دعواتكم لزميلنا المفكر د.الباقر العفيف بالشفاء العاجل
|
|
 حوار مع جد سنة (2065)
|
بعد خمسين عاما من الآن يتلم الاطفال والمراهقين حول جدهم وهو المراهق في زماننا الحالي الذي لم يبلغ العشرين بعد ليحكي لهم عن أيام شبابهم وطفولتهم .
- يا جدو ما تحكي لينا عن ايامكم سنة الفين واربعتاشر كنتو عايشين كيف ؟؟
- يا ولدي أحكي ليكم عن شنو ولا شنو بالظبط ااااااااااااااه يا حليل أيام زمان.
- يعني يا جدو مثلا عن أكلكم شنو ولبسكم كان كيف والرياضة والاجهزة والمواصلات والجو والعلاقات وكل حاجة يا جدو ..
- أيوا يا جدو أنا من زمان أقول ليك اتونس معانا أحكي لينا عن أيام زمان .
- طيب يا اولادي أبدا ليكم بشنو
-أبدأ لينا بالاجهزة مثلا والمواصلات يعني الحاجات الكنتو بستخدموها .
- يا سلاااام ذكرتوني زماااان كان عندنا أجهزة كدا أسمها الموبايلات ..
- شنو شنو شنو أسمها شنو يا جدو .
- ما قال ليك الموبايلات انت ما تقاطعه خليه يواصل .
- أها يا اولادي الموبايلات دي حاجة كدة قدر كفة اليد يمكن أكبر أو أصغر وكانت ماركات جلاكسي وايفون ونوكيا .. العنده جلاكسي دا يا دنيا ما فيك زيي أما ناس الايفون ديل اسكت خليهم ساي .
-أها يا جدو كنتوا بتعملوا بيها شنو الاجهزة دي ..
- يا ولدي كنا بنتواصل بيها يعني انت هسع لو عاوز تكلم ابوك في كندا بتعمل شنو - بدخل في غرفة التخاطر واتونس معاه ممكن أفطر معاه كمان وارجع .
- اها يا ولدي نحن كنا نضرب بالجهاز دا ونتصل وفيها يجيك خط وفيها ما يجيك .
ونتكلم ولامن اتطورنا خالص ظهرت لينا حاجات كدا اسمها الواتساب والفيسبوك ممكن تتونس مع اصحابك بالكتابة ,
- بالكتابة ؟؟؟ هاهاهاهاهاها والله يا جدو أيامكم كانت تحفة وانتو زاتكم كنتوا فايقين ورايقين خلاص .
- يا ولدي الحياة ما كانت سهلة زيكم كدا والزمن ما كان عنده قيمة
- أها المواصلات كانت كيف ؟
- كانت ما بطالة عندنا حاجات اسمها البصات وحاجات اسمها الطائرات والسيارات الصغيرة والبواخر والسفن والعجلات والركشات.
- البص دا شنو يا جدو .؟
- حاجة زي غرفة طويلة كدا فيها كراسي بالجمبات وتمشي على عجلات بالارض وسرعتها بالكثير مائة وخمسين كيلو في الساعة .
- بس ؟؟؟ لا حول ولا قوة الا بالله مائة وخمسين كيلو في الساعة دي سلحفاء يعني ممكن مسافة من هنا لكسلا دي اوصلها في ست ساعات ...؟
- ست ساعات ؟؟؟؟ لا حول ولا فوة الا بالله هاهاهاها ست ساعات دي انا آخد فيها دبلوم ..
|
|
 
|
|
|
|
|
|
|
|
Re: حوار مع جد سنة (2065) (Re: درديري كباشي)
|
- يلا يا جدو ورينا أكلكم كان كيف ؟
- طبعا نحن كنا نتاول الفواكه والخضروات والبروتين الحيواني والحليب .
- يا جدو البروتين الحيواني والحليب ديل شنو ؟
- انتو حاليا بتطبخوا وتاكلوا لحم صناعي مستخرج من البترول في شكل مكعبات معلبة . وتشربوا سائل ابيض اسمه الحليب مصنوع من بذور النباتات ... نحن زمان كنا نتاول نفس اللحوم والحليب ديل لكن كانت طبيعية من الحيوان .
- يا جدو الحيوانات ديل شنو ؟
- لو تلاحظوا في الافلام القديمة والكتب في صور لمخلوقات حية ..اها المخلوقات دي كانت تعيش معنا في الارض وربنا سخرها لينا نذبحها ناكل لحومها ونشرب حليبها ..
- يا جدو وراحت وين الحيوانات دي ؟
- الانسان بأسلحة الدمار والعبث بالطبيعة والبيئة أنقرضت الحيوانات دي حتى العاش منها وما أتسمم بالغاز أصبح عقيم لا يلد لغاية ما انقرضت كلها .
- يعني يا جدو عاوز تفهمنا انه الارض دي كان فيها حيوانات تانية غير الناس ؟
- طبعا كان في .
- بابا قال في كندا في حديقه فيها شوية مخلوقات غريبة لكن تذكرة الدخول ليها غالية وتحجز قبل سنة كمان .
- بالله يا جدو يعني الحاجات دي انتو كنوا عايشين معاها عادي. ما كانت خطرة .
- كيف ؟؟بعضها كان شرس جدا مما يقتل الانسان وياكله ..
- هاهاهاهاها يعني بدل أنت تاكلها هي تاكلك ؟
- لكن انتو قرضتوها يا جدو وما خليتونا شفناها .
- أها يا جدو لبسكم كان كيف ؟
- يعني ما في فرق كبير من لبسكم نفسها بناطلين الجينز الواسعة ونفس الموضة كنا نسميها السيستم في زمنا بنطلون ناصل كمان.. بس نحن كنا بنلبس معاها ملابس داخلية اسمها البوسكر جميلة وملونة ما زيكم . يا سلام كنا حشمة والله ..
يتبع
| |
|
|
|
|
|
|
|
|
|
Re: حوار مع جد سنة (2065) (Re: درديري كباشي)
|
- حشمة يعني شنو يا جدو ؟
- حشمة يعني ستر العورة يا ولدي
- عورة يعني شنو يا جدو ؟
- انتو عورة ما عارفين معناها لا حول ولا قوة الا بالله .
-انا عارفها يا جدو عورة يعني واحدة تكون بعين واحدة .
- لا لا لا انت مشيت بعيد يا ولدي عورة يعني بالنسبة للرجال المنطقة ما بين السرة والركبتين دي اسمها عورة ..
- كيف يعني عورة ... العورها شنو ؟
- يعني مفروض ما يشاهدها غير صاحبها الا في ظروف تانية يسمح لشخص تاني لسه بدري عليكم حا تعرفوها بعدين .
- عارفنها يا جدو ..
- طيب يا جدو البنات كان يلبسوا شنو برضوا عندهم عورة ..؟
- يا ولدي المرأة كلها عوره من رقبتها الى قدميها ..
- طيب يلبسوا كيف يعني ؟
-زمان كان البنات المتحشمات يلبسوا حاجة تغطي الجسم كله اسمها العباية فوق لبسهم العادي والغالب كانت سوداء ومعتمة مش شفافة زي عبايات الزمن دا يا لطيف ... وحتى الغير محشمات لو بالغوا لبسهم ما بيفوت الركبة بكتير . اخخخ من زمنا غايتو انتو ضايعين شديد .
- اها الكورة كيف يا جدو والرياضة .
- زمان وقبل ما يهاجر الناس للكواكب التانية الارض دي كانت هي سكن البشر و مقسمة لدول ما كانت دولة واحدة وكان في دولة متسيطرة على الكورة في دولة اسمها البرازيل كانت سيدة الكورة في العالم لغاية ما اتذكر لموا فيهم دولة اسمها المانيا خلت ريحتهم طير طير في سنة 2014 وغلبتهم سبعة واحد .
- طير يعني شنو يا جدو ؟
- طير يعني شنو ؟؟ خلوني انوم يا اولادي انا تعبت خلاص من السهر>
- خلاص يا جدو كمل لينا بكرة
| |
|
|
|
|
|
|
|
|
|
Re: حوار مع جد سنة (2065) (Re: درديري كباشي)
|
- طيب يا جدو احكي لينا عن غناكم كان كيف .
- يا اولادي طبعا زي ما حكيت ليكم انه الأرض كانت مقسمة لدول وشعوب وكل ناس عندهم غناهم وموسيقتهم . نحن عندنا هنا في السودان كان عندنا طرب اصيل يا سلام ياخ زمن ؟
- يا جدو تتذكر لينا الفنانين في زمنكم اسمهم منو وغناهم شنو ؟ .
- يا سلااام يا اولادي كان عندنا المبدع طه سليمان والبلبل الصداح جمال فرفور وحسين الصادق وأحمد الصادق ديل كانوا اخوان مدهشين وكمان عندنا شكرالله عز الدين يا سلام عليهم ياخ والعجب شريف الفحيل .
- يا جدو ما كان عندكم فنانات .
- كيف يا ولدي في حد ينسى ندى القلعة وافراح عصام ورماز ميرغني وصباح عبد الله وفاطمة عمر وفهيمة عبد الله هو نحن الكان زينا منو ياخ.
- يا جدو نشوفك دايما مركب سماعات قول لينا الاغاني الانت بتسمعها ..
- يا سلام على شكر الله لامن يقول اضربني بمسدسك واملاني رصاص يا سلام على طه لامن يغني قنبلة ولا حرامي القلوب تلب ولا ندى لامن تقول راجل المره حلو حلا .
- يا جدو مسدس ورصاص وقنبلة ديل شنو ؟
- نوع من الاسلحة الزمان هي اسلحتنا التقليدية .
- معقولة يا جدو حياتكم كلها حروب ومشاكل لامن قرضتوا الحيوانات كلها وغناكم كمان كله أسلحة وانت لسع زعلان على زمنكم الجميل ؟
- يا ولدي ما بي الفهم دا .
- كيف ما بالفهم دا انت نفسك مرة قلت لينا القنابل دي اغبى اسلحة اخترعها الانسان لانها تبيد الاطفال والنساء والحيوانات بدون ذنب كمان تغنوا ليها وعاجباكم ؟
- شوفوا هنا يا اولاد لو عايزين تقرفوني باسئلتكم البايخة دي انا ما راح ارد ولا بحكي ليكم .
- لا يجدو خلي روحك رياضية ما نحن كمان عايزين نعرف اجدادنا كانوا عايشين كيف وبيعملوا في شنو ؟
- يعني انتو هسع عاجباكم حياتكم دي تتنفسوا بأسطوانات اكسجين وزراعتكم كلها في المعامل ..
- - ما أنتو خربتوا الارض ودمرتوها بحروبكم ومشاكلكم لغاية ما بقت غير صالحة للحياة انت زمان قلت لينا الواحد يجر سريره في الحوش وينوم احلى نومة .. نحن الآن الواحد لو نام في الحوش ساعة واحدة يموت بالاختناق .
- خلاص يا اولاد انا تاني ما بحكي ليكم حاجة سيبوني في حالي .
- لا لا يا جدو انت ما قلت لابد من تواصل الاجيال عشان سر الحياة ما ينقطع .
- ندمان والله ندمان على كلامي دا خليكم في حالكم وخلوني في حالي
| |
|
|
|
|
|
|
|
|
|
Re: حوار مع جد سنة (2065) (Re: درديري كباشي)
|
Quote:
لو عمري شيئا في يدي لوهبته ليك يا سيدي
|
امد الله في ايامكم اخي درديري
خواطر تخوف
لكن 2065 دي هسع بتجيك طايره هوا واتا قاعد
تطقطق في كيبورديك ده
قول في نص الالفيه التالته كده
بعدين كلو يتغير الا حاجتين بفرملن معاك
الويكه بالقوراصه والجلابيه بالعمه
ديل الي قيام الساعه ان شاءالله
| |
|
|
|
|
|
|
|
|
|
Re: حوار مع جد سنة (2065) (Re: عمر عثمان عبد الوهاب)
|
قمة التفاؤل والتفاعل يا عمر
سنة 2065 دي بعد خمسين سنة من الآن
يعني الجد البتونس مع احفاده دا
حاليا عمره تمنتاشر سنة حالق كابوريا وداقي سيتستم ومركب سماعات وبيسمع في الفنانين الشباب وماشي تيراقص في الشوارع
مين من شباب اليوم لاقاك لابس جلابية وعمة
بالكتير زي جلالايب الفنانين العاملة زي العبايات الملونة دي
| |
|
|
|
|
|
|
|
|
|
Re: حوار مع جد سنة (2065) (Re: درديري كباشي)
|
ألف حمد لله على السلامة و عودتك للمنبر و عودة الكتابة الطاعمة
و يا ريت كمان تشوف لينا صاحبك عباس الدسيس يرجع كمان
و رمضان كريم و تصوم و تفطر على خير
و لك كل الود و الاحترام
| |
|
|
|
|
|
|
|
|
|
Re: حوار مع جد سنة (2065) (Re: ALWALEED ALSHEIKH)
|
ألف حمد لله على السلامة و عودتك للمنبر و عودة الكتابة الطاعمة
و يا ريت كمان تشوف لينا صاحبك عباس الدسيس يرجع كمان
و رمضان كريم و تصوم و تفطر على خير
و لك كل الود و الاحترام
نكرك يا ود الشيخ اناء الله ما فقدناك حين نتمناك
وشهر مبارك وكذلك عيد
| |
|
|
|
|
|
|
| |
ALWALEED ALSHEIKH
فيس بوك
تويتر
انستقرام
يوتيوب
بنتيريست