|
دعواتكم لزميلنا المفكر د.الباقر العفيف بالشفاء العاجل
|
|
 Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
قف تامل..
.فأصبحنا ذي مابيقول حميد
ذي الحي ومكفن.......الله يسامحك ويغفر ليك ياد.مجدي.... مالك علي
يا قلب
أناكت قايلك تبت من تعب السفر
ومن مخاواة القماري....ومن شراب موية المطر
ياقلب مالك علي
ما إنت عارف نقطة الضعف القديمه
جاي تسألني الدباره....
ياقلب مافيش دباره
الله يسامحك ويغفر ليك ويغفر لينا ياد.مجدي
لقد تحجرت مقلتي الآن واغرورقتا بالدموع....وأنا رجل عصي الدمع
أحذرك ياد.مجدي من هذا البوست الذي فتحته...وإلا... إحضر كفنك معاك...
فلاحياة بعد هذا البوست إذا أصررت عليه...إستغفرك اللهم من كل ذنب وأتوب إليك
| |
 
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
فالنتامل في ماضي الذكريات ....
كلمات ذات معان عميقه
ولازلنا كم كنا
بإسم الله الوحد الأحد
ياد.مجدي
بادي ذي بدء
سوف أنادي وأصيح... لأخي... وزميل غرفتي.... ورفيق دربي... أخي الذي لم تلده أمي....دفعتي... د.عمر محمودخالد.... الشاعر القدير....
اه شفت... أنا جايب معاي شنو...راجمه وكاسحة ألغام...مش حذرتك... وقلت ليك سوف تكون حرب لاهوادة فيها
ماذا تريد منا أن نحدثك ونوثقك لك?
أتريدأن نحدثك عن جلسات الإجتماع والتي بدأناها بعد أن أقنعنا بروف دأوؤد بذلك...وكيف كانت ليالينا مع الأدباء
محمد أحمد محجوب...والأستاذ الهادي آدم...وعمك حدباي
كيف أعدنا كأس الجامعه لكرة القدم بعد عشرين سنة عجاف...ضد مازدا(الآداب) وقرين شطه(الهندسه
كيف أغلقنا الجامعة سبع مرات خلال سته سنوات في محاولة لقلب نظام نميري
أحداث شعبان...واليوبيل الفضي لكلية الطب...كم عجمت عودنا هذه الأحداث الجسام وقوت نضالنا إلي يومنا هذا...لتعلمنا.... ما هو الوطن..... وماهي المنافي....ذي ما بيقول حبيبنا وزميل نضالنا الراحل المقيم... أصيل الدواخل الأستاذ الخاتم عدلان
والتي أدت في النهاية إلي إنتفاضة إبريل وألتي كان لنا نحن الأطباء شرف أن نكون حداة ركبها في صفها الأمامي...مات منامن قضي نحبه وبقي منا...من بقي...وما بدلو تبديلا
يا مجدي مالك علي
أعفيني يامجدي لقد إنسكب دمعي
يا دمعي ...ال إشتت...وغلب اللقاط
.....
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
يا مجدي شوق عميان لمتعة النظر...
ياخوي د.متوكل كلامو صاح..مالك فتحت كوة وأججت نار الذكرى...!! والله يا حليلها كلية الطب وحليلها جامعة الخرطوم..كنت دائما اقول لطلبتي في الكلية والله أنتو مظلومين..أنتو مناضلين ..لأنو بتقرو في الزمن الصعب بعد ما الجامعة ضاقت بها السبل وقتلها بنوها وفرقوا دمها على القبائل...
يا حليل الجامعة والنشاط..الكلية التي نهلنا فيها العلم والداخلية التي علمتنا معنى التعايش الحقيقي لأبناء الوطن بمختلف أعراقهم..وتمازجت وتفجرت فيها المواهب السياسية والفنية والثقافية...
نحن كنا وراكم أخي متوكل وواصلنا مشوراكم فكنا جيل الإنتفاضة...
وأقول ليكم...
يا دنيا مالها الناس.. بتظلم معاها الناس
والزول يسيب الزول ..ويتناسى للاخلاص..
يا دنيا مالها الناس..
لمن يكون الفات..أجمل كتير مرات
من حاضر الأيام .. والجاي من لحظات
ببقى الفرح ودّع .. والريدة ما بترجع
والناس بتتوجع ..لى آخر الانفاس
يا دنيا مالها الناس...
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
دخلت كلية الطب بعد نجاحي في تجربتي الثانية القاسية اعدادي علوم حيث كنا اخر دفعة اعدادي علوم مكثنا مايقارب العامين في السنة الاولي حيث تجربة المحايدين برئاسة حاتم المهدي واسامة ادريس عاصرنا في تلك السنة مديران للجامعة بروف التنقاري وبروف مامون حميدة تلك كانت بوابة الولوج الاندرلاب واعدادي علوم وقاعتي الجي ال تي وقاعة الاو ال تي يا له من زمن حلو الماضي دائما الذ من الحاضر
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
محطات يا مجدي في كلية الطب تفتح ذاكرة المطر لهطول استوائي
يروي سنين الشوق المعتق بعطش الدهشة
ويطول الحديث:
البرلم وشلة الحناكيش
سنة تانية وتالتة والغياب الطويل عن الدي آر (الباشكاتب)
الرحلات والقوافل
رحلة كسلا عطبرة
والهروب الخاص لمعسكرات الفريق القومي خارج العاصمة
(نادر الطاهر وهشام عبد الرحيم ووليد معاوية وعبد المجيد)
رابطة الطب والإنتخابات
تحويل الطلاب من مصر والإضراب الشهير
إضراب الأطباء
اليوبيل الفضي
جمعية الثقافة
جمعية الصداقة الاسكندنافية
رحلتي حول أوربا مع الدكتورة الرائعة رجاء
صاحبة الصوت الذهبي
مدريد اتيتك عكس الريح
وعصام روما
من غير ميعاد واللقيا اجمل في الحقيقة بلا انتظار
(ضاع الكلام ماتت حروف اللقبا قبال أهمسا)
جلسات الإستماع
الأمسيات الشعرية
وستعلمين عزيزتي علم اليقين
جلسات الداخلية
بابكر القراي
عبد العزيز عبد المنعم وعبد الحليم وعبد الهادي عبد الجبار بابكر السمح زي ما الجكس كان بسميه
الرائعين من الأصدقاء ويقف بيننا الجميل كوباني الآن
ود بادي
الطيب عبد الخالق
التجاني محمد أحمد
أبشر حسين
الرشيد كاراكاتير
ابراهيم كوجان
أسماء لا تغتفر
وأصدقاء الصيدلة المبدعين
الأمين حسن العبد
محمود ميسرة السراج ومنال بدر الدين وصلاح خليفة وخليل وأحمد الجمل
حلسات الصدق في النشاط والمين روود
وشاطيء النيل
الهجرات للتربية والفرع وشمبات
كل محطة تصبح كتاباً
كنا نمارس الإبداع
ونهوى الطب
لا أدري من اين أبدأ الحكاوي,, 
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
حبيبنا د.مجدي
أه جاك الأديب النحير صاحب الذوق والقلم الرفيع
أه جاك الحكي الجد جد.... الما خمج ال أمه بت أعم أبوه
والله ألم ليك د.عمر محمود خالد ود.معزبخيت ....في بوست واحد...وعن ذكربات الطب....دي قنبله هايدروجينيه....وأسلحة دمار شامل...وإنت مسئول مسئوليه كامله عن النتائج
أحسن ليك تسحب البوست ده...أو أطلب من بكري يودي الخور....
وإلا أنا وإنت وكل الدكاتره الحيخشو البوست ده حنمشي الخور
ولاعذر لمن أنذر
خليتك بعافيه
أخوك د.متوكل محمود
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
خلاص جانا بروف المعز... يا سلام على الذكريات الجميلة...يا سلام على الناس الحلوين زمان..حتى أفيال أنيس الذين كان لا يهمهم غير الكسر.. وين طارق عبده ومحمد المبارك(عتو).. والجمل...وسلوم..
حتى الصراعات السياسية كانت شيقة..كيزان..جبهة ديمقراطية ومؤتمر مستقلين... ذكريات الصراع الأزلي بين الخناشير والحناكيش.. يا سلام على ود بادي عندماقال.. ..سلاطين العلم يمة ما بعرفوا العشرة في فت يوم يدفروك بره زي دفر الطبالي.. وعندما قال لي..أنت ياكوباني يا خوي ناس المعز عمر بخيت ديل بسوا شنو..عشان أي زول جميل بكون في شلتهم....
وين هيئة حلمتيش العليا ..عندما قال المستعرب الخلوي الأمين حسن العبد..بص البنات كرعينو كيف متحننات...ويا عبده لا... يا سلام على داخلية حسيب وانت في سنة تانية... ويدخل عليك الولد بتاع الشاي ويقول ليك..هوي يا برلوم بتعرف الفالسالفا منوفا... أور زي موفمنت أوف زي ثمب...تل مي سمسنغ أباوت زي أوتونوميك نيرفوس سيستم...
يا سلام على من ذكرت يا معز ويا سلام على غيرهم..ناس عظمة وباسطة وأبوسن وشموس... وين ود اسحق وبت جبر الله ولالا وبلدو...
يا ربي ماذا فعل الزمن بأولئك السمحين الطيبين...
شكري يا مجدي يا رائع
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: د.علي الكوباني)
|
الاخ كوباني
لك تحياتي ...
لقد كانت لك صولات وجولات في الكليه مشهود لها وخاصة المناظرة السنويه بين ناس الباطنيه والجراحه...وقد كنت ركن اساسي في القوافل العلاجيه التي جابت جميع انحاء السودن ومعك اخيك الاصغر الصادق وكان العود والاغنيه الشهيره حبيبتي التي لازلنا نغنيها كلما تذكرنا تلك الاياموكان هذا جيل التمانينات فهل سطرت لنا تلك الايام وبالمناسبه لا يذكر علي الكوبني والا ذكر احمد المصري خفيف الدم مزيل الدبرسه فاين هو كما سمعت ومل جابو لي ان بروف جراح في جده الا زال هناك تحياتي يااحمد يامصري....القائمة تطول وسيب الجفاء ياودالقرشي واطلق لقلمك العنان ليسكب مداده تاريخا مدي الايام لاتنسي اركان النقاش ومؤتمر الطلاب المستقلين...اين انت ياالصائم وماذا فعل بك الدهر واخونا فتحي عبدالله اخصائي الطب النفسي هنا في ايرلندا...وين امال جبرالله وكمال عباس والنذير والبيلي ومحي الدين الدقوني وطارق عبدالفيظ والريس عبدالباقي احمدعبدالباقي يجاهدون العلم والمعرفه هنا في ايرلندا وحليمو ابوقاسم هنا ايضا وتنتابهم مبين الحين والاخر ذكريات الماضي فيسهبون في السرد حتي يسخن التليفون الاسماء كثيره هنا قابضين علي جمر الغربه والاغتراب....اين العندليب اماني قنديل وهند عمر النور واخيها هشام الفيلسوف عميق الفكر واين منال جبريل...والكثيرون منهم في اوربا والاكثريه في امريكا يربط بينهم حب السودان والوطنيه الصادقه ..والتحيه موصوله لنادر خوجلي وهو في بلده عسي ان نسمع منكم قريبا وياخي متوكل نعم انه بوست مثير خطر وياحبيبة عمري كلية الطب تفشي الخبر فلقد صدق حدثك ان هذا البوست تاريخ للسودان اذا سلك الطريق الي التوثيق والتحيه للاستاذ الدكتور الجزولي دفعالله بصفته اول ريئس وزراء في عهد الانتفاضه وتعظيم سلام للمشير سوار الذهب والاخ القوي عثمان عبدالله مد الله في عمرهم جميعا ومتعهم بالصحه والعافيه وكذا الحل لصاحب المبضع الفنان مستر شاكر زين السودان والعابدين والسماء كثيره كالنجوم التي تنير لك ظلمة الليل وتهديك الي طريق الصحيح....
ولازلنا ننتظر اسهامتكم جميعا في هذا هو التريخ وتقدمت كل الامم باحترامها لتاريخها دراسة وتوثيقا مهما كان قدره فهل فعلنا نحن..
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Dr Abdelazim Abdelrahman)
|
اشرقت الانوار وطل النهار
وياعظمه حبابك الف
وانكت لينا الجماعه العندك
ونتلاقي في الكافتريا
احمد يوسف واحمد اسماعيل وكمال عثمان ناس قطر راجينكم
الاخ محمود متوكل في انتظار القنابل الهايدروجينيه المحلاة بنووية عمر خالد
ويكون كفني عديله وزين
ياعديله
افتحوا البيبان والطاقه
وامسحوا الدمعه الحراقه
عديله وزين
ياعديله
راجينكم
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Dr. Moiz Bakhiet)
|
مجدى رجعنا تانى عشان نبدأ مشوار الذكريات الجميلة وحتى يكون الكلام مؤسس نقسم الكيمان {كيمان الذكريات}إلى كوم الرياضة وكوم ا لسياسة وكوم الشطارة وكوم الركلسة {ناس مجدى وعظمة } و كوم الأدب والشعر {ناس كوبانى ومعز عمر بخيت }. أما كوم الرياضة فأذكر فيه الحريف المهذب لاعب كرة القدم أحمد أدم الذى كان يلعب فى الأهلى مدنى بجانب دراسته للطب وهنالك أيضآ حافظ مامون وخالد يس وحارس المرمى القدير محمد إبراهيم {من الشباب الصغار الدفع الورانا} . المهم ديل البتذكرهم هسع لغاية ما نجى تانى صادين لبقية الكيمان ولكم ودى .
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
والله يا معز ياما راهنت عليك في الكافتريا..وعمرك ما ضيعتني...وأذكر آخر رقم قياسي ليك كان دقيقتين و35 ثانية وحسب علمي أن هذا الرقم القياسي لم يتم كسره حتى الآن... وعلى لسان ود بادي ( الجنى ده نجضنا تب..)
لا زلت يا مجدي ويا عظمة أذكر (المبذوقة الخامسة) التي شاركت في صياغتها مع شاعر التهاويم سيف دياب (وعملت أنه معكم في ايرلندا) له مني المنى..
تلك القوافل الطبية الرائعة لكل مدن وأصقاع السودان...علاج وثقافة وفنون وطرب ..وأنا شخصيا من الناحية الفنية..تعلمت الحجامة في رؤوس اليتامى...
يا سلام على معلقة كلية الطب العاطفية التي لا زالت تتوارثها الأجيال..
لو تظلمني وتنسى هواي**برضي بحبك زي my eye
وصولك كيف ومكانك high **تعال أدركني before I dye
***********
عملت كمان لحبك File** واستعملت أنا every style
دمعي يسيل زي موية الNile** وطالب منك just smile
**********
ليه يا قاسي ستة شهور ** since I saw youوامكن more
ماشي وجاي حزينvery poor** بين الwindowوبين الdoor
********
ليه يا ظالم كفاي تعذيب ** من ذكراك I cant sleep
في قلبي جروحي كمانvery deep** وشغلي صبح فيcry and weep
*******
يا سلام لمن كانت تردد بواسطة الجميع في شكل كورالي انسيابي يفيض بحنية أهلنا زمان...
يا سلام على ذلك الزمن الجميل..يا سلام على كلية الطب التي كانت مثل الاسلام(لا فرق بين عربي ولا عجمي إلا بالتقوى)..فكليتنا الحبيبة كان لا فرق فيها بين خنشور أو حنكوش إلا بالعلم...
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: د.علي الكوباني)
|
| Quote: تلك القوافل الطبية الرائعة لكل مدن وأصقاع السودان...علاج وثقافة وفنون وطرب ..وأنا شخصيا من الناحية الفنية..تعلمت الحجامة في رؤوس اليتامى |
الرائع كوبانى
سلام كتير كتير
كدى قول لينا شوية عن قافلة بارا
وعرج على ((جريجخ) وما أدراك ما جريجخ
وكلابها ونملها
ولك الود
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
اها سلام نواصل التقسيمات
ناس الصف الخلفي في انيس يعني اخر كنبه كانو بقيادة كوباني وسيف دياب والمسكين العبد لله ومعتصم باسطه والنقر والحويرص وما كان
في هذا الصف بنات لاسباب سيذكرها كوباني شيخ الحله الوراء وناس الوسط من الجهه الشرقيه ناس الغزالي ومصطفي الدحيش واحمد المصري
وهو فردة كوباني يا جماعه عمري ماشفت لي خوة ذي البين كوباني واحمد المصري محل ماتقبل تلقاهم سوا حتي عندما يكون كوباني خالط
تلقاه قريب ليهو وكوباني ده حاجه عجيبه وزول حاره اذكر ودي حكيتها في بوست اخر عندما سقط الترابي في الصحافه وجبره طلعت
الكاريكاتيرات عدد خاص بتلك المناسبه وكانت شديده وحاره تب وفقدوا الجماعه المنطق وهاجموني في الكافتريا ولم ينقذني الا كوباني
وطبعا معاهو احمد المصري وقد اعطاهم الله بسطة في الجسم حال دون ان يتمكن فلان وفلانه التي كانت تلعلع وتسب فنهرها كوبني نهرة واحده
فصمتت صمتة واحده. والكاريكاتيرات بنرجع ليها ان كان في العمر بقيه.
نرجع للتقسيمه
وسط الوسط في انيس كان فيه زكي السراج الشهير بزيكو واسعد مرتضي والمرحوم احمد تمام نسال الله له الرحمه
ويزدادبعدها عدد الطالبات كلما اتجهت خارجا من انيس وانيس بها باب واحد ولا مخارج للطوارئ....وعادة ماتكون انيس خاليه في الايام
العاديه الا من غزالي وزيكوومصطفي الذين اشتهروا تلك الايام بسكان انيس ويطلق عليهم اسم الفيله واذكر لهم بانهم اجادو فن الكسر ..
.وذي ما بقولوا يمه الزنقه جات وازنقنا زنقة كلب والحتات الفيها تسميات وامثال مؤلفها كوباني والله الزول ده كان محيرنا
عديل كده ما تقول حاجه الا والف فيك مثل كلامي ده صاح يانبيل والا لا..
اخونا نبيل يوسف ايضا كان مشهورا بالقفشات اللازعه ومكتوب عليه تعامل امامه بحذر والا شيل شيلتك وهو موجود بايرلندا
وخلص الممبر شب وكل دبلومات ايرلندا مافي دبلومه اعلن عنها الا نالها واصبح ماشاء الله وجيها وابو وليدات له التحيه وياريت نشوفوا
معانا هنا فله ذكريات لازالت محفوره في كلية الطب وامره احوله لكوباني ............
وعندما تقرب الامتحانات ... لا تجد مكان لك في انيس الا بالحجز تخت كتاب او تكون مجكس ..فتحفظ لك مكان معها لحدي ماتمشي الداخليه
وتجيب معاك السندوتش لرفيقة الدرب والكفاح المشترك وهناك اخوانا الذين يجيبو السلاسل ويربطو بيها الكرسي ويقفلوه بالطبله.
تقسيمه اخري سلم انيس انيس دي ياشباب قاعه في كلية الطب تقع تحت سطح البحر....وقد غرقت ايام السيول والفيضانات وغرق معها مكاتب
قسم التشريح وال دي ار"قاعة التشريح" وكانت الخلطه الشهيره بين الكتب وال كديفرات والماء والفورملين واغلقت القاعه لاكثر من شهر
واستغرق شفط الماء منها عدة ايام....اها نرجع للسلم البنزلك لانيس قبل ان تبدا النزول بتكون في خلطه انيسيه لزوم البريك وديل
بيكونوا جالسين في شباك احد مكاتب التشريح وذاك المكان ماركه مسجله لخلطه نموذجيه بداءت في ذاك الشباك في التمانينات وللان وربنا
يديم عليهم الصحه والعافيه والسعاده والحمدلله الان اولادهم بيقروا طب في الخرطوم واولادهم دخلو طب كمان وكانت انموذجا يحتذي به..
يالها من ايام ....
استراحه ونرجع
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
.نواصل التقسيمات
وانت نازل السلم وكان نسميه المطبخ فقد كان يتم فيه طبخ بروجكت قسم طب المجتمع لناس خامسه او كما يحلو للجميع ان يسميه
الكمونيه وارتبط ذاك المكان بمروان بخاري الذي كان عقله يسبق عمره كثيرا...تخريمه اخري مع ذكر اسم مروان بخاري نحيل الجسم خفيفه.
كان في الكليه برنامج تبادل طلابي مع جامعات العالم المختلفه ويطلق عليه اسم الكس جينجexchange وكان يتم الاختيار بواسطة رابطة
الطلاب وفيها يسافر المحظوظين الي الدوله التي اختير لهاحسب القرعه وهو برنامج سنوي وكانت هناك ثلاث فرص تتم عن طريق المنافسه لاحسن
ثلاث مواضيع تختار لمجلة الحكيم ..اتذكرونها..
والاكس جينج فوائده كثيرة منها التعرف علي بلد اخر والاحتكاك مع طلابه يعني لغة وعلم وفسحه..وتقوم الرابطه بدعم الطلاب المسافرين
واذكر ان للرابطه حساب في بنك باركليز والا ماكده ياود المبارك بجيك راجع......
المهم قربت الامتحانات والزنقه حصلت وكنا في رابعه وامتحان علم الامراض قد قرب فدعانا اخونا مروان لمنزلهم العامر في البيوت
الرئاسيه زمان واذكر كان معنااسامه الامين وخالد زكي و معتصم باسطه وكان عضو في الرابطه وهو من اولاد مدني السكه حديدوكان ايضا لاعب
كرة واي حاجه بيمسك فيها بجضما ذي ماقال شموس وكان ايضا معنا بكرى الطويل والقصير وخلف الله وتخوني الذاكرة في تذكر البقيه ..
المهم اثناء ا لمذاكره والنقاش في حل الامتحانت القديمه دخل علينا احد اخوة مروان وتحدث معه بلغه لم يفهمها احد وخرج ودخل اخ له
تاني وتحدث معه بلغه اخري مختلفه من الاولي فسالناه باي لغة تحدثتم فقال الاول تكلم معي باالالماني والتانى بالفرنسي فما كان من
اخونا معتصم محمدحسن الشهير بمعتصم باسطه سمح ما احسن نعمل الاكسجينج exchange عندكم بدل مالاخمننا بالسفر بره..وحينها كان معتصم
السكرتير المالي للرابطه علي ما اذكر وضج الجميع بالضحك
التحيه لهم جميعا
ومشتاقين ليكم وذي ماقال كوباني
شوق العميان للشوف
وونتظر مداخلاتكم ......
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
الأخ العزيز / مجدي الشيخ
أشكرك كثيرا لثقتك ودعوتك لنا بالكتابة في هذا البوست الرائع والجميل ونتمنى أن استطيع أن اخرج من حقيبة الفن وتسغفنى ذاكرتي ببعض الأحداث ولكن معظم الأحداث التي عايشتها كانت ذات إطار سياسي كما تعلم عزيزي مجدي ولكن هنالك حادثة بعينها كانت سببا في معرفتي بك وصداقتي لك .. اذكر وأنا في السنة الثانية أصدرت جريدة ثقافية أسميتها الابرنشاق والابرنشاق هو اعلي مراتب السرور حيث تبدأ مراتب السرور بالجزل ثم الفرح والمرح والارتياح والابتهاج ثم الابرنشاق وكان يخرج هذه الجريدة الحائطية صديقي بابكر ربع المنحدرة وهو من بور تسودان ويشاركني في الكتابة الأخ الرائع الباقر عبدالرحمن وهو الان اخصائى الباطنية بايرلندا والعزيز ابودجانة وهم من أبناء الهلالية .. ولقد كتب ابودجانة موضوعا أثار ضجة في ذلك الوقت باسم ( العلاقة بين الجنسين ) وقال فيه انه ليس هنالك علاقة صداقة بين الرجل والمرآة ولا يستطيع اى رجل مهما كانت درجة صداقته للمرآة أن يقاوم سحر جمالها وعطرها وفتنتها فتنحرف العلاقة بينهما .. فتصدت لابودجانة احد الزميلات وأظنها الأخت شادية ودافعت عن هذه العلاقة وعن الصداقة بين الجنسين ... ولكنى وبخلفيتي الإقليمية وعرفانا لصديقي ابودجانة ودفاعا عن صحيفتي هاجمت حديث الأخت شادية شكليا في طريقة كتابتها للموضوع وخطها الغير واضح وكأن حبرها كان من ماء البصل ولم استطيع الوقوف فكريا مع ابودجانة لعدم قناعتي بطرحه لنفاجأ بموضوع كتبه الأخ مجدي الشيخ بعنوان ( اننى وحيد أمه ولكن لي علاقات ممتازة مع الجنس الأخر) على ما اذكر ..وكان يهاجم فيه أراء ابودجانة ويقف مع الأخت شادية فكتبت له موضوعا مدافعا عن ابودجانة بعنوان ( إلى وحيد أمه ).. وهاجمت الأخ مجدي الشيخ ولكن بمنطق ضعيف ولغة قوية واذكر أن أصدقاء مجدي الشيخ أصبحوا ينادونه لفترة بوحيد أمه ..بينما ابودجانة الذي كتب الموضوع انسحب مبكرا وتركني وحيدا أدافع عن رايه الغريب ... موقفي هذا افقدني الكثير من الصديقات واحتجت لكثير من الوقت والجهد لازالة تلك الصورة السيئة التي انطبعت في أذهان الزميلات..
عزيزي مجدي ... لقد سبقتنا فكريا في هذا المجال فلقد عرفناك نقيا نظيفا مدافعا عن حقوق المرآة... ولنا عودة ..
تحياتي إلى الصديق الشاعر الأديب على الكوبانى
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
شكيتك لي الله يا مجدي.. والله مرقت ناس من جحورها...
يا ود محجوب السلام أمان...يا راجل الظاهر عليك زول قوافل تمام..بارا أجمل القوفل وأحلى الناس...وجريجيخ كانت تمثل واقع شظف العيش عند أهلنا الطيبين ورغم ذلك ما فارقفهم لا الكرم لا الابتسام..
يا سلام يا معز ..فعلا تلك كانت قصيدة ...وطلعت معبرة عن تلك الحقبة من الزمان..
يا ود القرشي وينك يا حلو..يعني أقول (ضيعني ساكن عمان) ..واصل التأريخ لتلك الحقبة المضيئة وخلينا نتعلم..
وين طارق عبده يا أخوانا وللا نقول ليهو بالرطانة...
قوري سيفجور أيمايسني ..أوركنا فجورأيمايسني
******
بابور كوسونا..أدا تورنا..
ردن جبلي ..إيقون جبلي..
والله أيون قوداككا هيمكونن كيايي..
تلو فانقوري..تلو موريي..
كورجا سوكيجامي سدولوني ..فوقا سوكيجامي سدولوني
تلك كانت ملحمة حلفا القديمة..وقد حفظناها رطانة ومعنى وكنا نؤديها بالعود مع طارق وسلوم..أين أنتم..
يا مجدي حقو تبدأ مشروع خارطة تبين أين موقع ومكان خريجي كلية الطب جامعة الخرطوم الآن... ليعرف الناس أن تلك الكلية أفادت كل العالم..
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
كيفكم يا اولاد الجميلة ومستحيلة..
ياحليل أيام بنات الحنينة السكرة بذاكرن فى قاعات الجميلة ومستحيلة.
كوبانى يادفعة كيف أيامك..
معز رئيسنا كيفك..
مجدى وعبد العظيم واحمد القرشى وودمحجوب كيفكم..
الظاهر عليكم صغار والواحد عايز حكة راس عشان يتذكركم..
أحمد القرشى إنت جريدتك دى كانت فى كافتيريا الطب (ول) فى راكوبة مهدى على قول ودبادى.
ياكوبانى زى ماكنت ماسك الزمن لمعز كمان كنت ماسك العداد لصالح عبد العزيز واظنو حقق الرقم القياسى فى إدخال الكلمات الإنجليزية فى نص الونسة..
يامجدى البوست دا وصى بكرى يرفعو للدورة الجاية بعد الأرشفة عشان نجيكم برواقة..
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Balla Musa)
|
د/ مجدي
تحيتي واحترامي
يعني البوست ده (حصري) على الأجيال القلتها دي؟
أها (زمان) دي لحد سنة كم يا ترى؟!
بعض الأسماء الذكرتها عاصرناها في الكلية،
ود/ كوباني درسنا الforensic medicine كأجمل ما يكون.
ينفع تجي ناس بعد دفعة مامون أبوسن ؟
سلام لكل الزملاء السابقين الذين مروا من هنا، وأكن لهم كثير الاحترام والتقدير.
متابعين بشغف.
إيمان
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
أخونا مجدى وبقية الأعزاء بالبوست : سلام جاكم ومعليش يا مجدى أكل العيش والجرى خلانا نبعد شوية وشايف البوست جذب كل الأشخاص الرايعين وسلام خاص لأختنا العزيزة إيمان أحمدوالأخ الدكتور بلة وطبعآ حبيبنا كوبانى وبالفعل ياكوبانى قصيتك أثارت فينا ذكريات جميلة وعزيزة ولكن أحسن قصيدة ليك كانت بتاعة : حبيبتى بزغت ...عارفك بتكون هسع ضحكت حتى بانت نواجذك .
المهم يا مجدى نرجع للكيمان ونعرج على كوم السياسة فقد كانت أركان النقاش مشتعلة ومولعة نار فعند دخولنا وجدنامن ناس الأتجاه الأسلامى الجميعابى فصيح اللسان وودفعتنا العزيز حاتم عبدالفاضل{السودان} ومن الجبهة الديقراطية أختنا العزيزة أمال جبرالله {بريطانيا} والصديق المهذب الهادىء صديقنا كمال عباس{إيرلندا} أما أخونا المامون أبوسن فقد كان من خطباء الجبهة الديقراطية ولكنه كان أيضآ يهوى مناكفة أنصار السنة فى أركانهم ففى يوم كان هنالك أحد أعضاء أنصار السنة يتحدث عن تحريم الغناء وإستشهد بأقوال أحد الصحابة ثم أعطى الفرصة للنقاش فرفع مامون أصبعه وإبتدأ حديثه : مع إحترامى الشديد لرأى الصحابى الجليل إلا إننى أختلف معه فى الرأى ففغر صاحب الركن فمه من شدة الدهشة ولم يسعفه لسانه بالرد على مامون . أما ناس مؤتمر الطلاب المستقلين فقد كان من نجومهم الصايم{أمريكا} وفيصل جلال{بريطانيا} وبالطبع أخونا أحمد القرشى{عمان} .
نرجع تانى برواقة إنشاء الله.
عبدالعظيم.
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
ايام وغني من تاليف كوباني وفي انتظار المزيد قال كوباني
يا سلام على معلقة كلية الطب العاطفية التي لا زالت تتوارثها الأجيال..
لو تظلمني وتنسى هواي**برضي بحبك زي my eye
وصولك كيف ومكانك high **تعال أدركني before I dye
***********
عملت كمان لحبك File** واستعملت أنا every style
دمعي يسيل زي موية الNile** وطالب منك just smile
**********
ليه يا قاسي ستة شهور ** since I saw youوامكن more
ماشي وجاي حزينvery poor** بين الwindowوبين الdoor
********
ليه يا ظالم كفاي تعذيب ** من ذكراك I cant sleep
في قلبي جروحي كمانvery deep** وشغلي صبح فيcry and weep
كانت الاغنيه المفضله نرتاح فيها من تعب سفر القوافل.........
الحلقات القادمه سنعرج علي قافلة الابيض وحادثة البانجديد اتذكرها ياكوبانى  :shy:
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
استراحه...من البوستات التي اعجبتني بوست ناسنا للاخ محمد المرتضي حامد وهو نسيبنا في كلية الطب !!
وكانت مني هذه المداخله اعيدها هنا ليكون التماذج بين البوستات ...أصدق الحزن ابتسامة في عيون دامعة....
ناسنا......
نار الحزن سبقته نور الابتسامه.....ناسنا
نسيم الحب سيعزف نغم العاشقين....ناسنا
ناسنا الذكرى سيفونية نعيش الحانها..ناسنا
نساءنا اشعاع سينير نجيمات المساء..ناسنا
نعيم الحب سقانا نسيمه انغام ناسنا...
عبق الذكريات في دواخلنا عميقه لا نكاد نستطيع سبر غورها..
انها سكنت انسجة الاحاسيس الدفينه تشبعت بها وتشبعت بها...
ونمت وترعرعت وكبرت معها وسجلت بداخلها كل لحيظات الفرح والمرح والانبرشاق ومعها اختلطت ادمع المقل الحزينه..
فتماوجت وتدفقت الاحسيس النبيله..
نحسها وتحسنا ويقف يراعناعاجزا من ترجمتها لكلمات بسيطه بالرغم من احساسنا بها...
فيكون احساس العاجز...لا عجز الاحساس....
فتاتي ريشة الالهام تنساب بين انامل الفنان..
فتكون لوحة الحزن الجميل لوحة منقوشة في دواخل الانسان....
ويالها من تركيبة معقده فريده....
الهام شاعر يداعب قلب شاعر مرهف الاحساس فتكون ولادة لاجمل قصيده ..
تدغدغ انامل عازف ولهان فتصبح لحن...
يسري في وجدان فنان يلامس صوته مسامات اسماعنا بنغمات الاحاسيس النبيله.. ..
فيحرك الموج الساكن في انامل رسام فتنساب ريشته....
فتنقش لوحةالابداع التي تتدفق منها الاحاسيس الجميله والفريده..
فيختلف احساسك بها في كل لحيظة تراها فيها...
حتي وان كنت انت الشاعر والمؤلف والملحن والمغني والرسام والمستمع الم اقل ان تركيبة الانسان فريده....
انها تجليات صاغها الخالق فهل من معتبر..... .
اخي ود المرتضي فقد ارجعتنا عشرات السنين ولامست حروفك جملة الفرح النبيل في دواخلنا
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
برقيه عاجله الي اخي وحبيبي ابكر ادم اسماعيل...
ابكر علم في راسه نار...
ابكر ادم اسماعيل نار تقابه في راسها علم...
تضئ الظلام تنير الطريق....
تصنع الثورات..تشعل الشمعات
وتقتل الجهل وان كان رجلا..
اخي ابكر طوع القلم فاطاعه ...
واخذ ينساب في الحنايا..
يفجر الثورات ..
ثورة تلو ثورة ضد الظلم والاستعباد....
ضد الجهل والتجاهل..والتخاذل
انار الطريق لاهلنا..البسطاء
فجر البركان في ارضنا السمراء..
عندما تقرأ له تتمواج الحروف وتتمائل الكلمات وتنساب الجمل في نظم عجيب...
كتاباته ابكت الموتي
واسمعت الاصم..
اين انت اخي لقد اشتقت اليك ..
واشتاقت لك الدنيا بما فيها..
فياايها الفتي الابنوسي....
لقد اشتاقت اعيننا لاشراقات كلماتك
ولبديع همساتك وصرخاتك..
فقد جفت الابار
وانطفاءت الانوار
فهل ترسل الينا غيماتك..
مسبوقة بالبرق ..
والرعد..
لتهطل علينا انغاما من لحن قيثارك..
وتشرق الدنيا فرحا من وحي الهامك..
اخي ابكر اين انت ؟
نحن في انتظارك لتشركنا هذا التوثيق الذى انت ركن من اركانه...
ولك كل التحايا
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
بله محمد موسى.. يا حليل أيامنا..وينك....؟ ليك وحشة وشوق شديد....
والله يا إيمان ..أنا كنت عامل فيها ود صغير...حسع ضيعتيني..!! كتر خيرك على الكلمات الطيبات... وعلى العموم أنا درستكم صغير..وأنا والكاشف أخوي (بله) تخرجنا 85.. بس المعز عجوز وقدامنا..والباقين ديل بعدنا بسنتين وثلاثة...
يا ريت تتواصل كل الأجيال في هذا البوست.. يا ريت يا مجدي..
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: د.علي الكوباني)
|
شكرا دكتور مجدي على الترحيب
د/كوباني
والله يا boss أنا كنت حاسة إنك كنت (صغير وجاهل ) عشان كده كنا بنستمتع بي حصصك، وبرضو مشية المشرحة بتدينا فرصة نتونس مع (عم جادو) ويحكي لينا بعض الحكاوي.
القصة كلها بالنسبة لي كانت مثيرة جدا ومدهشة، ما دراسة وبس.
وعندي حادثة ما أنساها عمري، حصلت لي في شارع المستشفي يوم الصباح وانا راجعة من المشرحة، كان الله هون بجي راجعة واحكيها.
سلامات وشكرا على تواصل الأجيال
إيمان
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Dr. Moiz Bakhiet)
|
يأ ايمان.. عاجبك كده...؟؟ اهو ده المعز وود محجوب العجائز القدامنا كتير..جابو ليهم صورة شافع متنفش وكمان في اللفة...!!
تسلمي يا ايمان وفعلاً تواصل الاجيال مهم..والارث والموروث بداية التطور..نحن في انتظار حادثة طريق المشرحة..
يا معز..يعني الواحد ما يقدر يقول البغلة في الابريق...؟؟ على العموم يا صديقي ..العمر احساس...وانت احساسك راقي وزي عافية المطر... وعارفك بتحب الليل..
يا ود محجوب..ما وريتناانت منو...؟؟ ومع الاسم الحركي بتاع الشيوعيين ده.. وفعلا بارا ما هينة..
يا مجدي في ناس كتار ما مرقوا لي بره..عشان نفاقق ونذكر الأيام الحلوة...
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: د.علي الكوباني)
|
Quote: ود محجوب..ما وريتناانت منو...؟؟ ومع الاسم الحركي بتاع الشيوعيين ده.. وفعلا بارا ما هينة..
يا مجدي في ناس كتار ما مرقوا لي بره..عشان نفاقق ونذكر الأيام الحلوة... |
اصبر شوية ياخ
جريجخ
كانت قافلة بارا
وكانت هناك ثلاثة مجموعات
كل مجموعة تتوجه من الصباح الباكر الى أحد المناطق حول بارا فى يوم علاجى تثقيفى صحى.
وكان نصيبنا فى ذلك اليوم ان نذهب الى جريجخ.
عياداتنا كانت فى مدرسة القرية.
وهى رواكيب من القش.
وبدأنا العمل فى همة ونشاط حتى الساعة الواحدة ظهرا.
ثم أخذ الجوع يشتد علينا ولم يأتى لنا أحد بشىْ
وأخونا كوبانى جاع وبدأ فى الهذيان واطلاق القفشات على جريجخ
وبعين الجائع رأى كل من حوله جائع
الناس
والحيوانات
والكلاب
وحتى النمل
ومن قفشات كوبانى وكانت العيادة مليئة بالنمل
((والله النمل دا من جوعو ما قادر يقرص))
وكلاب جريجخ من الجوع الواحد ما يقدر يهوهو الا يتكل على الحيطة.
ونواصل
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
السلام عليكم ورحمة الله وبركاته
الدكاتره ولادة الهنا وياحليل الجميله ومستحيله وطبعا كانت علاقة كلية القانون بناس الطب علاقه حلوه ومتينه وكنا نتسلل الى كلية الطب لحضور جلسات الاستماع يالها من ايام لكن ماذكرتوا الشاعر الكبير ورئيس الرابطه احمد فرح شادول وقصيدته التى هزت اركان الجامعه وهى قصيدة العذراء ولو تكرم احد الدكاتره ان ينزلها فى هذا البوست لانها بالجد جميله وتحياتى لكم جميعا
تيتا ام الاء
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Balla Musa)
|
Quote: ود محجوب كيف حالك
الزول المادى أصبعو دا عمر عبد القيوم?
|
بله يديك العافية.
غالبا يكون هو.
رابطة طلاب الطب تتبعها عدة جمعيات أذكر منها
1- جمعية التثقيف الصحى والاحصاء الطبى يسيطر عليها غالبا المستقلون وهى اكبر الجمعيات عضوية.
2-جمعية الطفولة والأمومة يتبادلها الحناكيش مع اليساريين.
3- جمعية الثقافة ويسيطر عليها الأخوان.
4 - الموسيقى والمسرح
5- التصوير (نسيت اسمها بالكامل))
...............
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
ود محجوب با رائع... والله الصورة رجعت الحنين..لمن حسيت بنفس جوعة جريجخ الما بتتنسي..
جمعية التصوير والسينما ..وأنا عملت فيها 3 سنوات...نسيت الأفلام الكنا بنجيبها ليكم في البغدادي..
وبعدين جمعية الصحة النفسية... جمعية الموسيقى والمسرح كانت غالبا ما تجمع الديموقراطيين ونحن أصحابهم...
يا سلام لمن كنا بنمشي نغلب ناس الهندسة في حلتهم في الكرة الطائرة... وبعد داك كمان نديهم حبة مشاغلة..كيف..؟؟ ألم تكن حشوة القميص داخل البنطلون حصريا على طلبة الطب...؟؟ دي اعتبرها (وليعة نيران)..يا ترى أين الصديق الرائع لاعب الكرة الطائرة الفنان الباشمهندس مجمر...؟؟
يا ود محجوب وين أفيال أنيس..وماذا فعل الزمن بهم..؟؟
وين أغلب دفعتنا يا بله..؟؟ هل ما زالت السعودية فائزة بنصيب الأسد منهم...؟
يا مجدي..حرك لينا باسطة..
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
نزولا عند رغبة أخينا الدكتور مجدي
Quote: ويااخي كمال لو سمحت ممكن تنزل بوستك معانا...
حتي لو بداية البوست فهي تكفي........
عشان نعمم الفكره ويكون جميل التداخل
ومرحبا بك في دارنا الذي هو داركم العامر |
فها أنا ذا انزل ما كتبته هناك هنا
الحقيقة فكرة بوست منتدى الذكريات بكلية الطب دا أعجتني جدا لاني مولع بالذكريات والأشياء القديمة وذكريات الناس الاجتمعوا في مكان واحد فترة من الزمن وتفرقوا والملفت ان هذا البوست بدا يبحت الأطباء بس الغريبة كل ما تهبش بروفايل واحد منهم تجد مافي اي شي يوريك أنه هو طبيب ولا هو وين؟؟ ولا ايش تخصصه؟؟ إلا القليل خاصة وأن أطباء السودان المساكين مشتتين في شتى أنحاء الدنيا
وقل ذلك في بقية الاخوة الأعضاء
نعم هناك بعض الأخوة لاسباب تخصهم يخفون معلوماتهم وهم معذورون في ذلك لكن اظن أن الغالبية يمكنهم ذلك من غير إشكالات
وأكبر فؤائد هذه الطريقة التعارف
فلو تدخلون واسطة أيها الأخوة للأخوة حتى يعرفونا بأنفسهم يكون أحسن والا كل أصحاب مهنة يعملوا نفس الفكرة لكن الفكرة الأولى أحسن عندي وقد يكون بعض الاخوة عندهم افكار اخرى في الموضوع او يؤيدون أو يعارضون ما سبق
تحياتي للأخ الدكتور مجدي والأخوة الأطباء
وكان ممكن اكتب الكلام دا في نفس البوست هناك لكن قلت افرده لعله ينبه لما أردت
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: كمال عكود)
|
مارس شهر الكوارث
مضي شهر مارس ككل شهر.....
ولكن هل كان مارس في فترة التمانينات وما قبلها كذلك....
لا لم يكن كذلك...كانت له مكانته واحتفاله الخاص به...
كان مارس شهر الامتحانات زمن الجامعه جامعه..كان كل ماشى زي الساعه..
وهذا ما وجدناه هنا في بلاد الضباب وايرلندا...
هنا في هذه الالفيه وجدنا السودان في فترة ماقبل التمانينات من القرن الماضي.......
كل شي مدروس ومخطط زي ماكان عندنا في تلك الحقبه من الزمان...
الترماي تلفونات العمله وساعة البوسته وحركة القطارات التي تظبط
عليها ساعتك واحترام العمل والزمان والمكان والمعلم
قم للمعلم ووفه التبجيلا كاد المعلم ان يكون رسولا
كيف ضاع كل ذلك....اه ثم اهات الي مالا نهاية ان كانت تجدي...
نعود لموضوعنا والعود احمد...
كان كل شئ في الجامعه مجدول وكل شئ منسق..
الجدول الدراسي ثابت وموعد الامتحانات كذلك في كل تلك السنوات..
في مارس تبداء الامتحانات...لذا سمي مارس شهر الكوارث...
في ذلك اليوم يتجمع كل الطلاب من كل الكليات.. في ملابس تنكريه.....
ما كان واحد يستطيع ان يعرف من بجواره من دقة التنكر.....
ناس الكليات الطرفيه طب وطب اسنان وصيدله ...
والشمباته ناس زراعه وبيطره وتربية حيوان..
وناس ام درمان ناس التربيه....
ياتون مبكرين ويكونوا اول الحاضرين....
وما في شئ اسمو مواصلات ...
مواصلات! كان الطالب ليهو قدره...
وكان بيصرف بيرسري...يعني فلوس كل شهر...
كل كليه لها عدد من الباصات...
بصات بصات..نضيفه ووهيطه وما في شماعة...
تتحرك في جدول زمني معروف لا يقدم ولا يؤخر..
من الساعه السادسه ص الي العاشرة والنصف م..
ولو تاخرت دقيقه البص بفوتك....
لكن ما في اي مشكله في بص بعديهو......
والفرق بينتهم علي اسواء تقدير ساعه...
يتجمعون امام قهوة النشاط وامامهم النعش...
يحملون اللافتات كل لافته ذات تعبير ومكنون عميق وساخر...
لامكان للسياسة هنا ولا الكورة ولا الدين.....
كل شئ له وقته ومكانه لايخلطون هذا بذاك وهذي بتلك.....
وتبداء المسيره عفويه وبدون بروفات...
يحملون النعش ويسيرون به في كل طرقات الجامعه...
يمرون على كلية الهندسه والمعمار ثم يتوقفون في الميدان الغربي...
يمرون علي كلية الاداب والقانون والاقتصاد.....
ثم كلية العلوم وبني برلوم ثم المكتبه ومن ثم المين روود..
وفي المين روود Main Road....
يبداء القاء الخطب.....
كل كليه لها شيخها الذي يمثلهاويتحدث باسمها..
وفي الختام وختامه مسك.........
يستمعون للخطبه الشهيره ..
التي يلقيها شيخ البركس....
وهي خطبة عصماء لايجود الزمان بمثلها...
يعدد شيخ البركس كل مساوئ النعش المحمول...
نعش مارس شهر الكوارث....
باسلوب ساخر ..مبكي ومضحك في ان واحد..
وشيخ البركس لا ينتخب ولا يزكي...
انما هو اقدم الطلاب في الجامعه...
هو من جارت عليه الايام وربت كم سنه..
واتوقف هنا لافسح المجال لشيوخنا في ذاك الزمن للمداخله...
وهذا هو ديدن ذلك الزمان...
الم عندو كبير يشوفو ليهو كبير........
واحيل الموضوع لاخونا متوكل ثم ود محجوب وودبله والمعز..
ثم اعرج به علي علي الكوباني... .
والفرصه ايضا متاحه لكل من كان محظوظا وحضر تلك المسيرة...
مسيرة مارس شهر الكوارث بكل طقوسها الجميلة....
هل من عوده هل......
واستغفر الله لي ولكم ونتلاقي ان كان في العمر بقيه........
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
العذراء
د.احمد فرح شادول
***
و بعد أن تعبت من تعدد السفر
و من تعدد الرحيل
و المرور بالبطاح
و القرى و بالحضر
فكم شددت عدة الرحيل للسفر ..
باحثاً منقباً
عن التي
تقي الفؤاد من نوازل القدر ..
متاعي الوفاء
و الوفاء خير رفقة لوحدة السفر ..
مطيتى العيون
علها تطيق رحلة الخطر ..
قائبى مليئةً
بكل نادر من النفيس و الدرر ..
مرافئي القلوب
علني أملّ رحلتي فأنتظر
فكم شددت عدة الرحيل للسفر ..
باحثاً منقباً
عن التى
تقى الفؤاد من نوازل القدر ..
و تهت فى مجاهلٍ
ما خاض في خضمها بشر ..
أحببت ألف مرةٍ و مرةٍ بلا حذر
لم أجد
سوى الخداع .. و الجفاء ..
و الشقاء .. و الكدر ..
لكنني علمت
علمت أن عالم النساء
لا يعرف الوفاء .. لا يعرف الوفاء ..
كأنما الإله
حينما أراد أن يجود
للوجود بالنماء
و حينما أراد خلق أمنا حواء
و بعدها بنات جنسها السواء بالسواء
قد صنَّع الأطراف
من عجينه الخداع و الدهاء
و أكمل التمثال
من عجينه النفاق و الرياء
و بث فيه الروح باستياء
فكانت النساء
..
لذا
أردت أن أعيش واحداً بدنيتى
أذوق حلو طعمها
منعماً و قانعاً بحصتي
عزمت أن أعيش
واحداً بدنيتى
طلقت عالم النساء
ألف طلقةٍ و طلقةٍ و طلقة ..
طلقت عالم النساء
غير نادمٍ .. لقسوتي ..
فذقت طعم دنيتى
مفاخراً .. مفاخراً بوحدتي
و دبّت الحياة في جوانحي
فأكملت سعادتي و بهجتي
و بينما أنا
أغوص في نعيم وحدتي
قابلتها السمراء في طريق عودتي
فحصتها تأمّلاً
فجددت قديم رعشتي
و عندما تقابلت عيوننا
هتفت صائحاً
وجدتها .. وجدتها.. وجدتها أميرتي
هي التي بحثت
في مجاهل الزمان
عن مثيلها لدنيتى
هي التي
أرومها لكي تزيل وحشتي
هى التى .. هى التى .. هى التى .. هى التى
..
و كان أن عرفتها
مشاعلاً تنير ظلمتى
تعارفت قلوبنا
ترابطت نفوسنا
تجددت مسرتى
و كان
أن كتبت في سجل دنيتى
وجدتها رفيقتى
رفيقة الحياة حلوتى
..
أقسمت أن أصونها
و أدمن الرحيل فى عيونها
فهذه نهايتى
علىّ فى الحياة أن أكونها
و هذه أميرتى .. علىّ أن أصونها
أميرها أكون أو سجينها
و كان أن عرفت كلما يجول فى دفينها
عرفت أننى الذى
أزلت وحشة الحياة من سنينها
وأننى الذى
سطعت كوكباً ..
يضئ فى جبينها
و أننى الذى
فتحت قلبها ..
و أننى الوحيد فى سنينها
و أننى .. و أننى و أننى .. و أننى أمينها
..
و مرة قصدتها
محملاً بحبى العنيف فى عرينها
و عندما طرقت بابها
لأنهل الحنان من معينها
أجابنى الصغير عند بابها
بأنها قد بارحت لحينها
و حينها .. فجعت حينها
حينما علمت منه أنه جنينها
و عندها .. ذكرت قولها
بأننى الذى فتحت قلبها
و أننى الوحيد فى سنينها
و أننى .. و أننى و أننى .. و أننى أمينها
و بعدها ..
قفلت راجعاً
لعالم الضياع و الضريح
كتمتها هزيمتى
لعل آخر المطاف ما يريح
أقودها سفينتى
ثقيلةً بغير ريح
أسوقه محطماً
فؤادى الكسيح
و قلتها مواسياً لقلبى الجريح
"يا أيها الجريح
لا تظلم التى حوتك هانئاً لتستريح
لا تظلم التى
حبتك بالحنان فى مجالها الفسيح
فإنها يا أيها الجريح
إنها العذراء في زماننا
و ابنها هو المسيح"
_____________________________
المصدر: عبد الله وداعة الأمين
طلب خاص لدكتور معز
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: Dr. Moiz Bakhiet)
|
الشكر الكتير لك اخي المعز لسرعة الاستجابه لطلب ام الاء
قالت تيتا ام الاء في مداخله سابقه:
......الشاعر الكبير ورئيس الرابطه احمد فرح شادول وقصيدته التى هزت اركان الجامعه
وهى قصيدة العذراء ولو تكرم احد الدكاتره ان ينزلهافي هذا البوست......
الاخت ام الاء لقد جاءت الاستجابه سريعه من البروف معز...
نرجو منك المزيد من التواصل والذكريات....
وانا ما حضرت ود فرح نرجو ان نسمع منك ذكرياتك حول هذه القصيده....
ونرجو ان نسمع منه ايضا مزيدا من الذكريات...........
والي لقاء ان كان في العمر بقيه.........
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
ما شاء الله...
هذه بنتي علا اخر العنقود...
وقد اكملت عامها الاول اليوم.....
كل سنة وانت طيبه ياحبيبه.....
واسال الله ان يحفظك بحفظه ...
وان ينير حياتك بنور القران الكريم...
وان يجملك بالعلم والعفاف والتقي...
وان يجعلك بارة بوالديك.....
اللهم امييييييييييييييييييين...
نسالكم الدعاء لها ولنا............
والي لقاء ان كان في العمر بقية.....
| |
|
|
|
|
|
|
|
|
 Re: منتدي الذكريات بكلية الطب ج الخرطوم زمان (Re: Balla Musa)
|
اهلا بك د.طارق عبده
استشاري الطب الباطني في بريطانيا.....
ومرحبا بك في منتدي ذكريات كلية الطب ج الخرطوم زمان....
سيرته الذاتيه تقول انه انسان سوداني غيور...
من قادة مؤتمر الطلاب المستقلين في ج الخرطوم...
وله مواقف بطوليه شهد لها تاريخ الجامعه وكلية الطب...
كان نائب السكرتير الرياضي دورة عبد الهادي عبدالجبار...
وكان السكرتير الرياضي حينها هشام حمدالله...
وفي دورة كاشان كان السكرتير العام للرابطه...
وين انت يا كاشان .....السعوديه شاغلاك مننا
اخونا طارق عبدو...
له طرائف لاتعد ولا تحصي ...
وشاعر مرموق ....
قصيدته الشهيره احلم بك شاعر اليتيمه....
التي يقول مطلعها...
لو كان في عينيك من صدق....
ذي ما في عينيك من بريق...
ماكنت تهتا......
ولا قلبي كان ضل الطريق....
فلنرحب به عضوا في سودانيزاونلاين....
ولنلتقي به في منتدى الذكريات بكلية الطب زمان...
والشكر موصول للاخ بكري....
وفي انتظار الفرسان القادمون
ويا هلا بيكم في منتدي الذكريات بكلية الطب زمان
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
زمان دى ماعندها تحديد لكن ندخل ونشارك بالرغم من أننا كنا طلاباًعابرين بها مع بداية الثمانينات ومعلمين فيها مع نهاية الثمانينات وحتى منتصف التسعينات ....
التحية للجميع ومتعهم الله بالصحة والعافيه ...
أين أجد زملائى واحبائى ايمان مصطفى وجورجيت ...عبدالرحمن المبارك ...نصرالدين العركى ...على عودة...نجوى الطيب ....
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
شكرا يا مجدي علي الحفاوه.....و حقوا تنكت ليناكاركاتيراتك الشهيره للتوثيق.... زي مانكت تحف قديمه ونا دره و ثمينه.. من عينة بله محمدمموسي.الف مبروك لي علا .... عقبال الف شمعه ..
صديقي العزيز بله, سعيد جدا بهذا اللقاء......يا دفعه كانت لنا ايام.. اخونااحمدالصائم معاكم يي غادي ..في تكساس و عتو موجود في انجلترا..اتخصص Psychiatry, ما عارفه بعالج والا بخلق زبائن!!! . .بحاول ااجببهم....
يا مجدي في الصوره بتاعة باره دي عرفت حسن عبدالجبار لكن الباقيين ما عرفتهم...الرجاء الافاده...
كوباني يا دفعه مشتاقين شديد ....البركه في تلفزيون السودان واالعيد!
يا سلااام بالله لسع حافظ ااغاني الرطانه الاصيله ديك....والله انت اصيل.... والا لسع بتاكل في الصفره!!!??
المعز عمر بخيت سلمات و مبررووك الاميره يارا...ربنا يحفظها...
عبد العظيم عبد الرحمن..وينك ما قلت حتجى راجع برواقه....في انتظارك...
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Tarig Abdu)
|
Quote: شكرا يا مجدي علي الحفاوه.....و حقوا تنكت ليناكاركاتيراتك الشهيره للتوثيق.... زي مانكت تحف قديمه ونا دره و ثمينه.. من عينة بله محمدمموسي.الف مبروك لي علا .... عقبال الف شمعه ..
صديقي العزيز بله, سعيد جدا بهذا اللقاء......يا دفعه كانت لنا ايام.. اخونااحمدالصائم معاكم يي غادي ..في تكساس و عتو موجود في انجلترا..اتخصص Psychiatry, ما عارفه بعالج والا بخلق زبائن!!! . .بحاول ااجببهم....
يا مجدي في الصوره بتاعة باره دي عرفت حسن عبدالجبار لكن الباقيين ما عرفتهم...الرجاء الافاده...
كوباني يا دفعه مشتاقين شديد ....البركه في تلفزيون السودان واالعيد!
يا سلااام بالله لسع حافظ ااغاني الرطانه الاصيله ديك....والله انت اصيل.... والا لسع بتاكل في الصفره!!!??
المعز عمر بخيت سلمات و مبررووك الاميره يارا...ربنا يحفظها...
عبد العظيم عبد الرحمن..وينك ما قلت حتجى راجع برواقه....في انتظارك... |
اخي طارق عبده..
سلامات...
وشكرا للاتصال....
واظهر وبان ...
معليش عارفك مزنوق...
ولكن دقائق قليله تكفي لنوثق تاريخ امه...
لك شكرى.....
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
الاخ طارق عبده...
اين هؤلاء ...
عتو والصائم ...
كاشان في السعوديه وتلفونه لايمكن الوصول اليه...
اين عز العرب..
عدلي في امريكا تحياتنا
اسامه محيي الدين ايضا
وشكرا لاتصالك وان شاء الله الوليدات طيبين
اسامه الامين
سوسن احمد عمر بالسودان
نداء السمراء السعوديه
المذكورين اعلاه كانوا من اعضاء الرابطه في دورات مختلفه
لهم التحيه
والي لقاء ان كان في العمر بقيه
| |
|
|
|
|
|
|
|
|
|
Re: منتدي الذكريات بكلية الطب ج الخرطوم زمان (Re: Magdi Ahmed Elsheikh)
|
سلام....
وسلام يا جنون سلام...
تتذكرون قوافل الكليه .....
في واحد بيقدر يعدها.............
فقراتها........
اشهرها مسابقة اكل الموز ......
شوال موز بيقوم بيهو عتو وكوباني بس
وبعد داك يقوموا يحلو بالغداء والتحليات
مره مشينا رحله الي الفكي هاشم ...
الجماعه كلهم موجودين ومشاركين للطبيه الخيريه....
وصلنا واوكل امر تجهيز الخرفان لمجموعه فيها قدورة الشهير بقدرلي وشموس..
والبرنامج بدء وكان فنان الرحله بكري من بري...
وفي انتظار الغداء....
والجميع راجين اللحمه والكبد....
وتاخر...
وتاخر وا....
ولما مشينا فقدناهم....
لم يتبقي من الخرفان الا القليل....
وقدرلي وشموس متخمين للنهايه...
كوباني بتتذكر الحصل تاني شنو
| |
|
|
|
|
|
|
| |
Magdi Ahmed Elsheikh
Mutwakil Mahmoud
Dr.Saeed Zakarya Saeed
Dr. Moiz Bakhiet
ود محجوب
Ahmed al Qurashi
Balla Musa
إيمان أحمد
ريهان الريح الشاذلي
كمال عكود
sourketti
فيس بوك
تويتر
انستقرام
يوتيوب
بنتيريست