|
|
 الشاعر القدال لا يصدأ
|
قصيدة قديمة للقدال ,, ولا زال هو ذات الرجل
تحية للصديق القدال
وماذا تري عيونك يا صاحب
|
|
 
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
لقينا عوجنا قايم بينا ما عرفناهو
ما قلنالو كيف حالك ..
نسينا مجامر التجريب
على برد المحن والعادة كان تهمد
قسينا الظاهر الباطن
ويوم حنينا كان الزحمة شالت من قلبنا الرحمة
ما قالتلو كيف حالك ..
دحين كيف الدبارة
وكت تمش في الزيفة وحيدك
دحين كيف الدبارة
وانت ماك فارز طلوع الروح وغميدك
دحين كيف الدبارة
وجرحك الدافن دشر جواك
لا مسك بطيب تاني .. لا مسك بطيب تاني
إلا تلاقي حد السيف
على لب الجرح نازف
بعد جواني يصبح تاني براني ..
***
مشيت يات من طريق
غشيت يات من مدينة
لقيتها زي طمل الخريف طينها
مشمر جيتها لي وجع المخاض
البر متل موية الرهاب
والوحل غطاني
مشيت يات من طريق
الناس مزغلله في الفراغ
وهموم مجدعة في التراب
وإيدين تخاتف ..
شن تخاتف ماني عارف ..إلا جيتا
وجيتا لي وجع المخاض ...البر متل موية الرهاب
وقفت أعاين في الخليقة
لقيت بتاوق جوه روحي
ضهبت في موج السراب
عريان وسط موج العرايا
سألت الجمبي : قتلو لحم وشيشك وين ؟؟
ضحك بين دمو عاين للورايا ...!
شفت عضامي في دمعوا المرايا ..!!
مشيت قدامو شفت عضامو في دمعي المرايا !!!!!
وشلت خطايا لي بلداً
قبيل ظنيتها فوق ..فوق للثرايا
لقيت كل الخلوق قامو ..
فِرح فرحاً .. فِرح فرحاً
فِرح فرح اللقا الرايحة
قعد وحيدي في نص السهل دامع
بكيت بالحيل ..قدر ما الله أداني ...
وقلت يا اخواني : إن الطيبة غطتني
دحين كيفن تكون الخجلة سالباني
ولا مسك بطيب تاني .. لا مسك بطيب تاني
إلا تلاقي حد السيف
على لب الجرح نازف
بعد جواني يصبح تاني براني .
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
بداخل القصيدة مضمون فلسفي عميق ,, ان الانسان يعتاد ما يراه كثيرا , دون الاعتبار لخطأه أو صوابه ,, بل يصل به الامر ان لا يعرف انه خطأ ,, لذا لن يسعي لتغييره ,, فالتغيير يستوجب الوعي اولا
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
لسعة القدال المعرفية , فهو قادرا علي إنزال اصعب المفاهيم الفلسفية بلغة دارجة بسيطة , ولمعرفته بالتراث السوداني الشعبي فهو كثير الاستشهاد به , واستحضاره ,, وادخاله بيسر للنص دون ان يحشره حشرا
| |
|
|
|
|
|
|
|
|
|
Re: الشاعر القدال لا يصدأ (Re: سيف اليزل الماحي)
|
مرحبا سيف
وحبابك
شاعر حديث وهو يتقدم علي شعراء عصره بقوة الفكرة وعمقها , ونقل الشعر العامي نقلية نوعيه ,, فرغما عن عاميته الموغلة في غريب الكلمات التراثية إلا أن الفكرة تتجاوزها ,
والرمزية في شعره عالية المرقي وليس رمزية ابهامية
تحياتي
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
| Quote: لسعة القدال المعرفية , فهو قادرا علي إنزال اصعب المفاهيم الفلسفية بلغة دارجة بسيطة , ولمعرفته بالتراث السوداني الشعبي فهو كثير الاستشهاد به , واستحضاره ,, وادخاله بيسر للنص دون ان يحشره حشرا |
القدال وماادراك ماالقدال
إنه الشاعر الذى طوع الكلمات
وجعلها غذاء للروح والقلب والعقل وأيقظ بها الشجون
شكرا ابوسن
| |
|
|
|
|
|
|
|
|
Re: الشاعر القدال لا يصدأ (Re: Mudather Kunna)
|
لو الذهب يصداء هذا البشر المبدع لايصداء
يا اخي والله القدال دا مش يخليك تتسلطن بالشعر يخليك تعيش في جو اقرب الى الدرويش والمجذوب في حلقة ذكر في ليلة محضورة
------------
والله يا صديق كنت عاوز افتح بوست خاص بمرابيع القدال البنشرها يومي على صفحتو على الفيس بوك لكن خلاص لقيت ضالتي و كل يوم بجيب ليك المربوعة وعليك الله انت املاها تحليل
يا سلام القدال عالم جميل وطـــز في زين
شكرا عبد الحفيظ
وهاك اول عربون ،،
Quote:
أولاد بَـمْـبَه شُـطَّار، في المِحَـنْ فالحينْ
عـارفــين كِـذْبَـهُـم يـِتْبَرَّا مِنُّو الدِينْ
عــارفــين المصايب سُودا في التَمكينْ
دَقـُّوا الجُـوز عديل قَـبَّال يَكيلُوا الهِـينْ |
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
سلام زميلي عبد الحفيظ وزوار البوست..
قرأت مداخلة الزميل علي دفع الله وأبيات القدال التي أستغرب لها كثيرا..
......
Quote:
Quote:
أولاد بَـمْـبَه شُـطَّار، في المِحَـنْ فالحينْ
عـارفــين كِـذْبَـهُـم يـِتْبَرَّا مِنُّو الدِينْ
عــارفــين المصايب سُودا في التَمكينْ
دَقـُّوا الجُـوز عديل قَـبَّال يَكيلُوا الهِـينْ |
إذ كيف يمكن لأي مثقف وشاعر معروف ومحبوب بقدرات القدال أن يكتب ما كتب في حق المصريين؟
يسمي المصريين بأولاد بمبة وهي أشهر راقصة في التاريخ المصري في عهد الإستعمار..
الشعب المصري العظيم الذي إتحد علي كلمة ضد الإخوان وسعي لحريته مضحيا بدمائه؟؟
لماذا يقلل القدال من قيمة شعب عظيم له تاريخه القديم والحديث؟؟
يكفيهم فخرا انهم خرجوا رجالا ونساءا وأطفالا لإزاحة الهم من صدورهم جميعا ولم يتركوا أبنائهم يموتون برصاص الغدر وحدهم..
علينا ان نحترم الشعوب وقدراتها ومكانتها ..
عيب والله عيب كبير وخاصة لما يجي من المثقفين والمتعلمين..
...........
...........
مع التحيات لكم جميعا..
..............
| |
|
|
|
|
|
|
|
|
|
Re: الشاعر القدال لا يصدأ (Re: Muna Khugali)
|
مرحبا مني
وحبابك
لا ادافع عن القدال
ولكن النص فيه اعجاب بالمصرين , واعجاب بذكاءهم وقراءتهم للتاريخ , واستلهامهم لتجربة السودان
بمبة فنانة مصرية وراقصة استعراضية , والرقص في مصر فنا , ومن تؤديه تعد من نجوم المجتمع ,, بل حتي ان لهم معهدا لتعليم الرقص الشرقي
ولو اردت الحديث حول اساءة المصرين للسودانيين لجلبت لك , بدءا بمباراة مصر في الخرطوم قبل سنوات وهجوم كل القنوات المصرية علي الشعب السوداني ,, وانتهاءا بتحول حلايب لمدينة مصرية
كامل الود
| |
|
|
|
|
|
|
|
|
|
Re: الشاعر القدال لا يصدأ (Re: Muna Khugali)
|
كتبت الزميلة منى خوجلي
Quote:
علينا ان نحترم الشعوب وقدراتها ومكانتها .. |
والله انسب وصف يمكن يطلق على الشعب المصري هو الذي اطلقه القدال (اولاد بمبة ) سواء كانت رقاصة او مستوطنة شارع الجامعة العربية
يا استاذة لو شفتي هذا الشعب وكيف بنظر لينا اصلك ما كان زعلتي من الوصف دا ،،
---------------------------
عموما رأيك مقدر ومحل احترام ولكن تأكدي كل ما اتجهنا شرق تهدر كرامتنا وانسانيتنا ،، ان الاون للاتجاه غربا وجنوبا هناك ذاتنا ،،
شكرا منى وكنا دايرين ننقل بقية المرابيع لكن اعرف حساسية الزميل عبد الحفيظ من اللت والعجن والتأمل والقراءة الممكن تجلب له مشاق
عذرا عبد الحفيظ سأتوقف عن نقل ما يبوح به القدال كما وعدتك في خيطك
ودمتوا طيبين
الاخت منى / الاخ عبد الحفيظ
| |
|
|
|
|
|
|
|
|
|
Re: الشاعر القدال لا يصدأ (Re: علي دفع الله)
|
شكرا عبد الحفيظ زميلي علي ردك اللطيف..
انا أعلم أن هناك من يشتمنا من المصريين ..كما أن هناك منا من يشتم المصريين.
الا أنني هنا أتحدث عن المتعلم والمثقف والذي لا يجب أن يقع في فخ التعميم ولا ينتقص
من قيمة شعب خاصة وأن ثورته كانت عظيمة..وخاصة إن جاء الحديث
من شخص في قامة القدال...
...............
...............
الاخ الفاضل علي دفع الله..
كل ما يكتب معرض للنقد..للقبول أو الرفض او حتي التحليل المجرد..
أرجو أن تستمر في كتابة أو نقل ما تود فليس هناك شيء شخصي..
تحياتي ومودتي..
..............
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
القصيدة السابقة من القصائد القديمة للقدال , وكنت معجبا ولا زلت بها
فكأن التاريخ يعيد نفسه , ولكن اعادته ملهاة كما تقول المقولة الشهيرة ,, ودونكم ما يحدث الآن كأنه احد مسرحيات العبث
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
شملة كنيزة (محمد طه القدال)
الوادى البهل نوارو سجادة..
ومرق من حولو .. فضلة خير..
اشوفو يخب مع نسامو
جقليباً غلبنى قياسو
لا قالتلو تردح فى البلا الياباك..
ولا حنت .. وكت غنت حداها نفوس.
واشوفك فيها .. تمرقى من عرق ريحانها ..
تدحلى في التراب تندسى..
تاخديلك نعاساً حول..
وتطلعي تاني .. زي بهرة شعاع فجراوى..
فوق وادى الودي.. ناموس.
اشوف الروس ..تكربت في البلود الساحقة..
قت : شن لاحقة ؟؟..
ياقلب البلد .. يلقاك..
يا درب المدد .. يلقاني.
وين لاحقة النفس يا خية؟؟
شن غير النفس متماحقة؟؟
لا أرجاها لا ترجانى..
خلها للشجر تنسانى..
غلطان العليها يكوس..
ويبقى عليها .. قول من قال
يا شملة كنيزة الواسعة
هى تلاتية .. لكن قدها رباعي.
***
نجمات الصبح شهدن على الما صاحي..
ما سلبني كفكيف دمعي يوم قلبني..
في جمرك البهب قداح
وما ترتاحي من تالايا ما ترتاحي..
غلطان البجيك مداح
قم من نومي شفتك صاحي
ترجعى في الزوامل الهاملة
وقتلك تاني.. غلطان البجيك مداح قم من نومي شفتك صاحي
ترجعي في الزوامل الهاملة
دربك ضل..
دربك بالصراط متلاوي..
منها لا بتجيك العتمة..
لا من شكك تتداوي..
ندهتك واقعة قناعتنا بين لومك وبين لومي..
حسبت البال..
ميقن عندى من زل العتر متروس
قبضت الايد .. أفتش وين قليبي!!..
الايد محننة .. والقلب متباكي..
من دون النفس مديوس.
نعلت ابليس ..
ندهتك تاني في سري..
ان صح المدد طالت..
بيصبح حسي كيف يغباك!!
ندهتك تاني .. لا اتقنعتي لا هماك
زمازمك من صبيب جلدى..
ولهاتي الجلدة .. صبحت قدة من تالاك.
ولا اتقنعتي لا هماك!!
وان قفيتى.. ما برمي الدمع بتاً
ولا برمي الدمع بتاً
أعقبى الليل يطول واقصر
أعقبى البينا ايدينا البقت شمسية
نجمة ليل
أعقبى بلاكى.. شن ببقالي..
فيك المونة.. فيك الصرة مدفونة
وما بين الوحيح وغناي
وما بين الرحيح وجفاك
تضيق الواسعة
تصبح شملة .. هى تلاتية لكن قدها رباعي.
***
جانا منادي غنى معانا
في غبش الليالي الضامرة
ضارب نوبة..
سارب حسو للسدد مسامعه الطين
وضارب الغفلة هباعي.
وكت يا ناس مدن تبلع مدن بحالا.. تهرس ناسا
كرفتى الليل متل غرقان يجابد في النفس
قبلتي .. شفت الشفع البتجارو في عينيك..
رفعت ايدي لقلب السما السابع..
لقيت ايديك
وكورت يا ناس مدن تبلع مدن بحالا.. تهرس ناسا
عرفنا البينا .. حتحتنا النجم بغنانا
كان الصوت مرق واحدة
قلنا النوق متين دارت تصاقع الجرة..
تهرج في الصقع ضراسا
عرفتي البى.. زغاريدك تصلصل
قلنا : كل ما امتداد يمتد .. نبني حواه..
كرتونة وزرايب ناس
ومتل الكان ضحك جواك
جفلت عليك قاصد صدرك اتحوابو قعقع تاني
كيف يا فقرى تزرب بالعمائر ساس؟؟!!
ومتل الكان ضحك جواك
اقالد فيك تمسكي فى الضلمة ضراعي
يرجع للضلمة غنانا
وين كبر العمائم جملة؟
وين طول العمائر جملة؟
وين أناس.. غناياً للكضب والصح.. مع غنانا؟!
غنوتك طايرة
شن بسويبا غير ما تبقى مجداعي!.
و جانا منادي غنى معانا
من غبش الليالي الضامرة
ضارب نوبة..
سارب حسو للسدد مسامعه الطين
وضارب الغفلة هباعي.
يا شملة كنيزة الواسعة
هى تلاتية .. لكن قدها رباعي
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
ياسلاااام،والله ياعبدالحفيظ اخوي،،الكلام تقريبا كلو راقد جواي ليهو اكثر من ربع قرن،،لكني والله كانني اقراه اللحظة،وافهمه ذات الان،،وانفعل به انفعالا يملا علي كل خلجاتي...
ياخي الشعب السوداني ده مبدع ابداع،،لكن مصيبتو الاقو فيها،،نصيبتو كبيرة يا عبدالحفيظ اخوي.
عليك الله شوف الزول ده ادخل في النفوس كيفن،،واحوم وسط الاحوال والحالات،بعمق،ودراية،،ومعارف يختار لها عباراتها الجزلة....
مزنوق فوق شغيلة،زرت ###### في طاحونة القرعي،لكن ميسك ده بعدي في مرواحي،وامكن اكان الله قسم،ابقي داخل تاني.
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
فرق يا الضيف
فعل الغضبان
أمْ فرفيرات الحُزني
شن القعدة يا أبو السرة
شن القعدة ..
في ضل العمارات ..
أبــ كميرتن برا
ضقنّا الحنضل اليانكي
وبلعنا المرة ...
كِملت كوتت التمباك
صقعنا الجِرة
وكت إتقفلت شقيش
قَبْل بالمرة ...
نرمي أمرنا
لي بلد المعاني الحرة
هذا السحر اللفظى يكفى بنفسه كل مقال ..
تحياتى صاحب البوست و ضيوفه
| |
|
|
|
|
|
|
|
|
|
Re: الشاعر القدال لا يصدأ (Re: حسام عبد الرحيم)
|
مرحبا حسام
وحبابك
وكت اتقفلت شقيش قبل بالمرة
نرمي امرنا في بلد المعاني الحرة
ورمي القدال امره في بلد المعاني الحره , وغني للوطن وغني للوطن الاخص حليوه وغني للحبيبه امونه وغني لحميد
ويا حميد اقيف شوق الخلوق محنانة
كفكف دمعتك
والعبرة فوت خنقانه
عسلك سال بحر
فوقو النحل ونانه
يات من جاك غرف
جازاك دبابير دانه
وكتب بنونته لحميد ,, وغني للجنوب ولخفاض البنات ولضحايا السيول والامطار , وغني لنفير
وكان حاضرا حزنا وفرحا ,,
وقدم البنات العيونهن هارجة زي جهر الكهارب في المدينة علي ضو الرتاين
وغني للوعي ويا سيد جمال الكون
و
كل ذلك كان من اجل الوطن
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
من الفيس
سلمي بت الشيخ سلامة
محمد محي الدين ! يااااه ! وين الشاعر ده ?
واذكر وانا يافعا فكريا وثقافيا واتلمس طريقي سمعت له قصيدة , رسخ في ذهني منها منذ ذلك الحين بيتا وحيدا مباغتا
لا إله سوي البندقية
والحاكمية للشرطة العسكرية
واظنه من مدني , ثم شهدته هو وقدال وحميد في ليالي شعرية متفرقات ,, كان شاعرا جميلا
القدال ترك الطب انتصارا للأدب ,, وكسب السودان صوتا متفردا وغناءا عذبا جميلا
ان القدال من الرجال العصافير كما قال الشاعر فيصل
ويعجبني في شعره رصانته ورمزه وقوة تعبيره وعدم ميله للهتافية الثورية , فهو ليس شعر مناسبات , بل شعرا ينمو مع نمو الوطن
سلمي
فرحان بيك ياخي
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
من الفيس
سلمي يا خيه
كتبت ليك كتابه كتيره , عن محمد والليالي الشعريه التي تتخللها جماعة السديم المسرحيه
وحملتك سلام لمحمد محي الدين
وونضمت نضمي
واعتمدت الرد وطش
وحات الرسول طش
وزعلت وهسه زعلان
لكن بجيك صاد
| |
|
|
|
|
|
|
|
|
|
Re: الشاعر القدال لا يصدأ (Re: الليندي)
|
مرحبا اللندي وكتر خيرك
ولعله سلفادور اللندي ذلك الرجل العظيم
تعرف القصايد الجبتها انت دي علامات فارقة في الشعر , شعر القدال وعموم الشعر
ورجعلك قليبي المهضلم
يراجع معاك صنوف الغناوي العصية
يراجع معاك الكلام القبيل استبان
شوكران
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
مرحبا عبدالعزيز
وحبابك
ياخي راجيك , الزرة حاصلة وكلنا زرة كــــــــــلب في مولد
القدال من الشعراء البتتكشف ليك عبقريتو كلما اعدت قرايتو ,, هسه قصيدتو شمله كنيز دي ليها كم وتلاتين سنة , وشبه حافظها ,, داير اكتب عنها ,قعدت اقرا فيها زي الشفتها اول مرة ,, وخشت جوه وابت تمرق لي ,, خشت منطقة النشوي وابت تمرق
راجيك تنفط يدك شويه وتجي مارق علينا
وراجي الاستاذه سلمي الشيخ سلامه تجي نابله من تحت
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
طريتك ليل وبرقا في المشارق لال
وبلل العينة زي دمعي المحقن شال
طريت الطيبة طيبة امي
طريت فرحي وطريت المي
وطريت همي وريدة اهل الفريق للقال
طريت الناس وظلم الناس
رضيت يا دنيا شلت احزاني فوق الراس
اكان يا دنيا تنجمي
قالو البسمة للتانين ودمعك ليك وبيك وناس
وعرق الطيبة عند اهل الحنين دساس
بدور يا ناس
بدور متل الخريف ما عاد بعد غرب
متل ناس الله ما بتفرح بدور افرح
وبعد الصبنة والسفاي
وجلدا في العضم كرب
يجيني رشاش واشم الطين
واكج حرماني فرقان ريدة للغاشين
بدور افرح
واقوم يا ناس
بعد هودت فوق الصي
اعاود لي بلود الرب واتيقن
واشوف الرحمة شوف العين
يزول البي واقوم افرح
تشقشق فرحة الاطفال في الكون خير
وخضرة
وضي
والحنية ما لاقيها من الناس اشيله اقصيد
واسيها سبيل سبيل للناس
فرح يملي الحنينين ري
اصلو البسمة للتانين ودمعك ليك
وبيك وناس
وعرق الطيبة عند اهل الحنين دساس
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
Quote: شملة كنيزة (محمد طه القدال)
الوادى البهل نوارو سجادة..
ومرق من حولو .. فضلة خير..
اشوفو يخب مع نسامو
جقليباً غلبنى قياسو
لا قالتلو تردح فى البلا الياباك..
ولا حنت .. وكت غنت حداها نفوس.
واشوفك فيها .. تمرقى من عرق ريحانها ..
تدحلى في التراب تندسى..
تاخديلك نعاساً حول..
وتطلعي تاني .. زي بهرة شعاع فجراوى..
فوق وادى الودي.. ناموس.
اشوف الروس ..تكربت في البلود الساحقة..
قت : شن لاحقة ؟؟..
ياقلب البلد .. يلقاك..
يا درب المدد .. يلقاني.
وين لاحقة النفس يا خية؟؟
شن غير النفس متماحقة؟؟
لا أرجاها لا ترجانى..
خلها للشجر تنسانى..
غلطان العليها يكوس..
ويبقى عليها .. قول من قال
يا شملة كنيزة الواسعة
هى تلاتية .. لكن قدها رباعي. |
القدال أمره عجب..................
شملة كنيزة ........... ا تلاتية ولكن.................
قدها رباعي...................!
الوادي بهل نوارو وين...... في سجادة
يخب مع نسامو....... وجقليبا....
شكرا عبد الحفيظ أخوي
ضحوي القدال.......... وصبيبو المو نقناقة........
وواديهو البهل نوارو في أرض الشعر العامي
القدال شاعر جمع بين جزالة الشعر والمفردة العامية ودلالاتها العميقة
وبين الألق والإلقاء المهول
وفوق ذلك وهاطة النَّفس...........
التحية لك وله وللمتداخلين جميعا
| |
|
|
|
|
|
|
|
|
|
Re: الشاعر القدال لا يصدأ (Re: عبيد الطيب)
|
ياعبدالحفيظ ،ياسمح ويا ذين،،تاني سلام،،
ياخي تاني جابني ليك نداء الحنين،،بس اول داير احكيلك عن ذرتي الاسع انا فيها،،تعرف انا قاعد في بلد بعييييد،ذي الاف من غجر الزمان الجديد،،وبتعرف قرايت الكبر،،هادي المورط فيها اخوك اليومين ديل،،وتقرا الحاجة عشرين مرة يا عبدالحفيظ اخوي،،وشوك،بي قد القفا،تمشي الشغل وتجي تلقي وله كلمه،،تبخرت تماما،،
وفي البال البلد بطيوفه وشخوصه،يتغشاك نيلا لا يمل الهدير،ضفاف شمخ فوقها النخيل،،وحقولا،قبل زمان القحط والمثغبات،ما ملت من عطاء،ويتغشاك البلد بناسه الطيبين فقرهم العزيز،،فتحن،تحن،،حن يقالدك اتبعه،،تحن لحلاله،،حليوة وحلتنا،،لنيله المدوده جنازنا،،وناسه الذين ادمنو الرحيل.
ثم تصحو،لتجد حولك بلادا كاملة العافية والبهاء،بلادا بناها اهليها حجرا حجرا،زرعوها شجرة شجرة،،فصارت جنة ونعيم،،اما نحن ،فننتفخ لوجودنا في نضار لم نصنعه،وعمار وجدناه هكذا،،تاركين وطنا،،به كل شروط النماء،،ولكن ياللحمق.
ساعود لا ارتشف معك من سلسبيل كاسك المعتق،الخواجة حضر مع نوح في سفينته،ويحفظ جل المعارف،،وزارني اشد من كديس في شوال..
ونحن قربت تنتهي رحلة العمر والخيل قد تعبت،،ولم يعد مجديا ان نلهب ظهرها بالسياط.
تحياتي ايها القابض علي جمر السماح،المشغول بالصباحات والحقول،الحالم والعامل لاجل زمن ينهزم فيه القبح،وينتصر الانسان والجمال.
| |
|
|
|
|
|
|
|
|
|
Re: الشاعر القدال لا يصدأ (Re: عبيد الطيب)
|
مرحبا عبيد
وحبابك
للقدال
فجراوي
ضحوي
ليلي
وليهو مطرا زي الطرفة صبيبو ولا بقيف
وبريقو قبلي دايما شالع
علا لكن
ما خايف المطر
يتحاشى الضهاري الراجية قولة خيرا
ولا خايف المطر
يمشي على الصحاري تلمو في بشكيرا
ولا خايف العشم
يتناسى العشامى ونيما ياكل نيرا
ولا خايف النفس
تتذكر نفسها وتنسى يوم حِدّيرا
خوفي على البلد
الطيب جناها وقمنا في خُديرا
شاحدك يا كريم
لا تحصل خراب لا أرجى يوم ودّيرا
للقدال لغة تشبهه , رغما عن قوله ونرمي امرنا لي بلد المعاني , قاصدا البطانة وشعر الحردلو وود شوراني وغيرهم ,, لكن لغته هي لغة وسطي ما بين لغة المدينة الدارجة ولغة البطانة ,, فلا يعجز طلاب الجامعات آنذاك من معرفة لغته إلا قليلا , فقد توجه لطلاب الجامعات ,, مناطق التنوير ,,
لغته كما قلت جزلي وتطريبيه ,, وله اداء متفرد
شكرا ياخ ونرجو ان نساهم في إعلاء هذا الشعر المتفرد
| |
|
|
|
|
|
|
|
|
|
Re: الشاعر القدال لا يصدأ (Re: Muna Khugali)
|
وجود يا نمي بعد الصدمة جود لي شعبي
جيب انسابو
وجود يانمي قول لي شعبي حسك في السكات شن نابو
عشرة سنين علي ربقي اللحو والجابو
صحت فيَّ اباليسا تبتلو تابو
حليلك من هضاليم الخلاء البتشابو
ومن تفاحِك الفدع السبيط ربرابو
الخلاني ازازي مع الشدر سرسابو
صُلح المشتق الحزم الوسط قُرقابو
ووين يا اب عازة دفيق المشيل كابو
وين يا اب عازة ايام المشبرق نابو
نحن الكي جديد ما بنخشي من ديدابو
لا الزمن الحزين بحقرنا لا دبابو
نحن اهل الجمال والذوق انحن اصحابو
فينا الفن مقسم في الحضور والغابو
للحرية نحن عيالنا كيف بتشابو
يا طالب الريال نحن الوطن طلابو
يا ولدي العزيز وِقود محارق غابو
مارق للمحاص زرع الفتق تيرابو
سارق منو دقن الغية روح اترابو
ما شيبني غير راس العيال الشابو
البلد الربط قولو وعلت احزابو
بكرة يفتح الدرس القفل اسبابو
الجامعة بتعود والشعب بجدع طابو
والفاكرنا غوش خلو اليضري ترابو
ما بنساك يا العرف الاله في كتابو
تقدل في الجنان ميتك توقي رحابو
ناس الدنيا عاملين الدنية وعابو
ساوين البلد صيا عوت كلابو
انت مرقت ل الليلة الله غيرك هابو
والدخلت علي البلد العزيز مارقابو
قالولنا الصبر واجب حزم لبابو
وين للغير التاويوتا ظلل بابو
شن مارضني غير الفي القلب جبجابو
شن معني السلام ل الليلة واقفة حرابو
يا وطن العزاز مين البيدور اسلابو
بكرة الصح بصح كل فار وياكل صابو
| |
|
|
|
|
|
|
|
|
|
Re: الشاعر القدال لا يصدأ (Re: الامين عباس احمد)
|
يا سلام يا اللمين عباس ياخ
قصيدة عشرة سنين من القصائد التي تستحوذ علي التصفيق المتصل ,, قالها القدال بعد مضي عشرة سنوات من حكم الانقاذ وتبين فيها سخرية القدال
عشرة سنين بنات حفرة
وبنات الغش
ودقنا لطعه فوق الوش
وشال شاويش
وسمنه جديده
لا بتداري لا بتنغش
وزير قدامي
بالنهب المصلح تام
والقلل الوراهو حمام
يخجن كان ضحك او هش
شوكران ياخ
| |
|
|
|
|
|
|
|
|
|
Re: الشاعر القدال لا يصدأ (Re: الامين عباس احمد)
|
حبابك الامين عباس
كتر خيرك كتير
هي فعلا قصيده ما معروفه , وقد تكون كتابتك دي اول مدونه ليها في النت ,, انا سمعتها سمع منو مباشره كذا مره ,, وفتشتها ما لقيتها في النت ,,
شكرا كتير ليك
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
.....
يامحبوبى هاك منى مكتوبى
صداح الغنا المكتوم ومداح الجمال والنور
وكلمه حب فى قلب حبيبى وقليب حبيبى من توبى
تشوش جوه قلب النيل مع اللهفه العلى ولدى
ويامعشوقى ليك من قلبى كل الشوق
ويا الخرطوم اذا نامت عليك عيون
تشوف الضلمه فى الضحى والنهار مطلوق
ولو غنيتى والغنا للسلام مخنوق....
اعرفى انك الزمن الجاى شروق..
واعرفى انك الزمن الحبيب وحنون...
ويا الخرطوم عيون الحق ما بتنوم
عيون الحق ما بتنوم
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
البلد المشتت خيرا في الاوحالويات من جاها في دغش الصباح فجاهابالدبابة والارتالوعمة وكاكي لا راي لا فهم لا مال جاك من ميسو قال بسم الله آية وراية آية وراية آية وراية نازل في المغارب سافيطالع في المشارق بالع الجنا جنا من لحسة بيان انقاذو لامن غناواصبح في المحارم ضالع في فد فنة عشرة سنين لا هناها لا مناها لا طمن عليها البال ما بننساها وما بنتكل عليك غناها يا ليل المناحة الطال وعشرة سنين صبر ايوب وسف الطين وسلق الطوبوبطنك طاوية شديتي الحزام مكروب ومديتي القرع والعين وعشرة سنين مزحلقة هاوية ما معروف غرارك وينولا كان النزول محسوب
قدال
قصيدة عشرة سنين قالت ما يقوله الساسة ولكن في لغة شعرية أخاذة
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
شكرا عبد الحفيظ
ونحنا فرحانيين عشان القدال حيكون معانا الشهر دا فى دبى
مجلة دبى الثقافية تنظم مسابقة ثقافية على مستوى البلاد العربية فى الشعر والرواية والمسرح
كنت محكم فى مسابقة المسرح
يقام احتفال تكريم للفائزين ولجان التحكيم
وتمت دعوة ادباء عرب
طلبت منهم ان ارشح اديب سودانى
تشاورت مع مجموعة من الاصدقاء المثقفين
رجحنا القدال
حتى نتيح فرصة للجمهور السودانى امسيات مع القدال
| |
|
|
|
|
|
|
|
|
|
Re: الشاعر القدال لا يصدأ (Re: mohmmed said ahmed)
|
مرحبا محمد سيد احمد
وحبابك
هنيئا لكم بالقدال , وشعر القدال مسموعا ارسخ في الذهن من مقروءا ,
أضف لذلك اداؤه المتميز , فالقدال يجسد التصاوير بنبرة صوته علوا وانخفاضا ,, غضبا وفرحا وحنينا , فتحسه كشلال منسكب من قمة جبل عالي ,, متحدرا وتبطئ بعض الصخور سرعته فتخاله هدأ ,, ثم يباغتك برعد انهماره ,, ويسير منبسطا حينا رقراقا كعذب النهر العاشق
تحية لكم جميعا وتحية للقدال
وقول للبلد
شايل غناوي الحزن ليش
والناس المادَّه عيونها تنادى الرحمه،
عيونهم جَــفَّنْ
الناس الشادَّه بطونها..
الرِيقَـه( ) الدَخَلَتْ لا زال جوَّه ..
بطونهم خَـفَّنْ
الناس الكادَّه( ) الجوع .. اللاحسه الكوع..
الخيلهم نَـفَّنْ( )
الناس الحادَّه( ) علي الما مات ..
الحَيْ ومكَـفَّـنْ
| |
|
|
|
|
|
|
|
|
|
Re: الشاعر القدال لا يصدأ (Re: Muna Khugali)
|
Quote: إذ كيف يمكن لأي مثقف وشاعر معروف ومحبوب بقدرات القدال أن يكتب ما كتب في حق المصريين؟
يسمي المصريين بأولاد بمبة وهي أشهر راقصة في التاريخ المصري في عهد الإستعمار..
الشعب المصري العظيم الذي إتحد علي كلمة ضد الإخوان وسعي لحريته مضحيا بدمائه؟؟
لماذا يقلل القدال من قيمة شعب عظيم له تاريخه القديم والحديث؟؟
يكفيهم فخرا انهم خرجوا رجالا ونساءا وأطفالا لإزاحة الهم من صدورهم جميعا ولم يتركوا أبنائهم يموتون برصاص الغدر وحدهم..
علينا ان نحترم الشعوب وقدراتها ومكانتها ..
عيب والله عيب كبير وخاصة لما يجي من المثقفين والمتعلمين.. |
ام الولوفة .. منى خوجلى ...
ده رد شاعرنا الذى لا يصدأ القدال بعد ان ارسلت له تعليقك
(( للمصريين اسماء كثيرة يعترفون بها ..
وقال شاعرهم : اللى بنى مصر كان فى الاصل حلوانى .. ويمكن ان اسميهم الحلوانية
نحن الذين نخجل من الرقص . من يستنكف ان ننسب الى راقصة حتى ولوكانت فى عظمة بمبة كشر ..
وهذا الاسم بالذات يطلق على اخواننا المصريين عندما يتعلق الامر بالذكاء والفطنة وفهم الاشياء وبواطنها .
وما قصدت غير هذا
ولا اريد هنا ان ازكى احترامى وحبى للشعب المصرى ولى فيه علائق رحم وصداقات عظيمة .))
وهو يعتذر عن التداخل بنفسه لضياع بيانات حسابه بالمنبر
| |
|
|
|
|
|
|
|
|
 Re: الشاعر القدال لا يصدأ (Re: عصام مدنى)
|
بلادٌ وحده القدال
بمدائنها وبيدها وقراها
بأطباعها ونزواتها وفحواها
بلادٌ وحده
بمسراتها وأحزانها
وسرها ونجواها
تسلم ود أبوسن عامر محلك أبداً بما يريح الأرواح
من وعثاء الدروب المفزعة...
سلمت
تحياتي ومحبتي واحترامي
لك
للقدال...
| |
|
|
|
|
|
|
|
|
|
Re: الشاعر القدال لا يصدأ (Re: بله محمد الفاضل)
|
مرحبا عصام مدني
وحبابك
شاكر ليك اهتمامك , واتصالك بالقدال , وجلب رده
رغما ان المربوع يعلي من شأنهم ,
ودون افتراع حوار يبعدنا عن اصل البوست ,, فالبون دائما شاسعا ,, بين المصريين والاعلام المصري نحو السودان
وارجو ان يراجع الصديق
علي دفع الله
قراره
تاني
شوكران وكتر خيرك
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
مرحبا محمد بله
وحبابك
ايوه ,, نعم
دي بلاد القدال
بلاد محنه والامهات البكرفن عيالهن ويلجنهم بلبن المحنه والطيبه
وشاكر ليك طيب حديثك ,, وحسن قولك ,, وارجو ان اكون عند حسن ظن شرفاء وطني
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
ام حالبين
دي أكلة عجيبة خلاس
أكلة رواعية في الخلا
بشوفو محلة دلجة ,, يعني ارض زي البلاط ,, وبجيبو بعر البقر الناشف ,, يولوعو فيهو النار في الواطة المحددة ,, بعد تهمد النار ,, يقشو الواطة , ويضرضرو دقيق ,, ويرمو فيها عجينه دقيق مخلوط بي لبن ,, تبقي زي الرغيفة القوية وصلبة ,, للأكل بكسروها ويفتوها في اللبن
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
اماتي القبيل بي حنهن لقني
كرفة وقلدة كيف شوف اللبن
رجنّي حزنا جاني في
ميع الصبا يلجني اطلع
مني يا جلدي المنمل جني
واطلع مني يا حزنًا بقى مكجني
خلني ابدا مسداري
واودي قفايا لي دارا بقت مي داري
جيت الجلدي بيني وبين عضايا الشحمة الا النار بقت قدامي
جلدي الليلة بيني وبين عضايا المافي
الا تراني شوال الكبس نفيخ جراريم الورم هدانّي
في جلدي الورم قولنلي ولا صحي الورم عضاني
سفريتك مي في النية
ماها الكانت محرية
خابراك عريف زم العربان ولّا قيام الوردية
مالك تريان ومندي كاسي الكتان والهندي
قولك ككيف ترجى البيشان ولا الغربة البي زندي
برق العبدلي الوزني يا طاش يا جاب المزن
فرق ياالضيف فعل الغضبان ام فرفيرات الحزن
شن القعدة يا ابو السرة شن القعدة
في ضل العمارات ام كمرتًا بره .. ضقنا الحنضل اليانكي
وبلعنا المرة كملت كوتة التمباك صقعنا الجرة
وكت اتقفلت شقيش قبل بالمرة
نرمي أمرنا في بلد المعاني الحرة
الشم خوخّت بردن ليالي الحرة
والبراق برق شوف عيني الصقير بي جناحو كفت الفرة
تلقاها ام خدود الليلة مرقت برة
مرقت برة تغلي مديدة الحلبة التسمن ردفها
السمن المبستر يانكي
والويقود بعيرات دخان في العين وفي الفشفاش بسوي عمايلو
وشن فايدة مديدة الحلبة يا ابو السرة شن فايدة مديدة الحلبة
والويقود وشالو اليانكي
قامت من دخاخين العمى تلمع وشيها كان اليانكي مستنيها
كان اليانكي مستنيها في مراية السجم
في الليل لقيتها متل فريخ الطير مرق ود عينها من ود عينها
رجافة المزمل حمى جفلت منو وقعت عندي صدرها بغلي
يا ابو السرة شفت اليانكي في ود عينها
شلتها للبحر
يمكن يغسل عينها من اليانكي
فتنا الحجرة بالكتة وغتسنا مسافة
تبقى قدر مسالك الريده ما لاقانا من يغبانا في
البحر الفدر تحتاني
ناس عارفاها ناس عارفاك ناس عارفاني
نادينا القعوي والبلطي قرقور السمك ودانا لي دابي الخشش
نادينا عمال الطمي الصارقيلا والقرموط وود الموية وقتنا عليها
كانت نايمة عجال البحر حارساها
كا نت نايمة بين حجرين
وضل ساسوية وعمال الطمي
الصحونا خابرين الدروب لمّو حصى البحر قسموهو
يات من كان سبع جمرات دابي الخشش قال ادوها
في الجمرات تلات سبعات
قلنا ادوها في في الجمرات تلات سبعات
مسكنا دربنا وعمال الطمي مرقوبنا في مشرع مسارب الضي
لقينا الدنيا تترجانا قوقى القمري خوّى صغيرو وعوّى حدي
وعمال الطمي الصحونا لمّو على البعرفو الصي
حصى القيزان دوابي الدارقة والسحلية والناس التحت
خابرين عمايلاليانكي
قولن للاخلا ديارو
دمك فرهد في نارو
غورّ في الارض طارو صقرين
اولاد الارض ما طاروا
لحمي غطى بن عمي شو صار حالو يا امي
منديل العرض في بيت الدين دمي ما يخلي دمي
انا من دير يسن صرنا في جزر التين
عم نسقي بعض حب الزيتون
بدو يرجع للطين صابرا تحت الدورية
صابرة تحت الدورية .. صابرة فوق الدورية
يا حالة ضد لحم الطفلين نابت غصن الحرية جزري مو في شاتيلا
ما قال حالي يا ويلا احنا في الارض
ارض فلسطين يا امي
هيلا هيلا
قوقي القمري خوّا القي وعوّا حدي
وكنا جماعة دابات الارض والسايمة وعوامة البحر والطير
وحتى الغيمة دفاقة المطر فوق راسنا شايفة الدرب
دريب اليانكي لا يودرنا قال الدابي للضليلة خليك صاحية
زوغ اليانكي لايودرنا
قال الدابي ان يغباها ما بيغباني
ولما الشم مودع غاربة وصّت جملة الصقار عيونن كاربة
ابقو الف بفوت للمتلكم ناهدين
وفوق دينن عريبا غادي
قال السحلي لا تغشوهو دول عربان توابع اليانكي
قال الجمعي لا نغشاهو دول عربان توابع اليانكي
وخلوها العريب الغايبة السراق طليقو معاهو
تيجانا عروشها الخروع الهش العويش النار تعلق فوق عقال العرش
ولا خسانا بي هادي العروش الغربة
يا ابو السرة لا عقام مسكنا دربنا وعمال الطمي الصحوها
خابرين الدروب
مرقوببنا من وادي الضلمة الكان عقب لمينا في باقي الجمع قاصين دريب اليانكي
شمور الضيب في الكنغو وخبرا من جنوب امريكا ومن كلهاري ديبا ضاري
والتمساح وليد امزون ونمرا في النمور كمبودي ونمرة خلا الله مكسيكية
ولما لميمنا والشمس البتوقد فوقنا شد شديدنا التمثال مشيل روقنا وعالم حر
يدوعل فوقنا لي يوم فوقنا نبزغ فيهو في عينيهو جر واسوقنا
يا شمس طلي طلي
شاوري على بيتي دلي
كيال الكيل ختياري مات
ظلي عم يحرس ظلي
عادل على خيي ميلي خيي لا يحمل شملي
ما خف الشمل تاني المرات ما كل الرصاص شيلي
عيني في الفيل ما ظله
كلنا ندريه ما نضله
يا ويل الويل نرمي الجمرات
عدّي المستشهد كله
عدي المستشهد كله
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
حــَزيــنـَـه وجُــوفِــك دمْـدَم هَـزيـم حِـزنـْتـِى وقَـلـب الحَــازنـِـك خـَــلـِى
تــعـَبــِّـى الحُـلـم الـشـفـتـِـيـهـو قـديــم وتــَمْـلـي حسـارك قـلـبــك مَـــلِـى
وكــل مايـنـسِّـــم قـاصــدِك نـسيـــم يـلهْـلـِـب جـِلــدِك كـِضـْـبــًا طـَــلـِى
فطمْـتـِى جَـنـاكِ وحـُـضـنـِـك رحـيـم وحِــنـِّـك تــب ماصَـابـُـو الـبـِــلـِـى
سِــمِـعـتَ غـُـنـاكِ وصُــوتـِـك رخِــيــم شــدِيــد أوتــَـارك زايــِد حـِـلـِـى
عِرفـتَ الـغَـم الصَّـار لـِــك نـديـم وشـُفــتَ الكـُون بـى شـوفــًا جَــــلِـى
لـِقـِيـت الحـَــازنـِـك كـافـِـــر ذمِـيــم إنــتــى وحـِــيـــدِك قـلـبــِـك ولـِــى
| |
|
|
|
|
|
|
|
|
|
Re: الشاعر القدال لا يصدأ (Re: عبدالحفيظ ابوسن)
|
Quote: وعشرة سنين وريدك موية عشش بالسرور والفاقة
ومن بعد الغنج والروقة جاتك طامة
لا شبال بناتك هف
لا بتعرف عيالك تويا
لا صفقة ولادك لامة
|
لله درَّك يا القدال..........
الشُبَّال والتويا والصفقة أم رسيس.......... بتجي مع راحة البال
هذا ايَّام محاربة الإبداع والمبدعين ، وطمس التراث بالغنا التعيس والإناشيد البّوْ........
"يا أمريكا اخطينا وما دايرين دقيق فينا و............................
Quote: والغمة العليك ساساقة .....ما أدَّت شموسك طاقة
قلبك رّفْ......
من وجع الملاريا العامة لي رقب السحائي اللَّفْ
ميتة وخامة عندك فيها شن بتقولي عندك لا جمل لا ناقة
عشرة سنين
وعشرة سنين بنات حفرة وبنات الغش
ودقنا مضعة فوق الوش ......
وشال شاويش وسمنة جديدة لا بتتداري لا بتتفش
وزير قدامي بالنهب المصلح تام ......
والقُلل الوراهو حمام مكرفس بالذبيب والتين
يخجن كان ضحك كان هش
|
دي تصوير عجييييييييب
النهب المصلَّح دي علي وزن النهب المسلَّح، بس نهب الحيكوووووووووومة مصلَّح عشان مقنن هو نوع من أنواع السرقة والنَّهب لكن عبر إيصالات ومستندات و............
Quote: وعين غرويدة من سهرة قيام الليل
علي الهبشة المع النفرة
علي الهبرة الورا التمكين
فيا ويلك من اللغة واستلاب الحرف ويا ويلك من التفعيل
ومن معني التوالي التاه ويا ويلك من التعليل ومن قولا صبح شفرة
اذا هذا الهبر في الفقر
فكيف الهبش في الوفرة
وعشرة سنين مزارع يابسة
والدين العليها يعلي مدماك طوقا
والزارع شريك من اصلو اصبح زي اجير
ادله اتدهور صبح ماروقة ما خابر مسورو وفصلو
من كتر الكلاب الكابسة
محفظة البنوك العابسة
الطراد .. ضريبة الموية حق الطير جباية العير وزاد البير
|
هذا والله أبلغ تصوير لمصطلحات الإنقاذ " النفرة ... والتوالي......... والتمكين
احسب واوقن ان هذا الشاعر هو لسان الناس جميعا، يُدهشك بتفاصيله الصغيرة..الكبيرة في قالب شعري محكم وإظهار أثرها علي حياة الناس، لا يقدر عليها إلاّ الشعراء العظام من أمثاله، في المقاطع الأخيرة كأننا نسمع النفرة الأولي وأناشيد ناكل مما نزرع ونلبس مما نصنع وفي الجانب الآخر نري المزارعين بؤساء ومزارعهم بور ونراهم مغلوبين من الديون وفي الطرف الآخر نري أهل التوالي يحملون أوراقهم ومستنداتهم ويملأون جيوبهم من البنوك
"الطّرَّادْ ...... ضريبة الموية حق الطير جباية العير وزاد البير" وزاد البير دي أبلغ تصوير يسمونه زاد المجاهد ولكنه ....... يضعونه في مطامير تانية
| |
|
|
|
|
|
|
|
|
|
Re: الشاعر القدال لا يصدأ (Re: عبيد الطيب)
|
مرحبا عبيد الطيب
وحبابك
وشاكر لك مداخلتك القيمة
وهذه القصيدة لم تلق حظها من الانتشار لسبب لا اعلمه , وهي من القصائد الجيدة , جمعت كل اسباب الخلود
اللغة السليمة
الصور الصادقة
القدرة الفذة علي نقل الواقع السياسي والاجتماعي والاقتصادي والديني
حفلت بالتصاوير الساخرة والعميقة
تحية لك وشكر
| |
|
|
|
|
|
|
| |
عبدالحفيظ ابوسن
Mudather Kunna
علي دفع الله
Muna Khugali
عبدالعزيز عثمان
حسام عبد الرحيم
الليندي
عبيد الطيب
mohmmed said ahmed
بله محمد الفاضل
فيس بوك
تويتر
انستقرام
يوتيوب
بنتيريست