|
|
 بريدك هسة اكتر من قبيل
|
45 minutes ago
يا كل الغلا
بريدك هسة اكتر من قبيل
صوتك حنين
صوتك حرير همس الاماني للزمن العديل
وبديت معاك خطاوي الالفة والعشم المدكن
بين مسامات الاماني
رغم الوصال المستحيل
رغم المتاريس
رغم الكلام الحسكنيت
وانا في غيبات جب سفر ما ليه اخر
مدبوغ سهر
ما بين رؤاك والحزن المشتت في الخواطر
ديمة باحث عن شليل
واشتاقك اكتر من قبيل
بين لحظة واللحظة البتاخد من مداخل الروعة
فيك لي مكامن اللوعة فيني
تملاني بالوجع الجميل
نور على نور
مداخل الكلمة
مسرى الظنون في معاريج الفضا
والعودة بالمعنى النبيل
ها زولة ها
يابنية من جوف البداوة
يا راقية من طعم المدينة
ياحالمة زي احلام طفولة
يانادية زي غيما بيمعن في الصبيب
والجوف مشبع بالشبيب
والقاك في دنياي ثريا
والحرف طايع ليك ذليل
يا منتهى الالفة النقاء
وحلاوة العصرية عند القيفة
والتمرة النخيل
انا ليك بذلت حشاشة الروح ومطايا
وفرشت ليك جوف العضام
وسكنتي يا كبدي
وبديت بيك استحلا الهيام
حمى وارق
وجدا قلق
خيلا من القافيات فرق
والنجمة والقمر البغير من وجنتيك
انا ليك مم غنيت مساديري
الحنين
حبيت مخاواة المسارات الماشة ليك
وختيت ملامحك لي دليل
بهواك؟
انا في هواك اتجاوزت خيلي المدى
صهلت قصيدي اليك جوى
ركضت ليك
وركضت بين قلبي ومساحاتنبضي
والزم التقيل
حلمك علي
حلمي الموزع كان حكايات الحياري
في العتامير
في الدياجير
في شوارع الحلة
بين همسات حرير والدنيا ليل
احكيك سر
يلاكي بعيد حين تهجد الاعين تنوم
انا سري ليك
داسيه يا عمري البدا
بين ضفتين بيناتها نيل
وبس
|
|
 
|
|
|
|
د.محمد حسن
فيس بوك
تويتر
انستقرام
يوتيوب
بنتيريست