|
دعواتكم لزميلنا المفكر د.الباقر العفيف بالشفاء العاجل
|
|
 Re: جزار صيني توجد صورة (Re: عبدالحفيظ ابوسن)
|
في دولة كما قال وزير المالية
نصدر النبق والدكاترة
فشنو ?
معقولة نستور جزارين صينين
يعني الزول ده جاي من الصين يشتغل جزار تقليدي في السوداني ?
طيب لامن جا خاشي
سبب الزيارة شنو
والوظيفة شنو
معقولة ?
آي معقولة !
| |
 
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
الأخ عبد الحفيظ
سلام..
العبد الله مشى الصين بتأشيرة زيارة واشتغل فى شركـة فى وظيفـة مهندس لعام كامل.. من تسعـة لخمسـة.. الصين الفيها ملايين المهندسين دى.
خلو الناس تترزق ما دام قاعدين بأدب ويحترموا القوانين ويدفعوا الضرائب.. أعرف فى مدينة صنينية واحدة فى اكتر من 10 شركات سودانية ما مسجلة.. وتعمل كيرى ساكت
وهم عارفنهم لكن ما بسألوهم..
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
ياخي عبيد ختم ده تطير عيشتو ...
كل الحاجات حاصله فوقه ؟
______________________
تعرف يا اب سن احكي ليك في عام 2010 زرت القاهرة لزيارة الوالده رحمها الله ...
جلست 19 يوم شفت فيها العجب العجاب ...
مصر فيها 95 مليون مواطن ...
فيهم 50 مليون كده ما لاقين شغل ...
لو عربيتك وقفت في اي اشاره يجوك زي 50 نفر جارين دايرين شغل ...
اي شي تحميل حفر تكسير ...
اها اخوك ماشي جنب منطقه حقة محاجر و رخام ....
والقي ليك واحد خاتي يافطه قدر الليله و امبارح ...
الولد بيحرر في سوقه ...
كاتب في اليافطة : " جميع العماله صينيه " ...
انت عارف يا اب سن ... الحلاق الصيني بيجي في البيت
خمسه جنيه حلاقه و انت في بيتك ... وكان داير كوافيره للناس البيت بالموبايل رطنه رطنتين تجي مرتو طايره بالعد كلها ...
اها لو مشيت لحلاق مصري 20 جنيه ما بتخارجك ؟؟؟
و الكلام ده حيجي السودان و حتشوف ...
الصين فيها كم مليار ... ما لازم ينشروا كده ...
و كمان حيجيك موضوع عرس الصينيات ...
في القاهره الولد وشو صيني و يتكلم مصري و لابس جلابيه !!!
طبعا لانو عرسهم غير مكلف ابداً لا شيله لا غيرو ...
وممكن كمان مع كل عروس يدوك مكيف سبليت وتلاجه هديه ...
| |
|
|
|
|
|
|
|
|
Re: جزار صيني توجد صورة (Re: يحي قباني)
|
مرحبا ابوالريش
وحبابك
ليك وحشة
الثقافة الامريكية
دعه يعمل دعه يمر
دون وازع اخلاقي او انساني او استراتيجي
نحن بلد فقير , مبتلي بفساد الحكام الذين لا يرون في التاريخ الاسلامي إلا أحط عهوده ,, عهود الملك العضوض والقواني وحياة القصور , فلا يحسبون حسابا لبقية الشعب
نعاني من البطالة , لأن رجل الاعمال السوداني يوظف الاجنبي الاقل سعرا وادني كلفة ,
لايمكن ان نستورد من الخارج العمال الاقل مهارة وادني عملا , فهم لن يرفعوا مستوي العمل , وهم من تم وصفهم في الادبيات بالبروتارية الرثة , وهي من اسباب فساد الثورات ايا كانت , فهم انتهازيون وصوليون , غير قادرين علي تملك القيم الثورية الانسانية لطبيعة عملهم وكيفيته
يشترط الآخرون علينا اقسي الشروط لتشغيلنا ,, ونحن نفتح الباب علي مصراعيه في فهم ساذج لمآلات فتحه
فكل جزار وشغالة لن يحمل معه لوطنه سوي عملة صعبة ,, مهما صغرت ولكنها مضروبة في اعدادهم تساوي رقما
هذا بتجاهل الاختلاف في السلوك الاجتماعي
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
مرحب يحي
هههههه
اظن في حديث نبوي
اطلبوا العلم ولو في الصين
انا قلت أظن , ماعندي مروة للمناتلة انو حديث ولا ما حديث ,, حديث آحاد ولا موضوع ولا رأي الجمهور
بس داير استدل منو علي بعد الصين البقت قريبة لدرجة يضبحو خروفنا
ولو كانت للانقاذ سيئة ادخال الصين للسودان لكفتها , في البترول قالوا اسوأ تقنية فهي تهلك الآبار , واسوأ صناعة , مسرطنة , لعب الاطفال الصينية مسرطنة , بطاطير الموبايلات واللابتوبات مسرطنة , الملابس مسرطنة وووو مسرطنة ,, اها نسوانهم زااتم مسرطنات ,, اشمعنا بس هن ما يكونن مسرطنات ,, صاح ممكن الواحدة تلبس نص متر قماش وتكنس وتطبخ والذي منو لكنهن مسرطنات وممكن تختها في كيس وتشيلها في كتفك ,سرطان اكتر من يكترن ويبورن بناتنا
الصين كبلد صناعي كويسه , لكن قالوا تجار الانفتاح الاعمي بمشو ويجيبو اردأ الصناعات
الموبايل ينفجر , الشاحن يسخن ويولع ويمسك في الستاره ويقرض البيت كلو
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
واحد صحبي وبتاع بوتيك , بمشي بلاد بره يبضع حكي لي
مشي يجيب بضاعة من السعودية , اشتري ولقي هدوم صينية عجبتو لكن غالية , قال لي قلت امشي الصين واجيب بضاعتي من هناك واجي غاشي السعودية وارفع بضاعتي كلها , آي والله ! فالصين بلد شقيق أشق من جنوب السودان , وعاملين لينا خاطر كما اشار ابوالريش اعلاه , خاطر عشان البترول والمعادن البلهطو فيها دي
اها قال لي مشيت الصين , وقلت لبتاع المصنع داير زي القمصان ديل شان اقرب المثل , قال ليهو بي 30 دولار , قال لي قلت ليهو دايرو بي 5 دولار ,,واتفقنا ,, اها الجهة وين ,, قلت ليهو السعودية , قال لي دي بضاعة ما بتخش السعودية ,, ليه ? لأنو ناس المواصفات السعودية قاعدين في الصين ,وبعتمدوا البضاعة اول حتي تتصدر
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
شيخ العرب دحين ما عصرت على الصينيين شويـة..
| Quote: لكن قالوا تجار الانفتاح الاعمي بمشو ويجيبو اردأ الصناعات |
وهـذا هو بيت القصيــد.. اللوم على التجار الجشعين وليس على الصينيين.. الصينيين يعرضوا بضاعتهم الكويسة والكعبة فى بلدهم.. ما قاعدين يعبوا الكونتينرات فى بورتسودان.
بعدين برضو أقول خليهم يجوا ويشتغلوا.. أصلهم ما شالوا وظائف سودانيين ولكنهم (فعلوا) سوق العمل بمعنى خلقوا سوق عمل ما كانت فى.. ودا كويس للسودانيين.
دا شعب عنده حضارة 7000 سنـة وثقافة فى غايـة الغنى والخصوبة.
مافى خوف من الصينيين، لأنهم جايين من حتـة بعيـدة وما يشبهونا فى اى شئ.. الخوف من البشبهونا فى اللغـة والثقافة والموقع الجغرافى.. ديل بالراحـة ممكن يشيلوا منك
الارض موش الوظائف.
| |
|
|
|
|
|
|
|
|
|
Re: جزار صيني توجد صورة (Re: Abureesh)
|
مرحبا ابوالريش
انا ما مع الانغلاق الحضاري والتثاقف , الصين دولة عظمي بلا شك , ودولة صناعية ورائدة , لكن تحاصرها قضية السكان والغذاء والارض الصالحة للسكني ,ف ليه مانفيد ونستفيد ,, بدل جزار او سواق ولا بياع زيت نعناع بي طرادة , نجيب عمال مهرة يرفعو مستوي الاجاده عندنا
هم فعلا سحبوا البساط من العمالة الوطنية , العمالة الما عندها غير ضراعها بس ,, العمالة الما متعلمه تعليم عالي والزادت مع توجهات حكومتنا الاقتصادية
للصين بضائع جيدة جدا وتنافس لكنها ما بتجي هنا ,, لأن حكومتنا ولا خصاها , فهي مشغولة بقضايا اهم , تأصيل المجتمع السوداني وإعادة صياغة المواطن السوداني وربط اسباب السماء بالارض لذا علوا مبانيهم !
الصين مهد للحضارات والفلسفات الشرقية ,, واول من خالف اسس الماركسية حين كان بريقها ساطعا وصبروا علي وصفهم بالتحريفين والماوية , فسقطت روسيا وبقيت الصين
الصين دي عندي معاها تار شخصي
كملت قروشي غصب ,, بقا عندي بنود اسبوعيه من رداءة صناعتهم وشهريه
لمبات كهربا وصلات وشنط مدارس واحذيه وبلكات ومواسير وووووو
اوووو
معليش ياخ طشيت طشه بعيده خلاس
كامل الود
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
| Quote: التجار المصريين لافين في حلتنا بكارو حمار ويدينو في النسوان بالشهر |
بس... جنس دا المفروض تعملوا حسابكم منهم.. الصينيين عبر تاريخهم لم يحتلوا بلدا أجنبية.. وحتى انهم لم يحاربوا دولة إلا فى خلاف حدودى مع الهند.. وكان ذلك فى زمن ماو زىتونق
وتتخيل ما قتلوهم فى الحرب مع انهم انتصروا، ولكنهم حاصروهم حتى تم الفصل بين القوات، وذلك إعتمادا على تعاليم بوذا.. تخيل الشيوعية فى اوج صعودها فى الصين لجأت لتعاليم
بوذا فى السلم وعدم العنف.. لذلك وصفهم الروس بالتحريفيين.. يعنى حرفوا القران الماركسى.. وبعد دا يغالطوك لما تقول ليهم الماركسيـة دين. تحريفيين تعنى حرفوا كتابات ماركس، فهل
هناك عقيـدة أكثر إنغلاقا وهوسـا من هـذه؟ ياخ فى عقيـدة المسلمين اكثر المتشددين يؤمن بحق الإجتهاد.
| |
|
|
|
|
|
|
|
|
|
Re: جزار صيني توجد صورة (Re: Abureesh)
|
ابوالريش مش قلت ليك طشيت انا ما تطش معاي ياخ
التحريف بإعتبار القوي صاحبة التغير هم العمال , والصين اعتمدت علي الفلاحين
حتي روسيا زاتها ما كان ماركس خاتيها في الاعتبار بل استبعدها وتوقع بريطانيا ,, ولينين قاد صراع ضد تروتسكي وهسه تروتسكي بقو يستشهدو بيهو
كدي نمرق من الوكره دي
المصرين خطر حقيقي والله
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
تحياتي عبد الحفيظ
ياخي انت متأكد إنو الزول ده صيني؟ ممكن يكون فلبيني أو إندونيسي أو حتى بورمي! وبعدين بفرض إنو صيني، معقول يكون جزار؟ ياخي مين البيأجر ليهو جزار صيني، صيني مسلم ده يعني ولاشنو؟ وكيف يعرف إنو مسلم؟ ومعقول بس يقدر ينافس في مهنة الجزارة دي؟ يمكن يكون طباخ معقولة لكن جزار دي صعبة التصديق!
عموما من واقع تجربتي الشخصية، كل مرة أتعامل فيها مع صيني أزداد احتراما للشعب الصيني، وحقيقة يفرحني أن يكون عندنا صينيين في السودان وأتمنى أن يزداد عددهم فلاشك أننا سنتعلم منهم الكثير. المصيبة في حدودنا المفتوحة لكل من هب ودب والذين ينتهي بهم الأمر لحمل جنسايتنا وجوازنا بطرق غير قانونية ولأهداف إجرامية!
| |
|
|
|
|
|
|
|
|
|
Re: جزار صيني توجد صورة (Re: محمد عثمان الحاج)
|
سلام عبد الحفيظ ...
كيفك وأخبارك ...
ما عارفو كان ياهو ولا ما ياهو لكن عندي ود عمتي ساكن اركويت حكى لي انو جيرانم عندهم مناسبة وجابو عجل .. قال لي بي عضمة لسانو مشو شارع عبيد ختم جابو جزار صيني مسلم .. قال ليهم أقيفوا بعيد ووقع في العجل براو بعد ما قال ليهم جيبو لي تمنية صواني .. أ!! استغربو لكن جابوهم ليهو وقعدوا يعاينو من بعيد !!..
بعد شوية انتهى ناداهم يشيلوا الصواني ...
لمن جو لقوهو طلع من العجل تمنية أفخاذ لحمة و ستة كيلو بيرجر واربعة كيلو لحمة مفرومة وخمسة كيلو سجوك وسبعة كيلو هوت دوق وتلاتة كيلو شيش كباب !!
عاين لي قال لي اتحيرت مش ؟!
قلت ليهو أنا خليني .. العجل زاتو يكون اتحير الحاجات دي طلعت منو كيف ...!!!
غايتو الصينيين ديل اتوقع منهم أي حاجة ..!!!
| |
|
|
|
|
|
|
|
|
 Re: جزار صيني توجد صورة (Re: ناذر محمد الخليفة)
|
Quote: سلام عبد الحفيظ ...
كيفك وأخبارك ...
ما عارفو كان ياهو ولا ما ياهو لكن عندي ود عمتي ساكن اركويت حكى لي انو جيرانم عندهم مناسبة وجابو عجل .. قال لي بي عضمة لسانو مشو شارع عبيد ختم جابو جزار صيني مسلم .. قال ليهم أقيفوا بعيد ووقع في العجل براو بعد ما قال ليهم جيبو لي تمنية صواني .. أ!! استغربو لكن جابوهم ليهو وقعدوا يعاينو من بعيد !!..
بعد شوية انتهى ناداهم يشيلوا الصواني ...
لمن جو لقوهو طلع من العجل تمنية أفخاذ لحمة و ستة كيلو بيرجر واربعة كيلو لحمة مفرومة وخمسة كيلو سجوك وسبعة كيلو هوت دوق وتلاتة كيلو شيش كباب !!
عاين لي قال لي اتحيرت مش ؟!
قلت ليهو أنا خليني .. العجل زاتو يكون اتحير الحاجات دي طلعت منو كيف ...!!!
غايتو الصينيين ديل اتوقع منهم أي حاجة ..!!! |
سلام يا ناذر والاحباب
الصينين بهم قوميات اسلامية
وهنا بماليزيا لديهم بعض المطاعم الصينية الاسلامية الحلال
واصلا اكثر ذبيحهم عجالي , يعني عجل ود عمتك ده جاهو في التخصص :)
استاذ عبدالحفيظ ابوسن
سرحت سرحة تاملية فكرية راقية ..
تحياتي لسكان البوست وقراءه متابعي الجزار واللحوم وتفاصيل الانتاج ..
| |
|
|
|
|
|
|
|
|
|
Re: جزار صيني توجد صورة (Re: أسامة البلال)
|
سلام يا اسامـة البلال، وأعترف انك إنسـان منظم ومرتب..
لو كل الناس يحسنوا الظن و يستفسـروا قبل ما يحكموا لما كنا فى هـذا الوحل الذى عليه المنبـر..
وشكـرا على تنبيهى لهـذه النقطـة المهمـة.. فلا ماركس عنده قران ولا الشيوعيين عندهم قران خاص بهم.. وكان على ان أن أضع كلمة قران بين قوسين حتى
تفهم فى إطارهـا.. وصراع الحضارات أيضا يلقى بظلاله فى الثقافات المحليـة.. ومثلا فإن فى الثقافـة المحلية التى أعيش فيها ردحا من الزمن، فإن كلمة Bible
تعنى الانجيل، ولكنها أيضا تعنى اى موضوع شامل لا يترك صغيرة ولا كبيرة.. فمثلا واحد يكتب كتاب فى شرح برنامج الوندوز من الفين صحفحـة، يعنى
يشرح فيه كل شاردة وواردة بتفصيل ممل.. وتجد إسـم الكتاب Windows Bible
شخصيا لا أويد هـذا الاسلوب، ولكن الواحد يقع فى الخطأ من وقت لاخر ثم يصحح نفسه او يصححه الاخرون.. سأقوم بالتصحيح وأشكرك على التنبيـه.
المقصـود كان ان الماركسيـة ديانة، و(قرءانها) هو كتابات ماركس وأنجلز مثل "رأس المال" لذلك حكموا بالردة على الصين حين تجرأت وإجتهدت فى أمور
معلومـة بالضرورة من الماركسية وفيها نصوص واضحـة!!!
| |
|
|
|
|
|
|
|
|
|
Re: جزار صيني توجد صورة (Re: Abureesh)
|
مرحب محمد عثمان
دفعت الصين في سييل نهوضها الكثير وآخرها ما حدث بالميدان
دولة نهضت من ادمان الافيون وزراعته لتصبح دولة لها شأن ,
وهم شعب عملي ونشط
تعرف لامن كانو كم وتمانين شغالين في احد الكباري , واحد صيني وقع في الخرصانة , ناسنا وقفو الشغل , لكن المهندس الصيني قال ليهم واصلو , يعني وقع في علبة نص البحر , بموت فورا , قالو ليهو نمرقو , قال ليهم لو طلع بمسك مسطرينة ?
آي كلام نحن ما بنعرفو ,, عملين لحد إلغاء الانسانية
ف شنو
الصيني حريص علي وطنو , كمواطن ولا يعابون في انتشارهم للتخفيف علي دولتهم وجلب عملات صعبة , ويفترض اننا برضو نبقي زيهم في حرصنا علي تطوير والمحافظة علي وطننا
احترمهم صحيح ولكن ليس لدرجة ان أكون مستغلا عندهم
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
مرحبا ناذر
تعرف في كوستي كتار عندنا وشغالين وين ماتعرف ,, المهم بتحركوا في جماعات ,, والناس بقو يعاملوهم كزبائن جلود ومقرضينها ,, وهم بشاغلو التجار لو احسو انك داير تدقسهم ويقولو ليك
علي بابا
يعني حرامي
قالوا اشتروا سرير واحد ونادو موسر يوسر ليهم السرير بحبل البلاستيك ,, اتفق معاهم بي 20 ج قالو ليهو بنديك 40 ج , لكن وسر ببطء , اها تاني زول وسر ليهم سرير مافي
نقشو اللعب
شعب بسيط وعملي
ولا يتعالون علي العمل
اها ده بكون الجزار حقي زاتو
هنا الجزار حقنا داير مراقبة عشان مايسرق اللحم ,, ولو قلت ليهو الجلد حقي بقدو ليك , ولو قلت ليهو الجلد حقك بسلخو بي لحمو
ولو ضبح ليك ما بكسر ,, ولو كسر بنجضك بالنقة وكسيرو داير كسير جديد ,, ويخليك انت وعيالك تبطلو شغلتكم وتقعدو تقطعو ,, تدفع قروشك وتت###### وتضيع قروشك الاشتريت بيها زمنك
ويرسل فيك زي الشافع
لا جيب صحن كبير , جيب ملح وليمونة انفخ ليك الفشفاش ,, ياخ من الاول قول داير وداير
اها والحجة في الباسم , لو حقو بطلع معاهو الفقرة كلها , والفقرة بتنفع ام رقيقة
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
مرحب شهاب
وكتر خيرك
تعرف مراحل ضبح الخروف دي , امكن كلنا بنشترك فيها ,, الفرجة
والتنظير بعد الضباح يمشي
سرق اللحمة ,, ما سرقها ياهو خروفك اصلو صغير
قد الجلد
ما كسر كويس
فلخ الكرعين
هرس العضام
ما ظبط اب غازي
والخروف كلو يبقي كمونية وام رقيقة ولحمة صاج
ولحمة الصاج النسوان يغنجن باللحمة السمحة ويدننا العضام ,, ننضم
ده من كسيركم وقطيعكم ونحن ييقنا بي سم منها
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
يا صاحب
طالما ما صيني معناها ما شغال
يمكن يمسك رقبة الخروف ويمرر السكين ويتوقف على كدا ..
لكن اصلا الذبح مش فيه شروط شرعية .. من ضمنها الاسلام ؟؟
لكن برضه ما مشكلة ممكن يسلم ..
يقيف في الشارع بسكاكينه وينتظرفي شارع وسط حي فاخر .. اذا المذبوح لهم هم من أهل السلطة والثروة والقائمين عليها .. القادرين على شراء الخراف وجرها حية الى دورهم .. اذا أهل المس كول غير معنيين بالامر ,,
وفي هذه الحالة الجزار المحلي غير مرغوب به خوفا من الغيرة والحسد ..
| |
|
|
|
|
|
|
|
|
|
Re: جزار صيني توجد صورة (Re: نور الدين عثمان)
|
مرحبا اسامة وابوالريش
آفة التطور التعصب ايا , والتعصب يحول الفكر إلي دوغما
هسة الطب فيهو تعصب ,, تلقي طبيب قديم متمسك بطرق قديمة عفي عليها الزمن
ولا معلم بدرس
ولا اب بربي في اولادو بطرق قديمة
او
او
ولا يرون غير فكرتهم حتي يصل التمسك بها مرحلة القداسة , فكأنها تتحول لي عقيدة دينية
الماركسية اللينينة اداة تحليل وقراءة للواقع , واستنباط الحلول وفقا للقراءة التاريخية ,, او ما تعارف عليه بالفلسفة المادية قصاد الفلسفة المثالية
فتحنيط المقولات والنطق بها يخالف اسسها نفسها , فهي قراءة الواقع والواقع متغير
ناهيك عن كتاب رأس المال واستنباطه لفائض القيمة فهو كتاب اكاديمي اقتصادي ,, والنظر له غير ذلك لا اريد وصفه
المادية التاريخية واصل العائلة من الكتب المفيد قراءتها ,, معها او ضدها
كما ان قوانين المادية الديالكتية قوانين مبهرة بحق
لن نتجاوز قعودنا ما لم نكن موضوعيين , فالعالم يسير نحو الامام ونحن نتجادل في الماضي ,, حتي فكريا فنحن ماضويين
كامل الود
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
درديري يا صاحب
قال ليهو تعال قشرو لينا
الذبح عندو شروط اسلامية , عندو طريقة لو فسدت لصار المذبوح فطيسا , اهلنا بقول ليك ما تحنجروا
والتهليل فما اهل به لغير الله محرم علينا
الضباح ده ماعارفو والله
لكن بيني وبينك البيوت دخلتها الشواطين , سنين الواحد مشتهي ليهو خروف يعلقو في خشم الباب , ونفتش حبل قوي من جوة البيت , وما نلقاهو ونحتار نجيب سلك وندبلو ,, ولا المفراكة والنفخ ,, وتمسك الكراع محل قد النفخ وتهجر الخروف من بطنو شان تسهل نفخك
هسه الصيني ده بعرف المفراكة ولا بقدر يطلع اب غازي?
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
الأساس في الأمر فوضي العمالة الأجنبية , التي وصلت حتي الاطباء
أطباء أجانب يأتون بواسطة سماسرة , دعايات في القنوات التي تعلن بجانب ذلك , المدارس الخاصة وكريمات تفتيح البشرة وقراءة الطالع والادوية العشبية السحرية , في وطن موبؤ بالامراض وهوس العلاج
Let him work ,, let him pass
اهو كلو مدفوع القيمة وغير خالص الضرائب
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
عبدالحفيظ ...
سلام..
الموضوع ما موضوع فوضى العمالة الاجنبية وان كانت موجدودة فعلا..
الموضوع هو انه الصينيين مافى ضباح بيضبح ليهم لو يدوه مال قارون..
تعرف ليه ؟
عشان السودانيين بيرفضوا ذبح الكلاب والحمير وكل الحيوانات البياكلوها الصينيين..
واذكر قصة انا شهود عليها لما الصينيين قالوا للضباح السودانى نديك 150 الف تضبح لينا الحمار وتسلخه..
السودانى قال ليهم لوتدونى مال قارون..
عشان كدا والله اعلم قريبهم فكر فى الفكرة دى...
وقرر انه يغتنى..
من ناحية تانية..
السودانيين المسلمين ما ممكن يجيبوا ضباح صينى..
لانه ما مسلم...
وما حيقول الله اكبر لما يجى يضبح..
| |
|
|
|
|
|
|
|
|
|
Re: جزار صيني توجد صورة (Re: nour tawir)
|
حبابك نور
كيفك يا خية
تعرفي الصورة دي حصرية لي انا , كلمني واحد وكضبتو زي تكضيبك لي ده , ومشي مخصوص ورسلها لي لايف ,, زايد قصة ناذر
تعرفي الكوريين جو كوستي وعملو معسكر بره في الخلا , كملو الجرويات حقات الدوق ( كده كويس يا بكري ابوبكر ) , وبقو الناس يربو ويسمنو ويبيعو
برضو زي ما قلت ليك الضباح ما عارف حكمو , لكن لو كاضم ممكن اي واحد يقول الله اكبر ,, بس هو ما يقول هللويا وبوذيا
كما الحديث إذا ذبحتم فأحسنوا الذبح
فهم بحسنو وبنجضو الضبح
وقت بنجيب اجنبية لغة ودينا وسلوكا تربي رضعنا بنجيب الصيني يضبح
الفي شنو والمافي شنو
كلو في
كامل الود والتقدير
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
عطفا علي مداخلة اختي نور
تعرفي ترزية الجلاليب والسراويل كانو نجوم , عمنا المرحوم كاكوم امهر ترزي بكوستي اقرب مواعيد ليهو 3 شهور , يعني جلابية الضحية تديها ليهو فيهو رمضان ,, والعمود عندو نسوان معينات بعرفن يطوقنو ,, العمود بي سعر والخياطة بي سعر
والجلابية بتتأخد بالمقاس , وفيها محلات لازم تتحكم كويس الاباط والقبة بكسر القاف والكرشليق , يعني ماتكون راجعه ورا من الرقبة ولا مفتولة ولو رفعت يدك ما تقوم معاك الجلابية كولها , يعني دايرة ترزي حريف , لذا كان بعض الناس بخيطو في مدينة وهم ساكنين مدينة , والمغتربين بخيطو بالاجازات الجلاليب
والسروال السوداني ايضا كذلك والعراقي ود الجلابية
والمغتربين كانوا مكرهننا يرسلو ليك المقطع وتعاني تخيطو
المهم
عليك امان الله هسة الجلابية الصينية يجيبوها تقول خيطها امر ترزي سوداني
ف شنو
الناس ديل شطار
بكونو بعرفو يسو امفتفت زاتا
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
تعرف يا أبو سن ومن خلال تجربتي في الغربة وفي السعودية تحديداً ونسبة لوجود العمالة الأجنبية بشكل مكثف
وسيطرتها على سوق العمل تماماً وهذا الوضع أدى بدوره لظهور حالة من العداء المعلن والغير معلن بين المواطن والوافد
ويظهر ذلك بجلاء في المنتديات الإليكترونية حال تناول موضوع يخص العمالة والعمل والغالبية تفترض تغول تلك العمالة على
خيرات البلد ونهبها وتفشي البطالة وسط المواطنين بسببهم . وطبعاً هذ الهجوم الشرس والتجريح يؤثر سلباً على العامل الوافد الذي يجد نفسه
في حالة إتهام دائم حتى وهو نظامي ( ولا يعرف الصبابة إلا من يعانيها)
من وجهة نظري الشخصية الغربة أصعب شئ قد يواجهه الإنسان في حياته لذلك تجدني أتعاطف مع كل شخص تغرب عن وطنه
وهذا الجزار الصيني الله أعلم بحاله ومن المؤكد إنه لم يترك بلده ويقطع كل هذه الفيافي ليأتي إلينا ويعمل في هذه المهنة الهامشية ( إن صح التعبير) إلا للشديد القوي
فرفقاً بالمهاجرون إلينا والذين حالهم كحال المستجير من النار بالرمضاء وبلاد الله واسعة والأرزاق قسمت هكذا . وبطبيعتنا وتربيتنا السودانية
السمحة الترحيب بالضيف وهذا لا يتنافى مع وجوب تقنين وجودهم وحصرهم ومنحهم إقامات بعد أخذ بصماتهم تحسباً لأي طارئ أمني .
ي ( ولا يعرف الصبابة إلا من يعانيها)
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
مشكلتهم الأساسية يا عبدالحفيظ
الرشوة
تصدق ؟؟؟؟
حتى كدت اقتنع إنو مافي صيني ما بشيل رشوة
وأحسن حاجة فيهم إنو ما عندهم عواطف في الشغل
شغل يعني شغل
لو شغال معاهو مية سنة وغلطت في الشغل ما بجاملك
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
في التسعينات رسلو ليكم جكس ببيعن الفيكس
و بعدها بشوية اختفو الجكس و ظهرت ليكم الجلابية السودانية مصنعة في الصين و مثلها اشياء كثر
المرة دي رسلو جزارين و ما معروف بعد ما يختفي يجيكم شنو؟
| |
|
|
|
|
|
|
|
|
|
Re: جزار صيني توجد صورة (Re: Mahjob Abdalla)
|
| Quote: في التسعينات رسلو ليكم جكس ببيعن الفيكس |
الأخ محجوب عبد الله .. بعد السلام
بمناسبة بنات الفيكس والحاجات التوافه التي كُنّ يعرضنها ويعرضوها إليك هذه الحقائق:
1- أرسلوا طلبة لدراسة الزراعة في كلية الزراعة بجامعة الخرطوم.
2- أرسلوا بنات الفيكس
3- أرسلوا الرجال الذين كانوا يبيعون الهتش في شوارع العاصمة.
كل هؤلاء المرسلين لم يكونوا إلا علماء كل في مجاله:
1- الزراعيين كانوا من حملة درجة الدكتوراة في الزراعة. سرقوا (تكنولوجيا) زراعة الكركدي وشجرة الهشاب التي تنتج الصمغ العربي. لكن طلع الكركدي عندهم مسيخ بدون طعم. زرعوا شجرة الهشاب وصار حجمها قدر حجم شجرة التبلدي الكبيرة ولكن بكل سرور عندما طقُّوها لم تنتج ولا رطل صمغ واحد.
2- بالنسبة لبنات ورجال الفكس والمبيوعات الأخري فكانوا دكاترة ومحاضرين جامعيين في مجال الاقتصاد والعلوم الإنسانية. فكل في مجاله درس طبيعة الشعب السوداني وعرفوا حاجته وعرفوا عنه الطيبة الزائدة التي تصل درجة التغفيل.. وهكذا رجعوا لبلدهم بمعلومات، ما يظهر أمامك هو من نتائجها. والغريق قِدّام. ربّك يستر.
تحياتي
كبـّاشي الصـّـافي
.
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
سلام نور تاور ..
Quote: من ناحية تانية..
السودانيين المسلمين ما ممكن يجيبوا ضباح صينى..
لانه ما مسلم...
وما حيقول الله اكبر لما يجى يضبح.. |
عندما كنا ندرس في الهند كنا نشتري الفراخ حيا ويقوم البائع بوزن الفرخة ومن ثم ذبحها وسلخها وتقطيعها ..
الحصل انو الجماعة ديل هندوس .. فكنا بنعمل حاجة من اتنين : يا نخلي البائع يمسك الجدادة ونوجهه يقبل ناحية القبلة ونحن نضبح ونناولو السكين هو يقوم بالباقي .. با اما نوجهو يقبل الجدادة ناحية القبلة ونحن نسمي وبعد داك نقول ليهو أضبح ..
أما بالنسبة لفتيات الفكس وسرهم أرجو مراجعة هذا الرابط :
وين البنات الصينيات الكانو ببيعو الـ (فِكس في السوق العربي )
| |
|
|
|
|
|
|
|
|
|
Re: جزار صيني توجد صورة (Re: عبدالحفيظ ابوسن)
|
مرحب محجوب
وحبابك
آي والله البنوت الصغار الكانن في برندات السوق العربي , يفترض يلفتن الانتباه , لو دايرة تفطر إلا تبيع ليها عشرة فكس , بعد ده كلو لابسات نضيف وهن الهمبوقلوبين حقن ظاهر , شلاليفن حممممر , وشبعانات
ولا مسؤول واحد سأل ,, حتي ناس الكشة يكشو اولاد البلاد المعروفين ويخلوهن
سبهللية وفوضي لازالت ضاربة بأطنابها في مفاصل الدولة
وهسة الجزار ده ولا السواق الصيني ولا ولا ,, الناس الشغالين شغل هامشي ولا يدر دخلا جيدا , حق تذكرتو ساي بس بي كم ,, ويطلعو متين
شنو يا ربي
حصان طروادة !
| |
|
|
|
|
|
|
| |
عبدالحفيظ ابوسن
Abureesh
يحي قباني
ناذر محمد الخليفة
شهاب الفاتح عثمان
أسامة البلال
نور الدين عثمان
nour tawir
سفيان عثمان قرضيه
بدرالدين بابكر مصطفى
Mahjob Abdalla
cantona_1
محمد نور عودو
فيس بوك
تويتر
انستقرام
يوتيوب
بنتيريست