|
|
 أستاذ حسين خوجلي.. دعني أصدقك
|
أو بالأحري أريد أن أصدقك لكن ما قادر فلو تسمح لي أتحسس إن كان في رأسي قنبور أو ما شابه ..
يقيني انك زول كتاااااااااااااب وكلااااااااام و وناااااااااااااس ( زي ما قال أبوعمير ) لكن دا لا يمنع إنو فيك شىء غلط ..
حتما هذا الشىء الغلط كشفو هجومك المنطقي الكاسح الذي تمارسه هذه الأيام على الحكومة خصوصا في قصة التقاوي
البائظة دي .. ما خليت ليهم جمبة يرقدوا عليها .. لا وكمان البعجب في الموضوع هو طريقة تناولك الس اخرة اللاذعة
للموضوع لدرجة انو نحن ( أنا والجمبي) خجلنا علينا من الجماعة الكذابين ديل وأتوارينا عن الأنظار ريثما الخجلة
تفك شوية قبل ما نرجع ونواصل متابعة هريك ليهم .. لكن يا أستاذ ..
عليك دينك وأيمانك وفي ذمتك إن كانت ضيقة واللا واسعة الكلام الحقيقي والصاح دا ( من وجهة نظري) لو كنت مع
النظام دا كنتا ح تقولو وتبحت فيهو كدا ؟؟؟؟؟؟؟؟؟
أظن وبعض الظن ليس أثم ولا يحزنون إنك لن تتطرق ليهو لا من بعيد ولا من قريب، بل وربما زينتو ولمعتو وطليتو
بماء الدهب ليسر الناظرين ..
لو كلامي دا غلط فلشنو من زماااااااااااااان ما قاعد تقول زيو كان في ( لألوان كلمة) واللا في المنابر التانية ؟؟؟
حقيقي يا أستاذ حسين اتا زول مبدع وأنا أحترم إبداعك دا وأحبو لو وظفتو للشفافية وكلمة (الحق والجمال والخير )..
نفسي أصدقك ياخ عشان إبداعك دا لكن سيعايرونني ب ( أبو قنبور ) حتما ولا بد .
غايتو
مافيش فائدة
كلهم كدا يا أبو الشباب .
تحركهم المصالح والأمزجة ولا بواكي على المساكين .
|
|
 
|
|
|
|
|
|
|
 Re: أستاذ حسين خوجلي.. دعني أصدقك (Re: طلحة عبدالله)
|
والله يا صديقي طلحة انا اختلف معك في هذا الشعور المغرض من جانبك..
حسين خوجلي زول جميل وكلّام وكتاب ومثقف ومتسق جداً جداً :)
ــــــــــــــــــــــــــــ..
اصبح مدمن لقناة ام درمان الفضائية منذ ان افرد حسين خوجلي لجناحيه الثقافيين السياسين الانتلجنتيين على أثير المشاهدة ..
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: HAIDER ALZAIN)
|
حاشاك إتا من القنبرة حاشاك....و....بعدين
أكان إتا يا طلحة أخوي أكان الزول القاعد جنبك
ياربي عندكم فكرة إنو تحت العمة الكبيرة دي في صلعة
حدادي مدادي ....:) وتحت العمة والصلعة بيكون في رقاد فوق رأي
فعليه خلّيهو يرقّع في مواقفوا و...دعّه يعمل..دعّه يتنخنخ ..دعّه يتنهنه...:)
وأوصيك ونفسي والقاعد جنبك بترديد البسملة والحوقلة ..
و...المقولة الشعبية الدارجة: المُدردم ماكلو ليمون..:)
وماتنسوا إنو القناة قناتو والريموت حقك....:)
ــــــ
و...ياخي عملّت لينا شنو في موضوع الصورة
ولاعايزني إتعكلت عليك فيها زي العكلتة الإتعكلتوها في
الصورة الهنا دا...ان شاء الله تطرشقو..حسين خوجلي أفضل مقدم برنامج تلفزيوني..غص...رتني يا حسين خوجلي‘‘)
وصراحة أنا البوست أعلاه أمتعني حدّ متعة الشاي اللي بي لبن القاعدين
تتمتعوا بيهو أنت والقاعد جنبك فلو ما مرّ عليكم
فااا حقو إتا والقاعد حداك تقزقزو بيهو الخميس وعقاب الشهر العلينا دا ..:)
وسؤال برئ :- هل لديك غير الشاي بي لبن إي "كمون فاكتور"* أخرى مع القاعد حداك....:)
ــــ
* الكمون فاكتور ياها القواسم المشتركة الواااحدة دي أكان صلعة أكان كرش....:)
هذا ....وأستغفر الله لي ولكم وللقاعد جنبك
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: أمير محي الدين محمد)
|
طلحة والشباب سلام..
شهادتي في حسين لا تعتمد..
فقد آلفته لسنوات خمس كنت التقيه كل مساء..
نتعشى سوياً ويمازحنا و(يطاعننا)..
رجل جميل بكل المعاني.. رغم اختلافي معه في الكثير..
أكثر ما أعجبني فيه ـ أيامها ـ ولاءه المطلق للشيخ الترابي..
وتحمل الكثير جراء ذلك.. فالرجل (شعبي) بطبيعته..
حسين خوجلي.. ظاهرة.. وليس إعلامياً فقط..
فهو رجل موسوعي ومثقف ومطلع وله في كل ميدان صولة وحضور..
قد يكون ما يجري الآن بترتيب واتفاق وتسهيل من أصحاب الشأن..
حسين خوجلي أوقفت صحيفته (ألوان) لعام كامل.. لمجرد أربعة أسطر
تتحدث عن طيار أجنبي يقود طائرة أيام غزوة أمدرمان في مايو 2008
عندما تضيق الأمور عند الحكام يفتحون مثل هذه النوافذ لسحب الهواء الساخن من صدور المواطنين..
وهذا هو المفروض..
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: طلحة عبدالله)
|
يا أميرهم جت عليهم
صلعة حسين خوجلي شوفة عين ما سمع يا حبيب
وحاة خوتك تخلع العيون من مجاحرا أو أيا كان مكانا ..
بصراحة موقفو الجديد إستفزاني والزول الجمبي دا أيما استفزاز
ما عشان أية حاجة إلا لأنو متناسي حكاية انو الناس ما ناسين ما كان عليه
في سالف العصر والأوان، بما يؤكد انو قاعد يلبس فيهم قنابير مع سبق الاصرار
والترصد .
البوست المرفق قريتو يا أميرهم وفعلا زي ما قلتا ممتع شديد ..
واتا عامل شنو بالله ووين الغيبة الطويلة دي ؟؟؟؟؟
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: طلحة عبدالله)
|
سلام يا أيمن
كنت أتمني والله أن يوظف حسين خوجلي مقدراتو وملكاتو الكبيرة جدا للمصلحة العامة
لكنه كالباقين تماما ينظر للأمور من ثقب الأنانية والذاتية الضيقة ..
عشان كدا ما متأملين خير يا أيمن أخوي.
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: طلحة عبدالله)
|
يا طلحة يا كاتبي الأحمر المفضّل
دا كلام شنو؟
| Quote: أظن وبعض الظن ليس أثم ولا يحزنون] |
الله سبحانه وتعالى يقول:
{ يأيها الذين آمنوا اجتنبوا كثيرا من الظن إن بعض الظن إثم ولا تجسسوا ولا يغتب بعضكم بعضا أيحب أحدكم أن يأكل لحم أخيه ميتا فكرهتموه واتقوا الله إن الله تواب رحيم }
ورسولنا الكريم قال
{ إياكم والظن ، فإن الظن أكذب الحديث ولا تحسسوا ولا تجسسوا ، ولا تقاطعوا ، ولا تدابروا ، وكونوا عباد الله إخوانا }
خت الكورة واطة وهدي اللعب شوية عشان تمرر تمريرات موزونة ومدوزنة
| |
|
|
|
|
|
|
|
|
Re: أستاذ حسين خوجلي.. دعني أصدقك (Re: طلحة عبدالله)
|
العـزيز طلحة ومن جاوره.. قلت:
Quote: كنت أتمني والله أن يوظف حسين خوجلي مقدراتو وملكاتو الكبيرة جدا للمصلحة العامة
لكنه كالباقين تماما ينظر للأمور من ثقب الأنانية والذاتية الضيقة |
في البداية أنا أفهـم تماماً أن يشكك الجميع خاصة مننا السودانيين في نوايا (الإسلاميين) حتى السابقين منهم الذين أداروا ظهرهم للحكومة وحزبها وحركتها؛ وحالنا هنا كحال ملدوغ الدبيب البخاف من مجـر الحبل.. وفي الآوانة الأخيرة دارت نقاشات بيني و عدد من الأصدقاء في الجانب دا بعـد الإعـلان عن (الحركة الوطنية للتغيير) والتي كان على رأس الموقعين أو المؤسسين لها عدد كبير من الإسلاميين (السابقين) أيضاً: الطيب زين العابدين، التجاني عبدالقادر، الأفندي الخ الخ، لدرجة أن كتب الأستاذ صلاح شعيب مقال نشره هنا أيضاً يقول لماذا لم يسموها الحركة الإسلامية للتغيير (أو هكذا)؛ لم أتداخل مع الأستاذ صلاح لكـن قلت للأصدقاء الذين رددوا سؤال صلاح: لأنهم لم يعـودوا (إسلاميين)، بل أن البروف الطيب قد ترك الحركة قبل المفاصلة حتى؛ ولأن الحركة تضم في الحقيقة شخصيات من مختلف ألوان الطيف منهم ناس إشتهروا بخصامهم ونقدهم إن لم نقل بعدائهم للإسلاميين؛ ولأنهم بقوا زينا كدة ينادوا بالديمقراطية والحريات العامة وحقوق الإنسان الخ.. وقلت لهم لماذا لم تسألوا مؤسسي حركة حق مثلاً : لماذا لم يسموها حركة حق الشيوعية؟ ببساطة لأنهم لم يعودوا شيوعيين! ولكـن عين السخط (تختلق) المعايبا.. عليه: نرجع لموضوعك :).. إنت عايز حسين خوجلي يعمل شنو مثلاً لتقول أنه قد وظف مقدراتو وملكاتو وقروشو وثقافتو الخ لخدمة المصلحة العامـة؟ وهل هناك مصلحة عامة يقدمها الإعلام الآن أكتر من تبصير الناس بحقيقة الفساد المستشري الذي أفسد حياة الناس وقضى على أحلامهم وآمالاهم في حياة كريمة؛ الفساد الذي حرمهم من علاج الملاريا حتى .. والفساد السياسي والإداري بل والأخلاقي الذي أورد البلاد والعباد هذا الدرك السحيق من التردي.. وكما علق أحد الأخوة أعلاه أن حسين خوجلي هـو (شعبي) أو أقرب للترابي الخ لكـن الآن كما رددت كتير قبل كدة حزب الترابي هو من يقـود تحالف قوى المعارضة.. والحزب الوحيد الذي ينادي بعبارات صريحة لا لبس فيها بإسقاط النظام، وبالتحالف أو التنسيق مع المعارضة المسلحة الخ، رغم إختلافي الكامل مع حزب الترابي ومع (الإسلاميين) عموماً.. وعليه أنا شايف إعتراضنا على ما يقدمه حسين خوجلي أو الشعبي أو (الحركة الوطنية للتغيير) هو نوع من دس المحافير لمن جا يساعدنا في (إحياء) أبونا السودان لا دفنه.. ياخي إعتبروهو زيو وزي (هيثم مصطفى) إن شا الله :).. أرجـو أن أعـود لأكمل كلامي..أو (يتبع) :)..
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: Isa)
|
سلامات يا عيسي
بى مداخلتك الفوق دي بقيت لي زي مشجعين الكورة الفي الجرايد الرياضية وفي البورد دا ذاتو
الهلال والمريخ يمشوا برة يتمرمطوا ويرجعوا بفضائح الدنيا والعالمين وبرضو الجماعة يتناقروا ويتشاكلوا
ويطلعوهم ولا ريال مدريد وبايرن مبونخ عشان بس رجعوا الدوري المحلي وغلبو نيل الحصاحيصا وأهلي القضارف .
والغريبة نسيان أو تناسي فضائح الفريقين ديل مستمر طول العام والأعوام التالية ودا كلو بى سبب التعامل مع الأمر
بالعاطفة بعيدا عن حسابات العقل والمنطق .
أها حسين خوجلي دا يا عيسي ما قللنا أبدا من مجهودو في كشف الفساد والمفسدين .. بل بالعكس أشدنا وثمنا وأديناهو
فوق حقو زيادة .. لكن بس قلنا إنو لو كان في النظام ما كان عمل البعمل فيهو دا .. إذا ما إجتهد للتقليل من أهميتو ..
والدليل انو قبل المفاصلة الشهيرة ما كان في حاجات زي دي بتطلع منو .
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: طلحة عبدالله)
|
| Quote: لو كنت مع النظام دا كنتا ح تقولو وتبحت فيهو كدا ؟؟؟؟؟؟؟؟؟ |
| Quote: قبل المفاصلة الشهيرة ما كان في حاجات زي دي بتطلع منو |
وأنا شايف دا (منطق؟) غريب يا طلحـة رغـم عن ـــــــــ أكرر ــــــ إحترامي لمن يشكك في نوايا الإسلاميين؟ وجعل شعاره مثلك: كذب الإسلاميين السابقين ولو صدقوا (تجاهل القواعد النحوية هنا مقصود).. وكلامك يشبه أن تقـول لزول كان ما عندو دين وقام أسلم، تقـوم تقول ليه: والله أنا صلاتك وصيامك دا ما راكب لي لأنو زمان لامـن كنت كافر ما كنت بتصلي ولا تنطق الشهادة.. أيوة من الطبيعي (في هذا الزمان وبأخلاق الكيزان بتاعت التبرير وفقه السترة والتقية) إنو لو كان ما زال مع النظام ما ح يقول كلامو دا بل ربما دافع عن الفساد كما قلت أنت، تماماً كما يفعل البشير وجماعتو الآن ويقولوا مافي اي فساد والعندو دليل يجيبو.. لا وكمان لو جبت دلايلك ومستنداتك يسقطوا حجرك، كمثال قضية ضابط الشرطة الشهيرة قبل مدة قليلة... فكونو حسين خوجلي تغير وأصبح يتحدث عن الفساد ويدعو للحرية والعدالة الخ فدا شي يحسب له ويحمد له ونشكرو إنو جانا في معسكرنا.. والعاطفة هي إفتراضاتك المتعسفة بتاعت لو كان وما كان .. ولو كان خليل إبراهيم ما زال مع النظام لما قتل هناك (والأعمار بيد الله) لكنه إرتضى أن يحارب النظام الذي كان جزء منه بل وأن يدفع حياته ودمه ثمناً للدفاع عن المبادئ التي أصبح يؤمن بها الخ..
| |
|
|
|
|
|
|
|
|
|
Re: أستاذ حسين خوجلي.. دعني أصدقك (Re: Isa)
|
يا عيسي يا حبيب
في حاجة إسمها كلمة حق أريد بها باطل وفي عقل يميز وفي عدم ثقة نتيجة تراكمات
وتجارب واختبارات قديمة يمكن وضع أساس الأحكام عليها..
كان يمكن يكون كلام صحيح لو الفساد البتكلم عنو حسين خوجلي دا بدأ الليلة واللا أمس
لكنه فساد قديم وموجود منذ أن جاء جماعته للسلطة بقيادة الترابي بغض النظر إن كانوا
مشاركين فيه أم لا .. فلماذا لم يقلب دفاتره أو حتي يشير إليه مجرد الإشارة من قبل؟؟
أنا على يقين كامل إنو لو كان حزبو موجود في السلطة لما جاء قرب هذا الفساد من أساسو
لكنه يفعل الآن مدفوعا بالمصلحة الخاصة التى لا علاقة لها بالإصلاح العام، بما يجعله
موضع شك لا يمكن ائتمانه على مصلحة المواطن وهذه وجهة نظري الشخصية يمكنك
يا عيسي أن تأخذ بها أو تتجاهلها لكن بالطبع لا يمكن أن تطالبني بتغييرها .
ثم ياخ أكرر ليك للمرة الثالثة إنو أنا ما بخست أصلا من جهودو في كشف الفساد
كما يفعل في برنامجو حاليا، فقط قلت إن ما يفعله هو كلمة حق أريد بها باطل فأين
التعسف الذي تكلمت عنه هنا يا حبيب ؟
نحن عايزين القوي الأمين . الأمين .. الأمين يا عيسي .
| |
|
|
|
|
|
|
| |
طلحة عبدالله
وضاح عبدالرحمن جابر
HAIDER ALZAIN
Frankly
فيس بوك
تويتر
انستقرام
يوتيوب
بنتيريست