|
|
|
 Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: بشير أحمد)
|
الانقاذ زائلة لا محاله ..ربما بكلفة باهظه ولكنها بلا شك اقل من كلفة بقائها اى الانقاذ واتوقع ان تعانى البلاد ولسنوات من اثار الانقاذ السياسيه والاقتصاديه والاهم من ذلك الاجتماعيه..لا ادرى لماذا تبادر الى ذهنى حين قرات سؤال الاخ حسن تلك الصوره التى رسمها معاويه نور لمدينة امدرمان عشية سقوط الدولة المهديه وهو يصف انسان تلك المدينه بالساهم وهو يترنم بالحان ملئية بالوجد والحزن..
ستخلف الانقاذ بقايا وحطام وطن وسنجد انفسنا امام مهام جسيمة تبدا باعادة بناء القوات المسلحه واعادة تاهيل الخدمات الصحيه ونظام التعليم قبل هذا وذاك محاكمة كل من اجرم فى حق هذا الشعب ويومها سنسمع ضجيجا وصخبا من هتيفة الانقاذ لاجل الحفاظ على ما اكتسبوه من مغنم..ستعج البلاد بالاحزاب والصحف وستظهر احزاب وستختفى اخرى..سيحدث تطور نوعى فى الجريمه ربما انشغلت عنه الدوله بالاعيب السياسه ستنفتح شهية المغامرين من كل انحاء العالم مما يلقى على عاتق اجهزة الامن مهام اضافيه..ستشهد البلاد عودة عدد من ابنائها من ذوى الكفاءات ولعله من الحكمه استيعاب هؤلاء فى حركة اصلاح شامله..ستتصارع القوى السياسيه ولزمان حتى تتفق على حكومة تكنوقراط لادارة البلاد ..سيمثل الجيش احدى معضلات المشهد ولن يكون فى مقدورنا ان نامن جانبه وربما لعدة سنوات قادمه..
| |
 
|
|
|
|
|
|
|
|
Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: د.محمد بابكر)
|
ان شاء الله حيكون في احسن حال بس ربنا يزيل عننا غضبو (الكيزان)
من غير ترتيب
سيندحر الفساد اندحارا نهائيا وقيل لو فكر زول ساي في الفساد يلقى راسو مافي لانو الناس دي و صلت الحد
عدالة للطيش و اول شئ يبدا بيه الشعب الحرامية الكبار كبار و من اين لك هذا ان شاء الله و ظيفة شلتها من غير حقك تتنازل و تدفغ تعويضات و قيل الشعب يرضى عنك وقد لا يرضيى فيشغلك عامل يومية في اي برنامج للمصالحة مع المجتمع
وانت تكون راضي و سعيد ما احسن ليك من تلقي الذي فيه عيناك مافي
و الاقتصاد كله يبقى اقتصاد انتاج و الزاد كان ما كفى ناس البيت يحرم على الجيران لا خرفان لا عربات للفرق اياها والهلال و المريخ و الموردة وفرق الاقاليم و غيرهم يصلوا النهائيات الافريقية و يجيبوا الكاسات و السودان يتاهل لكاس العالم و يمكن يصل دور الثمانية فيه و نايل و الزيو يمكن يصلوا النهائي في برنامج ذا فويز الاصلي ما التقليد و شعبنا يصبح محترم وسط الشعوب و جوازنا نفخر بيه و نقول بالفم المليان انا سوداني و اقتصاد البلد كله يتوجه للسلام و الشعب براه بيحمي بلدو والمستثمرين يجونا بالكوم و دهبنا يبقى بالكوم و قطنا تلبسوا كل الدنيا طويل التيلة و قصيرها و صمغنا فوق وثروتنا الحيوانية نقول نحن هنا و التجارة البينية تشتغل مع دول الجوار و ايرادات الجمارك تزيد و الاتصالات تتحسن و الطرق ما تتبني الا بمواصفات عالمية
و للمغتربين الجمارك معقولة و مقبولة و السلع الفاسدة سيدها يا السجن يا حبل المشنقة فلو استورد لساتك عربات تعبانة و تقرير الشرطة قال انو اللستك التالف هو السبب في الحداث الماتوا فيه ضحايا طوالي سيد الشركة يلحق ضحايا الحادث
التعليم بالكوم و المغتربين و المهجرين يرجعوا و الجريمة تقل تدريجيا.
و مطاراتنا نقول انا انا و الخطوط الجوية السودانية لها افضل اسطول في العالم و خط هيثرو يرجع ان شاء الله نصل الامم المتحدة و نقوم الدنيا و ما نقعدها عشام يرجع
و اطبائنا يرجعو ا و يشتغلوا في كل الاصقاع فتصبح خدماتنا الطبية محل ساحة طبية من كل العالم
و بناتنا يبقوا سمحات سود و سمر و بكل الالوان لا كريمات لا تلفزيون نيل ازرق لا يحزنون و تفتح تلفزونتنا تلقانا بكل اللغات و اللهجات . و السياحة ما تديك الدرب اشي سباق هجن و سباق عربات و سبق حمير كمان المافي شنو. و مهرجاناتنا سينما و مسرح و قران كريم و فنون و اثار ومعارضنا في كل العالم
و منافساتنا الرياضية من المصارعة حقت جبال النوبة الحتبقى عالمية لحدي الجولف
و برنامج مسابقات المدارس يرجع و مدرسة ابيي الثانوية بنين فريقا بتاع الروبوتات يفوز في المنافسات العلمية للدورة المدرسية . و جامعانتنا تنتعش و خدمتنا المدنية ترجع زي الساعة
و سككنا الحديدية تتاهل و برامج الاحلال للخطوط القديم يشتغل و تصل نيالا بالقطر بالخط الجديد في 5 ساعات و حوادث الطرق تقل و تلوث البيئة يقل انو فايلين شنو ما المشاكل دي كلها سببا الفساد بتاع الكيزان شئنا ام ابينا
و اهم حاجة الساعة ترجع ساعة زي ما ربنا خلقا مش زي ما الكوز عايز.
و نصينا من موية النيل يرجع و مشاريعنا المروية في الجزيرة و الرهد تنتعش و جبل مرة تصبح قبلة العالم للسياحة و مطار زالنجي يبقى دولي
و علم السودان القديم بتاع الاستقلا ل يرجع
و العدل ثم العدل ثم العدل
اها دي شذرات عشوائية لكنها الواقع المفروض نسعى ليه كلنا و نحن بنستحقوا لكن انتخرنا في تحقيق الواقع دا لانو سمحنا لكل صاحب نظرية فاشلة يجي يطبقا فينا . تاني ما بنسمع الا صنع في السودان من نظريات سياسية حاجات تتوافق من ظروفنا و تنوعنا و مزاجنا و علاقاتنا مش اسلام سياسي و لا نظريات اشتراكية و غيره كفاية النظرية الوحيدة الممكن نتحملها هي الديمقراطية لانها مننا و فينا و تتناسب مع الفطرة البشرية
وكون تكون في فوضي .... دا يتوقف على تعريفنا للفوضى ...قلو كانت بمعني الزوال التام لكل مظاهر الدولة من كل السودان لو ما انتبهنا ممكن دا يحصل فاعداءنا كتار منهم النظام الحاكم نفسه والمستفيدين منه ومنهم الطامعين فينا من الاعداء. و لو انتظرنا عشان ما تجي فوضى و خلينا الناس ديل فوق راسنا الفوضي حاصلة حاصلة بل مؤكدة و الان اجزاء كبيرة من السودان خارج سلطة الدولة الحالية
و بعدين تعالوا انتو قايلين الحاصل دا ما فوضى و حكم الكيزان ما فوضى.....فوضى اكثر من كدا كيف ...قوموا الي ثورتكم يرحمكم الله
| |
|
|
|
|
|
|
|
|
|
Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: ادم شحوتاي)
|
بسم الله الرحمن الرحيم
حبيبنا عوضاى
غايتو انا بتخليك جاى اجازة وفى مطار بورتسودان
تلقى كمية من العقالات مالية صالة المغادرة ( الرحلات
الداخلية ) وطبعاً انت تصر انك تعرف الحاصل وتسأل اول
واحد يقول ليك انا فهد بن نايف وماشى الخرطوم اطلع خلو
الطرف بتاع الالزامية والتانى يقول ليك اناجابر بن عايض
وماشى اقدم للجامعة .. وووووو
دى بمناسبة البدون
وياريت يكون بعدهم بلا حروب .. وقبلية .. وعنصرية .. وفساد
وطن جميل يسعنا كلنا .. ونقدم ليهو كلنا ... ونتقدم بيهو
لى قدام ..
ارتيقا
| |
|
|
|
|
|
|
|
|
|
Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: Nazik Eltayeb)
|
يا عوضاي بعد السلام
يتم تقسيم السودان كالآتي: جمهورية شمال دار فور. جمهورية شرق دار فور. جمهورية غرب دار فور. جمهورية وسط دار فور.
جمهورية جبال النوبة. جمهورية كردفان. جمهورية غرب كردفان.
جمهورية الجزيرة. جمهورية النيل الأزرق.
جمهورية كسلا. جمهورية النيل.
عشرة جمهوريات وننضم للجامعة العربية ومنظمة الوحدة الأفريقية باسمها الجديد. ونلعب في كاس العالم. وكاس أفريقيا بعشرة فرق.
وطبعاً حيتبع ذلك تقسيم جمهورية جنوب السودان إلى: جمهورية أعالي النيل. جمهورية بحر الغزال. الجمهورية الإستوائية.
وبعد فترة تنفصل جمهورية نهر النيل عن الجمهورية الشمالية وتقومان جمهوريتان.
يتبع ذلك أن تنقسم جمهورية الجزيرة لثلاث جمهوريات هي: جمهورية الجزيرة. جمهورية النيل الأبيض. جمهورية سنار.
ولن تبقى جمهورية كسلا إلا بعد تقسيمها لجمهورية القضارف وجمهورية كسلا وجمهورية البحر الأحمر.
وتكون هنالك حواجز ودشمانات بين تلك الجمهوريات. وتقوم حروبات بينها تهلك الزرع والضرع. ونكون راجين القيامة تحلّنا.
تحياتي
كبـّاشي الصـّـافي
| |
|
|
|
|
|
|
|
|
Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: cantona_1)
|
سؤال صعب يا عوضاي
الا الاصعب منه زوال الانقاذ للاسف.
منو قال الانقاذ ماشه؟!
للاسف بالشايفاهو ده في مشروع كبير لاقتسام السلطه معها.
فيا حسين يا اخوي لا تحلموا بعالما جميل!!
ويا نازك الطيب شكرا علي اشراكنا بهذا الحلم الجميل
لكنه سيظل مجرد حلم….صدقيني…..لا امل للاسف.
لانه انتهازية المركز مصرين علي الشعبطه وسرقة ثورة الشعب.(لاحظي لم اقل اهل المركز بل قلت انتهازية اهل المركز يعني هنالك شرفاء آخرين من المركز)
وتقاعس و عدم نضج قيادات الهامش و انانيتهم و رغبتهم في احتكار السلطه وبطشهم بانصارهم فرغ قضية المهمشين من محتوها.
وبين هذا و ذاك…..الله مع ثوار السودان المخلصين.
| |
|
|
|
|
|
|
|
|
 Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: حسين عوضاى)
|
انا غايتو بتخيل ,,
انا مرة ركبته ركشة جيت احاسب لقيت ,, عبد الرحيم ( اللمبي )
قال لي : لو سمحتي .. الحساب ..
لقيتو ليك مساعد ركشة . ..
عاينت اشوف السواق منو ؟ لقيتو عمر البشير ..
قال لي شوفتيني زمان وانا بقول في الخطاب ؟ هههههههههههههههههههههه اكتر من ثلاتين سنة قاعد اضحك عليكم ,,
انزلي شوفي الرئيس الجاكم ده .. مش انا كنت احسن منو ؟
علي الاقل كنت بهزر معاكم .. وانتو كنتو بتمووتو من الضحك ,,
هسع ديل نزلو قرار قالوا اي بت لازم تتشلخ علي حسب القبيلة ..
مافي ولا بت ما مشلخه
انزلي يا شايقية ,,
كويس انو رجعو ليكم زمن الشلوخ وشلخوكم بالغصب ,,
والما بتتشلخ فيكم ,,
بضبحوها عدييل ,,
بالله مش كان زمني انا واللمبي العبيط ده احسن ؟؟؟
قلت لي عمر البشير ... انا في عرضك ,, اقلبوها مرة تانية وتعالوا للحكم ,, والواطة دي في خشمي لو تاني فتحت خشمي وكتبت فيك قصيدة معادية للنظام ..
انا تبت .. مش انا تبت يا رئيس ؟؟
تبت تاني ما بكتب قصائد .. ههههههههههههههه
قال لي القصيدة دي الكتبتها منو ؟ كتبتها امي ؟ ما برجع تاني .. يا شايقية يا لئيمة ,,
رايكم شنـو نفتـح مسـاحـات للكذب ؟؟!!
ويا امة نقعد نتفق .. يا كلو زول يقعد يطبل للنظام
معقولة بس ؟ نقعد نكذب للزمن ؟ راس مالنا يبقى
الاغتراب ؟؟
لا قادرة اتحمل فراق اهلي الحنان
لا قادرة اتحمل كمان ظلم البشاكير والهوان
بهــواك انا وطني العزيز .. وبقيت غريب الكنته
شايلني وتشابي ,, وكنته ف جواك دوام
لكن غرورك وعزتي كانن بدايات الصراع
and#65275; انت رضيان تعترف بي عزتي ,, and#65275; قلبي راضي
الاحتقار
ده صراع رهيب مابين غرورك وعزتي
وحالتنا صارت جوع ونار
فيها ايه ؟؟ كيزانا ديل لو يرضو يحترمو القرار ؟؟ !!
سودانا عدمان القرش لا مويه لا ضل لا خدار
اوعاك يا بشكير تقول ,, اتحملو ,, دي بس ظروف ..
وبعدين حراميتك كتااار
ما انت بي ظلمك علينا خليتنا نتخذ
القرار
نطلع الشارع نكورك ,, والجوع كمان هاري الصغار
كل ما نجيك باليمين ,, نلقاك في اقصى
اليسار
تذكر أيامنا الزمااااان ؟؟
سودانا كان سلة غلال .. وعلمنا بالعز يعترف وكان منار
خليتو زي دلقان قديم ,, خجلان يرفرف بانكسار
إن شاء الله باكر ننتصر ,, يا بشه تسقط وتتشنق عز النهار
بت علي
قلت ليهو ,, لو عارفاهم بشلوخوني كدي ما كنت كتبتها .. ههههههههههههههههههه
تحياتي واحترامي لكم جميعا ,,
(عدل بواسطة عواطف علي on 04-17-2014, 04:21 PM)
| |
|
|
|
|
|
|
|
|
|
Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: عواطف علي)
|
سلام
عبدالواحد محمد نور (يصف حكومة ما بعد الانقاذ) بانها (الانقاذ 2) .....على وزن جون قرنق (بوصفة حكومة الانتفاضة بمايو 2)
الصادق المهدي يطالب ب (48 مليار ) قيمة ما صادرته الانقاذ من حزب الامة و اسرة المهدي
الحزب الشوعي يطالب بالوحدة مع دولة جنوب السودان ....
حزب البعث يطالب بقانون اجتثاث المؤتمر الوطنى و العزل .....
يعني الخلاصة (كانك يازيد ما غزيت ).............
| |
|
|
|
|
|
|
|
|
|
Re: كدي تعالوا نتخيل سودان ما بعد الانقاذ شكلوا كيييف ؟؟؟ (Re: مدثر صديق)
|
اعزائي عوضاي و زواره الاكارم
لكم جميعا التحية بدون فرز لكل مقاماتكم السامية
الحقيقة هذا هو السؤال المهم (مالذي نريده) وهو سؤال يجب ان نجيب عليه وقد كنت مندهشة ان هذا البوست و البوستات المشابهة لا تثير الاهتمام. و اعتقد ان هذا بسبب اننا اصبحنا امة متشائمة افرادها متشائمون تخاف من التفكير في المستقبل وهذا وضع طبيعي ل 25 عاما من الذل و القهر و الحروب في الجنوب و الغرب. اصبح كل غد اسوأ من اليوم وكل يوم اسوأ من الامس . واستغل النظام الحاكم هذا الخوف من المستقبل فكبره فينا وصنع منه ما صنع حتى اصبح الخوف في السودان الهاً يعبد كلنا خائفون ببساطة.
ما قاله الاخ كباشي الصافي مع احترامي وتقديري له هو ما يحسه كل سوداني لكنه بالتاكيد ليس الاجابة عن سؤال الاخ عوضاي.
والامر عندي بديهي كالاجابة على السؤال التالي: هل النظام الموجود حاليا سئ ام جيد؟
لن يتردد اثنان انه سئ (او هكذا اظن على اساس ان احدهما ربما يكون مستفيدا من النظام في الوقت الحالي و خائف من المستقبل ايضا).
الاجابة: سئ
اذن يجب تغييره .(نقطة) سطر جديد
اما ان نحدث انفسنا ان القادم اسوا فنحن اذن امة لا تستحق الحلم و بالتالي لا تستحق الحياة .
علينا ان نسعي لاحلامنا لانها قد تتحقق فاذا تحققت علينا الدفاع عنها.
حتى ولو بمنطق المغامرة (زول خسران) وامامه خيار ان يسحب الكرت الاخير فقد يكون رابحا و قد يخسر فهل يتردد ؟
نحن ذلك الخاسر على مائدة اللئام و علينا سحب الكرت الاخير كرت الثورة فقد يكون هو الكرت الرابح وان لم يكن لن نخسر شيئا اكثر مما خسرنا سجن سجن غرامة غرامة.
| |
|
|
|
|
|
|
| |
حسين عوضاى
بشير أحمد
د.محمد بابكر
Nazik Eltayeb
ادم شحوتاي
Artiga Gilani
cantona_1
Tragie Mustafa
Elmosley
مدثر صديق
فيس بوك
تويتر
انستقرام
يوتيوب
بنتيريست