|
|
|
 Re: أوراق من مفكرة كـــــــلب (Re: درديري كباشي)
|
الورقة الاولى
كنت عايش وسط البشر في بيت مع واحد انسان فقران هو واسرته .. احرس لهم بيتهم بالليل من اللصوص رغما عن انه بيته اساسا ما فيه شئ يستحق الحراسة مقابل انه هو واولاده يعطوني الفائض من اكلهم .. لحوم وبعد مرات رغيف مع لبن .. حسب حالتهم .. لكن فجاه الحالة ضاقت بهم .. وهم اهل البيت اكلهم بقى قليل قدر كفايتهم وبعد مرات يكتفون بوجبة واحدة ونادرا ما يرموا شئ .. انا عندما لاحظت انه وجباتي قلت وبقت نادرة همت في الشوارع في مكبات النفايات .. قلت يمكن اطلع بفايدة احسن من انتظار اصحاب البيت .. صحتي هزلت لان مكبات النفايات نفسها اصبحت مزدحمة بالبشر .. واصبحت انا مطارد هنا وهناك .. وكل ماشاهدت بشر ياكل في عظم وقفت قرب منه اقول عسى يشبع يرمينا بالباقي .. ولكن تلاقي الانسان يكد في العظم ويمص حتى العظم يكاد يصبح شفافا وبعد ما يرميه يكون عبارة عن حجر من الجير .. اصبحت انا هزيل واصحابي ما يسالوا عني مرات اروح السوق قرب المطاعم اقول يمكن الاقي بواقي طعام .. الاقي بواقي الطعام محجوزة من اصحاب مزارع الدواجن يقدموها علف لحيواناتهم لدرجة انه انا تمنيت لو كنت دجاجة كان على الاقل ضمنت وجباتي ..
واخيرا قلت اترك المدينة واهيم على وجهي في الخلاء وزي ما بيقول البشر ( الخلا ولا الرفيق الفسل )..
وفعلا قادرت المدينة ومشيت في اتجاه الصحراء .. وطبعا زي ما عارفين انه نحن حاسة شمنا قوية .. شميت لي ريحة حيوان ميت على اتجاه بعيد شوية .. تبعت الريحة وفعلا وجدت بقرة ميته وشكلها مقتولة دون تردد ودون اسال عن ملابسات القتل وقعت فيها اكل .. اكلت لامن امتلات تماما ... ووجدت جدول ماء شربت ورقدت نمت بعمق قرب البقرة .. قلت اخذ نومة واقوم اتعشى منها ..
المهم وانا نايم فجاه شعرت بانه في شئ بيشمني . رفعت راسي شفت ابشع منظر في حياتي .. حوالي عشرين فك مفترس وعيون مولعة شرر تنظر الي بغضب .. انا شعرت بخوف وتخيلت نفسي في كابوس .. لكن ما هدا روعي انه الحيوانات كانت تشبهنا انا قلت يمكن من ابناء عمنا الذين حكى لنا اهلنا عنهم وهم لم يعيشوا مع الانسان ابدا .. وماطماني اكثر واحدة فيهم انثى جميلة اجمل ######ة شاهدتها في حياتي خفق لها قلبي رغما عن خفقان الخوف رقت لحالي واقتربت مني وشمتني بلطف ظاهر .. رغما عن امتعاض البعض وزمجرتهم .... ساعود بس ما اكون طولت عليكم ..
| |
 
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
الورقة الثالثة
قال زعيم القطيع يلا يا شباب نتحرك نحو الجبال قبل ظهور البشر
وفعلا تحركنا جريا ناحية الجبال وكانت صولا وهي الذئبة الانسة تجري بقربي وكنا نتونس في الطريق ونحن نجري نحو الجبال .. في الحقيقة انا تعبت لاني غير متعود على الجري لمسافات بعيدة .. لكن استحيت ما توقفت وخاصة انه صولا كانت تجري بارتياح شديد ..
وسالتني من عمري قلت لها حوالي اربعة سنوات وقالت لي هل انت متزوج .. قلت لها حقيقة ما لحقت اتزوج كنت مرتبط ببنت الجيران ( كــلبة طبعا) ولكن للاسف صدمتها سيارة قبل زواجنا بشهر حزنت عليها وبعدها زهدت في الزواج ..
شعرت ان صولا ارتاحت لقصتي رغما عن انها محزنة لمحت ابتسامتها كانها رضى باني غير متزوج .. وواصلنا الجري حتى اعلى الجبال وهناك كانت توجد عدة كهوف توزعنا فيها ..
انا كنت اتمنى لو كنت في كهف واحد مع صولا لكن اتضح انه النساء في كهف والرجال في كهوف اخرى .. وصولا هي الانسة الوحيدة التي تخرج في رحلات الصيد لكن امها واخواتها يحرسون الصغار في الكهوف ..
قضيت الليل في قلق وتوتر خاصة بعد ما دخل الليل بدات الذئاب في العواء باصوات قبيحة ومخيفة .. كذا مرة جاتني رغبة في النباح لكن كتمتها (في حناني) خوفا من انه الذئاب خفت تنقلب علي ..
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
الورقة الرابعة .
عدت الليلة الاولى كما ذكرت في اوكار الذئاب مرعبة جدا وهم يتبادلون العواء وانا (الهوهة) اتقطعت في راسي وما قدرت انبح ولا مره رغما عن شوقي للنبيح خاصة بعد ما طرق صوت سمعي نباح جايي من بعيد ..
وفي الصباح طلعت من الكهف اتمغى واستمتع باشعة الشمس بعد ما قضيت ليلة مرعبة في وكر الذئاب لم استطيع النوم وهم يتهامسون ويتراطنون بلغتهم الغريبة وكل مره واحد منهم يرسل عواءا بصوت جهير كانهم يتباهون باصواتهم القبيحة .
شاهدتني صولا اقف امام الكهف وجات نحوي وبدت تتحاور معي .
صولا : اها كيف اصبحت نمت كويس ؟؟.
قلت ليها : انوم كيف مع اخوانك ديل الليل كله يعووا لامن صدعت من اصواتهم المرعبة .
ضحكت وقالت : بالمناسبة يا فوكس انت لازم تتعلم لغة العواء لانها هي لغتنا وثانيا مهمة جدا في الحماية الشخصية ورحلات الصيد .
قلت لها مازحا : وين اتعلم لغة الذئاب عندكم معاهد لغات هنا ..
ضحكت وقالت لي دمك خفيف لكن ... نحن طبعا حنعلمك وانا حا ابدا معك الدرس الاول من اليوم ..
طبعا انا سعدت جدا بهذا الخبر واعدت النظر لتفحص صولا شعرها جميل وناعم وكثيف ولونها رمادي مظلل وعيونها كحيلة لامعة وجسمها ممتلئ وضخم .. تحس فيها الحيوية والنشاط والقوة ممزوجة مع الرقة والانوثة .
رفعت راسها ولاحظت لنظراتي وسالتني بخجل : مالك تعاين لي من فوق لتحت مشبهني ولا شنو ؟
قلت لها : مشبهك؟ هو في مخلوق في الدنيا يشبهك ؟؟
ضحكت وقالت : يلا ارح نعطيك الدرس الاول وما تضيع الوقت ..
وانا جاري لاحظت واحد من اخوانها ينظر لي بغيظ وحقد باين وانا متاكد هو يتمنى يستفرد بي حتى يمزقني مثل ما مزق البقرة ... وقلت لها : في واحد من اخوانك يكرهني شديد وانا متاكد عنده رغبة شديدة في قتلي .
قالت لي اي واحد فيهم ..
قلت لها الذئب الذي يوجد اسود كثير في ظهره ..
قالت : اها دا صائل ولد عمي .... هو بيكرهك لانه تقدم لخطبتي وانا رفضته وزي الحس بميول بيناتنا عشان كدا بيكرهك .. لكن ما تخاف اي شخص انا لو عملت له حماية ما في حد من القطيع يتجرا ويقترب منه .. اولا لاني انا اقواهم وممكن اعدموا وثانيا ابوي زعيم القطيع وبيفضلني عليهم كلهم وكلمتي مسموعة .
قلت هامسا في نفسي: دي النسوان ولا بلاش ..
هي سمعت وسوستي وسلتني : قلت شئ .
قلت لا ابدا ابدا . وحتى اغير الموضوع قلت لها : هو انتو عندكم محل معين لتعلم اللغات .
قالت : طبعا في مكان في الجبال فيه صدى الصوت عالي .. وانت لامن تعوي بتسمع صوتك يرجع لك وتعرف اخطائك وعيوبك وتصلحها .. وهو دا معهدنا لتعلم لغات العواء او العوعوة زي ما بتقول انت ..
ضحكت انا من تعليقها رغما عن انه ما اذكر نطقت كلمة عوعوة لكن الذئاب الظاهر لها قدرة على قراءة الخواطر .. ما علينا المهم وصلنا المنطقة وفعلا شكلها غريب وادي في النص ومحاط بالجبال من كل الناحية وبدا تعليمي الدرس الاول وقالت استاذتي .
اولا يا فوكس تجلس القرفصاء باقدامك الخلفية وتخلي اقدامك الامامية واقفة وراسك لاعلى وتبدا تعوي : عاااااااااااااااااااااااااااوووووووووووووووووو..
وفعلت فعلت مثلها : وصرخت هاااااااااااااووووو
قالت : ما هاوو .. عا عا عا عا عاووو ما تعرف تقول عاء
قلت : ها هي تقول عاء انا اقول هاء .. قدر ما حاولت ما استطعت انطق حرف العاء وهو الحرف الاساسي في لغة العواء او العوعوة ..
المهم بعد جهد جهيد وعدة محاولات انطلق ميلاد اول عوعوة في حياتي ... ووضعت رجلي على صخرة وباعلى صوتي عويت : عااااااااااااااااااااااااااااووووووووووووووووووووو وووووووووووووووووو.
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
الورقة الخامسة
اول ما انطلق مني صوت العواء فرحت صولا جدا وانا كمان فرحت واصبحنا نرقص ونقفذ احتفاءا بهذا الانجاز .. وقالت لي صولا اخيرا اصبحت من الحيوانات الناطقة لحرف العين بدل هاوووو ممكن تقول عاوووووو ..
بصراحة انا اتغظت منها وقلت لها : هي دي ميزة يعني ما الخرفان بتنطقها وبتقول بااااع ..
قالت لي : اسكت اسكت ذكرتني الاسبوع الفات ضاربه لي نعجة بس خليها في سرك .
قلت : تقصدي شنو يعني ضربتيها ..
قالت : اقصد شنو يعني ما اكلتها..
قلت باندهاش : نعجة كاملة اكلتيها لوحدك ؟؟
قالت : مال حا اعمل دعوة يعني وهي النعجة كلها قدر ايش ..
قلت : يا ولية انا ارنب ما اقدر اكمله براي .
قالت : ما هو باين في خلقتك المعصعصة دي .. شوف هنا لو ما اصبحت ذئبا اكلتك الذئاب فتح عينك كويس واوعى حكاية الارنب الما بتقدر تكلمه دي تجيب سيرتها قدام واحد من اهلي سامع ولا لا .
وقالت ثم انا ما سالتك انه هناك مع البشر كيف تصيدوا واكلكم كيف تحصلوا عليه .
قلت : صيد شنو انت بتحلمي .. اولا نحن لو اتجرا اي واحد مننا لمس حيوان حي حتى لو عضاه على طول يحكموا عليه بالاعدام ..
قالت : طيب كيف تحصلوا على اللحوم ..
قال : في عالم البشر الانسان وحده فقط هو عندو صلاحية قتل وذبح الحيوانات وتحويلها للحم لنا وله .. ولكن بعض مرات بيستخدموا جماعة مننا في صيد الحيوانات البرية لكن فقط لقتل الفريسة وتسليمها لصحابه .. ويمكن صاحبه يكافئه بقطعة لحم .
قالت : بصراحة حياتكم تورم الفشفاش .. انا اصيد صيده واعطيها لمخلوق ثاني دا لمن يشوف حلمة اذنه . وطيب يوم يكون مافي لحم تموتوا بالجوع .
قلت : طبعا في بدايل اتعلمنا اكلها مع الانسان زي الفول والبوش والفاصوليا والعدس .
قالتك ,الحاجات دي شنو نوع من الحيوانات .
قالت حيوانات شنو يا حلوة انت دي نباتات .
قالت: باندهاش نباتات ؟؟؟ انت بقيتو نباتيين كمان ؟؟ فضيحة السواد يا يمه ..
قلت : نسوي شنو الجوع كافر
قالت : شوف هنا اوعى كمان تجيب سيرة اكلكم للنباتات قدام الجماعة اول واحد راح يبدو بيك انت وانا من جيت اقول فيك ريحة كدا ما عا########ي ..
خلينا نروح السكن اول نبشر الجماعة بتعلمك للعوعوة .. كدي جرب تاني قدامي ما نمشي هناك تخزلنا ...
قلت : عااااااااااووووووووووووووووووووووووووووووووووووووو ووووو
| |
|
|
|
|
|
|
|
|
|
Re: أوراق من مفكرة كـــــــلب (Re: Mutaz Hussien)
|
الورقة السادسة
بعد التجربة الثانية سعدت صولا بقدرتي على العواء وجرينا نحو بيوتهم في الجبال لتبشر اهلها وفي الطريق سالتها قلت : لكن كيف يكون العواء لغة متكاملة كيف يتحول لفهم
قالت : بالمناسبة كونك اصبحت تعوي هذا لا يعني اتقانك للغتنا . انت الان فقط استطعت تستخرج الحروف .
قلت طيب كيف نميز بين عوه واخرى .. قالت بعد ذلك ستتعلم معاني كل عوة لحاله .. وغالبا تتوقف على الجرات بمعن على الواوات مع كل عوة على كل حال ما تستعجل التعلم خلينا نحصل القطيع قبل ما يخرجوا لرحلة الصيد ...
وفعلا عدنا للجري وتسلقنا الجبال وفعلا عندما وصلنا وجدنا الزعيم ابو صولا مجتمع بالذئاب ويشرح لهم في خطة الهجوم الجديدة واستعدادهم لغزو منطقة جديدة مليئة بالصيد .. دخلت صولا على اهلها مبشره والدها بتعلمي العواء .
قالت : يا باب فوكس اتعلم العواء اسمع يا بابا ..
سكت والدها عن خطبته ويبدو انه مدللها وممكن يترك اي شئ لاجلها وقال وهو يبتسم يلا يا ابني سمعنا واطربنا بعوة من عواتك .. ونظرت وجدت صائل بن عمها ينظر لي بغيظ ويرفع في كتفيه استخفافا .. بالنسبة لي التجربة كانت مخيفة وارتبكت كاني داتخل معاينة اختبار ###### بوليسي .. المهم في النهاية تحنحنت واخذت نفس طويل وجلست القرفصاء ورفعت راسي لاعلى وصرخت : هههههاوووووووووووووووووووو
انفجر القطيع بالضحك وخاصة صائل ولكن ابو صولا بحق هو ذئب محترم جدا لانه نهرهم قائلا : يا اولاد يا قليلين الادب في شئ يضحك .. وعاد لي الكره وقال معليش يا ابني غلطة عادية اصلا حرف العين صعب في البداية جرب مرة ثانية ..
وفي المره الثانية وبكل غيظ واصرار وثقة بالنفسك عوة عوة جعلت الجميع ينطربون ويصفقون لي طالبين مني تكرارها وقالوا انه صوتي جميل بالنسبة لاجنبي وسطهم .
وتحرك القطيع نحو جهة الصيد .. كان كل الذئاب يجرون في صف واحد مسرعين الا انه صولا كانت تجري بمحاذاتي لترشدني وتشرح طريقة الصيد .. وقالت انه عندهم مرشد او جهاز استخبارات يخرج لوحده ودائما يكون حاد البصر وقوي السمع وحاسة الشم وسريع .. هو من يحدد لهم مكان الصيد ويشرح درجات الخطر .. لو كانت حيوانات مستانثه من الانسان مثل الابقار والاغنام هذه تحتاج لطريقة صيد معينة مع الحذر .. وهي في الغالب نكتفي بقتل الحيوان والابتعاد عن المنطقة ثم نعود في اليوم التالي يكون البشر غادروا المكان لناكل صيدنا .اما الحيوانات البرية مثل الوعول والغزلان هذا هو صيدنا الاساسي نستمع به في نفس اليوم ..
قلت لها : ما تلاقيكم عداوات من حيوانات ثانية اقوى منكم مثل الاسود والفهود.
قالت : نحن لاتوجد حيوانات اقوى مننا لاننا متحالفين ونعمل في جماعة لذلك الاسد نفسه يعمل لنا مليون حساب .. اما اذا فارق احدنا القطيع وحاول يعمل لوحدة ويعيش منعزل هو سيتعرض للخطر وممكن يموت فعلا من اسد او نمر او حتى الضباع ممكن تقتله ..
قلت لها : طيب انا الان رايح معكم رحلة صيد رغم انه في حياتي ما صدت حيوان ولا حتى فار ومات عندي فكرة في القتل ..
قالت : انت اليوم ولمدة شهر كامل ستكون ضيفنا وتتفرج فقط ما مطلوب منك اي مهمة .. في خلال الفترة دي انا بدربك على القتال .. والمسالة ليست تدريب فقط انت كمان محتاج لتقوية عضلاتك واسنانك ..
قلت ليها : عضلاتي وعرفناها اسنانا حتقووها كيف؟
قالت : كيف توجد هنا في الغابة نباتات وثمار نستخدمها في التدريب لتقوية الاسنان والفكين
قلت لها قولي لي مثال من نوع النباتات ممكن اعرفها ؟؟؟
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
الورقة السابعة
قالت لي صولا من انواع النباتات يوجد هنا نبات عنده سمره كبيرة قوية تسمى القرع .
قلت : القرع تقصدي ثمرة لونها اصفر مخططة وقوية .
قالت : نعم هي وانت تعرفها وين شفتها .
قلت : القرع دا من النباتات التي ياكلها الانسان بعد ما يطبخها مع لحوم الضان .
قالت : ياكلها؟؟؟ وبدت مشمئزة باندهاش .اوعى تكون انت اكلت معهم .
قلت: كيف هم بعد ما يخلطوه مع اللحم في النار ويصبوا عليه زيت وبهارات يصبح طعه لذيذ بنكهة اللحم وخاصة بعد ما يعجنوه مع كسرة مصنوعة من الذرة ..
قالت : عجيب امر الانسان هو اساسا نباتي ولا حيواني عشان كدا انا ما بطيق ريحتهم ابدا وبتعمل لي الحساسية . ومين عنده وقت وصبر يعمل كل هذه العملية .
قلت : البشر يتركون زوجاتهم في البيوت وهن يقمن بطبخ الاكل بهذه الطريقة يخلطوا المنتجات النياتية مع لحوم الحيوانات ويصنعوا منها الاكل وهو يعرف عندهم بالطبيخ .
قالت : تلاقي الانثى البشرية هي ابتكرت كل هذه الخزعبلات واللفة الطويلة حتى تملا وقت الفراغ وما تحس انها عاطلة . ولكن لو كان عندها مهام زينا تطلع تدور الصيد وتحضر اللحم للاولاد ما كان لقت وقت للطبخ والكلام الفارغ ومضيعة الوقت .. بعدين انت اذا كنت حيواني بتاكل لحوم الحيوانات العشبية ولو كنت نباتي بتاكل النباتات زيك وزي اي فيل او معزة ... لزومه شنو تخلطهم مع بعض وتقربهم من النار وتاكلهم .. وانت تكون منتظر كل هذا الوقت الى ان يخلص الطعام ؟؟
قلت : الا ان يخلص الطعام والى ان ياكلوا هم ويشبعوا ثم يرموا لي الباقي ان بقى منه شئ .
قالت : كمان ؟؟؟؟على حال خلينا في حياتنا الجديدة ما نقلب عليك المواجع ..
فجاه انا شميت رائحة غريبة توقفت .. وبعد قليل
قالت : لي مالك توقفت ؟؟ .
قلت لها : انا شامم رائحة غزلان على بعد الفين خطوة في اتجاه الشمس ..
قالت : انت متاكد من كلامك ؟؟
قلت : زي ما انا متاكد انك جارية قربي الان ..
قالت : بابا توقفوا فوكس قال شامم رائحة غزلان على بعد الفين خطوة في اتجاه الشمس .
وفعلا وقف الجميع وبدا يشمشموا في الاتجاه الذي حدده فوكس ولكن لم يشموا شئ ..
وسال الزعيم فوكس من جديد : انت متاكد من حاسة شمك يا ابني .
قلت : يا عمي زي ما انا متاكد من وجودك معنا الان ..
تدخل صائل العدو اللدود وقال متهكما : سيبكم منه دا ###### مخرف هو اصلا وين شاف غزلان قبل ذلك ؟؟.
وتصدت له صولا وقالت انا بثق في كلام فوكس .. ولو ما جيتوا معانا حانروح انا وهو في الاتجاه المحدد سامعين ولا لا ..
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
الورقة الثامنة:
وفعلا توجه قطيع الذئاب في نفس الاتجاه الذي حدده فوكس نتيجة تعليمات زعيمهم والد صولا .. وكان معظمهم متبرمين من استجابتهم لدعوة ###### مثلي .. ولكن انا تاكدت انه حاسة شمي اقوى منهم بكثير بدليل انهم حتى الان لم يشم احدهم شئ ..
المهم صولا ونحن متجهين في اتجاه الصيد الجديد الذي حددته انا . قالت لي : يا فوكس انا عاوزة اتقدم ليك ..
قلت : لها تقصدي شنو بتتقدمي لي ؟؟
قالت : اقصد شنو كيف يعني اخطبك عاوزة اتزوجك ..
طبعا انا شعرت انه قلبي كاد ينفجر بالخفقان .. قلت لها رغما عن اني حاليا اعتبر نفسي اسعد ###### في الدنيا الا انه مفروض انا اتقدم واخطبك ما انت ..
قالت : لها نحن في عالمنا عالم الذئاب الانثى من تختار زوجها .. وكل القطيع من انا اتحولت لانثى بالغة يترقبوا في خطبتي والشباب يتراشقوا ويخففوا في دمهم ويستعرضوا في عضلاتهم لكن ما فيهم واحد ملا عيني وقلبي غيرك انت .. ولو نجحت رحلة اليوم وطلعنا بصيد وفير حيكون هو دا مهري منك .
قلت : ليها انا متاكد من وجود الصيد زي تاكدي من حبي ليك ( ما قلت لازم استقل والموقف واعبر انا كمان )
قالت : انتو في عالمكم ال###### الذكر هو من يخطب ..
قلت : نحن عالمنا عجيب اولا الانسان عنده حساسية مع انثانا فهي معرضة للقتل ..حتى لو كانت جروة صغيرة .. لذلك الاناث عددهم قليل وبيكون الانثى الواحدة عندها عدة ازواج ممكن يصلوا للعشرة .
قالت : غايتو حياتكم مدمرة انا مستغربة كيف الكلاب متحملة الوضع دا ما كان يطلعوا الغابة زينا كدا ..
قطع الحوار احد الذئاب بعد ان عوي معلنا اقتراب مكان الصيد فعلا ..
هنا وقف الزعيم وقسم القطيع لمجموعتين وقال كل مجموعة تمشي في اتجاه حتى نحاصر الصيد في حلقة مغلقة .. وفعلا تحركنا في شكل قوسين ثم بدينا نتجمع حول المركز .. وتفاجا الجميع بوجود اكثر من خمسين غزالة متجمعين حول بركة مياه .. وكانت ليلة حافلة بعد الهجوم تقريبا كل واحد منا حظى بصيدة كاملة .. حتى انا تمكنت من بهم صغير .. واعلنها لاول مرة اتسبب في ازهاق حياة حيوان وكنت اقلد صولا حتى تمكنت من نحر الظبي باسناني ..
كان الجميع سعداء في هذا اليوم عدا صائل طبعا شعر بان هذه الليلة قضت على اي امل ممكن يطلع به من صولا .. وخصوصا بعد ان اصبحت انا محتفى به ..
امر الزعيم بان يحمل كل واحد منا رجل صيد للاسر والاطفال .. وقبل رحلة العودة همست صولا في اذن والدها واخبرته بخطبتها لي ..
ووقف الزعيم وجمع القطيع وقال اعلن من اليوم انه صولا وفوكس اصبحا زوجين من الان بعد ان اختارت صولا عريسها..
وقف صائل قاطبا وجهه وتمتم بكلام غريب لم افهمه وتحرك في اتجاه عكسي لا ادري ماذا قال ولا ادري الى اين اتجه .. ولا شئ يهم بعد الان بعد ما اقترنت بصولا رسميا .
وكانت رحلة شهر العسل جميلة لاول مرة بين ###### وذئبة جميلة تزوجا عن حب صادق .
والى الورقة التاسعة .
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
تعرف يا درديري بعد (إنت غلطان ) ما كنت قايلني بندهش من أي قصة تكتبها، طلعتني غلطان !!
سعة الخيال، الحبكة الدرامية و المقدرة علي السرد الباذخ ده ما شغل هواه !!
غايتو الله يغطي عليك من تبارك  غير كده لم قصصك دي و شوف ليك ناشر و لمن يشار إليك بالبنان كاحد أساطين الرواية السودانية بالله ما تبخل علينا بسلام الله !!
| |
|
|
|
|
|
|
|
|
Re: أوراق من مفكرة كـــــــلب (Re: عبداللطيف شريف على)
|
Quote: اخوى درديرى
تحياتى
يا زول مليان ابداع ..
اشوف اسمك بعرف فى جمال وراوى قدير ..
الى الامام وبثقة ..
Quote: كذا مرة جاتني رغبة في النباح لكن كتمتها (في حناني)
وما تكتم فى حنانك ابدا ... |
مشكور يا عبد اللطيف يا لطيف ..على الدفعة ..
وانشاء الله ما راح اتكم في حناني
بس قول يا لطيف
| |
|
|
|
|
|
|
|
|
|
Re: أوراق من مفكرة كـــــــلب (Re: أمين محمد سليمان)
|
Quote: تعرف يا درديري بعد (إنت غلطان ) ما كنت قايلني بندهش من أي قصة تكتبها، طلعتني غلطان !!
سعة الخيال، الحبكة الدرامية و المقدرة علي السرد الباذخ ده ما شغل هواه !! |
مشكور يا بروف أكيد طلتك مكسب وشهادتك مفخرة ,,,
الله يخليك ..
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
الورقة الثناية عشر
من بعد مقتل صولا وولديها دخلنا انا والاولاد في تدريبات عنيفة .. وانا اعتقد ان الاولاد كانوا اكثر مني حنقا وحقدا على مقتل امهم لاحظت ذلك في عملياتهم صيدهم كانوا يقتلون الحيوانات بصورة بشعة تحس فيها نوع من التشفي وحتى لم تكن لهم نفس مفتوحة للاكل .. فكانوا يقتلون الحيوان ياكلون قليلا ثم يتركوه ويقتلوا اخر قبل ما يخلص الاول بغير طبع الذئاب في الظروف العادية ..
هم يعلمون باني اخطط لهجوم انتقامي لكن اين وضد من هم لا يعرفون لانهم لم يشاهدوا بشر حتى الان ..
واخيرا جمعتهم يوم وقلت لهم اليوم سنذهب وناخذ الثار لامكم واخوانكم .. وقالوا نحن مستعدين يابا ...وقلت لهم لازم تعرفوا انه عدونا قوي وله امكانات اكبر واحتمال نحن لن يبقى فينا واحد حي ... قالوا لايوجد اقوى منا في الغابة نحن الاسد نفسه خاف مننا .. ففلت لهم الانسان هو اذكى حيوان وهو ملك الارض وحاكمها وله اسلحة متطورة وفتاكه ممكن يصيبوكم ويقتلونكم قبل ما تقتربوا منهم .. قال احدهم يابا لو كنت انت عاوز تخوفنا وتغير رايك ما كان من الاول دخلت الفكرة في راسنا .. نحن لنا اكثر من شهر نستعد لليوم الذي سناخذ فيه بثار امنا ولا شئ سيوقفنا بعد الان ..
قلت : اذا ما دام انتم مصرين دعونا نتحرك اليوم بعد مغيب الشمس في اتجاه مكان البشر ونهاجمهم .. نهاجم كل شئ اذا وجدتوا حيواناتهم المستانثه اقتلوها .. ولا تنشغلوا بالاكل .. حتى تقتلوا اكبر عدد ممكن .. وكما ذكرت احتمال كبير نكون كلنا معرضين للابادة الجماعية ..
قالوا لا شئ يهم بعد موت امنا ..
وتحركنا نحو المدينة في صف طويل اول ما شارفنا المدينا وقفنا في تل عالي وظليت اشرح لهم فكرة مختصرة عن حياة البشر .. وبعد ذلك قلت لهم يجب ان نتفرق لاننا لو دخلنا في شكل جماعة سيعرفون بانه هجوم وسيقابلونا بجيوشهم المدرعة .. ولكن اذا تفرقنا .. ستصبح الامور كانها حوادث عادية ثم تنتشر كاشعات لان البشر اعتادوا ان يكذبوا على بعض فالصدق بينهم اصبح نادر .. على بال ما يصدقوا ان هنالك هجوم فعلا نكون نحن حققنا اكبر قدر من الاضرار بعد ذلك كل واحد يحاول يهرب من جديد في اتجاه الغابة .
وفعلا نفذت الخطة وبدا الهجوم ..
انتظرونا في الورقة الاخيرة 
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
سلامات يا برلوم
| Quote: والعنوان اعلاه لا توجد به اي تورية او اساءه لأحد |
العنوان دا مسروق من كتاب توزعه دار نيويورك تايمز...لكاتب إسمو جيف كيني
لو صبرت لي بجيب ليك الرابط....فحقو تحفظ الحقوق الادبية لمؤلف الكتاب...أو تثبت ملكيتك للعنوان (-:
| |
|
|
|
|
|
|
|
|
|
Re: أوراق من مفكرة كـــــــلب (Re: garjah)
|
Quote: الدرديري اخوي
يا زول اكتب ساااكت
قشة ما تعتر ليك |
قرجة يا أخوي آمنت بشئ واحد .. ما تعرف تمشي جمب الحيط في هذا البورد حتى ولو حرصت .. حتما ستستحم بحلة ملاح بايت .. فأحسن حل امشي في النص وافرد صدرك ..
| |
|
|
|
|
|
|
|
|
|
Re: أوراق من مفكرة كـــــــلب (Re: د. ياسر عبد القادر)
|
Quote: العنوان دا مسروق من كتاب توزعه دار نيويورك تايمز...لكاتب إسمو جيف كيني
لو صبرت لي بجيب ليك الرابط....فحقو تحفظ الحقوق الادبية لمؤلف الكتاب...أو تثبت ملكيتك للعنوان ( |
العنوان بس المسروق ولا كل الموضوع يا دكتور ؟؟؟؟
وهل كلمة مسروق هذه تنطبق على الشخص الذي لم يسمع حتى بالكتاب ولا هنا الادانة تسبق الاتهام ؟؟
والكاتب الاسمه جيف كيني هذا كتب كتابه بالعربي او بالانجليزي؟؟
ولو بالانجليزي معناها يكون التطابق تم بناءا على الترجمة العربية ..
هل مايسري على الترجمة يسري ما يسري على التطابق في اللغة الواحدة ؟؟
ونحن نعرف كلمة مفكرة ممكن تكون مذكرة وممكن تكون يوميات وممكن تكون اجنده.. وكلمة اوراق ممكن تكون صفحات وممكن تكون وريقات ..لو استبدلنا اي من الكلمتين بالمترادفه هل سيظل الحال كذلك ؟؟
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
اول مرة اعرف انو عنوان الكتاب ممكن يكون له ملكية فكرية .....!!!!؟؟
يا دكتور اذا استاذ الدرديرى سرق كتاب بالانجليزى ورواه لينا بالعربى افتكر دى عبقرية ولا انا كداب دى عبقرية ولا انا كداب...!!
البرلم واصل يا حبيب الدفعة وزى ما قال ليك قرجاااالعمدة وبجلالته قشــــــــــــــه ما تعتر ليك ..
وفى انتظار جديدك ...
| |
|
|
|
|
|
|
|
|
|
Re: أوراق من مفكرة كـــــــلب (Re: عبداللطيف شريف على)
|
Quote: ول مرة اعرف انو عنوان الكتاب ممكن يكون له ملكية فكرية .....!!!!؟؟
يا دكتور اذا استاذ الدرديرى سرق كتاب بالانجليزى ورواه لينا بالعربى افتكر دى عبقرية ولا انا كداب دى عبقرية ولا انا كداب...!!
البرلم واصل يا حبيب الدفعة وزى ما قال ليك قرجاااالعمدة وبجلالته قشــــــــــــــه ما تعتر ليك ..
وفى انتظار جديدك ...
|
يا عبد اللطيف ..اولا فكرة استنطاق الحيوانات ليست جديدة عربيا منذ ان ترجم بن المقفع كليلة ودمنة الى العربية ..كتب توفيق الحكيم قبل ثمانين عاما حماري قال لي ومسرحية مصير صرصار ..
وانا شخصيا خضت تجربة مشابهة اكثر من مرة بامكاناتي المتواضعه هذه هذه كتبت ( ثرثرة في عالم الصراصير سنة 2008) وفرار فأر .. وحكمة فأر .. وقبل لذلك كتبت مشتركا مع اخت مسلسل جرت احداثه في مزرعة دواجن .. اي ابطاله ديوك ودجاج ..
ما لم استطع افهمه هي المانادة بعبارة يا برلوم :
هل يعتقد هؤلاء ان الدنيا بدأت وانتهت في سودانيز اونلاين ؟؟؟.
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
..
| Quote: وانا شخصيا خضت تجربة مشابهة اكثر من مرة بامكاناتي المتواضعه هذه هذه كتبت ( ثرثرة في عالم الصراصير سنة 2008) وفرار فأر .. وحكمة فأر .. وقبل لذلك كتبت مشتركا مع اخت مسلسل جرت احداثه في مزرعة دواجن .. اي ابطاله ديوك ودجاج .. |
روعة الروعة.. يا (ابو الدر)
ننتظر إبداعاتك أعلاه..
واصل.. عليك الله..
| |
|
|
|
|
|
|
|
|
|
Re: أوراق من مفكرة كـــــــلب (Re: عوض أبو عيش)
|
سلام
Quote: ثرثرة في عالم الصراصير سنة 2008) وفرار فأر .. وحكمة فأر ..
وقبل لذلك كتبت مشتركا مع اخت مسلسل جرت احداثه في مزرعة دواجن ..
اي ابطاله ديوك ودجاج .. |
ابداع لامنتهي بس زعلان منك عالم النمل دا ماجميل دا ربنا في القران نزل
سورة النمل.
الايام دي بكتب في مذكرات نمله بس ما النمله الشفوقه.
واصل ياجميل واتحفنا بعالم الحيوان المخلص.
| |
|
|
|
|
|
|
|
|
|
Re: أوراق من مفكرة كـــــــلب (Re: د. ياسر عبد القادر)
|
Quote: سلام تاني
وانا بفتح امس في المنبر العام شفت بوستيك دا وصادف قدامي الكتاب بنفس الاسم وهو لكاتب امريكي يكتب للاطفال ...
وحقيقة انا ماقريت في بوستيك دا غير اول مداخلة منو ,,,, .فقلت اداعبك شوية بالقصة دي بكلمة مسروق
وكلمة يابرلوم دي فوق البيعة ساكت
فدحين أكتب ساكت ....ما تتحسس...وركز علي النمل زي ماقال ليك الاخ عمر نملة الفوق دا
.وأكيد حأرجع أقرأ القصة والكلام المكتوب فوق كلو....
ومرحب بيك في الحوش الاسفيري الذي يسع الجميع
تحياتي |
ماشي يا دكتور
وانت عارف نحن ناس موتورين شوية ..
نتمنى انه الرد الفعل لم يكن عنيفا معاك ..
المهم اقرا وقولنا رأيك .. لانه حقيقة يهمنا
| |
|
|
|
|
|
|
|
|
|
Re: أوراق من مفكرة كـــــــلب (Re: عمر نملة)
|
Quote: ابداع لامنتهي بس زعلان منك عالم النمل دا ماجميل دا ربنا في القران نزل
سورة النمل.
الايام دي بكتب في مذكرات نمله بس ما النمله الشفوقه.
واصل ياجميل واتحفنا بعالم الحيوان المخلص. |
مشكور يا عمر نملة على الطلة الطاعمة
النمل انا احسن اخليه ليك انت الظاهر انت اتخصصت فيه عديل
بالجمبة كدا صورة الولد البيرضع في البقرة لذيذة جدا
| |
|
|
|
|
|
|
|
|
|
Re: أوراق من مفكرة كـــــــلب (Re: عوض أبو عيش)
|
Quote: روعة الروعة.. يا (ابو الدر)
ننتظر إبداعاتك أعلاه..
واصل.. عليك الله.. |
الله يخليك يا عوض يا عيش انشاء الله اذا ربنا كتب لنا عمر راح تشوف
الصراصير والناموس والفيران والجداد ( مطعم صيني )
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
| Quote: المهم بلغة كــلبيـــــــــــة مكسرة تحدثت معاي الكــــــلبيـــــــة الجميلة |
جيت متاخر المره دى
| Quote: يعجنوه مع كسرة مصنوعة |
ههههه شكلو اكل منها كتييير
انتهيت من قراية الاوراق مره واحدة
قمة الروعة
مرفقات
عليك الله براحة علينا شوية عشان نقدر نتابعك
الجرى مرات مافيهو فايدة
| |
|
|
|
|
|
|
|
|
|
Re: أوراق من مفكرة كـــــــلب (Re: محمد بابكر محمد)
|
Quote: ههههه شكلو اكل منها كتييير
انتهيت من قراية الاوراق مره واحدة
قمة الروعة
مرفقات
عليك الله براحة علينا شوية عشان نقدر نتابعك
الجرى مرات مافيهو فايدة
|
شاكر يا ود بابكر
على قول الجري ما منه فايدة .. وانا كمان الجري دا ما حقي
بس عندي اثنين عاوز اسثمرهم ( فراغ و وقت ) فكرت اضخ اكبر قدر ( الحزام الاسود لليوم الابيض )
| |
|
|
|
|
|
|
|
|
 Re: أوراق من مفكرة كـــــــلب (Re: محمد جلال عبدالله)
|
Quote: انتظر مصيري فكرت في كتابة مذكراتي وارسالها لصديقنا ( ابو الدر) . عن طريق التخاطر .. وانا متاكد انه ابو الدر يكون وصل لكم الرسالة ,,وما قصروملككم الحقيقة كاملة ... ولا نامت اعين الجبناء .... عاووووو .. او
|
الآن فرغت من قراءة القصة
والله يا أبو الدر إبداع ما بعده
شكرا لك
| |
|
|
|
|
|
|
|
|
|
Re: أوراق من مفكرة كـــــــلب (Re: محمد جلال عبدالله)
|
Quote: درديري كدي شوف دي بالله
كانت محاولة بس يا عيني مافي زول شجعني
عشان كده أبيت أتمها
زنقة كديس يوم الخميس ... الجزء الأول |
سلام يا محمد جلال
كذلك انا خلصت من قصتك الرائعة والتي فيها سخرية من الواقع السياسي والاجتماعي باسلوب كوميدي
لكن يتخيل لي المشكلة هي لانك نزلتها كلها في مشاركة واحدة ا اثنين .. الناس هنا ما عندها نفس او رغبة يحبسوا انفسهم في موضوع واحد لفترة طويلة
لازم تتبع طريقة الري بالتنقيط ..
لو اعدت نشر القصة من جديد حتى تعطيها فرصة ثانية يكون أفضل ( غير العنوان)
| |
|
|
|
|
|
|
|
|
|
Re: أوراق من مفكرة كـــــــلب (Re: درديري كباشي)
|
اجمل شيء ان تبداء يومك بدرديري كباشي ،،
------------
يا زول انت بشارة فال ومسار بقود للفرحة في زمن اصبح كالح ،
------
وعليك الله انقل لينا زهجك البي هناك لأنو بصراحة زهج بخليك تفرح،
---------
مودتي
| |
|
|
|
|
|
|
| |
علاء الدين حيموره
عوض أبو عيش
Mutaz Hussien
أمين محمد سليمان
عبداللطيف شريف على
د. ياسر عبد القادر
garjah
عمر نملة
محمد جلال عبدالله
علي دفع الله
فيس بوك
تويتر
انستقرام
يوتيوب
بنتيريست