|
|
|
 Re: عروس بي اسبيراتها ! هههه (Re: عبدالحفيظ ابوسن)
|
Quote: وبكري تعجبه الطرفة أكثر من الفكرة
فيقول ليك عرس عروس عندها اخوات ,, لو ماتت يعرسو ليك اختها |
ذكرتني نكتتة المسطول يا عبد الحفيظ في عزاء زوجته بعد مشاورات لاحظها من اهل الفقيدة جاه ابو المره وقال له ( انشاء الله نحن اتفقنا نعوضك بأختها ) قاليهم هو انتو نسابة ولا شركة تأمين ؟؟؟؟؟؟؟؟
| |
 
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
واحد قال لزوجتو وهو علي فراش الموت...
عليك الله لما اموت اتزوجي انتي لسع صغيرة وجميله !!!
انهمرت الدموع من عينها وقالت: عشان معزتك عندي بنفذ الوصية.
نظر اليها بكل حنيه ومحبه وسألها يعني حا تتزوجي حسب وصيتي ؟؟ قالت : نعم
وتسكنو هنا في البيت ؟؟ قالت : ايوه
وحا تربو معاكم الاولاد ؟؟؟ قالت: ايوه
وحا تديهو جلاليبي البسها ؟؟ قالت ........... لا
استغرب وسألها ليه يا حبيبتي ؟؟؟
قالت: لانو اطول منك !!!
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
زمان كان الراجل لو مرتو ماتت , بمسك كراع العنقريب حق الجنازة , ويقول ما بتدفن إلا يعوضوهو
يعني يعرسو ليهو اختها بت عمها وهكذا
وغالبا ما ينتهي الموقف بوعد التعويض الذي يتم في ايام المأتم
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
اها مسك العنقريب ده ما بتم ساي كده , الأرمل الحديث بكون خاتي عينو علي واحدة , والحي أبقي من الميت ! ولا شنو ?
يقوم يكنكش في العنقريب وزول يقدر يزحو مافي ,, والوقت داك وقت الانفعالات العاطفية , العقل بكون مؤجز , والمشاعر قدقدها الحزن وبقت رهيفة
يمسك العنقريب ويجوعر ويتمخط
لومكم علي الجنازة دي يا يشرمطوها ولا يعوضو لكن دفن مافي دون العقد
يسو شنو يعقدو ليهو
اها
انتو قايلين العادة دي انتهت ? لا قاعدة وبقت حديثة ومواكبة لي روح العصر
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
ود ابوسن
ذكرتني النكته بتاعت الولية الجات للراجل زعلانه بتأنب فيهو ما بشتري ليها ذهب زي النسوان وبديها قروش تتجدع في السوق
اها قالت ليهو ما شوفتا فلان داك بحب مرتو كيف كان يايمه في الدنيا دي معيشها في نعيم.... الله ارحما بعد ما ماتت عمل ليها مسجد باسمها.
عمكك قال ليها : انتي اتكلي علي الله والطوب جااااااااااااااهز.
صاحبنا عندو اسبيرات مهولة اصلي وصيني وكمان سكند هاند عايزها هي تفرتق.
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
ثقافة العوض دي بتفترض
ان محض إمرأة تصلح لمحض زوج
دون ان يكون الحب عاملا للإرتباط ,
والموضوع ده بمس بشكل مباشر المرأة المعوض بها , يعني مافي زول بسألها من رأيها , والموقف يمور بالعواطف ,, اختها شفعها صغار ومافي مرة احن عليهم من خالتهم , فببقي الرفض محرج ساعتها ,, واكيد الزواج من اهم الاحداث ليها , وتتزوج بهذه الطريقة ! غير انها برضو حزينة وفي نفس الوقت يطالبوها بأخذ مكان اختها
| |
|
|
|
|
|
|
|
|
|
Re: عروس بي اسبيراتها ! هههه (Re: Elsanosi Badr)
|
عبد الحفيظ وضيوفه
تحياتي ,,,
بوست دمه خفيف, منذ مدة قرأت مقالاً ساخراً فى احدى الصحف السودانية (نسيت الكاتب لكني متهم واحد من الأستاذين جعفر عباس و الفاتح جبرا)
" اتوقع ان تأتي عروس فى العام 2000م, لعريسها فى ليلة الدخلة ثم تخلع كل ما هو مركب من رموش وأظفار وشعر مستعار و ... ووو.... فتبقي العروسة على الشاصي"
| |
|
|
|
|
|
|
|
|
|
Re: عروس بي اسبيراتها ! هههه (Re: الفاتح شلبي)
|
مرحبا الفاتح
وحبابك
قالو واحد مغترب علق ليهو في واحدة عليقة شديدة ,,, ولا بقبل كلمة
يقولو ليهو لكن ! وقبل ما الزول يتم كلامو يقاطعو
ياخ داير اعرسها انا ولا انت
وقت غلبو فيهو حيلة
مشو معاهو
اهل البت استغربو , وقالو ليهو
لكن !
دايرها يا جماعة
اها والزول زمنو ضيق ,, ألكع ,, ألكع لقي نفسو معاها في اوضة الفندق
قعد في الكرسي وهو في السرير
بعاين ليها وما مصدق
ملصت الزفاف ,, وزولنا اعصابو باظت
وتقول كدة وهو مخلوع
ملصت الكراع الصناعية ,, وفكت اليد الصناعية ,, وملصت ليك عدسة العين وجدعت الباروكة صلعة بس
قالت ليهو
اها ما تجي !
قال ليها
لا ,,, جدعي لي من عندك
| |
|
|
|
|
|
|
|
|
|
Re: عروس بي اسبيراتها ! هههه (Re: يوسف محمود)
|
مرحبا السنوسي
وحبابك
طبعا في كلام زي دي في بعض سير الصحابة رضوان الله عليهم
لكن ياخ معقول لا يكون في مودة ولا رحمة تخلي الزول وفي لمن قاسمته الحياة ويفكر في العرس يوم وفاتها ولا بعد شهر ولا سنة
لامن ظهرت فتوي مضاجعة الوداع , صحبي محمد ساتي بقطر قال لي
ياخ الواحد لو عندو مرة تانية ما بقدر يصلها خلي يصل الميتة
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
يا دفعه ....
بمناسبة العنقريب ..
واحد مرته ماتت بعد ما كفنوها و شايلين العنقريب قدام البيت في عامود كهرباء واقع قام عتر للناس الشايلين العنقريب
قاموا وقعوا الجنازة، قامت المرأة كحت و صحت اتاريها كان مغمي عليها،،
المهم بعد كم شهر عيت تاني و ماتت،
بعد كفنوها و طالعين بيها عمك جاري قدامهم :
اعملوا حسابكم العمود ما يعتر ليكم،،،،
| |
|
|
|
|
|
|
|
|
|
Re: عروس بي اسبيراتها ! هههه (Re: محمد مجيدو)
|
مرحب العربي
تعرف قول عدالة
لكن !
لكن دي !
يقول ليك ماممكن ولدنا اول مرة يعرس ,, ويعرس عزباء ,
ولو كان اخوهم مقرش وطغيان يتدافسو فيها
إلا قليلا
آي والله إلا قليلا
يقول ليك
بنأنف نعرس مرة اخونا
وشفعو بنربيهم ومرتو بنراشيها
وحدهم شهر بس
ويقولو ليك
اولاد المرحوم طولنا منهم
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
من النفاج
مرحب جلال
ههههههه يعني متضايقين
رحمة الله حبابك
وهيطة تعبير دارجي يعني كبيرة العجيزة ضخمة الكراديس
مختار محمد حبابك
الرجال بنقرضو بدري من هموم الدنيا ويخلو الشاسي بدون مكنة
شاكر متابعتكم
واعتذر رؤية تعليقات الفيس خاضعة لإجراءات يرهق فيها موبايلي , فأحاولها من حين لآخر
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
شفت يا عبد الحفيظ
Quote: يقول ليك ماممكن ولدنا اول مرة يعرس ,, ويعرس عزباء ,
|
طيب انا حاجيك من حتة ثانية !!!
ممكن يجيها واحد متزوج يعني ما اول مرة يعرس ما عندو مانع من الارتباط مع عزباء !! او كمان تجيبوا هي !!
ما خلاص الراجل مات وهي صغيرة وعاوزة تتمتع بشبابها
تعرف اهل زوجها المات حيقولوا ليها شنوا ؟
مامكن يربي اولانا واحد غريب !! وانتي ما خلاص اهو عندك اولاد تاني دايره بالعرس شنوا ؟ وعيييييييييييييييييييييييك
عارف انا الفت نظري شنو الناس الفوق العلقت دي اصلوا ما ختوا فرضية موت العريس ..
لو لاحظت في السودان اذا في بكي في الحي النسوان يقولن ليك المات منو؟؟؟؟
ماحصل سمعت لي واحدة قالت الماتت مني ! ههههههههاي
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
هل تصلح محض إمرأة سودانية لمحض رجل سوداني ?
نعم تصلح
خريج جامعي وغلا محضر دراسات عليا هنا ولا في الخليج ولا امريكا زاتا , يرسل لي اهلو ,, اختارو لي عروس ,, يرسلو الصور ,, ويعقدو ويعرسو ويلدو
ويعيشو في تبات ونبات ويلدو البنين والبنات
آي صحي والله
كده بس
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
بلاش حب بلاش كلام فارغ
وتنظير
ايهما أبقي الحب بعد الزواج أم الحب قبل الزواج
والرد معلب وجاهز ومحفوظ
الحب بعد الزواج أبقي !
كدة بس !
وما ترفسي نعمتك ! العريس نعمة ! كنز ! اقبضي قبل يطير !
و
ألف من تتمناها ! ألف كيف يعني ? كلهن متفقات في ذات شروط الزوج !
لأنو كل ده الحب والتفاهم ما شرط من شروط الزوج
يقدس الحياة الزوجية وبشيل المرة
يشيلها وين ياخ ! واحدات حمار دنقلاوي صبي مايشيلها زي ما قالت النكتة
المرة هناك بي مية جنية الحمار ما يشبلها
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
واحد مرتو ماتت .... وبقى وحيد ... وحالتو بقت صعبه ...
اها ... واحده من ناس الحله قالت لجارتها ما تمشي جنب بيت فلان دا
عشان هو قليل ادب ...
وقبل فتره مشيت جنب بيتو وناداني وحسيت انو قصدو ما شريف
واليوم داك برضو دخلني جوه بيتو وعملي حركات كدا ما كويسه ...
وامبارح تحرش بي ..
والليله بمشي بشوف الحقير دا حيعمل شنووو .....
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
عمي صلاح الطيب جلي رحمه الله كان صديقي رغم فارق السن وعمومته لي ,, عمل عسكريا برفاعة ثم مغتربا عاد بحافلة يلقط بيها رزقو
قال لي
أختا العزبا ,, ليه يا عم ,, المهم الحب
وكان كثير حلفان الطلاق
قال لي
علي بالطلاق لو راجلها ميت ,, وخشت المقابر المدفون فيها تعتر
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
ده كلو تأكيد لكلام اخونا العربي ورد لاخونا السنوسي ,, كون انو في تساوي في العوض
يعني نحن بننظر للمرة العزبا نظرة دنيا ,, وننبذ نقول
امشي يا ود العزبا
والرجل الاعزب عكسو فهو محط آمال النساء كون انو عرس قبل كده وما بقعد بدون مره ,, والراجل مافي شي بعيبو إلا جيبو ,, لو بقدر علي حمالة العروس اليعرس دون النظر لسنه ,, ولا اولاده
يكبل العزبا ويعلي من شأن الاعزب
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
ا واحد مشي يخطب من زول محترم ومعروف وقال ليه انا داير بتك فلانه داك بي أدب قال ليه مخطوبه. قال ليه طيب فلانه قال ليه برضو مخطوبه. زولك عكليته قال ليه طيب فلانه(الصغيره) عمك عاين لي وقال ليه دي دايرنها اسبيرات لي اخواتها
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
واحد عمنا من كوستي الله يرحمو حكي لي
وكان شيخ نوبة وهو رجل فكه
قال لي
مرة جاني شيخ فلان وفلان وعدد لي من اعرفهم من المشايخ الكهول , جوني في البيت , وطلبو بتي لي واحد فيهم كبير وبتي دوبها في الجامعة
قلت ليهم غرضكم مقضي اشربو الشاي , شربو الشاي ,, وقالو لي
جيب العروس نشوفها
قال لي
مشيت قدامهم ورقصت ليهم بي جعباتي وقلبتهن
وقلت ليهم
لو جعباتها اصغر من ديل مرجوعة ,, لمو فيني نبذوني ومرقو
لو قلت ابيت بزعلو وماممكن اديها لواحد قدر جدها
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
واحد مرتو ماتت وحزن عليها شديد. مرت كم سنة وهو رافض فكرة الزواج بأخرى . أهل المرحومة أصروا عليهو ، و قالوا ليهو خلاس كان ما عارفك ليك واحدة تخطبها نحنا بنخطب ليك، قال ليهم ما دام إنتو مصرين أنا داير فلانة، ما عرفوها، وسألوه فلانة دي منو ؟ قال ليهم يا جماعة دي المره الجات شايلة الجردل وكورة الحنوط يوم ماتت المرحومة وقعد يجعر .وعلى قول حبوبتي: "الرجال ما ليهم أمان ولو تكرمشت الجبهة وقام الصوف في الأضان"
تحياتي أخي أبو سن
بيض الله سنك وأدام ابتسامك
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
هههههه
عمك قانص يعني
تعرف قريت قبل كدة في التراث واحد من بني امية مرتو سمحة خلاس ,, أها مرض وقال ليهم لو حصل لي القدر ود عمي فلان ده ما يخش علي ,, عارفو
الزول مات وود عمو جا وخش , وشاف مرة الراجل تبكي وتفتش في حجر دايره تكسر سنونها , رسل ليها مرسال وقال ليها
احفظي عليك سنونك فود عمك فلان عندو فيك نية
عليك امان الله قالو ليك جدعت الحجر التقول جمرة
ضمنت الاسبير ومحسن كمان
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
هههههه
عمك قانص يعني
تعرف قريت قبل كدة في التراث واحد من بني امية مرتو سمحة خلاس ,, أها مرض وقال ليهم لو حصل لي القدر ود عمي فلان ده ما يخش علي ,, عارفو
الزول مات وود عمو جا وخش , وشاف مرة الراجل تبكي وتفتش في حجر دايره تكسر سنونها , رسل ليها مرسال وقال ليها
احفظي عليك سنونك فود عمك فلان عندو فيك نية
عليك امان الله قالو ليك جدعت الحجر التقول جمرة
ضمنت الاسبير ومحسن كمان
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
تعرف يا يوسف هم الحياة اليوماتي ده بجنن , وده البستهلك الكاش ,, غير هم الحياة الاسبوعي والشهري
ف شنو الناس بتعاين لي جنس ده , اهل البت ولا البت زاتها , بقدر يعيشها ? قادر يفتح بيت ? فتح البيت مشكلة ,, تلاجة 5 مليون والتلاجة مهمة , غسالة 2 مليون ,, والغسالة مهمة , تلفزيون بي ريسفير ماشاشة 2 مليون وخلي السراير واللحفات والكراسي والبنبر والدولاب العادي ده 4 مليون , ولو قلت اوضة نوم 12 مليون ,,, ده انت لسه ما خشيت ,,, ولو خشيت عملية الولادة 4 مليون مجاني مافي وووووو
اي الكاش بقلل توتر الاسرة الجديدة , ده غير الهدوم ودي براها كوم
والله تنضرب في راسك لامن تعرف حاجة ,,, واها انبوبه الغاز فاضية بي نص مليون
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
Quote: زمان كان الراجل لو مرتو ماتت , بمسك كراع العنقريب حق الجنازة , ويقول ما بتدفن إلا يعوضوهو
يعني يعرسو ليهو اختها بت عمها وهكذا
وغالبا ما ينتهي الموقف بوعد التعويض الذي يتم في ايام المأتم |
كنت اسمعها كطرفة لكنها حقيقة فى مجتمعاتنا .
ونظرة المجتمع للاولاد واستمرار العشرة داخل العوائل
| |
|
|
|
|
|
|
|
|
|
Re: عروس بي اسبيراتها ! هههه (Re: الزنجي)
|
مرحبا الزنجي
وحبابك
وهي تتواءم مع غطي قدحك , فإذا انا غطيت قدحي ,ف لازمتن يعوضوني ! وتغطية القدح تكاد تكون قديما فرضا علي الشاب , ولا يسمح له بالزواج خارج اطار الاسرة , الاسرة بمعناها الاضيق وليس القبيلة , بل الاولوية للأسرة القريبة , وحدثت مشاجرات قادت للقتل احيانا بين شباب القبيلة , فيعتبر ابن العم ان خطبة احد شباب القبيلة لبنت عمه إستفزازا مباشرا
وبل انهم يفسدون الزواج وإن تم
لذا يشاور ابناء العمومة وابناء الخوؤلة قبل موافقة ولي العروس
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
غطي قدحك ?
ليه يعني قدح ? ليه ما غطي زيرك ? مثلا !
القدح هو الصحن ,, لو حق فخار ولا طلس ولا باشري ولا ميلامين ,, والقدح بختو فيها الملاح والكسرة ,, يعني الإدام والكسرة ,, فثقافة الملاح في صحن ويغمسو فيها دي أظنها زمان مافي , يختو الكسرة ولا العصيدة ولا القراصة ويملحوها ,, الرغيف اب غميس ده مافي
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
فيقولو ليك في المثل
البتضوق الملحات ما بعرس
والملحات هي الإدام
يعني الزول البياكل من محلات كتيرة ما بعرس , وهو للرجل الزاني
او يقول ليك
ده بكسر بالملوة ساي
والملوة اداة كيل للحبوب ونحو ذلك , وزمان مافي طواحين لطحن الدقيق , ياها المحراكة او المرحاكة ,, بطحنو بيها العيش او حسب التعبير بكسرو بيها العيش , فالرجل البكسر بي الملوة بكسر حسب الحوجة يعني , ما بكسر شوال كامل ويختو مؤنة للبيت ,, يعني برضو ما بعرس
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
يعني القصة كلها مربوطة بالأكل ,,
ف الملاح حقك تاكلو براك او بياكلو غيرك ,, عديل ولا باللفة
فيجب عليك المحافظة عليهو بتغطيتهو , غطي قدحك زول ما بياكل ليك طعامك ولا يضوقو
ف شنو يعني ?!
المرأة إداة إطعام ,
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
عرس النت
الحديث عنو حساس شوية بالجد
في تجارب ازواج تمت عبر النت , وهن قسمين
من داخل المدينة ,يعني البت والولد الاتنين من مدينة واحدة , وكان النت فرصة للتعارف ,, أيوة بعرف اختك وبعرف بيتكم وبعرف اهلكم , وساكنين جمب بيت ناس رجل اخت مرة ود خالتي وكده
ويتم السؤال والتقصي من الطرفين وما بيعدمو ود حلال ولا بت حلال تفقع ليهم المغتغت والقاعد في السهلة
وديل بتعارفو في منتديات المدن ولا مجموعات المدن في مواقع التواصل وكدة
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
أها زي دي راقدة هبطرش , النت بكون بداية للتعارف , وسكن البت والولد في مدينة واحد ولو بغيابهما او غياب احداهما فالعقب قاعد , بسأل قول داير اعرف عن بت و لا ولد ونيتك تكون واضحة , سيأتيك بالاخبار من لم تزود
وغلا تطلعوا اهل ولا نسابة كمان , ولا قرية اصولكم قريبة لقرية اصولها ,, و
والله نحن زي الاهل
والمبدي متموم
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
اها
في تعارف بين ناس بلدهم طيرها عجمي
والامكانية الوحيدة للمعرفة هي ذات الانترنت نفسو
والانسان لا يظهر للآخرين بالكلام سوي الجميل من الصفات
اها يبدا الاعجاب من صفحات التواصل او المنتديات الاعم
في الفيس الصداقات بتنشأ بشكل عشوائي غير مرتب , قريت ليهو تعليق في صفحة صديق جاك عن طريق اصدقاء , ولا قروب لامي
يبدأ اللايك , وسك المداخلات للأعجاب بطريقة الكتابة
وتقديم طلبات الصداقة وشكرا لك لإداخلي دائرة ضوءك
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
اها
في تعارف بين ناس بلدهم طيرها عجمي
والامكانية الوحيدة للمعرفة هي ذات الانترنت نفسو
والانسان لا يظهر للآخرين بالكلام سوي الجميل من الصفات
اها يبدا الاعجاب من صفحات التواصل او المنتديات الاعم
في الفيس الصداقات بتنشأ بشكل عشوائي غير مرتب , قريت ليهو تعليق في صفحة صديق جاك عن طريق اصدقاء , ولا قروب لامي
يبدأ اللايك , وسك المداخلات للأعجاب بطريقة الكتابة
وتقديم طلبات الصداقة وشكرا لك لإداخلي دائرة ضوءك
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
أها زي دي فيها بعض الكذبات البريئة , فيعني الزول ما كان متخيل انو العلاقة تصل للحتة ! البهيجة ! دي ,, وكون انو الزول يصادف توأم روحو ! ونصفه الآخر ! الذي اعجزه البحث عنو , وبقيت اعاين في الوجوه امكن البلاقي البشبهك
ده لو ما طلع واحد ضكر عامل انتاية ولا انتاية لابسه عمه
| |
|
|
|
|
|
|
|
|
|
Re: عروس بي اسبيراتها ! هههه (Re: عبدالحفيظ ابوسن)
|
اها
الدقيس في نوعية الجندر راقد رز , هبطرش ,, ليه ? ما تعرف !
مرات بتم بحسن نية وسذاجة او بتم بقصد إخفاء الشخصية او لمآرب أخري
زي ديل نجليهم
ونجي للضكور و الاناتي الراسم عديل
ويحصل كب الحنان في الخاص , وكتر خير الفيس وفر خدمة النضمي ولو كان داير فيها شوف ,, يعني سمع وشوف
الواحد يظبط ويقشر ويستحمي ويتريح ! يتريح لي شنو زاتو ! ويختار مكان الجلوس للخلفية وكدة , فلأنو هو بنتبه للتفاصيل دي فبعمل حسابو , وبكون دقي جدا في تبين التفاصيل
| |
|
|
|
|
|
|
| |
عبدالحفيظ ابوسن
عباس الدسيس
مجاهد محمد الهادي
زهير عثمان حمد
محمد نور عودو
Elsanosi Badr
الفاتح شلبي
محمد مجيدو
معتز عبدالله
إسحاق بله الأمين
د.يوسف محمد طاهر
الزنجي
فيس بوك
تويتر
انستقرام
يوتيوب
بنتيريست