بانوراما العيد في السودان

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 23-09-2018, 07:30 AM الصفحة الرئيسية

مدخل أرشيف للعام 2015م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
26-09-2015, 09:47 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


بانوراما العيد في السودان

    08:47 AM Sep, 26 2015
    سودانيز اون لاين
    درديري كباشي-
    مكتبتى فى سودانيزاونلاين



    بانوراما العيد في السودان
    الشمس تطل على استحياء تتثاءب معلنة عن الفجر .. أول من يستيقظ الأم
    - قومن يا بنات قومن خلاص قشن الحوش دا وفرشوا الملايات والفوط .. يا بت قومي يقوم نصك .
    - يا أمي خلينا ننوم شوية نحن ما سهرانين في النضافة للصباح
    - يا بت السهر اليكمل عيونك هو يوم واحد في السنة .. قومي أنت يا مقصوفة الرقبة عايني ليها تتمغى كيفن .
    - صباح الخير يا ماما كل سنة وانت طيبة .
    - تسلمي لي يا حبيبة وانشاء الله العيد الجايي يصحيك عريسك .
    - غايتو جنس تفرقة ناس يملسوهم وناس يدوهم بالجزمة .
    - أنت ما تبقى زيها كدا تصحي بوش مبتسم كدا وتصبحي على الناس وتعيدي مش مادة بوزك و يا امي في شنو .
    - الشاي يا أم احمد جيبو الشاي بالبسكويت حاج صالح دا جا يصبح ويعيد
    - بسم الله متين أصبحت هي ؟
    - أصلو عم صالح دا السنة كلها يكون قاعد منتظر العيد عشان يجينا ناطي من الصباح .
    - قومي على شغلتك يا بت خلي الكلام في الناس وفرشن السراير ديل ..وانت يا أنقشار تمشي على حوش الصالون تكنسيه وتدخلي فرش أخوانك وتلمي البطاطين .
    - كل ديل أعملهم أنا براي ونور تعمل شنو ورندا يا أمي أنت ما والداني زيهم ولا شنو .
    - يا بتي دا كلام يتقال في العيد من الصباح كيف ما والداك كمان .. ديل عندي ليهن شغل كتير بيجاي ..
    - طيب اشمعن أنا تخلو لي الصالون كله تمباك وسجاير ووسخ أولادك ديل .
    - شفتي أنت لسانك الطويل دا هو البجيب ليك المشاكل هسع كان سمعوك تعيدي بكف من الصباح .
    يقطع الحوار صوت رجل مصحوب بنحنحة وتصفيق كنوع من الانذار أو التحذير .
    - الحاجة سلام كل سنة وانتو طيبين عيد مبارك عليكم
    - الليلة وووب دا عم صالح جايييكم توووش
    - أصله ياه حاله يا بت دا شنو الملاية الجديدة لبستيها طرحة .
    - أسوي شنو أقابله بالبيجامة كمان ؟
    - أهلا أهلا يا الحاج علينا وعليك يتبارك .
    - أصلو أنا متعود كان ما صبحت العيد على ستنا وبناتها يبقى لي ما عيد أنشاء الله تفرحي بيهن كلهم .
    - يا بت جيبي علبة الحلاوة لعمك صالح
    - يا حاجة حلاوة شنو هو نحن عندنا ليها سنون ومع السكري دا كمان لكن ما مشكلة بشيل شوية لوليدات سهام معيدين معانا السنة دي ( ويضع كل صوابعه على علبة الحلوى ويخمش قرابة العشرة قطع يضعها في جيبه ) أها كدا بس كفاية وعروستنا وينها ما عيدنا عليها .
    - نور في الحمام
    - خلاص قولي لها عمك صالح يعيد عليك وانشاء الله العيد الجايي نجيك في بيت عدلك
    - تسلم يا حاج وربنا يتم علي خير .
    - أصلا ولدي حسام ضايق ضيق للعرس دا لو ليه طريقه بس نرسلها ليه كدا بلا تحضيروجوطة
    ( هاع هاع هاع هاع ) هي كمان ما ست الحسان ما دايرالها شغل كتير .
    - الله يهنيهم ببعض ويتم على خير .
    وينصرف عم صالح بعد أن ترك علبة الحلوى تعاني من أول زيارة لضيف .
    تخرج نور .
    - نسيبك العبيط دا خمش نص علبة الحلاوة في جيبه
    - أحترمي نفسك يا بت كيف تقول لي عليه عبيط راجل قدر أبوك .
    - شوفي شوفي حركات العروس كمان زمان كنتي بتشتغليه أكثر مننا .
    - هسع ما بقى أبو حسام
    - ما من زمان هو أبوه
    - يا بنات بطلن النقة الفارغة وقومن على شغلتكن .. يلا خلاص أنت بطلي اللئامة مع أختك وأمشي على الصالون قبل ما يجو رجال تانين .
    - ما في رجال بيجو هاجمين من الصباح زي عم صالح دا
    - يا ماما هدوم العيد حقتي وين ماشي الصلاة مع ناس ابوي .
    - حبيبي أنا صلوحي كل سنة وانت طيب .. يا بت لبسي اخوك دا خليه يلحق الصلاة مع ناس أبوه .
    - هو صلوحي يلبسوه لمتين ما بيعرف يلبس براه .
    - المهم طلعي ليه هدومه من الدولاب أنت بس واقفة لينا كدا في حلقنا .
    - يلا يا بنات قومن على شغلتكن أنا بجهز العصيدة والملاح والشعيرية هسع الرجال يجو من الصلاة ويقولوا عايزين الفطور .
    وتصدح مكرفونات المساجد وتلهج بتكبيرات العيد .
    الله أكبر ألله أكبر الله أكبر
    لا اله الا الله
    ألله أكبر ولله الحمد
    يتبع
                   |Articles |News |مقالات |بيانات

26-09-2015, 10:27 AM

مني عمسيب
<aمني عمسيب
تاريخ التسجيل: 22-08-2012
مجموع المشاركات: 15453

للتواصل معنا

FaceBook
تويتر Twitter
YouTube


Re: بانوراما العيد في السودان (Re: درديري كباشي)

    العزيز .. درديري ..

    كل عام وانت والاسرة الحبيبة بالف خير .

    اقتباس من كلام ست الحبايب عليها الف رحمة ونور حبيبتي ( حاجة نفيسة )

    Quote: قومن يا بنات قومن خلاص قشن الحوش دا وفرشوا الملايات والفوط .. يا بت قومي يقوم نصك .
    - يا أمي خلينا ننوم شوية نحن ما سهرانين في النضافة للصباح

    يا ربي تكون واحد من اخواني داخل باسم حركي وداسي مني ؟ هههههههه
    غايتو الاقتباس دا حق امي نفيسة وانت واحد من اخواني ههههههه .
                   |Articles |News |مقالات |بيانات

26-09-2015, 10:33 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: بانوراما العيد في السودان (Re: مني عمسيب)

    ههههههههههههههههههه سلام يا بت أمنا نفيسة كل عام وأنتم بألف خير

    مشاهد والله افتقدناها في الغربة
                   |Articles |News |مقالات |بيانات

26-09-2015, 12:07 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: بانوراما العيد في السودان (Re: درديري كباشي)

    بانوراما العيد في السودان 2
    - يا أمي جلابيتي وينا ؟
    - ما تشوفها في دولابك .
    - ما لقيتها
    - خلاص تكون راحت في الغسيل مع هدوم أبوك خليني أفتشها ليك هناك .
    - يا أمي أنا كمان شوفي لي جلابية
    - أشوف ليك من وين كمان هو أنت عندك جلاليب .؟
    - أي جلابية من جلاليب أبوي بس نروح بيها صلاة العيد ونرجعها ليه .
    - يا ود أبوك دا يجي ينقنق فيني وقال أنتو قعد تخربوا ليه جلاليبه . العيد الفات الصعوط أبا يطلع من جيب الجلابية خلاني دخلت في أضافريني .
    - خلاص يا أمي بمشي ببنطلون وقميص.
    - آآآآي احسن أنتو ما بتشتروا الجلاليب مالكم لامن يكون عندكم قرو تشتروا في لبساتكم العواليق دي لامن تحتاجوا للجلايب تجوا تلبسوها من أبوكم .
    - عجبني ليك .
    - يا بت أنتي كمان قفلي بوزك دا الدخلك شنو في الموضوع قفليه قبل ما أجي أقفله ليك ببنية .
    - يا بت يا انقشار أنت خلصتي شغلك براك تجيبي الكلام لنفسك.
    - يا أمي خلصت فرشت الصالون وشديت الملايات وكنست الحوش .
    - خلاص شيلي المبخر دا أمشي بخريه .
    - واحلاتهم ناس سحر لبسوهم وجوا يعيدوا عليكم .
    - ما شاء الله لبساتكم حلوة الجابه ليكم منو.
    - اللبشات دي لشلهم لينا حالو حشام من الشعودية .
    - عاد حسام ما اشاء الله زوقه ما راقي .
    - شوفوا نور تتبسم كيف الكلام عجبها .
    - هي أخليك يا أنتصار شيليني من دماغك .
    - ما صحي زوقه راقي كان ما راقي كان خطبها هي ؟
    تتبسم نور على هذا الرد وتضع قبضة يدها اليمين على كفها اليسار حتى تغيظ أختها المتربصة المشاكسة .
    - أها السرحكم منه يا سحورة .
    - شلحتنا ماما .
    - ما شاء الله تسريحتكم حلوة يا رندا جيبي الحلاوة لناس سحر .
    - جدو أدانا حلاوة قال جابها لينا منكم .
    - نان ماله تاني شيلوا عشان انتو بنات حلوات .
    - يا حاجة عمتي وين ؟
    - العمة والشال والطاقية والجلابية كلهم علقتهم ليك في شماعة الصالون يا حاج .
    - يلا يا أولاد أطلعوا خلونا نحصل الصلاة عشان نجي نضبح الخروف دا .. يا خالد مالك ما لبست جلابيتك .
    - يا أبوي أنا ما عندي جلابية ماشي بالبنطلون .
    - كيف تمشي الصلاة ببنطلون خلي امك تديك جلابية من جلاليبي مع سروال طويل .
    - ما قلت ليها كدا يا أبوي سمعتني كلام وقالت أنت ما بترضى .
    - لا لا الدنيا العيد الليلة مافي زول يزعل التاني لازم كلنا نكون فرحانين ومبسوطين .. يا حاجة أديه جلابية من جلاليبي .. بس يوم العيد تاني ممنوع .. ويعقبها بضحكة تشع البهجة في اقي أفراد البيت الذي شرع أفراده في حركة دؤوبة أستعدادا للاحتفال بهذا اليوم الميمون .
    - يتبع
    -
    -
                   |Articles |News |مقالات |بيانات

26-09-2015, 12:42 PM

معاوية الزبير
<aمعاوية الزبير
تاريخ التسجيل: 07-02-2003
مجموع المشاركات: 7610

للتواصل معنا

FaceBook
تويتر Twitter
YouTube


Re: بانوراما العيد في السودان (Re: درديري كباشي)

    بالله انقشار دي اسمها انتصار، طيب تمام، نشوف رندا ونور ديل بتعمل معاهن شنو.
    و زي ما الفنان أو أي مبدع بقول زوجتي هي ناقدي الأول
    أيضا اخواتنا هن أول ما نلمس قيافتنا في عيونن وتحديدا أيام العيد
    دا كان زمان طبعا أيام كنا نأبه للتقيُّف

    مواصلين معاك يا حبيب لغاية رابع أيام العيد والأيام التالية
    وكل سنة وانت والأسرة بألف خير
                   |Articles |News |مقالات |بيانات

26-09-2015, 01:04 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: بانوراما العيد في السودان (Re: معاوية الزبير)

    Quote: بالله انقشار دي اسمها انتصار، طيب تمام، نشوف رندا ونور ديل بتعمل معاهن شنو.
    و زي ما الفنان أو أي مبدع بقول زوجتي هي ناقدي الأول
    أيضا اخواتنا هن أول ما نلمس قيافتنا في عيونن وتحديدا أيام العيد
    دا كان زمان طبعا أيام كنا نأبه للتقيُّف

    مواصلين معاك يا حبيب لغاية رابع أيام العيد والأيام التالية
    وكل سنة وانت والأسرة بألف خير


    ألف سلام ليك أيها الرجل العيد

    العيد في الغربة ممل وقاتل يا معاوية

    راقد في السرير وأقلب في القنوات

    فجأة أتعبأت شاشة الذكريات في خااطري بذكريات العيد هناك ..

    حتى الشكل والمناكفة مع الأخوات أكتشفت أنه كان شئ ممتع وأفتقدناه

    كيس الصعوت تحت المخدة و قطعة اللبان الممضوغة وملصقة على الجدران وطرف العمة الذي أكلته السخلة والقميص الجديد شالته المكوة

    كلها عناوين لهيجان لذيذ يبصم ايام العيد بطابعها الخاص
                   |Articles |News |مقالات |بيانات

26-09-2015, 03:09 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: بانوراما العيد في السودان (Re: درديري كباشي)

    بانوراما العيد في السودان 2
    خبط على الباب مع نداء : يلا يا حاج مصطفى الصلاة الصلاة ما جهزتوا لسع .
    - حاضر جيناك يا شيخ صالح بس ألف عمتي دي . يلا يا أولاد أطلعوا . أنتي يا سعاد أمي أخبارها شنو ما عيدت عليها .؟
    - يا أبوي حبوبة في الحوش التاني منتظراك لابسة وجاهزة .
    - لابسة لشنو كمان عاوزة تلف معانا لفة العيد ؟
    - لفة شنو كمان منتظراك توديها المقابر تزور أبوك .
    - نزور المقابر يوم العيد كمان ؟
    - ما ياها عادتانا قالت دا أول عيد لأبوك لازم تزوره في المقابر وتعيد عليه .
    يصفق يديه ويقول : ياخ أبوي دا مات ليه سنة والعيد ربنا خلقه للناس عشان يفرحوا مش عشان يتذكروا أحزانهم .
    - الكلام دا ما بنقدر نقوله ليها نحن أنت كان تقدر تقنعها أقنعها .
    - ماشي خلونا نمشي الصلاة وأرجع ليها .
    - كدي أول أمشي عيد عليها .
    - حا تمسكني وتفتح الموضوع لغاية ما تفوتنا الصلاة
    - يلا اطلعوا يا حاج مصطفى
    - حاضر حاضر يا صالح مرقنا خلاص يلا يا اولاد
    وفي الشارع تجمع الجيران بالجلاليب البيضاء يهنئون بعضهم البعض بالعيد وهم يتجهون نحو المسجد .
    - كل سنة وانتم طيب يا عم مصطفى .
    - وأنت طيب يا بني كيفك يا عماد انشاء الله السنة الجاية خريج ودكتور كبير
    - عماد ولدي دا عيادته جااااهزة يا صالح بس منتظرنه يتخرج ونفضيها ليه من المؤجرين .
    - وين يا أبوي أنت قايل الواحد يتخرج كدا طوالي يفتح عيادة .
    - أها في شنو تاني بعد تشيل شهادتك كمان .
    - ما لسع في امتياز وفي خدمة الزامية ديل براهم دايراتهن ليهن ثلاثة سنوات
    - - لشنو يا ولدي تاني نقعد نحرس ونرجا ثلاثة سنوات انت بيدوك شهادة تعال افتح عيادتك طوالي .
    يضحك حاج مصطفى ويقول أصبر يا حاج صالح صبرت على الكتير وباقي شوية بس .
    يلا يا جماعة يا خالد شيلو معاكم السجادات الجامع بيكون زحمة ما بنلاقي مكان فاضي .
    يقترب الجمع من المسجد وترتفع أصوات التكبيرات .
    يتبع
                   |Articles |News |مقالات |بيانات

27-09-2015, 09:22 AM

الفاتح ميرغني
<aالفاتح ميرغني
تاريخ التسجيل: 01-03-2007
مجموع المشاركات: 7486

للتواصل معنا

FaceBook
تويتر Twitter
YouTube


Re: بانوراما العيد في السودان (Re: درديري كباشي)

    Quote: مشاهد والله افتقدناها في الغربة

    عزيزنا درديري كباشي
    كل سنة وانت وضيوفك ومن تحب بالف خير.
    بوست نوستالجيك شديد، وذكرنا اعياد واعياد.!
    في طقس في بيتنا ما قادر انساه واصبح بمثابة فرض عين على كل افراد الاسرة، سواء في عيد الاضحى أو الفطر.
    بنصحى الصباح وبعد الوالدة تعمل العصيدة والتقلية والشعيرية والسكسانية وبنات الخال يقومن بواجب الترتيب والنظافة والحاجات دي، تبدأ الوالدة في بكاء مرير تتذكر فيه الذين رحلوا من الأهل والأحبة، ثم يبدأ بعد داك التصافي والعفو بين افراد الاسرة، على ايقاعات دفوف (نوبة) الطريقة الاسماعلية، ويبدأ العيد والمعايدة وتبادل عبارات التهاني المثيرة للتفاؤل والفرح والأماني العذبة.!
    هسع هنا في الغربة الواحد العيد بقى يجيهو ،زي عيد الراحل ود القرشي، بدون زهور.!

    محبتي
                   |Articles |News |مقالات |بيانات

27-09-2015, 09:42 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: بانوراما العيد في السودان (Re: الفاتح ميرغني)

    Quote: عزيزنا درديري كباشي
    كل سنة وانت وضيوفك ومن تحب بالف خير.
    بوست نوستالجيك شديد، وذكرنا اعياد واعياد.!
    في طقس في بيتنا ما قادر انساه واصبح بمثابة فرض عين على كل افراد الاسرة، سواء في عيد الاضحى أو الفطر.
    بنصحى الصباح وبعد الوالدة تعمل العصيدة والتقلية والشعيرية والسكسانية وبنات الخال يقومن بواجب الترتيب والنظافة والحاجات دي، تبدأ الوالدة في بكاء مرير تتذكر فيه الذين رحلوا من الأهل والأحبة، ثم يبدأ بعد داك التصافي والعفو بين افراد الاسرة، على ايقاعات دفوف (نوبة) الطريقة الاسماعلية، ويبدأ العيد والمعايدة وتبادل عبارات التهاني المثيرة للتفاؤل والفرح والأماني العذبة.!
    هسع هنا في الغربة الواحد العيد بقى يجيهو ،زي عيد الراحل ود القرشي، بدون زهور.!

    محبتي


    يا سلام عليك يا أستاذ الفاتح

    أنا حضرت عيد الفطر في السودان بعد غياب ستة عشر عاما لم أحضر فيها عيد في السودان

    لكن أجمل شئ أكتشفت أن الامور ظلت هي هي لاغيرتها السنين ولا بدل أحساسها الزمن

    نفس اللبس الابيض وصلاة العيد واللف على الجيران والفطور أينما أدركك تفطر في بيتك خالتك في بيت عمك وفي بيت جيران او في بيت صاحبك

    والله حمدت الله أن هذه العادات الجميلة لازالت موجودة رغم عاديات الزمن وطحن الظروف
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de