|
|
 يا محجوب .. الماك محجوب - قصيدة في رثاء الشريف محجوب شريف
|
يا محجوب الماك محجوب
ياااا محجوب
الماك محجوب
الماك معيوب
يازول حبوب
محجوب من شق أو طق
أو هوب
محجوب
من جنس نفاق
وخيانة وحوب
محجوب من ذل.
من جنس تزلف
وأي تكلف
مهما تعاني
مصايبا كارة
صعاب وخطوب
يا محجوب
الماك محجوب
من واقع الشعب
عوام الناس
قلمك باريه الصدق بيلقط صورة وصوت
للظلم العدم الجهل المرض الفاقة وقل القوت
يرسم لوحات لشعاع الأمل الماسك طرف الأفق خيوط وهيوت وكيوت وخيوت
زلزل كرعين كرسي الطغيان ..
زعزع أركان الدقن اللابد تحت البوت
فلكل ذلك
واكتر من ذلك
يا شاعر الشعب
فالشعب حزين
والشعر حزين
باكي ومغلوب
وبفقدك أمست دنيانا هميانة زيادة صعاب
متروسة خطوب.
من فقدك جارية
مدامع الناس سراف وتبوب
فالفقد جليل وعظيم بلحيل
فقد السودان
كل الحلال
كل الفرقان
فقد الخوطوم وكذا امدرمان
مرزوق .. العشش .. الثورات
زقلونا .. الديم .. ام بدات
الشجرة .. ابروف .. الشعبية
وكل الأحياء الشعبية
خلفت قلوبم
راس مشطوب
وسرج مقلوب
وقلب مكروب.
جرحك
متعدد فينا الجرح الووب
حزنك
متمدد فينا الحزن الووب
شايلنو دموع في مآقي تدوب
لافحنو ازار وعباية وتوب
علم السودان
في السارية وحيد
جامد أسيان
متموم احزان
ناحب مخنوق
مترجي هبوب
من روح شعرك
الما معطوب
ملهم وعذوب
بى صدقك
ودافق كلماتك
تمتمت الناقص يا محجوب
كفيت مفروضك والمندوب
بيتك مفتوح
من غير ابواب
زي قلبك ضل
لبلابل الدوح
مسكن للشعب
الشعب الوالد ومعلم
طبشيرتو غبار وعرق مسكوب
الشعب
الأم
الأخت
البت
الزوجة
الصاحب
والجيران
الزملا
الناس العاديين.
من ست الشاي
لبتاع الكارو
صبي الكنتين.
البنايين .. الحلاقين .. الفتالين
السواقين .. الحمالين .. والشماشة
وجميع الناس المغلوبين
والمغبونين
غنيت ايامم
بى احسان
شعرا هتان
يروي الوجدان
من غيمة وشيمة
وديمة وكوب
الشعب التابعك بالأشواق
عارفك برار
ماك ولدا عاق
لا ولا سراق
عارفك معدن
يشلع براق
نضرة واشراق
خلقة واخلاق
وين متلك وين
لبنات بلدك
واولاد بلدك
يا صاحب الكل
زينة العشاق
موية الاحداق
شعلة احساس
قلبك ما ضاق
بالوطن الضاق
بشعبو الضاق
جمرا مهبوب
وين متلك وين
محجوب يا شريف
فقران لكنو
عفيف ونضيف
رغم الآلام
ضحاك وظريف
واعي وعريف
تلهم أجيال
بي وجدان حي
مصقول وشفيف
وكلام مسؤول
متسلسل روق
في صف الشعب
الحرف الغضب
الحرف الصرخة
الحرف الوعد
الحرف الثورة
الحرف الحزن
الحرف الضحكة
الحرف الآسي
يطيب خاطر الناس ويواسي
الحرف السيف
يقطع ويواسي
يقيف متراس
ضد ابكباس
ويصحي يباس
فقراء الناس
ويبشر بي وهج الثورة ينش الوسواس
مع الخناس
مع الهلواس
الحرف الفعل
الحرف الأصلي الما مضروب
الحرف القاوم
تب ما اتباوم
لا ولا اتناوم
ولا قط ساوم
على حق الشعب
الحرف الطلقة على الطاغي
الحرف اللهبة على الباغي
الحرف الأمل الماهو هبوب
في شعرك قادل يا محجوب
يا محجوب
رغم السكة
وتقل الأحمال
طول الترحال
من سجن لسجن
برد زنزانة وسوء أحوال
والداء عضال
ما كان في البال
انك ترحل بى دي السرعة
وعطاءك فينا بزيدنا جمال
بدينا أمل
بلهم أجيال
من شيب وشباب
ساهمين باكين
من فرقك دوب
والدوب يا دوب.
وين ماشي أقيف
خلينا نجيب المونة معاك.
ونبني
نبني .. نبني
مصنعا ونادي
جامعا وبسطة
وين ماشي أقيف
فايت شقيش
ارجانا عشلن نتحزم بيك
ونعانق بيك فجر الأحلام قدامنا هديك
قدامنا هديك
هديك ,, ويين ماشي أقيف
وين ماشي؟؟ أقيف
لكن عاندت .. وعبرت .. مشيت.
مشيت وين يا الحبوب
فتشنا عليك وما لقيناك
شن نعمل غير
نرجع ونتوب
ونرضى المكتوب
وقبل ما نوادعك يا الحبوب
سلم لي على كل الأبرار
من سبقك من أبناء الشعب
قول ليهم لا زالت صورتكم مالية شعاب القلب
محفورة تملي خطوط النبض ..
واعمالكم خالدة تضوي الدرب
وتأشر للفجر الصادق من تحت الطوب
وفي الآخر
يابا سلامة سلامة سلامة
وألف سلامة
خليناك في حضن حمامة
حمامة ترفرف تحت غمامة
تهب نساما ..
على وسادتك بردا وسلامة
ألف سلامة.
يا محجوب
الحاضر فينا ليوم نلقاك
ألف سلامة
وألف سلامة
يا محجوب
ألف سلامة يا الحبوب
هذه نقطة من بحرك, نردها اليك .. لعلها تروي قليلا من صدئنا يا محجوب
ولك ولهم التحيات
بشير اسماعيل
|
|
 
|
|
|
|
bashir kurdufan
فيس بوك
تويتر
انستقرام
يوتيوب
بنتيريست