|
|
 نصيحة الشايقي - زكريا أخوي
|
أيوه أسمعوا نصيحتي(الكلام ليكن يا المطيرين عينيكن) ... العندو بواسير أخير يموتبها .. أووووعكم من عمليه..ما يغشوكم الدكاتره الزلنطحيه ديل ويقولو ليكم بسيطه وكلها يوم واحد وتنتهي الشغلانه وترتاحو من الآلام والنزيف....بوووف كضابين ... وأوووعكم يحصلكم الحصل علي ده أنا بحذركم وبعدين تقولوا قشريا قال.... التجربه حقتي دي أنا عايزكم تستفيدوا منها (أمااااني أنا ما ضقته لي جنس زنقه.. حرامي في مولد ما إتزنقه.. و###### في طاحونه ما شافه) ... وإن كان لابد من عمليه فعليكم بالكي (أووووعه من الجراحه)... الحكايه وما فيها(أنا بوريكم الحاصل من طقطق للسلام عليكم وإنتو بيطريقتكن.. بس عليكم الله لا تشيلو حالي أكتر من ماهو مشيول)... حماكم الله... الخرابه دي أنا شاعربها من بدري ولا خليت قرض ولا دوا بلد أي نصيبه جربتها وأي زول يقولي سو الشي الفلاني أنا أمشي أسوي ولا خليت مراهم ولا حبوب ... مره واحد زميلنا قالي بس صفق النيم ..جنبنا نيمه في الشارع عدمتها الصفقه أخرت منها وأشيل وأحشر وأدفس لامن صلبي بقي زي بيت أبوالشرشري(هو أتاريهو يغلوهو فوق النار وأنا ماني فارزو) ..وواحد تاني قالي في فلاتي يفرش في السوق بس أمشلو يديك خلطة أعشاب الكمده بالرمده ...مشيتلو(كلوو خوفا من العمليه) أداني ليك نصايب مشربكه في بعضه لا تعرفه فروع لاتعرفه عروق لا تعرفه عش سرويي... غايتو شيتا كدي متل الكمتر وقالي تسحنو وتكبو في مويه دافيه في طشت وتقعد فوقو زي ساعه ...شلتو وسحنتو ودفيت المويه وعندنا طشت متوسط كدي كبيت فيهو المويه وخجيت النصيبه دي في المويه الدافيه ورحت قاعد والله تشوفوني بس شتلة الصفيح الساولها الماروق.. نان الشي ده مو ريحني.. لكن خلاني إتكرش متل المجرب ...دي شقاوة شنو الوقعته فيها دي(جينا ليمكه تغنينا سلبت طواقينا) ..وبعدين... قلته كدي أغب منو يوم وأجيهو صاد تاني..فعلا جيتو صاد وإتـقولعته وإتفرجخته وقعته فوقو تاني زي مرة الدخان زي نص ساعه كدي ...بس قومتي منو إنطلق في الكراش وصلبي كلو قام حب حب وليهو شوك متل الزريعي وبعد مو علاج بواسير بقيت في بلوه آآخره ...علا مشيت الأجزخانه أدوني صباع برهم كدي ريحتو بس فسوة الصبره وكتي الإتمسحبو إلا أسدد نخري.. إتمسحتبو يومين حتن الكراش وقف والحبوب راحت ... والله قربته أمشي للفلاتي ده وأقولو يا زول هيي علاجك ده تاني لا تديهو ليزول الشي ده ضريسي ولا حسكنيت ؟ده موية نار راسا عديييل ... تاني قالو لي جرب الحنضل اللخدر برضو جربتو لامن ريحتي بقت زي فحل الإبل الممسحنو بالقطران.. و مااا سوا التدعك ... المهم حاجات كتيره ونصايب بالكوم سويته لا العنكبوت جربتو(صاحب أوهن البيوت) ويا بواسير الضلمه دي إنتي أبيتي تروحي .. تسكت كم يوم كدي وتاني تدور نبيح ...لامن يوم لقيت الخرابه بقت تكب في الدم (أنا أخوك إنته) الحكايي جابتلها دموم كمان !! وبقيت أكوس في درب القطن والشاش بيوين ... وبقيت أقول ليروحي هيييي أنا في الباقيلي علي آخر عمري جاي ........!!(دي شيني مراقبين الموقع ماااابيمرروها بيأخوي وأخوكن أخير أختاها - رغم إنو في جماعه أصحابنا هني قالوها لي وإن قالوها تاني.. ياني الفاكي آخري.. أعملو حسابكن- ) .
تاني أنا بسمع نصحية الشايقي
زكريا بابكر عمر
منقوله من موقع البركل
|
|
 
|
|
|
|
محمد بابكر احمد
فيس بوك
تويتر
انستقرام
يوتيوب
بنتيريست