|
|
|
 Re: عقلي انشغل بهواك ...... طارق أبوعبيدة (Re: omer osman)
|
عقلي انشغل بهواك والحكمة عيني
لاجة ومجافية النوم يا أربعيني
هاك بعض حالي البي روقي اسمعيني
شاكي الغرام ما لقيت لي من معيني
لو كان كلام في الطيف مرة اسمعيني
خليني اصلى النار في هواك دعيني
فوق اللي جاري علي لا تجرديني
ثوب الغرام ودوام عنه انشديني
طايع مريد لقساك باهي اليديني
ما اخترت غانية سواك و حق ديني
مهما يلاقي عذاب قلبي السجيني
ومهما يزيد ويفيض همي ويجيني
لو كان يزور الطيف مرة ويجيني
تلبس حظوظي السود ثوب اللجيني
من يوم رماني سنان لحظك سنيني
محق علي نومي ومحق سنيني
اصبحت كل صباح يزداد انيني
كالبلبل المفرود يا مي حنيني
دائما تكيلي غرامك ما بتكيني
فوق لا اطيق من هجر تكلفيني
دائما تزيدي علي دائي الدفين
لمتين تراعي لحالتي وتنصفيني
| |
 
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
Quote: يا سعادتك
امبارح تلفونك اليوم كلو مقفول
اتصلت لاطمئن علي الهلال قبل المباراة
وفي المساء اتلاشت الاحلام
عيدك مبارك |
كل عام وانت بخير ياهندسة ......
لاتيأس ياخليل ..... زي مابقولوا المصريين كنا فين وبقينا فين ....
نحن نتطور لكن ببطء شديد ...
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: omer osman)
|
شكراً يا جنابو يا صفوة...
أغنية جميلة وبأجمل الأصوات..
عيدك مبارك..
Quote: طايع مريد لقساك باهي اليديني
ما اخترت غانية سواك و حق ديني |
أتوقع الصحيح: باهل يديني .. من بهّلَ يبهَلُ.. والله أعلم
ويا طارق: أداءك الجميل دا.. يا ريت لو قلت : يا مَيْ حنيني...(مي اسم مؤنث)
ياما حنيني ما ظابطة معانا..
وكذلك (تكلِّفيني) من التكليف.. كقوله تعالى: (لا يُكَلِّف الله نفساً إلا وسعها)..الآية
الله يجمل أيامك يا طارق زي ما قاعد تجمل أيامنا بركة قبايل العيد السعيد دا ياخي..
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
Quote: بالاضافة لكلام محمود عايز اضيف حاجة
البنت المقصودة في تلك الاغنية اسمها مي
واربعيني يقصد بها حرف الميم رقم 16 في الترتيب والياء رقم 26 في ترتيب الحروف
الف باء تاء ثاء وهكذا
والمجموع 40 |
ومنكم نستفيد ...... شكراً ياهندسة
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
Quote: أنا لو لي مراد ما أسمع الا طارق، الهادي ودالجبل، احمد شاويش،
بالإضافه للعاقب ومحمد جباره..
ياخ فعلاً يجموك في عضامك!.. |
طيب انت مطرطش كيفن يعني!!!!
ما ياهو زي الناس واحسن منهم كمان!!!
بتاع آمن دي ما بقدر انفيها منك ياخ
سامحني.
Quote:
البنت المقصودة في تلك الاغنية اسمها مي
واربعيني يقصد بها حرف الميم رقم 16 في الترتيب والياء رقم 26 في ترتيب الحروف
الف باء تاء ثاء وهكذا
والمجموع 40 |
الله عليك يا هندسة
كلامك سليم وده علم واضح
وناس الحقيبة ديل جضموهو
وكلامم بالارقام دائماً اسامي .
شكراً يافنانين
وعيدكم سعيد
وشكراً يا جنابو ياخ
والشكر الكبير لاخوي
طارق ابو عبيدة .
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
عاين يا خليل يا هندسة..
ترتيب الحروف الذي درج عليه شعراء الحقيبة وبعض شعراء المديح في ثقافتنا السودانية هو غير أ ب ت ث ج....إلخ..
وإنما هو أبجد هوز حطي كلمن صعفس قرشت ثخذ ضظغ...
ويلا قاموا أدوها أرقام بطريقتهم الجميلة .. الإفراد من 1 إلى 9 كالتالي:
أ=1
ب=2
ج=3
ه=4
و=5
ز=6
ح=7
ط=8
ي=9
وبعدين قاموا سموا العشرات بالعقود ورقموها كالتالي:
كلمن سعفص
ك=20
ل=30
م=40
ن=50
س=60
ع=70
ف=80
ص=90
وبعدها المئات (للمية العاشرة هاهاهاهاهاها) من قرشت وإنت طالع كالتالي:
قرشت
ق=100
ر=200
ش=300
ت=400
ثخذ ضظغ
ث=500
خ=600
ذ=700
ض=800
ظ=900
غ=1000
ما يجي زول يقول لي عليك الله أعمل لي حجاب ولا محاية .. دي ثقافة سودانية عامة..
إنت بالذات يا خليل ما تجي تقول لي عليك الله شوف لي الهلال دا بيجيب بطولة خارجية متى..
وهل حا أحضرها ولا بكون لحقت الزينين..أوعك..
طيب..تأسيساً على ما ورد أعلاه ، الميم رقم 40..وخلاص
أما إذا كان عايز الاسم كامل..والثابت إنه مي يعني م + ياء
معناها 40 + 9 تطلع معاك 49 .. بتكون ما جاية معاهو في الشعر..فقام
شنو... اكتفى بالإنيشيال وكدا..
وقع ليك يا خليل يا ستمية إنت؟؟
لووووووووووووووووووول
محبتي الشديدة..
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
دوما يمتعني طارق بالدهشه
شكرا يا عمر للاختيار وانت الرياضي المطبوع
مصطفي بطران من مؤسسي نادي استاك و من بعده نادي الهلال الذي تغني به يا قبلة الروح هلا في سماك هلال
مصطفي بطران من مؤسسي اتحاد الكرة
وقبل ذلك مصطفي بطران الشاعر المجيد الوفي لحبه الاوحد
عزف عن الزواج بعد هجر الحبيب و تفجر حروفا شكلت وجداننا الفني
دمعة الشوق كبي
اترك الاحلام يا جميل و اصحي
في الطيف او في الصحيان زورني
ما بي النية فرقك يا الدرة المكنية
عقلي انشفل بي هواك
زمن الربيع هل
ووطنيا غني مصطفي بطران بعزه وصالك وناله من الانجليز عقابا بالسجن 6 اشهر
كان صديقا شخصيا لسرور و خليل فرح و كرومة
رحمه الله
شكرا مرة اخري للابداع يا طارق
و الف شكر مرة اخري يا عمر
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: ابراهيم عدلان)
|
Quote:
معناها 40 + 9 تطلع معاك 49 .. بتكون ما جاية معاهو في الشعر..فقام
شنو... اكتفى بالإنيشيال وكدا..
وقع ليك يا خليل يا ستمية إنت؟؟
|
ابجد هوز
هذه عبرية يا صديقي وغير ماخوذ بها
وعقلي انشغل بي هواك الاسم الثاني لها هو (مي)
وهناك ايضا اغنية في الحقيبة باسم مي
خمرة هواك يا مي صافية
شوف بالابجدية ممكن تظبط معاك
عيدك سعيد
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
| Quote: شوف بالابجدية ممكن تظبط معاك |
الأبجدية ياها أبجد التي جاء منها الاسم أبجدية يا حلو..
قاصد ديك أ ب ت ث...؟؟ إلا تشوف ليها اسم براك..أبتثية مثلاً..
والله لو في محلك يوسف محمد دا أديهو ليك خمسة فدان حش وشلخ وعزق ولقيط وقليع في حتة ما فيها إرسال زاتو..
غايتو..
يا خوي عبرية بتاعة الساعة كم؟؟ كلامك دا لو سمعوا شيخي ممكن يزعل منك ياخي..
خليك عاقل.. وأنا وإنت ما اختلفنا في (مي) اسم الأغنية أو اسم المحبوبة المقصودة..
لكن اختلفنا في كيفية الحساب المعروفة عند شعراء الحقيبة والمديح عندنا..
أما الحساب بتاعكم إنتو يا هندسة..نحن ما عندنا ليهو طريقة..
إنت ما سمعت بتاعة عمك ود الرضي؟
مية وتمانية وستة وستة .. محبوبي حليلو القام يوم ستة
أترجمها ليك؟
100 + 8 + 6 + 6 = 120
طيب دي يعني شنو؟
حلها براك..شغل مخك ياخي
لوووووووووول
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: Mahmoud Mustafa Mahmoud)
|
طيب اجيب ليك كوت من مكتبة احمد القرشي
الذي ذكر انه اسم المحبوبة مليم وليس مي
وقد ورد اسم مي في اغنية عقلي انشغل بي هواك
اول نجيب الكوت وتاني نسال عوض بابكر
منقول من دكتور احمد القرشي
أغنية عقلي انشغل بهواك قالها بطران في معشوقة شعراء الحقيبة في ذلك الوقت مليم .. ولقد أشار لها الشاعر بالرقم أربعين والذي يقابل حرف الميم في الحروف الأبجدية ..
عقلي انشغل بهواك والحكمه عيني ...لاجه ومجافيه النوم يا اربعينى
ولقد تحدثت عن الحروف الأبجدية والأرقام التي تقابلها في مداخلات سابقة في هذا البوست ... ومليم انشد فيها ود الرضي أغنية تلفان من الأجفان وذكر اسمها .( ميمين يا لام .. الخاتيه ملام ).. وكذلك قال فيها أغنية مائة وثمانية وستة وستة .. وهى 120 وهى مجموع حروف مليم حيث الميم 40 واللام 30 والياء 10 والميم 40 .. وأشهر أغنية لمليم هي أغنية من الاسكلا وحلا لود الرضي نفسه ولها قصة ذكرتها في وقت سابق...
نواصل
| |
|
|
|
|
|
|
|
|
|
Re: عقلي انشغل بهواك ...... طارق أبوعبيدة (Re: khaleel)
|
وطيب مالك يا خلي ياااااااااااخ؟؟؟؟
حالتكم دي ما اتأهلتوا...
يعني لو شلتوا الكاس كان جيت قلت لينا الأغنية أصلاً من كلمات والحان صلاح إدريس؟؟
إنت وكت عارف الكلام دا كلو...بتلاوي فيني مالك من قبيل؟؟
تحياتي للكبير ود القرشي.. لكن هي من ناحية مي فهي مي مية المية وذلك طبعاً
قياساً على ما ورد في متن الأغنية تصريحاً من غير ترميز...
والله العظيم مستمتع بالحديث معاك جداً يا خليل يا هندسة...
وشايف جنابو عمر مستضيفنا على خلفية صوت الجميل طارق أبو عبيدة..
هو العيد أحلى من كدا يكون كيف؟؟
حبابك والله
| |
|
|
|
|
|
|
| |
omer osman
محمد عبدالرحمن محمد
khaleel
Mahmoud Mustafa Mahmoud
سفيان بشير نابرى
ابراهيم عدلان
فيس بوك
تويتر
انستقرام
يوتيوب
بنتيريست