|
|
 في زمن النفاق
|
في جلسة مغلقة مع نفسي خطرت في بالي قصة طريفة اجتريتها منذ المرحلة الابتدائية وهي تتحدث عن حايك فيلسوف بالبلدي ( ترزي تفتيحة ) استطاع ان يضحك ( يدقس) فرعون ووزرائه جميعا ..دعوني اعيد سردها على طريقتي ..
قال ليك واحد من الفراعنة كان النوع المفتري وضاغط الناس ومعذبهم بالضرائب والجبايات والجلد والسجن لاتفه الاسباب .. فجاه ظهر واحد ترزي وقال هو لازم يقابل فرعون شخصيا وما عايز اي وساطات .. الجماعة قالو ليه .. يا راجل انت قول لينا انت عاوز منه شنو ونحن نوصل له طلبك .. قال يا اخوان انا ترزي بمواصفات خاصة ( لا تقول لي فالانتينو ولا كرستيان ديور ولا عمكم جنز زاتو ) .. الجماعة قالوا ليه ياخي قوم لف وشوف ليك شغلة تانية البلد مليانة ترزية وحتى ما لاقين شغل بقو يلتقوا المراتب والمخدات عشان ياكلوا عيش ..
قال ليهم يا اخوان انا بشتغل بنوع خاص من الاقمشة ما يشوفها الا الشخص العندو فضايل كثيرة ( يعني شخص يكون كريم اصيل امين شجاع وفي مخلص صادق ) غير كدا او اي شخص فيه حتى ولو صفة دنيه واحدة ما راح يشوف نوع الاقمشة الانا بفصلها ..
قام طبعا كبير الوزراء قال اولا ورينا العينات .. وصاحبنا الترزي كان جاهز لنوع السؤال وعنده شنطة اصلا فاضية . فتحها وعمل حركات كانه يرفع في طاقات قماش من الشنطة واخيرا رفع يديه مفرودات من بعض كان بينهم قطعة قماش .. وقال شايف يا مولانا حتة القماش دي كيف ؟؟ .. والجماعة طبعا دجالين كلهم بصوت واحد ... ( ياسلاااااام ياخي دي مبالغة عديل كدا ... كدي قولينا مترها بكم ... ولا العجب الزرقا ديك الفي الشنطة التحت الحمرا مباشرة .. والوزير لاوز خاف يكون هو الوحيد الماشايف وبعدين يتهم بالصفات الدنية ويروح فيها وقال مالو نمثل مع الناس .. يا سلام يا ترزي الهنا اقمشتك كلها سلك وفي السلك ..خلي اولا ملكنا فرعون يعزل الاقمشة التعجبو وبعدين خلي لينا نحن الباقي ..
والوزير قال لاخونا الترزي انتظرني هنا اكلم فرعون وارجع لك ..ودخل الوزير على فرعون وقال له عندنا هنا ترزي من نوع فريد معاه اقمشة عجيبة لا يراها الا الانسان الذي يتمتع بصفات كريمة يعني شخص يكون (كريم اصيل امين شجاع وفي مخلص صادق ) فرعون قال له بسرعة خليه يدخل هو وشنطته .. ودخل عمنا الترزي عند فرعون .. وفرعون قال له : اه يا اخ ورينا اقمشتك العجيبة .. والترزي بنفس الحركة الاولى فتح الشنطة وعمل حركات في الهوا كانه يفرد في الاقمشة .. فرعون عاين هو متاكد ما شايف اي حاجة وعاين للجماعة لقاهم منتظرين منه اي تعليق .. بس هو كمان ما كذب ( اقصد كذب ) خاف يتهم بالصفات الدنيئة وقال ياسلاااام ياخي اقمشتك دي كلها محجوزة لي انا ولطاقم الوزراء بتاعني ... بس لازم انت كمان تكون بارع في خياطتها وتحولنا نحن لعالم الاناقة وعروض الازياء .. عمنا الترزي قال لهم ابشروا وادوني بس اسبوع .. بس الاول تعالو عشان ناخذ مقاساتكم .. والجماعة وقفوا له حتى فرعون معهم اخذ لهم المقاسات جميعا وسجل على ورقة بردي كانت في جيبة .. وقال لهم ادوني غرفة خاصة عشان نبدا في العمل .. وفرعون قال له نحن عندنا عيد وطني بعد خمسة ايام .. ونحن لازم كلنا نكون قاشرين باللبسات العجيبة دي .. وفعلا بعد خمسة ايام جا وقف قدامهم وتظاهر كانه يرمي لهم في اللبسات وكل واحد يقبض في الهوا كانه استلم لبسته .. وكل واحد جري ناحية غرفة ليغير ملابسه ( اي ينزع ما عليه ) وهنا الخبر انتشر في الدولة وكل الناس سمعت بان فرعون عنده ترزي الان يخيط ملابس من قماش شفاف اسمه الفضيلة لا يراه اي شخص به صفات دنيئة.. وطبعا فرعون وجماعته ( قشروا ) باللاشئ والناس منتظرنهم في الطابور صفين من هنا وهناك وهم يهتفون باسم الملك ووزرائه .. وطبعا فرعون نزل هو ووزرائه يحمل الصولجان ويلبس شبشب من ورق البردي فقط ( وانا لو كنت شايف حاجة تانية حانكرها ليه يعني .. على راي عادل امام ) والجماعة نزلوا يقدلوا وكل اهل الدولة يتظاهروا بانهم لا يرون شيئا غريبا .. بل بعضهم تمادى في النفاق وبدا يكذب ( ياسلام على لبسة الوزير فلان .. لكن لبسة الوزير فلان ضيقه عليه شوية ولو كفاها من تحت كمان ) والجماعة ماشين والشعب يصفق والنسوان تزغرد ... الا انه كان يوجد مجموعة من الاطفال كان من المفترض ان يلقوا على الملك نشيد وطني عندما يصل بمحاذاتهم لكن هم انفجروا ضاحكين .. وبعضهم قال الملك وجماعته عرايا .. فرعون يادوب شعر بانه يسبح في بحيرة من النفاق وانه اكل مقلب دولي من عم الترزي وكاميرا خفية من العيار التقيل ..
التفت فرعون لقا عمنا الترزي واقف بعيد قرب عجلته وميت بالضحك ... وفرعون بغيظ قال جيبوا لي ود الكـلـب دا .. والترزي ركب عجلتوا وقام سداري جري .. والجماعة ما عارفين يسكوه ولا ينستروا في الاول ..
|
|
 
|
|
|
|
|
|
|
|
Re: في زمن النفاق (Re: درديري كباشي)
|
بجدية تامة:
لو جلست إليك قليلاً يا درديري
حبكت قصصك هذه
قصقصت زوائدها
متنت متنها
وجمعتها بكتاب
فإنك لا تُجارى
فلديك أخيلة فنان مبهج
ورؤاه
...
وفي الإطار:
متعة بجد
وإنا لفي ذات الزمان
ونراهم عرايا بأياديهم
دون حاجة إلى ترزي عفريت..
سلمت
| |
|
|
|
|
|
|
|
|
Re: في زمن النفاق (Re: بله محمد الفاضل)
|
Quote: بجدية تامة:
لو جلست إليك قليلاً يا درديري
حبكت قصصك هذه
قصقصت زوائدها
متنت متنها
وجمعتها بكتاب
فإنك لا تُجارى
فلديك أخيلة فنان مبهج
ورؤاه
...
وفي الإطار:
متعة بجد
وإنا لفي ذات الزمان
ونراهم عرايا بأياديهم
دون حاجة إلى ترزي عفريت..
سلمت |
مشكور يا بلبل يا غريد
نحن منتظرين كتباك انت
نحن كتابتنا دي عبارة عن حجامة لنفس تلوثت بالغم
عساها تجدد روحها
| |
|
|
|
|
|
|
|
|
|
Re: في زمن النفاق (Re: درديري كباشي)
|
ورد الى وكالة امنحوتب للانباء ان الترزي الارهابي تم القبض عليه في منطقة الاهرامات مختبئ مع اسرة احد المرشدين السياحيين .. وقد اخذته القوات الامنية الى منطقة مجهولة .. وقد وجهت اليه تهمة تقويض النظام ( وكشف اسرار الدولة لجهات اجنبية معادية ) ومحاولة تعرية النظام ..
| |
|
|
|
|
|
|
| |
بله محمد الفاضل
شمس الدين ساتى
فيس بوك
تويتر
انستقرام
يوتيوب
بنتيريست