|
|
|
 Re: تـــــمــــــــام الــقـــيامة .... (Re: omer osman)
|
رحلة طويلة بدأت يوم 24-1-1987م لم تكن رحلة في طيات السحب لكن كانت رحلة من الشقاء اللذيذ مابين
ميادين التدريب وقاعات المحاضرات ..... هرب من هرب وصمد من صمد ومات من مات ........
فقدنا في رحلة التدريب الطويلة تلك واحد من انبل واعز ابناء دفعتنا هو المرحوم محمد عبدالحليم
المرحوم محمد عبدالحليم من ابناء كوستي وهو شقيق الراحل رقم صفر والاخ العزيز نادوس ....
ظاهرة الهروب او كما نطلق عليها (قد السلك) انتهت بنهاية ايام الــ 45 يوم الاولي وهي الاكثر مشقة في رحلة السنتين
هذه الــ 45 يوم تسمي مرحلة (إعادة الصياغة) من زول ملكي ساكت الى مشروع عسكري مالي قاشو ........
| |
 
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
الـ 45 يوم الاولي لدفعتنا شهدت احداث غريبة ..... ظني انها لم تحدث في دفعة قبل او بعد
المرحوم الفريق أول فيصل محمد خليل كان هو مدير عام الشرطة وقتها .... المعاينة الاخيرة التى تسبق
الدخول الى الكلية تجري امام المدير العام ومن يجتازونها يصبحون قوام الدفعة الجديدة ......
بدأت المعاينة ....... وقابلت المجموعة الاولي من سعادة الفريق اول فيصل لكن بسبب مامورية عاجلة
سافر سعادة الفريق فيصل الى انجلترا ...... ولم تتوقف المعاينات حيث اكمل المرحوم الفريق اول ابراهيم احمد عبدالكريم المعاينات
ودخلنا الكلية ومنا 188 طالب ...........
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
في تلك الايام كان وزير الداخلية هو الاستاذ سيداحمد الحسين ...... ولم تكن العلاقة بينه وبين
سعادة الفريق فيصل جيدة ..... وكانت هناك الكثير من المناوشات والصراعات بين الرجلين .......
الفريق فيصل توصل الى اعتقاد بان للاستاذ سيداحمد قام بتأثير ما في اختيار الطلبة تم في غيابه بلندن
لذا قرر ان يزور الكلية وطلب احضار كل الدفعة امامه .........
وجدنا الميدان الاحمر (ميدان التدريب العسكري) مليان بقادة الشرطة وضباط وتعلمجية الكلية وبعض الاطباء من مستشفي الشرطة
على كثرة الناس الموجودين كان الصمت المطبق هو سيد الموقف فا الفريق فيصل خليل مشهور بالصرامة والضبط والربط العالي
والجميع يهابه ويعمل له الف حساب ........
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
تم تشكيلنا في مجموعات صغيرة وطلب من كل مجموعة ان تركض باقصي سرعة من الحائط الشمالي للميدان الاحمر
الى حائط اسطبل الخيول وتعود فوراً بنفس السرعة وعند عودتك يستقبلك اطباء مستشفي الشرطة في كشف طبي سريع ...
المسافة لم تكن قريبة ويبلغ طولها ما يعادل طول ميدان كبير لكرة القدم مرتين لكن على الاقل كنا وقتها شباب
بعد اجراء الكشف الطبي طلب منا الوقوف في صف واحد واخذ الفريق او لفيصل يمر علينا واحد واحد وببطء شديد
يتفحصك من الامام والخلف وقد يسألك سؤال ...... واستمر في مروره واستبعد بعض الطلاب بلغ عددهم حوالي 6 أمر بفصلهم من الكلية
كان من بينهم ابن احد قدامي التعلمجية واكثرهم تميزاً استبعده سعادة الفريق لملاحظة في شكل قدمه !! التعلمجي المذكور شعر بأن
كل اماله واحلامه في ان يصبح ابنه ضابط قد تهاوت واسودت الدنيا امامه لكنه لم يستسلم وتقدم بكل شجاعة وبخطواته القوية حتى
وقف امام سعادة الفريق وادي التحية العسكرية بطريقته التى تثير الاعجاب وقال لسعادة الفريق بلغة بسيطة وواضحة وحاسمة :
(داك ولدي مع الجماعة الستة....... ارفدني معاهو اسي) ........
سعادة الفريق لم ينطق غير بكلمة واحدة قائلاً :
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
سلام كبير يا جنابو
متابعين قصصك اللذيذة، عندي كم واحد قريبي ممكن يكون معاك
نسأل الله المغفرة لدفعتكم، خالص تعازينا
اما فيما يخص مسالة اعادة الصياغة ، الولد امبارح ما طلع مريخابي (وش ما عارف اوصفه)
لكن لسه عمره 8 سنوات، فلسه في مجال نلحقو ببرنامج اعادة صياغة
ويبقى من اسياد البلد
تحياتي
| |
|
|
|
|
|
|
|
|
|
Re: تـــــمــــــــام الــقـــيامة .... (Re: أحمد ابن عوف)
|
Quote: سلام كبير يا جنابو
متابعين قصصك اللذيذة، عندي كم واحد قريبي ممكن يكون معاك
|
سلام ياقريبي ......
طبعا نسبة الشوايقة في الدفعة كانت مرتفعة شأن اغلب دفع الشرطة
لو اديتنا الاسماء بنديك النجيضة .....
Quote: اما فيما يخص مسالة اعادة الصياغة ، الولد امبارح ما طلع مريخابي (وش ما عارف اوصفه)
لكن لسه عمره 8 سنوات، فلسه في مجال نلحقو ببرنامج اعادة صياغة
ويبقى من اسياد البلد
|
خليهو على الفطرة ياخ ........
ويمكن ربنا يهديك معاهو ......... 
| |
|
|
|
|
|
|
|
|
|
Re: تـــــمــــــــام الــقـــيامة .... (Re: نادر النور آدم)
|
تحياتى يا جنانبو
لقد فطرنا معكم ( افطار رمضان ) فى الكلية بدعوة من الاخوة : كوكو و حذيفة
وذلك نسبة لقربنا من الكلية ( برى اللاماب ) ولحبى للعسكرية فقد سعدت جدا
بوجودى معهم داخل العنبر قبل الافطار و بتعريفهم لى على الاخوة الموجودين بالعنبر
وعلى ما اذكر ايضا كان هناك الاخ / اسامة محمد مصطفى ( برى اللاماب )
تذكرت ذلك اليوم بالتواريخ التى ذكرتها فى اعلى البوست ولك شكرى
أحمد العمار
| |
|
|
|
|
|
|
|
|
 Re: تـــــمــــــــام الــقـــيامة .... (Re: waleed dawash)
|
| Quote: ما تجي الصباح تقول لينا كنا واقفين وين؟ |
مع الطقش حق اليومين ديل يا وليد .. عادي جدا ممكن يعمل كدا
مش يقوليك واقفينووين ..
ممكن كمان يقوليك يا جماعة الكورة كم .. كم ..؟
يا بوليس ..
ياخ تعال تم لينا الشغل دا .. والله البهبش التعلمجية ديل بيعرف حاجة .. يتعمل ليهو فرش متاع بالطريقة الصاح ..
| |
|
|
|
|
|
|
|
|
|
Re: تـــــمــــــــام الــقـــيامة .... (Re: tmbis)
|
| Quote: ياخ تعال تم لينا الشغل دا .. والله البهبش التعلمجية ديل بيعرف حاجة .. يتعمل ليهو فرش متاع بالطريقة الصاح .. |
حاضر ياعمك ......
كل شيء الا التعلمجية ...... جنود مجهولون يقدمون في صمت ولايعرف قدرهم الا من عاشرهم او كان قريب منهم ......
تعرف ياتمبس الجماعة ديل بقعدوا معانا اكتر من ما بقعدوا في بيوتهم .......
من تمام الصباح لحدي نشاط المساء هم معانا لمن يصلوا بيوتهم بكون الليل دخل وشوية يجوا راجعين الكلية ......
التحية والتقدير والتجلة لكل تعلمجية بلادي ...............
| |
|
|
|
|
|
|
|
|
|
Re: تـــــمــــــــام الــقـــيامة .... (Re: احمد العمار)
|
Quote: تحياتى يا جنانبو
لقد فطرنا معكم ( افطار رمضان ) فى الكلية بدعوة من الاخوة : كوكو و حذيفة
وذلك نسبة لقربنا من الكلية ( برى اللاماب ) ولحبى للعسكرية فقد سعدت جدا
بوجودى معهم داخل العنبر قبل الافطار و بتعريفهم لى على الاخوة الموجودين بالعنبر
وعلى ما اذكر ايضا كان هناك الاخ / اسامة محمد مصطفى ( برى اللاماب )
|
هلا يا ابوحميد .........
حبال الود تظل دائماً موصولة بين طلبة كلية الشرطة وناس البراري .......
سوق 4 ببري كان ملاذناعندما تشتهي نفوسنا طعام غير الطعام المكرر بتاع الكلية .........
اولاد بري وناصر في الدفعة كانوا كتار منهم اسامة احمد المصطفي (اسامة جيش) واسامة دفع الله (اسامة الزقندي)
وخالد بشير وعادل عبدالحميد (عادل حمزة عضو المنبر) ........
حذيفة دفعتي وكان من ابناء الفصيلة الأولي اما كوكو فمن اعز اصدقائي ومن فصيلتي الفصيلة الخامسة لكنه كان يسكن
في عنبر النص (مشترك بين الفصيلة الخامسة والسادسة)
لك ولهم التحية والتقدير ............
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
Quote: كان من بينهم ابن احد قدامي التعلمجية واكثرهم تميزاً استبعده سعادة الفريق لملاحظة في شكل قدمه !! التعلمجي المذكور شعر بأن
كل اماله واحلامه في ان يصبح ابنه ضابط قد تهاوت واسودت الدنيا امامه لكنه لم يستسلم وتقدم بكل شجاعة وبخطواته القوية حتى
وقف امام سعادة الفريق وادي التحية العسكرية بطريقته التى تثير الاعجاب وقال لسعادة الفريق بلغة بسيطة وواضحة وحاسمة :
(داك ولدي مع الجماعة الستة....... ارفدني معاهو اسي) ........
سعادة الفريق لم ينطق غير بكلمة واحدة قائلاً : |
مرت الثواني بطيئة كأنها دهر ...... الصمت المهيب والترقيب هما سيدا الموقف ...
التلمجي والذي كان يقول انه لو منح دبورة مستعد للزحف حتى الحصاحيصا يرتجف من الغضب لمصر دبورة ابنه الذي صار في مهب الريح ...
نعم الكل يعرف عنه الشجاعة والاقدام لكن لم يتصور عاقل ان تصل شجاعته تلك لمواجهة المدير العام واى مدير عام ده فيصل خليل زاتو ..
ونطق سعادة الفريق : ادخل الطابور مع اخوانك (مشيراً بيده الى دفعتنا ابن التلمجي الاشهر في كلية الشرطة)
اعقباها بمد يده الى التلمجي والتقت الكفان في سلام قوي ونظرات صامتة تقول كم احترمك ايها التعلمجي الشجاع وترد عليه نظرات التعلمجي
قائلة لم تخيب ظني سعادة الفريق ...........
لهم الرحمة توفي سعادة الفريق والتعلمجي ونسأل الله ان يغفر لهما ويرحمهما ويسكنهما فسيح جناته .......
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
غادر الخمسة الباقين الكلية .......
وانقطعت اخبارهم فقط واحد منهم اذكر اسمه الأول (ابراهيم) علمت انه غادر السودان للدراسة في الخارج
واظنه اصبح (طبيباً) ...... ضيع مستقبلوا كم يقول التعلمجية
سعادة الفريق فيصل وعندما مر أمامي لدي تفقده للدفعة وهي مصطفة في طابور طويل ...
توقف امامي طويلاً ورمقني بنظرات قوية من فوق لتحت .....
نظرات كانت كافية لتجعلني افكر فيما سافعل في حياتي الجديدة بعد ان يخرجني من الطابور اسوة بالستة الاخرين ....
هل سانجح في اقناعي والدي ووالدتي التى كانت اشد معارضة هل سا انجح في اقناعهم بتحقيق حلمي الاساسي بدراسة الطيران الحربي
مثل خالي الشهيد ؟ البوليس ورفدوني منو وجامعة ما داير خلوني عاوز ابقي طيار حربي
فقت من هذا الحوار المتخيل على صوت الفريق يقول لي بلهجة ونبرة قوية : ياطالب انت عمرك كم ؟
19 سنة ياسعادتك.
يازول انت متأكد ؟ (نعمة من الله حتى اليوم يبدو دائماً ان شكلي اصغر من عمري الحقيقي كثيراً)
ايوه ياسعادتك ......
وقريت لحدي ما امتحنت شهادة والا جيتنا من الثانوي العام ؟
لا ياسعادتك امتحنت شهادة
انت جنسك شنو ؟
شايقي ياسعادتك .....
طبعاً اكيد شايقي من الروضة دايرين تجوا جارين جارين على البوليس ده ....
وانصرف فاتحاً لي ابواب التعلق بمهنة الشرطة مغلقاً احلام الطيران الى حين ....
احلام الطيران ظلت تراودني حتى وانا ضابط في مباحث المطار حصلت على قبول لدراسة الطيران في باكستان
من معهد معترف به ودرس به بعض طياري سودانير لكني وجدت بوابة الرفض القديم لاتزال موصدة امامي فصرفت النظر مرة اخري .
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
إنت عارف يا جنابو انا كنت عاوز اكون ضابط جيش....حتى بعد ما اتخرجته من الجامعه قدمته للدفعه الجامعيه في الجيش وكان بدعم من عمي توفيق ابكدوك....اها يا زول عملته كل المعاينات بنجاح و فضل القايد العام و لى الكليه عدل.....اها عندي ود همي الشهيد النقيب هشام قال لي إنت مالك و مال العسكريه .....لو داير قروش ما عندنا لكن لو داير وجاهه تعال لينا...
بيني و بينك خلاني افكر في الموضوع مرتين..
اخيرا غيرته رايي وقررته الهجره لبريطانيا و من ديك وانا حايم في بلاد الله الواسة...
ارقد عافية
| |
|
|
|
|
|
|
|
|
|
Re: تـــــمــــــــام الــقـــيامة .... (Re: Nader Abu Kadouk)
|
عدت سحابة صيف إعادة معاينة المدير العام
وواصلنا نشاطنا المعتاد في التدريب العسكري
الميداني والنظري ومحاضرات القانون ......
كل نشاط في الكلية لابد ان يسبقه تمام هو
(ضبط الحضور) ....... العسكرية تقوم على
فكرة السلسة العسكرية اى التدرج من الوحدة
الاصغر الى الاكبر في كل شيء والتمام يجري
على ذات النهج ......
التقسيمات العسكرية تبدأ ب (النفر) وهو
الشخص الواحد ثم (الجماعة) وهي مجموعة
انفار أقل من (11 نفر) فهولاء يكونون (الصنف)
وثلاثة (اصناف) تكون (الفصيلة) وثلاثة فصائل
تكون (السرية) وثلاثة سرايا تكون (الكتيبة) ........
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
قسمت دفعتنا الى 6 فصائل الثلاثة الاولي منها تكون
السرية الأولي والثلاثة الثانية تكون (السرية الثانية)
لكل فصيلة قائد يسمي الحكمدار وتمر كل اسبوع وظيفة
الحكمدار على كل افراد الفصيلة ثم هناك نبطشي السرية
وهو مسئول عن الثلاثة حكمدارات قادة الفصائل ثم يأتي
النبطشي العام وهو مسئول عن نبطشيي السرايا الاتنين .......
التمام يكون عن طريقة العد وتسمي العملية بــ (نمرة كاملة عد)
نداء يطلقه حكمدار الفصيلة بعد عمل إنتباه لفصيلته .....
وعلى الفور يبداء العد من أول فرد في الصف الأول
على اليمين ..التشكيلات العسكرية في العادة تكون في
شكل ثلاثيات (ثلاثة صفوف) أو سداسيات (ستة صفوف)
في حال الطوابير الكبيرة التى تتحرك في شكل (سرايا)
مثل طوابير التخريج. الفصيلة تشكل من ثلاثة صفوف
بكل صف عشرة بالطبع قد يصدف ان تتكون الفصيلة
من رقم لايقبل القسمة على تلاتة مثلاً 32 فتشكل
كالأتي الصف الأول 11 فرد الصف الثاني 10 افراد
لكن يترك فراغ قبل آخر فرد من جهة الشمال في
الصف الثاني (يعني هناك فرد وهمي في الصف الثاني
يكمله الى 11) الصف الثالث 11 فرد.
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
بعد ان يكتمل العد يرفع حكمدار الفصيلة تمام
فصيلته الى نبطشي السرية وهكذا الى النبطشي
العام الذي يرفعه بدوره الى التعلمجي مساعد
الضابط النبطشي الذي يرفعه الى الضابط النبطشي.
عملية رفع التمام على سهولتها النظرية لكنها دائماً
حافلة بالمشاكل والطرائف ..... ويتعمد بعض الطلبة
إيقاع زملائهم في الخطأ حيث ينطق رقمه بطريقة
تلخبطت جاره اذا لم يكن منتبهاً ويظن انه قال 17 مثلاً
ويقوم هو بالتالي منادياً 18 ويقع في خطأ عادة لايمر
مرور الكرام من قبل التعلمجي او الضابط الذي يراقب
عملية العد.
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
التمامات الاساسية في الكلية هي تمام النشاط
الميداني الصباحي الساعة السادسة صباحاً
وتمام النشاط الاكاديمي (المحاضرات) الساعة
التاسعة صباحاً تمام النشاط الميداني المسائي
الساعة الرابعة مساًء واخيراً التمام الحتمي
أو (تمام الساعة تسعة) الساعة التاسعة مساًء
والاخير هذه سمي (حتمي) لانه غير قابل للتغيير
او الالغاء باى حال من الاحوال فكل النشاطات
الاخري يمكن ان يحدث فيها تعديل او تغيير لاي
سبباً كان إلا التمام الحتمي لايتغير ولا يتبدل فقط
في رمضان يصبح عند العاشرة مساء ومن
مفارقات ونكات العسكرية عااااادي التعلمجي يقول
ليك طبعاً من بكرة رمضان وطبعاً عارفين
تمام الساعة (تسعة) حيكون الساعة (عشرة) فاهمين
فاااااااهمين يافندم تمام الساعة (تسعة) حيكون
الساعة (عشرة) !!!!!
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
طبعاً هناك تمامات اخري هي الاسوء في الكلية
وهي التمامات المفاجئة ليس لديها موعد أو زمن
محدد فعندما تسمع الصفارة فذلك يعني الجمع
لتمام مفاجيء ..... وهي تكثر عادة في الفترات
المسائية والليلية وعااااااااادي ممكن يكون في
الليلة الواحدة اكثر من عشرة تمامات مفاجئة
(طابور قلق) فما ان تضع رأسك في المخدة
الا ويأتيك صوت الصفارة فتنهض مسرعاً الى
ارض التمام لان التاخير محاسب عليه ........
وقد يرتبط (طابور القلق) هذا (بطابور لبس)
وتكون حكاية ما تخلص .....
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
طابور اللبس هو ان تاتي الى التمام كل مرة بزي مختلف
حسب تعليمات الضابط ..... تسمعالصفارة الاولي
فتنطلق الى ارض التمام وبعد إجراءتمام سريع تسمع
التعليمات (طيب نعمل إنصراف والجمع خلال 3 دقائق
اللبس قميص طلبة بنطلونلبسة خمسة الرجلين فردة باتا
وفردة بوت) تلبس وتجي جاري وبعد التمام السريع
(طيب نعمل انصراف والجمع خلال دقيقتين ونص
اللبس لبس الخروج كامل (بدلة البوشيرت) + الشنطة
والعصاية ........ وتستمر العملية لاكثر من ساعة كل
مرة لبس شكل والزمن غير منطقي تماماً فثلاثة دقائق
تكاد بالكاد تكون وصلت دولابك لذلك بكثرة هذه الطوابير
تعلمنا انك ممكن تكون جاري وبتلبس في البنطلون
والقميص والجزمة ..... الخ وكت مافي ...
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
واحدة من طرائف هذه الطوابير في احدي المرات
طلب منا لبس قميص الطلبة وهو قميص ابيض
باكمام قصيرة قماشه من التيل ...... احد الزملاء
جري مسرعاً وتناول القميص من الدولاب واخذه
في يده وجري على ارض التمام وبعد ضمن موقعه
في التمام عاوز يلبس القميص وادخل رأسه في القميص
وعبثاً لم يجد مخرجاً لرأسه في مكان فتحة الرقبة .....
ليكتشف انه احضر (كيس المخدة) ولم يحضر
(قميص الطلبة) .........
| |
|
|
|
|
|
|
|
|
|
Re: تـــــمــــــــام الــقـــيامة .... (Re: الصادق عوض)
|
سلام ياالصادق .... وتقبل تعازينا مرة اخري في فقيد الشرطة والوطن نسأل الله ان يجعل الجنة مثواه ...
| Quote: جنابو عمر ...كيف يكون التعامل مع الضابطات في الكليه ؟ |
دخول البنات كلية الشرطة تقريباً بدأ مع الدفعة (35) أو (37) غير متاكد ...
وهم في العادة لايتجاوزن 3-4 طالبات في الدفعة ...
حتى وقتنا كان الطالبات يحضرون الى الكلية مع التمام الصباحي ويغادرون الى منازلهم بعد إنتهاء نشاط الميدان المسائي
اى لايبيتون معانا في الكلية ....... بالطبع يحرص الضباط والتعلمجية على التعامل مع الطالبات بكل ماتمليه مكارم الاخلاق
وعادات وتقاليد السودان دون اغفال حقهم في الجرعة العسكرية التى تعينهم على اداء مهامهم في الحياة العملية ....
من بعد دفعتنا ومع بدء الدفع الجامعية ارتفع عدد الطالبات الى اكثر من ذلك وتم عمل سكن خاص لهم داخل الكلية حد علمي
مر على الشرطة السودانية ضابطات في غاية الفهم الشرطي الصحيح وابدعوا في مختلف المجالات وانا شخصياً ادين بالفضل الى سيادتو
فتحية عبدالرحمن (محامية الأن) فهي واحدة من الاساتذة الذين علموني أ ب ت العمل الجنائي في اقسام الشرطة وكنت تقود تيم مباحث
القسم الشرقي بصورة يحسدها عليه الرجال ....
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
التدريب وكل شيء في كلية الشرطة كان يقوم على فكرة التدرج والجرعات المحسوبة بدقة..
فمرحلة الـ 45 يوم الأولي مرحلة إعادة الصياغة لها قوانينها واعرافها وهي مرحلة المستجد الكهنة ...
والكهنة هي (قطعة القماش البالية التى لاتصلح الا لمسح الاحذية)
ومن قوانين هذه المرحلة انه يحظر عليك حظراً تاماً ان تسير اة تمشي كما يمشي البشر
فلابد ان تكون في حالة ركض مستمر طوال اليوم حتى وانت تمشي من العنبر الى الحمامات مثلاً
المشي محرم حتى لو كنت تحمل كوب ماء مثلاً في يدك لابد ان تركض ولايهم ان تدفق الماء ام لم يتدفق
من يجتاز هذه الفترة ولم يشرد او يقد السلك كما نقول فلن يفعلها بعد ذلك فالباقي كلو هين
تتغير طريقة المعاملة بعد ذلك الى الاحسن قليلاً جداً نعم انا اجتزت فنرة الــ 45 يوم لكن لايزال المشوار
امامك طويل خصوصاً وانك لاتزال (جونير) قدامك (سينير) لم يتخرجوا بعد وحالة دفعتنا من الحالات النادرة فقد
كان لدينا اتنين سينير هما الدفعتين (54 و 55) وتخرجوا في يوم واحد وزاد الامر غرابة بان كان لدينا اتنين
جونير بعد اصبحنا نحن السينير هما الدفعتين (57 و 58)
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
يستمر التطور التدريجي لك من مستجد كهنة الى طالب شرطة وتكون واحدة من اهم ملامح التطور
في حياتك داخل الكلية هي يوم ان يسمح لك بالخروج يوم الخميس مرتدياً زي الخروج كاملاً
وهو مايعرف باسم (البوشيرت) وهو البدلة المزينة بالكردون والقيطان وعلامات الكولرز
والكاب الضباطي الازرق والعصاية والشنطة السمسونايت ... وبدلة البوشيرت اقل درجة
من بدلة (التيونك) وتلك يرتديها الضباط فقط وهي اللبسة العسكرية مع الكرفتة
البوشيرت هذا ربما يكون السبب الرئيس في دخول العديد منا كلية الشرطة وبعضهم صرح
بها وقال انه لم يدخل الشرطة الا ليرتدي البوشيرت ويقشر بيهو يوم الخميس قدام جكس الحلة
| |
|
|
|
|
|
|
|
|
|
Re: تـــــمــــــــام الــقـــيامة .... (Re: SHIBKA)
|
Quote: بااااااااااااااااااااااااااالغ في دي
هههههههههههههههه |
والله ياشبكة الكلية دي كان بتحصل فيها قصص ومواقف عجيبة بشكل لكن الزمن طال والذاكرة شوية خربت...
عندنا ناس كانوا شفوت خلاس زي في الطابور ده لو دولابو في اخر العنبر مثلاً مابمشي يشيل هدومو بشوف اقرب
دولاب جنب الباب ويختف ليك من الهدوم ويجري ........ طبعا صاحب الدولاب المسكين يجي يتمقلب يلقي هدومو مافي...
صاحبي جداً وولد فصيلتي وعنبري اخونا (فلكس شارلس) من ابناء الزاندي وهو زول تفتيحة خلاس سألتو قلت ليهو يافلكس
انت ليه دائماً بتصل اول زول في طابور اللبس ده ونحنا عنبرنا بعيد نسبياً عن ارض التمام ... قال لي انا بوريك لكن
ما تكلم زول ..... كل شبابيك العنابر مافيها (قرل حديد) لكن فيها (سلك نملي) الزول ده فكه سلك النملي من تحت
وخلاهو مشبك بي مسمار واحد من تحت .... اها لمن الناس يكونوا جارين وبكابسو في باب العنبر هو براحة برفع النملي
ويمرق بالشباك وكده بختصر نص المسافة لي ارض التمام ....
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
وتستمر رحلة التدريب والتدرج (والله ياجماعة مرات كان بجينا احساس كده انو زي الحكاية ح تستمر مدي العمر)
يعني زي الما حنتخرج من هذه الكلية .... الايام زاته الزمان داك التقول كانت بتمشي براحة والا شنو ما عارف ؟
المهم بقينا ننتقل من مرحلة الى اخري ومن اهم المراحل بعد البوشيرت هو انتقالنا الى دروس الاسلحة ففي الفترة
الأولي يكون النشاط الميداني قاصراً على البيادة (الطوابير العسكرية) وتمارين الرياضة وكنا نتحرق شوقاً الى الوصول
الى مرحلة دروس الاسلحة وهي بخلاف احساسك بالاهمية وانت تمسك بالكلاشنكوف مثلاً دروس الاسلحة على خلاف باقي الانشطة الحصة
تتم ونحن جلوس على الارض وكمان مرات فيها دروس اكاديمية عديل كده في قاعة المحاضرات الابرة والانفجار والغاز ... الخ
وتتعلم في تلك الدروس كيفية فك وتركيب السلاح طبنجة كلاشنكوف مدفع استرلينغ مدفع 45 ده كمان فقري خلاص تقيل تقل عجيب
والمهارة والسرعة في الفك والتركيب وعمك سلمى وعمك محمد عبدالرحيم الشهير بقربينة (نوع من البنادق) ...
طبعا من غباء او ذكاء العسكرية ما عارف انو الدرس الأول في حصة السلاح هو :
البندقية تتكون من حديد وخشب (انتهي الدرس)
اى سؤال (هكذا يسألنا التعلمجي)
ياخ انت قلت حاجة عشان نسأل .....
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
التطور التالت الاهم في حياة الكلية هو دخلولنا مرحلة النشاط الاكاديمي يعني بقي في محاضرات
واهمية ذلك لم تنبع من حبنا للقراية بقدر حبنا للحصول على قسط من الراحة او النوم اثناء تلك المحاضرات
خصوصاً اذا كان المحاضر (ملكي) حيث كان يقوم بتدريسنا بعض الاساتذة من جامعة الخرطوم في بعض المواد
اتين فقط من اولئك الاساتذة الملكية كنا نخشي النوم في محاضراتهم اكثر من خشية ذلك في محاضرات الضباط
واحد دكتور في القانون نسيت اسمه لكن مشهور في جامعة الخرطوم وهو يلبس سماعة اذن بصورة مستمرة ... زول
صعب ومن النوع الما بقيف في حتة واحدة تلقوها لافي جوه القاعة لمن المحاضرة تنتهي واذا ضبطك نام فهو لا يتعامل
الا مع اللواء مدير الكلية شخصياً ولك ان تتخيل ما يمكن ان يحدث لك ؟؟؟؟!!!!!!!
الثانية هي الاستاذة (انجيل) قبطية تدرس في جامعة الخرطوم وكانت تدرسنا اللغة الانجليزية واول حاجة عملته لضبطنا هي
تقسيمها للدفعة لمحموعات صغيرة حتى تسهل عليها المراقبة والسيطرة ولاتتردد في الابلاغ عنك اذا وجدتك نائماً ...
وقتها كنت اعشق اللغة الانجليزية واحب محاضرات انجيل ويوم المكتبة وهناك من يكره الاتنين محاضرات انجيل يوم المكتبة
كثيراً ما كنت اعقد صفقات مبادلة مع احد ابناء الدفعة يعني امشي ليهو محاضرة انجيل مقابل كباية تانج باردة يعمله لي
او يعزمني باسطة عند قنبور في شارع المعرض ودي طبعا بتستلزم قد السلك وبعض المخاطر .
| |
|
|
|
|
|
|
|
|
|
Re: تـــــمــــــــام الــقـــيامة .... (Re: omer osman)
|
طبعاً ياجماعة ماتقولوا اصلوا العساكر ديل ناس بلادة ومابحبوا القراية لكن القصة ومافيها
انو النوم سلطان واتخيل انك تكون الليل كلو مساهر جري ونطيط وطابور قلق وادارة داخلية
هل تصدق انو ممكن نكون واقفين ادارة داخلية 4-5 ساعات في البرد بالفنايل الداخلية
وتصحي من الصباح ده اذا نمت ... جري وطابور صباح ده غير انك في النص ممكن تكون غسلت وكويت
لبس بكرة ...... وبعد ده دايرنك تمشي الساعة 9 ص تحضر المحاضرات لحدي الساعة 1 ظ
معقول ما تاخد ليك نومة والا دقسة صغيرة ......
مرة وانا مستغرق في نوم عميق في قاعة المحاضرات صحيت على صوت ضحكات عالية جداً
وانا نايم وين تحت الكنبة بتاعة القاعة .... المهم صحيت اتنفضت قمته قعدته
سألت الزول الجنبي انشاء الله خير مالكم بتضحكوا في شنو ؟
قال لي الليلة اخر حصة في مادة علم الاجتماع والمحاضر بقول في نكات
وطيب وعمك المشلخ شايقي الواقف هناك ده منو ؟
قال لي ياخ ده ما المحاضر زاتو !!!!
| |
|
|
|
|
|
|
| |
omer osman
أحمد ابن عوف
نادر النور آدم
waleed dawash
tmbis
Nader Abu Kadouk
محمد عبد الماجد الصايم
haroon diyab
الصادق عوض
SHIBKA
فيس بوك
تويتر
انستقرام
يوتيوب
بنتيريست