|
|
 المعلقة السودانية موديل الحصار /فيصل الدابي/المحامي
|
معقـول شـان واحـد بـس
يتحاصــر كل الســودان!
افـتـونا يا نـاس الدنيــا
جنـنا جــن الاخـــوان!
شبكـونا يومــاتي حـوار
للنضـمي فاتحـين دكــان!
ويومـاتي بيصـادرو جريدة
ويومـاتي فاكيــن بمـبان! الفوضــى حلـقت كابوريا
الجوطــة ولــدت تومات!
@@@
يا شعبـنا يا اكـبر فاهــم
ما بغشـك السـوى الغلطـة!
وخطـاب جـد ما مفـهـوم
للسـامع بيـسبب جـلطـة!
ما فيهـو حبايـة منطــق
مخلـوط بـي مـية خلطة!
الحـل تقســيم الثــروة
الحـل تقســيم السـلطة!
الـوثبـة القـالو علـيـها
يا اخـوانا ساكـت حركات!
@@@
اولادنا وبـناتنا انتفـضوا
وكـبارنا عاقـدين الـنية
الثورة حتمـلا السـودان
سلمـية ثورة سـلميـة
دايرين الحكـم المـدني
عايزين دولـة مدنـيـة
دايـرين في بلـدنا سلام
عايـزين خـبز وحـرية
جمعـتنا الاولـى للشهدا
استـنو الجمـع الجايات!
@@@
(1)
كم مطـرة الحـالة تقـيف
تتقطـع طرقــات وكباري!
بالمـرة مافـيش تصـريف
مافيـش خيـران ومجاري!
ومسـئول ضارب التطنيش
بيصهـين ويعمـل ماداري!
في العيـد تنـهدا بـيوت
الـناس خايضـين كـداري!
في العـيد اطفـال بتمـوت
بي سـيول بي فيضـانات!
@@@
(2)
الشهدا السقطو في دارفور
الشهدا السـقطو في نيالا
ما تنسو يا اخوانا حقوقم
بقـارة اتلمـو وابــاله
الـضرب الرصاص الحي
الاصـدر امـرو بـنذالة
مفروض يا ناس يتـحاكم
دايـرين قانـون وعدالة
يا عالم مطلـوب تحقـيق
بي نزاهة بي اجـراءات!
@@@
(3)
الحالـة بس زي الطـين
في جيبـنا مافيش مليـن!
وأي سـعر أصبح سعران
ما بـنقدر ندخـل دكـان!
والسـوق أصبح مطلـوق
وأي قرش أصبح ممحوق!
يا حلـيلو زمن الضـيفان
ما بنقـدر نعـزم إنسـان
على فطـرة بمـوية فول
لا جبـنة فيـها لا زيـت
لا سلـطـة لا طعمـيات!
@@@
(4)
والهـون رفـع التلفـون
في لحظة ضرب البليـون!
والهـم واقــف طابـور
من تصبح ما نلقى فـطور!
الفــات فات لف اللـفات
فـي جـيبو الكـنجالات!
من مافـي ركب العربات
جالوصو أصبح صرايات!
والفـلة وقعت في البـير
محروسة بي كم خـنزير!
لا محاسب لا كشف حساب
لا ذمــة لا اقــرارات!
@@@
(5)
بترولنا بى نسمـع بيهو
بس منو ما ضقنا ثمـار!
العـائد أكـبر مجـهول
وتوزيعو ســر الأسرار!
أفتــونا يا مـدنيـيـن
ورونا يا نـاس الـجيش
لى جدادنا ما نلقى العيش!
لى غنمنا مافـيش برسيم
لو جعـنا بس ناكل نيـم!
كم ليلـة القـوى بتناهو
واصبحـنا زي الحطبات!
@@@
(6)
ورسوم راجياك بيـجاي
وجباية حارساك بيهـناك!
على راسك تدفع دقنـية
النبكة مقسـومة مـعاك!
وضرائب حولك تتـحاوم
لو تجري تلـقـاها وراك!
التـور ذاتـو يحلبــوه
الأرحم عهــد الاتـراك!
باى باى سوولا رسـوم
تحصيلا بدون إيصـالات!
@@@
(7)
الـفار فرفر في الفـروة
شابكنا يومـاتي فـتاوي!
كم أرنـب جوه الطاقيـة
مستني منـديل الحـاوي!
الحاجـة اليـوم تتحـرم
وينكتلو علـشانا شـباب!
تتحلل في اليـوم التانـي
ويـقولو لي ناسا حـباب!
الجـن من جنـو اتجنـن
واتعـوذ مـن الكضـبات!
@@@
(8)
الكـان مستـور الحــال
الليلـة مقـطوع الـراس!
وابليـسنا سارح بي غنمو
وغـنمو سارحات بالناس!
الفاطـي سطـرين وتلاتة
الفاطـي كـل الكــراس!
لا يحلـو الشيخ الجعلـي
لا تحـلو سيطان كـدباس!
@@@
(9)
عمّي على ضاق بيهو الحال
ساب مرتـو خلالا البـيت!
عمّي على باظت أعصـابو
وأخلاقو قطعـت كم خيت!
عمّـي على أصبـح نقناق
ومين يسمع في بلاد الواق!
عمّي على ضاق خيرا زمان
والليلـة ما شايف حاجـة!
بتـمنـى الماضـي يعـود
ويحكمنا من تاني خواجـة!
لا وطنــي نافـع لا امـة
لا حـركة لا مـؤتمـرات!
@@@
(10)
الشافـع بس الله معــاهو
الشافـع ما لاقـي اللـقمة
الشافـع ما لاقـي دواهـو!
الشافـع أصبـح بكــاي
الشافـع أصبح ضــبلان!
كرشوه من جوه الاوضـة
طـردوه مـن الديــوان!
حرمـوه مـن أي حـلاوة
حرموه من باقـي الشـاي!
في العيد ما يشوف عـيدية
بي عينو ما يشوف لعـبات!
@@@
(11)
الطالـب طالـب مـن الله
كيف يصـبح من الشطار؟!
كل همو بقى بس في بطنو
كيف يقطع كـمين مشوار!
الجامعة يا حليل الجامعـة
لا صـفرة لا داخلــيات!
الجـامعة يا حليل الجامعة
لا مـعامـل لا مختـبرات!
@@@
(12)
الكهـربا بتسـل الـروح
بتـقطـع من دون انـذار!
الموية تقطـع على كـيفا
وتنشـف حلـق الأزيـار!
الأزمـة من دون تفـسير
ما النـيل هو أبو الأنهـار!
لو أصلو معـدوم الفائـدة
لو مويتو صبحت سجمانة
بيعـوه لشعوب عطـشانة
عبـوه فـي جـركـانات!
@@@
(13)
تلـفازنا بـوظ أعـصابنا
النـشـرة زي حفلة ظار!
بيجاي واحـدين بيكوركو
بيـهناك بـيدقو الـطار!
النشـرة مجروس متحرك
والعـسكر يلعـب بالنـار!
وعكـليتة يقـدم برنامج
طـفشـنا من السـهرات!
@@@
(14)
فنـانا أصـبح هـنـاق
بيغنى غـنا ما مفهـوم!
بـيعكر جـو أمدرمـان
بيـفور دم الخـرطـوم!
النجم الأوحد في سـمانا
مـداح بيـغـني الـراب!
يتلولح زي شافع الروضة
يطوطح من دون أسـباب!
حنينا لي حقيـبة الجـن
حنينا لي الـحكـامـات!!
@@@
(15)
الكورة صبـحت دافوري
اللاعب أصـبح كحيـان!
يا دوب قـادر يتحــرك
كيف يعني حيجيب اقوان!
ومعلـق باظت اعصـابو
ومشجع مـسكين غلبـان!
وبـلاد ما تسوى الحـبة
تغلبنا جـوه الـسـودان!
البلعــب دون ميزانيـة
ايه يجني غير الخيـبات!
@@@
(16)
القـومي في امـم افريقيا
لا ريحـة لا طـعم لا لون !
فـي تلاتة غلـبونا تـلاتة
ما طلعـنا ولا مـرة درون!
ما تزعـل أبـداً يا فـردة
لو تيـمنا واقف كـراكون!
ما عـزانا الاوحد يا سادة
في نفسـنا جبناهو القون!
@@@
(17)
للهجرة الـباب مفــتوح
الرايـح انـشالله يـروح!
الهاجر من ضـيق الحـال
الهاجر من ضيق الـروح!
الهاجر من فصل جماعـي
بالجملـة أو بالقطاعـي!
كم جـيل بـدل جــيناتو
كم جـيل اتناسى قديمـو!
لو طـرتا لي آخـر الدنيا
لو رحـتا بلاد الاسكيمـو
حـتقابل زول أو زولات!
@@@
(18)
في الغـربة بتلاقي مصايب
في الغــربة بتلاقي مآسي!
دكـتور شــغال جرسون
ومهــندس شـغال تكاسي!
واحـدين ساكنين مقطورة
كان احـسن سكنة تنقاسي!
واحـدين ساكـين الميتـة
ما شبـعو من الـصدقات!
@@@
(19)
الغـربة صبـحت ملعـونة
الغــربة صبـحت بطـالة!
لا سـفارة تنصـر مظلـوم
بي هرشة او حتى رسـالة!
كم زول مغلـوب على امرو
معصـور بكفـيل وكفالـة!
قــلاع يقلــع مقــلوع
لا منطـق ينفـع لا رجـالة!
واحـدين فـي مـحلك سـر
واحـدين قايميـن دفـرات!
@@@
(20)
اطفـالنا في الغربة اتولـدو
وتراثـنا مدمـوس مدكوك!
لا اكـلو ولا مـرة كـجيك
لا ضـاقو وريـق مفـروك!
لا لعـبو شــدد لا شلـيل
لا طـارو زي الماكـــوك!
لا لعـبو فـد يـوم بالطيـن
لا ساقــو عربيـة سلوك!
لا شافـو فد مـرة حمــار
لا سكـو سخـلان وديـوك!
لا حامـو في وسط السيرة
لا نامـو في بيوت بكـيات!
@@@
(21)
وحكـومة شغالة رجـالة
بالعلنـي قالت لي ناسـا
الدايـر حقــو يحـاربنا
سيبـونا من اي سياسـة!
كل حتـة مرقـت بسلاحا
كل حتة جـمعت فـراسا!
خايفـين مـن الشايفـنو
خايفيـن مـن الزنـدية!
خايفـين سـودانا يضيع
يتقســم زي كمـونيـة!
كل حـتة تتـناول كـوما
وتتحـول لي جمهوريـة!
الحـال ممكـن يتلخـبت
والواقـع يصبـح كالآتي
كل حـلة ترفـع اعـلاما
تتمـتع بالحكـم الـذاتي!
الـشايقي ينازع الجعـلي
في حـدود ما مرسومات!
@@@
(22)
وحـكومة شابكنا حلـيفة
الـوزرا يحلفـو بالـدور!
قـوات دوليــة يمــين
ما تدخـل اقـليم دارفـور!
وكم قـوة دوليـة تحـوم
في جنوبنا وجـبال النوبة!
المنطـق راح في حق الله
والجوطة قلبـت كم هوبة!
@@@
(23)
وجنوبي وشمالي اتشبكو
كل واحد بيكورك عووك!
صرتنا في ابيي مدفونة
لا جـدك هيلـو لا ابوك!
في ابيـي الموت بالكوم
في ابيـي الدم مسفوك!
في ابـيي الجن متحرك
في ابيي شيطان مفكوك!
يا ساتر اسـتر يا سـاتر
تنحـلا باخـوي واخوك
@@@
(24)
الإحـصاء قرب يا اخـوانا
ورونا كيـف حــيعدونا
الطفـشو ضعـفين الفضلو
حيـجلو مهـما يحسـبونا
كم مـرة جاطت حسبـتنا
كم مرة جاطـو وجاطونا
كم مرة قـسمونا وضربو
كم مرة جمـعو وطرحونا
شــالونا من خانة الزيرو
في خانة الماينس ختـونا!
@@@
(25)
في النـظري طالعين الاول
في العملي طالعين الطيش!
في الـشارع اجيال بتضيع
وكل كـيلو نقطة تفتـيش!
الشـعب ممنوع ما يرقص
ما يفرفش وسط الحفلات!
والكاكي يرقص على كيفو
بي عصاية وبي رشاشات!
يابـلة كيفـــن نتحـلا
شربكـنا زولن اتشـربك
واتورط جـوه الـشبكات!
@@@
(26)
مشروعنا القالو حـضاري
غرقنا في حروب وحروب!
فرقـنا شـرقاً وشـمـال
فرقـنا غـرباً وجنــوب!
لا سلـطة تنفـع لا ثـروة
ما دام ضــاع الانسـان!
يا حليـلو الكان سـوداني
يا حلـيلو الكان سـودان!
الفاتحة على ناس عايشين
لاكيـن زي الأمـــوات!
@@@
(27)
وسـدود بالـقـوة تقـوم
وتـهدد اوطـان وتـراث!
الـراي الرسمـي اتنفـذ
ما مهـم رد فعـل الناس!
الصهـين باكـر يـترحل
بالـمـوج أو بالـحراس!
القـاوم خنـقـو البـمبان
القـاوم كـتلو الرصـاص!
منصوري قمعوه ومحسـى
مافيـش لا خـد لا هـات!
@@@
(28)
بال ميري مسـكون بالـهم
ناس زهـرة يشكن وحواية
غير شاينا كـيفن حنعـيش
بنـربى جـنيات وصـبايا
الكـشة كابوسـنا الـيومي
يا مـاشا فـوقنا يا جـايه
يا اخوانا كيف سـت الشاي
تتـعامل زي سـت انداية؟!
كـم مرة يانـاس كشـونا
ما خـلو لـيـنا الـحبايه!
كـم مـرة طفـقو البـراد
كـم مـرة كـسرو الكبايه
كم كشحو شايات وسـكاكر
كـم دفقـو ازبط جبـنات!
@@@
(29)
الدولـة الشمولية اوانطـه
والـكورس بيقـول آمـين
الـدين قلبـوه سـياسـة
حكـمـونا تجـار الـدين
أي فـشل سمـوه البلوى
بس ميـن حيحاسب مين؟!
وجهلـول ادوه حـصـانة
تحمـيهو لى يـوم الـدين
البـنقد حكـمو التكـفـير
ينفـوه من المــــلات!
@@@
(30)
إسـلامي وكمان نصراني
لا ديـني ود غـابة كمان!
ســودانا متـحف اديان
ســودانا متحف اجناس!
بتفـرتك لـو اتعاليــنا
ومـسكنا جن الطـغـيان!
بتـوحد لـو اتصـافيـنا
وراعـينا حقـوق الإنسان
الحـل واضـح يا اخوانا
مـش محتاج لى تنظيرات!
يـلزمنا التنفـيذ العمـلي
يلزمنا حــسن النـيـات
@@@
(31)
وحكومـة اكتر من فاشلة
والـشعـب زي المافيـش!
حكمـوهو باقسى طـواري
لكـنو ضارب التـطنيش!
قمعــوهو صهيـن ما ردا
رفوهو رضـى بالـتهميش!
في الـشارع قبـلان يتفتش
ويتفـرج على كل تفـتيش!
@@@
(32)
اوكامـبو بقى اشهـر زول
وسيـرتو في كـل لسـان!
عايز يقبـض الريـس ذاتو
ويخـتو جــوه الليمـان!
اوكامـبو رقصـنا التانغو
اوكامـبو نســانا بطـان!
بالحكــمة لوما حليـتوها
بتـعاقـب كل الـسـودان!
@@@
(33)
اوكامـبو من قدم طلــبو
فرتكـنا كيـمان كيــمان!
واحـدين طايرين بالفـرحة
شايفنــو احـسن ما كان!
واحـدين هايجـين فايرين
شاتمـين اوكامبو كـمان!
واحـدين عايزين الحـكمة
شـان يسلم كل السـودان!
@@@
(34)
أوكامـبو مـن قام اتـجنن
جنـنا وجـنن نــادوس!
عيـشنا في أكـبر هـرجة
عيشـنا فـي كم كابـوس!
وحكـومة تتحــدى العالم
بخـطاب بالـجن ملبـوس!
والحـل في الحـل السلمي
المخرج في سـاس يسوس!
@@@
(35)
الريس اصـــبح مطلوب
كايسنلو نـسوان راجلات!
ما بنفـع غزغيز الـريش
ما بتنفـع كل الجـوطات
ما بنفـع طـرد البيـغيثو
ما بنفع هرش الخـواجات
ياريس بس اركـب عجلة
ما تفكـر في الطيـارات!
@@@
(36)
الريس بـيزور موريتانيا
عـقبال توغـو واخـواتا!
كان احسن يمشي الحتانة
كان احسن يمشي الحواتة!
لكــن خلـوه يــنوع
أوربــا يا اخوانا حلاتا!
سيبوه يسافر بريطـانيا
يتقـدل فـي لنـدن ذاتا!
@@@
(37)
القـالو عقـلاني وفـاهم
في راسـو اصـبح عيان!
بيقـول قبــل الإنقــاذ
كان بشحد شعب السودان!
يا راجل بس عاين حـولك
اتلـفت فـي كـل مكـان
ملايـين عايشـين باغاثة
في الفاشـر في امدرمان!
@@@
(38)
ابـيي النـبكة الحلــوة
قسـموها بخيـط ميزان
ابيــي وحـدة ارواح!
ابيــي وحـدة وجدان
كيف تقبـل قسمة لاهاي
وتتقـسم بـين الحـبان؟!
الواحـد يصـبح اتنـين
العايلة تصبـح جـيران!
ملعـون ميـتين لاهـاي
وين حكمة اهل السودان؟!
@@@
(39)
سكـتنا القالــو حديـد
يا اخوانا صبحت مافيشة!
العامل بالجـوع بيمـوت
لـو زاغ من التفنيـشة!
الكـان يا نـاس تفتيحـا
الليلة اصبح هو الكيشـة!
الراتب ما بعيـش النمـلة
كيف يعني حيكفي العيشة؟!
@@@
(40)
يا اهلنا في اغلـى جزيرة
مشـروعكم كيفن يتباع؟!
ياكـم قلـب الـسـودان
ياكـــم احـسن زراع!
من دون طـين الحواشة
ما فيش لا راس لا كراع!
افـدوها بالـروح والـدم
ما يشيلو ولا حتى ضراع!
@@@
(41)
قانـون الامـن الوطنـي
بالـقوة اصـبح قـانون!
تـهديد لى كل معـارض
في جو بالخوف مشحون!
تنتخـبو او ما تنتخـبو
الفـوز للـكوز مضمون!
ايه يعنى لزوم التصويت؟!
يا عاقـل وري المجنون!
@@@
(42)
خرطتنا اللـيلة انقـسمت
الليلـة ضـاع السـودان!
ناس منقو الليـلة انفصلو
وناس تنقو ضبحو التيران!
والنـار في جبال النـوبة
والـنار حرقـت قيسـان!
سودانـي يكتل سـوداني
خيبتنا صبحـت خـيبات!
@@@
(43)
الصورة الكاملة بتزعـجنا
وتفصـيلا اكبر ازعـاج!
تفـكيرنا دايـماً مشـلول
فوق راسنا سيف الحجاج!
وجـهتنا دائماً مجـهولة
رؤيـتنا ملـيانة عجـاج!
الامـة ساكتـة بتـتفرج
ومثقـف ساكن الابـراج!
ومصيرنا معلق بي شعرة
وقعـتنا صبـحت وقعات!
@@@
(44)
نـادوس يا رمز الطـيبة
نـادوس يا وش الخـير
نـادوس يا سكة عديلـة
نـادوس يا خـط السـير
خلصنا مــن الكـابوس
انـقذنا مـن الـكســير
زودنا ببصارة وحـكمـة
شان نبقى يوم بكرة اخير
ونتحـرر مـن الاوهـام
ونتخارج مـن الورطات!
@@@
فيصل الدابي/المحامي
|
|
  
|
|
|
|
فيصل الدابي المحامي
فيس بوك
تويتر
انستقرام
يوتيوب
بنتيريست