هناي هناية : قصة جريمة

مرحبا Guest
اخر زيارك لك: 03-29-2024, 11:40 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الثانى للعام 2014م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
10-15-2014, 07:01 AM

حسن النور محمد
<aحسن النور محمد
تاريخ التسجيل: 12-30-2004
مجموع المشاركات: 456

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
هناي هناية : قصة جريمة

    هناي هناية : قصة جريمة
    كانت ست البنات منزعجة وقلقة ,فغياب فلذات الاكباد لاي سبب اواخر جد مزعجة وعند تاخر مرسالهم, حتي ان كان ذلك المرسال للغرفة المجاورة يثير القلق, قامت عشان تشوف البيت البى قادى....لحظات ..بعد ان القت نظرة على بى قادى...وهو جهة الديوان او بيت الرجال في العهد البايد, جات تكورك .....الليله عاد ما درت الجلد براك . احمد مشيت وين ..تعال ..انت كمان بقيت زى كمال ؟ تعال الليل خلى ابوك يجى اقول ليه من ماجاء طالع مع كمال فى راس البيت , كمان بطقع الناس فى الشارع بالحجار, انزل ...كان ماكلمتو ابوى ماجايبنى.
    بعد قليل اكتشفت ست البنات ان احمد نائم في السريرالفي البرندة التانية
    ,متغطيي بالملاية ,تعبان من الجري و النطيط, حي يابوي انت نمت؟ صلحت راسه الذى مال الى الخلف استعدلت ارجله فى السرير غطته واقفلت الباب . خرجت تنادي , كمال ..ياولد ...انت وين ؟ انزقمت فى المخزن , عندك شنو هناك ؟..اطلع بتعضيك حشرة...تعال ارسلك ...انتو بتجو بس فى شان عذابى؟...انا اسوى شنو يا الله الاولاد جننونى. تدخل صديقتها اميرة ,كانت هنا منذ لحظات ..الا ان وجودها لايستغرب فهيى صديقه ست البنات منذ الطفولة ...بادرت اميرة سائلة يامرا بتتكلمى براك مالك ؟ ردت ست البنات ...ياختى الاولاد مجننى مماجوا من المدرسة مهججين الدنيا , كمال مرة في المخزن مرة فى راس البيت بطقع فى الشارع , هسى يفلق لية زول يجيب لينا مشكلة ...احمد الماقام من قعر الواطا مباريه , من التعب راقد زي الجنازة , ضحكت اميرة وهي تقول...ستهن انتى مانصيحة .. هسى لقيت كمال فى خشم الباب..كنت ماشه الدكان رسلته قلت مسافة يمشى ويرجع ادخل عليىك...قبيل الناس ما ادونا فرصة ..اها وقعى لى الكلام ...كيف قلتى ؟
    ردت ست البنات وهى تقودها من يدها الى الداخل.... لكنها توقفت وسط الحوش وهو مكانها الاثير للقطيعة , ياهو...(ماعارف نحن بنبداء الكلام بطريقة عجيبة ..زى قلت ليك , والله , ياهو , ثم يلا...ياسلام... انا بتكيفنى يلا دى عند الجكس طبعا) . يلا ...(ست البنات لانها بتعز اميرة قالت ليها ياهو ويلا الاتنين معا) . يلا ياهوقلنا الاولاد خلاص بعد دا نطهرهم....تفتحت كل مسام الشمار لدى اميرة فهى فى هذه الحالة اصدق راوية لان معلوماتها من بطون الكتب وستكون اى زيادات تضيفها مقبولة بحكم علاقتها بست البنات .قلت ليك قالت ستهن كما يدللنها صاحباتها , بلهجة مختلفة هذه المرة تظهر فيها الحميمية...خاصة عندما يكون الصوت خفيض والنظرات منكسرة , اتكلمت مع الحاج قلنا الدنيا حالها ما معروف احسن نطهر الاولاد اى حاجة ملحوقة , اصله قروش الصندوق ...قلنا الصرفة دى نقطعهم بيها , بينى وبينك كنا دايرين نبنى بيها بيت عد حسين , السور يعنى .., لكن ياهو بتقضى الغرض هنا . جادة كانت اميرة وهى تستمع وست البنات التى تساررها بامر اسرى خاص, تؤمى مستحسنة الفكرة...تسال باهتمام .حددتو المواعيد ؟ لا ماحددناها.قلنا نجهز بعدين نحددها ,ردت ست البنات.....وواصلت الحكى وهى تساوى شعرها الذي قعصته كعكة من الخلف ...فعلت ذلك بيدها اليمنى تعاونها اليسرى وهى تعض على بنسة باطراف اسنانها ...ظهرت سواعدها البضة...كما بان ابطها الحليق من فتحة كم القميص..ماكلمت زول
    والله بس ناس بيتنا وبيت ناس الحاجة وهسى انتى والحبان البشتغلوا معاى .(كدا يكون ناس امدرمان والخرطوم وبحري وشرق النيل عرفوا)
    وحتى تكون اميرة اهلا للثقة فقد صرفت النظر عن موضوع الشمار..بعد ان اخجلها ذكر ست البنات لها قبل الحبان..قالت لنفسها وهي تزوب حنان وست البنات مستقرقة فى الحكى ..عارفاك مابتقصري .
    طيب عملتى حاجة ؟..قبل ان ترد ست البنات كانت تقوى تطرق الباب , تدخل دون انتظار,ناظره للخلف ضاحكة للفراغ...الممتد عبر الشارع حتي الناصية ولم يفت علي اميرة ان تلمح عصمت ود علوية وهو يتواري مسرعا باللفة وهي تدعي قفل باب الحوش الفاتح علي مدار العام بعد القاء نظرة ذات اليمين وذات الشمال.
    انسربت تقوي وهى تتكلم باسمة كمن قبض اصحابه بجرم مشهود, بتوسوسو بتقولوا شنو ؟.
    بسم الله خلعتينى قالت اميرة تتسحبى ذى الحرامى,عاملة رايحة وقد تنسمت رائحة كنزو التي عرفت بها تقوي حتي سميت تقوي كنزو, وعرفت ان موكب الدلال قد هلت بوادره وهو لاشك متبوع...وان لم يكن متبوع بزعران الحلة فهو متبوع بماعناه شاعر الحقيبة اذ قال:

    خلي جاءت متبوعة الصافية كالدينار
    في القوام مربوعة شوفها عالية منار
    موضة آخر موضة هيفاء غير زنار
    متبوعة هنا لاتعني المعني الذي نتداوله كالعادة لكنه معني تجلت فيه فطنة الشاعر الفحل ود الرضي وفراسة اللغة التي خبرها اهلنا قبل ان يتلب حرامي القلوب الحيطة وقبل ان يغني الناس لراجل المرأة الحقو برا...وقبل ان يولع الصبية حفرتم نهارا جهارا لطبق البوخة.اقول ذلك وفي بالي رمية الحقيبة المعروفة
    طابق البوخه قام ندا يهتف
    نام من الدوخه
    ايدو عاقباه جدله مملوخه
    لي معالق الجوف موسو مجلوخه
    وقد ادلي صاحب ليلة المولد ياسر الليالي المجذوب بدلوه في طقس التجميل التقليدي المعروف بالدخان حيث قال :
    وحفرة بدخان الطلح فاقمة
    تُندي الروادف تلوينا وتعطيرا
    لمحت فيه وما امعنت عارية
    تخفي وتظهر مثل النجم مذعورا
    أرخي الدخان لها سترا فبعّدها
    كدرة في ضمير البحر مسجور
    يقول بعض من خبرو دروب اللغة ان تابعات المتبوعة هن الروادف...واستغفر الله لي ولكم.
    تواصل ست البنات وهى تضع يدها فى كتف الزائرة المعطرة , التى رفعت حواجبها متسايلة ...
    ماعملت حاجة بس بديت اجهز حاجات الرئحة والدلكة لانها عايزة يعملوها برواقة.
    المحلب اصلة عندى لمن مشى على اخوى المغرب جابو معاه .تدخالت تقوى ..المغرب فيها محلب ؟ قالت وهي مازالت مستلبة الفكر...اثر مغازلة ودعلوية التي خلبت لبها ووعدتها بسلوي ايام العطلة الصيفية لتعيش في عالم وردي صحبة ودالجيران الانيق هذا بعد ان تنقضي ايام الطهور...حق ناس علوية حيث ينشغل الجميع باجندهم السرية والعلنية.
    هو داب محلب ...يابتى ناعم ذى السمسم .....اضافت اميرة داعمة صديقة عمرها . اجى يا تقوى المغرب معروفه بالمحلب ( حتي هى لم تسمع فى حياتها بمحلب مغربى ) .
    تواصل ست البنات التنوير...المحلب المغربى كان شفتى بس محلب الدقاقة ياقول عبدالقادر سالم , المحلب والقرنفل وديته للحاجة امس مع مرغنى ( مرغنى اخو الحاج راجلها ) كان من المؤمل ان يتزوج اميرة..التى التفتت مستجيبة لكركبة سمعتها هي براها دون غيرها فى الداخل , حدثت فى الوقت المناسب لتنقذها من الحرج الذي احسه الجميع عند ذكر اسم مرغني المرشح السابق قبل ان يختطفها سعد تاجر المحاصيل المعروف كمساعدة لام الاولاد التي وخط الشيب راسها وانهك الرمتزم ركبها وفعل داء السكر فعله فيها ,هذاماعددته الخاطبه لتنهي دفاعات الفريق الاخر , وكان الحاج يطل بعد ان يترك عربته في طلمبه البنزين التي اوقف ريعها لاميرة...وكانت مكنتة لام العيال ان عندهم اجتماع مع الفريق عمر, وكان الاجتماع يطول لانصاص الليالي فيخابر الحاجة انه في جامع النيلين يقضي صلام التهجد ومنها يذهب للمصنع في الباقير...ولان الحاج من الذهاد العباد فقد كثرتهجده , (تقبل الله)..وكانت اميرة...لاعمل لها الا ان تقود الحاج في دروب الجنة المدهشة وكيلة عن الحور العين.
    ظهر احمد وهو يمسح عيونه من اثار النوم , حمودي قالت اميرة ذلك بود لتؤكد لستهن انها صديقة جد ,
    تعال صح النوم غمرت الصغير القبل وحضنته خالته اميرة ليكون تاني اثنين يتمرغ في تبر جيدها.
    تجاوزت ست البنات تلك النقطة التي ماذالت تخيم في الجو... بسرعة لتفادى صديقتها ماترتب علي زكر مرغنى من حرج ,( حرج شنو ماعارف ماهى برضها ماتزوجته وتزوجت اخوه يعنى شنو؟ فالتبرير بالارادة والقسمة والنصيب يعمل عمله في سودان الرقشات...).
    اها ياستى ومعاهن الضفرة , الحاجة تنظف الضفرة وبعد داك تنسحن.اضافت ست البنات فى مالا معني له
    ....لازم تنسحن دقاقة وكل حاجة تكون فى ماعون براه .( طبعا بعد داك بلخبتوهن سوا ) .
    مازال الثلاثى يتفاكر فى شان الحدث المرتجى.سالت اميرة..تبدى اهتمامها بمشروع عائلة صديقتها التاريخى , ولتاكيد معرفتها ببرتكولات الاستعداد لمثل هكذا مناسبات . طيب الروائح حضرتيها ؟ اجابت ست البنات بفرح , الروائح كلها جاهزة كنت بجمع فيهن من زمن ,سوارد باريس جابو لى ود خالى , طيار... كانما سوارد باريس مافي سعد قشرة ولاسوق ليبيا ولا عند اي بتاع كشك , سالت اميرة فى حرص , ان شاءالله يكون طلال جاب ليك معاه الرفدور. هنا لابد من وقفة فطلال المعنى شاغل قلوب النساء لوسامته واناقته وعينه الزايغه ومعذب الرجال لانشغال النساء به وبعض ذلك لغيرة وبعضه حسد ممن ارتبطوا بحسان يراودهم احساس ان حالتهم المادية هي السبب لاغير.وهو مفتون بذاته ..كبعض قادتنا النرجسين وبت عمته قاشرة بيه .الا ان هذا النوع من الرجال يكون موضوع رائع فى لمة البنات ... خاصة ان كن فى سنة اولى عرس .المهم طلال جاب سواغ دى باغى بس (قايلننا مابنعرف نتفشخر..بالفرنساوى ) .كان لابد لست البنات من توضيح كامل , فواصلت ,الرفدور جبتها من السعودية تركزت نظراتهن فى ست البنات .., فهن يعرفن انها لم تغادر الحلة لمدنى فكيف( جبتها من السعودية). استدركت ستو ..رامية الكورة فى ملعبهن,انتو ماعارفين مرت السفير الهندى شغالة
    تجارة ؟ .
    مع سيدات الاعمال ؟ سالن الاثنين ...بغرض تخزين المعلومة..لاستعمالها ..فيما لايجرمه القانون .
    ردت ستهن بهدوء وثقة...زمان خلتهن ..ديل حراميات ...ضربن البنوك وحاربن الشابات الصغار وفلسن بيهن واكلن مرة السفير الهندى شئ ثمنمائة وعشرين مليون( دخل المبلغ فى مذايدات الشمار فذاد عن المليار جنية فى منطقة بحرى وشرق النيل ) . سالت تقوى في انحناء قافذة كادت ان تدلق اللبن..الذي فار...واصبحت مناقير العصافير كماحبات ذبيب سلطانة الفي (الدي)...وقد حان قطافها(اها عملتي شنو ؟)
    ردت ست البنات ..بصوت اضفى على الجو شئ من الدراما , تعمل شنو ماقطعتها فى مصارينها .
    اوردت اميرة معلومة جد مهمة حين قالت ,هى زوجة دبلوماسى مامسموح ليها بمزاولة نشاط تجارى . لاتعرف اميرة رغم سماحتها البتوقف الحركة ان هذا القانون لاينطبق على نساء الدبلوماسين فى السودان خاصة المسلمين منهم .ولاينطبق على رجال السلك الدبلوماسي السوداني , والدليل على ذلك ان السيدة اميرة قرن السفيرة السودانية بالخارجية نقلت غرف نوم ايطاليا كلها وبدخلهن بمطار الخرطوم وبدون جمارك كمان, ..وبتباعن فى معرض البيت السعيد بالخرطوم وفى معرض ارض متى فى شارع الموردة .
    واصلت ست البنات .فى حنق واضح على نسوان الاعمال, هى ..(تقصد زوجة السفير الهندى بالخرطوم ) عندها دكتوراة فى الاقتصاد وعندها الجنسية البريطانية ..صدقى بقت تدى مرة سفير بنجلاديش لانهم مفلسين كمان عشان البنجلاديشية رئيسة جمعية النساء المسلمات .تبيع وتشيل نسبتها وبضاعتها كلها اصلية من السعودية. دى جبت منها الرفدور, ارياح الرش جبت واحدات من السواق واحدات هدايا .
    ختمت ست البنات الامر بقولها الرئحة موضوعها انتهى فضلت الدلكة . انتىى ياتقوى عليك الشعيرية والسكسكانية .ثم ملتفته لاميرة شفتى فى عرس ناس حنان عملتهم كيف لا لا ماشفت شغل زى داك , بذلك جيرت ستهن اولاد الحلة كلهم للعمل التطوعي الذي سيبتدي قريبا والذي سيكون بتكليف مباشر من تقوي كنزو لجماهير الشباب.
    الملحات النسوان الكبار بجيهنهن , نخلى الحاجة ونور عليهن النعيمية والتقلية.
    قالت تقوى متحمسة اميرة اعملى العصيدة , ردت ست البنات هوى هوى عصيدة شنو البتعملها اميرة ؟ حاجة فاطمة بتظبطها جد,عصيدة زى القطن.. ومتسائلة فى استدراك تانى ياربى شنو ؟ ايوا انا عارفا نفسى ناسية حاجة , الفطير تقطعه نهى هى عاد فى زول بصاقعها فى الفطير ؟( بصاقعها دى جبناها من وين ؟)..ثم ايوه الشية والمرارة ..ديل يا اميرة نعملن انا وانتىي في اشارة خفيه الي ان ازواجهن بتاعن (جقمة بالدس) والمناسبة تغري باعلان تلك النشاطات التي تشير الي نشاط اسري اخري وهو الشئ الوحيد الذي اتفق شعب السودان عليه وتوافق علي كتمانه حتي الان علي الاقل....طيب دايرين زولة تظبط الشطة ,...ومستدركة ....بس ليلى مافى غيرها.
    يحضر كمال فى حالة ظاهرة من التعب, اميرة ياخ هاك حاجاتك التقال ديل.
    اميرة حاف لا خالتى لاعمتى...تزعق فيه ست البنات , يما ياخى الحاجات تقيلة شوفيها ثم ينقنق..بصوت خفيض...( هي ماتجيب ليها ولد ترسلوا)...يبتسمن الصديقتين وترد...اميرة ووجها يتقضن ( ياولدي الولد شغالين فيه بي يدينا وكرعينا...الله يجيبه ) تقول ذلك وهي تقدير نصيبها في ورثة الحاج...الذي لاشك قاضي نحبه عن قريب اذا تابع قيام الليل وصلاة التهجد..(تقبل الله ).
    تسال تقوى ...مابتختو صحن فول يقزر الصينية ؟ ..تصيح ست البنات ..هى الفول نسيناه ...طيب صحن فول مظبط وطعمية حمص تمام. كدا, ,ديل خلوهن لوفاق ..البت تقول ابوها يمانى...الفول دا حقها بس بتسوي رهيب .
    تهم اميرة بالذهاب معلنة , ياخوانا قولولى امشى الرجال قربوا يجوا , تمسكها ست البنات من يدها لا لا خسمتك نكمل... قربنا...ثم معاتبة دى انتى كمان .
    ثم تسال , طيب حاجات الجرتق ...تختف تقوى الكلام , دى كمان دايره تعب ناس ابو مرين عندهم باجروها بسموها القفة فيها كل حاجة . تسال ست البنات شنو وشنو .
    تتدخل اميرة بعد ان جمعت معلوماتها بعد صنة...القفة فيها حقين صغير وكبير وثلاثة كور صغيرة واحدة للدلكة وواحدة زيت مر والثالثة للموية وصحن باشرى كبير للحنة ومبخرين وانتى تكلميهم , تقولى ليهم لطهور ولدين بدوك معاها هلالين دهب جمل وسبحتين يسر...كمان امكن يتظارف معاك ويديك الشموع .
    ثم دنت الرؤوس الثلاثة...كما في القرعة بين فريقين...ولايعلم الا الله ماذا قالن...الا ان كلمة هناي هناية تردد ذكرها...هذا ماقاله كمال عندما سالته حفصة وهي تقشر له موزة صومالية...نوع ابو نقطة...وهو نوع مشهور في كشف المستور عند الصبية
    (الماعارفين حاجة) كما تقول الامهات
    الجرتق نعمله هنا ,ماتنسى تجيبى معاك ثلاثة خرزات كبار وثلاثة ثلاثة شلات حرير ومندلين حمر للضريرة .
    تنهدت تقوى وملت الانتظار لانها لاتعرف الحاجات دى .فهمت اميرة مايجول بخاطرها فقالت ..انتى طبعا ماعارفة الامور دى ...اماتك بسون كل شئ لمن يجي وقتها..قريب ان شاءالله, قالن ذلك بصوت واحد مع ست البنات
    • ردت تقوى والله ما فاهمة اى حاجة,...انتى مالسة ما تستعجلى بيجيك الدور...قالت اميرة ,اكملت الباقى همهمات.... ثم قدمت الاقتراح الذي لن يلاقي اعتراض مطلقا...ستو يااخي ماتعملي لينا برنامج حفرة بي جنبة كدا, عشان تكون حجة وتجرة...في تورية متعمدة وهى تنظر مبتسمة لست البنات وتقوى عاملة ماناقشة حاجة .
    قالت ست البنات ...وهى تلقى سؤال الخاتمة اها تانى فى شنو ؟ .
    تقول اميرة مع احساس بمشاركة لاباس بها فى النقاش .بس جريدتين نخل , كلمى اى زول يجيبهم...من الجنينة الفى شارع الموردة (ياربى قاصدة الجندول والا النيلين والا حديقة الموردة ولا تكون قاصدة الرفيرا ؟ دى كانت منتزهات للشعب السودانى في امدرمان قبل ظهور الاسلام).
    ماتنسى الكحل تجيبى من ناس ابومرين والحنة لان حنتهم مافيها كلام ,بجيبو حنة الدامر الاصلية زارعنها براهم.
    صمت الجميع عن زكرالخبر القنبلة الذي تتداوله قعدات نساء العرضة الجنوبية...لم يرد زكره , لم يشار اليه تصريحا او تلميحا ,...وعندما ترد سيرته يكون ذلك فىى اغتضاب وسريعا كما التوقيع فى كشف مرتبات صرفت من قبل بتوكيل,...وبصورة جد مبهمة ....يكون ان تكرر زكره ... ولايكون ذلك الافي الخفاء وهمسا....تعارف الجميع علي عدم كتشفه .. وبعضهن امعان في الاخفاء يسمه هناي فلانة ...لكن الذي لاجدل فيه ان فعاليات الاستعداد للحدث العظيم تدور في صمت...ذلك ما (فكته...عفاف الخياطة وهي تقول ان حاجة علوية جابت ليها مقطعين قرمصيص وجلابية مستعملة تشيل منها المقاس ...وهي شامة ليها ريحة حاجة....كان ماقالته عفاف كافيا جدا لاشتغال البحاث وجماعة التحليل الذين ذهبت جهودهم لمعرفة شكل الفستان المستعمل وقماشه واذا عرف ذلك فقد انحل اللغذ .
    اما خبر طهور الاولاد فقد عم القري والحضر , لم يكن ناس العاصمة المثلثة كمايطلق عليها بعضهم قد اطلقو الجواسيس للتصنت علي ناس ست البنات . ولم يسمعو بالنباء العظيم من اذاعة لندن..لكن للجماهير حسها الواعي وشمارها القوي...وسرعان ماحام الخبر..البلد والبلدين لمن جاء لست البنات في داخل بيتها, تجسد ذلك في قصف كتيبة اللوم الاولي التي وجهت مدافعها لاسرة الحاج...اذا شوهدت كتيرة مرة عم موسي وهي مارقة من ناس ستهن منشرحة...لكن مادار حقيقة فهو مختلف جدا...اذا دخلت كتيرة ودمعتها في عينها وهي في عشرة عتاب وواقعة في ستنا بكلام يقطر عواطف, ( عاد ياستو نسيتي العشرة والخوة
    نسيتي تربايتنا في فريق السوق؟ نحن عاد ما اخوات والمرحوم ابوي ماصاحب ابوك...والمرحومة امي كان امك ماقعدت للقهوة حرمان عليها مابتختها في خشمها دحين ناس كمال وكت نويتو تطهريهم مالك كان كلمتيني...هم ما اولادي وبدور ليهم السمح...وجديدهم ماجديد وليداتي)..واستماتت ستهن في الدفاع عن موقفها حتي الجمتها كتيرة ورفعت الراية البيضاء وهي تتحلف..( هي ياحبيبتي النسا مع الناس ويدي واحدة وهو زاتنا لي هسي ماحددنا حاجة ..معقول عاد ما اكلمك..؟ نان التقلية البسويها منو ) كانت ست البنات تشغل فكرها بي رشوة كبيرة تسكت بيها كتيرة فانتزعت تكليف الحاجة بعمل التقلية لترشو به كتيرة...وللحقيقة هي لمن جاءت كتيرة للوالادة بي بتها البكر من بورتسودان ...كانت ستو طالبة في الصف التاني مدرسة المليك الوسطي....ليس ذلك الامر...لكن ذلك العتاب الرقيق المستعطف تحول عند وكالات الانباء الي( كان شفتي بقيتها اقل من سمسمة وكت قلت ليها الخبر الطير في السماء عارفه لمن نحن ناس حلتك وعزوتك بدسي مننا ؟ قعدت تتحلف وتتعزر لمن بكت حتي سامحتها.(دا كان الاستيت الختته كتيرة وهي تتفرس عيون الحاضرات...من حي الامراء...والذي طيرته وكالات الانباء بتصورات مختلفه...ودون شك معلومات مختلفه جدا.
    باعلن قرب طهور اولاد ست البنات...وهناي هناية كانما اعلنت الحرب...حرب ليس كباقي الحروب حرب من نوع اخر , قادتها الحرائر والحسان...وادواتها الحنة والعطور ...ووسائط جماليه اخري نسكت عن زكرها...الان ولاشك الدخان كتراث جمالي تاريخي ...ومن حفر حفرة لاخيه وقع فيها... (يتواصل الحكي)

    حسن النور
    ليزبردك بارك/سدني26 /09/2014

    (عدل بواسطة حسن النور محمد on 10-15-2014, 07:04 AM)
    (عدل بواسطة حسن النور محمد on 10-15-2014, 07:09 AM)

                  

10-15-2014, 04:14 PM

خالد عبد الله محمود
<aخالد عبد الله محمود
تاريخ التسجيل: 11-28-2004
مجموع المشاركات: 5393

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: هناي هناية : قصة جريمة (Re: حسن النور محمد)


    الأخ حسن
    سردكـ جميل و مشوق
    واصل بالله
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de