|
|
 النــور حمـــد.. زول راقي..!!
|
شاااايف البوست حق النور حمد لكن داك شكلو سياسي وبتاع تحليلات و رؤيا و و و ..
بتاعي ده بوست بتاع إعجاب بي شخصية أووول مرة في حياتي اشوفا النصيييحة ..
كنت بسمع بيهو من مجموعة اصدقاء بس فعلاً اول مرة أسمعو ..
ياخ ده زول راقي ونضيييف وأنييق ومتحدث يشهيك في القعدة معاهو...
النصيييحة زول جدير بي المصاحبة وجاتني رغبة اصاحبو ..شكلو زول بيتصاااااحب ..
تخريمة :
يا ناس قطر كلمو لي الزول ده ..
|
|
  
|
|
|
|
|
|
|
|
Re: النــور حمـــد.. زول راقي..!! (Re: سيف النصر محي الدين)
|
شوف هو بعرف وبتكلم فى اى حاجة الا الحاجات البتتكلم فيها
انت ....يعنى مابعتقد يكون مركز مع سيف مساوى ونجاة غرزة ...
ومابكون بعرف سليمان بمبى وجمعه جلنارو وبكرى المدينة ...
يعنى باختصار مافى قواسم مشتركة ...دى واحد ...
اتنين (دا الكلام الماعايزو عمر ) ...دكتور النور حمد عندو
سعة لقبول الأخر وشجاعة فى طرح الرؤى والافكار ومناقشتها يفتقدها
الكثيرين ...حتى الجمهوريين المسافة بينهم وبين النور كبيرة (جدا) ...
واعنى تحديدا فى حتة قبول الأخر والشجاعة فى مناقشة الافكار ...
النور لم يكتفى بما قدمته له الفكرة الجمهورية بل اضاف الكثير
بجهده ....والاهم سماته الشخصية وطريقته فى طرح الاراء والافكار دون
تعصب او تشنج ....
شخصيا (Ilike ) جدا شخصية دكتور النور حمد ...وبستمتع بالانصات
اليه وهو يقدم (السهل الممتنع ) ....
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد عبدالرحمن)
|
يا مامون مالك عايز تجييب لي الهوا الاصلللو مجيووب من ولدي الصغيير صلاح
عارف انا عند وليدين ربنا يحفظهو وصغااار لسة..اها الصغيير فيهم عمرو 3 سنوات لكن خيالو وااااسع جدا..
اها اسة كنا في السودان وكان بيحكي لي ناس البيت عن انو عندهم اخت كبييرة بتقرا في الجامعة ويشيييل ويوصف فيها لي امو ..
اها انا اسة مزرزر زرزرة عدوك في البت دي امها وينا؟ تجي انت تقول لي مبروك للبنية ؟؟؟ :-):-)
محمد الجزولي وشكووور للتايد ودعم الفكرة
يا سييف
في ناس كتااار مثقفين وفنانين بس معولقييين وسطحيين
يا اسامة صدق زي النور ده ما بينفع رئيس..النور ده زول تصاحبو وتقشر بييهو للناس بس..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
محمد عبد الرحمن ياخ احسسسن حاجة لما تصاحب ليك زول ما بيفهم في حاجاتك وما بتفهم في حاجاتو عشان الونسة ما تكون بيييض ومكررة..
بعد داك اييي واحد ح يدي التاني من حاجاتو..جمييل جدا انو يرفع من مستواي والاجمل انو اضيييف لي النور حمد شي من ونسات وثقافة اهل القاع..
بعدين ياخ انت عشان شايفني بتواضع وبرد علييك قايلني زول هييين؟؟ انا ود قلبا ..ويكفيني فخرا انو النور حمد قال لحظة اعدام محمود كان لاافي في حلتنا..
تخريمة
انا خليييني مع غرزة وحواجب..انت نعللك ح تونسو بي اب ستة واب عشرين والرتينة اوقدت..؟
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
النور حمد يا عمر فعلاً زول ما هين و الحاجة البقعد ليها بينجضه
و يري الأشياء البيتكلم عنها بزوايا متسعه .
النور و من الشخصيات الكاتبة و المحاورة الممكن الإنسان يستفيد
منها الكتير مهما كان الاختلاف .
النور حمد عندو كتاب اسمو (مهارب المبدعين) كتاب غني بالمفيد
يا عمر أتمنى انك تطلع عليهو .
النور حمد برضو عندو مكتبة في سودانيز رغم انها بسيطة بس فيها
دراسة عن كتابة عبد الله بولا في فكر محمود محمد طه مهمة جداً
في نظري .
مع خالص التحيات الطيبة .
| |
|
|
|
|
|
|
|
|
|
Re: النــور حمـــد.. زول راقي..!! (Re: سفيان بشير نابرى)
|
يا عمر الفاروق سرقت أفكاري
من الحلقة الأولي ناوي أفتح بوست عن دكتور النور حمد
وزيك كدا كنت ناوي أكتب بعيد عن السياسة والأفكار
كنت ناوي أدخل كلمة راقي في عنوان البوست
ولكن تكاسلت وخاصة البورد كان يمر بعراكات وكتاحات تسد النفس
وإكتفيت بتعليق في البوست الفات
إتفاق في الأفكار زي دا لا يعني مجرد توارد خواطر ولكن يعني إتفاق حول شخصية النور حمد
فعلا زول راقي وفاهم وأنيق ويشرف
صراحة لا أذكر متي حضرت لقاء بهذا الرقي
اسلوب سلس في الحكي.. أفكار مرتبة..ثقافة وعلم
ما شاء الله
خساره أمثاله يكونوا مشردين خارج الوطن
ومثلك تماما أتمني أن ألتقيه يوما في أرض الله الواسعة
| |
|
|
|
|
|
|
|
|
|
Re: النــور حمـــد.. زول راقي..!! (Re: سفيان بشير نابرى)
|
الصدفة بس الليلة خلتني اشوف النور حمد وهو يتحدث في المقابلة التي جمعته مع الطاهر التوم
وحقيقة امكن كل الذي قيل فيه لا يوصف هذا الرجل .
استمتعت كثيرا به والغريب ان صديقي عندما رآه وقبل ان يسمعه سأل مندهشا انتو ( ده استاذ النور حمد ...الزول ده درسني في خور طقت كان استاذ فنون ...بس ده صغير في السن ما اظن يكون هو وداك كان ضعيييييييييييف جدا بس كان جمهوري مثقف جدا )...وبقي يتكلم عنه لحد ما الحقلة انتهت ,
اتمني من الأخوة ان يمدونا بما كتبه هنا بروابط
له التقدير
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر محمد ابراهيم)
|
نابري يا حبوب ..
طبعاً أديك سر..إنت من الناس اللي بدي كلامهم إعتبار :) .. لأنك زول ود حلة وبيتكلم بي فهم ود الحلة وده كافي جداً .. أها انا عندي مشكلة مع قراية الكتب ويا قولي وقول صديقة لي إنو يا عمر لو بتقرا كتب كان بقيت حاااجة تانية :) ..لكن كلامك شجعني افتش كتاب النور واقراهو ..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
اسامة يا بلال..
شوفت الزول من تلاقهو لابس ليهو قميص لياقتو موزونة والبدلة قدرو طوااالي اعرفو زول راقي..
رقي النور حمد العجيييب كمان في طريقة كلامه ..طوااالي بيديك إحساس إنو زول مهذب وود ناس وبالو طويييل بيسمع لي اييي زول..
الزول ده الليلة خلاني احرس البرنامج من طقطق لي سلام عليكم ..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
Quote: تخريمة
انا خليييني مع غرزة وحواجب..انت نعللك ح تونسو بي اب ستة واب عشرين والرتينة اوقدت..؟ |
كده كويس يا محمد عبد الرحمن ؟
ما قلت ليك أولاد قلبها ديل ما تلعب معاهم !
التحيه والتقدير للصديق الأخ دكتور النور حمد
فالرجل قامه سامقه من قامات وطنا الجريح ,, وطنا الذى يمسك
بزمام أموره أمثال عبد الرحيم ونافع بينما رجاله الحقيقيون يهيمون فى المنافى ! دنيا !
وياعمر الفاروق بالإضافه للذوق والفهم والأناقه إنت ما شفتو أو سمعتوا عندما ( يتسلطن )
ويمسك العود ويدندن ليك للكاشف أو الكابلى ,, إنى آمنت بالله ,,
يأخ الجمهوريين ديل كلهم كده , بالله أبدأ فى رصدهم ,, حتكتشف العجب العجاب !
غايتو لو السودان ده ربنا قاسم ليهو حياة من جديد .. مفروض يحكموه الجمهوريين والشيوعيين ( القدااام ) .
| |
|
|
|
|
|
|
|
|
|
Re: النــور حمـــد.. زول راقي..!! (Re: كمال سالم)
|
الأخ عمر الفاروق...سلام..
الأستاذ النور محمد حمد...شخصية آسرة جداً...
تشرفت أنو درّسني في الخرطوم الجديدة الثانوية...
تخيّل أستاذ لمادة الفنون...ولكن يُجمِع كل الفصل على حبو والتعلّق بالمادة محبة لهذا المعلّم...
لم نكن نعلم أنوجمهوري ألاّ بعد دخولنا الجامعة و رؤيتنا ليهو وهوبيدير ركن نقاش...
فأدركنا سر الأدب واللطف والتهذيب الذي بهرنا في ذلك الوقت...
التحية والأمنيات الطيبة لأستاذ النور...
والتحية لبك أخونا عمر
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد محمود محمد)
|
Quote: إنت ما شفتو أو سمعتوا عندما ( يتسلطن )
ويمسك العود ويدندن ليك للكاشف أو الكابلى ,, إنى آمنت بالله ,, |
طيب يا كمال يا سالم ما أهو طلعت في حاجة بنقدر نتونس معاهو فيها ..محمد عبد الرحمن ده مالو ؟؟؟
ولا هو قايل غرزة ما بتغني بي العود؟؟
ولا علوية حواجب ما عندها في الفرقة بتاع أكورديون؟؟
تخريمة :
إنت كمان ما تبالغ يا كمال ما كل الجمهوريين.. هنا فييي بوردنا العفين ده في جمهوريين أيي كلام..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
يا محمد محمود محمد ..
غايتو إسمك منو خوفة ..ولو ما اخاف الكضب اقول طه منع من ظهورها التعذر :) :)
كدي في الأول النقول ليك إنو البت الفي البروفايل دي لا تقل عن النور حمد رقيّ ..ياخ حجزنا ..ممكن؟ بس حضروا لينا شقة وبوكسي ..باقي انا اولادي ديل ما بديهم بي الساهل ..
بالنسبة للموضوع فياخ بختكم أن درسكم النور حمد لأنو غااالباً بيكون زرع فيكم حاجة من طريقته في الكلام وفي فهمه للحياة وطريقة تفكيره..
شاءت الاقدار أن اعمل في كلية الفنون الجميلة وتعاملت مع عباقرة بلادي في هذا المجال ووجدت فيهم خاصية التواضع وسعة الأفق ..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
| Quote: شوفت الزول من تلاقهو لابس ليهو قميص لياقتو موزونة والبدلة قدرو طوااالي اعرفو زول راقي |
دى بتنطبق على تماما (البدلة) قدرى (طق) ....
فيما يخص اب عشرين وب استه اعتقد انو النور بعرف
فيها اكتر من مدير مشروع الجزيرة ...مابحتاج اكلمو ...
بعدين امبارح بالليل قابلناهو وحكيت ليهو عن بوستك
ومانصحتو بصحبتك ...وكمال سالم قدر مااجتهد يوصل
ليهو عمر الفاروق دا منو غلبو ....هذا من ناحية ...
من ا لناحية التانية حلتكم ياتا الكان حائم فيها النور ؟
ياخوى حلالكم كتار ...
ياكمال سالم انا كلمتك امبارح ...قلت ليك الغناء
السودانى دا اصلا اتجمع من الجزيرة ودقوهو فى (مدنى ) ..
بعد داك مدنى وزعتو لباقى مدن السودان ..ندق عود
وايقاع ونوبة ونغنى ....ونلعب الباصات الدقاقة
واحسن ناس يضربو اقوان بالراس فى العالم ...شفتا كيف ...
فياكمال ياخ القلب مكانو هناك فى مدنى ....
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد عبدالرحمن)
|
| Quote: فياكمال ياخ القلب مكانو هناك فى مدنى . |
لكن إنتو طبعاً ناس مدني و70 كيلو ..
زمان الجكس المعانا في الجامعة الواحدة تقول ليك ساكنة مدني ..أها تحصل ليها حاجة نقوم نقرر نمشي ليها ..نكتشف إنها ساكنة في مدني و 30 كيلو غرباً .. النوع البعد نصل مدني بنركب " البرينسة " ..وبعد ننزل من البرينسة بنركب " كارو " عشان الترعة .. وبعد داك بننزل من الكارو بيجينا شافع بي سروال مقدود عشان يوصلنا البيت ..
بالنسبة لي الحوامة في حلتنا .. فحسب رواية النور حمد فهو قال كان سايق موتر وحاايم في بيوت الجمهوريين في الثورات ..فااا شنو اسألوا من المعلومة دي عشان تستفيد برضو ..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
الأخ عمر الفاروق ..
غايتو إسمك منو خوفة ..ولو ما اخاف الكضب اقول طه منع من ظهورها التعذر :) ....
________________________
صدقت يا عمر...منع من ظهور طه....سيد الحوش....الأسم الرابع (طه)....
صدقني أعجابك بأستاذ النور من خلال اللقاء يدل على أنك زول شفاف
___________
بالنسبة ( لآية محمد محمود)...يا اخي أدّيناكم .....بس كان أدّبناها وعلّمناها بنكون قصّرنا؟
تحياتي لأسرتك الكريمة
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد محمود محمد)
|
يا محمد محمود :
| Quote: بالنسبة ( لآية محمد محمود)...يا اخي أدّيناكم .....بس كان أدّبناها وعلّمناها بنكون قصّرنا؟ |
بس عليييكم الله ما تضغطوا علينا في قصة العصمة دي ..أولادي مساكييين وما بتاعين مشاكل ..خلوها عندنا بتكم ما بتجيها عوجة .. :) :)
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
| Quote: أولادي مساكييين وما بتاعين مشاكل |
فاروقنا
إنت جادي ؟؟
كان ممكن نصدق ( المكنة ) دي لو قلت ( طالعين لأمهم ) مع الجملة
تحياتي لأستاذنا د. النور حمد
________________
شوقتونا نمشي نفتش ونحضر اللقاء من اليوتيوب
| |
|
|
|
|
|
|
|
|
|
Re: النــور حمـــد.. زول راقي..!! (Re: عاطف عمر)
|
Quote: طيب يا كمال يا سالم ما أهو طلعت في حاجة بنقدر نتونس معاهو فيها ..محمد عبد الرحمن ده مالو ؟؟؟
ولا هو قايل غرزة ما بتغني بي العود؟؟
ولا علوية حواجب ما عندها في الفرقة بتاع أكورديون؟؟ |
تتخيل نظريتك غلط؟
ممكن يسمعك لي النهاية (لأنو زول مؤدب).
لكن من ما يعرف حكاية (غرزة) ومحمود عبدالعزيز والحاجات دي ....
وتديها كمان رأيك في غنا الموصلي .... بتكون فارقتو إلى غير رجعة.
عموماً .. هو متابع جيد للبورد وبيكون شاف البوست ده (أكيد حنتونس بيهو وحنقطع فيك)
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد أبوالعزائم أبوالريش)
|
| Quote: ومحمود عبدالعزيز والحاجات دي ... |
والله يا ابو الريش ود العزائم لو محمود عبد العزيز طلع عندو من ( الحاجات دي ) ف عفيتو من صحبتي .. انا بحترم الناس الما بتسمع محمود طبعاً لكن ما لي درجة اصاحب زول بيعتبر محمود من ( الحاجات دي ) ..
بالمناسبة وحسب ما تابعت وسمعت هذا النور حمد الراقي.. بختلف معاك انت ومحمد عبد الرحمن في قصة ما بيعرف غرزة وحواجب وانو فقط عشان مؤدب ح يسمعني .. نوووو إطلاقاً ..
انا ومن خلال ما سمعته وفهمته وكونته عن شخصية الرجل إنو ممكن يسمعني لأنو ممكن يقتنع بي الجماعة ديل وممكن من خلال رحلة بحثه عن حقيقة الفن ان لا يضيره ان يسمع غرزة وعلوية حواجب..
زول تنقل بين الاسلاميين والشيوعيين والصوفية والجمهوريين ده زول مستعد يسمع اي حاجة ويقييمها بي عقله ..
أي نعم انا عجبتني البدلة والقميص والساعة حقتو إضافة للنضافة لكن ده ما بيمنع إنو انا زول كويييس بعرف اسمع واحضر برامج بي طريقة كويسة واستفيد من مخرجاتها واقدر اقييم الزول من كلامو ..
| |
|
|
|
|
|
|
|
|
|
Re: النــور حمـــد.. زول راقي..!! (Re: وليد محمد المبارك)
|
المحييرني يا وليد إنو كييف ابو العزائم ده إستطاع أن تسوّل له نفسه إنو يخت محمود عبد العزيز مع غرزة وحواجب ؟؟؟
بعدين أطمنك الحلو ح يكمل خصوصاً إنو الفنان البنتكلم عنو إسمو محمود .. والجمهوريين ديل تحنيكهم ساااهل .. أول ما الاقيهو ح اقول ليهو انا فناني المفضل هو فنان إستمد إسمه من الأستاذ وتمت تسميته ب محمود لأنه في الستينات رأى العم عبد العزيز في المنام شخص لابس أبيض في أبيض صبوح الوجه ناير الطلة والطلعة قال ليهو إنت منو؟؟؟ قال ليهو بي صوت طروب .. انا محمووود محمد طه يا عبد العزيز .. ما تخاف مني .. انت مرتك حااامل وح تجيب ليها ولد ..تسموهو محمود.. الولد ده صوتو جمييل خلوهو يغني ..ووصيتي ليك يا عبد العزيز في واحد إسمو النور حمد ..قول ليهو يا النور اسمع الولد ده كويييس .. الولد ده فنااان يا النور .. فنااان يا النووور .. فنااان يا النور ..ويبدا الصوت يقل والزول اللابس ابيض يختفي وهو بيردد :
فناان يا النووور.. فنان يا النووور..
أها باقي ليك بعد القصة دي الحلو ما بيكمل؟؟
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
ايك سر يا عمر
واخلي ناس ( مالهم النوبة ؟) يتجدعوا عليك شوية
والدة محمود عبد العزيز قالت بعضمة لسانها لاحمد فلاح كما اخبرتني ( مالهم النوبة ؟) .. انها سمت ابنها محمود على محمود فلاح .. بالمناسبة والدة محمود من المداومات على حضور المنتدى
عرفت محمود ده الشغلانة معاه ما صوت ساي .. بل منهج كامل تربى عليه
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
يا سلااام يا سني ياخ..
بل راقي إنت وراقي ابوك وراقين اهلك ..
أمشي كده ولا كده ها الراقي ده ..
طالما إنت جليسه ف الحبة ما بتجيني فانا على قناعة انو ارواحنا واذواقنا بتتشابه يا سني يا ود دفع الله ..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
| Quote: المحييرني يا وليد إنو كييف ابو العزائم ده إستطاع أن تسوّل له نفسه إنو يخت محمود عبد العزيز مع غرزة وحواجب ؟؟؟ |
ليه ما إختّه معاهم؟
الماعون واحد (إسمو عمر الفاروق)
____
سؤال جادي والله: غرزة وحواجب ديل شنو؟
| |
|
|
|
|
|
|
|
|
|
Re: النــور حمـــد.. زول راقي..!! (Re: وليد محمد المبارك)
|
يا ابو العزائم :
نعم الماعون ماعون عمــــــر.. ماعون يسع أي حاجة .. بنسمع أييي حاجة وبنعرف بعد داك نميّز ..ماعونا يسع الجميع سوداني وغير سوداني عاليه وهابطه جميله وغثه (غث دي ما عارف معناها شنو وما بعرف بتتكتب كيف زاتو .. ) .
| Quote: سؤال جادي والله: غرزة وحواجب ديل شنو؟ |
غرزة هي واحدة من سيدات الأعمال السودانيات الأصيلات ..بدأت حياتها كإنسانة مكافحة عركتها الدنيا بعد أن توفي عنها زوجها وترك لها ثلاثة أطفال أكبرهم يبلغ من العمر 5 سنوات ..قررت أن تكمل الدراسة فالتحقت بمدرسة امبدة المتوسطة ثم اكملت المرحلة الثانوية بمدارس إبراهيم سوميت التجارية بحي بانت العريق ثم التحقت بكلية شرق النيل الجامعية قسم المحاسبة .. وهنا كانت نقطة التحوّل والنقلة النوعية التي نقلت محاسن غرزة ( شقيقة نجاة ) لعوالم قصتها ربما أقرب للخيال ..
نواصل..
تخريمة :
حواجب هي الأستاذة علوية حواجب متخصصة في تجهيز العرائس تحديداً تشقير الحواجب بينما تقوم أماني تنس بي الحنة وإنتصار جحا بالمكياج ..
| |
|
|
|
|
|
|
|
|
|
Re: النــور حمـــد.. زول راقي..!! (Re: عمر الفاروق)
|
معليش يا عمر .... أعتذر ..... معنى كلامك إنو الإتنين ما ليهم علاقة بالغنا.
كلام الناس أوحى لي إنهم فنانات أو بصورة من الصور ليهن علاقة بالفن، بس يظهر إنو ده شغل مكاواة بينك وأصدقائك أوصل لي رسالة خاطئة.
عذراً .....
يعني ممكن تفك الإشتباك بينهن ومحمود عبدالعزيز
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد أبوالعزائم أبوالريش)
|
أسة يا ابو الريش بدل إعتذارك ده مش كان أووول شي تسأل سؤالك ده قبال ما تجيب إسم محمود معاهن؟؟
وبرضو تصبر لحدي ما تقدر تميّز بين ما هو مكاواة وونسة وبين ما هو جاديّ..
طبعاً هنا ناس سودانيز عندهم وهمة انا ابداً ما من انصارها ..الزول يخرمج ويخرمج وبعد داك يجي يكتب إعتذار يقومو الناس يجو يشكروهو ويقولوا ليهو يا لك من انسان رائع ويبدو يلوومو في الزول المخرمج فيهو ..
كلامي ده ما ليك تحديداً فموضوعك مختلف بس فكرة الاعتذار واحدة ..
| |
|
|
|
|
|
|
|
|
|
Re: النــور حمـــد.. زول راقي..!! (Re: محمد سنى دفع الله)
|
في كل شئ راق
وعالم موسوعي
زول فهم وتسامح يسع الرضا والالفة
زول الجلوس معاهو تشعر بالامان وطمانينة تحتويك
حتى تشعر ان العالم يخلو من الشرور والاباليس
محبتي
يا استاذ السني والله هذا ما أحسسته في استاذ النور محمد حمد منذ 1974 ونحن طلبته بخورطقت الثانوية . لقد احبه كل الطلبة منذ قدومه لخورطقت . النور حمد منذ ذلك الزمان كان موسوعة مجلات شتى رغم انه كان خريج جديد .فقد كان له دور في كل نشاط في المدرسة- في الليالي المسرحية والندوات والمناظرات والرسم والتلوين والديكور المسرحي والموسيقى وله مقالات حائطية ثابتة فيما كان يسمى (عكاظ) وهو مكان للجرائد الحائطية والبيانات وطرح الآراء الساخنة بما كان يسمى (اللهيب). اما دماثة الخلق وصفاء السريرة وسماحة الدواخل فهي تنعكس بصدقها في وجهه ومحياه وتحسها واضحة في تعاملة وتواضعه . فهو راقي وأصيل طبعاً وليس تصنعاً للاعلام واضواء الميديا. والله ما تعلمناه من النور حمد في سنه واحدة كان ذخراً لنا فيما بعد ولشدما افتقدناه انا وصديقي رزق فضل الله وكنا نتمنى ان نلتقيه في دروب هذه الحياه لننهل من معين ابداعاته وادبه الفياض.. فالتحية والمحبة والعرفان لاستاذ النور جمد
| |
|
|
|
|
|
|
| |
عمر الفاروق
مامون أحمد إبراهيم
محمد الجزولي
سيف النصر محي الدين
usama Babiker
محمد عبدالرحمن
سفيان بشير نابرى
أسامة البلال
كمال سالم
محمد محمود محمد
عاطف عمر
محمد أبوالعزائم أبوالريش
وليد محمد المبارك
محمد سنى دفع الله
فيس بوك
تويتر
انستقرام
يوتيوب
بنتيريست