أجريت اتصالا هذا الصباح بسعادة الوزير . وجدته قد صحا من نومه للتو فردّ عليّ متثائبا كأنه لم ينم ليلة البارحة . قلت : صباح الخير سعادتو قال : صباح شنو ياخي نحن لسة نايمين . قلت : الساعة الآن تمام الثامنة . ياخي ثمانية أيام في كوبر ، مالك داير شنو من الصباح ؟ والله قلت اسلّم عليك وأذكّرك بموضوع ولدي عليك الله يا هناي ما تجننا ، نحن ما فاضين ليك ياخي ، انت قايل الحكومة دي سووها عشانك انت وولدك ؟ انت يا سعادتو مالك نفسك حار الليلة ياخي جننتونا الواحد نومو ما تخلوهو يكملو ، تقوموا علينا من صباح الرحمن سعادتو سعادتو انت ياسعادتو عليك الله سهران وين ؟ أبدا والله كانوا عندي جماعة معزومين عشا ، وطلعوا مني زي الساعة اتناشر ، وبعد داك ما قدرنا نمنا للساعة اتنين . طيب موش لازم تنتهوا من حاجاتكم الساعة حداشر عشان تكونوا قدوة للناس ؟ ياخي اتغدى بيك البعاتي . قدوة شنو ؟ انت مالك الليلة جنيت وللا شنو ؟ طبعا العشا كان فيهو شية جمر وسمك . والله كان عشا فخم . طيب ياخي مالك ما عزمتني ؟ انت الظاهر عليك ما قادر تفرّق بين العلاقة الشخصية والمنصب الرسمي، انت ناسي أني أنا وزير ؟ لا يا سعادتو أنا ما ناسي ، بس انت ناسي أني أنا بجي بيتك عادي . ياخي تبيت في الحدب . انت داير شنو لي ولدك ؟ يعني انت يا سعادتو نسيت الموضوع خالص؟ ياخي مليون حاجة في راسنا ، وكل شوية ينط لي واحد داير حاجة لي ولدو ؟ كدي يا سعادتو أنا رصيدي دا قرّب يخلّص ، ممكن تتصل علي من تلفونك المجاني؟ بس بعدين ، وللا أقول تعال لي في البيت بكرة المعرب . طيب ما أجي اتغدى معاك . عليك الله يا هناي تعال المغرب زي ما قلت ليك . ينقطع الرصيد .
01-09-2014, 10:49 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
هدية لبله محمد الفاضل يلتقي أهل القرى في السوق يومي الاثنين والخميس . سوق معتوق ، وهم يسمونه سوق أبّ احمد ، ينطقونها وكأنها كلمة واحدة يتواصلون ويتآنسون ، يبيعون ويشترون ، يعرفون أخبار بعضهم البعض ، ويبلّغون ويتقبلون الدعوات لأفراحهم .. كان سوق معتوق عامرا باللحم والخضار والفاكهة ، يتميز باسعاره الهادئة ـ خاصة حين ينتصف النهار ويقترب الناس من العصر .. لا توجد ثلاجات لحفظ اللحوم أو الخضار أو الفاكهة ... عليك أن تبيع أو ستخسر كل شئ.. وفي تلك الأيام الخوالي ، كان الناس يجدون الكثير من المريسة والشواء وأم فتفت والسلايق ، في إنداية تعج بالبشر من رجال ونساء ، وتعمر أصايلها بالدلوكة والعرضة ورقيص الرقبة .. قال شاعرهم يفاخر : أنا الواسوق أنا العزّازي يوم السوق أنا الفسحة الورا معتوق والواسوق معروف بمقدرته الكبيرة على لم التراب وتحريكه كأنه البلدوزر والعزّازي سوق بغرب الجزيرة يفيض بالبشر في يوم سوقه ، وأيام السوق هي السبت والثلاثاء والفسحة الورا معتوق هي إندايتهاالعامرة .. والقادمون من جميع القرى كلهم ينتمون لشجرة عائلة واحدة حتى من لم يكن اصيلا منهم صاهر الناس وصار منهم .. المجتمع كله أهل .. ولا يوجد غرباء ... والأمن ، والسلم ، والرخاء ،والسماحة ، والكرم ، كلها صفات تشكل لوحة خلفية يتكئ عليها هذا الجمع من الناس .. لكن القرى كانت تتنافس في الخفاء .. حلتنا أكبر من حلتكم .. بس نحن أكرم منّكم .. أولادنا اتعلموا وانتو أولادكم رواعية ساي .. وكثير من المطاعنات والملاسنات التي لا تجلب العداء بل تحافظ على الترابط والمودة .. يا زول ها والله إت زي الطير البتشرّك ليهو ده ، مخّك ده صغيّر. عليك الله والله زي ما قتّ ليك وإت قايل الطير ما عندو عقل؟ يا زول هاعقلا وين ليهو ، هو كان عندو عقل الزيّك إت بيغشّو؟ يعني هسة إت قايل عقلك أخير من عقل الطير يازول قول بسم الله ، أنا عقلي يوزن حلتك كلها .. سمح كدي طوّل بالك وخلينا النشوف.. كل منهما ينتمي لقرية ، وهذا يدعي المعرفة وذاك كان صائدا ماهرا للطيور يصطادها بالشباك .. كان المعرفي يسلك الطريق إلى أرضه ، وكان الصياد يختبيء ويكمن له في الطريق وسط سيقان الذرة رمى الصياد بصلة كبيرة في الطريق ، ثم بصلتين ، ثم ثلاث ، ثم كمية من البصل ... نزل المعرفي من حماره العالي ليأخذ البصلة الأولى ، ثم انطلق يجمع البصل حتى جلس لجمع الكمية الكبيرة . وانهمك في جمع البصل .. وفجأة غطته شبكة الصياد.. الله لا تريحك يا ود هناي ... والصياد يصيح مبتهجا : ول .. ول ..ول ...
01-12-2014, 10:13 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
النساء في هذا الزمان شامخات ، ساميات . مثقفات . يواصلن مسيرتهن براس مرفوع ، وعقل ثاقب .. الرجل والمرأة صنوان يتشاركان ، يتسابقان ، وسويا يقدمان لنا عصرا يفيض تقنية وتطورا .. لكن هل المرأة لم تكن كذلك في الماضي ؟ وهل الرجل وحده هو من صاغ المجتمع وفرض ثقافته ؟ أنا شخصيا أجيب بلا .. حبوباتي قسم الخالق بت سعيد ود نوار أم ابوي أنثى بعشرة رجال .. حبوبتي الجاز بت إدريس ود نوار أم أمي ، مكملة الكرم والشهامة والرجالة ذاتا .. واخواتهن بنات سعيد وبنات إدريس أولاد نوار / آمنة ، حكم الله ، فاطمة ، عائشة ، وآمنة الأخرى ، كل واحدة منهن بحزمة رجال .. كنّ جميعهن يمتلكن الحقل ويعملن بجد ويمتلكن الماشية ويرعينها أفضل مايكون الرعي ، ويخرجن من ألبانها الروب والسمن ويوزعن الألبان على المساكين والمحتاجين ويهدين السمن للأخوة والأهل والأحباب .. وكنّ يخرجن أكبر قدح من عصيدة الفتريتة يأكل منه القوم مستمتعين بملاح الروب بالسمن الفاخر ..وفوق كل هذا أنجبن من البنات والرجال الكثير وربينهن كأفضل ما تكةن التربية فأحاطوا دنيانا بالدفء والحكمة والصنيع الجميل .. اللهم ارحم حبوباتنا الجميلات العاملات المنتجات ـ اللاتي لم يقصّرن في أمر من أمور الدنيا ولا الآخرة رغما عن أنهن حرمن نعمة التعليم لكنهن غرفن ونهلن من ثقافة عصرهن ما أوصلننا به إلى ثقافة عصرنا ..
01-12-2014, 10:06 AM
ودقاسم ودقاسم
تاريخ التسجيل: 07-07-2003
مجموع المشاركات: 11146
أن تعيش بين الخضرة وماء الجدول الرقراق فتلك متعة الدنيا .. أن يحتضنك مجتمع شديد البساطة شديد الإلفة أفراده متحابون مؤتلفون فهذه نعمة كبيرة لا تضاهيها نعمة .. لماذا لا نفتك من قيد المدينة وسجنها الكبير ؟ لم استسلمنا لأقدارنا هكذا دون أن نبدي تململنا وضجرنا من الحياة السقيمة ؟ هنا الحياة كلها ممارسات رسمية .. موعد للزيارة ، دعوة لطعام ، لا عطاء إلا بسؤال .. هناك تدخل عليهم متى ما شئت ، يدخلون عليك متى ما شاءوا يؤانسونك بالطيبة والمحبة والحكي البرئ ..يتمتعون ببيئة نظيفة بطبيعتها .. تمر بأرضهم فتدخل وتأخذ ما تشاء .. تمر على الراعي فيطعمك الحليب طازجا . تشاركهم وجبتهم دون دعوة مسبقة. فتكفيهم وتكفيك. بسطاء في أفراحهم ، بسطاء في أتراحهم .. لا صيوانات فاخرة ولا صالات ..تكاد الجريمة تنعدم ، ويحل محلها السلام المقيم .. أمني النفس بحياة هادئة في بيئة طاهرة حتى لو أني ألوذ بجذع شجرة ...
01-13-2014, 12:31 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
لو كنت أحد بائعي الحطب بشاطئ ( أبوروف ) لتخيرت لحطبي .. لا ابيعه لكل من هب ودب.. فأنا عطار .. ولا اصلح ما أفسده الدهر السوق الممتلئة هي وحدها التي تستحق الدخان وتستحق العناء ومعافرة النار وغير ذلك تعب لا يأتي بنتيجة ولا يغير من الواقع شيئا فالدخان ليس علاجا لوجع السيقان ياااااه يا مملوءة الساقين أطفالا خلاسيين أين هي تلك المرأة المملوءة الساقين .. كنت ألجأ إليها بين الحين والآخر نأكل سويا الفولين المصري والسوداني ونعب الشاي عبّا وأحتفي سرا بساقيها ثم ننطلق سيرا أنا على أقدامي وهي على ساقيها الممتلئين لمسافة طويلة نتجاذب لأحاديث ونغشى المحلات التجارية وأردد في نفسي : فاظفر بذات السوق تربت يداك لكنها هجرتني وتركت لي ذكريات قصيرة وأنا لا أحب الذكريات القصيرة
01-15-2014, 08:03 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
التبريرية منهج يخيفني . عندما أكتشف أن شخصا ما ينتهجها أحاول أن أنجو بنفسي لأنني لا أتحمله .. كثيرون يقولون لك أنك لا تتقبل الآخر .. لكني دائما أتساءل : هل الآخر هذا مطلق اليد والعقل واللسان أم أنه مقيد بما هو منطقي .. والبعض يذهب أكثر من ذلك ويقول أن الامور نسبية وأن الخطا والصواب نسبيان ، ويعتدون بمقولة : رأيي صواب يحتمل الخطأ وراي غيري خطأ يحتمل الصواب . وهؤلاء يطلقون على أمثالي صفة التشدد ، وبعضهم يسميها المثالية .. لماذا لا نكون مثاليين .. فالشخص المثالي شخص متوازن في تفكيره وفي فهمه وفي فعله . هل يمكن تبرير السرقة بالجوع أو العري أو الفقر ؟ هل يمكن تبرير رمي القمامة في طرف الشارع كيفما اتفق بالقول أن الكل يفعل ذلك ؟ هل يمكن ان تكون إجابتنا على كل ما هو سلبي : ياهو ده السودان؟ في النظرية السياسية أطلق الفيلسوف ميكافيلي ماعرف فيما بعد بالميكافيلية : الغاية تبرر الوسيلة .. وكثير منّا يطبق هذه النظرية ، والبعض اعتبر إجادة تطبيق الميكافيلة نوعا من (الشطارة ) و (الفلاحة ) حتى أصبحت النظرية معيارا للنجاح في هذا الزمان التبريري ...
03-03-2014, 01:30 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
بعد ما عمك طلع من البيت مشى على الزراعة حقتو ، جاء إلى بيته ساعي البريد يحمل إليه برقية .. ده بيت فلان الفلاني ؟ آي بلحيل ، اتفضل . يزيد فضلك يا خالة . عندكم برقية تستلميها؟ برقية دي شنو ؟ يعني جوّاب مستعجل . سمح ، ربي يجعلو خير . إنتي اسمك منو ؟ أنا آمنة بت أمحمّد. أها هاك البرقية وأول ما يجي الحاج أديها ليهو. سمح . عمك رجع ، الحاجة مدت ليهو البرقية .. بس مافي ولا زول بيقرأ .. أولاد القراية في المدرسة .. والمدرسة ما قديمة ، ما خرّجت ولا زول . خلاس أنا بمشي للفكي إسحق يقراها لي . خلاس ربنا يجيب العواقب سليمة .. ما تطوّل.. الفكي حدق في البرقية ثم قرأ بوضوح : رقبة التور وقعت بينا ياتو تور ياشبخنا ؟ عاد ما بعرفو ياتو رقبة ؟ والله ما بعرفا ياتو ناس ديل الوقغت بيهم رقبة التور ؟ شن عرّفني عاد سمح .. جاء الرجل مهموما وحكى لزوجته وبناته .. فأطلقن الصرخات والويلات .. وتجمعت القرية .. وفهم الناس موضوع رقبة التور التي وقعت بأهلها .. وبعد بكاء وعويل عاد أول طفل من المدرسة .. تعال يا ولد.. أقرأ الورقة دي .. رقية النور وضعت بنتا فحلت الزغاريد والفرحة محل العويل والبكاء..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ودقاسم
بله محمد الفاضل
فيس بوك
تويتر
انستقرام
يوتيوب
بنتيريست