|
دعواتكم لزميلنا المفكر د.الباقر العفيف بالشفاء العاجل
|
|
 Re: خمسيـــــــــــــــــــــــــــــــــــــــــــــــــــــــــــــــــــــــــــــــــــــــــــ (Re: درديري كباشي)
|
وفي اليوم التالي في بيت ابو علي
محاسن : انت متاكد انه ما عندهم اي مناسبة للدعوة دي يعني لا ميلاد شافع ولا نجاح اخت .
ابو علي : يا وليه ناس بيريدونا لله عازمننا عشا نقعد نتحقق ونشك فيهم ..؟
محاسن : كان بيريدونا ما بعرف ..
ابو علي : هو في ايه شنو الخلاك تشكي ..؟
محاسن : سعاد دي صاحبتي من زمن نحن بنات وطالبات بعرفها زي جوع بطني ما بتعمل ليها حاجة بدون هدف تحت تحت وزولة بتاعة مقالب وخوازيق.
ابو علي : اللهم طولك يا روح ياخي هي دي اول مرة نعزمهم ولا يعزمونا نحن البينا عامرة من زمان ..
محاسن لازالت شاك في الامر ( يتخيل لي عندها حق)
محاسن : كدي انت آخر مرة قابلت ابو عمر متين وكنتو تعملوا في شنو .؟
ابو علي : اتقابلنا امس الخميس في الجمعية اقصد الصباح الجمعة لا لا لا الخميس يعني صبحان على الجمعة .
محاسن : يا راجل مالك تقطع خميس وجمعة وصباح .. انت صحي يوم الجمعة الصباح بدري قلت اتصلوا بيك ناس الشغل وقالوا في حالة طارئة وطلعت زي ثلاثة صباحا وجيت بعد ساعة انا بعاين ليك كنت مبسوط تغني .. في شنو في الشغل خلاك تكون مبسوط وتغني .
ابو علي شعر بجرجرة محاسن ستورطه في التحقيق لو قال ليها كان عند ابو عمر وراح جراه خمسين في عقر داره وسط اهله يمكن الخبر يفرحها لكن حكاية التسلل ثلاثة صباحا دي غبر مامونة العواقب لذلك قرر ان يحسم النقاش مستخدما صلاحياته الذكورية ..
ابو علي : شوفي هنا يا وليه عايزة تروحي العشا اهلا وسهلا ارجع من الشغل الاقيكم لابسين ما عايزة قولي ما عايزة ما تملينا كلام كتير .
محاسن تؤثر فيها اللهجة الحادة وتبتلع لسانها وتذهب وهي تهز في راسها وتؤشر بيديها دليل على انها لازالت تشك في الامر ..
وفي بيت ابو عمر
سنعود
| |
 
|
|
|
|
|
|
|
|
Re: خمسين (Re: عبدالعزيز عثمان)
|
Quote: ود ،ماها ام..
والله دي خمسين دي المرقتك عند اهلنا في ود كري, |
حلوة يا عزو رغم اني ما فهمتها ..
بس نحن من زمان بيعجبنا الكلام الما بنفهمه من زمن الصادق المهدي شابنكا السندكالية والراديكالية والماعارف شنو كدا
| |
|
|
|
|
|
|
|
|
|
Re: خمسيـــــــــــــــــــــــــــــــــــــــــــــــــــــــــــــــــــــــــــــــــــــــــــ (Re: درديري كباشي)
|
بيت ابو العلي الوقت بعد المغرب بقليل في ذات يوم الدعوة
ابو علي : يا محاسن انتي لسع ما لبستي العيال ديل ..
محاسن أجي يا راجل البسهم من المغرب ليه هو نحن معزومين عشا ولا فطور رمضان .
ابو علي : يا ولية عشان نمشي بدري ونجي بدري انت عارفة بكرة في دوام ومدارس ..
محاسن : انا ذاتي دعوة بداية الاسبوع دي ما داخلة لي في راسي ...
ابو علي : يا مرة هوي بطلي الوسواس دا ناس عازمننا عشا دي فيها حاجة ؟
محاسن : عشا بلا مناسبة وفي بداية الاسبوع دي ما حاجة تشكك ..؟
ابو علي : يمكن عاملين لينا مفاجأة ..
محاسن : مفاجأة زي شنو يعني ؟؟
ابو علي : محاولا التمويه وابعاد نفسه بعيدا عن الشبهات : يمكن مثلا اشتروا بيت ..
محاسن : طيب نحن البفاجئنا شنو لو اشتروا بيت ما يشتروا نحن مالنا ومالهم ..
ابو علي شعر باللكمة المضادة السريعة فاستخدم سلاح الذكورة من جديد : يا مرة ما تبطلي النقة الكتيرة دي لبسي الاولاد خلينا نمشي ما نساهر بالناس .
محاسن تستجيب للنهرة بغيظ وتبدأ تنهر في الاطفال ... ( يا بت يا سحر شطفي اخوانك ديل ولبسيهم .. انت يا خالد يا زفت خلي البلي استشن دا امشي البس ..
- ماما نحن ماشين وين ؟؟
- حانمشي وين يعني ماشين نتحشي عشا لا ليه راس ولا قعر وراجعين ..
| |
|
|
|
|
|
|
|
|
|
Re: خمسيـــــــــــــــــــــــــــــــــــــــــــــــــــــــــــــــــــــــــــــــــــــــــــ (Re: درديري كباشي)
|
بعد قليل تحركت سيارة ابو علي متجهة ناحية بيت ابو عمر لتلبية الدعوة .
ضجة الاطفال في المقاعد الخلفية لم تمنع محاسن من التفكير والسرحان في امر هذه الدعوة المشبوهة وخاصة لان الطرف الداعي هو صديقتها اللدودة منذ مرحلة الدراسة سعاد .. هي تعرف انها ليست انسانة شريرة بمعناها الحرفي والمنحرف .. لكنها حماسية وغيورة وممكن تحول أي شئ الى منافسة وانتصار و هزيمة حتى لو كان المجال لا يتيح ذلك .. فهي لها القدرة في ثني رقبته حتى يصب في بحر المنافسة المتلاطم .. فهي تريد ان تنتصر في أي شئ .. لدرجة انه محاسن ربما شعرت بعض المرات بالندم في انها اختارتها عروسا لصديق زوجها وزميله .. اذ انها سبقتها بسنوات في الزواج .. وعندما طلب منها ابو عمر ان تختار له زوجة رشحت له صديقتها سعاد .. لكنها لم تكن تتصور ان تظل سعاد بطبعها الحماسي والعدواني الى مرحلة الزواج والاسرة .. صحيح هي لا تحسدهم ولا تغار بالمعنى المفهوم لكنها تريد ان تنصر وتفرح فقط بذاك الفرح الصبياني الذي لا مبرر له والذي كثيرا ما يزرع فيها احساس الهزيمة المر ..
ابوعلي مقاطعا سرحت زوجته : شنو يا ام علي سارحة مالك ؟
ام علي : والله دعوة ناس ابو عمر ديل قدر ما قلبتها شمال يمين ما عرفت ليها سبب ؟
ابو علي : يا ولية انت مكبرة الموضوع ساي .. ناس عازمننا عشا نفرح ونشكرهم ولا ننشغل بسبب دعوتهم ..
ام علي : ما هي الدعوة لو كانت من أي ناس تانين انا ما كنت انشغلت بيها لكن سعاد انت ما بتعرفها زيي ..
ابو علي : ياخ سعاد دي ما صاحبتك وانتي اخترتيها لاخونا ابو عمر ..
ام علي : وانا ما قلت حاجة هي عروسة جميلة وست بيت ممتازة بس ما عايزة تخلي حركاتها الصبيانية ديك ابدا ..
ابو علي : حركاتها الصبيانية زي شنو ؟
ام علي : هي تكره الهزيمة عمة حتى في المصارعة دي لو شجعت مصارع وانهزم ممكن تبكي وتتأثر اكثر من المصارع المهزوم .
ابو علي سرح ويادوب بدأ يجمع ...وقال مستدركا : يعني ممكن تكون هي الاقترحت الدعوة علي ابو عمر ..
أم علي : وهي تقترح الدعوة ليه .ز ما هو في معلومة ما واصلاني انا كان فهمت وفهمتك ..
ابو علي تقريبا وصل للسبب لكن خاف ان يفاتح زوجته فيضطر ان يعترف بقصة الخمسين في الساعة الثالثة صباحا فيصبح موضع شك في كل شئ ثاني من قبل زوجته وتتحول حياته لجحيم .. اذا لايوجد حل سوى قفل النقاش الآن ولاحقا يحلها الف حلال ..
أم علي : سكت مالك وسرحت وين ..
ابو علي : ياخ خلينا نركز في الطريق ما نعمل حادث ونضيع كلنا اطردي الشيطان من قلبك نتعشى ونرجع سريع .
أم علي شعرت هذه المرة بتهرب ابو علي من شئ ما لكنها آثرت الصمت ..ز وعلى رأي المصرين الخبر الغالي اليوم بكرة يبقى ببلاش ..
| |
|
|
|
|
|
|
|
|
|
Re: خمسيـــــــــــــــــــــــــــــــــــــــــــــــــــــــــــــــــــــــــــــــــــــــــــ (Re: درديري كباشي)
|
أما في بيت ابو عمر اتفق الزوجان ان تكون وجبة العشاء على ما ذكرته ام عمر اولا وهو الفول وفرقته وتوابعه على ان يضاف اليها سمك مقلي جاهز لان ابو علي يحب السمك وصينية بيتزا لتفرح الاطفال .. وهو كله يصب في خانة أخف الاضرار أي تجنب كارثة الميتة وخراب ديار بعد ( الخمسين )..
وصل الضيوف وضج البيت بالسلامات المعهودة .. و سلام بالحضن بين الصديقتين اللدودتين وتبادلا القبلات الروتينية .. وحاولت سعاد ان تداري سبب الدعوة بكلام من نوع and#61516; والله اشتقنا ليكم ساي كدا واشتقنا لونستكم) .. رغما عن انها توقن تماما بأن مثل هذا الكلام لا يدخل ذمة محاسن بتعريفة كما يقال .. وخاصة ان الدعوة في بداية الاسبوع .
وجلس الجميع .. ابو علي توجه مع صديقه ناحية الصالون ليجد مائدة الكتشينة معدة ليست مائدة عشاء بل مفروش بهد فرشة من القماش تفرش عادة في لعب الورق حتى لا يتخرش بالجر في الخشب .. استرجع كلام زوجته وبدأ الفأر يلعب في صدره او في عبه كما يقال ..
ابو علي : شنو يا ابو عمر انت عازمنا عشا ولا كتشينة .. وبعدين انت مش قلت اعتزلت اللعب أمس ..
ابو عمر متلعثما : لا لالا لا ياخ اعتزل شنو انت بصحك ياخ هي الكتشينة بتتخلى ..
ابو علي : طيب شنو انت محضر الملعب للكتشينة افضل من عشاك العزمتنا ليه دا ومشتري كتشينة جديدة كمان هو في اييه بالظبط .
ابو عمر : ياخ فيها شنو ما أي بيت واحد في شلتنا فيه كتشينة بس افضل انا الوحيد وكل ما يجوني ضيوف ما يلاقوا عندي ورق للعب ؟ .. ( ثم يلاحظ انه التبرير لم يدخل دماغ ابو علي ويعلب على وتر الادمان عنده ) .. لكن لو ما عايز خلاص بلاش منها خلينا نتونس ساي . ويتظاهر بأنه بدع يجمع في الفرشة ,,
لكن ابو علي بسرعة الى صوابه اقصد الى جنونه وادمانه للعب الورق : لا لا لا ياخ تلمها شنو يا خانا بهظر معاك معقولة تجي منك انت وانا افوتها يلا نلعب اها قصيت ليك وزع الورق ؟؟
سعد ابو عمر بنجاح خطته وذكائه وبدأ يوزع ورق الحريق بينهما ..
| |
|
|
|
|
|
|
|
|
|
Re: خمسين (Re: درديري كباشي)
|
بدأ الصديقان اللعب وتبادل العبارات المعهودة من نوع ( يلا جر .. ما تفك البايظ ياخ .. ما عندك بايظ نعفيك من المهمة دي ؟؟.. انت تتكبكب كدا مالك ؟؟ .. ترجف كدا تقول عاوز تشوت بلنتي في بيتر شيك )
اما في مجلس النساء جلس الصديقتان .. ولاحظت محاسن ان سعاد تتونس معها لكن بالها وتركيزها مشغول بشئ آخر .. فتخرج الردود منها مبهمة ومختصرة وكاشفة عدم التركيز في كلام ضيفتها .. لكن محاسن في الاول لم تعرف السبب الذي يجعل ذهن سعاد شاردا بهذه الطريقة ويصب في مكان آخر .. لكن بعد ملاحظة لاحظت نظراتها منصبة ناحية صالون الرجال كأنها تتوقع خبرا من هناك .. لم تستطيع الصبر فسألت .
محاسن : انت في شنو يا سعاد بالك وين .
سعاد : اجي كيف بالي وين ما معاك .
محاسن : معايش نو هسع لو قلت ليك نحن قعد نتكلم في شنو ما تكوني فاكرة .
سعاد محاولة التمويه والدفاع عن نفسها : كلام شن ودا يا محاسن انا طبعا مركز على كل كلمة انت قلتيها .ز
محاسن : طيب مالك بتعاين ناحية الصالون هو ابو علي وابو عمر قعد يعملوا في شنو ..؟
سعاد محاولة تتويهها اكثر : يعلموا شنوا كيد بيتفرجوا في الكورة او المصارعة الحرة ..
محاسن : طيب مالهم كل مرة يصرخوا ويضح واحد فيهم بصوت عالي هي الكورة والمصارعة فيهم حاجة بتضحك ؟
سعاد : نحن مالنا ومالهم يا اختي خلينا في ونستنا ..
محاسن : ما هو لو كان انتي مهتمة بونستنا انا ما مكنت انشغلت بيهم لكن ملاحظة ليك مشغولة بيهم ..
سعاد : ياخ سيبك من شكك وتحقيقاتك البايخو الدي ارحكي المطبخ نخت العشا سوى .
تتحركان ناحية المطبخ لكن دون ان يرتاح بال محاسن هي اصلا تشعر ان هذا اليوم لن يعدي على خير اكيد فيه لقم اعدته سعاد الملعونة لكنها لاتستطيع ان تصبر حتى تكتشفه قبل ان ينفجر ..
| |
|
|
|
|
|
|
|
|
|
Re: خمسين (Re: عبدالحفيظ ابوسن)
|
في المطبخ
محاسن : بسم بالله في شنو يا سعاد مالك بتزغردي وابو عمر مالو صرخ وقال خمسين يا اام عمر ..
سعاد : ابو عمر جاب خمسين .
محاسن : من ماية ؟
سعاد : من مية شنو هي خمسين من مية بيزغردوا ليها كمان ... جاب خمسين من خمسين.
محاسن : وجابها في شنو هو ابو عمر ممتحن ؟
سعاد : لاممتحن ولا حاجة الخمسين جابها في راجلك ابو علي ؟
محاسن : كيف انا ما فاهمة أي حاجة ؟
سعاد : في الكتشينة يعني في شنو .
محاسن مستدركة .أهااااااااااااااا .. والله انتي عمرك ما بتعقلي .. وانا اصلا حكاية العشا بتاعكم دي ما داخلة دماغي .. وعشاكم دا يسمنا ..
سعاد : لا لا لا انت التعقلي يا محاسن دا ما لعب ساي .. معقولة ناس بيتسلوا نحن راح ننشغل بيهم ..
محاسن : هو انت عندك حاجة اسمها لعب ساي اتاريك عازمانا في يوم السبت بداية الاسبوع عشان الرجال يلعبوا كتشينة ومن قبيل مركز على صوت الرجال في الصالون ومتفقة مع راجلك لا من يفوذ عشان تزغردي ليه انا من زمان عارفاك جاهلة وما تكبري لكن ما كنت قايلة للدرجة دي .
سعاد : شنو هو انتي زودتيها جاهلة وما بتقدري يعني راجلك لامن جا دق لينا الباب الساعة تلاتة صباحا كان عامل خليفة المسلمين يتفقد الرعية ما جا عشان يلعب كتشينة ويغلب راجي وما انستر صرخ بأعلي صوته لامن صحى الجيران .. ونحن حقنا ما بنخليه يروح ساكت .. نشطبه اول بأول ..
محاسن نادت بنتها : يا بت يا سحر امشي نادي ابوك دا قولي ليه نحن ماشين ..
سعاد : لا لا لا محاسن اعقلي ياخ اتعشوا وامشوا ما معقول نحن حضرنا العشا وخسرنا فيه ..
محاسن : خسرتو فيه ؟؟هاه .. كان خسرتوا فيه ما بعرفه .. امشي يا بت نادي ابوك .
ابو عمر يسمع جلبة الحريم ومن خلفة ابو علي يتداري حوله لانه ادرك بغريزته ان سعاد ( فتته ) أي كشفته وانا زوجته اليوم لن نبيته مرتاح هذا لو لم تطلب الطلاق وتسفيرها لاهلها ..
بعد مباصرات وترضيات وبنفوس مشحونة بالغضب قبل الضيفان تناول العشاء على مضض .. وانصرفوا ..
لتعود سعاد الى زوجها مسرورة بعد ان ارضى غرورها ومبتغاها ,,
ابو عمر مداعبا زوجته : اها كيف معاك ما جيهته وريحتك .؟؟؟
أم عمر : كدي يا يابا اماني ما ريحتني ..
ابو عمر : اها وعشانا كيف الليلة ,
أم عمر : الليلة عشاك دبل ..
وكانت نهاية الخمسين .
| |
|
|
|
|
|
|
|
|
|
Re: خمسين (Re: درديري كباشي)
|
دخلت من أجل التحية والسلام يا الدرديري
مشتاقون،
أنت وصاحبك الدسيس مكملين لبعض في الظرافة.
دائماً تمتعوننا بحكاويكم وقصصكم المضحكة.
يا الدرديري واحد في الإثنين إما أنت أبوعلي أو أبوعمر
لو طلعت أبوعلي تكون كيشة تزلق الخمسين.
وما تستبعد الخبر يكون وصل الأهل في السودان من زمان
وعم القرى والحضر.
الله يديكم العافية
| |
|
|
|
|
|
|
|
|
Re: خمسين (Re: عزيز عيسى)
|
Quote: دخلت من أجل التحية والسلام يا الدرديري
مشتاقون،
أنت وصاحبك الدسيس مكملين لبعض في الظرافة.
دائماً تمتعوننا بحكاويكم وقصصكم المضحكة.
يا الدرديري واحد في الإثنين إما أنت أبوعلي أو أبوعمر
لو طلعت أبوعلي تكون كيشة تزلق الخمسين.
وما تستبعد الخبر يكون وصل الأهل في السودان من زمان
وعم القرى والحضر.
الله يديكم العافية |
سلام يا عزيز
نحن بالاشوق اذا جاز التعبير
انا حريف حريق بس لكن ماني ابو عمر والله
ولا ابو علي
ولا مدمن لدرجة العبها ثلاثة صباحا
يمكن يكون صاحبك الدسيس
| |
|
|
|
|
|
|
|
|
|
Re: خمسيـــــــن (Re: درديري كباشي)
|
Quote: و الله كلامك لذيذ و طاعم كالعادة يا الكباشي .. اضحكتني في هذا الصباح الرمادي
بالله ما تبخلوا علينا أنت و الدسيس بمثل هذا الجمال
رد · أعجبني · متابعة المنشور · منذ 22 ساعة |
مشكور يا عبد العزيز
| |
|
|
|
|
|
|
|
|
|
Re: خمسيـــــــن (Re: درديري كباشي)
|
| Quote: أم عمر : الليلة عشاك دبل .. وكانت نهاية الخمسين . |
اخونا ضرب العشا الأول وضرب العشا التانى ونام ملء جفونه ...والأفكار تتناوشه
فى ذات اللحظه التى يعلو فيها شخيره ...
ياربى الزول ده لو خطط لى قيم انتقامى اعمل شنو ؟؟؟
....
اها لو عزمنا بى مكايده من مرتو وعشانا ترمس وكبكبى نعمل شنو ؟؟؟
ولو لعبتا معاهو عشره وجرانى خمسين اعمل شنو؟؟؟
ولو الهزيمه بقت قدام كميه كبيره من الجمهور الدباره كيف ...؟؟؟
.....
يشخر ويتقنت لحدى ما الواطا اصبحت
خخخخخخ خخخخخ خخ خخخخخخخ خخخخ
......
القصه مفتوحه يادرديرى كباشى
ياخ استمر
مع احلى التحايا
| |
|
|
|
|
|
|
|
|
|
Re: خمسيـــــــن (Re: ملهم كردفان)
|
Quote:
اخونا ضرب العشا الأول وضرب العشا التانى ونام ملء جفونه ...والأفكار تتناوشه
فى ذات اللحظه التى يعلو فيها شخيره ...
ياربى الزول ده لو خطط لى قيم انتقامى اعمل شنو ؟؟؟
....
اها لو عزمنا بى مكايده من مرتو وعشانا ترمس وكبكبى نعمل شنو ؟؟؟
ولو لعبتا معاهو عشره وجرانى خمسين اعمل شنو؟؟؟
ولو الهزيمه بقت قدام كميه كبيره من الجمهور الدباره كيف ...؟؟؟
.....
يشخر ويتقنت لحدى ما الواطا اصبحت
خخخخخخ خخخخخ خخ خخخخخخخ خخخخ
......
القصه مفتوحه يادرديرى كباشى
ياخ استمر
مع احلى التحايا |
تعرف يا ملهم لو فتحناها راح يتحول البوست لدار جمعية سودانية ..
هنا الجمعيات السودانية فيها عشرات الحريق مدورة ليها اكثر من عشرين سنة يمكن بدون مبالغة من نفس الافراد ...
| |
|
|
|
|
|
|
|
|
|
Re: خمسيـــــــن (Re: درديري كباشي)
|
يا زول والله غلب الكشتينة دا حار بالحيل ،،حدثني من اثق في روايته،،انو في واحد مجنن الشلة بي جرهم الخمسين،،يوم جروه جرا حااااره،،وسيروه،،ياهو ياهو،،لمن وصل البيت ،،امو شالت القرجة،،ساقتو قداما،،ومعاهو مرتو،،قالن ليهو وله تتسدي الخمسين دي ولا الليلة بنفلقك،،رحمة الله،طق جر الجماعة،امو رمت توبه ،وهاك هي ومرتو شاقات الحلة زغاريد...
كانت الكشتينة في الحلال عالم مدهش.
| |
|
|
|
|
|
|
|
|
|
Re: خمسيـــــــن (Re: عبدالعزيز عثمان)
|
Quote: يا زول والله غلب الكشتينة دا حار بالحيل ،،حدثني من اثق في روايته،،انو في واحد مجنن الشلة بي جرهم الخمسين،،يوم جروه جرا حااااره،،وسيروه،،ياهو ياهو،،لمن وصل البيت ،،امو شالت القرجة،،ساقتو قداما،،ومعاهو مرتو،،قالن ليهو وله تتسدي الخمسين دي ولا الليلة بنفلقك،،رحمة الله،طق جر الجماعة،امو رمت توبه ،وهاك هي ومرتو شاقات الحلة زغاريد...
كانت الكشتينة في الحلال عالم مدهش. |
حلوة يا عزو قصة حريق الحريم ..
يمكن فعلا هي اللعبة الوحيدة التي يصعب لعبها من قبل الحريم
| |
|
|
|
|
|
|
| |
بله محمد الفاضل
ناصر حسين محمد
نصر الدين عثمان
ملهم كردفان
عبدالحفيظ ابوسن
عبدالعزيز عثمان
عزيز عيسى
عثمان محمد كرار
Abuobeida Ali Abdullah
فيس بوك
تويتر
انستقرام
يوتيوب
بنتيريست