|
|
 عمي اخو ابوي ياك كرهتنا ...
|
عمي دا كان حقار ياخ ما يشوفني اتبسمت الا ينهرني بطريقه مضحكه اتلمي يابت وامسكي ادبك مع انو المضحك ما الهزار الممكن يخطر ببال زول بس طريقته والا ماعارفه صوتو ما بشبه صوت الرجال ..لا ..والا النسوان ...حتي ما بشبه النضم العدييل حقنا دا لمن يتكلم زي صوت الديك لمن يكورك الصباح وفيه بحه غريبه تشبه الزول العنده لوز بقول في دا ما من غيظي بالعكس حفظت حقارتو عديييل نكون مثلا انا وامنه ونضحك يسمع صوت ابتسامتي ومايشوف قرقرة بتو بقيت ما بشتغل بفارغتو كتير وبيني بين نفسي اقول هوي امشي كدي شوف بتك بتعمل في شنو ...الكلام دا بدا من يوم جيت اخش الجامعه حلف ما اقعد في داخليه وبيتو قاعد اي نعم من ناحية انو حنين والقصص دي مافي كلام بس زول قديم ياخ ...عنده راي في كل شي وبس مركز معاي تركيزه تخنق كدا ياخ ناسي انا زوله كم كدا وادخل السن البصوت فيها في الانتخابات!شايفني بس الطفله ديك البلعبو معاها
وما شايف قدامو بت عمرها 17 ونص سنه
اول مره بدت بينا الصدامات كنت مارقه اسجل وسبحان الله معاي ابوي اتظبطت وجيت مارقه قال لابوي هوي يا عبدالقادر انت الغربه خربتك البت تلبس لبس الولد وماشي مباريها بلا خجله ادخلي يابت البسي لبس بنوت وامرقي كمان والله مافضل الا باكر تجي شايله السجاره وخاته السفه والبزعل انو ابوي نهرني
غيري البطلون دا البسي اسكيرتي
يا بابا
يابت هوي بلا يا بابا بلا بطيخ انجري !
انجريت لبست لي من الزعل شوال زي ما بتقول امنه ومشيت سجلت
|
|
 
|
|
|
|
مها عبدالمنعم
فيس بوك
تويتر
انستقرام
يوتيوب
بنتيريست