|
يا زولْ جَدِيرْ بالإحْتِرامْ ......
|
يا زولْ جَدِيرْ بالإحْتِرامْ ...... One man with courage is a majority – Thomas Jefferson
"إلى (جَعْفَر خضر) وهو يُجالِدُ وحيداً كالسَّيفِ عُصْبةَ الْمُرجِفينَ في مدينةِ (القضارِف) ....."
(1) الْقومَة ليكْ يا "جَعْفَر" الشَّامِخْ جبَلْ وسلامْ يِغشِّيكْ السَّلامْ يا زولْ تَمامْ يا زولْ جَدِيرْ بالإحْترامْ تقعُدْ يقوم النِّيل يجيكْ شايلْ الأناشِيدْ بِشْبَهنَّكْ لمَّا تمرُقْ للصِّدامْ يغشاكْ سلامْ يا زولْ جسورْ ما بْهابْ نِزالْ يغشاكْ قُمْرِي مع الْحَمامْ يدِّيِكْ شبَّالينْ هدِيلْ ويغنِّي ليكْ لامِنْ فوانيس الْفَجُرْ يوقْدَنْ بَراهِنْ بين إيديكْ
(2)
وصَدقْتَ يا دُغْرِي اللِسانْ هُمَّ اللُصوصْ والأرزّقِيَّة، الأمنّجِيَّة، الإنكِشاريَّة .... النُّجُوسْ ديلْ الْمّجوسْ نارُمْ: فُلُوسْ ...... عَارِينْ يِطَوِّفُوا حولَها ...... وهاكْ يا ذِكِرْ: "أَسْرِقْ ...... وأَنْهَبْ ما تشاءْ عَذِّبْ وكِتِّلْ في الْخُلُوقْ ويحِلَّها الْحَلَّالْ إذنْ يوم الْقيامْ ......" بِئسْ الذِّكِرْ يا مُرْجِفينْ .....!!!!! ما بعَرفوا اللهْ .... أَهَلْ ضَلالْ ما يغُرَّكْ الدَّقِنْ الْكَبييييييرْ ...... ديلْ المفاسِدْ والْفُجورْ حَقِّنَّها ....... الدَّين هِنا، وهُمْ بَىْ هِنااااااااااااااكْ ......!!!!!! وأوَّلْ تَباديِ، وقُولْ معاي: هُوْ الْبِعرِفْ اللهْ بِشِيلَّو حُكْماً بالغَصِبْ ....؟! لا وبَىْ كِضِبْ قالْ أيهْ: أَمِشْ قّصرَكْ وسُوقْنِي على الْحَبِسْ .....!!!!! - ما نْسِينا نِحنا إذا نِسُوا - وينْ " التي أحسَنْ"، ووينْ "شُورى" ..... و"عَدِلْ" "لا ظُلْمْ" .... "لا إكرَاهْ" ...... ولا كَسْر الرَّقاب ..... ؟! باللهِ يا "جَعفَرْ" أخُوي، هَلْ ديلْ بِيِقْرُوا معانا آي نَفْس الْكِتابْ ....؟! ما أظَنَّهُمْ .....!!!!!! ما أظَنَّهُمْ .....!!!!!! ما أظَنَّهُمْ .....!!!!!! ولو ما الإله صَانْ الذَّكِرْ كانْ حرَّفُوا أُمَّ الْكِتابْ .....!!!!! ما بعَرْفوا اللهْ وناسْ ضَلالْ هُوْ الْبِعرِفْ اللهْ وعِندُو دِينْ بِقْهَرْلُو زول .....؟! ديلْ يا خِيْ قاهْرِينْ الْعِبادْ كَمَّينْ زَمَنْ خَسَفوا الْبِلادْ سابِعْ أرِضْ بَىْ ذِمَّتَكْ يا زولْ نضِيفْ: كانتْ كِدا .....؟! بلَدينْ بِقَتْ وسِتينْ بَلَدْ ....... بَسْ كُلُّو أوَّلْ ليهو آخِرْ ....... وكُلُّو ظالِمْ ليهو حَدْ ...... بِتفُوتوا زي ما جيتوا يا نسَلْ الْخَرابْ ....... بِتفُوتوا بالمركُوبْ ...... وباللعناتْ تبارِيكُمْ إلى يوم الْحِسابْ .......
(3)
الْقومَة ليكْ يا "جعفَر" الشَّامِخْ جبَلْ ما بِحْدِرَكْ بَطش اللِئامْ ما بِهِزَّكْ الرَّيح الْوَعِيدْ عَزمَكْ حَديدْ والْقَصَّة خِلْصَتْ يا بَطَلْ وكُلَّ الْهَلُمَّ الدايرة دِي خاتْمَةْ مطافْ يا "جَعْفَر" الشَّامِخْ جبَلْ قُومْ لَىْ حَصادْ غَرْس النَّضالْ آن الْقِطافْ آن الْقِطافْ آن الْقِطافْ ......
عصام عيسى رجب السبت 26 أكتوبر 2013 م
|
|
|
|
|
|
|
|
Re: يا زولْ جَدِيرْ بالإحْتِرامْ ...... (Re: عصام عيسى رجب)
|
Quote: آن الْقِطافْ آن الْقِطافْ آن الْقِطافْ ...... |
تسلم يا أستاذ عصام قصيدة تتحدث عن نفسه بأبلغ من اي لسان وكما تفضلت فإن وعده حق على هذه النظام الفاسد (وَإِنَّا عَلَى ذَهَابٍ بِهِ لَقَادِرُونَ) والوعد!! الوعد!! للوطن العزيز (فَأَنشَأْنَا لَكُم بِهِ جَنَّاتٍ مِّن نَّخِيلٍ وَأَعْنَابٍ لَّكُمْ فِيهَا فَوَاكِهُ كَثِيرَةٌ وَمِنْهَا تَأْكُلُونَ)
| |
|
|
|
|
|
|
Re: يا زولْ جَدِيرْ بالإحْتِرامْ ...... (Re: Muna Khugali)
|
Quote: الْقومَة ليكْ يا "جَعْفَر" الشَّامِخْ جبَلْ وسلامْ يِغشِّيكْ السَّلامْ يا زولْ تَمامْ يا زولْ جَدِيرْ بالإحْترامْ تقعُدْ يقوم النِّيل يجيكْ شايلْ الأناشِيدْ بِشْبَهنَّكْ لمَّا تمرُقْ للصِّدامْ يغشاكْ سلامْ يا زولْ جسورْ ما بْهابْ نِزالْ يغشاكْ قُمْرِي مع الْحَمامْ يدِّيِكْ شبَّالينْ هدِيلْ ويغنِّي ليكْ لامِنْ فوانيس الْفَجُرْ يوقْدَنْ بَراهِنْ بين إيديكْ
|
شكراً عصام والتحية عبرك للشامخ جعفر الذي أصبح رمزاً للثورة ورمزاً للجسارة والصمود.
| |
|
|
|
|
|
|
|