|
تداعيات ... وحراق روح
|
هييييييييييييييييييييييييييييييييه .... في الزمن دا من فصول السنه في جزيرتنا (الكانت خضرا) وبعد ما تجي راجع من الضهريه لو عندك شغل في الحواشه ... أو من التمرين ... لو أرضك مسكت مويتها تب .... تجي داخل البيت مع المغارب ... وتلقى عنقريبك فوق ضهر الحوش والحوش مرشوش ...والملايه تهبهب طرررررررررررر .... واللحاف الليل القطن ... قطن حواشتك زاتها والمنجدو ود امحمد زين ... بارد وتريان ..يا سلااااام ,,, وتقول كدي أمك الحنينه تجيبلك الشاي المقنن الما خمج ... ومعاهو كان لقيمات ولا موليته ... ويا سلام لو الكهربا ما خذلت توقعاتك وقطعت ههههههه ... وقتها بجيك القمر فوق خشم بابك ... والحله بتاخد ليها صنه .... وبتجيك الاصوات صافيه والروائح شهيه .... ريحة دعاش بعيده ... ريحة طاجن العصيده ... وصوت السره تناغم في بتها امونه .. امونه الصباح.
وانتا في أثناء المشاهد والاحاسيس الجميله دي تاخد ليك غفوه وتحلم ..... تحلم بالقمح شايل سنابلو ... وبالقطن أبيض وناصع ... وبي أمونه الصباح ... تتبسم في وجيهك وتقرب في الحفله تديك شبال ... وتحس اثناء نومتك ديك انها مطرت فوق رويسك ... تقوم بى لهفه في شان تدخل العنقريب واللحاف .... تلقى العمبلوق ود اللذينه ... خرب ليك تأملاتك وشبال امونه لانو .... طلع فوق العنقريب النايم فوقو وبال كمان ههههههههههه يا سلااااام.
ملحوظه:
المنظر دا قاعد اتذكرو كل يوم وانا طالع الصباح للشغل ودرجة الحرارة قريب اربعين درجه .... نحنا غايتو عايشين في صحراء راسها عديل .... وكان ما الريال دا شيتن بقعدنا فوقا مافي ..... وكان ما الأمر منو شيتا بصبرنا علي مرنا دا مافي.
الله يصلح الحال ... ويجازي الكان السبب ... وللعلم يا أخوانا الله في.
|
|
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
قبل مده اتصل علي واحد من أعمامي... وسألني يا عثمان نحنا متغالطين في حاجه ودايرين نتأكد منها ... قبيلة الكاتب الراحل المقيم الطيب صالح شنو؟؟؟
قلت ليهو والله ما متاكد ... هو غايتو أكيد سوداني ومفخره لكل سوداني.... المهم الموضوع ... خلاني أفكر كتير .. الكاتب الطيب صالح والذي قرأت كل كتبه ... بشغف وحفظت جملا كاملة في كتبه ... وكم تحدثت عنه بكل الفخر مع الجنسيات الأخرى لأنه سوداني وكفي ... لم أحاول في يوم معرفة قبيلته أبدا ... وعندما بحثت في الانترنت عن قبيلته وجدت انها قبيلتة الركابية ... معلومة عرفتها وعمري قد تجاوز الأربعين عاما ... بينما عرفت الطيب صالح الكاتب السوداني .... وأنا في العشرينات من عمري !!!! .. وحتى هذه اللحظة لا أعرف قبيلة الأزهري ... أو المهدي أو المحجوب ... أو جون قرنق ولا أعرف قبيلة عبد الفضيل الماظ ... أو عبد الرحمن النجومي بينما أعرف أن النميري دنقلاوي ... والبشير بديري .... أذا تأتي الجهوية والقبلية مع الانظمة الشمولية فقط ... ولكن في الحكومات الوطنية والديمقراطية .. يكون القادة والحكام والشخصيات الوطنية سودانيين.
وهذا ما نتفق عليه هنا في الغربه ... فلأنك سوداني ... يسألك أهل البلد عن الجهة التي يقصدونها لأنك الاقدر على الوصف الصحيح والصادق ... وفي الغربه ... تكفيك فقط الجلابيه السودانيه او العمه ... حتى تغاث في الطريق في حال تعطلت سيارتك مثلا ... ويحكي أحد الخليجين أن سيارته قد تعطلت في الطريق وهو بمعية أسرته وانتظر طويلا ... حتى فقد الأمل وهو يلوح لمنقذ .... وبعد زمن طويل توقف له سوداني ولكن في الاتجاه الآخر من الطريق ... وافاده بأنه لا يستطيع مساعدته لأن هنالك سياج يفصل بين الطريقين .. ولكنه اعطاه فقط العمه السودانية وطلب منه أن يلبسها على رأسه ... وسيجد المساعدة ... فقال الخليجي بعد أن لبستها وصل عدد سيارات السودانيين الذين توقفوا لمساعدتي اكثر من 10 سيارات ... الحمد لله ما زلنا ... كـــ سودانيين .. أهل كرم ... وغوث .. وصدق .. وامانه ... قلوب بيضاء ... نعم هنالك بعض الهنات ... ولكنها لم ولن تأثر حتى حينه على سمعتنا بين الجنسيات الأخرى ... هي دعوة لنكن جميعا ضد التشرذم والدعوات العنصريه والقبليه والتي تخدم من يريدون ان يفرقوا بين السودانيين ..حتى يشتتوا قوتهم ... ولو قمنا جميعا بتمزيق أي طلب لوظيفه او جواز سفر او كرت تموين مكتوب فيه أذكر اسم قبيلتك ... لما تجرأ هؤلاء على كتابتها مرة أخرى ... صدق الراحل المقيم الطيب صالح عندما قال من أين أتى هؤلاء .... يا سادتي ... يكفي إنو النيل أبونا والجنس سوداني.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
زمااان لامن كنت طفل صغير ... واجي جاري بسرعه وبدون حذر وبتهور واقع في الواطه ... كانت الحكمه التربويه الموروثه بتقول : شوف الواطه انشقت هيييع الكلس شقيت الواطه ... ولامن ابكي ... عشان يرضوني يا قالوا لي الراجل ببكي؟ ويا قالوا لي ... الندق ليك الواطه !!! ابدا ما بيتم الحديث عن خطأ التهور وعدم الحذر .... وبتأكد انا كــ طفل انو غلطانه الوااطه .. وعلطان الباب ... وووووو ...... دي واحده من الاسباب البتخلي السوداني ما ندر يعترف بغلطو ... السواق كان كتل ليهو زول في الشارع ... بقول غلطان المرحوم ... لو فريقنا البنشجعو اتغلب ... بنقول التحكيم فاشل ... حتى الحكومات ... ساسه ونخب واحزاب وتنظيمات ورؤساء ووزراء وقضاه ... ووووو ... اخطأوا في حق الوطن والمواطن أخطأ فادحه دمرت البلد ... ولم نسمع احدهم في يوم من الايام يعتذر ويقر بفشله ... عشان كدا ... عمرنا ما ح نتقدم ولا نتطور لو ما اتعلمنا ثقافة الاعتذار والاعتراف بالفشل ... فالفشل ليس عيبا ... ولكن الاستمرار في الفشل هو الدمار بعينه ... فـ سياسة يا فيها يا نطفيها دي نتائجها كارثيه (ان شئت فقل .. او ترق كل الدماء) .... نحنا محتاجين قبل تغير الحكم والحكام بشده لان نتغير من دواخلنا اولا .. ولا يغير الله ما بقوم حتى يغيروا ما بأنفسهم.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
يا سلاااااام يا عثمان ياخ على روحك وعلى حراقها مرحب بيك و حياك الله على الكتابة الطاعمة - الطاعمة فعلا لا مجازا في الفقرة الأولى حسيت وانا بقرا بريحة الدعاش و طعم اللقيمات و كان ما اخاف المبالغة قهمتني صنانة بول العمبلوق :)
ياخ شكرا ليك وكتّر خيرك والله
| |
|
|
|
|
|
|
Re: تداعيات ... وحراق روح (Re: محمد البشرى الخضر)
|
ود البشرى منور والله .... راكوبة التداعيات وحراق الروح هههههه .... وعلي الطلاق لو بكري دا خاتيلنا خرفان فوق ضهر المنبر دا كان ضبحت ليك واحد شخخخخخخخ ... في شان جيتك الكريمه دي ... وكان يا حبيب القسا قعدنا أنا وانتا ندوبي ونشوي في خروفنا والنار تقول هل من مزيد هههههههههه والله يا ود البشرى وما طالبني حليفه ... الزول البعرف ريحة الدعاش والهمبريب وشيطنة العمبلوقات دا زولي تب ... لانو الحاجات ديل ما بعرفن الا زول عايشن تب ... الله يرجعنا لي بلدنا سالمين غانمين ... وللهمبريب والشيه الطاعمه ضاربين ههههههه قول آمين أأأأأ ود البشرى.
| |
|
|
|
|
|
|
Re: تداعيات ... وحراق روح (Re: محمد البشرى الخضر)
|
عثمان جادالله بخيت...
أها هاك دى عشان تشوف النفسيات الما خمج...
فى الوكت دا, وقدر ما تتلفت تلاقى الخضرة مغّطية الجبال.. والخضرة نديانة ولامعة.. ويغشاك نسيم بااارد ومنعش وعليل... والدنيا صاااانة تقول الناس رحلت .. وأت براك قاعد فى الحتة دى..
وأت فى الحالة دى... تجيك ريحة ملاح التقلية من حتة... وريحة السمك المشوى من حته.. وريحة الشية من حته.. وريحة ملاح النعيمية من حته.. وريحة الطين لما الوآطة تغشاها المطرة..
وأت برضو فى الوضع دا... وآقف قدام بيتكم... تسمع من هنا صباح الخير... وتسمع من هنا سلام عليكم... وتسمع من هناك كيف أصبحتوا... لغاية ما يناديك صوت من جوة... ويقول ليك الفطور جاهز...
أها فطرت... وشربت الشاى بالنعناع والقرفة والهبهان.. وقمت رشيت نبات الظل المجّّدع فى كل ركن.. ومرقت تلحق الناس المشت الزرع..
والله على الزرع... القش يبلعك... ويرشك بالندى يمين شمال... وفرآشة طايرة تجرى وراها فرحان.. لآنك فرحان وسعيد من قلبك.. وتسمع الناس بتزرع وهم بيغنوا غناجماعى.. وسواعد زى الفولاذ..
وبعد الضهر... يّوّقفوا الشغل... عشان الغدا... ويرجعوا تانى...
فى المسا وأتوا رآجعين... والهوا بارد... منعش.. والارض رطبة... والوجوه نضره... والناس بتضحك وتنّّكت... وريحة الآكل طالعة من كل بيت... وكلما جوا جنب بيت يسلموا على أهله من فوق الصريف ولا الحيطة.. يسّلموا تسليما وهم مآشين... لغاية ماتصل بيتكم..
أها أولا الكلام داكوووووووووووله أنتهى.. عشان الحرب.. وتانيا أحنا فى بلد درجة الحرارة الآربعين تحت الصفر.. يعنى كان طّلعت صباعك من الجوانتى يقيف زى الآلف.. وكل زول مآشى وبيعاين قداموا... ولا السلام عليكم... ولا عليكم السلام..
وتجى جارى جرى للبيت... عشان البرد.. وتفتح التلفزيون.. وتكلم السودان... وبعد داك تتخمد وأت مغموم...
أهاأت ولا أنا؟
| |
|
|
|
|
|
|
Re: تداعيات ... وحراق روح (Re: nour tawir)
|
والله يا نور تاور وأنا بقرا في كلامك ... في دمعه فرررر فرت من عيوني في شان حسيتو صادق وطالع من القلب .... وأهلنا قالوا تشوف مصيبة غيرك تهون عليك مصيبتك ... الله يلعن الحروب والبتسببوا فيها يا نور أختي لأنها بتقلب سلام أهلنا وأمنهم لي خراب وتشرد وموت ووجع والمناظر والمشاهد الانت قاعده تحكي عنها دي أنا عشتها في النيل الأزرق وفي جبل مره .... ناس والله بطيبتهم وتحنانهم ينسوك أهلك شوفي معاي المشهد دا:
كنتا شغال في الدمازين ... في شركة الشيخ مصطفى الامين ... أمين مستودع .... ومعاي زملاني من أولاد المنطقه ... والله أبدا ما حسيت في يوم إني غريب منهم ... علي العكس بعاملوني وكأني مولود معاهم ... وكل يومين أجي راجع قطيتي ألقاها مرتبه وحوشها مقشوش ... وكان الصريف ضراهو المطر أجي ألقاهو مصلح ... وفي الفرح سوا وفي الحزن سوا .... والبجيب ليهو منقا ... بجي أديني منها والبعتر ليهو في خلية نحل ... بديني منها عسل ... والعجب لامن نمشي نشرك للسمك فوق ضهر الخزان يسألني الله لو ربنا ما أراد اقبض لي سمكه يملوا لي قفتي سمك لااااااااامن أقول بس هههههههههههه .... يا سلام يا نور يا سلام.
اها ازيدك من الشعر بيت يا نور ... أطعم أكله آكلها في حياتي كانت في جبل مره ...وطعمها لي يوم الليله في خمشي ..... أرنب ونحنا ماشين بالعربيه جهرو نور العربيه وضربو الرفرف حق اللستك ... نزلت ضبحتو ... ولقينا قدامنا حله صغيره ... طبخوهو لينا وجابوهو وجابوا لينا معاهو عيش حااااااار ... أجمل لحظة أكل احس بيها في حياتي مع همبريب الحله وطيبة الناس ... وكرمهم الـــــ لا محدود.
شكرا لاضافتك القيمة للبوست ... كتر خيرك يا نور ... وربنا يرجع لينا بلدنا زي ما كانت قادر يا كريم.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
عثمان .. حاف كدا.. ما دام بقى فيها العيش والارنب..
كان سمحت لى أفضفض معآك.. عشان الشالوه مننا أولاد الابالسة ديل... حاااار خلاص.. وبوستك دا قلّب لى القديم والجديد.. ...
هاك دى..
كنت فى العاشرة من عمرى.. تلميذة فى مدرسة الدلنج المتوسطة بنات.. الدنيا درت.. ويا سلاااام على الدرت.. كرنفال أولان وفرح..
قبل العودة الى ىالمدرسة (الداخلية) بيوم.. كانت هناك حفلة كمبلا.. أجتمع فيها جميع سكان الحى... والاحياء المجاورة..
أتى الشباب بملابس مزركشة.. وأتت النسوة كبيرات السن بتوب الزراق... فهو لم يكن موضه بقدر ماهو فرض اقتصادى... رغم ثراء البلد..
ذبحت الثيران... زغردت النساء... وبدأن فى الغناء بتناغم يدخل القلب مباشرة... بلا أنتظار أو استئذان... بدأ الرجال يغنون من خلفهم.. بأصوات جهورة..
وأنت فى ذاك المكان.. يعود اليك الصوت من وراء الجبل... وهو اقوى وأوضح... وأكثر ملامسة للقلب... فيفعل فيك الآفاعيل... مع سكون الليل... والنسيم العليل..
ورويدا رويدا... بدأ الشباب يدخلون فى حلبة الرقص.. وهم يلبسون لبس الرقص... خيوط من اللحاء.. رقيقة ولكنها ليست شفافة..
ثم يدخل الى الحلبة... رجل متوسط العمر بيده سوط... يجلد ذاك الشاب فى ظهره... وكلما زادت السياط.. يهيج الشاب... ويفتخر... كما لو أنه الرجل الوحيد فى الحلبة...
وتزغرد النساء... ويعلوا سوط الطبل... ثم يختم نهاية المقطع... صوت رجالى جهور... يمثل صوت الثور...
تلك السياط... معناها... كلما تحّمل الشاب... كلما كان تحّمله دليل صبر وجلد وشجاعة..
يستمر العرض حتى الخيط الآول من الفجر... فيتفرق الجميع..
صبيحة اليوم التالى اصطحبتنى كبيرات السن فى العائلة... الى موقف اللوارى... وبعد أن صعدت... كانت تحيط اللورى... حبوبات وخالات وعمات وجيران.. وكل وآحدة فى يدها ّصّرة..
حبة سمسم... حبة فول.. صفيحة كعك صغيرة.. قزازة عسل.. قزازة سمن.. وخمسة قروش مصاريف الطريق... وكل وآحدة منهن تّوّصى..
خلى بالك من نفسك.. الصفيحة ما تنسيها.. (ياولد)مخاطبات الكمسارى... خلى بالك من بتنا... دى غالية عندنا زى الموية الشوية... ثم تأتينى أخرى... (منقة)وكان هذا اسم الدلع فى الطفولة.. هاك صّرو المنقة دى.. وأكلى فى الطريق... ما تخجلى..
وتأتيك أخرى... تجينا بالشهادة... وما تتشاكلى مع البنات.. كان شاكلوك... كلمى الست.. أها أتغّطى كويس.. ما تسهرى فى المزاكرة.. أقرى نهااار..
يتحرك اللورى... أها فى وداعة الله.. أها قلت ليكى.. يتحرك اللورى.. تخبو الاصوات وتبتعد.. ويبدأ طريق الدراسة... ...
بّكيتنا ياخ.. الله يسامحك...
| |
|
|
|
|
|
|
Re: تداعيات ... وحراق روح (Re: nour tawir)
|
يديك العافية يا عثمان قلت لي عايز تضبح من خرفان بكري :) وآميييييييييين ربنا يستجيب وييسّر لينا الرجعة, الغربة البلا نهاية دي قاتلة .. قاتلة, الله يدينا خيرها بس اليوم داك معاي واحد مصري جا من الصباح كابس و يشيل ويسب أم العريان على أم الإخوان على أم الثورة على ابو التحرير هههههههه مالك يا زول قال تصريحات العريان الشتم فيها الإمارات ح يطلعوها على جتّتنا, وهو لسة ما شطب الشقة, قال ابن الـ (تيت تيت) دا ما يصبرش الكام شهر الفاضلين ديل, قلت ليه كم شهر على ايه قال على خطته و مدته الخاتيها للإغتراب سرحت في كلامه و قلبي وجعني, هو طالع من بلده بي هدف وخطة محددة مساراتها تقود في النهاية لعودته لبلده, يا حليلنا احنا, البرجع بعد خرتمية سنة اغتراب كلها كم شهر وتلقاه بكوس لدرب الرجوع !! ايييييييه يا عثمان مالو حراق الروح فرض نفسه بدري بدري كدا يا دوب قعدنا, بكري القهوة لسة ما تنيناه نور تاور سلام عليكم, نحن شعب شقي قدرنا ان نعيش ولا نعيش, على عكس شعوب الدنيا دائما ما نرى ماضينا افضل من حاضرنا و بالتاكيد من مستقبلنا لكن املنا في رحمة الله كبير
| |
|
|
|
|
|
|
Re: تداعيات ... وحراق روح (Re: محمد البشرى الخضر)
|
كتب الحبيب ود البشرى : يديك العافية يا عثمان قلت لي عايز تضبح من خرفان بكري :) وآميييييييييين ربنا يستجيب وييسّر لينا الرجعة, الغربة البلا نهاية دي قاتلة .. قاتلة, الله يدينا خيرها بس اليوم داك معاي واحد مصري جا من الصباح كابس و يشيل ويسب أم العريان على أم الإخوان على أم الثورة على ابو التحرير هههههههه مالك يا زول قال تصريحات العريان الشتم فيها الإمارات ح يطلعوها على جتّتنا, وهو لسة ما شطب الشقة, قال ابن الـ (تيت تيت) دا ما يصبرش الكام شهر الفاضلين ديل, قلت ليه كم شهر على ايه قال على خطته و مدته الخاتيها للإغتراب سرحت في كلامه و قلبي وجعني, هو طالع من بلده بي هدف وخطة محددة مساراتها تقود في النهاية لعودته لبلده, يا حليلنا احنا, البرجع بعد خرتمية سنة اغتراب كلها كم شهر وتلقاه بكوس لدرب الرجوع !! ايييييييه يا عثمان مالو حراق الروح فرض نفسه بدري بدري كدا يا دوب قعدنا, بكري القهوة لسة ما تنيناه نور تاور سلام عليكم, نحن شعب شقي قدرنا ان نعيش ولا نعيش, على عكس شعوب الدنيا دائما ما نرى ماضينا افضل من حاضرنا و بالتاكيد من مستقبلنا لكن املنا في رحمة الله كبير.
ود البشرى رمضان كريم .... وصدقت والله وقتين قلت نحنا شعب شقي أو مكتوبه عليهو الشقاوة ... كل يوم بلدنا نتزيد أوجاعو ونحنا بنزيد في شتاتنا ... والغريبة انو مافي جنسية من الجنسيات بتقعد زينا في الغربه .... خططنا دايما على وزن القصيدة نبني فتهدمها الرياح فلا نضج ولا نثور هههههههههه ... يبقى الأمل في رحمة الله علينا .... لأنو كان طال الزمن ولا قصر بجي اليوم البنرجع فيهو كلنا عشان نبنيهو وطنا كما نحب.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
يا ودجادالله... الذي قد كان ولي،وتبعثر. حين ياكلك الحين،كما في عالم صاحبك ماركيز هذا،حين تحن لذلك الزمن الجميل، للحقول الضاجة حياة وبهاء،بعصافير الافراح بالوانها الزاهية،بالخريف يجئ فيمتد الافق امام كنار امتريبات بحدائق الورد والبهاء،للعيش تاكله فريكا وتشويه قنقرا،في الطماطم الحلوة من التجاربات غير المشبعة بالكيمياء السامة،ياودجادالله يالله من زمان الصمد وحماره المبهرج ذو السرج المطهم،او غفيره بشاله الصوفي الاخضر عنوان الزرع والصفاء مناديا في الناس ،ان قد جاء صرف الارباح،هل رايتها ياودجادالله،القروش السمحة الخدرا،التي تطهر وتبني وتعرس،ويبقي باقيها لزراعة العام القادم. ياودجادالله لا تكن ضحية سهلة لالاعيب وحيل الحنين،فلقد ويا للوجعة مرت خيول المغول،وهلك الزرع،وخرب العامر،ماتت الضحكة انفض السامر،وصودر الحلم،وعلي صهوة كنار ام تريبات تنتصب الان مئات الطلمبات الصينية،تبكي حظها الذي رماها في هذه الفجاج العطشي،وحتي الامس كانت ندية وريانة وخضراء. في اواخر الثمانينات،كنت في زيارة مع جدي لاحدي نواحييكم،في الطريق وانا اسوق بوكسا امرني جدي بالوقوف،والشمس مع الغروب،والدنيا برد،زمان كان في سقط،اوقفني جدي ونزل من العربة،ملص جلابيتو ،وشمر،ودخل خاض ابعشرين،وداخل حقل القمح كان هناك ابوسته مكسور،قام جدي الثمانيني،بسد العوج،لبق طين ليسو لياس،توضا وصلي في ذلك الفضاء مغربه وانا ارجف بردا،تدري ياودجادالله لم يكن جدي يعلم صاحب الارض،ولا اهل الحلة،لقد كان يدري شئا واحدا ان هذا عوج لا بد من ازالته والا ضاع هذا القمح. ومضي الزمن الجميل مع جدك وجدي ،ابي وابوك،وحلت اللعنة بايدي السياسيين الكذبة،ولم يعد الان،الا مدينة كلها لصوص،ومائة مزرعة من الحريق،وخريف من الياس،وجنرالا يقف امام فصيل اعدام،ونحن ياصاحبي صرنا من ذوي ملكاديس،غجر الزمان الجديد.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
يا سلام عليك يا عثمان أخوي
Quote: يكفي إنو النيل أبونا والجنس سوداني.. |
صدقت .. ما كتا قايلك حكاي وكتّاب كدة يا أبو مشكاة.
---- ----
طلب سغيروني وحاتك يا أبو مشكاة لامن تصل هناك ترفع هنا شي عن البلد ديك - دا لو كنت مقرر تمشي حتتي البحبها ديك..
ولو كانت برضو كوالا أكتب عنها تداعيات بس بدون حراق روح..
عطلة سعيدة وموفق ان شاء الله..
| |
|
|
|
|
|
|
Re: تداعيات ... وحراق روح (Re: مجاهد محمد الهادي)
|
عثمان جاد الله..
بينما كنت أنا منهمكا في استخراج الشوكة الكبيره (شوكة لقد) والتي انغرزت في قدم جدي (يرحمه الله) وفي الوقت التي كانت تهم فيه جدتي (يرحمها الله) بتقديم بركة جبنتها والتي شربنا (بكريتها وتنيها) أوقف حركتنا جميعا صوت عمي يوسف الله يرحمه والذي كان يعمل في وظيفة (صمد) ...قال بصوته الجهوري المعروف .... يا حاج بخيت المويه جات ... قمحك دا كان ما رويتو الليله بعطش وبموت ... لانو المويه دي ما ظنيتها تجي تاني قريب .... قال كلامه مخاطبا الجميع من الحوش الخارجي وغادر مسرعا ومشغولا كعادته ... تنحنح جدي بعد أن أخرجت له الشوكه الكبيره ... وقال ... أسي السايبه دي أرويها كيف مع كراعي دي ... قلت ليهو أنا لها يا جدي ... وليك علي أرويها لاااامن تقول بس ... أها طوااااااااالي في ضهريتي ديك ....... لبست الفنيله الكت والبنطلون الجينز ... وشلت معاي رواية غابريال غارسيا ماركيز ـــــ الحب في زمن الكوليرا والكنت قاعد أقرا فيها ... ويا سقاية القمح جاك زول هههههههه .... وكل شي مشى تمام وبى نظام .... ولاااامن المفتش جا ماري وقف لقاني قاعد فوق ضهر أب عشرين مويتي قافله وقمحي يزعرد ايوووووووووووووي ... قال لي المفتش الحواشه دي صاحبها وينو؟ قلت ليهو أنا يا جناب المفتش ..... ضحك وقال لي عفارم عليك يا ولدي ... وأحمد ربنا انو شفت اليوم الفيهو المزارعي بمسك مويتو وهو لابس بنطلون جينز ... وبتابع سقيان المويه في الحواشه وهو بقرا لــ غابريال غارسيا ماركيز .... ضحكنا معا في لحظتها حتى طربت (التقانت) هههههههه ..... هيييييييييييييييييييه أسي دا كلو ين؟ ...ز
تصدق بالله الطيب صىالح لو قام من قبره ما يقدر يعمل التصّور دا.. وبعدين توارد خواطر عجيب... فى حكاية الحب فى زمن الكوليرا... وقارسيا ماركيز.. الراجل دا خّلانى لافة فى الكتب المفروشة فى الارض افى الخرطوم أفتش على كل الكتابات بتاعته.. وفى النهاية.. آخر كتاب لقيته فى كادقلى.. وما تتصور فرحتى بالكتاب..
الله يّرّجعك بالسلامة... عشان توآصل الكلام الجميل دا.. كلام فى عصب اللحم الحى..
| |
|
|
|
|
|
|
Re: تداعيات ... وحراق روح (Re: nour tawir)
|
والله يااخت نور للحظة خيل لي ان احد ما سطا علي زكرياتي،وغني بحنيني للناس،ثم تذكرت بان صديق ما وجدته في لحظة شجن يبكي ماكان بالامس غراما وانطوي،وسقط علي مطر الحنين من كل افق. فجاة ضاع كل شئ،ماعادت الحشايش الندية ذاتها،يسقط المطر فتشرق الارض بالبهاء والنضار،عشب مختلف الالوان،ازهار حمراء وصفراء وبيضاء،نور ونوار،فراشات وعصافير،جنة مد الافق،نفوس مشرقة بالفرح، ضحكات عامرة بالحب والاشواق،سواعد تكدح بشرف ويقين،وكم تيربنا متتبعين حبوباتنا وهن يزرعن الارض بالسلوكة والامل،كم حشينا بالملايد،وقضينا علي القش المر بالكدنكات،وشلخنا وحصدنا،واكلنا الكسرة البايته بي قرن شطة وحبة ملح فوق ضهر الترعة او ابوعشرين حامدين شاكرين صادقين ،حتي اذ فتحت المدارس ابوابها ركبنا حميرنا وحملنا نفس الكورة ذات الكسرة البايتة. ومن ذلك الواقع خرج العلماء والناس الجيدين العاديين،وكان الجميع في رضا،ذلك انه علي قمة الهرم السياسي كان هناك شرفاء مثل الازهري،يعجزون عن شراء الباسطة لعيالهم،ياكلون مثل شعوبهم الويكة وام شعيفة،وكان هناك افندية محترمين يقدسون العمل ويعفون عن المال الحرام،وكان هناك تجار صدوقون يرضون بالربح الحلال ولا يغشون،لذا كانت الانفس رضية،واللقمة هنية،والارض عامرة بالخيرات، والبلد مليئة بالبركات،افق من السماح والصفاء. لو يعود الزمان للوراء،لقايضت كل عمري الان،بفسحة قليلة موشحة بجمال ذاك الزمان البهي،بقيلولة واحدة في بيت جدتي الطيني،يعبق بها البن،يحفها الود،عامرة بلذيذ الحكي وحلو الضحكات،بينما يهدل الحمام في صفائحة المعلقة بالراكوبة المنصوبة فوق البيت،بينما ينساب من بطن الحي صوت مزياع يهمس فيه ابوداوؤد بهمسات ،،،كان،كان لي بالامس،،فينتشي السامعين,
| |
|
|
|
|
|
|
Re: تداعيات ... وحراق روح (Re: عبدالعزيز عثمان)
|
عبدالعزيز عثمان...
كم حشينا بالملايد،وقضينا علي القش المر بالكدنكات،وشلخنا وحصدنا،واكلنا الكسرة البايته بي قرن شطة وحبة ملح فوق ضهر الترعة او ابوعشرين حامدين شاكرين صادقين ،حتي اذ فتحت المدارس ابوابها ركبنا حميرنا وحملنا نفس الكورة ذات الكسرة البايتة. ومن ذلك الواقع خرج العلماء والناس الجيدين العاديين،وكان الجميع في رضا،ذلك انه علي قمة الهرم السياسي كان هناك شرفاء مثل الازهري،يعجزون عن شراء الباسطة لعيالهم،ياكلون مثل شعوبهم الويكة وام شعيفة،وكان هناك افندية محترمين يقدسون العمل ويعفون عن المال الحرام،وكان هناك تجار صدوقون يرضون بالربح الحلال ولا يغشون،لذا كانت الانفس رضية،واللقمة هنية،والارض عامرة بالخيرات، والبلد مليئة بالبركات،افق من السماح والصفاء. لو يعود الزمان للوراء،لقايضت كل عمري الان،بفسحة قليلة موشحة بجمال ذاك الزمان .... وآه لو يعود الزمان...
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
عثمان جاد الله.. حمد الله على السلامة.. ورمضان كريم.. تصوم وتفطر على خير..
عدنا من الزرع فى تلك الآمسية.. وولجت تلك اللحظات الخيالية فى الماضى.. كما ولجت وقآئع ذاك اليوم.. الى العقل الباطن.. وحضن الذكريات..
فى العادة وفى أثناء السير من والى الزرع.. يتبع الّزّراع طريقا ضيقا وواحدا.. على طريقة ال single file ويسير رب الآسرة فى أول الصف وتتبعه الآسرة حسب التراتبية الآجتماعية..
كنت أقفز من أول الصف.. الى وسطه... الى نهايته... أتحدث مع هذا وذاك... فى سعادة غآمرة... وشعور قوى بأن الزمان والمكان هما تلك اللحظات السرمدية.. بدون أى أحساس بالتعب أو الآرهاق..
وفى المنزل... طلبت منى جدتى أن أحضر ملابسى النظيفة وأستعد للغسل... ومن ثم أعدت لنا العشاء.. دمعة دجاج.. ذرة شامى مسلوقة.. بليلة بالسمسم... وكوب حليب مخلوط بملعقة عسل وملعقة أخرى من السمن..
بعد العشاء جاءت الصبايا من الجيران... يدعوننى الى الخروج للرقص معهن على ضوء القمر.. لم يبد على جدتى أنها موآفقه... ولكن فى نفس الوقت وآفقت وهى تمطرنى بسلسلة من الوصايا..
ما تشاكلى زول... وكان شاكلوك ترجعى طوالى.. وما تتأخروا يا بنات...الخ
خرجنا الى الساحة... لنجد أن هناك من سبققنا اليها... وجوه صغيرة بريئة... تضحك باستمرار و بكل البراءة الممكنة.. ينعكس ضوء القمر على وجوههن.. فيزيدها لمعانا... ويبدأ الرقص.. فتيات وصبيان.. حتى وقت معين.. ثم نعود..
وقبل أن أنام.. تأتى جدتى لتحكى لى قصة فاطمة السمحة بت الحّطاب... والشاهد أن ما أن يصل والد فاطمة السمحة الى الغابة.. حتى أغط فى نوم عميق.. صبيحة اليوم التآلى... وأول ما أبدأ به هو السؤال... عن ماذا حدث لوالد فاطمة السمحة.. فتجيب جدتى بحماس شديد.. هسى دى مواعيد المدرسة... بعدين نكمل القصة.. ولم أكمل القصة... حتى توفيت جدتى عليها رحمة الله...
| |
|
|
|
|
|
|
Re: تداعيات ... وحراق روح (Re: nour tawir)
|
Quote: لو يعود الزمان للوراء،لقايضت كل عمري الان،بفسحة قليلة موشحة بجمال ذاك الزمان البهي،بقيلولة واحدة في بيت جدتي الطيني،يعبق بها البن،يحفها الود،عامرة بلذيذ الحكي وحلو الضحكات،بينما يهدل الحمام في صفائحة المعلقة بالراكوبة المنصوبة فوق البيت،بينما ينساب من بطن الحي صوت مزياع يهمس فيه ابوداوؤد بهمسات ،،،كان،كان لي بالامس،،فينتشي السامعين, |
عثمان جاد الله نور تاور عبد العزيز عثمان محمد البشري وجميع المتداخلين والمتاوقين وناس المسيال السمحين سلااااااااااااااااااام ومعزة
يا ناس مالكم علينا كتلتونا بالشرف وياريت كان الشرف بجيب
ناس أبَّان شماخ والقطرة والبَنْقَالي ليمهن ضُل ضحي لا بشيقيني لا بِحَلالي بتين الرجعة لي العرب الهِناك حاسْبَالي ناس الفنجري ودعيسي وأزرق خَالِي مطروح الجبين الفي بشاشتو هِلالي أدقس مايقو شارف عنقو دقٌّو غزالي حَسَبْ في إيدينو رمَّاهو الوَدِع خطَّالي بسوِّي القوق حنين ؤريدة فال دوبَالي لي طلتنا شارف ومن بعيد نادالي وقال جيد ليّ بي خيري ؤشَهق شاشالي ؤفرَّ إيدينو قالدني السَّلام واحلالي
يا سلام علي لمّة القرايب والأنس مع الناس البساط والإنبساط وقمر السبوع داير والدعاش يتسارق والضحك المعافي اي والله حتي الضحك صادق ومن جووووووووووووووه...........
محبتي ودمتم سمحين
| |
|
|
|
|
|
|
Re: تداعيات ... وحراق روح (Re: عبيد الطيب)
|
زمنن يالعبيد لا فيهو غش لا تعالي مستور بالحنان والفردة والبغالي في ضل الضحي جلس الفقير والعالي راجينو الكريم يرجع يعود في الحال حليين فنجريك وازرق حليل خالي معطون في السماح للضيف اجر الغالي راجينك تعود للهملة والعطالي وراجينك تعود بالخير تعدل الحال وراجيين الزمان يرجع بها الامال وياسيدي العبيد يرجع زمن ناس خالي
| |
|
|
|
|
|
|
Re: تداعيات ... وحراق روح (Re: nour tawir)
|
عبدالعزيز عثمان...
زمنن يالعبيد لا فيهو غش لا تعالي مستور بالحنان والفردة والبغالي في ضل الضحي جلس الفقير والعالي راجينو الكريم يرجع يعود في الحال حليين فنجريك وازرق حليل خالي معطون في السماح للضيف اجر الغالي راجينك تعود للهملة والعطالي وراجينك تعود بالخير تعدل الحال وراجيين الزمان يرجع بها الامال وياسيدي العبيد يرجع زمن ناس خالي ....
ويا له من زمن!!!!
| |
|
|
|
|
|
|
Re: تداعيات ... وحراق روح (Re: Abdel Aati)
|
عادل عبدالعاطى...
بوست جميل ....
هلا بالعزيز الغآلى.. نرّحب بك.. عضوا فى أسرتناالسعيدة هذه.. نحن هنا نتخّلص من كافة أشكال الحزن.. و(التداعيات وحراق الروح).. بأن نجتر مآضينا السعيد.. ونضحك ونسعد ونذهب... لنعود..
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
عبد العزيز عثمان .. تصوم وتفطر علي الخير يارب .... ونضمك والله سمح تب وحنين زي نضمي أهلنا الحنان الفاتو ... وزمنهم السمح ... بالله شوف تصرف جدك دا الله يرحمهم جميعا كيف في وقوفو في وش العوج .... نزل من عربيتو وصلح كسر المويه واتوضا منها وصلى وقتو وفات سبحان الله .... لأنو الزرع نعمه .... من نعم الله علينا ما بنرضى فوقها الخراب .... والله ذكرتني زمنا سمح بالحيل وقت الفردي يا سلام .... الناس اليوم داك بتكون مبسوطه وبتذكر لامن امشي مع جدي للصرف في المكتب ... بجي راجع جيبي ملان نبق ولالوب وتسالي وبلح وجنيهات .. ههههههههه وكل واحد من المزارعين ديل يشوفني يضحك ويسلم علي في راسي ويقول لي يا ولدي ... نحنا دايرنك تكون في مكان الصراف دا عشان تزيد لينا القروش هههههههه ... في شان كدي أقرا كويس آآآآآ ولدي .... عشان تعينا نحنا فترنا خلاس ... وكان كل واحد من المزارعين ديل بحاول بكل جهدو يرضي ناس بيتهم كلهم لأنهم صبروا سنة كاملة منتظرين الفردي ....... وجدي الله يرحمو لامن يكون ما دايرني أمشي معاهو للصرف عشان خايف علي من إنو اغرق في الترعه ولا أجوع وأعطش من الحر والانتظار الطويل .... يجي بالليل يتبدى براحه براحه افتش في كراعي عشان ياخد مقاسها بالخيط .... هيييييييييييه زمن يا عبد العزيز أخوي.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
نور .. الله يخدر ضراعك .. ما شاء الله رويتي البوست دا ومسكت مويتو تمام ههههههههه في شان ما يموت الخدار الفيهو .... ربنا يجعل أيامك كلها خضار ونضار ونوار ببركة هذا الشهر الفضيل ... ويعلم الله بقيتي زي جد ود عثمان الردم كسر المويع البتسقي في القمح وتصومي وتفطري علي خير ونواصل في التداعيات وحراق الروح .... تسلمي يا أصيلة.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
كانت جدتي تحب الحمام. كان عشقا يخرق المعتاد،ليس له من مثيل،وكان الحمام يبادلها عشقا بعشق، يملا ساعات وحدتها،هديلا،متسلقا كل اجزاء جسدها الطاهر، ومحتلا كل ارجاء بيتها الطيني الواسع،وراكوبتها العامرة بالحياة. ولم تكن جدتي تتذوق لحم الحمام،او تتخذه تجارة،بل انها في الاصل تحرم اكل اللحم مطلقا،وكانت تنفق علي حمامها ذرة وسكر،من عرق جبينها في الزرع،وكان الحمام يظللها كالغيم في كل رحلات النهار والهجير،فاتني ان اقول ان الحمام كان متاحا للحوامل والمرضعات والمرضي ،بغير حساب . لكن الحياة لا تسير كما يشتهي الناس،في غمرة احزان ليلة موت في القرية،نسيت جدتي مااعتادته من وسائل التامين،وكان هناك قط شيطاني متربصا بالسرب،قط حقود شرس،لا يشبه ابدا ما عرفنا من قطط،ففتك بالسرب فتكا،واحدث مجزرة مروعة،في الصباح طار باقي السرب،وبدات ايام الحزن والنحيب في الدار. ومنذ اللحظة الاولي كان بينا ما اجتاح جدتي من اسي،ويوما بعد يوم وسربها في هجرته الجارحة، هجم الحزن الجارف علي القلب الحزين،وهنت،ملا الشيب راسها،غارت عيناها اللتان كانتا تفيضان محبة ونضار،افتقد الفريق ريحة بنها،وافتقدت الاماسي لمة الناس لجميل حكيها،وادرك الفريق كرب عظيم. كانت الاخبار قد اكدت ان الحمام قد عبر النهر لاجئا باحد القري،الا ان الموسم كان دميرة،ولا يمكن للناس عبور النهر،ولا بالمراكب. قلت لجدتي يوما ،هل صحيح ان الانسان يمكنه ان يسير فوق الماء،قالت ملتاعة الصالحين يسيرون،ولكن النهر مغرم بابتلاع الصبيان. حين كانت ساحة القرية ،تكركر طاراتها،وتهدر نوباتها،وترتفع فيها الاذكار والمدايح صباح العيد،كنت انا لا الوي علي شئ قاصدا النهر،ذلك انني منذ الصباح رايت جدتي،وتاكدت ان كبدها سينفطر ان لم تعيد والحمام. خلعت نعلي،وهممت بوضع رحلي فوق سطح الماء،موقنا يقينا لا شك فيه، انني قادر علي السير فوق صفحة الماء،وانني لا بد عايد والحمام،في ذات اللحظة،سمعت هديرا يصم الاذن،ويملا الفضاء،رفعت راسي،كان هو هو،اسراب الحمام،تداور فوقي،حتي اذا ما رايتها،يممت صوب القرية. غير اني في ذات اللحظة،رايت القرية ،بطاراتها ،تتقدمها جدتي،ذلك بانها علمت باني قصدت النهر، فهرولت حافية،وحضنتني بالدموع. رفرف الحمام فوقنا، دق خالي بخيت طاره كما لم يدقه من قبل،نفخ عمي الباهي علي قرنه نغما ابكي الحاضرين،وانشد جدي صالح السراي،وهتفت جدتي،الم اقل لكم انه هو من يعيد لي اسراب الحمام،نظرت الي جدت،تيقنت بانها قد استعادت النضار.
| |
|
|
|
|
|
|
Re: تداعيات ... وحراق روح (Re: عبدالعزيز عثمان)
|
عبد العزيز عثمان ... والله لقد أسعدتني ... وأشجيتني .... حتى البكاء ... شكرا لنقل هذه الصورة الجميلة والمعبره والمليئة بالحنين والحبوبة والحنان .... وريحة البن والنهر .... شكرا لأنك صورت وأبدعت حتى خلت انني بينكم انتظر الحمام وأبشر مع طبول عودته ..ياااااسلااام يا عبد العزيز والله لقد صنعت يومي كله ... لك التحية .. عذرا للناس الفوق .. جاييكم كلكم بالدور ... ان شاء الله لانكم كما عبد العزيز أضفتم جمال روحكم وذكرياتكم الجميلة لهذا البوست.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
الحبيب مجاهد .. تحياتي وتصوم وتفطر علي الخير ياااااارب ... وشكرا علي التشجيع والاشاده .... والرحلة كانت ممتعه وجميلة وكلها خدار ... واشجار ... ونضار ومحيط هندي ههههههههه ماليزيا بلد جميل تتناسب تماما الصور منو مع هذا البوست وسأحاول رفعها كان ربنا يسر.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
نور بت تاور .. اسكتي ساااي أنا كان عندي شغف عجيب بقراية الكتب ... لدرجة انو لو عندي كتاب ما تميت قرايتو ما باكل ابدا .... وكنتا عشان ازوغ من ناس البيت وقت الوجبات بطلع بكتابي فوق شجرة النيم الكبيره هههههههه وما بجيبني منها متلب الا ريحة الجبنه .
وهاك دي بمناسبة الزراعه في الحواشات.
طبعا يا نور الزراعه عندنا المواسم المهمة فيها ... حش العيش (الذرة) أو زراعة القطن وسمادو ... أو زراعة البصل لأهل الجناين وغيرها مثل القمح والطماطم وهكذا.
اها كنا بنحاول نكمل شغلنا في حواشتنا سريع سريع عشان الدافوري ... وعشان ..نطلع حق فتة الفول بالليل أو حق الكتب والكراسات وملابس المدرسة .... وكان الصبيان في مواسم الااعه دي بيتقسموا لي مجموعات ... وكل مجموعه بتحاول تعمل اعلام لي همة المجموعة ونشاطها وسرعتها وأمانتها اهم شي .... والامانه تعني انو يختو البذره في حفرتها وما يشتتوا التيراب ساي في الحواشه يقوم المزارعي بعد السقايه يلقى زراعتو بايظه فـــ كانت امانة البيزرعو ضرورية لانو اكتشاف عدم الامانه بيتم دايما بعد فوات الاوان.
اها اليوم داك ونحنا مارقين غلي الضهرية .... تتلملم ليك سحابه سريعه وتنزل مطره لاهي التقيله ولا هي الحفيفه ... لكنها بوظت الاتنين الشغل في الخلا والدافوري ... قمنا مرقنا علي سور الحله قلنا نساعد العربات البوحلن في الطمله .. شويتين شويتين كده واحد من الصبيان اقترح نلعب حرب حرب .... ودي لعبه مربوطة بالطين طبعا .. بقوموا الصبيان يتقسموا لي فريقين ... وكل فريق بقسم ناسو ... ناس للأمداد وديل مسؤلين من دردمه قنابل الطين ههههههههه وناس التنشين وديل مسئولين من النيران علي العدو .. وناس الحماية وتلقي ضربات العدو المضاده اها في اثناء ما مستمتعين باللعب ... نط واحد ود حنوت من الجنيات وقال لينا انتو جيعانين زي كده يا اخوانا؟ قلنا ليهو بالحيل .. وفعلا الجري حق اللعبه والمطره والجو الجميل جوعتنا تب,
لي عودة
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
Quote: ا مرقنا علي سور الحله قلنا نساعد العربات البوحلن في الطمله .. |
بي يوم الخميس من جبرة قام بي مارق نمت سواقو قنب في الأبنص يسارق الدرب كلو مليان طين وماين غارق وتوي لقيتلك الشارع الوحيدو مفارق
| |
|
|
|
|
|
|
Re: تداعيات ... وحراق روح (Re: عبيد الطيب)
|
قال لينا ما دام جيعانين رايكم شنو نمشي ناكل جوافه ومنقه من جناين الري القريبه .... قلنا ليهو لكن الحباس (الحارس) ما بخلينا ... قال لينا قبيل الصباح انا شفتو ركب عربيه مشى مدني ومع المطره دي ما ظنيتو يجي راجع هسي ... وبسرعة توجهنا نحو الجناين في خفة ونشاط .. اول ما وصلنا الجناين عملنا استكشاف عن الحراسة لقينا الامور تمام وهادية ... وتسللنا واحدا تلو الآخر لداخل الجنينه ..... واول ما قلنا يا هادي وبدينا ناكل في الجوافه .... نشوف ليك الحارس الليل الجنينة شايل ليهو بسطونه كدي من طولها انا غايتو ما عرفت نهايتها وين ههههههههه وقلنا كدي و جرينا جري شديد .... خوفا من البسطونه ومن انو يقبضنا الحباس ويجيبونا بكره في طابور الصباح .... البتذكرو كويس اليوم داك انا قطعت ترعتين ههههههه مع اني ما بعرف اعوم .... ولسه والله ما ناسي ريحة الجنينه بعد المطره ... ريحة الارض والدعاش والمنقه والجوافة والليمون يا سلااااااااااااااام .... حتى رائحة خوفنا اليوم داك كانت مميزه .
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
Quote: كانت جدتي تحب الحمام. كان عشقا يخرق المعتاد،ليس له من مثيل،وكان الحمام يبادلها عشقا بعشق، يملا ساعات وحدتها،هديلا،متسلقا كل اجزاء جسدها الطاهر، ومحتلا كل ارجاء بيتها الطيني الواسع،وراكوبتها العامرة بالحياة. ولم تكن جدتي تتذوق لحم الحمام،او تتخذه تجارة،بل انها في الاصل تحرم اكل اللحم مطلقا،وكانت تنفق علي حمامها ذرة وسكر،من عرق جبينها في الزرع،وكان الحمام يظللها كالغيم في كل رحلات النهار والهجير،فاتني ان اقول ان الحمام كان متاحا للحوامل والمرضعات والمرضي ،بغير حساب . لكن الحياة لا تسير كما يشتهي الناس،في غمرة احزان ليلة موت في القرية،نسيت جدتي مااعتادته من وسائل التامين،وكان هناك قط شيطاني متربصا بالسرب،قط حقود شرس،لا يشبه ابدا ما عرفنا من قطط،ففتك بالسرب فتكا،واحدث مجزرة مروعة،في الصباح طار باقي السرب،وبدات ايام الحزن والنحيب في الدار. ومنذ اللحظة الاولي كان بينا ما اجتاح جدتي من اسي،ويوما بعد يوم وسربها في هجرته الجارحة، هجم الحزن الجارف علي القلب الحزين،وهنت،ملا الشيب راسها،غارت عيناها اللتان كانتا تفيضان محبة ونضار،افتقد الفريق ريحة بنها،وافتقدت الاماسي لمة الناس لجميل حكيها،وادرك الفريق كرب عظيم. كانت الاخبار قد اكدت ان الحمام قد عبر النهر لاجئا باحد القري،الا ان الموسم كان دميرة،ولا يمكن للناس عبور النهر،ولا بالمراكب. قلت لجدتي يوما ،هل صحيح ان الانسان يمكنه ان يسير فوق الماء،قالت ملتاعة الصالحين يسيرون،ولكن النهر مغرم بابتلاع الصبيان. حين كانت ساحة القرية ،تكركر طاراتها،وتهدر نوباتها،وترتفع فيها الاذكار والمدايح صباح العيد،كنت انا لا الوي علي شئ قاصدا النهر،ذلك انني منذ الصباح رايت جدتي،وتاكدت ان كبدها سينفطر ان لم تعيد والحمام. خلعت نعلي،وهممت بوضع رحلي فوق سطح الماء،موقنا يقينا لا شك فيه، انني قادر علي السير فوق صفحة الماء،وانني لا بد عايد والحمام،في ذات اللحظة،سمعت هديرا يصم الاذن،ويملا الفضاء،رفعت راسي،كان هو هو،اسراب الحمام،تداور فوقي،حتي اذا ما رايتها،يممت صوب القرية. غير اني في ذات اللحظة،رايت القرية ،بطاراتها ،تتقدمها جدتي،ذلك بانها علمت باني قصدت النهر، فهرولت حافية،وحضنتني بالدموع. رفرف الحمام فوقنا، دق خالي بخيت طاره كما لم يدقه من قبل،نفخ عمي الباهي علي قرنه نغما ابكي الحاضرين،وانشد جدي صالح السراي،وهتفت جدتي،الم اقل لكم انه هو من يعيد لي اسراب الحمام،نظرت الي جدت،تيقنت بانها قد استعادت النضار. |
جميل ...... كتابة تخلي رمضان 17 يوم بس عثمان بخيت وضيوفه و بنت البلد نور تاور رمضان كريم عليكم
| |
|
|
|
|
|
|
Re: تداعيات ... وحراق روح (Re: nour tawir)
|
ساحكي هذه الليلة عن عمي محمد،صديق والدي،ورفيقه في رحلات الصيف والشتاء، ذلك بانه اخبر الناس،بعد ابي ،بالزرع، اقر بعضمة لسانه، لم ياتي الغيط باكثر منهما دربة،اما ابي عليه الرحمة،فكان يعرف سر اسرار النبات،يتعامل معه بحنو ومحبة،قال لي جدي احمد ودنعيم عليهم جميعا رحمة الرحمن،يازول ابوك يتونس مع النبات عديل كده،النبات يجيهو بي خاطرو،ريدا فيه. ولكن عمي محمد قصة كفاح بهية، اعرفه منذ ان كنت صبيا،اركب دحشتنا الحمامية، وابي يمتطي حماره الروثمان الصح،مطهم وملجم،ماشيين الضهرية،لنجده في طرف الحلة في انتظارنا ،يخلف معي مشاركا الدحيشة،ملتفتا لابي،يازول رمينا الليلة تسع طائرات، يضحك ابي قائلا،خلو الكضب،والله تسعة طيرات ماترموهن،كان عمي محمد معجبا بجمال عبدالناصر،وكانت الايام حرب يونيو،ولقد بدات الزراعة باكرا،حينها كان كل شئ يسير كساعة سويسريه،والمشروع في ايام مجده العظيم، حين يعجز عمي محمد في اقناع ابي بنصرهم علي اسرائيل،يلتفت الي قائلا،ابوك من اذناب الاستعمار،ويضحكان،وينشد لي عمي محمد جرس الخطر دق ياعرب. ومع اتقان عمي محمد للاشياء،الا انه كان كثير النسيان،وكان نسيان محبب،ولطيف،لم يتردد حين سالته عنه ان حكي لي طائفة من لطائفه،اضافة لما عاصرته انا من احداث وطرايف. الارجح ان ينادي عم محمد علي ابي مع المغارب سائله اين وضع سرج حمار،ليرد ابي،محمد اهديك الله،ات ماجيت خالف مع الوليد. في ليلة ظلماء ذات مرة،جاءت زوجته لتخبر ابي،صاحبك رمي قروشه حقت صرف الارباح في الطريق، ولقد كان مبلغا ضخما،ابي قال لها بيقين،شوفي شغلتك،محمد شنو البرمي،محمد بدس وبنسي محل دسه،خرج الفريق يحمل رتاينه،نحو القيط،مشطوه سرابة سرابة،عادو فجرا خايبين،نزل جدي الفكي القران سبعة مرة،ولم يترك مزارا اوربالا،او وداعية الا زارها،لا شئ،وابي يصر،يامحمد استهدي بالله شغل مخك،القروش لميتن ونسيتن،قال لي مضي العام حتي قرب الخريف، كنت ابحث عن صفيحة ،اصنع منها صبابة،وتنزلت علي الزكري كفلق الصباح،عوووك القروش القروش،اجتمعوا حوله،افتحو المخزن،تحت السفير في صفيحة،فيها شوال ملح،فيه جزلان،فيه القروش،وقد كان،جديدة كانها جاءت من الخزنة لحظتها. ولعل قصته مع بنته التي ذهب بها المستشفي مريضة،وعاد ناسيا للصغيرة قد طبقت الافاق،او قصته حاملا،زمان السينما المتجولة صبيا ظانا انه ولده،واضعه فوق راسه،يشرح له الفيلم،وطوال الفيلم يتعجب كيف اصبح فجاة تقيل الوزن. من تلك الارض الطيبة عاش حياة الشرف والكرامة،عشقها وعشقته،امينة لا تعرف المكر،طيبةلا تعرف الخبث،اوع فيها كل عمره السمح،ربي منها البنات،زوجهن،بني اوضتين،حج وزار النبي،واكرم منها الاف الضيوف،وهو في خريفه الحزين وجدته اسيا،يشكو قحط الارض الخصبة وبوارها ، قال لي،ياولدي الحواشة دي كنت بجيب 50 اردب عيش،100 جوال قمح،بلقط تمانين قنطار،اللوبة ،الصلصة،العجور الاسود البامبي،اح،واسع،اسع،ولاقبضة،من وين موية في الترعة مافي. ختم دامعا،الله يرحم ابوك،والله لقد تنبا بكل هذا،وهذه قصة اخري لعلي اعود لها،مالم يستعجلنا قطار الرحيل.
| |
|
|
|
|
|
|
Re: تداعيات ... وحراق روح (Re: عبدالعزيز عثمان)
|
يا ود جاد الله،اوعي يكون رمضان دخل فيك من اسع،وينكم ياجماعة رمضان ده عباده وحكاوي الزمان البهية ،يابت الملوك هل معقول ان تنضب سريعا حلو الحكايا في تلك الفجاج الزاهية،واناسها البسطاء سليمي الحس والوجدان،الطيبين الاذكياء.انه الواجب المقدس ان نكتب عنهم،صناع الحياة،طيور المحبة وحمائم السلام،اكتبوا عن افراحهم،ودربتهم بالحياة في بساطتها،نحن لا تعنينا السياسة والسياسين ،نحن من من عناهم الفيتوري،بدنيا يملكها من يملكها سادتها الفقراء،اين انت ياعبيد الطيب،همتكم،دايرين نقرا عن السمحين والزمن السمح.
| |
|
|
|
|
|
|
Re: تداعيات ... وحراق روح (Re: عبدالعزيز عثمان)
|
هييييييييييييييييييع عقب آآآآآ عبيد ود الطيب .... والله مسدارك دا بدورلو جبنه بالشيه والربيت ههههههههه حصل جربتها آآآآ المبروك تشرب بكريك في الأول وفي الفواصل بين البكري و التني والبركه ... تقزقز بالشيه والربيت يا سلااام .. منور البوست يا حبيب واقول ليك زي ما قال الشاعر :
في حضرة جلوسكم وقهوة المسدار يحلو الحديث وتتســــــــــامر الأقمار الدار فـي وجودكم شــعشــعت أنوار تســلموا يالكــرام يا نبتــــــة الأبرار
كتر خيرك يا أصيل
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
هههههههههههه ود عثمان تسلم والله ورمضان مع درجة الحرارة الفوق الخمسه والاربعين دي خلانا بعد الفطور نشوف طشاش طشاش لكن طوالي بتداهمنا ذكريات جلساتنا بين الطيبين هناك .... بعد ما تقرب تمغرب ... الجيران والاهل يناغمونا يا جنيات الفطور قرب امشوا افرشوا الفرشات .... وبعد ما تفرشوهن امشوا علي شارع العربات ... العربية البتجي اقفلوا ليها الشارع وقفوها لينا ... والطلاقات خلوها لينا ههههههههه .... وتجيك الصواني مارقات من البيوت حنينه ودافيه زي طيبة امهاتنا السونها بكل اخلاص وعلي قدر الحال وبدون تكلف ... وأعمامك اثناء الفطور كان بدور يضوقك شيتا عاجبو يقول ليك أدن جاي آآآآآ ولدي ..... افتح الجك الكبير دا .... وكب منو الآبري الابيض الماخمج هيييييييييييييييييييييييييييييييه .... يا ود عثمان أخوي ... بسطاء وفقراء ولكن طيبة قلوبهم تدخل الغبطة والسرور في قلبك ... وبترجع شايل صينية بيتكم رويان .... وشبعان .... سماحة ومحنة
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
جدي طه ،الله يرحمو،زول ضكر واجواد، ماعونو بره،خصوصن في رمضان، اصلو ما برضه الحقار،ولن يقبل كائنا من كان يتفرعن علي مسكين،وله امراة،سبحان الله،كان قلييل. ولكنه رغم صينية فطورو البره،كان يقاشر رمضان مقاشرة،تعلمها كل الحلال. في رمضان ما،اغراه جدي عبدالله بمبلغ كبير،وكان جدي عبدالله من الميسورين،واذا وعد اوفي، وهو بن اخت جدي طه،انلم الفريق كله في غرفة امي حجاز،اخته،وحبوباتي بنات اخته،وجمع من الاهل عظيم،كل يود ان يكمل طه يومه،فلقد كان محبوبا من الجميع. الساعة الان التاسعة،الان التاسعة والنصف،الان العاشرة،الان منتصف النهار،وجدي يوح ،يعاين الي الشمس التي ابت ابدا ان تصنع شبرا من الظلال،واخواته وبنات اخواته،قربت ابوي طه قربت. هوي ياناس،شوفو شغلتكم،دي الليلة محرشه،صام عدوها،يمين ماتغيب،وتولي الي الزير ،رادا مال جدي عبدالله مبتسما. في اخريات ايامه،توج جدي طه شجاعته وكرمه بصيام وقيام وقنوت،ومضي محبوبا من اهله،وان شاء الله مقبولا من رب العالمين.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
بدا الامراولا ان خفت نباح الكلاب في العشيات،لم نعد نراها تطارد بعضها ابان النهار،او تصارع العظام وبقايا الذبيح في جزارة القرية،حتي جزع الشجرة المغروس وسط الجزارة والذي يستعمله ود عبدالقادر وجماعته لتكسير اللحم،لم يعد كما كان يبدو في الصباحات،لامعا ونظيفا،الان صار مثقلا من تراكم اللحم والشحوم، لم تعد الكلاب تاتي للحسه بالسنتها،وغسله بمائها. ثم صار الناس يشتكون من ضياع حميرهم،صار امرا مالوفا ان تجد غرباء يفتشون وسط البيوت،وفي الزرائب ،والغرف المتساقطة،لتكتشف انهم قد ضيعوا حمارا،كان اكثر الباحثين من اهل الكمبو الذين ورثوا بالطبع كل حيوانات القرية،بعد ان قرر سكان قريتنا انها لم تعد تواكب تطورهم المهول. جاءت لجان امنية من المركز ،اخذو الاقوال والافادات وساقتهم نباهتهم ان الامر لابد ان يكون مرتبط بمهدد امني،لذلك قاموا بتثبيت فريق كفؤ درا للمخاطر. خلت المنطقة تماما من ايما ######،وشارفت الحمير علي الانقراض،ولم يعد اصحابها يهملون فيها ابدا،صارت مربوطة لعناقريب نومهم،ولم تكتشف لجنة الامن الموقرة سر الاختفاء. في ظهيرة خانقة احدي ايام مايو الحارقة،جاءني اصدقائي من الفريق الطبي الاجنبي الذي يعمل بالمستشفي المجاور،لقد كان فريقا كبيرا، التقيهم بمزرعتي التي تجاور سكنهم،لذا كثيرا ما ياتون لمنزلي لاساعدهم في شئ،طلبوا مني ان اتحرك معهم بعربتي البوكس،كان مقصدهم بيت احد الاشخاص في الكمبو المجاور،ادركت انهم قد اشترو منه جحشا سمينا بائن النضار. اوصلنا الجحش لسكنهم،وخرجوا من غرفهم يجسونه بفرح عظيم،وبدوا،واغلبهم من الجراحين المهرة،تقطيع الاوصال،ضلعا،كستليتة،ورقائق ومحاشي وشيات،مايدة فخمة من حمار وعدة كلاب،لا غرو،في ذلك اليوم كانت وفودا من سفارتهم في زيارتهم. خرجت هاربا قبل موعد وجبتهم،فانا اصلا لا اكل طيبات اللحوم،خرجت وبي حيرة عظيمة،ااكشف سر اختفاء حيواناتنا،ام اصمت،تماما مثل رجال الامن المرابطين،الذين يعلمون اين ذهبت الكلاب واين سكنت الحمير.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
ليالي رمضان في قريتنا الوادعه كانت جميلة ... وحبلى بالسمر والحكايات .... كل يوم حكايات من أكتر من راوي وتدور عادة عن موضوع واحد وهو الموضوع البكون افتتج بيهو باب الحكاوي أول زول بدا يقص للناس قصة .. اليوم داك كان الكلام عن الدوابي أو الثعابين أنواعها واشكالها ... وسمومها .... النوع البي جرس براهو ... والنوع البعمي براهو ههههههههههه ... وانا قاعد استمع للحكاوي اليوم داك وانا رافع كرعي الاتنين في العنقريب ... وفي اثناء القصص دي شالتني غفوه كدا .. نمت شويه وصحيت علي صوت أبوي الله يرحم بقول لي : يا ولد أمشي الفرن جيب لينا رغيف للعشا ... الليله رشة مطرة قبيل دي بلت الويقود كلو وأمك ما بتقدر تعوس الكسره .... قمتا من عنقريبي داك أجرجر في نفسي جرجير .... والفرن كان في أول الحله ... اول ما طلعتا من الفريق وضربني ليك الهوا ... بقيت أدوبي ساااااااااااي لحدي ما وصلت الفرن ... وكانت متعتي الحقيقيه في مرسال الرغيف ريحة الرغيف وهو جوه الفرن وقريض العيش حاااااار هههههههههههه ... شلت رغيفي وجيبت مارق ألوووووك ساااااااااااي وانا بغني بعد شويه كدا حسيت بي حاجه ماسه في كراعي وليها صوت شششششششش طوااااالي اتذكرت حكاوي الدوابي ... ومن محلي ديك جريت وأنا بكورك الداااااااااااااااااااااابي ... الداااااااااااابي .... ماسك كراعي الدااااااااااابي .... شتت العيش .... ودخلت البيت ونطيت في أقرب عنقريب .. ولااااااااامن الناس جوا يشوفوا الدابي الماسك في كراعي لقوهو كيس اسود شابك في كراعي هههههههههههههههه غايتو اليوم داك أخدتا لي دقه كاااااااااااربه ونمت بدون عشا والغريب في الموضوع انو كنتا قاعد ادوبي قبل هجوم الدابي في مسدار (نحنا اولاد بلد نقعد نقوم علي كيفنا) هههههههههههههههه
| |
|
|
|
|
|
|
Re: تداعيات ... وحراق روح (Re: عبيد الطيب)
|
عبيد ود الطيب... شكرا لهذا الألق ... شكرا لنقل هذه الصورة الجميلة والمعبرة ... والله وكأني كنت معاكم مستمتعا بالجمال والصيد والرفقه الحنينه ... يا سلام علي البادية وحياتها ... النضره والهنيه ... يااااااااااااخ معقول دا جمال فوق الوصف والنضم والخيال ... تسلم يا ود الطيب ياااااااخ وياريت تزيدنا من الصور دي ... والله الواحد أمنيتو في الحياة دي يعيش زي العيشه دي من ضل شجره لي راس جبل ... ياكل من خيرات الباديه صيد ... وعربيتو جملو العشاري وما شايلو هم في الدنيا دي ... من مسدار لي مغامره لي رفقة الأخوان .. أخوانا يسدو عين الشمس كرم وشجاعه وطيب خصال
| |
|
|
|
|
|
|
Re: تداعيات ... وحراق روح (Re: nour tawir)
|
عبيد الطيب،، تنتمي لزمان غير هذا،والي وطن لم يعد موجودا،ولرجال مليئن بالاشواق،عبروا خفافا الي الضفة الاخري،وتركوا لنا الحنين،ياعبيد ،امسك عليك وجدك،امسك عليك عشقك،والا والله ستدخلنا في لجج حنين تبلعنا ضحا،اقول لك، حفظ الله لك هذا النضار.
| |
|
|
|
|
|
|
Re: تداعيات ... وحراق روح (Re: nour tawir)
|
نور بت تاور بالله شوفي البوست دا .... مليان بقصص زمان وناس زمان وسودان زمان .... الماضي والذكريات .. التاريخ ... وساسة زمان ... واقتصاديين زمان ... ومبدعين زمان ... في شتى ضروب الفن وفي مقدمتها الغناء.
ولعل السبب في ذلك الاحباطات التي يعيشها كل سوداني إلا قله من أولاد وبنات المصارين البيض والذين وضعوا في احدى اذنيهم طينة وفي الآخرة عجينة كما يقول المثل الراتب ... غير عابئين بمعاناة الشعب ولا همومه وآلامه ... شعب انتج ثورة اكتوبر وابريل ... وانتج فنانه وردي الطير المهاجر وكاتبه الطيب صالح موسم الهجرة للشمال .. شعب كان سلطانه علي دينار يكسو الكعبة الشريفة كل عام ... شعب كان ينتظره السعوديين في كل حج ليصيبهم من الخير نصيب وظمأ وشبع بعد جوع.
فحتى وقت قريب في أواخر الستينيات كان العاصمة الخرطوم مضرب مثل في فن العمارة والتقدم والتطور والتنظيم ... لدرجة أن حاكم أمارة أبوظبي كانت أمنيته فقط أن يرى أبوظبي في مثل جمال الخرطوم ... بالله عليكم كيف هي الخرطوم اليوم وكيف هي أبوظبي؟
لماذا نحن في تراجع مستمر نحو الهاوية؟ نعيش حاليا هزائم عنيفة في كل المجالات فقدنا في غمرتها وحدتنا وترابطنا ... وصفاتنا الحميدة أو نكاد نكون؟؟؟
هههههههههههههه بلد ياكافي البلا ويا حايد المحن
فرق كرة القدم فيها طاااااااااااااااايره
والاسعاااااااااااااار فيها طااااااااااااااايره
وما وااااااااااااااقعه فيها غير الطيارات ... يا الله فرجك ورحمتك.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
---
سنة المجاعة،حين لم ينزل المطر , في ذاك العام،اهلكنا القحط،حتي اكل الانسان ،اخيه الانسان، لشهرين متتاليين،تولول الريح الجافة، يجلدنا الهبباي الاحمر،قادما من قبلي سهل البطانة،حاملا الحصي والتراب القاسي،لايام بلياليها يستمر حصبه،كانه جيش عرمرم يرمينا بالنبال،لشهرين اثنين ماشال برق عبادي،ولا هبت علي الفجاج نسمه . مضي الضراع باكمله ،صيف من صهد ولهيب،اعقبته نترة بصوم صمدي،هلت الطرفة ،فماتغشانا ندي،ولا بكت السماء بالمطر،وانقضت ايام الجبهة مثقلات بالكرب والبلايا،وهانحن في بطن الخرصان،نفس عواء الريح الجافة،وسمومها الحارق. من دغش الفجر قصد جدي زروق الجامع،كانو هناك منكسي الرؤوس،متقرفصين فوق البرش المتاكل، رمي عصاه،ومثل الايام التي سبقت، لم يبداهم بالسلام،جبلة جديدة،ظنوها مقدمة لدخوله خريف عمره الحزين، اقتربوا من اليقين في ظنه كلما وجدوه،يقلب وجهه في الافاق مهمهما بطقوس غير مفهومة،ولقد كان لثمانين حولا،حكيم الجهات، الحاذق الفطن،ذو فهم يتجاوز ظاهر الاشياء،وعارف بسر حركات الطبيعة ونشاط مخلوقات الارض،الملم بما كان،ومن كان،حاكيا بالتفصيل منذ ان رست سفينة نوح،حتي لتخاله واحد ممن قدم فيها. رمي بعصاه،واتبعها قائلا،مكلما نفسه او جمع المجتمعين للصلاة,انها اذن والله الفاجعة،صلوا بصدق،وتضرعو للرب ان تكضب الشينة. صلي بهم جدي الفكي،كما كان يصلي في الزمان القديم ،اوجد فيهم كما من الاهة ،يتلو وتخنقه العبرات،الان ادركو ان خريف عمرزروق محض ظن،وانهم جاءهم بالنبا العظيم. قضيت الصلاة،فقاموا صامتين يمشون خلفه،ساقهم لاطراف الحلة،فتملكهم الزعر،كان الفجاج كلها تفيض بالنمل،جيوش وجيوش،من النمل صفوفا صفوفا بهمة وجد،داخلة المخازن،المطابخ،تكلة العواسة،الزرايب،تفتش في كل جحر عن ايها طعاما،وتمضي لتعود. حسنا لقد حلت الكارثة، رمي بحجره الثاني،وحدث الامر في ذات اللحظة،ذلك ولكان الناس قد انتبهوا فجاة ان مخازنهم قد خلت من ايما غلة،ان اجسادهم ادركها الهزال،ان اطفالهم قد شاخوا،انه في ذات اليوم قد دفنوا من الناس عددا،كان اليوم طويلا بصورة لاتصدق،ادركت السعية الخوار،نزع جلدها،امتلات دبرا وقروح،وعجزت الابقار من ان تقف علي ارجلها،طال اليوم حتي كان الطفل يولد ويشيخ ويموت ويدفن في نفس اليوم. جاؤوا للساحة ،يجرون ارجلهم جرا،ساقوا بعنت البهائم العجفاء،من تبقت من المهلكة،جاوؤا بالاطفال هياكل،وبالامهات ثواكل ،وبكوا للسماء،بكوا لمشايخهم،بكوا السنين الخوالي،ايام العز والطرب،تذكروا الاعراس وايام البهاء،تذكروا زمانا كانت الحقول مخضرة،والسعية راتعة،والبراحات تضج بضحكات الصغار،وشدو العصافير،هل حدث ان مر بهم زمان سمح كهذا ام هو الهزيان. لم يسقط المطر،وما حدث بعد ذلك لا بد انه معلوم للجميع،فلقد تغيرت خارطة البلاد،وتبدلت حيوات كانت حية لمئات السنين،وحين جاء الرجل الابيض،ووثق رحلات الموت،التشرد،المويلح الشيخ ابوزيد،انكر الناس ان هذا حدث بارضهم. البارحة ،التقيت جدي زروق،وكانه علم ما بدواخلي،فاجاني قائلا لن يهاجمكم النمل هذا العام. في اخر الليل شلع برق كانها نار عظيمة،وهب دعاش حلو،وانهمر المطر،لثلاث ساعات ولا زال مطر عظيم،انا اكتب ولم يتوقف المطر،ولكني علي يقين ان النمل لن يجئ.
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
الآخ العزيز عثمان جادالله بخيت..
نحن نشكرك على هذا النّفّاج الذى فتحته لنا.. حتى نعالج أمور تداعياتنا وحراق روحنا من وقت لآخر.. ويسرنى أن البوست يسير ولو ببطء لكثرة مشآغلك.. ألا أنه يسير بثقة...
....
أولاد الشوارع ............
عبدو كلفته هو أحد هؤلاء الذين تنطبق عليهم كلمة أولاد الشوارع.. بعد التعديل الذى أدخلناه على تسمية هذه الفئة من المجتمع السودانى.. بأولاد الشوارع.. حيث اصبح الشارع بالنسبة اليهم... هو مصدر الآسترزاق الآساسى والحياة.. وليس ساحة لممارسة كافة أشكال الشرور... وأزعاج المجتمع.. من البشر والسلطآت الحكومية..
خرج عبدو كلفته ذاك الصباح وأتجه صوب سوق الخضار المركزى فى الخرطوم.. لا يلتفت يمينا أو يسار... كأنما يخشى أن الآلتفات قد يفقده بوصلة الطريق الى السوق المركزى.. كان مسرعا ومهموما ومجتهدا فى هدفه ذاك الصباح..
وبالوصول الى السوق المركزى... أشترى من الخضار ما يكفيه لتجارته البسيطة فى ذاك اليوم.. وهو يحلم بأن يكمل المبلغ المطلوب منه لآمر ما..
عاد عبدو كلفته بنفس تلك السرعة والهمة... وأتخذ لنفسه مساحة فى مدخل الحى الذى يعيش فيه.. حتى تسهل على النساء عملية رؤيته... وشراء خضاره...
بدأ يومه بالتحية هنا وهناك.. يا عم فلان ويا فلان.. وهو يحتسى كوب الشاى بالنعناع.. الذى يحرص على شراءه من تلك الفتاة الجميلة النظيفة... التى تبيع الشاى فى ركن غير بعيد منه..
وفيما بدأت الحياة تدب على ذلك الشارع العريق.. وألاصوات تعلو تدريجيا.... والناس فى طريقهم الى مختلف شئون الدنيا.. فجأة ظهر شرطى يحمل فى يده سوطا.. يلوح به ذات اليمين وذات اليسار.. لم يمهل الشرطى عبدو كلفته ليحمل خضاره ويهرب مثل كل مرة.. بل أنتزع الخضار وطلب من عبدو كلفته أن يلحق به..
جن جنون عبدو كلفته.. وهو يحاول أن يثنى الشرطى من أخذ خضاره.. وبدأت الدموع تسيل على خده.. على غير عادته.. فبالرغم حركته الدؤوبة.. ونظرة الجد وألاجتهاد التى أتسقرت فى وجهه.. وضحكاته التى تجلجل أحيانا فتعطى الحياة طعما لذيذا فى ذاك الشارع السودانى.. ألا أن أحدا لم ير عبدو كلفته يبكى على الآطلاق..
وفيما أنطلق الشرطى بالخضار... وهو ينزع فى طريقه كل أكوام الخضار تلك... جاءت بآئعة الشاى مهرولة نحو عبدو كلفته.. الدموع فى شنو يا كلفته؟ ما أنحنا كل يوم فى المرار دا؟ والرازق الله.. هسه شوف الليلة أول مرة المقرود دا يخلينى..
رد عليها بصوت أجش وهو يغآلب دموعه... كله ألا خضار الليلا.. أنتى ما عارفة أنا عايز القروش دى لى شنو.. ودايرها لى شنو يعنى؟ مافى حاجة فى الدنيا دى بتخلى رآجل يبكى قدام الناس..
لا فى سبب يا سكينة يا أختى.. الليلة آخر يوم عشان أدفع فيه قسط الجامعة.. وكان ما دفعت بّعيدونى السنة.. وأتى عارفة باقى المسلسل لو أنا عدت... الآسرة الرآجانى دى يحصل ليها شنو.. ردت سكينة: وناس الجامعة يا كافى البلا ما بيّقدروا ظروف الناس؟ لا ما بيقدروا ظروف الناس يا سكينة.. ناس الجامعات بتاعة الزمن دا جزارين.. والجزارين أخير منهم..
طيب أقول ليك حاجة يا كلفته... أنا دآخلة فى صندوق.. ولسه قدامى تلاتة يوم عشان أدفع.. شيل القروش البتخآرجك من جزارين الجامعة ديل.. ويمكن بكرة ولا بعد بكرة تقدر تردهم لى كان ما جا عزرائيل العسكرى..
| |
|
|
|
|
|
|
Re: تداعيات ... وحراق روح (Re: nour tawir)
|
تعرفي يا نور ... قصتك دي فعلا قاعد تكون واقعيه في الكثير من دراما المشهد السوداني ... ولا زلت أذكر أنا علاقاتي المتميزة في فترة دراستي الجامعية مع الخالات والأخوات ستات الشاي ... زي علاقة أفراد الأسرة الواحدة بالجد ... ولا زلت أذكر على سبيل المثال لا الحصر الخاله مارغريت في جامعة جوبا .... أها الخاله مارغريت دي كلامها براهو لأنها طوال فترة دراستي في الجامعه ما قصرت معاي تب ... وقاعد أشرب قهوتي كان عندي قروش ولا ما عندي ... لحدي ما اتخرجت وعشان أكافيها أول ماأغتربت أول توبين سمحات أشتريهن واحد فيهن كان لأمي والتاني للخاله مارغريت ...تصدقي يا نور؟
| |
|
|
|
|
|
|
Re: تداعيات ... وحراق روح (Re: عثمان جاد الله بخيت)
|
ما الذى حدث؟ الدنيا تغيرت وقلبت رأسا على عقب.. هل تقدم الزمن يفعل أفاعيل تضر بقيم الناس؟ هل يتغير البشر فى كل كم دورة زمنية.. الى الآسوأ؟ ثم ماذا فعلت أنا لآستحق كل هذا؟ وهكذا كانت هآجر تتحدث الى نفسها... وتدريجيا يعلو صوتها.. حتى ليخيل اليك أنها تتحدث أمام نفر من الناس.. كل من مرت بجانبه... كان ينظر اليها بأستغراب... وحسرة.. وهو أو هى تهز رأسها ذات اليمين.. وذات اليسار.. وتضرب كفا بكف.. معقولة دى هآجر؟ البت السمحة النضيفة الظريفة.. اللى ضحكتها تجيب آخر الشارع؟ البت المتعلمة والآستاذة والمربية؟ لا حول ولا قوة الا بالله.. الله يلعن الحرب.. هآجر جنت من بدآية الحرب.. ومن يومتا وهى تمشى وتتكلم.. لا بتتعب ولا بتكل.. الله يلعن الحرب والبيحاربوها.. أهو النسوان جّنن وحايمات فى الشوارع يكلمن روحهن..
| |
|
|
|
|
|
|
|