت يا لديح كلكم جاييكم حتى عموري الصغير حا نجيب ليه .
    - يا ابوي ونحن البنات كيف عجلات برضو ؟
    - البنات حنجيب ليكم حلقان .
    - هوي يا راجل أنت قايلوا خاتم سليمان بالجد ولا شنو ؟
    - بلا سليمان بلا زفت نحن الكلام دا مش أنتهينا منه أمس .
    - لا أنا قصدي خاتم سليمان بتاع السحر ؟
    - هاهاهاها كان كدا معليش .
    يركب عجلته متوجها ناحية الصائغ .
    وأمام أول محل يا داب فاتح والصائغ يقول يا هادي يدخل عم عمر المحل ويستخرج االخاتم .
    - بالله يا معلم ما تشوف لينا الخاتم دا يجيب كم ؟
    - كدي .. يأخذ الصائغ الخاتم ويبدأ يقلب فيه ويدقق مرات يشمه وتاراة يتذوق طعمه مما زاد تذمر عمر .
    - شنو يا عمنا تشم وتضوق هو دهب ولا دكوة؟
    - يا زول مالك عاوز تتدخل في شغلنا كمان ؟ أنت عاوز تبيع ولا عندك كلام تاني .؟
    - لا العفو يا عمنا بس لانه عندي شغل محصله نحن ذاتنا ناس سوق زيكم ولو فوتنا الصباحية دي يمكن الرزق ما ينقبض تاني وانت سيد العارفين .
    - صدقت يا ولدي بس أصبر شوية لانه كشف الدهب مسألة ما ساهلة كدا ؟
    - ياخ دا دهب مختوم أنت ما شايف .؟
    - أنت جايبه من وين ؟
    - من الفول .
    - شنو ؟
    - لا لا لاقصدي أنه هو خاتم المرة . الظاهر علينا جعنا هاهاهاهاهاها ..
    يلاحظ أن الصائغ يسحب درج ويدقق في صور داخل الدرج وتاره ينظر للخاتم أخيرا يستخرج جواله ويعمل منه محاولة اتصال ( مسكول ) .. عمنا عمر يلاحظ للحركات ويشعر بالقلق .
    - شنو يا عمنا هي الحكاية اصلا طويلة كدا ؟
    - طبعا هو انت أول مرة تبيع دهب ولا شنو ؟
    ثم يبدأ يتظاهر كأنه يوزنه ويضرب في السعر قبل أن تقف سيارة ( بوكس ) وينزل منها عدة شبان بزي ملكي ويؤشر لهم الصائغ ناحية عم عمر .. وليمسكه اثنان من كتفه وثالث يتناول الخاتم من الصائغ ويجروه جرا ناحية البوكس .. غير آبهين لاحتجاجه .
    - يا اخونا في شنو يا اخوانا استهدوا بالله .. طيب العجلة يأ اخوانا ارفعوا معاي عجلتي ..
    يلقى به في ظهر البوكس وتتجه به العربة ناحية جهه مجهولة حتى الآن .
    يتبع .
                   |Articles |News |مقالات |بيانات

21-12-2014, 04:36 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    3

    تتجه العربة البكس بعم عمر ناحية مكاتب المباحث والعساكر الثلاثة يحيطون به جلوسا على حافة البوكس وهو يقرفص في وسط الصندوق .. الشئ الوحيد الذي طمنه قليلا استاجبوا له ورفعوا معه العجلة .
    - يا جماعة ما تفهمونا في شنو مودننا على وين ؟ كان للخاتم انا ما عايزه شيلوه اصله هو خاتم سليمان بتاع الفول نكره وانا ما فارق معاي ؟
    لا أحد يرد أو يتجاوب .وأخيرا صمت مستسلما لمصيره .
    وفي المكاتب يستقبلهم أحد الشباب بزي ملكي ويبدو أنه رتبة .
    - سعادتك هو دا صاحبنا بتاع الخاتم ..
    - ما أدلى بأي أقوال في الطريق أو اعترف لكم بباقي المسروقات ؟
    - والله سعادتك يقول في كلام ما مفهوم مرة خاتم سليمان ومرة فول الظاهر عليه راسه ما حلو ولا يكون بتاع سيجارة .
    طيب جيبوه هنا عندي جلسوه في الكرسي ونادوا لي معاكم عثمان مقانص نحن نعرف نخليه يعترف .
    هو يسمع في هذا الحوار وتزداد عيونه اتساعا وخاصة بعد ما شاف شخص طويل القامة مفتول العضلات يدخل عندهم يرتدي فنلة بأكمام قصيرة تبرز عضلاته المتكورة وعروقه النافرة . يبدأ عم عمر يبلع في ريقه ويعرف أن الموضوع سيتطور .يجلسوه على الكرسي ويبدأ الضابط التحقيق معه .
    - يلا يا عم عمر عايزنك بكل هدوء تقول لينا الخاتم دا جبته من وين. ووين باقي المسروقات عشان تختصر لينا الزمن وتحافظ على صحتك .أنت براك شايف بنية من عثمان دا يمين مرتك زاتها ما تعرفك تاني .
    - والله يا جنابو الخاتم دا جانا في جك الفول .؟
    - شنو خلاص بدينا اللف والدوران .. وينظر الى العسكري الذي يبادره بكلمة تجعله يطيح على الارض ويقوم مسرعا.
    - الا الا في شنو يا جنابو ياخ والله يجنابو زي ما بقول ليك دا خاتم سليمان لقيناه في الفول .
    يضحك الظابط بشدة : لا دي جديدة لنج ما حد سبقك عليها .. خاتم سليمان لقيتوه في الفول ؟ انا سمعت بخاتم سليمان في سمكة . الظاهر عليه خاتم سليمان بقى مواكب الظروف عارف الناس ما بتقدر على السمك ها ها ها ها .
    شوف هنا خليك عاقل يا عمر وانت زول كبير ما وش بهدله نحن عندنا بلاغ من أسره غنية الشغالة سرقت منهم الدهب كله وهي دي صوره .. شايف خاتم سليمان بتاعك دا موجود وسط الاساور ( يعرض عليه الصور )
    - أهااااااااا يا جنابو أنا يداب فهمت بس عليكم الله خلوني اشرح ليكم القصة بالتفاصيل بدون ضرب ولا عصبية .
    - يلا أتفضل نحن منتظرنك
    يتبع
                   |Articles |News |مقالات |بيانات

21-12-2014, 08:46 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    .
                   |Articles |News |مقالات |بيانات

22-12-2014, 09:51 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    4
    لا أها يا عم عمر أحكي لكن اوعك تقول لي خاتم سليمان ولا مصباح علاء الدين فاهم ؟ بكسر ليك وشك دا ..
    - حاضر يا جنابو .أول انا ساكن جمب السوق في أول محطة مواصلات وعندي مسطبة في زنك الخضار .أها كل يوم بجي أفطر مع الاولاد في البيت وارجع شغلي تاني .. عشان نوفر مصاريف وكدا .
    - أختصر أنت حا تحكي لي قصة حياتك كلها ؟
    - ما أنا جييك يا جنابو أصبر علي شوية ..أها أمس المرة قالت لي لي شيل الجك يا عمر وجيب لينا فول من عم سليمان عشان نعمل الفطور .( قبل ما يتم الجملة تأتيه لكمة في فمه من عثمان مقانص يطيح على الارض .)
    - ضاربو ليه يا عثمان ؟
    - ما شايفو سعادتك تاني جاب سيرة الفول وسليمان ؟
    - ما هو بيحكي .... تاني ما تضربه الا بتعليمات مني سامع ولا لا ؟
    - حاضر سعادتك .
    - معليش يا عم عمر واصل حكايتك .
    يبدأ عم عمر يمسح الدم الذي بدأ يسيل من فمه بعمته . ويواصل .أها اخذت الجك ورحت لعم سليمان جبت الفول .. وقعدت أقرا في الجريدة . قامت المرة قالت لي الحق يا عمر لقيت خاتم في الفول .أنا طبعا هجت لانه عم سليمان دائما فوله مرة نلاقي فيه حصى تمر ومرة حجارة وزعلت .أخذت الخاتم ورحت سألته منه نكره قال ما عنده علاقه به قدام رجال الحلة .أها طبعا أنا قلت رزق ربنا جابوا لينا في الفول قمت الصباح رحت أبيعه للصايغ وحصل الحصل ..
    - همممم لا خلاص وضحت الصورة وكلامك منطقي و واضح أنك ما وش أجرام . طيب تعالوا يا عادل وعاطف .أمشوا المحطة الاولى جمب السوق في واحد بتاع دكان أسمه سليمان جيبوه وتعالوا .
    - سعادتك لو أبا يجي معانا ..؟؟
    - يعني كيف ما يجي معاكم دي عايزة ليها وصية كمان ولا نحن بنعلب ..
    بعدها يقدم جك موية لعم عمر يغسل وجهه وجراحه . وبعد ساعة يدخل العساكر بصحبة عم سليمان ومورم الوجه تبدو عليه آثار الضرب أول ما يجد عم عمر .يبدأ يصيح
    - هو دا أنت والله انا عارف اليوم دا ما حا يعدي على خير من جيتني أمس . مصايبي كلها منك أنت ياخي أنا ارحل اسيب ليك الحلة دي .؟
    - شنو أنت داخل شمال وتتكلم مع المتهم فوضى هي تعال هنا أجلس قدامي .
    - معليش سعادتك ياخ الراجل دا ممغصني ومكرهني الشغل أها كمان الليلة جاب ليه بوليس كمان .
    يتبع
                   |Articles |News |مقالات |بيانات

22-12-2014, 10:00 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    5
    أسمع هنا يا سليمان بتاع الدكان عم عمر دا قال لقى خاتم في الفول الاشتراه منك وقال الخاتم تبعك أنت .
    - يا جنابو والله الراجل دا بتاع شبك وناس الحلة كلهم عارفنه ومتلحني أنا بالذات مرة يقول لقى حجر ومرة مش عارف شنو .
    - حجر بطارية .
    - أسكت يا عمر ما تقاطع . واصل يا عم سليمان .
    - أها من أمس جاني في المحل وقال لقى خاتم ومش عارف شنو قدام ناس الحلة .
    - لكن يا عم سليمان المرة دي طلع خاتم دهب .
    - خاتم دهب ؟؟؟؟؟ ويتبسم بخبث . محاولا أن يلتف على الموضوع بعد ما تغيرت الخامة .
    - أيوا ما سمعت .؟
    - أهاااااااااااا أتذكرت خاتم الدهب صاح صاح صاح المرة قالت لي شيلوا لمعوا في الصايغ عشان عندهم عرس عند قرايبها . الظاهر كنت خاتيه في جيبي ووقع مني في القدرة .
    - يعني بتقر أنه الخاتم بتاعك ما بتاع عم عمر .
    - أيوا صاح تبعنا نحن يا جنابو ممكن تسلومنا ليه .؟
    - نسلمك ليه ؟ بالبساطة دي ؟ .. اولا الخاتم دا مسروق معاه دهب تاني نحن عايزنه .
    - شنو لا لالا لا يا جنابو دا ما بتاعي ولا عندي بيه معرفة .
    - ما بتاعك ؟ خلاص يا عمر أنت خد عجلتك وأمشي نحن آسفين الحمد لله الخاتم طلع خاتم سليمان فعلا . خلي لينا عم سليمان دا نحن بنعرف نجيهه . كمان قال المره قالت ليه لمعو ..
    - ممكن يا جنابو تخلوني أنتظر معاكم شوية .؟
    - تنتظر لشنو يا عم عمر عايز تتفرج في صاحبك ؟ والله ارجعك تاني لدائرة الاتهام .
    - لا لا لا خلاص مشيت أنا قلت يمكن تحتاجوا لي في حاجة .. بس براحة على عم سليمان دا بنية عثمان مقانص دي بتقطع فيه حاجة هاهاهاهاهاهاها
    يتبع .
                   |Articles |News |مقالات |بيانات

25-12-2014, 07:45 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    .
                   |Articles |News |مقالات |بيانات

27-12-2014, 02:47 PM

عزالدين عمر
<aعزالدين عمر
تاريخ التسجيل: 08-10-2014
مجموع المشاركات: 143

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    متابعة لصيقة وإمتاع حد الاشباع ..
    شكرا درديري ..

    منتظرين الباقي
                   |Articles |News |مقالات |بيانات

28-12-2014, 03:31 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: عزالدين عمر)

    شاكرين يا عزالدين

    انشاء الله راح نكمل المسلسل بعد انقطاعه من المصدر على قول قناة قون ههههههه
                   |Articles |News |مقالات |بيانات

28-12-2014, 06:39 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    6

    تحدث كركبة في باب بيت عم عمر بعد يصل لبيته وهو يحاول فتح الباب ليدخل عجلته قبل ما يأتي الاطفال جاريين فهم ينتظرونه بشوق للهدايا التي وعدهم بها .
    - يا أمي أبوي جا خلاص . أبوي العجلات وينها ؟
    - أمشي يا ولد من قدامي بلا عجلات بلا زفت .
    - أبوي عينك ما لها وارمة وخشمك فيه دم .
    - يا اولاد ما تمشوا تخلونا ندخل ..
    تخرج شادية من المطبخ : سجمي يا عمر مالك مورم كدا وما جيت للفطور .
    - يا ولية خلينا ندخل الضل ونوريكم الحاصل شنو .
    - يا ابوي في جماعة قبيل جو عند عم سليمان بتاع الدكان ببكس قالوا ليه تركب معانا ابا يركب معاهم دقوه وركبوه بالقوة وقفلوا الدكان ورموا ليه المفاتيح في وشه .
    يبدأ يتبسم يبدو أنها المعلومة الوحيدة التي أطربته : انت كنت حاضر يا خالد .
    - أيوا يا أبوي أمي رسلتني الدكان لعم سليمان قبل ما يبيع لي حاجة بس شفت الفلم دا قدامي حتى عم سليمان اتلفت علي وقال لي انت وابوكم الله يكافينا شركم .
    - يا عمر ما تحكي لينا الحاصل شنو والخاتم وينو بعتو ولا لسع ؟
    - يا ولية خاتم شنو مش طلع خاتم سليمان بعد ما نكره وكان حا يودينا في ستين داهية .
    - كدي براحة ورينا الحاصل شنو والضربك كدا منو ؟
    - أنا الصباح قبل شغلي قلت أروح الصائغ أبيع الخاتم . الصائغ بقى يماطل ويتلكلك ويأخر فيني لغاية ما جات قوة من شرطة المباحث رفعوني معاهم للمركز بتاعهم .
    - سجمي لييي في شنو ؟
    - أتاري الخاتم طلع مسروق معاه دهب كثير من ناس أغنيا وناس المباحث موزعين صور الدهب على الصياغين أي زول يجي يبع يروح فيها ..أها أنا لامن قلت ليهم الحقيقة أنه الخاتم خاتم سليمان جانا في الفول .أفتكروني بستهبل عليهم ووقعوا فيني ضرب .
    - أنا ما قلت ليك رجعوا ليه ؟
    - ما رجعته وهو نكروا قال ما حقه قدام ناس الحلة .
    - أكيد ما قلت ليه هو خاتم دهب لانه هو بموت في القروش حتى لو ما حقه كان قال حقي .
    - ما دا الفلم ذاته لامن الضابط أقتنع بكلامي رسل ليه قوة جابته في الأول لامن قالوا ليه عمر دا قال لقى خاتم في الفول نكر وقال الراجل دا سلباط وعايز يخلق لي مشكلة لكن أول ما قالوا ليه خاتم دهب طوالي غير رايه قال حقه وكمان الف قصة قال المره عندها عرس وقالت ليه لمعه هو نساه في جيبه ووقع منه في قدرة الفول .
    - أها ماا رجعوه ليه ؟
    - يا وليه انتي بصحك يرجعوه ليه ؟ قالوا ليه عايزين باقي الدهب يا حرامي . لكن عمنا أول ما عرفه مسروق رجع نكره تاني .
    - وووووب علي يا عم سليمان الطيب المسكين رحت فيها .
    - خليه يتأدب شوية عشان يعرف الطمع بيودي وين .
    - اها الحصل شنو بعداك .
    - أها الضابط ما خلاني أحضر باقي الفلم قال لي خلاص يا عم عمر أنت طلعت براءه أمشي لأولادك .. في احتمال يدوني مكافأة لاني بقيت ليهم سبب في رجوع الدهب ( محاولة بث الأمل من جديد في نفوس الغلابا ).
    - وعم سليمان أوعى يضربوه الراجل كبير وعيان ما بيتحمل .
    - يا زولة ها عندهم واحد أسمه عثمان مقانص دا لو ساب الشرطة ممكن يشتغل طاحونة براه .. يهرس العيش بيده ..
    - هو الضربك ؟
    - شايفة اللخبطة في شكلي دي كلها بنيتين بس منه .
    - يا حليلك يا عم سليمان .
    - أنا غايتو وصيتهم عليه قلت ليهم براحه الراجل ما بتحمل .
    - قلت ليهم براحة ما قلت ليهم يعفوه ؟
    - يعفوه كيف ما هو لازم يأخذ ليه قرصة قرصتين تفشنا شوية ياخ .
    يتبع
                   |Articles |News |مقالات |بيانات

28-12-2014, 06:45 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    7

    أما في مركز الشرطة وبعد انصراف عم عمر عرف عم سليمان بأنه أتورط فعلا وخاصة بعد ما اقر بملكيته للخاتم بل أصبح الإنكار سيجره لمشاكل أكبر لان الأمر اتضح أنه أكبر من مجرد خاتم فلم يعد أمامه سوى سرد حكاية الخاتم مثل ما هي قبل أن يتعرض لمزيد من الضرب والتعذيب .
    - أنت قلت يا عم سليمان أن الخاتم تبع زوجتك ونحن اثبتنا ليك انه هو جزء من ذهب مسروق يلا أختصر لينا الزمن وقول لينا باقي الدهب وين .وما تعرض نفسك للضرب والبهدلة .
    - والله يا جنابو أنا ما عندي فكرة عن الباقي بس غير الخاتم دا ما عندنا حاجة ثاني .
    - معناها انت مصر طيب يا عثمان ورينا شغلك .
    يتوجه نحوه العسكري ويمطره بلكمات عشوائية وصفعات وهو يحاول يصد ويتوجع ..ويستغيث : خلاص يا جنابو أنا حا اوريكم الحكاية .
    - خلاص سيبو يا عثمان يلا اتكلم ..
    - يا جنابو أول أمس بالليل جو أربعة شبان طلبوا عشا فول وتونا وطحنية وجبنة وزيتون وبيض وطعمية وأنا عندي صينية كدا للحالات الزي دي .. كانت صينية كبيرة مليانة خيرات المهم الفاتورة طلعت كبيره قام واحد من الشباب قال لي يا عم سليمان نحن ما عندنا فكة لكن خلي الخاتم دا معاك رهينة بكرة نصرف نحاسبك ونرجعه .
    - أنت بتعرفهم الشبان ديل ؟
    - أبدا يا جنابو أول مرة أشوفهم .
    - طيب عرفوا أسمك من وين ؟
    - أكيد سمعوا الزبائن بينادوني .
    - طيب تقدر توصف اشكالهم ..
    - والله يا سعادتك أنا ما شديد في الوصف لكن لو وريتني مجموعة صور ممكن أتذكرهم واطلعهم من وسط مائة نفر .
    - جميل جدا يا عم سليمان وفكرة جيدة .. يا فايز هات الالبوم بتاع صور الحرامية .
    - وبعد قليل يبدأ الضابط يستعرض الصور مع عم سليمان .أخيرا يصرخ عم سليمان .
    - أيوا هو دا ذاتو .
    - هو مين ؟
    - الأداني الخاتم
    - خلاص خلاص يا عم سليمان نحن متشكرين على التعاون بتاعك ممكن تمشي بعد كدا .
    - خلاص أمشي يا جنابو ؟
    - يلا اتوكل على الله نحن متشكرين تحب نوصلك ؟
    - لا لا لا انا بركب تاكسي أحسن .
    - تعالوا يا معتز أخذوا قوة وأمشوا بكل سرية جيبو لي خزنة وشلتو بسرعة بدون ما توروهم الحاصل شنو سامعين ؟
    - ويخرج عم سليمان بوجهه المورم الدامي متوجها ناحية متجره .
    يتبع
                   |Articles |News |مقالات |بيانات

30-12-2014, 08:08 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    Mohamed Noor · جامعة الخرطوم
    متابعين بشغف المسلسل, واصل الحكي السهل الممتنع والممتع

    شاركرين يا محمد نور
                   |Articles |News |مقالات |بيانات

30-12-2014, 08:08 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    Mohamed Noor · جامعة الخرطوم
    متابعين بشغف المسلسل, واصل الحكي السهل الممتنع والممتع

    شاركرين يا محمد نور
                   |Articles |News |مقالات |بيانات

31-12-2014, 05:26 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    8
    قبيل العشاء يعود عم سليمان من المخفر بعد أن أخذ ما فيه النصيب بسبب هذا الخاتم الملعون .. غشى بيته غسل جراحه لف وجهه بشال غطى ما غطى وترك ما ترك . وبعد صلاة العشاء عاد لفتح دكانه حتى يعوض ما فاته من رزق منذ صلاة الظهر . وقد فكر في أنه لا يمكن أن ينتظر حتى الصباح فيهرب منه الزبائن الى بديل أقرب ولا يعودوا له أبدا .. لم يلحظ لعيني غريمة الشامت عم عمر تراقبه من خلال باب بيته وهو يضحك على حاله شامتا وبغيظ .
    يلتفت عم عمر لزوجته : ما عايزين فول للعشا ؟
    - فول تاني أنت ما بتتوب من الفول دا ؟
    - أتوب منه ليه عرقي هو ..أنا خايف عم سليمان هو اليتوب منه هاهاهاها .
    - أنت الراجل الغلبان دا ما عايز تشيله من راسك مالك ؟
    - هسع أنا عملت ليه شنو ؟ ماعايز أشتري زي وزي أي زبون تاني .
    - هو فتح الدكان تاني .؟
    - أيوا شايفه فاتح جيبي الجك نحصله نجيب فول .
    - عليك الله يا عمر سيب الراجل الغلبان دا في حاله كفاه الجاه منك جيب لينا الفول من مطعم الزين في طرف الشارع .أصلا فول المطعم أحسن ومظبط .
    - ما قلنا ننفع جارنا دا هو أولى .
    - تنفعه ؟ أنت بتضر فيه عذبته لوليداته حرام عليك.
    - ياخ جيبي الجك بطلي النقة الكثيرة دي .
    يأخذ عمر جك الفول متوجها ناحية دكان سليمان .. ويلقي عليه تحية كاملة الدسم كأنه لم يحدث بينهما شئ .
    عم سليمان : وعليكم السـ .... أنت تاني .؟
    - الا في شنو يا عم سليمان ما عايزين فول .
    - يا زول أختاني عليك الله يا عمر خليني في حالي والله أنا كرهت الشغل والتجارة بسببك ( يتعبر ويكاد يبكي ) ياخ انت المسلطك علي منو عملت ليكم شنو أنا ياخ ؟
    - الا الا الا مالك يا عم سليمان ما عايزين نشتري بقروشنا زينا وباقي الزبائن .
    - في ذمتك أنت قعد تشتري زيك وزي باقي الزبائن .؟
    يقاطعهما زبون جديد : السلام عليكم .. شنو وينك يا سليمان من الصباح .. بسم الله وشك ما لو مورم كدا أنشاء الله ما في عوجة .
    - تقول شنو يا عبد الرحمن يا أخوي الظهر مشيت لي مزرعة كدا لم فيني نحل يا زول عض شديد ( ويعاين بطرف عينه لعمر نظرة ترجي أن يعديها )
    - عمر : يا زول يا عم عبد الرحمن أنا وهو كنا مع بعض لم ليك فينا نحل ليه مقانص وعضلات ها ها ها ها أنا زاتي ما شايفني مورم كيف .؟
    - أيوا صاح لا حولا ولا قوة الا بالله أنتو الوداكم محل النحل شنو..؟
    - تقول شنو يا عبد الرحمن أخوي النفس طماعة ..شفنا العسل لعابنا سال قلنا نخم منه هاهاهاها .
    فجأة يقطع حديثهما سيارة بوكس يتنزل منها شباب
    - مين فيكم سليمان عبد الغفار .
    - أنا ذاتي أها في شنو تاني خاتمكم وشلتوه دق ودقيتونا دق العيش عايزين شنو تاني .؟
    - تعال معانا يا راجل ما عايزين كلام كتير .الضابط ماجد قال عايزك ضروري .
    - ما قال ليكم عمر يجي معاي ( محاولا جرجرة سبب بلوته معه )
    - عمر دا منه كمان ؟ قفل دكانك دا يلا أرح معانا .
    عمر يجحظ عينيه في الأول خوفا من أن يستجيب العسكر لرغبة عم سليمان ثم يتسلل بجكه ناحية مكان آخر .. أما الزائر عبد الرحمن تكاد عينيه تخرجان من محجريهما دهشة وحيرة بالطبع دون أن يفهم شيئا خاصة بعد تضليله بحكاية النحل .
    يتبع
                   |Articles |News |مقالات |بيانات

03-01-2015, 01:54 PM

عزالدين عمر
<aعزالدين عمر
تاريخ التسجيل: 08-10-2014
مجموع المشاركات: 143

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    الله يخارجك ياعم سليمان من عثمان مقانص ..

    تحباتنا لك ابو الدرادر ..
    منتظرين
                   |Articles |News |مقالات |بيانات

03-01-2015, 07:08 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: عزالدين عمر)

    Quote: لله يخارجك ياعم سليمان من عثمان مقانص ..

    تحباتنا لك ابو الدرادر ..
    منتظرين


    سلام يا عزو

    ههههههههههههههههههههههههه نكمل الزنقة
                   |Articles |News |مقالات |بيانات

03-01-2015, 07:13 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    9

    قفل عم سليمان دكانه وركب البوكس مع عساكر المباحث من جديد بقى العم عبد الرحمن رجل طاعن في السن تخطى السبعين يرتدي العراقي البلدي مع السروال الطويل ..وهو حتى لم يلحق يشتري أغراضه .. أما عم عمر الذي يتوسط الخمسين من عمره ويبدو في هيئته أصغر .واشتهرت صراعاته مع سليمان الذي يقترب منه في العمر .. حاول أن يبتعد من المكان خوفا من أن يسر سليمان للعساكر بشئ عنه يجعلهم يعاودون الكره ويأخذونه معهم . لكن يلحقه عم عبد الرحمن بالنداء .
    - يا عمر يا ولدي يا عمر .
    يتوقف على مضض وهو يحدث نفسه ( عاوز شنو عمنا دا كمان ؟)
    - أيوا يا عم عبد الرحمن .
    - ماشي مالك مستعجل كدا ؟
    - ماشي أحصل أجيب العشا للاولاد من مطعم الزين ..
    - دقيقة نتمشى سوى أنا زاتي عايز لي فول لناس البيت .
    عرف عمر ان عم عبد الرحمن يريد أن يتخبر عن المواضيع لانه حتى لا يحمل ماعون للفول ..
    - أنت الجماعة الساقوا سليمان معاهم ديل منو وشنو حكاية النحل العضاكم دا ؟
    - زي ما قلنا ليك أنا وسليمان الظهر قلنا نمشي مزرعة واحد صاحبنا نجيب ليمون أها لم فينا النحل ..
    - لكن شايف سليمان معضعض أكثر منك أنت بس عضتين ؟
    - ما سليمان ما قدر يجري شديد زيي أنا أخذت عضتين تاني ما في نحلة لحقتني لكن هو الرطوبة كسرته وحمتوا الجري ..غايتو أهو أصلا قالوا عض النحل دا علاج للرطوبة ها ها ها ها ..
    - طيب الجماعة الركبوه معاهم في العربية ديل منو .
    - ديل جمعية مكافحة النحل ؟
    - صحي الكلام دا ؟ أنا أول مرة أسمع بجمعية كدا .. هو النحل كتر للدرجة دي لامن يعملوا له جمعية ؟ طيب ما يعملوا لنا جمعية للباعوض .
    - أكيد حا يعملوها قريب .
    - يا ولدي أنا الرطوبة كسرت كرعي ما تشوفوا لي جماعتكم بتاعين الجمعية ديل يسلعونا لسعة لسعتين بالنحل يمكن ينفعننا .
    - خلاص المرة الجاية لامن يجو لسليمان أنت قول ليهم يا أخوانا أنا عندي علاقة مباشرة بالموضوع وعايز أعترف ؟
    - بس كدا ؟ والكلام دا عنده علاقة بالنحل ..؟
    - يا هو دا الكلام البجيب النحل ذاتو .
    - طيب أنا حا اعترف بشنو ؟
    - حا تعترف ان الرطوبة عمت قلبك ونستك الآخرة وحسابها .
    - يا ولدي كلامك غريب لكن علا سمح .
    يصل الاثنان المطعم ويشتريان عشاء أسرتيهما وفي طريق العودة يفكر عمر في جريمته الجديدة يؤنبه ضميره ويقرر الاعتراف بالقصة لعم عبد الرجمن .
    - والله صراحة يا عم عبد الرحمن الحكاية لا فيها نحل ولا يحزنون كل ما في الموضوع أنه أنا اشتريت فول من سليمان أول أمس للفطور .. وحصل وجصل .(ووووووو الخ يحكي الحكاية كلها بالقدر الذي شاهده منها .)
    - يبدأ عم عبد الرحمن يغضب : يعني كنت عاوز تورطني معاكم يا ولدي .
    - أورطك كيف يا عم عبد الرحمن لو كنت عاوز أورطك ما كان حكيت ليك القصة وفضحت روحنا وطمعنا انا وسليمان .
    - - طيب تقول لي الرطوبة وتعترف .
    - أعمل ليك شنو يا عم عبد الرحمن نحن قلنا ليك نحل عضانا قعدت تتساءل وتجرجرني في الموضوع .
    - مسكين سليمان الله يخارجه من ورطة الخاتم دي .. وانشاء الله تبقى ليك توبة أنت كمان تبطل تليحك ليه ؟
    - يا عم عبد الرحمن انا ما بتلح أي زول لكن ما بخلي حقي لزول ولا بجامل فيه .
    - يتبع
                   |Articles |News |مقالات |بيانات

03-01-2015, 07:26 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    10
    لا زال الجارين عم عبد الرحمن وعمر في حوارهما في طريق العودة من مطعم الزين بعد أن أحضرا العشاء لزويهما .. أذ تصرف عم عبد الرحمن وحمل الفول في كيس من النايلون كما هو مألوف في في هكذا حالات ( حالات العشاء العابر ) .
    - أها يا ولدي أنا متأكد أن سليمان لا هو حرامي ولا عنده علاقة بالحرامية تفتكر جاب الخاتم دا من وين .؟
    - والله علمي علمك يا عم عبد الرحمن أنا كمان متأكد أنه ما حرامي لكن كمان متأكد أنه طماع .. والطمع واحد من الاسباب البتقود للسرقة .. لكن برضو ممكن يورطك بطرق تانية غير السرقة .
    - تقصد شنو ؟
    - يعني مثلا لو جا واحد عرض عليك خاتم دهب بمائة الف وأنت عارف تمنه يساوي مليون بتشتريه ولا ما تشتريه ؟.
    - أبدا يا ولدي ما بشتريه .
    - ليه ما تشتريه دي ما صفقه مضمونة ؟
    - لانه ظاهر مسروق أصلا الحرامي لو باعه بأي ثمن هو ما خسران شي .
    - أها عم سليمان ممكن يشتريه وما أكذب عليك أنا ذاتي ممكن أشتريه .وأصلا هو دا السبب الورطني ويمكن يكون ورط سليمان .أنا ما عارف التفاصيل شنو لانه الضابط ما خلاني أحضر التحقيق مع عم سليمان أهو أدوني بنيتيني ديل وقالوا لي أمشي اتخارج خلاص .
    - طيب حقة سليمان دي خليه هو يحكيها لينا وريني أنت طمعت كيف .؟
    - أنا المرة لامن لقت الخاتم في جك الفول ما كانت عارفاه دهب كلمتني وانا هجت لانه دائما الاقي بلاوي في الفول وأعمل معاه مشكلة .. حمتني أمشي اشاكله واترجتني . لكن لامن عرفته دهب أصرت أمشي ارجعه .. أنا كمان استغليت فرصة خوفه مني وما وريتو انه دهب هجت فيه لامن نكره .. رجعت قلت ليها قال ما حقه ؟
    - أهاااااااااا أنا حاضر جوطتكم دي ما كنت واقف معاكم .وانت طبعا جري على الصايغ لامن وقعت في الفخ .
    - بالظبط كدا يا عم عبد الرحمن ناس المباحث عاملين كمين عند الصياغين بصور الدهب أي حد يجي يبيع يروح فيها .
    - لكن ما أظن الحرامية بلدا لامن يبيعو الدهب في نفس المدينة السرقوه منها ؟
    - كلامك صاح لكن ممكن يبيعوا حاجة صغيره خاتم مثلا عشان ياكلوا ويتصرفوا او على الاقل يسافروا ,لزول طماع ما بيحسب الامور زيك كدا وممكن الزول الطماع يورطو واحد أطمع منه زيي أنا .
    - ها ها ها ها والله أنت مصيبة يا ولدي الله يهديك بس ويفك سجن صاحبنا سليمان .
    - الله يخارجه من المصيبة دي والله أنا أثرني وبقيت متعاطف معاه .
    - فيك الخير يلا تصبح على خير يا ولدي .
    - تصبح على خير يا حاج .
    يتبع

    (عدل بواسطة درديري كباشي on 03-01-2015, 07:28 PM)

                   |Articles |News |مقالات |بيانات

05-01-2015, 08:38 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    11

    في مركز الشرطة يدخل العساكر عم سليمان على الضابط ليلاحظ معه حوالي ستة شبان عاتيين مشوهيي الوجوه وتبدو عليهم سمات الاجرام .. وعرف منهم اربعة من الذين تعشوا عنده قبل يومين وفيهم أكبرهم الذي رهن عنده الخاتم وجعله في المأساة التي يعيشها الآن .
    - خير يا جنابو نعله ما في مشكلة تاني .؟
    - لا ما تخاف يا عم سليمان المرة دي عايزنك شاهد فقط . منو من الجماعة ديل أداك الخاتم .
    بكل ثقة يؤشر عم سليمان على أحدهم : هو دا يا جنابو .
    لكن دون أن يتوقع أحد هذه الجرأة يمسك المجرم بتلابيب عم سليمان ويكاد يخنقه بجلبابه . وهو يصيح : يا زول يا رمة أنا متين أديتك خاتم يا حيوان .. ويمطره بسيل الشتائم . يتلم العساكر على المجرم العاتي ويحاولوا يفكوه منه ولا يستطيعون الا بعد صراع وضرب شديد وعم سليمان تجحظ عيناه بل تكاد تخرج من محجريهما .
    - يا زول دا شنو عايز تقتل الراجل المسكين دا والله الليلة أأدبك أدب .. ويتم اجلاس عم سليمان في الكرسي بعد أن كاد يغمى عليه من الرعب وكتمة النفس .

    - معليش يا عم سليمان الحمد لله جات سليمة لكن ما عليك ناخد ليك حقك من الحرامي الكلب دا .. وأنت يا حيوان ما عامل لي أي أعتبار كويس أنا حا أوريك .. طيب يا عم سليمان الاتعشى معاك منه من ديل .
    هذه المره تردد عم سليمان بعد أن لدغ من هؤلاء البشر مرة فأصبح يلقي عليهم مسحة بنظرة يملأها الرعب . وهم عرفوا أنه دب فيه الخوف وبدأ يصرون وجوههم محاولين ارعابه وارباكه ونجحوا فعلا لانه طأطأ رأسه في الارض .
    - أتكلم يا عم سليمان ما تخاف أنت هنا في حماية الشرطة .
    - وبره كيف ؟ رد بعد تردد .
    - برة كمان في حماية الشرطة ما تخاف ما حد يقدر يلمسك يلا أتكلم مين كان مع خزنة .
    - هو أسمه خزنة كمان ؟
    - خزنة مشهور بكسر الخزن لكن دي انشاء الله آخر مرة . لانه حا يقضي باقي عمره في السجن .
    ( يمط خزنة شفته السفلى استهجانا بالضابط مع هز رأسه من أعلى لاسفل .)
    - يلا أتكلم يا عم سليمان .
    يتوكل عم سليمان ويؤشر على الثلاثة الباقين ..
    - طيب شا كرين يا عم سليمان بس عاوزنك توقع على المحضر وتمشي بيتك .
    يوقع عم سليمان على الدفتر ويخرج وهو لا زال يتلفت ناحية المجرمين بذعر . ويفكر كذلك قائلا في نفسه طيب هو أعترف بالاربعة الذين شاهدهم قبل ذلك كيف الحل مع الاثنين الباقين الذين لم يتعشوا معه أكيد ستكون مصيبة كبيرة لو أطلق الضابط صراحهم حتما سيأتون للانتقام أما كسروا الدكان أو هاجموه في بيته .. الله يستر والله يكضب الشينة .. تمتم وتفل وتعوذ وخرج يجر رجليه ولا زال يتحسس عنقه من أثر الخنقة التي كادت أن تحز رقبته . أعوذ بالله من ديل بشر الله يكفينا شرهم .اريت لو ما أخذ الخاتم وخلاهم يتعشوا مجانا . دا كله ما كان حصل . لكن الطمع وشطارة الشيطان .

    يتبع
                   |Articles |News |مقالات |بيانات

06-01-2015, 09:54 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    12

    وصل عمر لبيته قريب العاشرة مساءا وجد زوجته مستاءه وتنتظره بغضب .
    - يا راجل تطلع من بعد المغرب عشان تجيب عشا للاولاد تجينا داخل عشرة بالليل هسع الاولاد ناموا من غير عشا .
    حاول أن يلهيها بخبر عم سليمان .
    - عم سليمان الجماعة جو سا قوه تاني كنا نحاول فيهم يسيبوه لكن ديل ما بتفاهموا ياخ . تعليمات صارمة .
    - سجمي الراجل المسكين دا شقاوته شقاوة .. ماله في شنو تاني مش الخاتم وشالوه منه .
    - يا وليه ما قلنا الخاتم دا في معاه دهب مسروق تاني لازم يلقوه أنت فاكره الحكاية ساهلة بتنتهي باخوي واخوك .
    - الليلة يا عم سليمان الراجل الطيب حيموت بالخوف .
    - أنتي شنو شابكانا طيب طيب القاليك منه طيب هو في زول بخيل وطماع يكون طيب ؟.
    - أنت بس كارهه لكن الحلة دي كلها تشكر فيه وما بيشكوا منه .
    - القال ليك منه ما بيشكو منه هو أنت طلعتي الشارع وسمعتيهم ما قاعده في بيتك دا طول اليوم .
    - أجي الحلة دي ما فيها نسوان بيزوروني وازورهم ونتلاقى في المناسبات ما سمعت واحدة شكت منه غير أن عنده شوية طمع وكان اتدينو منه بكرههم حياتهم الا يدفعوا حتن يرتاحوا منه .
    - طيب ما ياها ذاته المكرهة فيه الناس الحاحه واحراجه يلاقيك في عقد ولا عرس قدام الناس يسألك .. خاصة لو شافك دفعت في الكشف ..يرميها ليك بب كدا .
    - أجي يعني يخلي حقه للناس عشان يكون طيب .
    - لا ما يخلي حقه لكن يراعي ظروفهم كدي هسع خلينا منهم ختي لينا العشا خلي نبلع لينا لقمة قبل ما ننوم .
    ويخرج ناحية باب الشارع ينظر ناحية دكان سليمان الذي ظل مغلقا حتى الآن .
    - في شنو يا راجل أنت منتظر ليك زول جايي ولا شنو .
    - لا بس قلت أشوف سليمان رجع ولا لسع ؟
    - هو حتى كان رجع بيفتح الدكان بعد دا ؟
    - ممكن أمشي اشوفه في بيته رجع ولا لسع ؟
    - يا راجل أنت ما تسيب الراجل دا في حاله مالك وماله ؟
    - الا جارنا ما نتفقده نعرف الحاصل عليه شنو ؟
    - حا تخلع مرته واولاده ساي يمكن ما عندهم فكرة عن الموضوع .. وبعدين شنو الشهامة النزلت عليك فجأة كدا أنت الراجل دا ما كان ما بينزل ليك من حلقك ؟
    - يا مرة انتي واقفة لي بالمسطرة والقلم كدا مالك .. يعني أنا أصلا ما عندي مروة ولا شهامة .
    - لا كدي يابا أنت سيد الرجال بس ما مع عم سليمان دا .
    - هاهاهاهاهاهاها والله أنتي فقرة فقارة .طيب ننتظر الصباح رباح ..
    ويعود الى داخل بيته ليتناول العشاء مع زوجته .
    - لكن تفتكري أنه ناس المباحث أكتشفوا أنه الدهب كله مع سليمان أشتراه برخص التراب من الحرامية .
    - أن بقى كدا أمانة ما وقع راجل وياهو الراح فيها .
    - لكن أنا ما بظن لانه هو رغم طمعه الا أنه جبان جدا لو عرضوا عليه الدهب كله كان خاف وما بشتريه منهم .
    - كدا خلينا نصبر لبكرة الله يفرج كربتك يا سليمان راجل سعدية الحنينة الطيبة .
    يتبع .
                   |Articles |News |مقالات |بيانات

06-01-2015, 10:04 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خرج سليمان من مخفر الشرطة مرعوبا يتلفت مخافة أن يطلق صراح باقي المجرمين خلفه بعد تبرئتهم .. وبدأت تدور الهواجس في رأسه ..( دائما ما يربتبط البخل بالجبن بالطمع لانها صفات دنيئة كلها تتفرع من الانانية وحب الذات . كما أن الشهامة والكرم والشجاعة تتفرع من التجرد ونكران الذات ).أوقف سيارة تاكسي وركب متوجها الى بيته ولا زال يتلفت .. بعد ما قرر التوقف أمام بيته لاحظ لشابين من خلفه يقودان موترا خاف أن يكونا متابعنه . فطلب من سائق التاكسي التحرك من أمام بيته حتى لا يصبح لهم دليلا دون أن يدري . نزل بعيد من بيته وعاد خببا يمشي ناحية البيت ضرب الباب بشدة على غير العادة . فتحت له زوجته الباب .
    - بسم الله يا راجل مالك ترجف كدا ويدك زي التلج وين كنت لهسع قبيل رسلت ليك عاطف الدكان قال ابوي قافل .. أها مشيت وين كان الله هون ..
    - يا وليه ما تصبري خلينا ندخل نشم نفسنا شوية ياخ .
    - أها أدخل لكن وريني في شنو يا سليمان أمس سألتك من الورم الفي وشك قلت رحت السوق تجيب بضاعة لاقاك نحل في السوق .. هو النحل دا ما لقى زول في السوق غيرك ؟ أها الليلة وسجمى دا شنو الشلخ الفي رقبتك دا .. نحل برضو؟ .. الا كان النحل بقى يشيل سكاكين كمان .
    أختلطت مشاعر سليمان بالغيظ من زوجته مع الخوف من المستقبل مع الاستياء من الاحداث .. يخرج من ورطة تعقبها أخرى أخرصته الاحداث وأكتفى بالنظر الى زوجته .
    - يا مرة خلينا في حالنا .
    - ما بخليك الليلة الا توريني في شنو .. من أمس لي الليلة بقيت ما فاهمة حاجة والكلام القلته كله عن النحل ما دخل لي في رأسي .
    هذه ورطة جديدة لانه لو حكى لها قصة الخاتم فضحت نواياه في أن حتى الخاتم لو أمتلكه لم يخطر في باله أنه سيهديه لها .. بل هو فكر في بيعه مثل ما فعل عمر .. ويستبدل ثمنه ببضائع يملا بها الدكان وأكيد لن تسامحه لو عرفت أن الموضوع كان خاتم دهب بعيدا عن أصابع يدها التي لم ترى ذهبا منذ الزواج قبل عشرين عاما ..لكن لو ألف قصة جديدة سيعقد الأمر أكثر فضلا عن أن ذهنه ليس جاهزا ليؤلف قصة جديدة يكفيه ما فيه فقرر أن يلتزم الصمت .. الى أن يأتي الفرج بسبب ما .
    وأخيرا بعد الحاح وغلبان حيلة أضطر أن يحكي لها قصة الخاتم من أولها الى لحظة دخوله البيت .
    - يخسي عليك يعني بعد طمعك وبخلك دا كمان جابت ليها خيانة .
    - خيانة شنو يا مره هوي أنتي جنيتي ؟
    - يعني الخاتم التمنه صحن فول ما كنت ناوي تجيبه لي .
    - يا مره دا خاتم مرهون يمكن الجماعة كان يجوا تاني يوم يدفعوا حق الفول يشيلوا خاتمهم .
    - ما كان تخليه معاي على الاقل اتمتع بيه يومين لو جو راجعين تعال البيت شيلو .
    - ياخ انا قلت يمكن يجو مستعجلين وما يكون في وقت . كدي هسع خلينا في الحاصل الله يستر .. الليلة أحسن ننوم جوة الغرف .
    - ننوم جوة الغرف ليه في الحر دا .
    - عشان الباعوضة .
    - هي الباعوضة دي جات الليلة ما من زمان في .
    - طيب خلي نور الحوش مولع كان حاننوم بره عشان الباعوضة .
    - ليه الباعوضة دي عندها امتحانات كمان ولا شنو ..نور شنو البنخليه مولع للباعوضة ..وانت اليوم كله تنقنق في فاتورة الكهربا .. ومحرمنا نستعمل الخلاط والفرن والمكوة .
    - ياخ أنت أي حاجة أقولها تفنديها يلا خلاص روحي اتخمدي نومي .
    - ما عايز أسوي ليك عشا ؟
    - ما داير أي زفت .
    وقضى سليمان الليل كله نصف نائم على سريره كل ما سمع صوت كركبة رفع رأسه وأعطى الحوش مسحة بالنظر ليكتشف أنها قطط تطارد بعضها بعضا .. يبدو انه في ذالك اليوم طاب الغزل لقطط الحي في حوش سليمان .. جعلت ليلته كأنها في بيت الاشباح بمدينة الملاهي .. وفي باله أن الاثنين الذين برأهما سيلاحقانه بأمر من زعيمهما خزنة الذي شهد ضده . ابدا لم يخطر بباله أن يأتيا ليشكراه ,,
    يتبع .
                   |Articles |News |مقالات |بيانات

07-01-2015, 07:55 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خاتم سليمان (14)
    أصبح الصبح
    قام سليمان مورم العينين بعد نومه المقطع وكوابيس القطط التي أرقت منامه بصراعها ..متأخرا ليس كعادته على صوت زوجته سعدية .
    - سليمان قوم يا راجل بسم الله الليلة مالك الساعة تمانية والاولاد راحوا مدارسهم من قبيل والشمس جات عليك .
    قام كشف بطانيته عن عينيه المحمرتين والمتورمتين من السهر يتمغى _ يا ولية خلينا ننوم شوية أنا الليل كله مساهر مع كركبة الكدايس والباعوضة .
    - أنت مالك يا راجل الكوابيس شنو الكدايس ما يا هو حالن من زمان الجد شنو الليلة .
    - أنت متخيلة الحرامية الشهدت ضدهم ديل حا يخلونا في حالنا ؟
    - سجمي أنت مش قلت قبضوهم كلهم .
    - أيوة لكن في أتنين ما أتعشوا معانا في الدكان قلت يمكن الضابط يطلعهم براءه ويجوا ينتقموا مننا ..
    - سجمنا عشان كدا بالليل حالك ما يا هو مرة تقول ننوم جوة ومرة تقول لي خلي النور مولع مع أنك هارينا هري في صرف الكهربا .. ودا شنو الخاتيه تحت المخدة وووب علي مسدس اللعب بتاع خلودي .
    -أيوا ما قلت أكان جو نخوفهم بيه شوية ..
    - طيب لو هم كان معاهم مسدس جد جد ما راح يقطعوك .
    - أعوذ بالله فال الهم ولا فالك أنتي مره شوم زاتك .
    - خليك من شوامتي فوم أشرب الشاي والحق شغلك تلاقي ناس الحلة كلهم اتحولوا لدكان عبد الغفار .
    - ايوة كلامك صاح الشاي زاتو رسليه لي في الدكان ..
    - وحا ارسله ليك مع منو الاولاد راحوا المدارس .
    - رسليه مع الشغالة .
    - الشغالة أنت ما مشيتها زمان لامن جبت لي الغسالة ما قلت يا الغسالة يا الشغالة ؟
    - أوففف خلاص ما عايز شاي زاتو .
    - خلاص قوم اتوضا وصلي صبحك واسأل ألله أنه يحفظك ويحميك من شرهم انا بحاول الحقك الشاي سريع شيله معاك في الترمسه .
    وفي بيت عمر .. وهو واقف في الباب متوجها لعمله ..
    - أنت سليمان دا لسع ما فتح الدكان يكون بات في الحراصة ولا شنو ؟
    - حراصة شنو أنت مش قلت برأوه خلاص ؟
    - عرفني شنو أنا ببراءته هم بيتكلمكموا ؟ ولا هو جاب سيرة .؟ ما قال عضاه نحل .خلاص خلاص هو طلع من بيته الظاهر عليه كان مساهر أمشي عليه أعرف خبره قبل ما أمشي شغلي .
    يتبع
                   |Articles |News |مقالات |بيانات

07-01-2015, 07:59 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خاتم سليمان (15)
    الشفقة والفضول يجمعان حاج عبد الرحمن وعمر أمام دكان سليمان وهو يفتح دكانه ويقول يا هادي .. وجهه لازال يحمل أثر الكدمات أذ تحولت للسواد قبل زوالها .. و أما جيده فيزينه الشلخ الجديد لحافة الجلابية بعد ما خنقه خزنة في مخفر الشرطة وكاد أن يفتك وبه ويلحقه ( الرقدوا ) كما قال أمام الضابط وعساكره .. مما ضاعف الخوف في نفسه تجاه هؤلاء المجرمين أذ أستنبط منها أنه لا شئ يخيفهم وخاصة منظر خزنة يمط شفته للظابط هازئا بعد أن توعده بالسجن المؤبد .
    - حمد لله على السلامة يا راجل شفقنا عليك الحكاية شنو .. وناس النحل مالهم معاك تاني ؟ أعقبها حاج عبد الرحمن بأبتسامة تنم عن المامه بالموضوع ......
    رد عم سليمان بعد أن نظر لعمر نظرة غيظ : الله يبارك فيك يا حاج نسوي شنو البتقع من السما بتتحملها الواطاه .
    - أها كيفك طمنا عليك يا سليمان والله الليل كله ما نمنا قلقالين عليك .
    - قلقان علي أنت يا عمر والله أنا كان عضتني نمله بقول مرسلها عمر ؟
    - ليه كدا يا راجل نحن أصحاب وجيران ونريد ليك الخير ما تكرهنا ياخ .. بعدين حكاية الخاتم دي قدر كلنا وقعنا فيه وأخدنا نصينا .
    - أخذتك نصيك أنت أخدت ليك كفين واتخارجت لكن أنا البلاوي لسع جارة معاي .
    - كدا يا سليمان يا ولدي تغشني تقول لي عضاك نحل ؟
    - أقول ليك شنو يا حاج عبد الرحمن أنا زول شغال وعندي زباين أقعد أحكي ليك قصة محتاجة ساعة كاملة واسيب شغلي أنا اختصرت الحكاية بالنحل دي ؟ وبعدين على فكرة حتى المرة في البيت قلت ليها نحل عشان ما عندي رغبة أكرر القصة واحكيها .
    - بس هو ما مشى بعيد بكلمة نحل لانه الناس البيحبو المجان والرخيص يسموهم النحل والحرامية برضو يكونوا نحل .
    - ياخي معقولة النحلة دي من أنشط مخلوفات الله تسافر الاف الكيلومترات عشان تجمع رحيق تصنع منه العسل .. نحن البشر بنمشي نكسر خلاياها ونسرق العسل الجمعته لجناها .. هسع الحرامي منه النحل ولا البشر ؟
    - والله كلامك صاح يا حاج عبد الرحمن قلة فهم مننا .
    - كلامه صاح بتاع شنو النحلة دي لامن تدخل الحدائق وتمتص رحيق الزهور كان قعد تقطع تذكره ؟ ما هي بتسرق برضه .
    - دا كلام شنو يا عمر يا ولدي . .النحلة بتاخد الرحيق هو أجر مقابل خدمة تقدمها للنبات وتساعده في التلقيح أصلا النبات بيصنع الرحيق مخصوص عشانها هي .
    - لا في دي كلامك صاح ومعاك حق .
    - خلينا مع سليمان نفهم منه حكايته شنو مع الشرطة والحرامية .
    - والله كلامكم بتاع النحل دا كله ما سمعته وما فاهم منه حاجة انا جايب معاي شاي من البيت خلوني أكب ليكم الشاي وارجع لكم .
    - لا يا شيخ الشاي نحن شربناه في البيت أشرب أنت وموضوع النحل نحن قفلناه خلاص . نحن عايزين نعرف الحصل معاك شنو .. ياخ يمكن تحتاجنا في شهادة نحن ممكن نشهد معاك انك انسان نزيه ونضيف وتجري على لقمتك بالحلال .
    تراجع سليمان بعد ما شرع للدخول في دكانه ينظر لعمر باستغراب أول مرة يسمع منه هذه اللغة ويلمس هذه الروح هو ظنه فيه لو لقاه في النار لرمى عليه الحطب وصب فوقه الجاز .
    - شنو تعاين لي كدا ما مصدقني والله الكلام دا انا قلته لعم عبد الرحمن نحن واقفين معاك ما تفتكرنا ضدك ولا جايين نشمت فيك .
    - ايو كلامه صاح يا سليمان ولدي حتى لو حتى تحتاج لمحامي انا ممكن أكلف صلاح ولدي يترافع عنك مجانا .
    رد عم سليمان على هذه الروح عمليا دخل الدكان وأحضر ثلاثة كبابي شاي وصندوق بسكويت فاخر (أول مرة يعملها ) وحلف عليهم أن يشربوا معه شاي الصباح .. هذه الروح المفاجئة اكسبته الثقة وجلس يسرد معهم كل الذي جرى معه حتى الآن .
    أتفقوا أولا أن يعملوا نفيرا من شباب الحي يعملون حراسة ليلية على دكان سليمان وبيته وكل الحارة .. ومن له كلب يطلقه في الشارع ومن له سلاح ناري مرخص يضعه تحت التصرف جاهزا .. نبسم سليمان كثيرا شكرهم بل كاد يقبل رؤوسهم ودعهم بكل امتنان بل ظل يشيعهما بنظراته حتى اختفيا كل تجاه عمله .
                   |Articles |News |مقالات |بيانات

08-01-2015, 09:29 AM

أحمد يوسف مولود
<aأحمد يوسف مولود
تاريخ التسجيل: 17-12-2014
مجموع المشاركات: 79

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    يا سلام عليك يا درديري
    قصه رائعه و سرد جميل للخيال
    امتعتنا امتعك الله
                   |Articles |News |مقالات |بيانات

09-01-2015, 12:28 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: أحمد يوسف مولود)

    Quote: يا سلام عليك يا درديري
    قصه رائعه و سرد جميل للخيال
    امتعتنا امتعك الله


    الله يبارك فيك يا ابو حميد ويمتعك بالعافية
                   |Articles |News |مقالات |بيانات

10-01-2015, 02:11 PM

عزالدين عمر
<aعزالدين عمر
تاريخ التسجيل: 08-10-2014
مجموع المشاركات: 143

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    شنو يا عمك ..

    ما عصرت علينا شوية ..
    داخلين على اليوم التالت ..

    كب العسل

    تحياتنا

    (عدل بواسطة عزالدين عمر on 10-01-2015, 02:14 PM)
    (عدل بواسطة عزالدين عمر on 10-01-2015, 02:20 PM)

                   |Articles |News |مقالات |بيانات

10-01-2015, 07:32 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: عزالدين عمر)

    Quote: شنو يا عمك ..

    ما عصرت علينا شوية ..
    داخلين على اليوم التالت ..

    كب العسل

    تحياتنا


    آسفين يا ابو العز للتقطيع اناء الله نكمل
                   |Articles |News |مقالات |بيانات

10-01-2015, 07:36 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خاتم سليمان (16)
    أنصرف الجاران الزبونان من أمام دكان سليمان بعد أن أصر عليهما على تناول الشاي بالبسكويت .. شيعهما عم سليمان بنظرات الوداع بعد أن بعثا الطمأنينة والأمان في نفسه من جديد .ز وبصفة خاصة عدوه اللدود عمر الذي أكتشف فيه أصله الطيب ومعدنه الأصيل لأول مرة . قضى ذالك النهار سعيدا يبيع لزبائنه يمازح الأطفال كعادته . ولأول مرة فتح كيس حلوى صغيرة وبدأ يوزعها على كل طفل يأتيه مرسل .. شعر بإقبال على الدنيا .. شعور الجميل عندما تكتشف أناس كنت تظنهم لا يطيقونك فيتضح لك أنهم يسعون لمصالحك وحمايتك ..نذر بينه وبين نفسه ألا يضايقهم أبدا وألا يلاحقهم بمطالب الديون .. ليس لدرجة الآعفاء لكن على الأقل سيخفض من وتيرة الإلحاح التي كان يلاحقهم بها ويكرههم حياتهم .. سؤال واحد نهاية كل شهر يكفي .هكذا قالها في نفسه وعزم على ذلك .
    عد ذاك النهار السعيد وراح سليمان بيته لتناول الغداء مع زوجته وبنائه وحكي لها عما عزم عليه أهل الحي .. شكرتهم وكادت تزغرد .. ليس لأنها خائفة من هجوم اللصوص الحق يقال هي أكثر شجاعة من زوجها .. لكن أعجبتها روح أهل الحي الداعمة والتي كثيرا ما ظنت أنهم لا يطيقونها هي وزوجها البخيل الأناني ,
    وفي المساء تحول أمام دكان عم سليمان الى منتدى جمع الشيب والشباب ليضعوا برنامج الحراسة الليلي .. قدمت لهم زوجة سليمان شاي الحليب بالزلابيا .. فرحا وحبورا بهذا الموقف الشهم .. البرش الذي يفترشه عم سليمان أمام دكانه عادة للسمر مع كبار الحي ليلا لم يعد يكفي الحضور فاستعانوا بفرشات جديدة . كانت ليلة جميلة أستمتع بها الحي وهم يكتشفون شهامتهم ووحدتهم لأول مرة ..
    - خلاص اتفقنا يا شباب على جدول الحراسة الليلي ..
    قالها عمر مخاطبا الجمع ومكملا حديثه .
    - كل يوم طوف من خمسة شباب معاهم واحد على الأقل معاه سلاح ناري مصرح . وكشاف .. النوبة الليلة تبدأ من الساعة حداشر بالليل بعد ما يقفل عم سليمان دكانه .
    كما قال حاج عبد الرحمن " زي ما قال ليكم ولدنا عمر أوعى تغفلوا لحظة .. نحن عايزين الحي دا يكون محروس .. وهاكم الصفارة دي أنا محتفظ من زمن كنت حكم كورة زمان .. أذا شفتوا عدد كبير من الحرامية ما تعرضوا نفسكم للهلاك صفروا انشاء الله تلاقوا الحلة كلها معاكم .. يلا شدو حيلكم .
    - يا سلام عليك يا عم عبد الرحمن والله كانت فايتة علينا دي . كثر خيركم يا أخوانا والله أنا ما عارف أشكركم كيف .ز ويبدأ سليمان ينتحب ويبكي .
    - لا يا سليمان يا ولدي نحن أهل وعشرة سنين واجبنا يحتم علينا نقف مع بعض في المحن .. يلا يا جماعة خلاص فضوا الاجتماع .
    - لا والله ما بتشموا الا أعشيكم كلكم .
    - معقول يا سليمان كدا حا نخرب بيتك .
    - تخربوا بيتي شنو هو فول يعني حا أضبح خروف هاهاهاهاها
    - وضحك الجميع رغم نكتة سليمان السمجة لكن الفرحة العامة بالموقف تطغى .
    عدت تلك الليلة معلنة عهد جديد في حي سليمان وعمر روحه التكافل والتعاون وحب المشع الذي غسل كل رواسب الغل السابق .. وحقيقة النار تفلح دائما في إبراز أصل المعادن وتبرز بريقها الذي يخلب النظار .


    يتبع
                   |Articles |News |مقالات |بيانات

10-01-2015, 07:41 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خاتم سليمان (17)
    دكان سليمان بالليل أقرب للمطعم منه للمتجر ..أذ أن له طاولة كبيرة وعالية أمام الدكان بقرب قدرة الفول .. بها أطباق كبيرة بمليئة بالمحسنات التي تدخل على الفول عادة والتي تعدها زوجته بالبيت نهارا .. كالطعمية والبيض المسلوق والجبن المبشورة والسلطة خضراء مخلوطة بالليمون والشطة ومعجون الفول السوداني ( الدكوة ) وكذلك سلطة البازنجان ( المصقع كما يسميها المصريون ) وسلطة عجور ولبن رائب .. هذه المكونات التي يبتدع بائعي الفول في تشكيلها فتخلق لهم الفارق التنافسي .. يد سعدية الماهره في الطبخ أعطت زخما لفول سليمان وجعلته مرغوبا من جميع فئات أهل الحارة والزائرون ( طبعا عدا الحجارة التي يكتشفها عمر في كل مرة ويلوث بها الجو )..:مكملها بالبرش مع الكراسي القصيرة ( البنابر .. وفي المساء يعتمد على أحد ابنائه في العمل داخل الدكان ليغطي الطلب عليه والذي يعد نادرا مقارنة بالفول ومركباته . في ليلة الحراسة الكبرى واجتماع أهل الحي تنازل عن مكونات ذاك اليوم متفضلا على أهل الحي بعشاء فاخر أو كارب على الاقل .. عرفانا بالجميل على شهامتهم ومروتهم .وأصر رافضا على كبار الحي عندما قرروا أن يجمعوا له اشتراكا تعويضا عن خسائره في ذاك اليوم ..وهو يعلم تماما أن خطوتهم المباركة لا تساويها كل بضاعة الدكان .
    مرت الأيام واعتاد الناس على نوبات الحراسة من الشباب وهم يجوبون الحي ويسألون كل غريب عن هويته وعن الذي أتى بهم الى حارتهم .. لم يحدث شئ غريب حتى قاربت الفترة على الشهر .. وبدأت العزيمة تفتر والملل يدب ويكثر غياب الحراس من ابناء الحي عن نوبتهم .. بعد أن أطمأن الجميع بأن ما ظنوا أنه سيحدث ما هو الا هواجس من عم سليمان الذي أعتاد قلبه ( الرهيف ) أن يهول المصائب .

    في آخر يوم في الشهر وعم سليمان واقف على بنك الفول مشغول بتصليح أحد الطلبات يرفع رأسه على صوت جهير . لم تخفى عليه معرفته .
    - عايزين لينا فول مظبط لو سمحت ..
    رفع رأسه مرعوبا ومتمتا : خزنة ؟؟؟؟؟؟؟؟؟؟؟؟
    - أيوا هو خزنة ذاتو الحمد لله بقينا معرفة وكدا ..
    بدأت يده ترتجف ليشاهد خلف خزنة يقف اربعة شباب مفتولي العضلات تزين وجووهم الكدمات والجراح القديمة عرف منهم ثلاثة على الأقل عدا رابعهم .
    حاول أن يمشي الآمر عادي كأنهم زبائن مألوفين وحاول أن يؤخرهم .. للتو أنتبه أن حراسة الحي في الآونة ألأخيرة أصبحت لا تلقي الاهتمام لدى الشباب بل أصبحت تحصيل حاصل .. لكن هاهو اليوم الذي يريدها فيه قد أتى بدونها .. حاول أن ينظر في الأفق ليلمح أي من ابناء الحي عساه يرى كيف حاصر هؤلاء الوحوش طاولة الفول بوجوه عابثة غاضبة ..
    - خير عايزين كم فول ..
    - تفتكر نحن يكفينا كم فول كب القدرة دي كلها في أكبر صحن عندك . والا أقول ليك كب لينا القدرة هنا في سلطة الروب وكب عليها باقي الحاجات دي كلها .. تعالوا يا شباب قشروا البيض دا كله .. الليلة كان ما شبعنا .. ندخل على الدكان نتمها طحنية ومربة هاهاهاهاها لينا زمن ما أكلنا لينا لقمة طاعمة من عم سليمان دا .
    بدأ عم سليمان يرتجف حتى ولده الذي كان يساعده في الدطان ذهب للبيت لينام مبكرا استعداد للمدرسة .آخر زبون كان طالب فول مصلح سفري يعني أشترى ومضى دون أن يركز على هؤلاء العصابة ..
    الليلة يا سليمان يا ود ستنا رحت فيها قالها في نفسه وهو لازالت يده ترتجف يصلح في الفول ويعد الخبز ..
    جلس المجرمون متجمعين حول أحد الطاولات القصيرة وبدأوا الأكل والضحكات المجلجلة تنطلق منهم كمكائن تكسير الاسفلت البالي . وهو لا زال يخدمهم ويتعشم في أن يظهر أحد أـبناء الحي .أتته رغبة في الصراخ .. لكنه خاف خوفا مزدوجا ..خاف من الفضيحة كما خاف أن يغضب هؤلاء المجرمون فينتقمون منه طعنا بالسكين .
    وبعد أن أكلوا تقدم منه خزنة : الحمد لله شبعنا يلا حاسب ومد يده بخاتم ذهب مرة أخرى .
    نظر سليمان ناحية الخاتم : هو دا الخاتم نفسه ؟
    - وأنت فاكر شنو تفتكر في حد يقدر يأخذ أموال خزنة أوانطة كدا .. قال معروضات قال هاهاهاهاها .. ضحكة أعقبها زملائه بضحكة مماثلة كأنهم كورس في فرقة شعبية .
    يتبع
                   |Articles |News |مقالات |بيانات

10-01-2015, 08:27 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خاتم سليمان (18)
    جلس سليمان في متجره يراقب في زبائنه غير المرغوب فيهم يتسامرون بنكاتهم السمجة التي تضحكهم وحدهم يحكون عن الطرائف التي تقابلهم اثناء عملهم غير الشرعي في سطوهم على المنازل ويضحكون بمتعة ومن أعماقهم .. قدماه لم تقويان على حمله فجلس على كرسي قريب ..فأصبحت ساقاه ترتجفان كما الترزي يوم وقفة العيد .. رخى أذنه محاولا أن يستمع على حكاويهم بتركيز أكثر عساه تسليه أو تسري عنه قليلا .. ولكن ظل خائفا يترقب .
    - كدي يا عضة أحكي لينا حكاية صاحبك بتاع البنك الجبان داك .
    - تعرفوا كنت مراقب ليك صاحبنا داك من بعيد دخل البنك مرق بشنطة دبلوماسية كدا عرفتها ليك مليانة شرتيت (أموال ) قلت الليلة أمانة ما عيدنا . المهم ركب عربيته رحت مباريه ليك بالموتر .. لغاية ما وقف جمب بيت فاخر كدا ..يا زوول سور مزغرف كدا وابواب وجنينة .. فتح قراش البيت ودخل العربية .. عرفت المحل وجيته ليك بالليل زي الساعة واحد صباحا .أول أتأكدت أنه بيته لا فيه كلب ولا فيه حراسة . بعد الشارع فرغ من الناس جيت تاوقت بالحيطة كدا لقيت ليك صاحبنا راقد في الحوش ومتغطي لنصة ببطانية يشخر .
    - عرفته كيف هو نفسه صاحبك ..؟
    - ما أنا كنت مراقب البيت من بعيد طول النهار ماشي وجايي بالموتر ما شفت زول غيره دخل البيت أو مرق . وبعدين حسيت أنه اولاده مسافرين لانه البيت الكبير دا كله ما فيه حركه غيره .
    - أها واصل واصل ما توقفه أنت يا ركس ياخ .
    - أها وقفت مسافة في الحيطة زولنا يتقلب ساي ومرات يقح شديد . ويرجع ينوم تاني .أها قلت أنتظر لامن يغرق في النوم .. لامن أتأكدت نام تلبت الحيطة .. هو صحى رفع رأسه .. لكن في شجرة ليمون طوالي لبت بوراها وطلعت السكينة قلت لو جا علي أجقدوا ليك لامن يعرف حاجة واشتت طوالي (أطعنه بالسكين وأهرب ) . لكن تاوقت لقيت صاحبنا رجع أتغطى بالبطانية .أنتظرت زي خمسة دقايق ومشيت حفيان بطرف أصابعيني .. جيت جمبه قلت أتكأد أنه نام ..أتاري صاحبنا ( الفارة دا ) كان صاحي وخايف بالله الراجل دا يرجف زي مكنة الجاز .. هاهاهاها ..
    وانفجروا ضاحكين : الله يجازي محنك يا عضة ياخ أها وعملت شنو ..؟
    - يا زول طوالي مشيت على الصالة والغرف بقلب قوي لقيت ليك باب الصالة من برة مقفول بالمفتاح . قلت أكيد المفتاح مع صاحبنا دا جيته راجع . الراجل عاينت كدا لقيته لسع بيرجف تحت البطانية . بدون تردد دخلت يدي تحت المخدة بتاعته طلعت ليك دقشة المفاتيح . يمين يا خزنة تشوفني تقول أنا سيد البيت ولعت ليك النور بمزاج . فتحت الدواليب لامن لقيت الخزنة شطبتها ليك وصاحبنا لقيت عنده جلاليب كدا حاجة فخمة ياخ وشالات وعمم .. شلتها قلت يمكن تجينا مناسبة عقد ولا كدا ما الواحد لازم يكون وجيه وكدا ..
    - أتذكرت يا عضة دي أنت بعدها سافرت أديس أببا وأسمرا .
    - يا زول هيصت هيصة شديدة الناس قايلني أغتربت هاهاهاهاهاهاها .
    سليمان لازال ينظر ويستمع لهذه الحكاية وغيرها .. شعر بأن احشائه كلها ذابت وكادت تخرج من بطنه .
    - أها يا سليمان شبعنا ما محتاجين للطحنية والمربى ولا شنو يا شباب فيكم حد عايز حاجة ولا يناولنا البسبسي والبارد ؟
    - لا كفاية هات الببسي يا عم سليمان .
    - حاضر .. خرجت من فمه مشرشرة كادت تفضح رعبه دخل الدكان واستخرج لهم زجاجات البسبسي فتحها ووزعها عليهم .
    قاموا وتوجهوا ناحيته للحساب ومد له خزنة الخاتم من جديد .
    - والله يا استاذ خزنة أعفيني من حكاية الخاتم دي ؟
    - حلوة استاذ دي ..شنو نعفيك وما نعفيك ما عايز حسابك .؟
    - لو ما معاكم فكة خلوه ما بيناتنا .
    - يا زول نحن ما بناكل حق زول أوانطة .
    - ومال الدهب دا جبتوه من التنقيب ؟ هذه العبارة فلتت من سليمان غصبا عنه لا يدري كيف خرجت وندم عليها ولم يستطع بلعها بعد ذلك . لانها حولت خزنة الى أسد ثائر من جديد مسكه من عنقه نفس الخنقة السابقة ؟
    يتبع
                   |Articles |News |مقالات |بيانات

11-01-2015, 03:50 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    يتبع
                   |Articles |News |مقالات |بيانات

11-01-2015, 03:55 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    أخونا أحمد محمد صالح بادي الشاعر غاظتو حكاية يتبع دي فقال :

    من بـداية الـْبـُوْست دا كـَتـَمْ نـفـسى، ولـَىْ ريـقى أبـلع
    وأقلـِّبْ صفحه صفحة طمْعـَان لى نهاية القـِصِّىْ أسمع
    كان مـاهـا كـَلـْمـِى شـَيـْنىِ، كان قُتـَّلَكْ علينا لا تـِنْـدَلـَّع
    وأمانا ماسَلـِّيـْت رِيْوَحْتِى بالكلمه الدَنـَّقْ فيها:يتْبَع، يتبع

    ههههههههههههه
                   |Articles |News |مقالات |بيانات

13-01-2015, 08:17 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    .
                   |Articles |News |مقالات |بيانات

13-01-2015, 08:58 AM

عزالدين عمر
<aعزالدين عمر
تاريخ التسجيل: 08-10-2014
مجموع المشاركات: 143

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    يعنى يا كباشي نقطتك الفي المداخلة الاخيرة دي شحتفة ولا شنو ما فهمناها

    برضو منتظرين
                   |Articles |News |مقالات |بيانات

13-01-2015, 12:48 PM

جلالدونا
<aجلالدونا
تاريخ التسجيل: 26-04-2014
مجموع المشاركات: 6445

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: عزالدين عمر)

    اها بدينا فى الجرجرة و حراق الروح و الشحتفة
    سلام يا رايع .. متابعين
                   |Articles |News |مقالات |بيانات

13-01-2015, 04:09 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: جلالدونا)

    معليش يا شباب والله ما قاصد حاجة لانه بلاقي البوست مشى الصفحة الثانية وانا ما جاهز لاضافة حلقة جديد أقرب وأسهل حاجة هي النقطة ... لانه لو عد صفحة صقحتين الله أعلم أرجع له تاني

    لكن ليكم علي الليلة أكملها ليكم بس ولا شحتفة ولايحزنون
                   |Articles |News |مقالات |بيانات

13-01-2015, 04:19 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    خاتم سليمان (19)
    في اللحظة التي كان يضحك فيها زبائن عم سليمان غير المرغوب فيهم شعر جاره اللدود بالقلق داخل بيته لامر ما لا يدري سببه خرج فتح باب بيته المطل على دكان سليمان .. غير مكترثا لنداء زوجته .
    - يا راجل مالك طالع الشارع نص الليل .؟
    - شاعر بقلق كدا ما عارف في شنو .
    فتح الباب وركز نظرة ناحية متجر سليمان شاف المحل خاليا الا من شلة الزبائن الذي يلتفون حول صحن الفول يضحكون بأعلى صوتهم دون حشمة . أكتفى بالمراقبة من بعيد .قرر أن يدخل الى بيته عائدا لكنه لم يرتاح للقرار تأخر قليلا الى أن وصل الأمر مرحلة الخنق .. عرف بعدها أنهم شلة اللصوص ..أنفعل قرر أن يجري لينقذ صاحبه الآ أنه تعقل الآمر سريعا لكنه تذكر الصفارة التي منحها لهم العم عبد الرحمن الحكم المتقاعد إذ كانت بحوذته .. دخل بيته قفل الباب وبدأ يطلق منها صفيرا متواصلا .


    شلة اللصوص كانوا مشغولين بفك يدي قائدهم من رقبة عم سليمان المسكين قبل أن يموت في يده ويحيلهم الى قتله بعد أن كانوا مجرد لصوص . لم يركزوا على صوت الصفير الذي أتى أكله أذ بدأت الابواب تفتح ويخرج الرجال والنساء من بيوتهم محملين بكل ما وقع في أيديهم من عصا أو ماسورة حديد أوسيخة وبعضهم سكاكين وسيوف .. شلة اللصوص لم يفيقوا الا والضربات تنهال عليهم من كل حدب وصوب .. حاولوا الفرار لكن العدد كان أكبر من أن يمكنهم من ذلك . بعضهم سقط متضجرا بدمائه .خاف عم عبد الرحمن أن يروح اللصوص في أيدي أهالي الحي الغاضبين وبدأ يهدي فيهم قبل أن ييحيلوهم الى أكوام من اللحم والعظام ..

    - خلاص كفاهم يا جماعة كدي حا يموتوا خلوكم عاقلين .. لالالالا يا مصعب خلاص يا حاتم ..أنتهج الكبار أيضا اسلوب عبد الرحمن في تهدئة النفوس .. لكن حالة عم سليمان المزرية ومجابهته الموت في لحظة غفلة أهل الحي عن حمايته كانت تشعل القلوب نارا .
    وبعد قليل هدأوا وتكوم اللصوص في الوسط بما فيهم زعيمهم بين نزيف وكسير وجريح . تطوع أحد ابناء الحي بإبلاغ الشرطة التي أتت في قوة بقيادة الضابط نفسه الذي باشر الحادث منذ أن كان مجرد خاتم مسروق سقط سهوا في جك الفول .
    شكر أهل الحي وعاتبهم على العنف وأستلم اللصوص في عربة الشرطة وقال متوعدا خزنة زعيمهم .

    - ما قلت ليك يا خزنة أنا حا أجيبك وأدخلك السجن .؟

    - خزنة بوجهه الدامي والمتورم بصعوبة عقب للظابط : يعني دا كمين أنت كنت عامله لينا ؟

    - أسكت ساي أنت شفت حاجة .

    أنصرفت عربة الشرطة وبقى أهل الحي يحتفلون بنصرهم ويواسون عم سليمان الذي أنقذ من الموت بأعجوبة .
    - أنتو الضابط قال دا كمين هم عاملنه للحرامية ؟
    - كمين شنو ديل كذابين ساي والله كان ما عمر صفر ومرق الناس عم سليمان كان الصباح نجي نلاقيه ميت مخنوق جمب دكانه .

    - هم لو يقدروا حاجة من الأول ما كان الحرامية طلعوا من السجن ..ناس ثبتت عليهم التهمة يفكوهم كيف .؟؟

    بدأت الجمل ترد من هنا وهناك مرة تهكما ومرة فرحا بصحوتم وقدرتهم على حماية أنفسهم من أعتى القتلة والمجرمين ..

    - والله الحكاية دي تستاهل لها كرامة

    قالها حاج عبد الرحمن قبل ما يعقب تاجر الجملة خضر : أنا الخروف علي بكرة أنشاء الله أهل الحي كلهم معزومين عندي في الديوان ..
    جزاك الله خيرا .. وانا علي بالرغيف ..وانا الفحم ..وانا وأنا .. بدأت التبرعات تنهال منهم بكل أريحية وحبور ..

    وفي النهاية
                   |Articles |News |مقالات |بيانات

13-01-2015, 04:23 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    النهاية
    في اليوم التالي ليوم الحادث العظيم أجتمع أهالي الحي في بيت خضر التاجر ذاك البيت الواسع الفخم الجميل .. وفي صالونه كان أهل احي يجلسون في حلقات وبعضهم تحت ظل الشجر الوارف المنتشر في الحوش .. يحكون عن أحداث ليلة الآمس .. كل واحد يحكي عن بطولاته ودوره في قهر هؤلاء المعتدون .. وتتقاذف الجمل من نوع ( تعرفوا العاتي داك .. كان عاوز يجري يمين خبطه بالصيخه في ركبته .. لامن برك ..وانا كمان يا عاطف أديته بالعكاز في رأسه .. والطويل داك كمان بعد ما فلت عاوز يجري عماد جراه من رجله بس جا منبرش على وجه ) .. وعم سليمان يمدهم بالمعلومات : الطويل العاتي داك أسمه خزنة هو زعيمهم ..
    - أنت بتعرفهم من وين يا عم سليمان ؟
    - حا أعرفهم من وين كمان المجرمين ديل .. أنا ما لماني فيهم الا خاتم الجن دا . ما تقول حاجة يا عمر ؟
    يبدو أن بذرة صداقة نضرة نبتت بين الاثنين أبطال الخاتم عم عمر وعم سليمان ,, بعد ما وصلت عداوتهما للقمة وجرتهما الى مكاتب الشرطة والحراسات .. لكن الحدث الأخير الذي ساهم فيه عمر مساهمة فاعلة في أنقاذ سليمان من الموت غسل كل رواسب الغل القديمة بينهما .. أصبح سليمان يحس بأنه مدينا بحياته لعمر .. كما شعر عمر بعاطفة صادقة تجاه سليمان بعد أن وضح له أنه انسان ضعيف مغلوب على أمره .. لولاه لكانوا اليوم متجمعين في بيته حزنا على فراقه .. لكن الحمد لله الذي زرع فيه ذاك القلق حتى يخرج من بيته ويكون سببا في أنقاذه , نحن عادة نميل لحب الشخص الذي يحتاجنا أكثر من الشخص الذي نحتاجه وهذا السر الذي غرزه الله في الانسان وصفة خاصة الوالدين لتظل الأسر متماسكة ومتحابة ,. عقب عمر على طلب صديقه بعد أن تم تفعيل الصداقة بينهما من جديد دون شوائب عدا ما ستسفر عنه مقبلة الأيام من أحداث ووفقا لطبيعة الشخصين .. وكما قيل الطبع بغلب على التطبع .
    - قصة الخاتم تاني يا سليمان أنت ما تبت منها هاهاهاهاها .أها يا جماعة قصة الخاتم باختصار قبل شهر أشتريت فول للفطور من عم سليمان رحت البيت المره لقت فيه خاتم جيت سألت منه عم سليمان نكر علاقته بيه خايف أعمل معاه مشكلة وما كان فاكره خاتم دهب ..رحت أبيعه لقيت ناس المباحث منسقين مع الصياغ أها لموا فيني .. في الحراسة قلت ليهم الخاتم دا لقيته في جك الفول جابوا سليمان طلع مستلمه من الحرامية ديل مقابل عشا ووقع منه في قدرة الفول دون أن ينتبه .. بعد زرزروه أتعرف عليهم جابوهم .أها أمس الحرامية طلعوا من الحراسة وجو ينتقموا منه لانه أعترف عليهم ..
    - لكن الحرامية طلعوا كيف من الحراسة بعد ما ثبتت عليهم التهمة .؟
    - أها دا السؤال الأنا ما عندي ليه أجابة ..
    - ولا أنا والله ما عندي ليه أجابة ..
    - أنتظروا الضابط أكيد راح يجي يحقق معانا بعد ضرب الجماعة ديل وكسيرهم راح نسأله لانه دي مسؤولية كبيرة .
    - أها يا أخوان عايزين نتفق على حاجة في التحقيق لو جا سؤال تفصيلي شخصي يعني مثلا مين فيكم كسر يد فلان تكون الأجابة واحدة كلنا نقول أنا أنا . نحن ما راح نسمح أيه تهمة توجه لشخص واحد فينا نحن كنا ندافع عن فرد منا وننقذ حياته البطولات البتحكو فيها دي لللاستهلاك المحلي والونسة فقط .
    - ينصر دينك يا عم عبد الرحمن والله أنت حكيم الحي فعلا ..
    أنفض أهل الحارة في يوم أشبه بالعيد بادئين صفحة جديدة من التعاون على البر والمحبة التي هي كفيلة بحماية أي فرد فيها من الشرور المتلاحقة .. الوحدة جديرة بأن تجعل كل ضعيف قوي وكل فقير غني وكل جبان شجاع عندما يختزن في ذاكرته أن له ظهر قادر على حمايته ضد عوادي الزمن المتفلت ..
    أنتهــــــــــــــــــــــــــــــــت
                   |Articles |News |مقالات |بيانات

23-04-2015, 08:22 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( مسلسل) (Re: درديري كباشي)

    تحية للفول
                   |Articles |News |مقالات |بيانات

24-04-2015, 07:43 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان ( نهديه لقدرة الفول) (Re: درديري كباشي)

    .
                   |Articles |News |مقالات |بيانات

02-09-2015, 03:44 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان (Re: درديري كباشي)

    .
                   |Articles |News |مقالات |بيانات

06-09-2015, 07:44 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان (Re: درديري كباشي)

    نرفعها لطب بعض الاخوة
                   |Articles |News |مقالات |بيانات

07-09-2015, 04:31 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان (Re: درديري كباشي)

    .
                   |Articles |News |مقالات |بيانات

10-09-2015, 04:29 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: خاتم سليمان (Re: درديري كباشي)

    Quote: .
    Sayed Abd Albagi · Awad alhasan
    أستاذ درديرى متابعين بلهفة وشوق للحكي السمح ده .... والواحد والله بقي يخاف يقراء ليك عشان شحتفت الروح هههههههه ... نحن مقدرين ظروفك لكن تقول شنو حركات مننا بس


    آسفين يا شباب لم انتبه للمداخلة أو لم أنتبه أنه ما رديت عليكم

    عموما شاكر جدا على السند ونشوفكم في حكاية تانية

    (عدل بواسطة درديري كباشي on 10-09-2015, 04:31 PM)

                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de