الاوضاع التي ذكرتها أعلاه يا أخ أشرف ستكون لايام او ربما لساعات وليس لمدة 21 سنة لم ينل الشعب منها شئ!!. وبعدها ستكون النتائج عظيمة , وستأتي فترة انتقالية وحكومة ديمقراطية وسيحكم الشعب نفسه بنفسه.
فأيهما افضل؟ الديمقراطية ام حكم الفرد وتسلبط أسرة بن علي علي خيرات البلد.
نفس الشعب الذي انتزع حقوقه قادرا علي ان يبسط الامن بعد ان طرد اللصوص و الانقلابيين.
ولك التحية اخي اشرف.
01-14-2011, 11:42 PM
احمد محمد بشير احمد محمد بشير
تاريخ التسجيل: 06-17-2008
مجموع المشاركات: 14987
Quote: الا انني فرح اننا ولو ليوم متفرجين علي احداث العالم وبلدنا الحمد لله هادئة
والله دي براها نعمة
بلدنا هادئة!! هل يمكن ان تشرح ذلك يا اخ اشرف؟ الامن منفلت في دارفور و الموت بالجوع والمرض في شرق السودان وغلاء فاحش بسبب جشع التجار بالتعاون مع الكيزان. ومطارده دولية وبالتالي نقص لسادة الدولة....... كلو دة وتقول البلد هادئة يا اخ اشرف!! لكين بالغت يازول.
01-14-2011, 11:48 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
Quote: بلدنا هادئة!! هل يمكن ان تشرح ذلك يا اخ اشرف؟ الامن منفلت في دارفور و الموت بالجوع والمرض في شرق السودان وغلاء فاحش بسبب جشع التجار بالتعاون مع الكيزان. ومطارده دولية وبالتالي نقص لسادة الدولة....... كلو دة وتقول البلد هادئة يا اخ اشرف!! لكين بالغت يازول.
يا احمد دائما المشكلة في هذا المنبر انو الناس تقول السودان انتهي واتدمر
يعني يكون في حرب في دارفور وكأن الحرب في السودان كله
واي زول يتكلم يقولوا ليه البلد هادئة؟؟؟
طبعآ هادئة يا احمد
انا لا اقلل من حرب دارفور لكن اكذب عليك لو قلت ليك كل مدن السودان بها حرب كدارفور
نحن لا نتكلم هنا انو في مشاكل في دارفور ام لا
نحن نتكلم بانه لا يوجد حرب في كل السودان الان ودي براها نعمة
انا كلامي اننا لا نعيش ما يعيشه التونسيون الان
وهو الانفلات الامني
والكلام هنا محدد لنصح الجميع بعدم الخروج الي الشارع وقتل بعضهم البعض
انا ما عايز اتفرج علي ابناء بلدي وهم يقتلون بعضهم البعض
01-15-2011, 00:04 AM
Hafiz Bakhit Hafiz Bakhit
تاريخ التسجيل: 10-26-2010
مجموع المشاركات: 369
الحبيب اشرف .... منظرك بالجد بايخ وانت في اكبر بلد ديمقراطية وتطلب من الناس ما ( يحاولو يبقو ) ديمقراطيين ويرضو بالحكم الظالم ده ... انت البلد القاعد فيها دي عرفت كم شخص مات فيها وهو يحاول ان يرسي القواعد للديمقراطية ؟ عرفت نظام الحكم فيها كيف ؟؟؟ يعني انت اسي بكل بساطة تمشي تقدم عريضة في رئيس الوزراء ... عرفت النظام الدستوري كيف؟ عرفت البلد دي اتقسمت كم مرة لحدي ما اسي مصرين انهم يبقو بالشكل ده رغم التعدد القبلي؟ والله نصيحة لي الله منظرك بايخ
01-15-2011, 00:15 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
الاخ اشرف سلامات هذة اول مرة اتداخل معك لكن اذا كنت حقيقي خائف علي الشعب والسودان كنت دعيتهم للخروج للشارع لالنو الشعب السوداني ميت الان بالفقر والمرض ماتفتكر انو السودان دي الخرطوم فكل يوم يموت في السودان نفس العدد المات في في تونس ودائما التغيير يأتي بالتضحيات لن يتغير هذا النظام الا اذا سالت دما ولو مليون شخص حتي يعيش الباقي وينعم بالعيش الكريم
01-15-2011, 00:57 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
الاخ اشرف .. لو فكرت فيها بعقل نجد الاتي ... يعيش المواطن تحت خط الفقر فلا غنم الدنيا ولا غنم الاخرة ... حقوقه مسلوبة من قلة ادمنت الوصاية وهي ابعد ما تكون من الامانة ... لو فكرت فيها بعقل ... اتحسر على ضياع الشعب والشباب لحساب قلة لا تخاف الله ولا تخاف حسابه .... سياستها تجهيل الناس بحقوقهم ( وتخويفهم ) وكسر ثقتهم في نفسهم ... اشرف ...الاشرف لنا ان نموت علىان نحيا حياة ذليلة كهذه هل تعلم لماذا حرق الشاب ملهم هذه الثورة نفسه ... هو خريج جامعي لم يجد عمل لان المحسوبية والجهوية اغتصبت حقوقه فصار يبيع الخضار في عربة خشبيةبتصريح من ( المحلية ) هذا التصريح يومي ( تما ما كما يفعل حرامية الحكومة في السودان الآن ) . بعد ان - جدد- تصريحه وبدأ البيع اتى عمال - المحلية- وكسروا عربته ولك ان تتخيل كم تعول هذه العربة من انفس ... فذهب هذا الشاب واحرق نفسه امام وزارة الداخلية ومنها بدأت الشرارة التي اخافت كل الطغاة ومناصريهم .
Quote: العايز يقاتل الحكومة يمشي يحارها لكن ما يعرض الناس المساكين لخطر
تعرف بجملتك هذي لا فرق بينك عندي من ود الباوقة ولا صلاح غريبة ...... انت المسكين السودان ما بقا فيهو ناس مساكين يا سيد .... عاين النوريك الرغيفة الما بتاكل شافع بقت بي 250 جنيه فهمت كلامي ده ولا ازيدك الناس اساسا في الخطر من ما انكشف ضهر الحكومة دي من نص التسعينات .... مرحلة الخطر دي اتعدوهو بقو في مرحلة المجازفات ..... تجازف عشان لقمة تجازف عشان حياة ....تجازف عشان تعيش...فبالله وفر خوفك على المساكين الما موجودين حاليا في جغرافية هذا البلد .. الموجودين هسع المجازفين والمجازفات الاحياء منهم والاموات.....
Quote: انت براك شايف الشرطة والامن في السودان
الفوق ده بعتبرو كلام الحكومة .... ولا انت ما شفت امن وبوليس بن علي ؟؟؟؟
01-15-2011, 00:47 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
ازيك يا اشرف .. في تونس كما قلت خرج "الشعب" ضد الرئيس حتى هرب فحدث انفلات أمني لا تتمناه لبلدك. و كلنا لا نريد لبلدنا اراقة الدماء .. في رأيك ما هي الخطوات التي يجب أن يتخذها "الشعب" السوداني لو أراد ان يثور ضد حكومة الإنقاذ حتى لا يحدث ما حدث في تونس ؟ بعيدا عن اسامة و امثاله ممن يدعون لحرب .. بماذا تنصح الشعب السوداني إذا قرر أن يثور مثل شعب تونس ؟ هل تنصحه أن لا يثور و لا يتظاهر ليسقط الحكومة و يرضى بالواقع؟ ام تنصحه باتخاذ تدابير معينة ؟
01-15-2011, 01:10 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
Quote: في رأيك ما هي الخطوات التي يجب أن يتخذها "الشعب" السوداني لو أراد ان يثور ضد حكومة الإنقاذ حتى لا يحدث ما حدث في تونس ؟ بعيدا عن اسامة و امثاله ممن يدعون لحرب .. بماذا تنصح الشعب السوداني إذا قرر أن يثور مثل شعب تونس ؟ هل تنصحه أن لا يثور و لا يتظاهر ليسقط الحكومة و يرضى بالواقع؟ ام تنصحه باتخاذ تدابير معينة ؟
والله يا حمور كلامك interesting ومحفز لكن هذه الخطوات التي تتكلم عنها تريد دراسة من المختصين الشغلة ما كلفتة ساكت طالما في حياة بني آدمين المشكلة وينوا الشعب العايز يثور؟؟؟ عارف يا حمور لو طلعت مظاهرات ستكون فئة قليلة وسيت حسمها الموضوع في رأيي يحتاج الي تسوية سياسية وليس حرب شوارع ومدن ما اهو عندك الاحزاب عملت شنو؟؟؟؟ حسع قبل فترة سمعت ان مريم الصادق المهدي تعرضت للضرب في مظاهرة يعني الناس دي عارفة شغلها وبتعرف تخمد المظاهرات كيف انا طبعآ ضد استخدام الامن للقوة لفض اي مظاهرة وبالجد زعلت للحص لمريم الصادق ومن معها الموضوع ده عايز تعامل بذكاء وحذر شديدين ما عايز هرجلة واهلنا يموتوا في النص ونحن نلز فيهم من الخارج طبعا ده رأيي والموضوع معقد لكن اعتقد يحتاج لحذر شديد
01-15-2011, 00:47 AM
عبد المنعم ابراهيم الحاج عبد المنعم ابراهيم الحاج
تاريخ التسجيل: 03-22-2005
مجموع المشاركات: 5691
وانت قاليك انا انا ما حاربت ولا اسي ما بحارب .... ولا مفتكرني مرطب ساكت ....
اولا اعتذر لك عن اي جملة فهمت منها اني اسيئ اليك او أسات اليك وليس من ديدني الاساءة ولا تعودت عليها وحتى الذين تسببوا في ( عاهتي الدائمة ) لم اشتمهم ليس لخوف ولكن لطبعي ويمكنك ان تسأل عني او يمكنك محادثتي فانا لا ارد اي احد .... اشرف انا متأسف . موضوع الانتفاضة ده بدري عليهو لكن الناس ما مفروض تكسر مجاديف الناس ..... يا اشرف الناس في السودان ما بتعرف معنى الحياة .... الحياة البسيطة الانت وانا عايشنها دي .... ناس بص في مواعيدو وكهرباء اربعة وعشرين ساعة وموية نضيفة واي شيئ موجود ... ومجلس بلدي لخدمة المواطن ( ما لخلعة المواطن ) وتعليم بالجد (يبني انسان ويضعه على بداية الطريق ) تفتكر ناس ما عندها الحاجات دي بفكرو يموتو ولا لآ؟؟؟؟ فكر انت بعقل
01-15-2011, 01:06 AM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
لم أتعرض لك شخصيا يا أشرف وأصفك بالبؤس وأنما وصفت الإرهاصت بالبؤس ..ثم انظر الي ردك تر موضع الإساءة عموما لا تفرق معي ولن أوجه لك إساءة سأحتسب ذلك داخلي .
كل مافي الأمر أنت الذي ينصب نفسه وصيا على الشعب بكلامك أعلاه وتحذيراتك وأنت بعيد عن موضع الحدث ، لا تشكو الجوع ولا المرض ولا الموت . لا أنا فلم أطلب منه الخروج هذا تقدير يقدره الشعب .
01-15-2011, 01:50 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
كيفنك يا اشرف .. يا عزيزي المشكلة ما في الحكومة التضرب المتظاهرين الشوية .. انت بتتكلم عن تونس حيث خرج الشعب "كلو" ضد "الحكومة" حتى هربت و بعد داك الدنيا بقت فوضى. و حذرت من المصير ده. و انا متفق معاك تماما انو انفراط الامن ما حباباو. اها كيف يسقط "الشعب" الحكومة و يجعلها تهرب من الخرطوم و البشير يمشي جده دون أن يحدث انفلات أمن ؟ اذا مافي حل يبقى التنبيه ناقص.. مش كده ؟ يعني تقول للناس ما تثورو ضد الحكومة عشان ما ينفلت الامن. اها طيب لو عايزين يثورو يعملو شنووو ؟ لاحظ انو السودانيين ديل ثارو مرتين ضد حكومات شمولية و ما حصل انفراط امن. لو فرضنا انهم حيمرقو مرة تالتة و حيحصل انفراط امن .. ما يمرقو ؟
01-15-2011, 02:05 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
يا حمور النقاش معاك ممتع لانك انسان مثقف وليس متطرف وكويس انت فهمت ما اهدف اليه في هذا البوست وكويس نحنا متفقين برفض العنف كمبدأ الحاصل في السودان لا يسر يا حمور والغلاء ده لابد من ايقافه انا ما بنصح الناس انها تحمل السلاح ولا امنع احد انه يثور انا فقط احذر الا نتهور فلا نجد الوطن ذات صباح حتي لو نحنا عايزين نتصالح العالم ما حا يخلينا وطبعآ نقطة ضعفنا اانا مختلفين في كل صغيرة وكبيرة العراقيين قبل كده ما خلوا حاجة كعبة عن صدام ما قالوها ودخلوا الامريكان بلدهم وشوف النتيجة ربما يكون العنوان ناقص كما تفضلت لكن النقصان افضل من الزيادة في هذه الحالة انا ما عندي بديل للثورة التي تتحدث عنها فقط شاب سوداني اعيش في الخارج ليس لي حول ولا قوة مثلي والكثيرين ولكن اناشد السودانيين يتحدوا ويفضوا خلافاتهم ليس لي سوي هذا السلاح لكن اتمني وطنآ اعود اليه واجده المشكلة يا حمور الانفلاتات الامنية تخيف اهلنا بالداخل خصوصا النساء منهم نحنا رجال نستطيع العيش دون خوف لكن بهذه الطريقة سيأتي يوم يسيطر الرعب علي الجميع تعرف يا حمور انا كنت قريب افكر في العودة النهائية كي اربي اطفالي في السودان وانشأهم نشأة صحيحة لكن الان افكر جديا في الذهاب لمكان آخر ربما مصر او غيرها اتخذه وطنآ آخر السودان اصبح كالغابة لا يسر أبدآ حتي الماء اصبح متسخا ويحمل رائحة قذرة قلبي دائما مع المواطن في الداخل ولكن لن استغل مكوثي في الخارج لزيادة العبأ عليه
01-15-2011, 01:51 AM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
يعني يا اشرف طالما ما عندك حل يبقى الخيط و المخيط في يد الشعب . مش كده ؟ اذا اختار انو يطلع زي شعب تونس و يسقط نظام الانقاذ و يجاهد بعد ذلك لكبت العنف و الانفراط اليحصل حيكون ده خيارو و لا نملك انا و انت و اسامة و عبد المنعم الكلنا بره لا نملك ان نقول له اعمل و ما تعمل. الخيار خيارو اذا اختار انو يسقط الحكومة بأي شكل . و عموما اي سقوط حكومات باي شكل بتصاحبو اعمال عنف او شغب متفاوته. زي ما قال عادل امام في مسرحية الزعيم لما قالو لو الزعيم لو مات البلد حتولع قال ليهم طبعا ده انا حانزل دلوقت اولع ف سمسه و امها. لما سقطت حكومة نميري احاطت جماهير عطبرة ببيت احد قادة الاتحاد الاشتراكي و هي مصممة ان تحرقه. و لولا لطف الله لقتلوه.
عليه يا صديقي طالما انت ما عارف الحل و لا انا عارف الحل نقوم نقول للشعب السوداني سوا : أيها الشعب السوداني اعمل البريحك و اختار خيارك براك. انا و اشرف مصطفى لا نستطيع ان نختار لك. و كان اخترنا ليك بنجي نشاركك الخيار. يا نموت معاك .. يا يحكمنا معاك الدكتاتور. التوقيع : حمور زيادة ( القاهرة) أشرف مصطفى ( لندن ) توقعو معانا يا اسامة و عبد المنعم وله عايزين تقعدو تدعو للحرب من بره كده ؟
01-15-2011, 04:37 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
يا حمور اتفق معك ان الموضوع في يد الشعب والبقرر يعمله الشعب انا قبلانه لكن المشكلة الناس البتنظر دي كلها قاعدة بره وشايلة كيبورداتها وحايمة بيها وكأنه شايلة معاها زر الخلاص
01-15-2011, 02:21 AM
عاطف عبدون عاطف عبدون
تاريخ التسجيل: 02-27-2008
مجموع المشاركات: 3701
Quote: اذا منظري بايخ عشان خايف من انفلات امني في الوطن واراقة الدماء فاليبقي بايخ
بدون زعل يا أشرف أخوي الكلام ده بيخلي منظرك موش بس بايخ... الكلام ده بيخليك عايش أما في كوكب تاني ولا بيخليك مكابر على إنجازات الشعب السوداني العظيمة عبر العصور والأزمان في مواجهة الظلم
يا أشرف نحمد الله إننا أول شعب علم أفريقيا والعالم العربي كيف أنه يستطيع إحداث التغيير وطرد المستبد نحن شعب يعاني في سبل العيش... شعب قتل وسحل وشرد ومزقت تركيبته الإجتماعية وبه ظلم من نظام جائر فرض في التراب والارض... وأشعل نار الفتن، طائفية، عرقية، دينية ، أقتصادية وإجتماعية
نحن شعب نسير نحو الثورة بخطى حثيثة... ولسنا فوضويين ولا نخرب من أجل الخراب
سنعمل على إحداث التغيير مهما كانت النتائج، ليس لأننا دعاة للموت، بل نحن دعاة للإنعتاق والحياة بكرامة وعزة
تونس يا أخي الفاضل أنجبت الشابي وخلدت إرثه وحققت حلمه. أوليس هو القائل إذا الشعب أراد الحياة فلابد أن يستجيب القدر.. فالأقدار بيد الله... ولنا أن نموت في سبيل أوطاننا خيراً من أن نستكين للطغاة.. خوفاً من الإنفلات
يا سيدي الإنفلات حدث في كل بقاع السودان.. والموت يجري ويحصد في أهلنا، فمرحى به إن كان في موتنا الإنعتاق والخلاص
والســـلام....
01-15-2011, 07:02 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
دي قلبت فيها الهوبة وأكيد ما قاصد .. السؤال دا أنا محيرني جدا وما لاقي ليهو إجابة رغم انو طرحته كتير : لو الشعب السوداني انتفض كما انتفض من قبل منو البجىء بدل الحكومة دي ومنو البضمن انو الح يجوا ديل مايكونوا برضو محتاجين إنتفاضة ولمتين الشعب دا ح يقعد كدا ينتفض ويغير و..إلخ.
01-15-2011, 12:50 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
سأتكفل له بالتذكرة للسودان وحأدعوا ليه ربنا يوفقوا
ولو ما مشى وبس قاعد ينظر من منبر بكري
يبقي شكله حا يكون بايخ جدآ
لطالما ثارت الشعوب ضد الظلم والظالمين في عصور مضت لكن:
في عصرنا هذا عصر الغيبوبة والتشويش والإبتزاز صارت الثورات والإنتفاضات مرتعا خصبا للمندسين وأصحاب الأجندات العميلة والنفوس المريضة ....
في كل ثورة شعبية هنالك متربصين ينتظرون عند زوايا الطرق وخلف الأماكن المعتمة يتحينون الفرصة لإختطاف الثورة وتوجيهها نحو الفوضى والحرائق والإنفلات
التوقيت غير مناسب .. هذا لمن يهمهم أمر الوطن والمواطنين
أما من ينعتون أصحاب الرأي المخالف بالجبن والتخاذل فهؤلاء ليسو سوى بيادق في رقعة الشطرنج السياسي .. أو كالثور في مستودع الخزف ...............................
ماذا تنتظرون من ثورات يقودهاالموقع المشبوه facebook سوى الخراب والدمار ...
لك الله ياوطن اللهم أحم السودان من كيد أبنائه قبل أعدائه ....
يا منتصر ولا ثور في مستودع ولا ذو نفوس مريضة وأجندة خفية كنت عايز أجي أدعوا ربنا انو لو عندي اجندة خفية ربنا يكشفني ولو انت اتهمتني زورآ وبهتانا ربنا يدمرك وينتقم منك دنيا واخرة لكن مافي داعي يازول اقول ليك حاجة قشة ما تعتر ليكم وانشاء الله السودان يبقي زي افغانستان اتهنوا بيه بالهنا والشفا والله القعاد بره احسن من الحاصل ده حسي دي ديمقراطيتك العايز تفتح بيها السودان؟؟؟ بعدين انت قايل الشعب كله عايز يطلع؟؟؟ ما حأكتر الكلام عشان ما اقول كلام جارح لكن الله يسهل ليك ولي وانا متابع معاكم وقشة ما تعتر ليك
قمة الاستبداد والتعالي
01-15-2011, 04:45 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
ردئي الجودة وقاعد علي هبشة زي الصومال وافغانستان الساسة يتصارعون علي الكراسي ودحين المنبر ده كله بقي سياسي وردئي ايضا بمعني لا يحافظ علي تراب وطنه شيفت كيف؟؟؟
سؤالك ده ياخ ما بتلقي ليه اجابة هنا فوفره لنفسك احسن
01-15-2011, 04:42 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
يا خوانا انسوا حاجة اسمها وطنية وكلامي الكتير ده انا معاكم تب من الليلة في خروجكم للانتفاضة امشوا جاهدوا وقاتلوا وناضلوا واصلوا ما حأمنعكم ورأيي البقي تقيل عليكم ده خليتوا يا الله العايز يعمل فوضي يطلع فلتان امني قشة ما تعتر ليه انا متابع من بعيد لكن ربنا يوفقكم اها قصرت معاكم؟؟
تاني كده لو جاياني قروش من البوست ده حا تنقطع
01-15-2011, 05:17 PM
Nazik Eltayeb Nazik Eltayeb
تاريخ التسجيل: 11-27-2007
مجموع المشاركات: 2357
ملحوظة :كلام حمور دا خلي ليه بالك نحن في ثورتين ما حصل لينا انفلات امني و ازيدك كمان *الانفلات الامني في تونس يقوده ضباط امن تابعون للحكومة المطاح بها مع القليل من المجرمين *الحل ان نفكر في كيفية حماية الثورة القادمة من الانفلات الامني الذي سيقوده النظام لا ان نمنع الثورة *معظم المتاخلين الذين دعوا للثورة يتحدثون من داخل السودان و من قلب الاحداث لا تستمع لاشاعة الكيزان معظمنا بيكتب من جوه السودان و بتعرض للتهديد
01-15-2011, 06:29 PM
ASHRAF MUSTAFA ASHRAF MUSTAFA
تاريخ التسجيل: 08-04-2008
مجموع المشاركات: 11543
يا نازك احييكي وانت تتحدثين من مرمي النيران والله لن امنعك بعد اليوم انا قصدي لو حصلت فوضي وعدم استتاب في الامن سيموت اهلي واهلك واهل الكل لكن النقطة وضحت لي الان دعهم يموتون بسلام فالوطن اولي بهذه الانتفاضة كله يهون في سبيل الاجيال القادمة
في حاجة جميلة لفتت انتباهي في كلامك
Quote: الحل ان نفكر في كيفية حماية الثورة القادمة من الانفلات الامني الذي سيقوده النظام لا ان نمنع الثورة
طالما ان هنالك تفكير يمكن تدابر الامور بعقلانية النظام بالفعل لن يسمح لاحد التحرك لانه قابض علي زمام الامور بقوة وصلابة حاولوا قدر الامكان ان تتحسسوا موقع اقدامكم قبل انزالها حاولوا ما في استطاعتكم لتقليل الدماء التي تسيل سأتصل بأهلي كي يستعدون للمجازر القادمة سأرسل ايميلات للكثير من الاصدقاء والاهل الروح تروح ما مشكلة الروح تروح ما مشكلة لا اخفي عليكي اختي الكريمة انني لن استطيع مشاركتك النضال ولكن لن اقف عقبة في تحقيق نضالك ومن معك واتمني لكي ومن معك ان تتحقق انتفاضتكم مع انني ليس متفائل بشدة لانني اتحدث بصورة مستمرة مع اهلي واقاربي ولم اجد بينهم من يريد النزول الي الشارع ليس هذا فحسب ولكن عودة الكثيرين من السودان والكثير منهم اعضاء هنا قللوا من هذا الامر كثيرا وتحججوا بأن المواطن همه في رزقه وكسب العيش وهو امر يحسب ضدكم وليس عليكم لكن مع اصراركم وعزيمتكم يمكن ان تفعلوا الكثير لهذا ادعوا لكم صادق الدعوات بالا تتراجعوا ابدا وان تتحقق امانيكم بأقل قدر من الخسائر وان يلطف الله بالعباد ويقلل من الدماء التي ستسيل
01-15-2011, 06:44 PM
منتصرمحمد زكى منتصرمحمد زكى
تاريخ التسجيل: 11-04-2009
مجموع المشاركات: 4045
الاخ منتصر انا قلت كنت عايز لكن لم افعل بعدين قلت ما حأكتر الكلام عشان ما اقول كلام جارح والتررد ده سببه انك طول عمرك مهذب ومحترم لكن فجأة شعرت انك اتغيرت واحتديت معي في اللغة فبادلتك الحدة علي اساس ان الكلام طالما جاني في بوستي فهو بالضرورة موجه لي كما شعرت بإستعلاء في ردك وربما كلامك لا يكون موجه لي كما تفضلت ولكنك لم توضح كما شعرت انك تريد اقصاء رأيي وفرض رأيك
علي كل حال أشكر لك ردك الاخير الواضح جدا واعترف انني متهور ومتسرع لم اراجع كلامك مرة اخري ولكن كلامك الاخير يكفي فلك العتبي حتي ترضي يا صديقي والعفو لله والرسول
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ASHRAF MUSTAFA
احمد محمد بشير
Hafiz Bakhit
Osama Mohammed
حمور زيادة
عاطف عبدون
Mohamed Yassin Khalifa
طلحة عبدالله
منتصرمحمد زكى
Nazik Eltayeb
فيس بوك
تويتر
انستقرام
يوتيوب
بنتيريست