|
|
|
 Re: أغرب وظائف إمكن يقابلك في حياتك! (Re: Sameer Kuku)
|
متخصصي الاحضان:
نشأت في اليابان و انتقلت لامريكا, وظيفة من يعملون في هذا المهنة هو توفير حضن دافئ للزبائن
الذين ينقصهم الحنان و يحتاجون للدفء بواسطة لمسات الاخرين و يعرف ايضاً بقوة العلاج بواسطة
اللمس و لا يحتوي على لمسات جنسية و كما لا تشترط ان يكون بين جنسين مختلفين و ان كان
هناك ميول للجنس الاخر عموما.
احدى العاملات في هذا المجال هي خريجة من نفس تخصصي و من نفس الجامعة UR في و لاية
نيويوك و تدعى جاكي صامويل و تعمل ب 1 دولار للدقيقة و تقول ان دخلها 300 دولار في اليوم.
الصورة اعلاه لجاكي اثناء تأدية عملها!!!
| |
 
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
مختبري الروائح:
جنس قرف واحد!
ديل وظيفتهم شم روائح الاباط بعد استخدام العطور من قبل من يريدون هذا الخدمة في الصباح قبل الذهاب للعمل
و ايضاً اختبار تأثير العطور و مستحضرات التجميل في الاباط قبل توزيع المنتجات.
انا ما عارف ديل بقولوا لعيالهم هم شغالين شنو؟
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: محمد البشرى الخضر)
|
| Quote: مواضيعك اليومين ديل مزاجها عالي يا ابو سمرة:) |
يبدو ان مزاج ابوسمرة هو الرايق يا ودالبشرى!
| Quote: زولك بتاع الأباطات دا بكون بقول شغال مدير ضبط جودة |
في كل الاحوال ناس الاباطات ديل احسن حالا مننا لمن كنا بتاعين ورنيش في السوق العربي,
الكلام ده كان في محطة بحري القديمة في ابوجنزير, يجيك زبون صباح بدري - خلي بالك من صباح بدري ده - و يقلع
الجزمة عشان تديه ورنيش, ترفع الجزمة يجيك طمام من العفانة التقول الجزمة مصنوع من جلد فطيسة
و لمن يطلع شمس النهار الكعب بتاع زحمة ابوجنزير داك و يجيك واحد من اياهم عشان الورنيش .....غايتو خلي المواضيع ده ساكت!
| |
|
|
|
|
|
|
|
|
 Re: أغرب وظائف إمكن يقابلك في حياتك! (Re: Sameer Kuku)
|
| Quote: ياخ الدبيب ده لو ميت مافي زول بنطو,,خليك من تحلبو و هو حي. اعوذ بالله! |
انا قاعد اقول السودانيون عموما بخافوا من حاجتين الزول الميت (بعاتي) و الدبايب!
و الدبايب بذكرني بقصة في جامعة الخرطوم:
أذكر في متحف التاريخ الطبيعي بجامعة الخرطوم يوجد عدد الدبايب معظمهما آصلات داخل اقفاص معدنية و بواجهات زجاجية لفرجة الزوار
لكن في قفص واحد فيهو دبيب كوبرا و على العكس من الاصلات التي تبدو هادئة و مستكينة, الاً ان الكوبرا و رغم صغر حجمه الا انه عدواني
لدرجة مخيفة و ما ان يرى بعض الزوار حتى ينتفخ اوداجه و يصبح شكله زي مضرب التنس و يضرب الزجاج بقوة عدوانية - و ارجل زول بقوم صوف - بالرغم من وجود الكوبرا في قفص
لكن في واحد من الزملاء و في احدى الزيارات لقفص الكوبرا و من الخلعة وقع في حوض السمك القريب من قفص الكوبرا و مليانة قراميط و ده منظر لن انساه ابداً.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
قبل يومين تلاتة لقيت الاعلان ده مدقوق في شجرة في مدينة روشستر, نيويورك و زي ما هو باين, الشباب
عندهم كديس رايح اسمو راجا و عارضين مكافاءة لمن يجده,,,المهم لمن قريت الاعلان و وصلت
السطر الاخير ده "We love him and miss him so much" شعرت بأسى شديد على الكدايس
و الكلاب الكتلناهم لمن كنًا صغار في الفاو و امبدة و الجبال, اصلاً انا عضاني ك ل ب في الفاو و نشأت على
كره هذا المخلوقات و ما بفوت اي مناسبة فيها مطاردة و كتل ك ل ب او كديس و كنت ساعدت مرة رجال الشرطة اثناء
حملة ضد الكلاب الضالة في امبدة. المهم اتصلت باصحاب الكديس المفقود "راجا" و واسيتهم في فقدهم الجلل
"نسأل الله ان يجمع شملهم بمن يحبوا و ان يعود الكديس راجا الى بيته سالما غانما"
لكن لم يخطر ببالي و انا افتح البوست ان هناك وظيفة من الوظائف الغريبة يسمى "مباحث الكدايس و الكلاب" و ديل كمان متخصصين في
البحث عن الكدايس و الكلاب المفقودة و ذلك باستخدام كلاب مدربة كما هو واضح من الصورة ادناه.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
الوظائف الغريبة في السودان دائما مرتبطة بطبقة الفقراء و المسحوقين و هي كثيرة جدا
فهناك ممطري التمباك, و غارفي البلاعات و عيال الطوروبي و بايعي الطايوق و الخراجيًة....الخ
لكن في شغل كده ارتبط باولاد حلتنا في امبدة من دون بقية الخلق الاٌ وهو "المتقلات" و لمن لا يعرفه,
هو جمع الحديد الخردة "التقيل" بواسطة العربة الكارو و بيعها في المنطقة الصناعية امدرمان و later يباع لمصانع جياد.
و المعروف ان الحلب كانوا يعملون في نفس المهنة و لكن اهتمامهم كان ينصب على البطاطير و الالمنيوم و النحاس.
و بعد ان عدمنًا ليك الحديد الخردة من امدرمان (من صالحة جنوب لغاية جبال المرخيات في الشمال) أتخذنا القرار الصعب
و هو الذهاب الى بحري او الخرطوم من اجل الحديد بعد ان تأكدنا من وجود كميات كبيرة من الحديد في تلكم النواحي.
واجهتنا مشكلة كبيرة و هي عبور الكباري, فمعروف و حسب القانون "ممنوع مرور عربات الكارو فوق الكباري." الكبري الجديد
في الفتيحاب كان تمً افتتاحها للتو و لقينا تحتها من جهة الفتيحاب (مكان منتجع البحيرة الحالي) الاف الاطنان من الحديد الخردة
و الكمر و المواسير من مخلفات بناء الكبري و اشتغلنا في نقل الحديد لمدة يقارب الثلاث اشهر بمعدل حوالي 200 كيلو حديد في اليوم.
و عندما افتتح الكبري رسميا, تمً اغلاق الكبري القديم في اتجاه السلاح الطبي من اجل الصيانة, و بالتالي لم يبقى لنا غير بحري.
في الزمن داك اشتريت حمار دنقلاوي ابيض عاتي و شبعان. تشاورت مع المجموعة (5 اشخاص, يتراوح اعمارنا بين 12 و 14 سنة)
و قررنا عبور كبري شمبات رغم الحظر, فكان خطتنا ان نصحى بدري الساعة 4 ص و نصل مدخل الكبري في حوالي 5 ص و هو زمن
تبديل الخدمة بين عساكر سلاح المظلات الذين يحرسون ليلا و عساكر شرطة المرور و خدمتهم من الصباح لمنتصف الليل و نستغل
غياب الخدمة لبعض الوقت في الصباح و نعبر الكبري من امدرمان لبحري. لكن في طريق العودة (مع المغارب) كان هناك مشكلة, مثلا في اول
يوم و بعد ما عبرنا المظلات من اتجاه شمبات و وصلنا رأس الكبري في امدرمان, اصر الكمندان ان نرجع بحري...المهم دفعنا و مرينا و من
الوقت داك الجماعة - سوى كانوا جيش في شمبات او شرطة مرور في بحري - عملوها مشغلة, تدفع حق الشاي تمر otherwise ترجع.
الوضع ده قرب ان تنتهي بكارثة كبيرة - لولا ربك ستر - في يوم و فى احدى الصباحات واحنا راكبيين الكارو كالعادة ماشيين بحري, لكن اليوم داك كان
بدري شوية. و الحمار بتاعنا كان بخاف من الموية تحت الكبري عشان كده كل ما نركب الكبري بينطلق زي الصاروخ من الخوف, المهم اليوم داك الحصل
انو لستك الكارو دقً في حجر موجود في طرف ال sidewalk بتاع الكبري و سقط ماسورة من الكارو و اتدردق في اتجاه الخيمة بتاع الجيش بصوت عالي
و على ما يبدو, كان في ديدبان جديد حرق الخدمة و شالتو نومة, و قام مخلوع بصوت الماسورة الجاتو في الخيمة, و قام عمًر بندقيتو و سمعنا ثابيييييييييييييت و صوت
طلقة في الهواء و الوقت داك احنًا قطعنا اميال داخل بحري و حتى لو العسكري فك طلقة في اتجاهنا ما بصلنا, و ده كان أخر لينا يوم في متقلات بحري.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
Quote: نصل مدخل الكبري في حوالي 5 ص و هو زمن تبديل الخدمة بين عساكر سلاح المظلات الذين يحرسون ليلا و عساكر شرطة المرور و خدمتهم من الصباح لمنتصف الليل و نستغل
غياب الخدمة لبعض الوقت في الصباح و نعبر الكبري من امدرمان لبحري |
الشي إنقلاب :)
مبسوط منك
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: مرتضى احمد عبد القادر)
|
| Quote: فهناك ممطري التمباك, و غارفي البلاعات و عيال الطوروبي و بايعي الطايوق و الخراجيًة....الخ |
المثل المصري بقول الرزق يحب الخفية, و الإيد البطّالة نجسة
رغم الفقر المدقع في السودان لو سألت أي زول بقول ليك الحمدلله و اهو ماشة, الناس بتتصرّف وبتدق الواطة بتطلّع مصاريفها
على سيرة المهن الغريبة اذكر ظهرت لفترة مهنة غريبة جدا في السوق العربي و في بحري المحطة الوسطى, هي تقليم الأظافر!!
تخيّل صف بتاع ناس خاتين بنابر قاعدين فيها الزباين وهم بقلّموا ليهم اظافر رجليهم ويديهم, اذكر انو النظام العام طاردهم ومنعها لكن كانت ملفتة للنظر في وقتها
يا ابو سمرة لفت نظري تعليقك عن الورنيش و اخيرا عن بيع الحديد, ماشاء الله عليك, على صغر عمرك لكن يبدو انك عشت تجربة ثرية جدا ومليئة بخبرات حياتية مختلفة
ياريت لو لقيت وقت ومزاج تحكي عن رحلة صبي الورنيش إلى أمريكا مرورا بجامعة الخرطوم
| |
|
|
|
|
|
|
|
|
Re: أغرب وظائف إمكن يقابلك في حياتك! (Re: محمد البشرى الخضر)
|
عزيزنا سمير
تحياتي ومشكور على إشراكنا في بعض المغامرات بسرد ممتع ومشوق!
وعلى قصة الدبيب.مرة خشينا فيلم هندي فيهو البت بتتقلب دبيب عشان تنتقم من قتلة حبيبها.
والله العظيم تلاتة يوم اخوك ماسكاه حمى. حاجة مخيفة شديد. وزي ما قلت الدبيب ده ميت مافي زول بيقدر ينطوا.!
محبتي
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: محمد هاشم ابوزيد)
|
Quote: يا مستر سمير
شكلك كده نويت تعمل فلوس كثيره من زمان
امريكا بلد الفرص، لو عملت حرفنتك دي هناك ، اكيد ح نسمع بيك قريب في واحده من القنوات الفضائيه المشهوره
|
مستر محمد هاشم: زماااااااان كن دايراين نعمل survive لا اكثر!
ربنا يسهل و دعواتك معانا!
اوامرك يا سيدي و خليك قريب!
| |
|
|
|
|
|
|
|
|
|
Re: أغرب وظائف إمكن تقابلك في حياتك! (Re: الفاتح ميرغني)
|
Quote: تحياتي ومشكور على إشراكنا في بعض المغامرات بسرد ممتع ومشوق!
وعلى قصة الدبيب.مرة خشينا فيلم هندي فيهو البت بتتقلب دبيب عشان تنتقم من قتلة حبيبها.
والله العظيم تلاتة يوم اخوك ماسكاه حمى. حاجة مخيفة شديد. وزي ما قلت الدبيب ده ميت مافي زول بيقدر ينطوا.! |
الفاتح ميرغني,,,,,,طلعت دهري مندرا و باريت ناس اميتاب باتشان!
هسع نواصل الفلم الهندي ده و لا ناكل باسطة؟
محبتي الاكيدة
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Mohamed Mekki)
|
| Quote: (ش.ع): شهادة عربية |
لعلك تقصد شهادة عربجيًة يا محمد ولد مكي!
| Quote: التوقيع: خراجي قديييييييم |
كنت بتبيع الجوز بي كام؟
| Quote: طبعا في اللحظة دي الحمار بكون بال عدييييل كدة |
الحُمار! كانت الموية براها مطلعة زيتو و تاني لمن تجيب ليهو نار ما خلاص الموضوع باظ!
كن بخير و ادينا طلًة تانية!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: محمد البشرى الخضر)
|
يا ود البشرى: ناس الاضافر ديل تلقاهو شايل مقص صغير بكشكش بيهو و معاه مبرد ضفارة, و كن سألتو انت شغال شنو؟ بقول ليك:
فني اضافر, ده كن ما قال ليك فني ضبط جودة الاضافر! و السلطات عموما تكره ما تكره الزول البكون شغال و ما قادرين يخلصوا منه اي ضرائب,
فلذلك تقوم بالحملات على ناس الاضافر و عيال البرد و الاكياس و غيرهم.
فلو الشرطة بتقيف ضد العمل ده لأنو مهين (In public) عكس محلات الكوافير و الصوالين, فمن ناحية صحيحة لأني شاهدت ناس الورنيش في مدينة اسمرا بورنشوا
و الجزمة في الكراع و حمدت الله على ورنيش الخرطوم, و من ناحية تانية, اي عمل مرتبط بالعرض و الطلب, فلو في زول داير خدمة زي ديا و ما عاوز يضفر
براه و لا داير يمشي صالون و مستعد يدفع يبقى المشكلة وين؟ بس امكن نقول ان ثقافتنا عموما ترى في الانحناء للارجل نوع من المهانة. ربما من ناحية
صحية, لكن احنا كمان مشاركتنا في حاجات بعض كتييرة جدا, يعني عادي تطلع المفاتيح فيشوفك زول قاعد جنبك, فيقوم يقول ليك: اذنك ضفارتك ده!
بالنسبة لقصص الورنيش و الحديد و ما قبلهما و ما بعدهما خليني اونسكم بيهو يوم تاني!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: مرتضى احمد عبد القادر)
|
مرتضى احمد عبد القادر,,,,,,
عندنا قصص كتيرة مع ناس الشرطة و الجيش, و لأنهم هم ذاتهم من الشباب الفقير و غلابة في انفسهم فكانوا بمشوا لينا الكتير من المخالفات
او ربما كانوا ينظرون الينا كأطفال لا اكثر. مرة عسكري بتاع شرطة سألنا: انتو بدخلوا كم في اليوم من شغل الحديد ده؟ قلنا ليهو: 30 الف جنيه
صافي بعد ما نطلع حق الحمار برًة (برسيم, قصب, ذرة) فقام مسك رأسو و قال: انا مرتبي 180 الف في الشهر, ياخ ما تشوفوا لينا شغلانة معاكم
بدل شغل الميري ده.
و انشاء الله يا يابا دائما مبسوط!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
اخونا سمير كيف حالك
مرة قابلت سوداني في واحدة من مدن السعودية وقال لي شغال مع كفيلو سواق
المهم في شغلة وهي سواقة عربات الصرف الصحي - سوقها كان رابي اليومين ديك.
- السعودي قام قال لصاحبنا السوداني : رأيك شنو نعمل عربية صرف صحي وتسوقها
ومنها تكسب وانا اكسب.
كان رد السوداني: والله يا عمنا نحن في السودان بنقول ما في شغل عيب
لكن شغلت دي لو رجعت السودان ما بشتغلها. 
علما بانو كتير جدا من الاخوة السودانين شغالين في عربات الصرف الصحي
وفي النهاية للضرورة احكام والمسألة مسألة قناعات شخصية.
-----
مرة واحد من الوزراء الكيزان مشوا الصين - بعد الزيارة عملوا معاهو لقاء عن انطباعتو عن الصينيين.
قال زار مستشفى في الصين الصباح بدري حصل عمال النظافة شغالين بكنسوا وينضفوا
بعد شوية عمال النضافة الكانوا بمسحو وبنضفو مشوا غيرو ملابسهم وجو لابسين
واحدين دكاترة وواحدين ممرضين ... الخ
ما عرف الكلام دا صاح ولا الوزير دا اتخلبط في الصينيين البتشابهو ديلاك.
--------
(حمار دنقلاوي) الفوق دي ح تجيب ليك الهوا - حاول اسحبا
العنوان محتاج لتعديل (إمكن يقابلك) تعدل إلى (إمكن تقابلك)
ولك تقديري
| |
|
|
|
|
|
|
|
|
|
Re: أغرب وظائف إمكن تقابلك في حياتك! (Re: قسم الفضيل مضوي محمد)
|
Quote: السعودي قام قال لصاحبنا السوداني : رأيك شنو نعمل عربية صرف صحي وتسوقها
ومنها تكسب وانا اكسب.
كان رد السوداني: والله يا عمنا نحن في السودان بنقول ما في شغل عيب
لكن شغلت دي لو رجعت السودان ما بشتغلها. |
على كمان الله يا قسم الفضيل صاحبك ده لو سمع بالقروش البدخلوه الناس البسوقو الفنطازات و بشفطوا مياه الصرف الصحي, ما كان قال كلامو ده.
Quote: علما بانو كتير جدا من الاخوة السودانين شغالين في عربات الصرف الصحي
وفي النهاية للضرورة احكام والمسألة مسألة قناعات شخصية. |
احنًا المضيعنا شنو غير الطنقعة الفاضية دي,,اي زول تلقاهو عاوز يبقى مدير و وزير حتى في بلاد الناس!
يعني زول يسافر السعودية و بالكاد يكون تخرج من مسيد و حافظ 5 سور من جزء عمً, داير يشغلوه شنو يعني مثلا؟ رئيس مراسم في الديوان الملكي!!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: قسم الفضيل مضوي محمد)
|
| Quote: (حمار دنقلاوي) الفوق دي ح تجيب ليك الهوا - حاول اسحبا |
انا ما عرفت قصدك يا قسم؟ على العموم الحمار الدنقلاوي في سوق الحمير في سوق ليبيا هو افضل انواع
الحمير على الاطلاق و الحمير بنقسم الى نوعين 1- حمار ديراوي او دبزاوي و ده الحمار المكادي البطئ
و البحرن كتييير و منتشر في الولايات البقع جنوب الخرطوم 2- الحمار الدنقلاوي و لونه ابيض و ده اسرع
انواع الحمير على الاطلاق و سهل التعلم و يستخدم الى الان كمواصلات في اطراف الخرطوم و تقريبا يأتي من
الشمال و الحمار الدنقلاوي هو "خير فصيلة من الحمير اخرجت للناس" و قال فيه ابو مبارك من منتديات البركل:
ياسلام منك ياسلام
ده الكلام والنضم التمام
ليك تحية ومليون سلام
ولي حمارك تعظيم سلام
ولي حمارك كــل احترام
سيدو عاد كاربلو اللجام
شد سرجو وربط الحزام
قام مع الفجاج فتاح يا عليم
وكالبرق في سوق مروي حام
حبلو تيل منسوج الرسن
والصريمي تزيدو هندام
و رد عليه متداخل اسمو عادل بالأتي:
"إبداع والله شيخنا العطا ، أطال الله عمرك ، هل تصدق أنه قد كانت لي أمنيات عديدة في طفولتي لم استطع تحقيقها يأتي على رأسها
امتلاك حمار دنقلاوي فاره وطنبور، وها قد هرمت على قول التونسي ولم أحقق أي من الأمنيتين"
و الحمار الدنقلاوي بتاعي كان ثمنه 2 مليون بالقديم, يعني لو تميت عليه 2 مليون تاني كان جاب لي بوكس مازدا!
| Quote: العنوان محتاج لتعديل (إمكن يقابلك) تعدل إلى (إمكن تقابلك) |
تمً عمل اللازم و شكرا يا حبيب!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: عثمان جاد الله بخيت)
|
شكرا يا ابو سمرة على السياحة الممتعة
اديك اغرب مهنة يمكن تكون سمعت بيها
مجموعة ومن بينهم سودانيين كان مهنتهم عبارة عن بنوك دم متحركة للملك فهد يرحمه الله
هم من نفس فصيلة دمه شغلتهم هي انو كلما يحتاج لدم يجو يشيلو منهم
طبعا كانو بيحظو بعناية طبية فائقة وتغذية على مستوى سبع نجوم
يسافرون معه في حله وترحاله
اسي طبعا بكونو استغنوعنهم هههههههههه
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: محمد إبراهيم علي)
|
Quote: شكرا يا ابو سمرة على السياحة الممتعة
اديك اغرب مهنة يمكن تكون سمعت بيها
مجموعة ومن بينهم سودانيين كان مهنتهم عبارة عن بنوك دم متحركة للملك فهد يرحمه الله
هم من نفس فصيلة دمه شغلتهم هي انو كلما يحتاج لدم يجو يشيلو منهم
طبعا كانو بيحظو بعناية طبية فائقة وتغذية على مستوى سبع نجوم
يسافرون معه في حله وترحاله
اسي طبعا بكونو استغنوعنهم هههههههههه |
المهنة دي فعلا غريبة و غريبة جدا يا محمد ابراهيم و نادرة زي فصيلة دمهم.
و ذكرتني بالزلمة الكان شغال متذوق طعام صدام حسين وهو في نفس الوقت صديق شخصي لصدام
يعني تموت انت عشان يحى الملك و الرئيس.
لكن الناس دي بتكتب شنو في ال CV بتاعهم بعد وفاة الملك, بايع دماء مثلا, لكن بيني و بينك برضو احسن
من سافكي الدماء و مهدري الدماء.
تحياتي!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: nour tawir)
|
Quote: يا سمير كوكو..
الوآحد بطنه طّآمة ليها 25 سنة...
فى دآعى لزيادة القرف؟ |
غلبتنا سدها يا نور , فقلنا نوسع قدها!
| Quote: بوست ممتع يا سمير وااااااااااصل ... لك مني السلام والود والتحية. |
خليكم قريبين يا عثمان جادالله و احمد من الفيسبوك,,,, النشوف نهايتها وين!
تسلموا!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
حبيبنا سمير التحية المعطرة بالورد لك اولا ....
شكرا لك ثانيا لانك اخرجتنا من بوست النبز والكلام الفارغ البيهناك داك ...
وكمان لانك ذكرتنى طفولتى بقيام الفجر بس الاختلاف بينا انو الوالد كان تربال (مزارع )
وكان بصحينا عند النباه الاولانى عشان نحش القصب فى موسم ابو سبعين وحش الخضرة والجرجير
عشان يجهزهم للسوق ويكون فرش واخضر ....وكمان التشابه جاء فى مواصلة التعليم رغم الصعوبات..
تحياتى وشكرا على البوست الممتع ده واضم صوتى للمطالبين بحكى تجربتك الحياتية كاملة للفائدة .
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: ابو جهينة)
|
تحياتي سمير
بوست جميل
في فيلم Perfume كان جين باتست له حاسة شم يستطيع بها تمييز رائحة الديدان والضفادع تحت الماء, راحة الحديد والزجاج والأعشاب والحجارة باختضار يميز رائحة كل شي جمادا او حيا
العجيب أنه لم يكن (يشمئز ) من أي رائحة
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: نور الدين عثمان)
|
| Quote: حبيبنا سمير التحية المعطرة بالورد لك اولا .... |
و لك من هذه التحايا مثلها و اضعاف استاذ نورالدين عثمان!
Quote: وكمان لانك ذكرتنى طفولتى بقيام الفجر بس الاختلاف بينا انو الوالد كان تربال (مزارع )
وكان بصحينا عند النباه الاولانى عشان نحش القصب فى موسم ابو سبعين وحش الخضرة والجرجير
عشان يجهزهم للسوق ويكون فرش واخضر ....وكمان التشابه جاء فى مواصلة التعليم رغم الصعوبات.. |
التحايا عبرك لكل المزارعيين في مشاريعهم الزراعية و حقولهم و بلادهم و حواشاتهم على امتداد ربوع الوطن
فقد كانت مهنة الاباء و الاجداد و ما زال. و الاب المزارع و الابن المزارع دوما يذكرني بقصة "المزارع الحكيم" في كتب المطالعة
و مع اختلاف الوصايا للابناء بمرور الزمن, يظل المزارع حكيما و لا شك ان والدك كان كذلك!
| Quote: تحياتى وشكرا على البوست الممتع ده واضم صوتى للمطالبين بحكى تجربتك الحياتية كاملة للفائدة |
التجربة الحياتية بالنسبة لي ربما لا تكون متفردة unique او حتى غنية, و ها انت تكتشف ان حياتك فيها شبه مني مع اختلاف التفاصيل
, لكن التجربة عندي ربما بها نوع من الاثارة و شئ من الغرابة لأنها ببساطة كانت تسير كيفما اتفق دون تخطيط مسبق من احد, لكن العناية الالهية
و المشيئة الربانية كانت دوما حاضرة. و سوف ننتظر ذلك اليوم لنتونس بها و عنها.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: خالد عبدالوهاب)
|
Quote: جميل جدا ياسمير
ايميلك لذو اليد بخصوص الصورة جميل وملهم جدا ياسمير
اضم صوتي لبقية الشباب البيطلبو تحكي مسيرتك بتفاصيل اكتر
شكرا على البوست الجميل ياجميل |
اشكرك أخي خالد على المرور و اوعودك بالتطرق لتفاصيل تجاربي الشخصية في بوست منفصل متى ما سمح الوقت بذلك!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
معقولة بس ... شغل و نوم في نفس الوقت ... اختبار المراتب الفاخرة!!
شغل غريب و مريح للدين ... كل ما في الموضوع تستلقي و تنوم في مرتبة و سرير فاخرين اثناء النهار كنوع من اختبارات الجودة لمحلات الاسرة الفاخرة.
و يجري اصحاب البزنس تجارب أخرى بعد تناول الموظف النائم للكحول و الكافيين و كذلك اختبار النوم في حالة وجود اضاءة و ضوضاء.
كلام عجيب! تقبض 1600$ شهريا مقابل تجي كل يوم تنبطح طرة في السرير و بعدو تتكل بملابس النوم و بعداك تمشي بيتكم بعد 3 ساعات ...احلى من كده في وين!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: محمد المعتصم ابوبكر)
|
| Quote: ياخ دي اقدم وظيفة عرفها التاريخ ولكن مع التطور يبدو انها تم تعديل المهام فيه |
نعم الاحضان و توفير الحنان قديمة و موجودة من زمن ابونا ادم و امنا حواء.
الجديد انو بقى بقروش و ده حاجة ما بتنفع معانا, إحنا ناس نحب الملح بس, مثلاً في مدينة نيويورك في تايمز اسكويرز و اليونيون اسكويرز
بلاقيك بنات زي الورد شايلين يافطات كبييرة و مكتوب فيها (احضان بالمجان) زي الفي الصورة التحت ده:
و انا لمن اكون في الحتات ديك, ما بفوت المولد ده كلو كلو,,,,,
و بعدين انا من الناس البؤمنوا بالمثل القائل: "كتر من المجان حتى لو بضرك"
بارك الله فيهن بقدر ما يقدمن للانسانية من خدمات جليلة و مجانية.
| |
|
|
|
|
|
|
|
|
 Re: أغرب وظائف إمكن يقابلك في حياتك! (Re: عوض محمد احمد)
|
Quote: منذ فترة طويلة لم اقرا مثل هذه الكتابة الجميلة الجديدة المثيرة
هل تكتب في موافع اخرى؟ فمنذ اليوم لن افوت لك حرفا في اى مكان تكتب فيه |
ده كلام كبييييييييييير الكتبتو يا استاذ عوض!
الكتابة الجميلة دائما موجودة و بكثرة في المنبر.
بالنسبة لسؤالك,,,انا لا اكتب في اي مكان أخر.
توقع مني ايميل بخصوص الموضوع و سوف اوضح ليك فيهو وجهة نظري!
| Quote: يسرني و يشعرني بالإفتخار , إفتخار إنسان بمهنته تعظيم سلام ليك و بوستك حقيقة ممتع.(أرجو أن أكون فهمت صح) |
شكرا عبدالمنعم علي كلماتك الطيبة و الاشادة!
Quote: منذ ندوة الكونفرس الذي تحدثت فيه عن جزء من تراجيديا حياتك
صرت ايقونة تحدي الواقع بنسبة لي وشكرا لك |
عثمان شريف يا صديق لك شكري على حضورك هنا مجددا!
Quote: والله يا سمير انت شخص محترم ومتصالح مع نفسك وماضيك ومثال لقمة العصامية وعلي ما اعتقد انك خريج هندسة جامعة الخرطوم فوالله وانت
قد تحديت مثل هذه الظروف لتواصل تعليمك وفي اعرق الجامعات السودانية وفي احسن كلياتها والله يجب ان تعطي نجمة الانجاز الذهبية فالف تعظيم سلام لك يا محترم
|
الاخ فتحي ابوعاقلة (Fath Abuagla): على العموم نقول ليك شكرا و ان كان كلامك اكبر مني بكتيييييييير!
| Quote: الآخ سمييييييييير أنت راااااائع وبوست ممتع وممتاز , وأتمنى ليك كل التوفيق والسعادة الآبدية ... |
علي احمد: الاشياء دائما رائعة بحضوركم و مشاركتكم!
شكرا لكم مجددا على المجاملات اللطيفة!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
بمناسبة المهن القديمة يا محمد المعتصم - و اشكرك على المرور و الاشادة لأني نسيت في الصفحة الفاتت ما لخمة الاحضان دي - في مهنة
كانت في انجلترا ما قبل عهد الساعات المنبهة تسمى "الطارق" Knocker up و عامل زي المسحراتي بتاع رمضان, لكن ده بكون شغال
بصحي زول واحد في كل مرة باستعمال قناية للشباك البعيد و عكاز للشباك القريب,و بدفعو ليهو قروش.
مصدر الغرابة هنا حاجنين:
1- الصورة اعلاه تمً التقاطها بكاميرات و ليست رسمة و المعروف ان تقنية الكامرة اكثر تعقيدا من منبه الساعة,
فكيف ناس عندهم كامرات و ما عندهم منبهات ساعة و الساعات اقدم من الكامرات بكتيير؟
2- تخيل زول يجي يصحيك من النوم عشان تمشي انت الشغل و يرجع هو ينوم و يكون ده شغله!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
الأخ سمير ياخي البوست ممتع جدا ، وحكاويك حلوة وظريفة..
عندي ليك مهنة غريبة جدا بمارسها شخص ما ورغم أنها مهنة أبدا ما جميلة لكن برضو نذكرها إضافة للبوست...
عمل هذا الشخص ينحصر بالتجول في الفيافي بحثا عن أي حيوان نافق.. حمل أو بقرة أو خروف أو أي حيوان يكون قد مات حديثا.. يحمل هذا الشخص معه قارورة مليئة بسائل الفورمالين يقوم بصبها على الجثة .. ثم يأتي بعد يومين ليجد أن اللحم قد تحلل فيقوم بفصل اللحم عن العظام ويقوم بأخد هذه العظام إلى مخزن يستأجره في المدينة.. المخزن في غاية النتانة.. هناك يقوم هذا الشخص بغسل وتنظيف العظام تماما من أي آثار للحم، ثم بعد فترة يقوم بجمع محصوله من العظام ويوردها لجهة ما تشتري هذه العظام وتستخدمها في صناعات معينة..
هذه المهنة تدر لهذا الشخص دخلا كبيرا لدرجة أنه شيد أكثر من عمارة في دياره، و استمر لأعوام عديدة في عمله هذا إلى أن أحس بالتعب ورأي أن يورث المهنة لإبنه.. وحضر الإبن ظانا أنه سيعمل في عمل مقبول .. وفوجئ بعمل والده.. فاشمأرت نفسه تماما مما شاهد و استنكر أن يعلم ممارسة والده لهذا العمل فرأي أن يعود نهائيا إلى الوطن وبالفعل عاد وترك صاحب هذه المهنة الغريبة في عمله..
معذرة لغرابة المهنة ولقبحها..
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: الأمين عبد الرحمن عيسى)
|
اللمين عبدالرحمن عيسى,,,, اولاً: انا سعيد بطلتك البهية بجاي و اكثر سعادة بمشاركتك لنا بقصة جامع عضام الفطائس.
ثانيا: عندما يصبح جمع عضام الفطائس مهنة ... اكيد نحن في ازمة! و بالمناسبة هي قريبة من مهنة "المتقلات" بتاعتنا
فهو يجمع عضام الحيوانات النافقة و يبيعها لجهة صناعية و احنا كنًا بنجمع عضام السيارات الميتة من كرنكي و عجل حديد
و سلندرات و يصل في النهاية لجهة صناعية!
و في وقت ليس ببعيد, كانت هناك مهنة قريبة من جمع عضام الفطائس عند زولك ده, و هي مهنة جمع روث الحمير من
الشوارع و تعبئتها شوالات لاستخدامها كزبالة في بيوت الجالوص و الطوب اللخدر و الكلام ده كان في الخرطوم الواحد ده.
خليك قريب لأن العرض ما زال مستمر!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
فرز جنس السواسيو في مزارع الدواجن:
العاملون في هذا الحقل بكل بساطة يقومون بفرز ضكور السواسيو من اخواتهن الاناتي,
و ذلك بعمل check في مؤخرات السواسيو للبحث عن نتؤ, فان وجٍد فالمولود ولد
و الاً فان المولود بت.
و لماذا يقومون بهذا؟
يقولون ان التغذية لا بدً ان يكون مختلف للضكور عن الاناث لأن الضكور للضبح
و الاناتي للبيض.
هناك العشرات من مزارع الدواجن في السودان فهل يوجد عندهم هذا المهنة كعمل
منفصل؟ ام ماذا؟ الشئ الاكيد ان الفرز موجود.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
Quote: لرائع جداً سمير اتزكر موقف ظريف حصل لصديق لنا يسكن امدرمان مع "الطروبي" صديقنا دا كان رجل منظم جدا وشباب وكان بتغاظ جدا جدا لمن يلقى الاكياس
المطلعها لعربية النفايات مبعثرة فحاول يحل المشكلة انو يفصل النفايات ويخت النفايات البلاستيكية برارها والحاجات التانية براراها عشان ما يبعثروها فالظاهر الشباب "الطروبي"
ما اقتنوعو بعد ما يشيلو المخلفات البلاستيكية المنفصلة البلقوها جاهزه برضو بحاولو يفتشو في الكيس التاني ويبعثروهو المهم يوم صادفهم ببعثرو في الكيس التاني وو يقف يقوليهم
(شنو ياخ مافي ثقة اصلو ؟ والله فصلنها كلها) الشباب ضحكو ومشو |
ذكرتني يا محمد عبدالرحمن بقصة حصلت معانا:
مرة و احنًا راجعيين بيوتنا من المنطقة الصناعية امدرمان؛ و في الطريق و قبال ما نعبر شارع سوق لبيبا (الشارع الطالع من ليبيا لغاية حوش الخليفة)
في حي كده بيقع بين مدرسة الضو حجوج و طرمبة ودالبشير في امدرمان (ما متذكر اسمه) لكن الحي ده مقابل حي الدوحة ... اها و قبًال ما نقطع شارع
سوق ليبيا و ندخل حي الدوحة (الزمن داك كانت كوشة و فيها شوية بيوت) نادانا واحد بيتو ناصية مع الشارع و قال يا ولد يا بتاع الكارو مشوار لو سمحت؛ انا
قلت في نفسي مشوار شنو زول نضيف زي ده بكون دايرو بالكارو بتاعنا الحالتو بالبلاء من شحن الحديد؛ و الفرشة بتاعة الكارو دينو طالع و كلو مسامير.
و الزول ساكن في بيت سمح كنًا نطلق عليها "بيوت اولاد العز" المهم مشينا عليه؛ و لمن وصلنا؛ قال لينا: عندي 6 شوالات وساخة دايركم تشيلوه و تكبوه في الكوشة
القدامكم دي و انتو في دربكم؛ المهم اتفقنًا على السعر و شحنًا البقج في الكارو و سوقنا حمارنا و قطعنا الشارع في اتجاه حي الدوحة؛ لكن بعد جسينا الشولات حسينا
انو فيها حاجات قيًمة و ليست فضلات اطعمة؛ و في مكان ليس ببعيد من الملحقية الثقافية للسفارة الايرانية في حي الدوحة؛ فرغنا الشوالات و فتفتناه فتفيت
الجداد و كن نسمي هذه العملية ب "الغربلة" و اثناء لخمتنا مع الغربلة ظهر لينا زول طويل و عاتي ما عرفناه طلع لينا من وين؛ و قام سألنا: انتو بتعملوا في شنو؛
قلنا ليه: سيد البيت داك قال لينا نكشح الوساخة ده هنا؛ فقام عاين للبيت الوصفناه ليه؛ و قام قال لينا: اقول ليكم حاجة: القطعة دي بتاعي انا وهو عارف كده كويس
لكن هو كايس ليهو مشاكل؛ اسمعوني الزول ده دفع ليكم كم؛ قلنا ليه: 1000ج، قال لينا: امسكوا ده 1000ج؛ اشحنوا الوساخة دي و امشوا كبوه ليه قدام بيتو و انا
واقف هنا خليهو يفتح قدومو ده و يسألكم؛ و قام طلع جهاز لاسلكي من جيب الجلابية فعرفنا انو الزول قرن كبييير في الحكومة؛ طواااالي عبينا ليك الشوالات
و قطعنا الظلط و فكينا البطًان بتاع الحُمار و قلبنا الشولات زي القلاب؛ مع صوت الكراكيب سيد البيت جا مارق مع مرتو؛ ده شنو البتعملو فيهو يا اولاد؛ ردينا: الزول
الواقف هناك داك هو القال نجيب الوساخة و نكبو هنا؛ فقام جرَ نور طويييل في الزول العاتي ابو جلابية الواقف مقطع الظلط؛ و كان واقف وقفة عسكرية جد جد
مادي صدرو زي العسكري العامل هُرت بدون استرح في طابور ادارة جيش بالرغم من انو لابس جلابية؛ صاحبي الهنا ده لاوز من الزول داك؛ و مرتو قالت
لينا: يا اولاد شيلو الوساخة دي امشو كبوه في اي كوشة تانية بعيدة من هنا؛ و سألتنا، انتو ساكنين وين؛ قلنا ليها امبدة جنوب؛ فقالت لينا هاكم دي 2000ج
و بتلقو ليكم كوشة هناك تكبوه فيه؛ قلنا ليها و لراجلها الما داير يفتح خشمو من الزعل؛ اكيد حنلقى كوشة، و امبده اصلاً عبارة عن كوشة مفتوحة.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
عندما اكتشفت ان الشماسة مهنة!
كنت مدعو لبرنامج حوار اديان نظمتها الرابطة الدولية للطلاب الكاثوليك بالتعاون مع الطلاب الانجليين في الخرطوم.
و احدى فقرات ذلك البرنامج كان تعريف الطلاب المشاركون بالمراتب الكهنوتية و وظائف الاكليروس؛ و في قاعة
بالمدرسة اللاهوتية Seminary التابعة لسفارة الفاتيكان بكوبر جلسنا للاستنارة؛ و تقدم قس من ابناء الاستوائية
كان قد حضر للتو من احدى كليات اللاهوت بايطاليا؛ و بدأ الشرح بعربي جوبا؛ و طلب من القساوسة و الاساققة بان يتقدموا
للامام ليتعرف الناس عليهم؛ لكني تفأجات به ينادي على "الشمَاسة" ليققوا بجوار القساوسة و في البداية استغربت من وجود
"شماشة" في الكنيسة؛ بالرغم من ان الكنيسة و ثقافتها لم تكن غريبة علي؛ و نظرت حولي فلم الحظ اي دهشة في وجوه
الحاضرين فقلت انتظر نشوف الحكاية شنو؛ فظهر عدد من الاشخاص بلباس كهنوتي وقال القس: ان هؤلاء الشماسة هم
مساعدي القساوسة في الخدمة الكنسية و القداس الالهي.
ربما اخطاء القس في نطق اللفظ العربي و ربما اخطاء في صيغة الجمع للكلمة والتي فعلا تكتب "شماسة" Deaconess
.............................................................!Whatever
| |
|
|
|
|
|
|
|
|
 Re: أغرب وظائف إمكن يقابلك في حياتك! (Re: Sameer Kuku)
|
تظليل وجوه و أجساد فتيات الاعلانات التجارية!!
عندما شاهدت الصورة الضخمة لنانسي عجرم مظللة الوجه و الصدر و كانت قبلها ترتدي قلادة
و هي كما قال الشاعر "وفي عنق الحسناء يستحسن العقد" و استرسل العقد حتى لامس ما ابدع الله
و كان ذلك المنظر في محلات داماس للذهب في السوق الافرنجي في الخرطوم، خطر ببالي ان
من قام بتلك العملية التظليلية هي "جماعة الامر بالملفوف و النهي عن الهمبيرغر" ناس
كاسيات عاريات و نامصات منمصات، و لكن كان المفاجاءة ان من قام بتلك العملية هو عسكري شرطة كان
سادي خدمة في السوق الافرنجي!!! و كان العسكري قد فت الشمار ده لاحد اصدقاءه العاملين هناك
و قال ان جماعة من الشيوخ السلفيين عندما شاهدوه مربي دقينة افتكروه مولانا و دخلوا فيه بحنك
الله قال و الرسول قال ... عشان يمشي يظلل صور نانسي و لمن ما جاب حقو؛ طلعوا ليه ربطة
سمينة؛ العسكري قبض العربون و قال للشيوخ: على الطلاق بتشديرتكم دي بمسح ليكم نانسي عجرم
في لبنان. و انجز المهمة في الليل و اتاه الشيوخ في الصباح و تأكدوا من العمل قد تمً على اكمل وجه
و قاموا بتسليمه الباقي؛ و قبل ما يمشوا قام العسكري سألهم: ما عندكم لينا شغل في مكان تاني؛؛ قام
مولانا قال: احنا مقسمين العساكر حسب دوائر الاختصاص و خليك هنا امكن نحتاج ليك في شغلانة تانية!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
و على ذكر تظليل اجساد النواعم؛ حدثني صديق من غير الثقاة بعد ان اطلع على البوست
و قال لي ان هناك وظيفة غريبة في السعودية و يكون في المطارات التي تستقبل الصحف
اليومية العالمية حيث يوجد موظفين يحملون اقلام شين و يقوم الموظف بتقليب الجريدة صفحة
صفحة و الباس اي صورة لحواء اللباس الشرعي و كده.
لم يتسنى لي التأكد من هذه الوظيفه؛ عسى ان يأتي من له علم و يصحح او يفند او يدعم تلك الرواية!
خصوصا ان مجلة سيدتي و الجميلة تنتجها السعودية و لها اماكن توزيع في المملكة!
لكل الاخوة زوار البوست تفضلوا هدية قطعة حلوة بمناسبة الباس فتاة حلويات سعد اللباس الشرعي!!!
عالم وههههههههههههههههههههم زي ما قال صلاح بندر ياخ حتى Relax ختو بدلو Enjoy the test
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
Quote: الاخ/ سمير كوكو ربنا يديك العافية ياخي بس شغلت صاحبتك جاكي دي قلت مافيها اي شي غلط بس شحن حنان لناقصي الحنان لكن يا خوي انا اكان ما اخاف الكضب
الشغلة شايف فيها ((حنكيل) كرعين الزولة دي محنكلة الزول دا شديد ..الزولة دي لو في السودان - الحنكيلة دي كانت جابت منها تيمان... يازول الخواجات ديل بتاعين محن ههههههههههههه |
قلت لي كيف كيف كيف؟!! اما انت امرك عجيب بشكل!! غايتو احتطاب الليل من الفيسبوك ده يوم حنرفع لينا عقرب فوق المنبر!
غايتو ربنا يديك العافية برضو!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
دق الصاجات للوري السفنجة:
السفر في داخل ولاية القضارف مشكلة كبيرة في الخريف نسبة للاراضي الطينية؛ و معاناة السفر الحقيقية
لمن تطلع من القضارف المدينة في اتجاه القرى القريبة من الحدود الاثيوبية؛ سافرت لقرية اسمها "الدروت"
على بعد 20 كلم تقريبا من مدينة دوكة و السفر كان باللوري السفنجة و الدنيا كانت خريف؛ صاحب اللوري أجر بعض
المساعدين للمساعدة في رمي الصاجات تحت اللساتك في حالة الوحل؛ و في واحد من سفرياتي في الحتات ديك؛
المساعدين شغالين بدقوا صاجات للوري نص مسافة الرحلة و كان اللوري بوحل كل مترين في الطين؛ المعروف ان
الصاجات اتعملت اساسا للوحل في الرمال و ليس الطين، لكن الله قادر ... الموت و لا دق الصاجات في الطين.
انا ما عارف بدفعوا للمساعدين ديل كم؟
* مفردات دق الصاجات و الدُقار لا تستخدم كثيرا؛ نسبة للايحاءات الجنسية التي التي الصقت بهما.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: الأمين عبد الرحمن عيسى)
|
Quote: شغلانية مريحة جدأ
بقرقوا علينا أخوتنا العرب في الخليج مع أنهم هم أكسل مننا بكتير .. المهم
النكتة بتقول واحد سوداني قالوا ليهو لقينا ليك شغلة مريحة جدا، قال ليهم شنو؟؟ قالوا ليهو شغلتك بس تنوم، بس انوم ما أعمل أي حاجة تانية؟ آآي بس تنوم .
قام وافق وبدأ الشغل وبعد يومين جاهم زهجان هايج.. يا أخوانا شغلكم ده أصلو ما فيهو راحة!! |
و برضو قالوا: السوداني لمن يقوم من النوم في الصباح، اول حاجة بعملها باخد راحة!!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
بودي غارد حفلات الطرب بالاورغن!
المعروف ان البودي غارد يحمي الاشخاص و ليس المعدات و الكثير من الفنانين يذهبون للحفلات بصحبة بودي غارد لتوفير الحماية من مثيري الشغب؛
لكن في الحفلات التي تعرف بالطرب او الطربانة؛ و هي الحفلات التي تعتمد على برمجة الكيبورد (الاورغن) بايقاعات قوية و الاغاني التي يألفها
الشباب من واقع الحياة اليومية؛ فالبودي غارد الذين يقفون في صف واحد مع العازف و فني الساوند اثناء الحفل هم هناك لحماية الساوند سيستم و جهاز ضبط
الصوت و الاورغن في حالة اندلاع شغب "شكلة" في الحفلة. و السبب ان حفلات الطربانة نشأت في اطراف العاصمة في بدايات الالفينات و انتشرت بعد الايقاعات
التي برمجها العازف ايمن الربع و لاقت رواجا كبيرا؛ و في تلك الاماكن كانت تنتشر ثقافة "فرتيق الحقلات" من بعض الشباب لأن الحفلات تقام في الشوارع العامة؛
مما يعني حضور عدد من المتطفلين و المخمورين و بما ان الساوند سيستم و الاورغن غالية الثمن فصاحبه يستأجر من يطلق عليهم بودي غارد للتأكد من ان الساوند
سيستم سوف يجد طريقه سالما للعربة الهايس في حالة قيام شكلة و انطفأ الانوار لأن وجود الساوند على ارتفاع عالي من الارض يعني سقوطه في الهرج و المرج
المصاحب للشكلة و الوهمة؛ اما الفنانة يحلها كرعينها عشان كدة بجو لابسات بناطلين! تغير وظائف البودي غارد بعض الشئ في السنوات الاخيرة مع تحسن الاوضاع
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
Quote: رائع انت ايها السمير ... كم يعجبنى فيك هذا الافتخار بالماضى رغم ما حمله من شظف العيش والذى يسعى الكثيرون الى مسحه من حياتهم ... انت لم تخلق هذا
الماضى ولكنك عشته ... وانت الان تصنع كل هذا الجمال حولك لجمال روحك ومفرداتك ... عش كريما فانت من يصنع نفسه الان ... وفقك الله اينما حللت |
الاخ محمد خليفة، سلامٌ لك وتحية وبعض انحناء، اشكرك اخي العزيز على هذه الكلمات الحميميًة و على مشاعرك الجميلة الدفاقة
و شكر خاص على الدعوات القلبية الصادقة و كذلك دعوات كل الاخوة من قبلك و كلماتهم التشجيعية التي ترد الروح؛ و مرورك
دوما يسعدنا و يضيف للبوست منظور جميل و بعد اكثر القاً و تجدني ابادلك الود و الدعوات اضعافا مضاعفة وهو كل ما املك حالياً
على امل ان يجمعنا فضاءات ارحب.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
صيد الجراد:
معروف ان الصيد يكون للحيوانات و الاسماك و الطيور و لم يسمع شخص بصيد حشرات كالجراد.
في الغالب الاعم في السودان يتم رش الجراد بالمبيدات سوى كان بالطائرات او باليد و من ثمً يمكن
التقاطها ياليد و هذا ليس صيد؛ لكن في بعض المناطق خصوصا في كردفان و اجزاء من النيل
الابيض يتم اصطياد الجراد بواسطة الاشخاص عوضا عن الرش بواسطة المبيدات و حسب مفهوم هؤلاء؛
فان الجراد المرشوش بالمبيدات يحتوي على كيماويات و لا يصلح للاستهلاك و بالتالي يستعينون بطرق
تقليدية للصيد مثل استخدام الصمغ كشرك في الاشجار او حتى استخدام اقمشة كبيرة و رميها فوق الجراد
و الطريقة دي بكون في المشاريع الزراعية! و الجراد يتم شواءها و استهلاكها كطعام خفيف؛
لا اعرف شعبية الجراد كطعام؛ لكن لها رواج في بعض مناطق امبدة و اكبر اسواقها سوق كرور
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
| Quote: صيد الجراد شائع جدا فى الخليج ويباع باسعار غالية جدا ويقولون عنه انه فياقرا المساكين |
ماشاء الله يا شيخ العرب مريت على صفحتك في الفيسبوك؛ شايفك عندك فكرة عن الحكاية دي و كاتب ليك كويس عن الجراد و شايفك مهتم بالزراعة و منتجاتها
و سرقت الصورة دي من صفحتك، لأن السعوديين مهذبيين الشغلانة بتاع الجراد دي بطريقة كويسة و لو زول ما انتبه للصورة يفتكرها شئ تاني!
مرة كنت في الحي الصيني في نيويورك و لقيت الصينيين بفرغوا في صناديق مليانة سرطان بحر (ال Crab او ال Lobster) و كان عاينت
لسرطان البحر ده حي، تاني ما بتاكلو و هو مطهي و طوالي اتذكرت الجراد في السودان لأنو شايف الخواجات مهتمين بيهو شديد في السودان
و بقولوا انو علاج للكثير من الامراض، غايتو ما سمعت بانه فياغرا، المشكلة انو الجراد في السودان يعتبر كارثة plague و ليس ثروة و الناس شايلنو
مع الجراد من ما تسبب في مجاعة سنة 6؛ و انا بحب الجراد شديد و علي كمان الله فيهو حلاة ورك خليهو ساي، و اعتقد انو جرادنا ده ممكن ينافس
سرطان البحر و غيرو من الحشرات التي تقدم في المطاعم الغربية لو احسنا التعامل معها.
انا فكرتي كانت عن استخدام كلمة الصيد للجراد؛ يعني تخيل زول من الاهالي يرفع ليهو بقجة و يدقش الخلاء و يقول ماشي
الصيد و تفتكر انو ماشي يقنص ليهو ارنب و لا جداد وادي و يمشي يجيك بجراد!!
شكرا يوسف ابوصالح على الطلة و كن بخير!
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
نوم وتقاضى راتب 5 ألاف دولار .. ناسا تطرح ''أكسل'' وظيفة فى العالم
وظيفة يحلم بها الجميع، لا جُهد يُبذل، ليس مطلوباً منك سوى الاستلقاء على ظهرك، أفعل ما تريد، يمكنك مشاهدة التلفاز، أو
تناول الأطعمة أو حتى أخذ ''دُش'' بارد، سنوفر لك ما تشتهيه من أطعمة، ولكن بكميات محدودة، إذا أردت تصفح الأنترنت
أو لعب الشطرنج فلابأس، فقط ''نم وأفعل ما تشاء''.
وكالة الفضاء الأمريكية ''ناسا'' أعلنت عن حاجتها لـ''متطوعين براتب شهري 5000 دولار'' وذلك لشغل منصب ''مُستلقى على
السرير'' لدراسة ''تأثير الجاذبية المنخفضة على الجسم البشرى''.
وقالت الوكالة إن ''المتطوع المُختار'' سيتم إجراء مجموعة من الاختبارات والتجارب عليه بقاعدة ''جونسون الفضائية''
بالولايات المتحدة الأمريكية، وفى بادئ الأمر ولمدة أسبوعين، سيعيش ''المتطوع'' حياة عادية ويمارس كل أنشطة حياته
الطبيعية لدراسة حالة جسده فيزيائيا وطبياً.
وبعد مرور الأسبوعين، سيُطلب من الشخص الشاغل للوظيفة القيام بـ''أشق جزء فى المهمة'' وهو الاستلقاء على سرير
لمدة 70 يوماً متصلة، يتعرض فيها المتطوع لـ16 ساعة من الضوء و8 ساعات من الظُلمة، فى ظل مناخ ذو جاذبية منخفضة
لدراسة ردود فعل الجسد.
الوقت الوحيد الذى يمكن للمتطوع أن يتحرك فيه هو عندما يريد العلماء إجراء فحوصات على العضلات والدورة الدموية والجهاز العصبي المركزي.
وبعد مرور الـ70 يوماً، سيقوم المتطوع بإجراء فحوصات لمدة أسبوعين أخرين، ثم يمكنه الذهاب حيث يشاء.
ويؤكد العلماء فى ناسا أن المهمة ''ليست سهلة كما تبدو'' فجسد المتطوع ''سيفقد وزنا كبيرا حال تعريضه لظروف الجاذبية المنخفضة''
مؤكدين أنه حال تعرض المتطوع لخطر جسيم ''سيتم إيقاف التجربة فورا''.
الجدير بالذكر أن ''ناسا'' تقوم بتجارب حول تأثير الجاذبية على البشر منذ أكثر من 25 عاماً، إلا أن التجربة الحالية سيتم استخدمها
كمحاولة لدراسة ردود أفعال الجسد حال إرسال رواد فضاء فى رحلة طويلة إلى المريخ أو إلى مكان أبعد.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: معتصم محمد صالح)
|
معتصم يا نيستا، سلام يا صاح بين الانام، سلام يا زول يا جميل، سلام يا ابن الكرام!
اسعدني تواجدك هنا و اسعدني اكثر ما سطرته و شاركتنا به من تجارب الطفولة و الشباب المبكر و لو قام مخرج تلفزيوني
و ترجم قصتك لعمل درامي لكان فيها من العبر و الدروس الممزوجة بالمرح و الترويح الكثير و ا تاح للاجيال الجديدة القاء نظرة
على تلك الايام الخوالي. و السبعينات عموما عصر ذهبي للسودان حتى لو لم يكن به شئ اخر سوى نعمة السلام و الاستقرار
و نعمة الويسكي و البيرة و الشري بالمناسبة ما شفت واحد من اعضاء مجلس ثورة الانقاذ مقيل في ميز الضباط
لأنو في 4 منهم كانوا خمرجيًة، سكروا في السبعينات و حولو طفولتنا الى جحيم في التسعينات.
مهنة غربلة الذهب ليس بذلك السؤ و الغرابة مقارنة بالتنقيب عن الذهب في صحاري و وديان السودان بواسطة الاهالي؛ لأنهم يحفرون
قبر جماعي كبير و يكونون بداخله و يطلقون عليه منجم، التقول في منجم بكون تحت رمال. الغريبة انا ما سمعت بي حكاية غربلة
الدهب و الاً لكنت وجدتنا بهناك، بالرغم من اني قضيت زمن طويل في الحتات ديك.
غايتو قصة مجازفة جوز الحمام ده عامل زي لمن انعدم الحديد النوديه المنطقة الصناعية فقمنًا فكينا الحديدة بتاع حبل الملابس بتاع
جيرانا و كان متدلي من برة و قمنًا ربطنا محلو طوبة خضراء عشان الملابس المشرور في الحبل ما يقع في الحوش
اما قصتك ما الفرك ده قصة عجيبة و انا متأكد اي زول بقرا كلامك ده، تاني اول ما يمسك ليهو قروش جديدة ح يفركها، عسى و لعل ينفلق.
شكراً عزيزي على مشاركتنا تلك المحطات الحياتية و ما فيها من غرابة و عبر و الم و امل.
| |
|
|
|
|
|
|
|
|
|
Re: أغرب وظائف إمكن يقابلك في حياتك! (Re: Sameer Kuku)
|
الصبي كبش الفداء في العصور الوسطى:
البريطانيون كانوا يعتقدون ان الدم الملكي او الاسرة المالكة شئ مقدس و بالتالي كان هناك مشكلة يواجه المربيين و المعلمين لملوك المستقبل
عندما يكونوا اطفال؛ و المشكلة هي لا مكان معاقبة الامراء الصغار من الاسرة المالكة بالضرب مهما ارتكبوا من جنح او جرم؛ فابتدع المربون طريقة لمعاقبة
الامراء عن طريق معاقبة صبي لا يحمل دماء ملكية ككبش فداء بدل الامير و بالتالي الصبي غير الملكي وظيفته اخد "علقه من امو" مكان
الامير و اختيار الصبي كبش الفداء لا يكون عشوائيا و انما يكون صديق مقرب من الامير و قد يكون ابن احد من النبلاء؛ و يتألم الامير عندما يرى
صديقه يضرب و المكافاءة للصبي كبش الفداء يكون في المستقبل و يمكن ان يرقى ليصبح دوق او نبيل نتيجة للعلقة التي اخذها و لا يستحقها.
ديل عكسوا اية {وَلَا تَزِرُ وَازِرَةٌ وِزْرَ أُخْرَى}
| |
|
|
|
|
|
|
| |
محمد البشرى الخضر
Ali Sirelkhatim
مرتضى احمد عبد القادر
الفاتح ميرغني
محمد هاشم ابوزيد
Mohamed Mekki
قسم الفضيل مضوي محمد
nour tawir
عثمان جاد الله بخيت
محمد إبراهيم علي
نور الدين عثمان
ابو جهينة
السر جميل
محمد المعتصم ابوبكر
الأمين عبد الرحمن عيسى
معتصم محمد صالح
فيس بوك
تويتر
انستقرام
يوتيوب
بنتيريست