منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 11-12-2017, 11:36 AM الصفحة الرئيسية

مدخل أرشيف للعام 2015م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

حاجاتنا بِقن كُتّار خلاس. والله صحي...

23-01-2015, 01:03 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


حاجاتنا بِقن كُتّار خلاس. والله صحي...

    كُتّار ؤُ مُساخ كمان.



    ونواصل إن شاء الله...
                   |Articles |News |مقالات |بيانات

23-01-2015, 03:57 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    زمان حبوبتي بت ميدوب الله يرحمها كان عندها مرقون، عرشو مسنود في النص
    بشعبة هي مسكن للدنانيّن والعرش هو الآخر تسكنه الزرازير والسوار. هذه
    الزرازير والحشرات تشارك حبوبتي السكن في مرقونها من غير ان تبدي ضجر
    أو ملل من حركتن الدآئبة طول اليوم. في المرقون في تلاتة عناقريب إتنين فوقِن
    شلتوت وِسادة وباقيات علي الحبل، والتالت (Luxury) يعني نظام مع شلتوت الوِسادة
    مفرشة فوقو عتنيبة. في ركن من أركان المرقون في سحارة لحفظ المواعين والحاجات
    ذات القيمة العالية، مثلاً فِدايات، حُجُوّل، حبة الجنيه، فتيل ريحة بِت القسيس وآخر
    بت السودان، وضروري جداً وآحد ريحة السيّد علي، وبرآد طبعت فوقه صورة السيّد
    علي وأولآده، إضافة لتوب زراق وحُق. جريدة نخل مربوطة بين حبلين موصلين
    بسقف المرقون عاملة نظام شماعة لعِليّق الهِديمات، ولمان تكون في ضبيحة بيشرو
    فوقها الشرموط برضو. في الخارج فسحة كبيرة جداً بين المرقون والجنينة، وفي
    الجهة الشرقية من المرقون حرازة حبوبتي وتحتها غِنيماتا. حلّة زرقا لحلب الغنم
    في الصباح، وسِعِن معلّق في شدرة الحِنّة التي تفصلها حوالي خمسة أمتار من باب
    المرقون، تحتها عنقريب سغيّر تقعد فوقو حبوبة العصُر لخش اللبن. في ضهر
    المرقون في جبيق جريد وسِعنين تلآتة اللآت عجوة. مُصلآية ومُعلآق (مشلعيب)
    هذا ايضاً ضِمن أساس المنزل. عندها شِقيانة ومراويد لزوم دق النقرسان. تحت
    العنقريب بيفِليل لآزم تكون في كورية جردقة لتخفيف حِدة النحار. وبس...
                   |Articles |News |مقالات |بيانات

23-01-2015, 04:37 AM

معاوية الزبير
<aمعاوية الزبير
تاريخ التسجيل: 07-02-2003
مجموع المشاركات: 6704

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    بَس شنو يا مدير
    دا مشهد أول داخلي
    يللا شيل الكاميرا لمشهد خارجي (الجنّون ابّان عراريق شاربه من موية الدميرة
    وخطوط ملح العرَق ترسم أودية بامتداد الرقبة، و سنيناتم البيضاء من أثر عدم
    تناول أي حاجة ملوثة، قبُل مرحلة تدخين سيقان اللبلاب والسِفيفات المختلسة من حُقة الجد)
    يعني معقول توصف الراسي المستقر وتخلي المتحرك القلِق الذي سيشكل المستقبل؟
    واصل واصل، لسه في صوت نهيق حمارة منو وحِسيس دحيش نجمِ غَدْ .. الخ الخ ياخ
                   |Articles |News |مقالات |بيانات

23-01-2015, 04:38 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    كدي قبُل نمشي لقدآم النمسك الموبايل دا.
    أها، الموبايل عندو شاحِن في البيت وشاحِن في العربية، ووصلة عشان يتوصل مع
    التلفزيون ووآحدة تانية عشان يتوصل مع الكمبيوتر، وكمان في وآحدة عشان يتوصل
    مع سماعات العربية، وشاشة لوقاية الشاشة الأصلية ما يحصل ليها دآمـj وسماعة،
    وبُلُو توث للعربية، ووآحدة للضان، وبعد دا كلللللو عندو جفير عشان تحفضو فيهو.
    قااااااااااادر الله، ويا حليل أهلنا وزمنُن...
                   |Articles |News |مقالات |بيانات

23-01-2015, 05:08 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    نسيت اقول،
    حبوبتي كانت عندها دفارة وقُرباب، ولمّبة كوز يعني مسرجة أو مِشرِط.
    الظاهر عليها كانت مرا مبزرة خلآس...
                   |Articles |News |مقالات |بيانات

23-01-2015, 05:56 AM

Khalid Elmahdi
<aKhalid Elmahdi
تاريخ التسجيل: 20-08-2012
مجموع المشاركات: 609

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    حكي طاعم...
    أهلنا الصوفيه قالوا:
    ما عاقهم الا تكاثر زادهم*** مما يباح ولايباح!!!
                   |Articles |News |مقالات |بيانات

23-01-2015, 07:03 AM

محمد الكامل عبد الحليم

تاريخ التسجيل: 04-11-2009
مجموع المشاركات: 2410

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: Khalid Elmahdi)

    تحية


    يا معاوية المدير اكاد ان اسمع صوت حبات الماء من الزير حين تلامس سطح القدح الصغير الموضوع بعناية بأسفله وطيور الجنة صغيرة الحجم تتصيد لحظة صمت الأشياء لتلتقط حبات الماء المنقوع..

    تقوم تصحينا بي صوت الموبايل واجراسه وتوقعاته الماكره؟

    لك طيف ذكرياتي الحانية..
                   |Articles |News |مقالات |بيانات

23-01-2015, 08:53 AM

عبدالعزيز عثمان
<aعبدالعزيز عثمان
تاريخ التسجيل: 26-05-2013
مجموع المشاركات: 4037

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: محمد الكامل عبد الحليم)

    اها قمت علينا تووقد في نيران الحنين..
    يازول ماتخاف الله فينا
    الدنيا انصاص ليالي
    مطر وبرد يدخل جوه الروح
    وريح تعوي...
    وتاتي بحبوبتي في دي الساعة
    وهي تحتل كل الامس الجميل...
    الله اسامحك..
                   |Articles |News |مقالات |بيانات

23-01-2015, 10:19 AM

عماد حسين

تاريخ التسجيل: 10-06-2011
مجموع المشاركات: 6960

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: عبدالعزيز عثمان)

    معاوية..

    شنو يا أخي
    Quote: شعبة
    دنانيّن
    زرازير
    شلتوت
    فِدايات
    حُجُوّل


    أرجو مراعاة الناطقين بغيرها من أولاد البندر
                   |Articles |News |مقالات |بيانات

24-01-2015, 00:14 AM

اخلاص عبدالرحمن المشرف
<aاخلاص عبدالرحمن المشرف
تاريخ التسجيل: 04-03-2014
مجموع المشاركات: 1705

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: عماد حسين)

    لا زلت الاول
                   |Articles |News |مقالات |بيانات

24-01-2015, 03:17 AM

عبدالحفيظ ابوسن
<aعبدالحفيظ ابوسن
تاريخ التسجيل: 24-06-2013
مجموع المشاركات: 15840

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: اخلاص عبدالرحمن المشرف)

    سلام المدير وضيوفه
    قالوا فرح ودتكتوك كان عندو ركوة وابريق وعصاة
    يحكي ان سلمان الفارسي كان واليا في احد الامصار . وقامت حريقة .. الناس تتجاري وتمرق في حاجاتا اما هو
    دخل
    واخرج عصاته
    وقصعته
    وقال للناس
    وكذلك يوم القيامة ! خففو يخفف عنكم
    اها ياخ برضو راعي لينا نحن ناس بندر ادينا مذكرة تفسيرية ( وشوش متفنقلا من الضحك
                   |Articles |News |مقالات |بيانات

24-01-2015, 10:00 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: عبدالحفيظ ابوسن)

    Quote:
    بَس شنو يا مدير
    دا مشهد أول داخلي
    يللا شيل الكاميرا لمشهد خارجي (الجنّون ابّان عراريق شاربه من موية الدميرة
    وخطوط ملح العرَق ترسم أودية بامتداد الرقبة، و سنيناتم البيضاء من أثر عدم
    تناول أي حاجة ملوثة، قبُل مرحلة تدخين سيقان اللبلاب والسِفيفات المختلسة من حُقة الجد)
    يعني معقول توصف الراسي المستقر وتخلي المتحرك القلِق الذي سيشكل المستقبل؟
    واصل واصل، لسه في صوت نهيق حمارة منو وحِسيس دحيش نجمِ غَدْ .. الخ الخ ياخ


    في صوت نهيق حمارة !، كأنك شفتها يا ود الزبير مربوطة جنب باب الجنينة المقابل باب المرقون،
    حمارة أُمحُوّمد ود ياسين البيضا كان يقضي مشاويره علي ظهرها، ونردبها الموية من البحر فوق
    الخُرُج المصنوع من جلد التور بدبارة فائقة فتحتين من فوق لملي الخُرُج وفتحتين في أركان الخُرُج
    لسكب الموية في اللزيار والجرادل من خلآل بوز قزازة مربوط بإحكام في الفتحتين، وبنقفلو بعضم
    القنقرة بعد نكُدها. ما أحلا البحر وورُوّد البحر وبِنيات الفريق فاكات الصفايح فوق راسن وشاقات
    قصب الجروف لا يقيهِن من لسع الناموس والكُنتيب إلا تلك الناموسية المصنوعة من جريد النخل،
    والتي تبدو فوق راسهن كتاج الملكة. البساطة كانت مالية النفوس والقناعة كانت هي سيدة الموقف،
    والزول حمارتو دي ما يبدلآ بأجعص مارسيدس. مرقنا نتبِن في الضُلُمّة أنا وهمزة ود أُمحُوّد
    ود ياسين الله يرحمو لآحقين صلآة العِشا في الجامع لقينا حمارة الكجر جناها مدلدل، وقفنا فوقا
    ولدناها وزفينالو الخبر، فِرِح كأنّنا حدسناهو بوضوع زوجته.
    ويـنـا مـراتـع الـدرت الـباسط دايـما بـبكي ..عـليهن
    ويـن بـنوت الـحلة الـبكّر عصرا بدري يسوّن في شاهيهن؟
    الجنوّن ابآن عراريق يا ود الزبير مُتطلآبتهم ما كانت بتفوت طاقية تحت الحاجب المعقود، وخوسة
    ضراع، وسروال ومركوب، وشبال من السمحة وكِت في هيباتا تتجلى، وخُت في بالك الشبال بي
    شرّو، وفي الحِتة دي بالزآت هيجة الناس تفوت الحد وكان حجازا مدّ اليد بتسمع كع.

    الجنيات الحزمو الجبه
    وعرق الشتوي عليهم نايا و صبا
    وحات الله كانوا ملوك يوم كانت النفوس متسّبة بالقناعة، في الحواشة ضراعُن اخدر، ؤُشتلِن
    قابض، وفي السوق مشنقين طواقيهم وإسياد الموقف تب، ووكت القمر يظهر بينات الضفاير
    تتحكم ملوك الكيف وتحلوّ الونسة. قعدة ولا في أفخم فنادق باريس ونيو يورك.
    الحياة كانت أنيقة لأنها كانت بسيطة. كدي أحسب شوف الواحد الليلة عندو كم كريم؟. علي اليمين
    نحن زمان المسوح دا عندنا خيابة، وما كان عندنا غير الودك نطقطقو فوق كرعينا لآمن يشققن
    من الصقط...
                   |Articles |News |مقالات |بيانات

24-01-2015, 11:03 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: حكي طاعم...
    أهلنا الصوفيه قالوا:
    ما عاقهم الا تكاثر زادهم*** مما يباح ولايباح!!!


    تطعم لك الحياة إن شاء الله يا اخينا.
    صدقو أهلنا الصوفية والذي رفع السماء بلا عمد. لآمن نزلت الآية {ثُمّ لَتُسْأَلُنّ يَوْمَئِذٍ عَنِ النّعِيمِ}
    الصحابة قالوا للرسول عليه أفضل الصلآة وأتمّ التسليم فيما معناه، وينو النعيم؟، ما عندنا غير
    الأسودين التمر والماء، وسيوفنا فوق كتوفنا والعدو أمامنا. قال لهم الرسول صلي الله عليه وسلم
    فيما معناه، سيكون. شُفت كيف!؟.
    يا اخي كدي عاين بس للحبوب، الوآحد عندو مليون فتيل اللآت الدغت، واللآت الملآريا، واللآت
    الرطوبة، واللآت وجع الراس، واللآت السكري، واللآت السجم واللآت الرماد. أهلنا زمان ما بعرفو
    حاجة غير القرض، واللِسبتالية دي بجنبها ما بيمشو الوآحد يقرطع كباية السمنة زي الماحصل شي
    ويِدشى ويقوم علي خدمتو زي الماحصل حاجة لا كلوسترول، لا قِفيّل شرايين. جدنا ود الشونة كان
    فاتحلو دكان في الحِلّة وبيجيب بضاعتو من سوق اتبرا فوق حمارو. الله يرحمهم ويغفرلهم، ابوي
    أكان بيرسلني اجيبلو السجاير من دكانوا، اوآت ما اقيف قداموا يخُت المصحف ويسألني، خرمجة
    السِغيّر، خرمجة الكبير كيفنو؟. أقولوا بيسلم عليك. يديني السجاير ويرجع لمصحفو يطقطق المصحف
    من الحمدو للناس لا نضارة نظر لا نضارة قراية لآمِن مات. نحن هسّع نضارة نظر، ونضارة قرآية،
    ونضارة شمس، ونضارة طابقين، وبعد دا الحالة ماياها.
    الطقطقة دي ذكرتني صاحبنا هاشم، ود اتبرا الكان ساكن معانا في الغزالة الحمرا، كان يجي من
    الشُغُل هلكان، يقول لي، عارف أنا لآمِن أشوت العشا دا تاني ما بتناضم. أقولو، يا هاشم تشوت
    كيف، الحكاية دي صلآة؟. يقول لي، ايّ والله، وباكر يكرر نفس الكلآم!، نعمنو بينسى...
                   |Articles |News |مقالات |بيانات

26-01-2015, 06:20 PM

معاوية الزبير
<aمعاوية الزبير
تاريخ التسجيل: 07-02-2003
مجموع المشاركات: 6704

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: قالوا فرح ودتكتوك كان عندو ركوة وابريق وعصاة
    يحكي ان سلمان الفارسي كان واليا في احد الامصار . وقامت حريقة .. الناس تتجاري وتمرق في حاجاتا اما هو
    دخل
    واخرج عصاته
    وقصعته
    وقال للناس
    وكذلك يوم القيامة ! خففو يخفف عنكم
    والله ديل يا أب سن ناس فايتين الحكمة بي غادي ورايح

    تعرف أنا جنّي رحول من البيوت، هسي في قطر دي من سنة 2001 لغاية الآن سكنت في 8 بيوت
    والله في ناس لما يكونوا دايرين يزوروني أول حاجة بسألوني: رحلت من بيتكم حق المرّه الفاتت ولّ لسه؟
    أها في الرحيل دا بتطلع من البيت المرحول عنو كترت عِدة وكراكيب، الصراصير زاتها ما بتكون عِترت فيها
    الكلام دا لافق مع البوست ولّ نرحل منّو ؟
                   |Articles |News |مقالات |بيانات

28-01-2015, 00:40 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية الزبير)

    sudansudansudansudansudansudansudansudansudan48.jpg Hosting at Sudaneseonline.com

    حرآزة حبوبتي بِت ميدوّب...
                   |Articles |News |مقالات |بيانات

28-01-2015, 01:23 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: تحية
    يا معاوية المدير اكاد ان اسمع صوت حبات الماء من الزير حين تلامس سطح القدح
    الصغير الموضوع بعناية بأسفله وطيور الجنة صغيرة الحجم تتصيد لحظة صمت
    الأشياء لتلتقط حبات الماء المنقوع..
    تقوم تصحينا بي صوت الموبايل واجراسه وتوقعاته الماكره؟
    لك طيف ذكرياتي الحانية..


    حياك الغمام أخي محمد.
    نُقاع الزير في الليل يشارك الصمت الأصوات الصادرة منه، تسمعه في هدئة الليل التي تضج
    بالصمت كدقات قلب المرء يبعث الحركة في السكون ويعبث بلوحة الليل الصافية، ويخترق سمعك
    في قيلولة النهار الساكنة وتلك الزرازير الجميلة تروي ظمأها من موية النُقاع التي تستعمل لعمل
    الشاي لأنها صافية. الموية نواحي السافل موية نيّل الوآحد فينا كان ينبطح فوق الجدول المارق من
    الجنينة وشاقي السام ويكركِع موية مشبعة بالطمي وتخينة تشبِعك لآمن تقيف دُت لا حصوة لا وجع
    كلي لا يحزنون. نصيبنا من الألعاب كان طين الجدول الذي نصنع منه مستقبلنا البسيط جداً، اليوم
    وِليداتنا حاجاتُن كِترن بالحيل، موبايل، بلي إستيشن، ؤ شِيتاتاً أنا والله ما بخبرن. كنا نطارد الفراش
    والجراد في حواشات البرسيم وشايلين نبلنا وفوق طيرنا حايمين. موية النقاع كانت قيمتا عالية والناس
    ما كان عندهم تلآجات، بالليل تلقى الناس قللُن تريانات، ومرات يصبو الموية في الصينية شان تبرُد.
                   |Articles |News |مقالات |بيانات

28-01-2015, 03:13 AM

محمد الكامل عبد الحليم

تاريخ التسجيل: 04-11-2009
مجموع المشاركات: 2410

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    تحية

    اكاد اشم رائحة الطين وهي تخالط نباتات تتماوج الوان خضرتها وهي في حب لا تفضحه نسيمات الصباح ,و رجع اصوات تتناغم فيها الطيور والبغال والحمير تدوذن عبر حركتها معزوفة الأرض والنيل والحياة..


    جادك العطر من شلالات سحره الغامض المثير..
                   |Articles |News |مقالات |بيانات

28-01-2015, 07:32 AM

MOHAMMED ELSHEIKH
<aMOHAMMED ELSHEIKH
تاريخ التسجيل: 21-03-2008
مجموع المشاركات: 8632

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: محمد الكامل عبد الحليم)

    زمان حبوبتي بت ميدوب الله يرحمها كان عندها مرقون(مخزن)، عرشو مسنود في النص
    بشعبة (عمود)هي مسكن للدنانيّن(ابو دنان) والعرش هو الآخر تسكنه الزرازير والسوار(اتم سوارة نوع من الطيور). هذه
    الزرازير والحشرات تشارك حبوبتي السكن في مرقونها من غير ان تبدي ضجر
    أو ملل من حركتن الدآئبة طول اليوم. في المرقون في تلاتة عناقريب إتنين فوقِن
    شلتوت(قطعة قماش او دلقان) وِسادة وباقيات علي الحبل، والتالت (Luxury) يعني نظام مع شلتوت الوِسادة
    مفرشة فوقو عتنيبة(برش باللوان مختلفة يفرش للنوم على العنقريب). في ركن من أركان المرقون في سحارة لحفظ المواعين والحاجات
    ذات القيمة العالية، مثلاً فِدايات(مصوغات تلبس في الأذن)، حُجُوّل(مصوغات تلبس في الرجل)، حبة الجنيه، فتيل ريحة بِت القسيس وآخر
    بت السودان، وضروري جداً وآحد ريحة السيّد علي، وبرآد طبعت فوقه صورة السيّد
    علي وأولآده، إضافة لتوب زراق وحُق. جريدة نخل مربوطة بين حبلين موصلين
    بسقف المرقون عاملة نظام شماعة لعِليّق الهِديمات، ولمان تكون في ضبيحة بيشرو
    فوقها الشرموط برضو. في الخارج فسحة كبيرة جداً بين المرقون والجنينة، وفي
    الجهة الشرقية من المرقون حرازة حبوبتي وتحتها غِنيماتا. حلّة زرقا لحلب الغنم
    في الصباح، وسِعِن معلّق في شدرة الحِنّة التي تفصلها حوالي خمسة أمتار من باب
    المرقون، تحتها عنقريب سغيّر تقعد فوقو حبوبة العصُر لخش(رجه لاستخراج السمن واروب) اللبن. في ضهر
    المرقون في جبيق(عدد معين من جريد النخل الناشف) جريد وسِعنين تلآتة اللآت عجوة. مُصلآية ومُعلآق (مشلعيب)
    هذا ايضاً ضِمن أساس المنزل. عندها شِقيانة(حذاء بسيط مصنوع من الجلد ويسميه آخرون سعيدانه) ومراويد لزوم دق النقرسان. تحت
    العنقريب بيفِليل لآزم تكون في كورية جردقة لتخفيف حِدة النحار(الحموضة). و


    اها قصرت معاكم
                   |Articles |News |مقالات |بيانات

28-01-2015, 08:27 AM

Haytham Ghaly

تاريخ التسجيل: 20-01-2013
مجموع المشاركات: 3192

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: MOHAMMED ELSHEIKH)

    ود المدير وضيوفه الافاضل

    سلام ومحبة

    والله يا ود المدير قبل يومين كنا انا وصاحباً لي بنتكلم عن موضوع الحاجات الكترت دا

    ياخي دي حكاية صعبة خلاص

    معلومات كتيييييرة شديد والرويس دا يخبر شنو ويخلي شنو ما تعرف


    سالت صديقي لو في طريقة لي عمل فورمات لي راس الجن دا لكن قال ماهو خابرلو شي

    انت لو عندك طريقة الحقنا والفانا بيها ينوبك ثواب.


    سيرة التراب والجداول والطين تخنق الواحد بالعبرة

    بالذات الزقاقات والقيزان وبعض الاماكن في تلك القرى الراحت


    تحياتي
                   |Articles |News |مقالات |بيانات

28-01-2015, 09:37 AM

MOHAMMED ELSHEIKH
<aMOHAMMED ELSHEIKH
تاريخ التسجيل: 21-03-2008
مجموع المشاركات: 8632

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: Haytham Ghaly)

    شوف الطواقي المشنقة دي

    P1010569.JPG Hosting at Sudaneseonline.com
                   |Articles |News |مقالات |بيانات

29-01-2015, 04:17 PM

محمد الكامل عبد الحليم

تاريخ التسجيل: 04-11-2009
مجموع المشاركات: 2410

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: MOHAMMED ELSHEIKH)

    تحية


    قال اسماعين ود حد الزين...

    (لي صديرياتنا لي لبس الطواقي...يا حليلك يا بلدنا...واللبيب بي صوتو لي جرحي يبيداوي...يا حليلك يا بلدنا...)



    افق تتلاقي مع فجر الأمنيات وظلال تعبث بهامساءات شليل والرمه والحراس...وبنوتن تحاكي الخيل...وشبالن مكنتن في طريفو ودع ..فتأمل .

    (عدل بواسطة محمد الكامل عبد الحليم on 29-01-2015, 04:18 PM)

                   |Articles |News |مقالات |بيانات

29-01-2015, 09:40 PM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: محمد الكامل عبد الحليم)

    Quote: اها قمت علينا تووقد في نيران الحنين..
    يازول ماتخاف الله فينا
    الدنيا انصاص ليالي
    مطر وبرد يدخل جوه الروح
    وريح تعوي...
    وتاتي بحبوبتي في دي الساعة
    وهي تحتل كل الامس الجميل...
    الله اسامحك..


    عبد العزيز يا قريبي،
    قالوا عندكم زُنبي في حِلتكُم !.
    ذكرتني ليالي الريف والأحاجي، الحبوبة ما بتحجي كان ما وآحدة من المشارط قعدت
    تفليلآ في شعرا، ونحن تلقانا متلمين ومقهيين كلّ وآحد فينا يحلم بأنه الفارس ود النمير،
    والبِنيات كلّ وآحدة فيهن شايفة نفسا فاطمة السمحة، والحياة زاتا يا اخي كانت سمحة،
    اليوم داير تتابع الدوري اللِنقليزي، وداير تتابع الدوري الأفريقي، والأسيوي، والآن بي آي،
    والسوبر بول، عجب والله !. زمان نرجى الوآطة دي مِتين تفلل عشان الحبوبة تكوّع فوق
    كراب العنقريب ونحن نِتفّن قداما في بطن الوآطة وتقعد تحجي بفاطنة السمحة واب زيد الهلآلي
    ونحن نسرح بخيالنا الصغير في عوالم تضج بالمغامرات بعد دآك نضرب اللِبأ وننوم وكلٌ منا
    يحلم بأنه فارس بني هلآل. اللِبأ هو لبن الغنماية الوالدة دابا وبيكون تخيّن يعني قريب للزبادي،
    كنا نحبه جداً ونحن سغار، هذا التعريف لشيخ عماد وجماعته.
    وحات الله يا عبد العزيز حبوبتي بت ميدوب دي فاتت الميّة لآ غادي، ولي قبل موتا كانت بتنضم
    الخيت في الخياتة. عندما ينقرش ود جبارة ربابتو ويصدح قايمي الصباح مِتكفلِتي شايلِي الحِليلة
    علي المُرآح، طوالي بتجي صورة حبوبتي قدامي رآبطة قُربابا وشايلة حلتا ومتجهة نحو مُراح
    الغنيمات تحت الحرازة. الصباح وما ادرآك ما الصباح في ذلك الزمن الجميل وفي تلك الأماكن
    أضرحة الصلآح ؟، جوفة موسيقية من مختلف أنواع الطيور تلآمس أجمل أوتار حناجرها لتخرج
    لحن الصباح تصدح معها الأغنام والأبقار وحتي الحمير صاحبة الأصوات المُنكرة، وتسمع هوي
    يا ناس، بت ميدوب كيف اصبحتِ؟، يصبحك بالخير تعال اشربلك كباية شاي، لا لا لآحق
    جنون البادراب قبل يعدو.
    ااااااااااااااااااخ، خلآس انا تُهتَ في الأشواق وما برجع وهسّع ضُمّة لا شايفك ولا بسمع...
                   |Articles |News |مقالات |بيانات

30-01-2015, 06:08 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote:
    معاوية..
    شنو يا أخي
    أرجو مراعاة الناطقين بغيرها من أولاد البندر


    يا شيخ عماد،
    حاولت ان أبسّط قدر المستطاع وبعد جُهدٍ جهيد توصلت إلي هذه الصيغة التي اظنها ما ديرالآ
    رفع ضو، يعني العميان ما بيعتر فوقا. ما بقدر ابسّط أكتر من كدي. زمان وكِت رحلت الخرتوم
    وإشتغلت في المخازن والمهمات، جنوّن وبِنيات البندر وكِت أنضم أكانوا بيضحكو علي. كنت
    أقولهم، إنتو يا ناس الناقصكم كتير بالحيل، وعلي اليمين الما عاش في الريف عيشتو ناقصة.
    ناس ما ركبو الحمير عِرِي، لا قِرصو حواهم فقير لا اتمكنو كواهم بصير، لا شاققوا بحر النيل
    والدنيا تساب، لا شقو البرود نُص الليل وسط الدوابي، لا فرعولُن حوض برسيم، لا قرّعوا
    التمُر، لا أمشي، لا تعالي، عليك الله نفر عِيشتُم دي شِن طعما ؟...
                   |Articles |News |مقالات |بيانات

30-01-2015, 06:25 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: الكلام دا لافق مع البوست ولّ نرحل منّو ؟


    لا، لا بالحيل لآفق،
    دحين لا ترحل لآمِن اجي أوقِعلك الوترة...
                   |Articles |News |مقالات |بيانات

31-01-2015, 09:04 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote:
    لا زلت الاول


    كتّر خيّرك كتيّر يا إخلاص،
    جبر الخاتر والله مُو هيّن.
    sudansudansudansudansudansudansudan222.jpg Hosting at Sudaneseonline.com

    ليك علي يا قريبتي كان واتيتك في السودان أقودِك من إيدك واوديك تزوري اللهل والبلد.
    عارفة يا (إخلاس) في أُمسيات البلد وكت الليل يفلل ونكون إتعشينا بالفطير باللبن وكوعنا
    فوق العناقريب في الحوش، وظهر القمر بينات ضفاير أشجار النخيل والونسة أخدت طعم
    ود لقاي الفوقو الطير يسوي الوآي، وتخلل ونستنا صوت بابور جالبو النسيم من الجزيرة
    بحس إنو أهلنا الرحلو كولهم حضور، أرواحهم تحوم حول أشجار النخيل والليمون والبُرتُكان
    والمنقة، وتكون الونسة في حضورهم عابقة بطيف من الذكريات.
    كانوا ملوك وحضورهم كان بهي وقوي، يملكون الأرض ويعرفون قيمتها يعطوها جهدهم
    وعرقهم فتجود عليهم ولا تبخل. في التمانينات مشيت البلد ولقيتها مخضرّة والجناين شايلة
    والجداول جارية والبهايم شبعانة ورويانة، فأعجبني ما رايت. رجعت اتبرا وبتونس مع الوالدة
    عليها رحمة الله، قتلها، يا يُمّة والله البلد ما شاء الله لقيتا تريانة ورويانة والجناين شايلة والجداول
    جارية والخير باسط. قالت لي، يا ولدي الخير رآح مع الزينين، زمان وكِت بالليل تقع هبوّب
    الصباح وكِت نقوم بندلي كرعينا فوق التمر. قلت سبحان الله ! الناس كانت طايحة فوقُن قناعة
    هي الخلّت اللرض تنتج...
                   |Articles |News |مقالات |بيانات

01-02-2015, 07:46 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote:
    سلام المدير وضيوفه
    قالوا فرح ودتكتوك كان عندو ركوة وابريق وعصاة
    يحكي ان سلمان الفارسي كان واليا في احد الامصار . وقامت حريقة .. الناس تتجاري وتمرق في حاجاتا اما هو
    دخل
    واخرج عصاته
    وقصعته
    وقال للناس
    وكذلك يوم القيامة ! خففو يخفف عنكم
    اها ياخ برضو راعي لينا نحن ناس بندر ادينا مذكرة تفسيرية ( وشوش متفنقلا من الضحك


    عارف يا عبد الحفيض،
    عندك صاحباً ليك معانا هنا زي الجماعة الذكرتهم ديل (أخونا يحي بليل).
    قالوا، المفتش اللِنقلِيزي زمان ماري يتفقد في الحواشات، لقى حوآشة جدنا ابو العاص ارِضا ما محروّتة.
    قام قالوا، أرضك دي ماك حارتا مالك ؟. جدنا ابو العاص قالوا، ما عندي غير بقرة وآحدة والمُحرات
    بيدُورلوا بقرتين. المفتش قالوا، باكر ترجيني اللرِض دي محروتة، إن شاء الله تجيبلك بقرة من السما.
    قالوا، باكر المُفتش وكِت جا، لِقى جدنا ابو العاص رآبط حمارتو مع البقرة في المُحرآت واللِتنين حارنات.
    قالوا، دا شنو يا ابو العاص ؟. جدنا ابو العاص أشار لبقرتو وقالوا، دي بقرتي البرآك خابرا، ثمّ أشار
    لحمارتو وقالوا، دي بقرة السما. قالوا، المفتش ضحك وأمر بمحرات الحكومة وحرت لجدنا حواشتو.
    هكذا اجدادنا كانوا متاعهم في الدنيا قليل، الوآحد عراقيهو وسروالو وعصاتو وطاقيتو، وعندو جلآبية
    لصلآة الجمعة والمناسبات.
                   |Articles |News |مقالات |بيانات

02-02-2015, 07:59 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: شوف الطواقي المشنقة دي

    sudansudansudansudan7.JPG Hosting at Sudaneseonline.com

    ؤُ شوف القعدة دي...
                   |Articles |News |مقالات |بيانات

02-02-2015, 06:23 PM

Mohamed Yousif
<aMohamed Yousif
تاريخ التسجيل: 24-10-2014
مجموع المشاركات: 229

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)
                   |Articles |News |مقالات |بيانات

02-02-2015, 06:25 PM

Mohamed Yousif
<aMohamed Yousif
تاريخ التسجيل: 24-10-2014
مجموع المشاركات: 229

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)
                   |Articles |News |مقالات |بيانات

02-02-2015, 06:25 PM

Mohamed Yousif
<aMohamed Yousif
تاريخ التسجيل: 24-10-2014
مجموع المشاركات: 229

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)
                   |Articles |News |مقالات |بيانات

02-02-2015, 06:27 PM

Mohamed Yousif
<aMohamed Yousif
تاريخ التسجيل: 24-10-2014
مجموع المشاركات: 229

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    والله ياود المدير بكيتنا عديل
    لينا خالة بعد أن رجعت البلد من اتبرا قالت:

    من الجزيرة لِى أم طُيورْ
    وقِتْ يَصَفِّر البَابُورْ
    مِن جِلاسِ يجيكِ مَجْرُورْ
    شَارَفْلُوا كلُ زُولْ

    زَمَنْ خِلِيوْتِك أُم حِيرَان
    وزمن جامعِك أب أذان
    حاج سالم يَتْلُو من القرأن
    ويا مدنى البيبيت عَجْلانْ
    وقِت يسمع حِسَ الأذان
    أنا مَرِيتْ فِى ألْحِيشَانْ
    وفيهم مالِقِيتْ إنسان
    لاضُلالة لا بِيبَانْ
    وَناسِكْ رَقَدُوا فى القِيزانْ
    مَشِيتْ مِنكْ قَلْبى خَرْبانْ
    أكبْكِبْ مِن الدُمُوع رِيقَانْ

    زَمَن عِيشِك أبْ قُسَّابْ
    من الجزيرة حَدُو ألسَابْ
    وبيوتك بِقَنْ دُرَّاب
    من الحلنقة للعَيْداب
    زمن ساقِيتِك أم تورين
    زمن بعلقوا السمقه واللارميق
    وقِت يَصَفّر كِرَيكان
    تَقول دُخانه دَاك ألبان.



                   |Articles |News |مقالات |بيانات

05-02-2015, 05:16 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: Mohamed Yousif)

    23:16 م Feb 4,2015
    سودانيز أون لاين
    معاوية المدير بكندا محافظة البرتا
    مكتبتي في سودانيزاونلاين



    Quote:
    تحية

    اكاد اشم رائحة الطين وهي تخالط نباتات تتماوج الوان خضرتها وهي في حب
    لا تفضحه نسيمات الصباح ,و رجع اصوات تتناغم فيها الطيور والبغال والحمير
    تدوذن عبر حركتها معزوفة الأرض والنيل والحياة..

    جادك العطر من شلالات سحره الغامض المثير..


    ريحة التراب زي ما قال سُماعين ود حد الزين.
    اللرض ليها ريحة تتسرب في مسارب الروح وترُدها بعد الرجوع إليها من ديار الغربة، واهلنا لآمن
    يقولو للزول البيتردد علي مكان كتير، يا زول إنت صُرّتك مدفونة هنا ؟، يعنون ما يقولون، فبقية
    الحبل السُري الذي ينفصل من صُرّة الجنين ويُدفن في اللرِض هو باقي ذلك الحبل الذي يربط بين
    الجنين وأُمه في بطنها وإمتداد ذلك الحبل الذي يربط الشخص بأُمه الأرض، فالنفس لها ريّدة شديدة
    للرض.

    الزمن يا ولدي ماحقاهو السنين
    والبعيش في الدنيا ما بعيش مرتين
    العِمير فاضِلِي بس مِنو اليقين

    دآيرة توريهو حق ابوهو الجم حِقيق حاج اللمين، اليعرفو حتي كان ما نقح واطاتو ورمالو
    فيها تيراب، بس كل همها الناس تقول جناها عندو أرض في البلد اللِدفنت فيها صرتو
    وعاشت فوقا هي عشقتها واللرض جادت عليها، ولزمتها عن قناعة لا تطمع في شئ غير
    علآج للعوينات التي أصبح شوفِن ضنين. حرصها علي اللرض وعشقها لها جعلها تقول
    له في ختام رسالتها لو اللرض يا ولدي تتشال في الليدين انا كُت برسلآ ليك في لوري
    الخزين. البيعرف ريحة التراب مهما ابعده الزمان عنها زاد حبه لها...
                   |Articles |News |مقالات |بيانات

05-02-2015, 05:44 AM

Haytham Ghaly

تاريخ التسجيل: 20-01-2013
مجموع المشاركات: 3192

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    23:44 م Feb 4,2015
    سودانيز أون لاين
    Haytham Ghaly -
    مكتبتي في سودانيزاونلاين



    Quote: في أُمسيات البلد وكت الليل يفلل ونكون إتعشينا بالفطير باللبن وكوعنا
    فوق العناقريب في الحوش، وظهر القمر بينات ضفاير أشجار النخيل والونسة أخدت طعم
    ود لقاي الفوقو الطير يسوي الوآي، وتخلل ونستنا صوت بابور جالبو النسيم من الجزيرة
    بحس إنو أهلنا الرحلو كولهم حضور، أرواحهم تحوم حول أشجار النخيل والليمون والبُرتُكان
    والمنقة، وتكون الونسة في حضورهم عابقة بطيف من الذكريات.



    والله يا ود المدير نفس الإحساس دا دايماً بجيني في البلد وبمجرد ما اصل البلد

    بتذكر كل اموات اهالينا وحلتنا العاشو حياتم كلها في البلد وما فارقوها الى

    ان فاضت ارواحهم العفيفة والبريئة التي ما نالت من مباهج هذه الدنيا الا القليل القلييييل جداً

    الى بارئها عليهم رحمة الله وغفرانه فقد كانوا قانعين بما عندهم حامدين وشاكرين المولى عز وعلا

    على نعمته سعداء ونبلاء وكرماء رغم الشح في كل شيئ






    ياخ مالك علينا ياخ
                   |Articles |News |مقالات |بيانات

05-02-2015, 05:45 AM

عماد حسين

تاريخ التسجيل: 10-06-2011
مجموع المشاركات: 6960

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    23:45 م Feb 4,2015
    سودانيز أون لاين
    عماد حسين -
    مكتبتي في سودانيزاونلاين



    Quote: اللِبأ هو لبن الغنماية الوالدة دابا وبيكون تخيّن يعني قريب للزبادي،
    كنا نحبه جداً ونحن سغار، هذا التعريف لشيخ عماد وجماعته.


    تسلم يا معاوية

    والله كلمة لبا دي.. لي زمن طوييييييل ما سمعتها

    نحنا يا معاوية.. ربينا في كبوشية...

    برنامجنا بالليل كان عصيدة قرع باللبن، والدغشية، نمشي بيت
    حبوبة أمي فاطمة بت عبدالله، عندها سِعن ماكن... نمشي يومياً
    نشرب "الغباشة" ونجي صادين بيت حبوبتي أم أمي.

    Quote: وحات الله يا عبد العزيز حبوبتي بت ميدوب دي فاتت الميّة لآ غادي، ولي قبل موتا كانت بتنضم
    الخيت في الخياتة.


    تعرف يا معاوية.. أنا هسع جدي أبو والدتي حي يًرزق ولله الحمد

    ولو كلمتك عمن رأيتهم من حبوباتي، ممكن تستغرب

    أنا شفت أم أمي، ودي مسألة عادية

    وأنا كبير وعمري 20 سنة، شفتا حبوبة أمي.. أم أمها (فاطمة بت عبدالله) البحكيلك عنها

    وكمان.. شفت عمة حبوبتي فاطمة، واسمها نفيسة بت حسن ود الامين، وهي جدة د. عمر معز بخيث العوض، (والدة أبوهو)

    يعني ديل 3 أجيال من حبوباتي...

    فعلاً.. زمان كانت الدنيا فيها بركة.. وهسع ده زمن المحق

    تحياتي

    (عدل بواسطة عماد حسين on 05-02-2015, 05:46 AM)

                   |Articles |News |مقالات |بيانات

05-02-2015, 07:55 AM

MOHAMMED ELSHEIKH
<aMOHAMMED ELSHEIKH
تاريخ التسجيل: 21-03-2008
مجموع المشاركات: 8632

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: عماد حسين)

    01:55 م Feb 5,2015
    سودانيز أون لاين
    MOHAMMED ELSHEIKH - ابها- السعودية
    مكتبتي في سودانيزاونلاين



    يا معاوية حبوبتك نفيسة بت المدريس طبعا عاشت فوق المية عام ببصرها وسمعها
    وعقلها وقد سافرت لابنتها حبصة في الدامر لوحدها عن طريق المحلي من جنانيطة لاتبرة ثم البولمنات من اتبرة للدامر حيث تاكسي المدريس جاهز .
    سألتو: " اهاب توديني ناس حبصة بنتي بي كم؟"
    المدريس " بي خمسة قروش بس ياحاجة"

    اها وعدتي دي (طبعا مخمخمة الدنيا كلها)؟
    المدريس قال ليها " دي بنشيلها ليك مجااان"
    قالت ليهو " اها عاد تعال نوصف لك المحل وانا بلحقك بكرعي"
    عايزة تمشي كداري من الدامر للشعديناب وهي فوق المئة حيث توفيت هناك بعد ثلاث اشهر من هذه الرحلة وهي والدة حبوبتي لامي وكنت مسئولا عن اخذها للجامع في العيدين وبعض الجمع لمشكلة الرطوبة.

    الحنية التي عايشناها معهم لن تتكرر واذكر انو حبوبتي دي لديها صديقه اسمها حاجة مسرة وتوفيت قبل 20 سنة من وفاة حبوبتنا ولكن كلما تحكي حبوبتنا قصة لازم تدخل فيها حاجة مسرة وفي اثناء القصة بتقول" حاجة مسرة الله يسامح لها" مع شوية بكية " الليلة ياحاجي مسرة هييييييييي . الليلة يالفعلت وتركت هييييييييي" ثم تواصل في القصة
                   |Articles |News |مقالات |بيانات

05-02-2015, 01:19 PM

محمد الكامل عبد الحليم

تاريخ التسجيل: 04-11-2009
مجموع المشاركات: 2410

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: MOHAMMED ELSHEIKH)

    07:19 ص Feb 5,2015
    سودانيز أون لاين
    محمد الكامل عبد الحليم -
    مكتبتي في سودانيزاونلاين



    تحية

    امشاجنا تخلقت من هذه المشاعر المبتلة دوما بالحنية والتوادد...حديثك يا محمد يذكرني بعمتي بت عشماني...هي في الأصل عمة الوالدة اطال الله في عمرها لكن ليس لها ذرية فتناوبنا انا واخواتي واخواني فيما بعد بل تناوبت علي تربيتنا بالاصالة والوكالة والحب...كنت اول اخواني الذكور الذين ترعرعوا علي كنفها الدافئ...أسمعها في هدأة الليل وهي تبكي اخوانها الراحلين وتدعو الله للقاء الغائبين بصوت تمتزج فيه العبرة والأسي والرجاء حتي اصبحنا نردد معها أهازيج الحزن في سن باكرة...تتحدث مع القماري وتراها تستجيب لندأتها عن اقتراب وصول الأحباء الغائبين...ترصد ابنلاج القمر وتحدثنا عن الحيوانات المقيمة في أصقاعه حتي نركن الي النوم...وفي الصبح الباكر نصحو علي (خش السعن) واصوات الشياه اللائي لهن اسماء للتعريف وتكاد تحفظ تواريخ ميلادها بل نسبها....تعلمنا منها حقيقة الحياة وخلود المعاني وسعة الضمير الانساني في استيعاب الناس والأشياء والحيوان بل الحشرات وهي تختلس الصمت لقطف قطرات ماء أو اصطياد اخريات.. والتزواج البييئ الكامل بين الناس والبغال والحمير وبقية الأنعام وغثائها وفرثها ولحومها.. فتئأمل..

    (عدل بواسطة محمد الكامل عبد الحليم on 05-02-2015, 01:20 PM)
    (عدل بواسطة محمد الكامل عبد الحليم on 05-02-2015, 01:22 PM)

                   |Articles |News |مقالات |بيانات

07-02-2015, 02:00 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: محمد الكامل عبد الحليم)

    20:00 م Feb 6,2015
    سودانيز أون لاين
    معاوية المدير - بكندا محافظة البرتا
    مكتبتي في سودانيزاونلاين



    يُروى أن السيدة عائشة رضي الله عنها كانت تنشد قول لبيد :

    ذَهَبَ الَّذِينَ يُعَاشُ فِي أَكْنَافِهِمْ ... وَبَقِيتُ فِي خَلْفٍ كَجِلْدِ الأجْرَبِ
    يَتَغَايَرُونَ خِيَانَةً وَمَلاذَةً ... وَيُعَابُ قَائِلُهُمْ وَإِنْ لَمْ يَشْغَبِ

    وتقول : رحم الله لبيداً ، لو عاش إلى زماننا .
    وكان ابن الزبير يُنشده ويقول : رحم الله عائشة ، لو عاشت إلى زماننا .

    رحمهم الله جميعاً، فكيف بهم إذا حضروا زماننا هذا ؟؟؟...
                   |Articles |News |مقالات |بيانات

07-02-2015, 03:55 AM

جلالدونا
<aجلالدونا
تاريخ التسجيل: 26-04-2014
مجموع المشاركات: 5281

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)
                   |Articles |News |مقالات |بيانات

08-02-2015, 00:09 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: جلالدونا)

    18:09 ص Feb 7,2015
    سودانيز أون لاين
    معاوية المدير - بكندا محافظة البرتا
    مكتبتي في سودانيزاونلاين



    Quote:
    ود المدير وضيوفه الافاضل
    سلام ومحبة
    والله يا ود المدير قبل يومين كنا انا وصاحباً لي بنتكلم عن موضوع الحاجات الكترت دا
    ياخي دي حكاية صعبة خلاص
    معلومات كتيييييرة شديد والرويس دا يخبر شنو ويخلي شنو ما تعرف
    سالت صديقي لو في طريقة لي عمل فورمات لي راس الجن دا لكن قال ماهو خابرلو شي
    انت لو عندك طريقة الحقنا والفانا بيها ينوبك ثواب.
    سيرة التراب والجداول والطين تخنق الواحد بالعبرة
    بالذات الزقاقات والقيزان وبعض الاماكن في تلك القرى الراحت
    تحياتي


    ود الغالي يا غالي،
    سلآمات.
    يا ود الغالي كلما الحاجات كِترت التفكير بيكتر والرِويس بيتعصر ومنسوب (الإستيرس) بيرتفع
    والأمراض بتبدأ تطفو علي السطح، عشان كدا أهلنا زمان ما عندهم أمراض اليوم والتي يسمونها
    أمراض العصر. زمان عمتنا السيّدة بِت أُمحوّمد بتقدف المركب براها وتمشي الجزيرة تجيّه
    مقاتا، وتجيب عشا غنما وتجي، أها وكِت يتعشن الغنيمات تاني ما عندها شيتاً بيشغل بالآ.
    قدم أكانت بترمي مركب وِلآد حِتيل والبحر متسّب، وتقوم لآ فوّق وتجي مع المقداف شاقة البحر
    لآمن تمرقا في جزيرة نواوي تقضي مُشهادا وتفقد غِنيماتا وترمي المركب وتجدي معديا شرق.
    قدم أكانت مرا ضكرية والشغل البتشتغلو عشرة رجال ما يقدروا عليهو. ويا ود الغالي الناس
    ديل زمان بيخدمو ويحفضو عشان يمشو يزورو المصطفى عليه أفضل الصلآة وأتمّ التسليم،
    ووكت يزورو ويجو صادين بيجيبو للناس الكُبار السبح وبيجيبو للسغار الطواقي نعمنهم الناس
    زمان كان دا مُبتغاهم، لا في زولاً دايرلو موبايل، لا في زولاً دايرلو تلفزيون. الكُبار بيقدرو
    السبحة والسغار بتبسطُن الطاقية. أها قدم دي ناداها المنادي يا قولُن، ومشت زارت وجات
    وجابت لي أب نجمة ود اخوها جلآبية، واب نجمة كان مطموس وبيشرب البنقو. أها الجلآبية
    نعمنها حاجة كبيرة، قدم دي وكِت تلقى اب نجمة قاعد في عِرق الحرازة تناديهو، يا ولد عباس،
    الجلآبية دي لا تقعد بها فوق عِرق الحرازة، بتنشرط، تاني تلآقيهو يلعب في الشارع تناديهو،
    يا ولد عباس، الجلآبية دي لا تلعب بها مع الجنون بيشرطوها عليك. وهكذا. وكِت الحكاية
    كِترت اب نجمة زهج منها ويوم جدعلها الجلآبية في الشارع ؤُ سبالآ ومشى أهلو عريان.
    زقاقات الحِلة وكِت تكون مِندلي علي البحر والوآطا نُصّت نهار وريحة الجروف عابقة في الأمكنة
    وتلآقيك السمحة قاصدة الجيران تدنقر في خجل وتغريك السلآم رِويحتك دي ما يفضلها إلا تطير
    وتحلق فوق سبج الغمام. سلآم خجوّل كلّ مُناك في الدنيا. بِنيّة عفيفة نضيفة خجولة ظريفة، ؤُ حيطة
    سام مشققة، ونهارية عابقة برائحة البُن، وإنت كأنو الدنيا كولها بين إيديك...
                   |Articles |News |مقالات |بيانات

09-02-2015, 10:42 AM

عفاف الصادق بابكر
<aعفاف الصادق بابكر
تاريخ التسجيل: 10-08-2009
مجموع المشاركات: 4168

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    والله كلام طاعم جنس طعم ..

    تقول شنو زاتك ما تعرف ..

    بس تتفرجخ فى الواطه دي وتسمع بمزاااج .. وتنسى ام بناين قش ...



    ود المدير ... ياخ مشتاقين يشهد الله ..
                   |Articles |News |مقالات |بيانات

09-02-2015, 02:13 PM

مهيرة
<aمهيرة
تاريخ التسجيل: 28-04-2002
مجموع المشاركات: 393

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: عفاف الصادق بابكر)

    كلام طاعم بالحيل آود المدير

    ذكرتنا الزمن القبيل زمن حبوباتنا الحنينات

    وشهيتنا نزور بلدكم السمحة ام نخيل

    الا عاد صحى الحاجات بقن كتار ومساخ

    وان بقيت داير ترحل من بيت لبيت دفارات ما بتكفيك

    وستيف العدة يكسر ضهرك

    قالوا تستيف العدة سووله شركات عديل!

    تحياتى
                   |Articles |News |مقالات |بيانات

11-02-2015, 01:16 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: مهيرة)



    لجمعكم الكريم مودتي.


    كان القى غردي انا فرّ اطِيّر...

    يا اخواني مُشتاق شوق كتيّر
    شوقاً يهِد حيل البعير
    شوقاً قدُر جرف الكِرير
    شوق المريض للعافية
    اضناهو السرير
    شوق البِتِب في قيدو
    للحرية في الظلمات اسير
    انا شوقي للنيل والبلد،
    شوقاً قسَم بالحيل كتيّر
    كان القى غردي انا فرّ اطِيّر
    الحق بنياتنا البِيردن
    في الحفير
    واشرب مع حبوبة
    فنجان جبنة في ضُل العِصيّر
    واخدِم مع تربالنا في وهج الهجير
    وإتغدى في الرآكوبة
    بدمعة وفطيّر
    والنِيّمة مكدُوّن فيها زِيّر
    مويّة بحر، تحلف تقول
    مويّة عصير...

    اكان القى غردِي انا فرّ اطِيّر
    الحق مع صِبيانا لمآت النفير
    ولماتنا في الحوش الكبير
    ود العوض، وعلي الصغير،
    عبد الحفيض و ود النِعير
    يشاغلوا في شنبو العوير
    ورُقادنا في حوش التمُر
    فوق عنقريب، مافوق سرير
    القمرا فوقنا ملجلجة
    وبابور حسن يهدر هديّر
    مِندلقة في الحيضان
    جداولوا معربدة
    وبحرنا كِيّر

    كان القى غردي انا فرّ اطِيّر
    للسمحة في حِلتنا اقدِل زي أمير
    وإدسى في دِيسا الغزير
    حبوبتي تنهمني وتقول،
    يا ود مشيت سابل وليدآت البصير؟؟؟
    رحل اللكان دُخري وعديل
    الدنيا تب ما فيها خيّر
    وحفيان ازور شيخنا الضرير
    يا شيخنا واقع في حوآك
    ومن الفُرآق بيك مِستجير
    انا وين اروّح؟
    انا وين اطٍيّر
    يا اخوانا عُووووووووك
    حالة البلد مازي زمآن
    والغربة عِيشتا زمهرير
    ياخواني عآد انا وين اطِيّر؟
    انا وين اطِيّر؟
    انا وين اطِيّر؟
    انا وين اطِيّر؟
    انا وين اطِيّر؟
    ؟
    ؟
    ؟
    ...........إلخ
    ود المدير...
                   |Articles |News |مقالات |بيانات

11-02-2015, 03:38 AM

Haytham Ghaly

تاريخ التسجيل: 20-01-2013
مجموع المشاركات: 3192

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: انا شوقي للنيل والبلد،
    شوقاً قسَم بالحيل كتيّر
    كان القى غردي انا فرّ اطِيّر
    الحق بنياتنا البِيردن
    في الحفير
    واشرب مع حبوبة
    فنجان جبنة في ضُل العِصيّر
    واخدِم مع تربالنا في وهج الهجير
    وإتغدى في الرآكوبة
    بدمعة وفطيّر
    والنِيّمة مكدُوّن فيها زِيّر
    مويّة بحر، تحلف تقول
    مويّة عصير...


    الله عليك يا ود المدير والله قمة الابداع

    تعرف انا اتأكدت انو حالتك استعصت مرة واحدة

    وبعدا خفت على نفسي دي من قل الصبر .. والله صحي




    لكن جوعتني بي الدمعة والفطير ديل وزكرتني أيام القراعة ودوير البابور

    ويجيبولك الفطور الما خمج فطير او قراصة بي دمعة في صحن كبييير

    والشطة قاعدة من فوق ملفوفات في طرقي .. يا الله .. ما اطعمها من وجبة

    وما اجمل راحة البال في تلك القرى وذاك الزمان وهاتيك البويتات



    غايتو انا لو ما فارقت البوست دا


    حا يكون في قرار ارعن ومتهور

    (عدل بواسطة Haytham Ghaly on 11-02-2015, 03:39 AM)

                   |Articles |News |مقالات |بيانات

11-02-2015, 06:14 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: Haytham Ghaly)

    Quote:
    والله ياود المدير بكيتنا عديل
    لينا خالة بعد أن رجعت البلد من اتبرا قالت:

    من الجزيرة لِى أم طُيورْ
    وقِتْ يَصَفِّر البَابُورْ
    مِن جِلاسِ يجيكِ مَجْرُورْ
    شَارَفْلُوا كلُ زُولْ

    زَمَنْ خِلِيوْتِك أُم حِيرَان
    وزمن جامعِك أب أذان
    حاج سالم يَتْلُو من القرأن
    ويا مدنى البيبيت عَجْلانْ
    وقِت يسمع حِسَ الأذان
    أنا مَرِيتْ فِى ألْحِيشَانْ
    وفيهم مالِقِيتْ إنسان
    لاضُلالة لا بِيبَانْ
    وَناسِكْ رَقَدُوا فى القِيزانْ
    مَشِيتْ مِنكْ قَلْبى خَرْبانْ
    أكبْكِبْ مِن الدُمُوع رِيقَانْ

    زَمَن عِيشِك أبْ قُسَّابْ
    من الجزيرة حَدُو ألسَابْ
    وبيوتك بِقَنْ دُرَّاب
    من الحلنقة للعَيْداب
    زمن ساقِيتِك أم تورين
    زمن بعلقوا السمقه واللارميق
    وقِت يَصَفّر كِرَيكان
    تَقول دُخانه دَاك ألبان.


    والله كلآم يا محمد،
    كلآم زين ؤُ كلآم زولتاً عاشقة البلد بالحيل. الناس ديل ماهُن ناساً
    هينين. بعد نورقو وباعو محاصيلُن كان فول كان قمح، كان دُخُن، حرسوا
    القُطاع، قطعو وباعو تمُرُن. قبضو قِريشاتُن ؤُ نوا الحجاز، والكل اصبح
    يطرق سمعه حاج الماحي يمدح قالوا الحجيج قطع طالب نور البُقع،
    والسماني أحمد عالم ينشد يا راحلين إلي مِنيً. أها، جو اتبرا ووكت
    يجو اتبرا أنا ببطل اللعب في الشارع وألآزِمُن كي اقضي حاجاتُن
    وامتع نفسي بحكاويهم. التأشيرة للحج كانت من اتبرا، ؤُ خالتي نفيسة
    عليها رحمة الله قائدة الركب نعمنها عاملة فيها فاهمة. وقفوا في صف
    الجوازات، خالتي وآقفة اوّل زول وخلفها مباشرة المغفور له بإذن الله
    زوجها الحسين ود حاج عُمر. أدت الضابط الجوازات سألا من عمرها
    قالت لو، أكتب عندك، أنا إطناشر، والحاج أربعطاشر. ضابط الجوازات
    قالها، يا حاجة اديني الجوازات ديل، ؤُ كوووولكم اقيفوا لي بجاي.
    مشو الحجاز زارو وجو، وكان ود حجتُن صديق ود دبلآن الله يرحمو، بعد
    رجع من الحج جاب المداحين. أها، كووولهم إتخمخمو ومشو المديح،
    وكنت مرافق لهم. عندما لهجت الحناجر بمدح الحبيب المصطفى عليه أفضل
    الصلآة وأتمّ التسليم، وأصبح وقع وقع الطار يقدح في القلوب الشوق
    قام العوض ود حاج الخليفة بخيزرانته وجلآبيتو جناح أُم جكو ذات
    الأكمام الفضفاضة وراح في حلبة الطار يتثنى ويتأنى وبيمناه عصاه
    تتحنى لعباً حرّكه المداح غنّى راجع الخطو بطارٍ رجّع الشوق وحنّ، فكانت
    ليلة ما زالت عالقة في الخاطر.
    بسطاء يحبون المصطفى ويقنعون بالقليل ولا يبطرهم الكثير، أحبو
    الأرض فجادت عليهم ولم تبخل. ذهبت إلي البلد في حياة الوالدة عليها
    رحمة الله، فوجدت الجداول جارية، والبهائم شبعانة واللرِض رويانة والخدار
    مفرهد والجناين شايلة وكذلك التمور، فسرني ما رايت، وعندما رجعت جلست
    للوالدة ؤُ قُتلها، يا يُمّة البلد ما شاء الله لقيتا خيرا باسط تب. قالت لي
    يا ولدي الخير مسك في الزينين ؤُ رحل معاهم، زمان كُنا وكِت تقوم تنيقة
    في الليل، الصباح وكِت ننزل كرعينا من العناقريب ننزلِن فوق التمر. رحمها
    كيف بها إذا حضرت زماننا هذا!؟؟؟...
                   |Articles |News |مقالات |بيانات

12-02-2015, 05:43 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: تنونى فينا ساكت يا ود المدير
    اها هاك اتهدهد بى دى أكان تنوم


    جلالدونا يا اعزّ الناس،
    خلي النضمي الكتير والفانا بالسمحة جات والريلة.

    Quote:
    حبوبتي بت ميدوب...


    كلما صدح الغناي مُردداً:


    قايمي الصباح متكفلتي شايلي الحِليلىِ على المُراح...
    تراءت لِي صورة حبوبتي فاطنة بت ميدوب أمامي. (مُتقرقبة بقُرقابها الأسود )
    والحِليلة في يدها اليُمنى, تداعبها نسمات الصباح وقد بدأت الطيور تعزف
    الحانها الجميلة فوق أغصان شجرة حرازتها واشرابّتَ غنيماتها يتصايحن
    كأنما يؤدن لها تحية الصباح. تبدأ تحلب وقد فاحت رائحة المُراح في جنبات
    المكان ممزوجة برائحة البرم, ونوار الليمون والبُرتُكان.أراها ماثلةً أمامي
    وقد حلبت اللبينة ثمَّ توجهت بخطىً قد أثقل وقعها مر الدهور والأزمان
    معتمدة على دفارتها نحو شجرة الحِناء النابتة بجوار (المارقون) وقد
    تدلى من أحد أغصانها سِعن اللبن. تسكب فيه اللبينة, وتجلس فوق البنبر
    وتبدأ في خش اللبن.
    أذكرها وهي جالسة فوق عنقريب صغير قريب من الأرض, أمامها
    براح واسع ممتد حتى الجنينة حيث لايوجد سور ولا سياج, ونحن نلعب
    مثيرين الغبار, وهي تبتسم من بين ما خلّف لها الزمن من أسنان. إبتسامة
    يتفجّر من خلالها إحساس بالرضاء عن النفس. إحساس بأنها قد أدت
    رسالتها في الحياة وهي ترى أحفادها أمامها يمرحون في سعادة وحبور.
    ثمَّ تنهض وتدلف متوجهة الى داخل المارقون الذي تتوسطه شِعبة تساعد
    العرش على التماسُك, قد حفرت (الدنانين) أجحارها فيها مُشاركة
    بت ميدوب المكان برفقة (الزرازير) التي هى الأُخرى طول النهار في
    حالة دخول وخروج من خِلال الطاقات في عملٍ دؤوب لِجلب الطعام
    لصغارهن, لايهدأ لهن بال إلا بعد أن ترتمي الشمس في أحضان الغروب.
    ما ضجرت بت ميدوب يوماً ولا تضايقت من هذه الرفقة. ثمّ تفتح
    السحارة لتأخذ شئ فتفوح رائحة السحارة في جنبات المارقون وقد
    عبقَ في جنباتها عطر بت السودان ورائحة الصندل والمحلبية وحتى
    رائحة (الحنوط) الذي إحتفظت بِهِ بت ميدوب في السحارة مع كفنها
    إستعداداً للرحيل. رائحة السحارة هي رائحة بت ميدوب. ما زلتُ أشتمها
    كلما عصفت بى الذكريات المحزونة والحنين للزمان والمكان.
    أذكرها في عِزّ الهجير وهى تقلّب سعون العجوة حتى تتعرض لأشعة
    الشمس, ثمّ تتوجه إلى عنقريبها تحت ضل الحِناء. نعم شجرة حِناء,
    ووالله كنا نتسلق أغصانها. الأرض كانت مِعطاءة, والنفوس كانت صآفية
    كما النسمات تحتَ أشجار الجزائر...


    هكذا عاشت حبوبتي بت ميدوب. معتمدة على نفسها في كل شئ حتى
    بعد أن تجاوزت المئة. ثمّ رحلت في هدوء. وبعد رحيلها غادرت
    الزرازير والدنانين المكان, وآثرت الحِناء السقوط على البقاء من بعدها,
    وأصبح المكان لاهو المكان ولا الزمان هو الزمان بعد رحيل بت ميدوب
    والناس السمحين اللذين ابت البركة إلآ أن تتمسك بأكفانهم وترحل معهم
    بلا رجعة...
                   |Articles |News |مقالات |بيانات

12-02-2015, 06:26 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    Quote: والله كلام طاعم جنس طعم ..
    تقول شنو زاتك ما تعرف ..
    بس تتفرجخ فى الواطه دي وتسمع بمزاااج .. وتنسى ام بناين قش ...

    ود المدير ... ياخ مشتاقين يشهد الله ..


    ياسلآلآلآلآلآلآلآلآلآم،
    غايتو البوست دا أمانة ما جاب.
    شوقنا تكِنو قمحاً مصوبر في التقا.
    بت الصادق،
    خبرك والوليدات ؟.

    وحات الله يا بت الصادق حيشان ما كانن في، الليلة كان قعدنا نحسب في المفاتيح بندورلنا
    ضحوية كلّ الكان زمان السام وبابو باب حراز بيسوولو كُشر. الناس كانوا بيصفقو إيديهم
    ويقولوا، سلآم يا الجُوّة، وتسمعي، حبابك ابقى لآ داخل. أقيم حاجة كانت الرادي، وعادي
    ممكن يكون في الراكوبة وناس البيت مافيشين، زول بيهبشو مافي. الليلة الزول كان عينو
    زاغت من الموبايل ساكت بيكون في خبر كان. زمان البنوت الوآحدة تلقيها مارقة الطربيزة
    في الحوش ومفرشة فوقا ملآية وخآت مكواة الفحم فوق طوبة، والرادي جنبها، الواطة
    العِصير وموجة الرادي تصل مخلوطة بأصوات والله أنا كلما تطرق أُذني اليوم ترحل بي
    إلي ذكريات عصريات جميلة تبعث في نفسي الشجى. بالليل عندما يخيم الصمت ويكون
    القمر هو الوحيد المتحرك بين السماء والأرض أهلنا كانوا حريصين جداً يسمعو نشرة
    تمانية عشان يعرفو أخبار الميتين، ويعيرو سمعهم عبد الله الطيّب وهو يفسر القرآن يصحبه
    صديق أحمد حمدون بصوته العذب، ثمّ ويختمو بربوع السودان. لا نجوم غد لا أفلآم
    ولا حتي تلفزيون زاتو لحدي الساعة تسعة بيكونوا إتعشو بالفطير باللبن وكلو زول لزم
    عنقريبو عشان الصباح بيصحو مع الزرازير. كانوا يعشقون اللرِض، والزول اكان
    مسافر إسبوع يقضالو غرد في البندر يخثمو اترو ويكشحوهو لآ داخل فأل بالرجوع للبلد،
    وحتي كمان مرآت يصروهو في قطعة ويحفضوه لآمن الغايب يرجع...
                   |Articles |News |مقالات |بيانات

12-02-2015, 07:04 AM

عزالدين عباس الفحل
<aعزالدين عباس الفحل
تاريخ التسجيل: 26-09-2009
مجموع المشاركات: 11882

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    http://www.gulfup.com/?X7KoN4







    عزالدين عباس الفحل
    ابوظبي

    .
    ..
                   |Articles |News |مقالات |بيانات

12-02-2015, 11:02 PM

جلالدونا
<aجلالدونا
تاريخ التسجيل: 26-04-2014
مجموع المشاركات: 5281

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: عزالدين عباس الفحل)

    اها هاك الريلة دى


    غايتو قاعد توجع فينا جنس وجع
    بس الله يسامحك اّا زول

    (عدل بواسطة جلالدونا on 12-02-2015, 11:03 PM)

                   |Articles |News |مقالات |بيانات

18-02-2015, 08:29 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: جلالدونا)

    Quote: كلام طاعم بالحيل آود المدير
    ذكرتنا الزمن القبيل زمن حبوباتنا الحنينات
    وشهيتنا نزور بلدكم السمحة ام نخيل
    الا عاد صحى الحاجات بقن كتار ومساخ
    وان بقيت داير ترحل من بيت لبيت دفارات ما بتكفيك
    وستيف العدة يكسر ضهرك
    قالوا تستيف العدة سووله شركات عديل!
    تحياتى

    sudansudansudansudansudan80.jpg Hosting at Sudaneseonline.com

    والله الليلة زارونا ناس سمحين بالحيل.
    أمانة ما كان زمناً سمح بالحيل، وأمانة الناس ما كانوا سمحين وطيبين.
    يا مهيرة بلدنا ياها بلدك، واهلنا ياهُن أهلك. مرحبتين حبابك، كنا نقوم الدغش عشان نلحق باظ
    سِتة أو قولي باظ العبيدية. بيقولوا باظ سِتة عشان مواعيدو الساعة سِتة صباحاً، وأصلو لا حصل
    جا سِتة لا حصل قام سِتة إنما يتحرك حسب رغبة ناس البلد ويسير حيثما ساروا. نمشي سوق
    اتبرا عشان نركب باظ سِتة، والناس عادةً بيتلمو عند المدير ود الشيخ واللآ عِن خدر الكِعيك، وغالباً
    بيكونوا عندهم حاجات دايرين يقضوهِن من سوق اتبرا، وتسمعي، يا جماعة فلآن دا وينو ؟ دايرين
    نمشي. هوي يا زول هوي، ما تجي مِنسل لآ جاي. يا ناس ما تصبروا ضايقين مالكم، لآحقين شنو ؟.
    وبعد دآك تسمعي، عليك الله القفة دي احشرا تحت كرعيك. البهمة البتنبح دي مطيرنها وين ؟. يا ناس
    ود الشيخ دا دحين ما قال قايم معانا ؟. ساقوهو ولآد الحسن ود مصطفى وقال بيجي باكر.
    وتبدأ الرحلة، نفوت خليوة والريافة وكنور، وندخل دار مالي، وفي الطريق اكان لقينا ناس يدفنو في
    جنازة الباظ كلّو يعرج عليهم لرفع الفاتحة والمساعدة، وتسمعي الحليفة بالطلآق وغير الطلآق ان لآزم
    تواصلو إنتو علي سفر، ما قصرتوا تب. أكان عدينا بكدباس نتنسم عبير الصالحين الشيخ الجعلي،
    ونمُر بود الفكي علي وندخل بالجول وفتوار، وغالباً ما نمشي عن طريق المخيرف، بربر ؤُ بهناك
    الضانقيل والفريخة، ثمّ ونصل العبيدية ومن العبيدية لمشرع الباوقة. البانطون بغرب والباوقة تبدو كغابة
    نخيل خضراء فوق تلّة عالية، ونحن بالشرق نشرب الشاي في الرواكيب نطايب دا ونسالم دآك والبساط
    أحمدي والونسة والقرقرآب لحدي ما يصل البنطون، ونطايب النازلين ميممين صوب اتبرا وبربر ناخُد
    خبرُن ونديهُن خبارنا. بتكون في كميّة من المطايبة والمحاننة واللوم والعتاب والمحبة دايماً بتكون هي سيّدة
    الموقف. نعدي لأُم زهور وبغرب نركب البرنسات نصل نطايب اللهل ويطايبونا. مرحبتين حبابك يا مهيرة
    تجي إن شاء الله تمشي معانا نزور البلد كان واتينا المغموّل ناكل المغموّل، وكان واتينا أُم راس ناكلنا
    أُمات راس، واللآ قُرامات طير، وكان بقينا في بداية الموسم بنلقى سبق الجوع مرق، والموية نواحي السافل
    موية نيل نشرب من الجدول. نحن قومٌ لا نعرف الأُفُق فمسكننا وسط الجناين، والزراعة هي حرفة اجدادنا،
    والأرض هي كل شي في حياتنا. الحاجات يا مهيرة بِقن كُتار ؤُ مُساخ ونحن سافرنا وبعدنا.
                   |Articles |News |مقالات |بيانات

18-02-2015, 01:01 PM

Mohamed Yousif
<aMohamed Yousif
تاريخ التسجيل: 24-10-2014
مجموع المشاركات: 229

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: معاوية المدير)

    http://www.exact-it.com/files/vidio1.mp4http://www.exact-it.com/files/vidio1.mp4

    (عدل بواسطة Mohamed Yousif on 18-02-2015, 01:08 PM)

                   |Articles |News |مقالات |بيانات

18-02-2015, 03:57 PM

Mohamed Yousif
<aMohamed Yousif
تاريخ التسجيل: 24-10-2014
مجموع المشاركات: 229

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: Mohamed Yousif)

    http://exact-it.com/files/vidio1.mp4مشتاقين للبلد
                   |Articles |News |مقالات |بيانات

18-11-2015, 05:38 AM

معاوية المدير
<aمعاوية المدير
تاريخ التسجيل: 24-03-2009
مجموع المشاركات: 17173

للتواصل معنا

FaceBook
تويتر Twitter
YouTube


Re: حاجاتنا بِقن كُتّار خلاس. والله صحي... (Re: Mohamed Yousif)

    <sudansudansudansudansudan57.jpg Hosting at Sudaneseonline.com
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de