دعواتكم لزميلنا المفكر د.الباقر العفيف بالشفاء العاجل
|
|
 أنت غلطان
|
المكان احد تقاطعات الرياض الشهيرة بالحوادث تقف سيارتان مصدومتان ببعض عز الظهر والشمس في كبد السماء احداهما مهشمة المقدمة والثانية محطمة الباب من جهة السائق .. ويخرج السائقان من سياراتهما .. لحسن او لسوء الحظ او لا علاقة للحظ بالموضوع يكون الاثنان سودانيان احدهما كبير في السن اي في العقد السادس من عمره والثاني شاب في العقد الثالث ..
يبدا الحوار العم الكبير : شنو يا ولدي انت ما ما بتعاين مشغول بشنو تتكلم بالجوال ؟؟
الشاب : يا عمنا انت غلطان عاوز تطبق فيني نظرية الهجوم خير وسيلة للدفاع .
العم : ياولدي هجوم شنو ودفاع شنو نحن في هلال مريخ انت جاي من اليمين مفروض تديني فرصة .
الشاب : ياعمنا الجايي من اليمين هو صاحب الفرصة انت ما عارف قانون المرور .
العم : يا سلام كمان عاوز تديني درس في قوانين المرور ولا شنو ؟؟
الشاب : لا عفوا يا عمنا انا قصدت اذكرك بانه قانون المرور بيدي اولوية للشخص الداخل من اليمين ..يعني الشخص الجاي من الشارع الاهم الى الشارع الاقل اهمية .
العم : وانت عرفك شنو انه الشارع دا اهم من الشارع دا ؟؟
الشاب : العملية واضحة لانه دا شارع كبير وسيدين وعنده فاصل في النص .. ودا شارع اتجاهين بدون فاصل .
العم : برضو دا ما بيعني اهمية الشارع : يمكن الشارع الصغير دا نهايته فيها وزارة او قصر شخص مسئول او مكتب امن كدا برضوا داك حيكون اهم منه بس عشان واسع .
الشاب يبدو انه كاد العم ان يهزمه بالمنطق القوي لذلك حاول ان يتراجع : خلاص يا عمنا نحن نتصل بشرطة المرور وهم يجو يقدروا الحالة ... لكن يا عم انت غلطان .
العم : اتصل بالمرور وماتحكم بنفسك وما تكون انت الخصم والحكم وتعلق لي في انت غلطان ..
ويتصل الشاب بشرطة المرور فعلا .. ونسبة للزحمة في عز الظهر تتاخر سيارة المرور ويظل الاثنان يقفان امام سيارتيهما .. كل مره واحد فيهم يتجه ناحية سيارته يتفحص الاضرار ويعود لحوار من كان الغلطان .. يتصبب العرق ويشعر الاثنان بالعطش ..ويبادر الشاب بدعوة العم ناحية الكافتريا : تعال يا عمنا نروح الكافتريا نجلس في الظل ونشرب حاجة باردة على بال ما يصل المرور .
العم : كلامك صاح يا ولدي يلا ارح .
|
|
 
|
|
|
|
|
|
|
|
Re: أنت غلطان (Re: درديري كباشي)
|
ويتجه الاثنان ناحية كافتريا قرب التقاطع ويطلبا قارورتي عصير ..ويتحالف الاثنان فيمن سيدفع كعادة السودانيين في هذه المواقف وحوار من نوع ( لا والله خليها علينا المره دي ... ياخي انا العزمتك .. ياولدي انا الاكبر ... لكن انا عزمتك ..ما مشكلة ) الا ان يحسم الامر ويقبل الشاب ان يسدد العم قيمة العصير ..
ويجلس الاثنان في احد الطاولات متناولين مناديل ورقية لمسح العرق ..
يبدا العم استئناف الحوار : لكن ياولدي انت كنت سارح وين لامن صدمتني ..
الشاب : يا عمنا كيف اكون انا صدمتك وعربيتي مضروبة في الباب يعني هي العربية بتمشي بالجمبة ..
يبدو ان الملاحظة الاخيرة التي اكتشفها الشاب منطقية وخطيرة وكادت تحسم الحادث لصالحه ولذلك سريعا ما حاول العم قفل الحوار في هذا الموضوع .
العم : على رايك يا ولدي خلي الخبز لخبازه عسكري المرور خليه هو يحدد مين فينا الغلطان ولكن ما قلت لي انت من وين في السودان .. وما تعرفنا على كل حال قبل ما تقول انت انا عمك ابوزيد عبد الرحمن مغترب لي خمسة وعشرين سنة هنا في الرياض ولكن اهلنا في السودان من امدرمان ام بده بس جزورنا من شمال السودان ..
| |
|
|
|
|
|
|
|
|
|
Re: أنت غلطان (Re: درديري كباشي)
|
بينما كان الاثنان مشغولان بعمليات التعرف يلفت نظرهما عامل الكافتريا بان الشرطي وصل ويسال عنهما .. نزل الاثنان متجهين الى الشرطي .
الشرطي : وينكم يازوله تتصلون بالمرور ولا تنتظرون ..
العم : معليش سعادتك اصلا الجو حار ورحنا نشرب موية ..
الشرطي : ماعلينا خلونا في المفيد .. مين فيكم غلطان ولا تبون تتسامحوا ..
العم : طبعا ولدنا دا هو الغلطان لانه هو جاي داخل يمين ..
الشاب : كيف انا غلطان وانت صادم الباب ..
العم : ما انا حاولت اتفاداك .
الشرطي : ايش فيكم تتغالطون .. مين فيكم جايي من الشارع الشرقي ومتجه شمالا ..
العم : انا كنت متجه من الشرق انا في الشارع الرئيسي وهو مفروض يقيف ..
الشاب : يا راجل حرام عليك شارعي انا سيدين وفيه ترتوار في النص هو الرئيسي ..
العم : ياخي ما قلنا ليك سيب التقدير للشرطي .. وانت ما قلت لي وين سليمان خالك حاليا .؟؟؟.
الشاب : سليمان خالي في ليبيا ليه عشرين سنة ما رجع السودان ..
العم : هو في ليبيا من الزمن داك ما رجع نحن بنرجع كلا سنة تقريبا ..
كان طلعنا في فترة واحدة هو راح على ليبيا ونحن جينا السعودية ...
الشرطي مقاطعا : والله عجيب الحين نحن نسجل الحادث وانتم تتسولفون فين سليمان خالك وما ادري ايش.. وقسم اركبكم الاثنين هنا في الدورية وادخلكم الحبس يومين انت وهو .. انا اسالكم مين فيكم غلطان وانتم تتحدثون عن ليبيا .
الشاب : عفوا جنابوا ما كان قصدنا ..
الشرطي : وايش جنابه هادي كمان تبي تتريق ..؟؟
| |
|
|
|
|
|
|
|
|
|
Re: أنت غلطان (Re: ود الباوقة)
|
هههههههههههههههه حلوة يا دريري أنت الغلطان دي
تصدق من قريت العنوان جيت جاري وعرفت القصة فيها حوادث
وعشان كدا النحكي ليك القصة دي هواده سااي مني
الكلام دا قبل فترة قد تكون 10 سنوات كده
قال ليك كانت في مباراة هلال نصر مباراة نهائي
الشوارع فاضية والناس دي كلها بتابع في الكورة
اها العسكري الماسك النطبشية جاهو الاتصال الآتي:
المتصل: الو ... معنا حادث هنا ونبغى نبلغ عنه.. الله لا يهينك ترسلوا لنا دورية
العسكري: متابع الكورة وقال للمتصل طوااالي يا اخوي الأجنبي غلطان
المتصل: الاثنين اجانب ..
العسكري : أجل غلطان المصري 
شفته نسيتنا نسلم عليك هســي مع أنت الغلطان دي
تحياتي يا شاب
| |
|
|
|
|
|
|
|
|
Re: أنت غلطان (Re: درديري كباشي)
|
العم : عفوا سعادتك الولد طبعا جايي جديد من السودان وما متعود على لهجة الخليج ..
الشرطي : تبون تسامحون بعض ونشطب بلاغ الحادث ولا نكمل الاجراءات ..
العم : خلاص سعادتك نحن مسامحين بعض لكن اعطينا ورقة اصلاح عشان الورش تقبل تصلح السيارات ..
الشرطة : يلا اتفضلوا وحركوا سياراتكم ترى هي عملت ازمة في الشارع ..
ياخذ الاثنان ورقة الاصلاح من الشرطي ويقترح الشاب بان يركب العم معه في السياره لان سياراته اقل ضررا وممكن تتحرك اما سيارة العم لابد ان تحمل في شاحنة لان اللديتر تلف وتسربت المياه منه ..
وفعلا تم استدعاء السيارة الحمالة ( السطحة ) لتحمل السيارة المحطمة .. وركب العم مع الشاب متحركين ناحية المنطقة الصناعية مواصلين الحوار .
| |
|
|
|
|
|
|
|
|
|
Re: أنت غلطان (Re: درديري كباشي)
|
و ركب عم ابو زيد في سيارته مع عصام متجهين ناحية المنطقة الصناعية امام السطحة ومواصلين في الحوار ..
ابو زيد : اها يا عصام يا ولدي بتعرف ليك ورشة معينة نمشي عليها ..
عصام : ابدا والله يا عم لكن نمشي صتاعية ام الحمام من هنا قريبة ونتقاول مع اي ورشة السعرهم معقول نشتغل معاهم .
ابو زيد : وهو كذلك اها ما قلت لي يا عصام انت شغال وين ..
عصام : انا شغال مهندس في شركة الاتصالات ..
ابو زيد : ما شاء الله يعني مهندس مهندس ولا مهندسين الزمن دا ..
عصام : ما فهمت قصدك تقصد شنو ..؟؟
ابو زيد : الزمن دا السباك والميكانيكي والكهربجي كلهم يقولو ليك نحن مهندسين حتى واحدين قروا معاهد مصر ام ستة شهور ديك يقولوا نحن مهندسين ..
عصام : لا ولا يهمك ياعم انا خريج كلية الهندسة جامعة السودان هندسة الكترونيات ..
ابو زيد ايوا دا الكلام اها وساكن وين ..؟؟
عصام : نحن شلة حوالي خمسة مهندسين مؤجرين شقة في المرسلات وساكنين مع بعض ..
ابوزيد : ليه زوجتك ما معاك ( نظام دردقة )
عصام : ابدا ياعم والله انا لسع ما تزوجت ..
ابو زيد : خير يا ولدي ناقصك شنو ماشاء الله شايف وضعك كويس وعربيتك ماشاء الله جديدة طبعا قبل ما اكسرها ليك انا .
عصام : ضاحكا يعني بتعترف انه انت الغلطان ..
ابوزيد : انا الغلطان ولا انت الغلطان؟؟ .. انت جيت داخل الشارع غلط وبعدين انت ما اعترفت قدام شرطي المرور .. (ويبدو على لهجته الغضب) ... ولو سمحت نزلني هنا ما عاوز اركب معاك زاتو..
عصام : لا لا لا شنو ياعم زعلت نحن ما خلاص فرغنا من الموضوع دا وعشان ااكد ليك انا ما عندي مانع ادفع ليك تكلفة التصليح بعدين انت بعضمة لسانك اعترفت وقلت انت كسرت لي عربيتي .. ما تزعل ياعم نحن اهل وما بيناتا ..
ابو الزيد : خلاص معليش وعليك الله بلاش تجيب سيرة الحادث مرة ثانية عشان انا بتعفرت ..
عصام : ما عليك ياعم خلاص نحن قربنا من الصناعية اهو
| |
|
|
|
|
|
|
|
|
|
Re: أنت غلطان (Re: درديري كباشي)
|
الورشة
وصل عم ابو زيد وعصام المنطقة الصناعية والى ان وجدوا احدى الورش التي قدمت لهما عرض بانه سيارة عم ابو زيد صيانتها تحتاج لمبلغ الف وسبعمائة ريال مع قطع الغيار وسيارة عصام تحتاج لسبعمائة ريال .. مما حدا بعصام ان يعرض مبلغ الفين ريال للسيارتين مع بعض .. ويوافق صاحب الورشة ويطلب مقدم الف ريال دفعه عصام بعد مجابدات سودانية معهودة مع عم ابو زيد فيمن سيدفع . وحوار نوع انت دفعت حق العصير وخلي الصيانة علي .. وتحت انظار ودهشات العاملين في الورشة كيف يتعازم الناس على تكلفة صيانة الحادث وهم اصلا لم يجمعهم شئ سوى الحادث .. وحتى المجابدات بدات معكوسة تنم عن اصل السودانيين وسهولة ذوبان المشاكل بينهم بل بعض مرات استثمارها وتوجيهها في اتجاهات معكوسة وافضل .
قال العاملين بالورشة انه سيارة عصام ممكن تخلص بعد ساعتين اما سيارة عم ابو زيد الا في اليوم التالي لانها تحتاج لشغل ميكانيكي .
اصر عم ابو زيد انه ينتظر مع عصام صيانة سيارته رغما عن ان عصام أذن له بالذهاب على سيارة اجرة ولا شئ يرغمه على الانتظار .
طلب صاحب الورشة الشاي للرجلين واعد لهم كراسي جلسة مريحة حتى تخلص السيارة ليستمر الحوار .
| |
|
|
|
|
|
|
|
|
|
Re: أنت غلطان (Re: درديري كباشي)
|
عم ابو زيد : اها ما قلت لي يا ابني عصام خالك سليمان عندو كم جنا ..
عصام : والله يا عم خالي عندو على ما اعتقد اربعة ولدين وبنتين بس هو جاب البنات في الاول يعني البنات يكونن في الثانوي العالي الاولاد في المتوسط كدا ..
ابو زيد : وليه قلت تعتقد ليه انت ما شفتهم قبل كدا .؟؟.
عصام : طبعا يا عم المرة الوحيدة الرسلهم فيها اجازة السنة الفاتت وانا كنت هنا ما حضرتهم ..
ابو زيد : سبحان الله انا كمان عندي اربعة زي صاحبي خالك دا بس ثلاثة بنيات وولد واحد .. اها البت الكبيرة دي في الجامعة بتدرس الطلب .. اصلا هي شاطرة وجنها قراية من زمان .. والولد بعدها بيقرا اقتصاد في جامعة الخرطوم . اما الاثنين المعاي ديل هنا واحدة في اولى ثانوي والثانية في ثانية.. الظاهر عليهم ما هن زولات قراية شايفات نفسهن لبس ومكياج ..
عصام : تقصد شنو يا عم ما هن زولات قراية ..
ابو زيد : دا رايي انا فيهم يمكن انت لامن تشوفن يكون رأيك غير ولا ما كدا ..
عصام : انشاء الله .
ابو زيد : اها بالمناسبة دي ما تجي تتغدا معاي يوم الجمعة اقولك حاجة تعال انت واصحابك الاربعة ما مشتاقين لطبيخ البيت ؟؟..
عصام : لا خليني المرة الاولى انا اجي براي بعدين مرة ثانية اجيب اصحابي .
عم ابو زيد قال في نفسه : الولد طلع مصيبة عاوز هو يعزل في الاول بعدين اكان في نصيب تاني يكون بعده ...
عصام : سرحت وين يا عم ابو زيد ..؟؟
ابو زيد : لا ما في حاجة ما تشغل نفسك ..
| |
|
|
|
|
|
|
|
|
|
Re: أنت غلطان (Re: الصادق سيكا)
|
عصام : سبحان الله رب ضارة نافعة يعني هسع لو ما صدمتني يا عم ابو زيد ما كنا اتعارفنا ..
ابو زيد : صدمتك شنو ؟؟ انت الغلطان لانك داخل شمال ..
عصام : ياعمي انت صدمتني من الباب يعني انت الغلطان ..
ابو زيد وبدا صوته يرتفع : ياخي قلنا ليك حكاية الشارع سيدين ما بتحدد اهمية الشارع ..
عصام : خلاص خلاص يا عم ابو زيد انا الغلطان المهم انا عربيتي جهزت يلا ارح عشان اوصلك ..
ابو زيد : يلا ارح انت عارف بيتنا بوين غبيرة جمب كبري الحديد اول شارع عمار بن ياسر ..
عصام : لا وصفك واضح مافي مشكلة ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وصل عصام عمه ابو زيد لبيته حسب الوصف بحي غبيرة
وتوادع الاثنان على الامل اللقاء بعد يومين في يوم الجمعة وقت الدعوة المزعومة..
عم ابو زيد يوصف لابو زيد : شايف يا عصام ولدي العمارة ديك اقدام الجامع طوالي
اها الشقة رقم تلاتة ياها شقنتنا حا نستناك يوم الجمعة ..
عصام : ابشر يا عم انشاء الله يومين واكون معاكم .
يدخل عم ابو زيد العمارة . شكلهه مترب ويديه فيها زيت محروق من اثر السيارة وحالته فيها قليل من البهدلة ..
تستقبله أم العيال :
يا راجل مالك اتاخرت كدا خير ومالك ######ان في شنو يا ابوي ..أجي ..؟؟
ابو زيد ياولية أصبري خلينا ناخد لينا نفس ..
أااهها غايتو الحمد لله بس نقول شنو ..
- في شنو يا راجل قطعت قلبي ؟؟
يا ولية مافي حاجة حصل لي حادث لكن رب ضارة نافعة ..
-حصل ليك حادث ورب ضارة نافعة ؟؟؟؟ خير العربية نعلها ما اتكسرت ..
ابو زيد : هو دا بس الهاميكي ..
-أحا عا يهمني شنو تاني انت وشكلك ياكا ما معوق تاني شنو ممكن يجي من الحادث ..
ابو زيد : ممكن يجي منو عريس ..
-شنو ؟؟؟؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
وفي بيت العزاب يدخل عصام على اصحابه ..
- شنو يا ابو الشباب اتأخرت كدا مالك؟؟ كنا منتظرنك بالغدا لغاية الساعة تلاتة .
عصام : ولا يهمكم يا شباب انا حصل لي خادث اتحول لفلم هندي ..
عماد : شنو فلم هندي كيف صدمت هندي يعني ؟؟
عصام : لا ابدا والله صدمت واحد سوداني كبير في السن ... يازول حق الله بق الله وتعارف طلع راجل فردة خالي سليمان الفي ليبيا من عشرين سنة ما اتقابلوا ..
المهم الموضوع جر وشكله حا يجر لسع ..
خالد : يا اخوي روح اخد ليك دش وغير هدومك ديل وتعال احكي لينا فلمك الهندي دا برواقة كدا ..
وفي بيت عم ابو زيد يبدو انه حكى القصة لزوجتها ..
لانها بدأت تتبسم وتسرح .. وكل مرة تدعوا بدعوة مبتورة من نوع ....يااااااااارب..
| |
|
|
|
|
|
|
|
|
|
Re: أنت غلطان (Re: garjah)
|
| Quote: وبعديييييييين معااااااااااك؟؟؟؟ |
سلام يا قرجة
خليك معانأأأأأأأأأأأأأأأأأأأأأأأأأأأأأأ
| |
|
|
|
|
|
|
|
|
|
Re: أنت غلطان (Re: خضر صيام)
|
| Quote: سرد يجسد اصل وطيبة اهل السودان |
يا سلام عليك يا خضر
نحن عندنا قدرة لتحويل المصائب لافراح
بس يدونا فرصة
| |
|
|
|
|
|
|
|
|
|
Re: أنت غلطان (Re: درديري كباشي)
|
في بيت عم ابو زيد تستعجل ام العيال مشاهدة العريس المرشح وترى انه يوم الجمعة بعيد ولا تستطيع الصبر وتقترح .
انت يا ابزيد ما تقول للولد دا يجي يسوقك الورشة تجيب عربيتك الليلة الخميس دا وبالمرة يشرب معانا شاي المغرب
ابو زيد : يا ولية انت مجنونة انا ساكن في غبيرة جنوب الرياض اقول ليه تعال من المرسلات شمال الرياض وديني الورشة ؟؟ عايزة يقول من هسع بدينا نستقله كمان ؟؟
ام : العيال نستقله هو نحن عندنا معاه شنو ما زول كسر لينا عربيتنا ..
ابو زيد : ما كفاية دفع تكلفة الصيانة ؟
ام العيال : هوي ما دفعها كلها دفع نص بس وبعدين نحن عايزين يزورنا ما بنصبر لغاية يوم الجمعة كمان يقوم يشوف ليه شوفة تانية ..
ابو زيد : يا ولية انت عايزة تجنينا هو شاف ليه شوفه اولى اولا لامن يشوف ليه شوفه تانية ..
ام العيال : المثل ما قال ليك العاوز يشوف فاطنة يعاين لمحمد ابوها ؟؟
ابو زيد : يا ولية اختشي عايزة تتغزلي فيني بعد العمر دا كمان ..بعدينن بيقولوا محمد اخوها ما ابوها ..
ا\ام العيال : بعد تأخذ تنهيده طويلة وبصوت منخفض : الراجل عاوز يفقع مرارتي .. اتغزل فيه شنو عامل راسو المظعمط دا كمان ..؟؟
ابو زيد : قلتي شنو يا ولية ؟؟
ام العيال : ما قلت حاجة بتكلم مع نفسي ما اتكلم كمان ؟؟
ابو زيد متبرما : اتكلمي وانشاء الله ما تلاقي زول غيرها تكلميه ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وفي بيت العزاب ..
عصام : ياخ ما قلت لي يا عماد اتصل على عمك اقول ليه اجي آخدك بكرة للورشة تجيب عربيتك ؟؟
عماد : ياخي ما تبطل الخفة دي يا عريس..
عصام : ياخ عريس شنو انت كمان عملتني عريس من هسع هو نحن شفنا حاجة ..
عماد : ايوا فرصة تعال نمشي ليه سوى ..
عصام : تشموا شنو انت خليك هنا انا بس امشي اول ..
عماد : ياخي ما تخلي انانيتك دي يمين انا امشي اقنص لعمك دا بعربيتي ادقشو تاني ..
عصام : ياخي انا حا اضرب ليه تلفون ما حانخسر حاجة لو اعتذر ما في حل غير الصبر لغاية يوم الجمعة..
يتناول عصام تلفونه ويتصل ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وفي بيت عمك ابو زيد يرن تلفون ابزيد ..
يرد ابزيد : الو ؟؟؟ منو معاي ؟؟؟ اهلا يابني عصام كيف صحتك يابني ..
تسمع ام العيال الاسم تجري للتصنت .. وتحاول ان تملي زوجها الردود بالغة هي لا تستطيع ان تقول عليها لغةة الاشارة لكن دعونا نسميها لغة ( الوحوحة)
ابزيد :آآآي يا بني ... تجي توصلني الورشة ؟؟؟ لييه تكلف نفسك يا بني مافي داعي ..
في هذه اللحظة ام العيال تكاد تصرخ . وهي تحس زوجها ان يقبل هذه الفرصة التي جاتهم مدردقه . تارة بالاشارة وتاة بهز الرأس .. وهو ينغاتت عليها يتظاهر بانه لايريد ان يكلف الولد .. لكنه كان ينتظر هذه الفرصة ..
ويبدو من الطرف الآخر انه عصام كان يلح هو الآخر يتشوق لهذه الفرصة ..
واخيرا يتفق الطرفان ان يمرهم عصام غدا العصر ويأخذ ابو زيد للمنطقة الصناعية ثم يعود الاثنان ليشربا شاي المغرب..
تفرك السيدة حرم ابو زيد يديها فرحا بنجاح مخططها ..
كما يفرك عصام من الطرف ىلآخر يديه فرحا بنجاح مخططه ..
| |
|
|
|
|
|
|
|
|
|
Re: أنت غلطان (Re: درديري كباشي)
|
في بيت ابو زيد تنادي الام العيال بناتها
وتقول لهم يابنات بكرة جايينا ضيف مهم عايزاكم الصالون دا تخلوه قصر ..
يلمع غيروا المساند ركبوا الستائر الجديد انفضوا السجاد ..
نسمه وبسمه بنتين شبه توأمين يفرق بينهما عام واحد
| |
|
|
|
|
|
|
|
|
|
Re: أنت غلطان (Re: درديري كباشي)
|
في اليوم التالي اي يوم الخميس الموعود
عصام من بعد الغداء بدأ يعد نفسه يستحم ويصفر
وصديقه عماد : انت يا اخوي انت فرحان كدا ايمكن يطلع كرت ضارب ولا حاجة ..
عصام : يا اخوي المثل يقول لو عاوز تشوف فاطمة عاين لمحمد ابوها
عماد : أخوها ما قالوا ابوها ..
عصام : المهم زول قريبها ..
عماد : يعني نفهم من كدا عمك طلع راجل وجيه ..
عصام الظاهر عليه في شبابه لانه طويل القامة وشعره ناعم رغما عن الصلعة بيغطيها بالشعر الناعم عيونه كبيره رغم نضاراته قعر الكباية دي ..
عماد : طيب فضل شنو بعد البلاوي دي كلها تقول وجيه ..
عصام : المهم انا ما راح اخسر حاجة لانه في النهاية انا ماشي ابيع ما ماشي اشتري ..
عماد : يا اخوي تشتري شنو وىتبيع شنو حيرتنا معاك ذاتو ....
عصام : انا قصدي ماشي اقدم خدمة بدون مقابل ولو لقيت الجو مظبوط امشي في الموضوع ولو الكروت طلعت ضاربه على الاقل اكون عملت عمل ابر بيه خالنا مش قالوا الخل والد ..
| |
|
|
|
|
|
|
|
|
|
Re: أنت غلطان (Re: عبد الله كسلا)
|
غايتو بالغ معاى شددددددددددددددددددددددديد
قربت اقطع تذكره اسافر السعوديه افتش على الجماعه واعرف الحاصل
:((((((((((((((((((((((((((((
| |
|
|
|
|
|
|
|
|
|
Re: أنت غلطان (Re: درديري كباشي)
|
قديت عيونا ياخي ..
أوع بعد دا كلو تجي تطلع لينا الولد غلتان ؟
إن سويتا الناس دي بتقابلك بالمراكيب ..
اتصرف ـ أهو أنا كلمتك .
| |
|
|
|
|
|
|
|
|
|
Re: أنت غلطان (Re: محمد على طه الملك)
|
Quote: قديت عيونا ياخي ..
أوع بعد دا كلو تجي تطلع لينا الولد غلتان ؟
إن سويتا الناس دي بتقابلك بالمراكيب ..
اتصرف ـ أهو أنا كلمتك . |
سلام يا ملك
ما عليك شكلك كدا نائم ليك على قدر من الجكس لابأس به
رايك شنو نزوغ عصام من ابوزيد ونحوله عندك بعد ما نطلعه غلطان كمان ..
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: رايك شنو نزوغ عصام من ابوزيد ونحوله عندك بعد ما نطلعه غلطان كمان .. |
ههههه ..
ماك خايف من ناس ود الباوقة الجو صنقرو من الفجر ؟
| |
|
|
|
|
|
|
|
|
|
Re: أنت غلطان (Re: محمد على طه الملك)
|
Quote: ههههه ..
ماك خايف من ناس ود الباوقة الجو صنقرو من الفجر ؟ |
لا لا لا ما عليك ود الباوقة نازل من زمان وماسك كرت صغير كان قبضوه بيه ما مشكلة ... يعني هو ما منزعج من الناحية دي ..
| |
|
|
|
|
|
|
|
|
|
Re: أنت غلطان (Re: درديري كباشي)
|
في يوم الخميس في بيت ابو زيد تستيقظ ام العيال مبكرا ( قبل الظهر) على غير عادتها .
وتبدأ في تحضير مكونات صناعة الكيك .. فهي لاتحبذ ان يشتري ابو زيد هذه الاشياء الجاهزة حتى تبرز قدرتها في صناعتها ..
وهي تعلم ان ابراز هذه القدرات هو جزء من لعبة توليف القلوب بالنسبة للعرسان المرشحين او المشرشحين ..
توقظ ابو زيد رغما عن انه يوم الخميس اجازة الا انها تطلبه ان يروح هايبر ماركت باندا ويحضر لها مكونات خبز الكيك ..
هو ينقنق كسلان : ياخي الحاجات دي ما راقده في البقالة ..
- ياخي البقالة حاجاتها قديمة وانا عاوزة حاجات ما في في البقالة
عايزة روح موز وروح تفاح وروح ..
يقاطعها : يا روح ما بعدك روح ..
- روح يا راجل خلي اليوم دا يعدي على خير..
- هوم يوم عادي لكن انتي عاوزة تحوليه لشنو ما عارف ؟؟؟؟ ولد عرفناه أمس بالصدفة وفي حادثة ..
-يا راجل المثل بيقول لك اخطب لبنتك وما تخطب لولدك ..
- ما في مثل بيقول اخطبي لزوجك ما تخطبيى لولدك ؟؟
- ها ها ها دمك خفيف لكن امشي يا راجل ما تفقع لي مرارتي ..
يحضر عم ابو زيد كل الاغراض وبعد ساعة تستيقظ البنتان على رائحة الكيك الشهية التي عطرت الشقة بل قل كل العمارة..
وتهرعان نحو المطبخ :
نسمة : ماما في شنو اليلة عيد ميلاد منو ؟؟
بسمة : ماما انتي ما عيزة تقولي لينا مين الجايي الليلة ؟؟
أم العيال : واحد صاحب .............. اختشت تقول صاحب الاب ....؟؟ وقالت صاحب عموري ( ولدها الذي عمار يدرس الجامعة بالسودان),,
نسمة : وصاحب عموري ليه يجي وعموري مافي ؟؟
أم العيال بغيظ : يابنات هو جايينا وخلاص نقول ليه ما تجينا عشان عموري مافي ؟؟ أمشن غيرن وجهزن حالكن وسرحوا شعركن دا كويس عشان كلنا حانقعد معاه ونشرب الشاي مع بعض ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وفي بيت العزاب
تجهز عصام العريس المرتقب بعد ما ارتدي بنطول الجينز وقميص كاروهات قصير الاكمام جدا ومحزق يبرز عضلات الزراعين والصدر كموضة هذا الزمن
وبخ نفسه بنصف فتيل عطر
وتجاهل رغبة صديقه عماد في مرافقته ..
عماد : يا عصام يعني ما عاوز تاخذنا معاك زهجنا ياخ من جو العزابة عايزين نشوف لينا بيت عوائل نشم فيه ريحة السودان ..
عصام : قوم يا راجل بلا لبط معاك هو انت كل يومين بايت مع ناس أختك ..
عماد : والله انت راسك قوي ما عارف يجيبوك كيف .زاتو .؟؟
عصام يضحك وهو خارج : ما عندك مشكلة يا صاحبي خلينا اروح اكشف ليك الجو المرة الجاية نروح سوى بأذن الله ..
عصام في باله فكرته الخبيثه هو عايز الخيارات تكون كلها امامه هو لوحده بعد ذاك ما عنده مانع انه صديقه ينزل بالبايظ بتاعه كما يقول ناس الكتشينة ..
وبعد ساعة في بيت عم ابو زيد ..
| |
|
|
|
|
|
|
|
|
|
Re: أنت غلطان (Re: Nader Abu Kadouk)
|
Quote: درديري جهجهتنا....
ازيك ......... |
نادر والله سك شد\يد
يعني المسافة بين المرسلات وحي غبيرة يمكن تكون حوالي عشرين كيلو متر او اكثر بالدائري تاخذ ليها ساعة كاملة
خلونا ناخذ نفس نوصل الراجل دا ما يعمل حادث كمان
| |
|
|
|
|
|
|
|
|
|
Re: أنت غلطان (Re: درديري كباشي)
|
في بييت ابو زيد تصر الام على بناتها ان يلبسن ملابس جميلة ويتزينن لاستقبال الضيف الجديد ..دون ان تقول لهن لماذا ومن يكون القادم ..
سلوك طبيعي من ام سودانية تريد ان تعرض بناتها دون تسبب لهن صدمة او عقدة اذ لم يكن ضمن هوى العريس المرتقب .
فضول البنات لم يهز الام ويجعلها تصرح بهوية الضيف وسبب الاهتمام .. والاسرة بعد ان اعدت حالها
جلست اسرة ابو زيد المكونة
من زوجته وبنتيه في الصالون
يتظاهرون بمشاهدة التلفزيون
ولكن قلوبهم معلقة بجرس الباب
البنات زاد فضولهن اهتمام والديهما
بعد قليل يرن الجرس ..
الآم كانها تؤدي دور في مسلسل او تقرأ في سيناوري مكتوب ومتوقع .
الام : يا بت نسمة قومي افتحي الباب .
تتلفت البنت باندهاش : يا أمي بسمة هي الاصغر مفروض هي تفتح الباب ..
طبعا الام في تفكيرها وحسب العرف وايمانها بالحب من اول نظرة لاتريد الصغرى ان تكون هي المتقدمة فتقع في حب العريس من اول نظرة وتبور الكبرى
صحيح هم عندهم بنتهم البكر التي تدرس الطب في السودان .. لكن تلك هي من اختارت طريقها بنفسها .. ويامى تقدم لها العرسانن وهي في مرحلة الثانوي لكنها اصرت على تكملة مشوار الدراسة دون ازعاج نفسها بزواج وغيره .. فهي الاخرى كانت واثقة من جمالها الأخاذ لذلك لم تستعجل الزواج ..
اما هاتين فلابد ان تفوز واحدة منهن بهذا المهندس الجاهز الذي ساقته لهن الظروف ..
الام : يابتي ما تعاكسيني .,. اها انا بس قلت انتي تفتحي الباب ومصرة ... بسمة ما بتفتحوا ..
بسمة : خلاص يا امي عادي انا بفتحو ..
الام : لا والله ما بتقومي من محلك دا خليها هي تفتحو ..
ابو زيد : يابنات الزول مشرور في الباب يمكن يمشي خلوه انا بفتحو..
نسمه : خلاص يا بابا انا بفتحه ..
بسمة كما قلنا هي الاكبر والاجمل قصيرة نوعا ما مقارنة بأختها الاصغر وجسمها ممتلئ واسعة العينين ( كاحلة بلا كحل كماا يقول اسمعين حسن),,
تقدمت وفتحت الباب ..
في هذه اللحظة كان عصام مركزا على الباب بعد ما طرق الجرس مرتين قرر ان ينصرف لكن كأنك هنالك قوة سمرته بالارض ..
ارتفعت ضربات قلبه عندما سمع صوت كركبة قفل الباب ..
وأخيرا يفتح الباب فعلا
يتبع .
| |
|
|
|
|
|
|
|
|
|
Re: أنت غلطان (Re: درديري كباشي)
|
وقف عصام طبعا مندهشا مدهوشا منشدها فاغرا فاه وكل الجمل العربية التي تصف شخص واقف امام شئ لم يكن يتوقعه
اتعشى واجيكم
| |
|
|
|
|
|
|
|
|
|
Re: أنت غلطان (Re: امير الامين حسن)
|
Quote: رعم الحوار والسرد المتناغم
تبقى القصة نمطية فى بنائها |
لا توجد في الدنيا قصة نمطية
لان النمط يعني التكرار على وتيرة واحدة ..
ولا توجد قصة متكررة .. لان كل شخص عاش هذ الدنيا هو عبارة عن قصة قائمة بذاتها وتختلف القصص كاختلاف بصمات الاصابع ..
ولكن هنالك شخصيات نمطية ..
كشخصيات بت قضيب والعم كركوب التي كان يؤديها الراحل الفاضل سعيد .. وهو شخص بشكل معين في مواقف مختلفة ..او سيد جرسة او هرباش ..
قد تعني انت ان القصة لم تحرك فيك دافع الفضول والتشويق .. وهذه مسألة نسبية .. تختلف من شخص لآخر ...
والبورد ملئ والحمد لله وانشاء الله ستجد فيه ما يرضيك ..
| |
|
|
|
|
|
|
|
|
|
Re: أنت غلطان (Re: درديري كباشي)
|
أبو الدرادر
على أقل من مهلك ،،، ما تشتغل بالجماعة المأجرين عجلات ديل
المستعجلين ليها شنو ما عارف
نحنا عجلاتنا ملك حر
ومستمتعين للطيييييييييييييش
حبة حبة
الون قو بسوي عشراقة
ويديك ألف عافية
| |
|
|
|
|
|
|
|
|
|
Re: أنت غلطان (Re: درديري كباشي)
|
خلاص نقول بيت مال وعيال ولّ فيها (مفاجعات) ؟
Quote: بسمة كما قلنا هي الاكبر والاجمل قصيرة نوعا ما مقارنة بأختها الاصغر وجسمها ممتلئ واسعة العينين ( كاحلة بلا كحل كماا يقول اسمعين حسن),,
|
احلف إنت ما عماد جيت ساكي صحبك؟ هههه
يا درديري بصراحة دا سيناريو بى حلقاتو كمان ..
مناسب وجاهز بس ياريت ...
.
.
أها ....
| |
|
|
|
|
|
|
|
|
|
Re: أنت غلطان (Re: محمد على طه الملك)
|
| Quote: حلف إنت ما عماد جيت ساكي صحبك؟ هههه |
هوي يا ملك انت عاوز تجيب لينا الهوى ولا شنو ؟؟
انت عارف انه المنتدى دا فيه جراد الكتروني منزلي
يعني زي الذباب المنزلي وكدا ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وبالفعل يخرج عم ابو زبد وعصام بالسيارة متجهين الى الصناعية
وفي البيت تنفرد البنتان بامهما وتحاصرانهاا بالاسئلة ..
نسمة : ماما في ذمتك دا منو الولد الجاناا دا ..
بسمه : واضح انه لا بيعرف عموري أخوي ولا جاب سيرنه طيلة القعدة ..
الام تحس بالحصار وتحاول ترد حتى تتفرق لهواجسها عن النتيجة المترتبة على نهرة زوجها الارعن للشاب في موضوع منتهي ومحسوم ..
يا بنتي الولد دا هو العمل حادث امس مع ابوك . وابوك بالصدفة طلع انه هو و خاله كانوا اصحاب زمان أها حصل التعارف ..
التعريف المختصر لم يفسر للبنتين الاهتمام الزائد ولا الحلويات ولا اللبس والتي لا تقدم عادة للضيوف العابرين او العاديين .
لكن سكات الام يعني بانها لا تريد ان تفصح عن المزيد .
تقوم البنت الكبرى نسمة بذكاء محاولة جرجرة الام : بس ما شاء الله ولد وسيم جدا ...
ينجح الفخ اذا تبتسم الام ابتسامة مشرقة تفصح عن مكنونها : صحي عجبك يا بنتي ..؟؟
نسمة : يعني لكن ما شاء الله وشغال شنو هو يا امي ..
تتشجع الام بسؤال البنت وتستعد لمزيد من الافصاح : يابنتي دا مهندس قدر الدنيا في شركة الاتصالات
( وهل هنالك مهندس قدر الدنيا وآخر قدر الاخرة لكنها طريقة الامهات للترويج وقيادة رغبات الابناء لتجري في نفس مجرى الوالدين .)
تتدخل نبسمة الاخت الصغرى : يعني يا ماما خلاص بفى يعرفنا وحا يجي يزورنا تاني على طول ؟؟؟وتتبسم بخبث وهي تنظر ناحية اختها التي ابدت مزيدا من الاهتمام ..
الام : انشاء الله يا بتي اكان ما بقى زعل من نهرة ابوك الماكان ليها داعي دي ..
بسمة : آىي صحي يا امي ليه يقول لابوي انت الغلطان ..
تتدخل البنت الكبرى مدافعة : ما صحي يمكن ابوي هو الغلطان ماا حادث مرور ما شكلة يعني اي زول ممكن يغلط ..
الام مبتسمة ومسرورة من دفاع بنتها : تسلمي ياا بتي حادث مرور اي زول بيكون سارح وممكن يعمل حادث هو ما غلط يعيب ليه زول يخلي ابوك يزعل بالطريقة دي ..
| |
|
|
|
|
|
|
|
|
|
Re: أنت غلطان (Re: درديري كباشي)
|
غايتو يا درديرى حسرتى ياخى على يتمى من بدرى
حسى ابويه الله يرحمه لو كان فيه وبعج له عربيه مش كان اتخارجت
:(((((((((((((((((((((((
غايتو الاخوان ما ملحلحين زى الاباء
| |
|
|
|
|
|
|
|
|
|
Re: أنت غلطان (Re: رانيه محمد الشيخ)
|
Quote: غايتو يا درديرى حسرتى ياخى على يتمى من بدرى
حسى ابويه الله يرحمه لو كان فيه وبعج له عربيه مش كان اتخارجت
:(((((((((((((((((((((((
غايتو الاخوان ما ملحلحين زى الاباء |
الله يرحمه يا رانيا
هم التعساء المفلسين العمايا
لكن حتما المحظوظ صاحب النصيب موجود بدون حوادث
| |
|
|
|
|
|
|
|
|
|
Re: أنت غلطان (Re: خالد عبدالوهاب)
|
غايتو يا خالد احتمال ادقش من البحلقه ساى
لكن مره مره بتجينى افكار زى دى
تانى بتراجع
حسى لو دقشته وطلع معرس
اقول يا منو
تبقى عليه عنوسه وفلسه
:))))))))))))))))))))
| |
|
|
|
|
|
|
|
|
|
Re: أنت غلطان (Re: رانيه محمد الشيخ)
|
نواصل
في طريق الى الصناعية
وعم ابو زيد راكب مع عصام في سيارته
محاولا ان يجد تعبيرا لائقاا يعتذر به عن لعصام عن تصرفه غير المبرر ونهره امام اسرته
عصام يقتله الفضول ليعرف ما الذي اثار حفيظة عم ابو زيد من عبارة انت الغلطان وحولته لهذه الحالة الجنونية .
يبادر ابو : معليش يا ولدي ما ـآخذني قبلي هجت فيك ..
عصام : لا لا يا عم ولا يهمك انت والله في مقام ابوي ..
عم ابو زيد : شكرا يا ولدي والله دا كان العشم عارفك ما راح تزعل ..
عصام كان يمهد للسؤال التالي بعد ان ضمن هدوء عم ابو زيد .ز
عصام : بس محيرني يا عم ابو زيد ليه عبارات انت غلطان قدام اولادك زعلتك كدا في حين نحن لحظة الحادث اتبادلناها اكثر من مرة وكنت عادي جدا ..
ابو زيد : يا عصام يا ولدي دي قصة طويلة عاوز ازحمك بيها هسع ....
عصام يزداد عنده الفضول : يعني حاتزعجني كيف ان عرفت الموضوع وراه قصة .
| |
|
|
|
|
|
|
|
|
|
Re: أنت غلطان (Re: رانيه محمد الشيخ)
|
ما عليك يا نجمة النجمتين ديل لزوم رفع البوست وكدا كنت طالع مشوار بعدين انا ما عندي اخلاق اقعد اقلب في الصفحات شغال بنظرية الفاتك فوتو .. يعني اي موضوع يلحق يروح الصفحة الثانية مع السلامة تاني ولا بههبو ليه ..
| |
|
|
|
|
|
|
|
|
|
Re: أنت غلطان (Re: درديري كباشي)
|
يشعر ابازيد بجرجرة عصام له ليعرف سبب عقدته من عبارة انت غلطان .. ولكنه لا يسقط في الفخ ..
ابو زيد : يابني دي قصة قديمة وما في داعي لذكرها خليها في يومنا ..
عصام في نفسه : ماشي يا عم لكن انا لازم اعرف سبب العقدة يوما ما ..
عصام : اها قربنا على الصناعية انشاء الله تكون عربيتك جهزة ..
وفعلا امام الورشة يقابلهم الفني ويعتذر بانن السمكرة خلصت لكن البوهية لسع ما ضربوها ..
يسخط ويسب ابو زيد .. ولكنه في ذات الوقت كان مرتاح للقرار هذا معناه سيرجع مع عصام مرة ثانية ويمكن يعالج غلطته ويرفع عنه الزعل الذي سببه .
لكن طبعا لازم يظهر شوية رتوش فقال : خلاص يا عصام يا ولدي انا ما راح اشغلك برجع بلموزين انت امشي مشوارك لاختك ..
وعصام نفسه ما صدق ان فرصة الرجوع عادت له من جديد بعد ان رمى دون مناسبة حكاية زيارته لاخته حتى يبرر غضبه من نهرة عمه ....
عصام : لا لا لا كيف لازم ارجعك ومشواري ما ضروري اليوم ممكن نخليه لبكرة ..
ابو زيد : بكرة كيف انت نسيتت دعوة الغدا معانا ولا شنو ..
يضحك عصام بعد ان شعر بأن المياه عادت لمجاريها .. وعادت له الفرصة في التمعن في النجفة من جديد هكذا حدث نفسه ..
لا لا ما مشكلة ياعم ممكن نروح لها بعد المغرب ..
خلاص المهم الان نرجع البيت ..
اما عم ابازيد يتصل بزوجته ليبشرها برجوعه مع عصام على الاقل يوقف سلسلة سخطها عليه ..
الامم تبشر بناتها بأن الجماعة راجعين ..
تجري الكبيرة نسمة نحو غرفتها وتبدأ في اعادة تزيين نفسها .. في الاول كانت تتزين بناءا على اوامر امها لسبب لا تعرفه .. اما الآن فهي تعرف السبب ولا تنتظر أوامر من احد ..
تتريق منها اختها وتقول لها : اها عرفة من متين كدا قمتي تتكبكبي ..
| |
|
|
|
|
|
|
|
|
|
Re: أنت غلطان (Re: درديري كباشي)
|
Quote: لا توجد في الدنيا قصة نمطية
لان النمط يعني التكرار على وتيرة واحدة ..
ولا توجد قصة متكررة .. لان كل شخص عاش هذ الدنيا هو عبارة عن قصة قائمة بذاتها وتختلف القصص كاختلاف بصمات الاصابع ..
ولكن هنالك شخصيات نمطية ..
كشخصيات بت قضيب والعم كركوب التي كان يؤديها الراحل الفاضل سعيد .. وهو شخص بشكل معين في مواقف مختلفة ..او سيد جرسة او هرباش ..
قد تعني انت ان القصة لم تحرك فيك دافع الفضول والتشويق .. وهذه مسألة نسبية .. تختلف من شخص لآخر ... |
فى ظنى ان البناء يشمل الشخوص واللغة ..الخ
وكذلك النمط لا يعنى التكرار إنما يعنى النوع ..اى نوع القصة التى تتشابه مع غيرها
فى طريقة السرد .. الحراك داخل العمل ...وغيرها ... تشابه قد يقودك الى رسم
نهاية الاحداث قبل قراءة النهاية
| Quote: والبورد ملئ والحمد لله وانشاء الله ستجد فيه ما يرضيك . |
الاهم ان شاء الله ما نكون زعلناك
تحياتى
| |
|
|
|
|
|
|
|
|
|
Re: أنت غلطان (Re: امير الامين حسن)
|
ماشي يا امير شكرا على عودتك .. ونتمنى نتلاقى في مكان آخر نناقش معرفتك بهذه الناحية عسانا نستفيد منك ...
او نفتح بوست منفصل نناقش فيه الفرق بين القصة والرواية والسيناريو والمسرحية .ز
ياريت نحلل نصوص مقروءه مثلا ليوسف السباعي ااو نجيب محفوظ او احسان عبد القدوس..
مثال بعض الروايات بنية لتشرح فكرة العنوان نفسه للرواية ..
مثلا رواية نحن لانزرع الشوك ليوسف السباعي ..
الكاتب يحاول انن يثبت عبر سيرة حياة طويلة لبطلة القصة ان القدر خط لها طريق الانحراف في حياتها دون ان يترك لها فرصة التوبة ..
وليصل لهذه النقطة مرت سيدة بعدة احداث كانت تقاوم الانحراف في كل مرة تحاول ان تعيش حياة نظيفة ..
الا انها تجد الظروف ترميها في طريق الدعارة في كل مرة ..
هلل هذه القصة انت ستسميها نمطية لانك بناءا على العنوان تسنطيع ان تتنبا بنهاية كل طريق تمشي فيه سيدة لانن الشوك دائماا في طريقها ؟؟
ثم ما تقصد البناء اللغوي ..
هذا ليس اسلوب مبتكر حتى الراحل الطيب صالح كان يدير الحوار باللغة الدارجية والربط بين الجمل والشرح بالفصحى .. وهذا ما اكسب كتاباته الوقعية التي اشتهر به .. وهذا اصبح اسلوبا سائدا عند معظم الروائيين العرب .
| |
|
|
|
|
|
|
|
|
 Re: أنت غلطان (Re: درديري كباشي)
|
يا الدرديري .. خلاس الحكاية إنتهت على كده ؟؟
يعني إنت قاصد النهاية تكون مفتوحة ونحن نتمها خيال ..
الجماعة ديل لسه في الصناعية ... والبنات في البيت آخر كبكبة ..
عموماً ده إقتباس من الفيسبوكاب الفي المدرجات الخلفية ... الروحهم حرقتم ..
| Quote: يا جماعة واحد يرفع البوست دة الزول دة قال ما برفعو |
ومسؤولين من الخير .... رانية مشت وين ؟؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
يعود ابو زيد بصحبة عصام الى البيت من جديد
وهو لا يدري هل من حسن الحظ او سوءه الا تكون سيارته قد جهزت
في يوم يبدو فيه اضطراب بين سوء الحظ وسوءه الا يدري منهما ايهما اولى بالموقف ..
قليل ويطرق الباب
تجري البنت الصغرى لتفتح الباب هذه المرة ..
لم تقاطعها الام او تمنعها بعد ان ايقنت ان خطتها الاولى قد مرت ..
ويظهر لها بالباب والدها ..
وتتسرع بسمة بالسؤال : عصام ما رجع معاك لييه ؟؟
ارتبك العم ابو زيد قبل ان يظهر عصام من خلفه ..
شدته هذه الاريحية وهذه الاسرة التي عرفها من ساعتين وتعلقت به كما تعلق بها ..
هو كان من الممكن ان ينزل عم ابازيد في الشارع امام بيته ..وينصرف الى مشواره او حال سبيله
وبلكن دون وعي وجد نفسه يتبعه حتى باب شقته وحتى دون دعوة منه ..
ويصل الباب يجد الجميع متوقع ومنتظر لعودته .
وهذا ما عبرت عنه هذه الزهرة الصغيرة ..
ويتمنى لو كان هذا هو شعور زهرة الشمس الاخرى
والتي قد حان قطافها ..
او تركها في غصنها ..
تشرق له في كل صباح ..
وتدور معه حيث يدور
كما تدور زهرة الشمس مع الشمس ..
كل هذه الخواطر دارت في زهن عصام وهو يتبع البنت الصغرى واباها دخولا الى البيت .ز
ويتلفت في لهفة ظاهره
لم يعد يستحي من كشف غوارها .
وحتى بعد ان دخل الصالون لم يرى نسمته التي تعلق بها ..
الا بعد ما سمع جملة من خلف ظهره تقول : بتندور على حاجة ..؟؟؟
يلتفت ليجد نسمة بابتسامتها المشرقة والتي تنتزع منه ابتسامة تكاد تبرز ضريس العقل منه ..
كاد ان يقول لها ادور عنك انت ... لولا الجمه الحياء ..
واكتفى بالابتسامة ..
| |
|
|
|
|
|
|
|
|
|
Re: أنت غلطان (Re: درديري كباشي)
|
ابو زيد مع زوجته في المطبخ والتي تسأله من باب الفضول .
-عصام مالو جا راجع معاك ما قال ماشي لاختو .؟
ابو زيد : عربيتي لسع ما اتصلحت ..
قالت دون وعي : بركة .
ابو زيد بغيظ : قلتي شنو ..؟ بركة ما اتصلحت ؟؟
ام العيال مستدركة : لا لا لا لا قصدي يعني عشان تكون سبب نحن ما عايزين الولد يروح مننا زعلان بعد الدرابة الرميتها انت ..
ابو زيد وهو في سرة يحمد ربه انه سيارته لم تكن جاهزة لكنه لا يريد تفويت فرصة انه مسك عليها خطأ .: بس مفروض تتمني اني عربيتي تتصلح مش العكس ؟؟
الام منفعلة بغيظ : يا راجل انت عاوز تعمل لي حكاية .. كدا هسع شيل صينة الكيك والكبابي ديل انا بجيب ترامس الشاي واجي بوراك ..
وفي الصالون يجد عصام نفسه منفردا بالعصفورتين .ز وان كان يمني النفس بان تخرج الصغيرة ..
نسمة : ما قلت ماشي لاختك مالك جيت راجع .. وابتسمت بخبث ..
عصام يرد بخبث اكبر : اصلا انا ماشي الان ويقف على طوله متصنعا كانه يريد الخروج : وين عام ابو زيد\ ..
ترتبك نسمة وتتلعثم : لا لا لا انا ما قصدي اشرب الشاي معانا واتعشى .
تكمل الصغيرة مداعبة بعد ما شاهدت كبكبة اختها : هاكم الاندلاق دا نحن عندنا شاي وبس ما عندنا عشا ..
عصام : انا اصلا اتعشيت وحليت كمان .. وابتسم وهو يجلس ..
الصغيرة : خلي بالكم الكلام دخل الحوش جد جد ..اتعشيت وحليت قبل ما متغرب ..
يدخل عنم ابو زيد من خلفه زوجته يحملان الشاي وتوابعه ..
| |
|
|
|
|
|
|
|
|
|
Re: أنت غلطان (Re: درديري كباشي)
|
أنقضى ذاك اليوم العجيب كالحلم في نظر عصام ..
دخله متوجسا من باب الفضول بعد ان شعر ان عمه ابو زيد بعد ان تعرف اليه يريد ان يلزق له احدى بناته البائرات .
وخرج بانطباع مختلف بل يتسرع الخطوات الايجابية حتى لا تفلت منه هذه الحسناء ... و خيل اليه الوسواس ان خطابها لن يقلوا عن عشرة .. ربما اي مناسبة تحضرها او رحلة في استراحلة لن تنتظره ..
العم ابو زيد : اصبح يؤمن بالمثل القائل رب ضارة نافعة .. من كان يظن حادث يعدم سيارته سيكون فاتحة خير فالتذهب السيارة .. المهم ان يكن الام وبناتها نجحن في تكبيل هذا العريس اللقطة ..والذي يبدو وقوعه جليا من تلفته أي العريس وكبكبته ..
الام : تحمد ربها وتمني نفسها بان لا تظهر عوارض وخاصة من اخته التي ذكرها والتي بالتاكيد لها الف شوفة أخرى ..
البنت : نسمة تسرح مبتسمة مع هذا الرجل الحلم الذي دخل قلبها دون اي مقدمات وتربع عليه .. وهي تتوق لرنة اول تلفون منه بعد ان اخذ رقمها ورن لها رنة اتاحت لها الاحتفاظ برقمه ..
والصغيرة : ايضا نالها نصيب من الفرح .. فهي سعدت لاختها ومنت النفس بالتأكيد ان لعصام اصدقاء من نفس مستواه ..
خرج عصام والجميع يزفوه نحو الباب .
ودعهم مصافحا .. وتجرأ على ضغط يد نسمة التي ابتسمت في خجل .. لتكون هذه آخر صورة منها تنطبع له في ذهنه ..
عاد ابو زيد واسرته سعداء بهذا اليوم
بالرغم من انه ليس به سوى اشارات صامته فقط
لكن على رأي المصريين الجواب يبان من عنوانه .
| |
|
|
|
|
|
|
|
|
|
Re: أنت غلطان (Re: محمد بابكر محمد)
|
ودع عصام عائلة ابو زيد على امل اللقاء بهم غدا كما كان متفق لتناول وجبة الغداء ومن ثم التحرك مرة اخرى للصناعية لاحضار سيارة ابوزيد ..
قاد سيارته وبدأ فكرة مشغول تارة ذهب به خياله الى بيت عم ابو زيد .. وبالطبع تحضر صورة واحدة .. تلك النسمة التي عبرت جوانحه واحتلت دواخله دون استئذان .. يستعيد ابتساماتها وتعليقاتها ليستحلبها من جديد .. ويتبسم .. وكل مرة تصدر منه اشارة باليد دون وعي منه ..
وتاره يذهب بخياله الى من ينتظرونه على احر من جمر الفضول اصحابه العزابه الذين يريدون ان يسمعوا قصة مسلسل واقعي مشوق ..
عندما وصل هذه النقطة توقف عصام مع نفسه .. وقال ان الوضع اختلف الآن .. في الاول كان ذاهب بدافع الفضول وطيش الشباب يتمنى ان يحصل على مغامرة يحكي تفاصيلها لاقرانه بكل فخر كما يفعلون عادة.
لكن الآن الامر اختلف شعر بأنه اصبح مسئول امام هذه الاسرة بل اصبحت كانها عرضه .. فهو لن يقبل ان يصف شكل نسائها وبناتها لعزاب يتشوقون لمثل هذا النوع من الحكي والمغامرات ... ولكن كيف سيخرج من هذه الورطة .. عليه .. ان يجد مخرجا من هذا المأذق بحيث يلجم اصحابه فلا يخوضوا معه ولا يحاصروه بأسئلة محرجة تفضح عواطفه ثم تصبح مادة للتندر لاصحابه ربما سربوه لمكان العمل ..
كيف الحل اذا ليلجم اصحابه ..
اخيرا اهتدى لفكرة ستلجمهم ويطفي الموضوع ليرجعه الى طي الكتمان حتى يتم ويصبح جزءا من واقعه المعاش .
| |
|
|
|
|
|
|
|
|
|
Re: أنت غلطان (Re: درديري كباشي)
|
يصل عصام الى مسكنه في الشقة المشتركة مع زملائه المهندسين ..
وكما كان متوقع يبادره صاحبه الفضولي عاطف : شنو يا ابو الشباب شريتنا كدا .. كدي تعال ..يجره من يده نحو الصالة .. عاوزنك تحكي لينا من طقطق للسلام عليكم من جيت مبتسم ومنشرح كدا معناها عندك مسلسل تركي ..
عصام : رغما عن انه كان متوقعا هذه الخطوة بنفس السيناريو الا انه ارتبك ..
وخاصة بعد ان بدأ باقي الزملاء يتجمعون معهم في الصالة عماد وخالد وحسام .. وكلهم متشوقين لسماع قصة الحادث التي تحولت لرومانسية كما قال لهم عاطف ..
عصام ناويا ان يحسم الامر بخطته التي اتفق عليها مع نفسه : يا جماعه انتو فاهمين غلط .. او بالاصح انا كنت فاهم غلط ..تصور يا عاطف عم ابو زيد عمل فيني مقلب بس تقول كاميرا خفية ..
خالد : كيف يعني كاميرا خفية ..
عصام : اصبر ما انا جييكم .. تصور بعد ما تعرفت عليه لحظة الحادث وطلع انه كان صاحب سليمان خالي الروح بالروح وما بتفارقوا .. ما قال لي انه هو متزوج خالتي بنت عم أمي مباشرة ....
عاطف شعر ان القصة دخلت في ملف سيطقيها وهو لا يدري هل عصام صادق ام اراد ان يبعدهم من عالمه : سأل باستنكار : متزوج خالتك ؟؟ بعد شوية حاتقول اكتشفوا شامة موجودة في ضهرك شغل افلام هندية يعني ..
عصام مواصلا بعد ان كاد ينفجر بالغيظ من مقاطعات عاكف التي كادت تفشل خطته وتفضح دواخله..
المهم انا بعد ما مشيت عنده في البيت .. انا شفت زوجته وقدر ما عصرت ذهني لانه شكلها بقى لي مألوف .. المهم بعد ما عرفتهم بنفسي وبأهلي اشوف ليك المره فجأة حضنتني وقعدت تبكي .. وقالت لي سبحان الله شوف الدنيا فرقتنا كيف انا خالتك ولينا سنتين في نفس المدينة ما اتقابلنا ... وقالت انها كان زارتنا زمان في بيتنا في الخرطوم قبل ما تتزوج ونحن كنا صغار ما بنتذكرها .. المهم اليوم كله قضيناه ذكريات في الناس الماتوا والحيين عندنا في البلد ..
عندما وصلت القصة لهذه النقطة بدأ العزاب يتسحبون واحدا تلو الآخر .. الا انه لم يبقى سوى واحد لم تدخل القصة في دماغه .. وهو عاطف الفضولي ..
عاطف : اها خالتك دي ما عندها جكس نضيف ؟؟
عصام : يازول احترم نفسك ..
عاطف شنو هو احترم نفسي ولا اخنقها انت فاكر الفلم الهندي الحكيتو دا دخل دماغي ؟؟
عصام : شوف هنا يا عاطف انا قصة غير الحكيتها دي ما عندي تاني ... هسع انا داخل غرفتي انام تصبح على خير ..
عصام : تنوم عاوز تنوم من الساعة تسعة مساء ؟؟ وتقول لي خالتي برضو .. وما عايز تحضر كورة برشلونة ؟؟ انت كنت كورة برشلونة دي تلغي ليها اهم المشاوير حتى سفرك تأجله .. وتقول لي خالتي برضو ؟؟
يخرج خالد من غرفته ويعاتب عاطف : انت يا عاطف مالك حاكيها معاه كدا ؟؟ انت طالبه حاجة ؟؟
عاطف : ايوا طالبه ياخ .. انا كل ما اطلع مشوار يوم الخميس نقعد نحكي لبعض ويحكها معاي لحداشر مسا؟؟
خالد : لكن الوضع يختلف الراجل قاليك المرة طلعت خالته .ز
عاطف : ونحن الكنا قاعد نمشي ليهم ديلك ما خالاتنا ..؟؟
عصام يتصنع الغضب ويدخل غرفته ويقفل الباب عليه حتى يتخارج من مطبات عاطف الثقيل ..
| |
|
|
|
|
|
|
|
|
|
Re: أنت غلطان (Re: درديري كباشي)
|
يغير عصام ملابسه ويرتدي ملابس النوم ويتناول تلفونه الجوال متشوقا ويتصل بالتلفون ..بنسمة ..
لايكاد التلفون يرن رنة واحدة الا ويفتح الخط .. مما يدل على ان الطرف الثاني كان على احر على الجمر في انتظار هذه المكالمة ..
بل اكثر تفاجئه بعبارة : أتاخرت مالك ؟؟؟
عصام : نعم ؟؟؟ ااـخرت من شنو ؟؟
نسمة : انت طلعت من بيتنا من الساعة ستة وهسع قريب عشرة ما لقيت تتصل الا هسع ؟؟
عصام : تعرفي دي أجمل عبارة (أتأخرت مالك ؟) سمعتها في حياتي .. الكلمة تطارد فيني من الابتدائي وغالبا ما كانت تنتهي بجلدة من الاستاذ .. وحتى في العمل ...
نسمة : يعني بتعترف انك نوام ..
عصام : ما حكاية نوم لكن انا عادة بنشغل بتفاصيل كثييرة فجأة تظهر لي قبل ما اروح المدرسة او العمل الان ... قدر ما اعمل احتياطي واحضر نفسي من بالليل الصباح اكتشف حاجات جديدة مفروض اعملها .. على كل حال ما نضيع الوقت ما تعرفي انا سعيد بيك كيف .. ومن ما جيت متشوق انه ادخل غرفتي واتصل بيك ..
نسمة : وانا كمان دخلت غرفتي من قبل ساعة ومنتظرة مكالمتك ..
عصام : طيب ماكان تتصلي او تعملي لي ( مس كول)
نسمة : اول اتصال بيننا عاوز اكون انا المبادرة ؟؟
عصام : نحن مش يقينا واحد خلاص ..
نسمه : لا لسع ..
عصام يضحك من تعليقها : كيف لسع ..
نسمة : ياراجل نحن اتعرفنا على بعض قبل ساعات .. وما معروف الشي البينا دا اعجاب متبادل وعابر ولا شئ ماشي لقدام ..
عصام : غايتو انا غرقت لشوشتي زي ما بيقول المصريين ..
نسمة : معقولة يعني ما عندك من اول علاقات ولاحاجات تانية حامياك ..
عصام : لييه يعني انتي عندك ..
نسمة : لا لا لا ابدا انا لو كان عندي ماكان تعلقت بيك من اول يوم ..
عصام : حلو اهو انتي بتقولي بعضمة لسانك انك اتعلقتي بي ..
نسمة : ما نت جرجرتني في الكلام ..
في هذه اللحظة يدق باب الغرفة .
عصام " اذنك يا نسمتي برجع ليك بعد شوية .ز
ويفتح الباب .
| |
|
|
|
|
|
|
|
|
|
Re: أنت غلطان (Re: درديري كباشي)
|
أبو الدرادر
متابعيييييييييييين
وما تستعجل
ومستمتعييييييين للطيش
بالسيسي بالله
وما عليك من أي زول
ما ورانا شئ
الجرجير وبعناه
بس إنت أحكي ،،،، وذي ما قلت ليك بالسيسي
مودتي يا فنان
| |
|
|
|
|
|
|
|
|
|
Re: أنت غلطان (Re: ابراهيم عبدالناصر)
|
ابشروا يا سيف الدين وعبد الناصر .. هو نحن لازم نكملها قبل نهاية الشهر عشان الجماعة هنا قالوا عندهم ربع خالي وربع كبسة ومش عارف شنو عشان كد لازم نردمها كلها ما تخافو .ز\
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: هو نحن لازم نكملها قبل نهاية الشهر |
تاني 21 يوم انتظار
تتجازى يا الدرديري
تخ ريما :
الفكي قوقال مش حقتك والا انا غلطان
| |
|
|
|
|
|
|
|
|
|
Re: أنت غلطان (Re: ابراهيم عبدالناصر)
|
Quote: تاني 21 يوم انتظار
تتجازى يا الدرديري
تخ ريما :
الفكي قوقال مش حقتك والا انا غلطان |
وهو كذلك يا ناصر لقد عرضها في هذا المنبر الاخ زهير الزناتي بعنوان ( بركات الشيخ قوقال) عام 2010 قيل ما آخذ انا الجنسية هنا ..
شكلك قاطع تذكرة لوج يا حبيب .ز
ما عليك انا راح ابطل اي حاجة واسوقها لحد التخمة .ز
| |
|
|
|
|
|
|
|
|
|
Re: أنت غلطان (Re: درديري كباشي)
|
يفتح عصام الباب ويجد كما كان متوقع زميله عصام
عاطف : يا ابو الشباب ياخي انا بعتذر ما اكون اثاقلت عليك وانا لغاية آخر لحظة ما كنت قايلك جادي في حكاية خالتك دي .ز
عصام : ولا يهمك يا عاطف نحن اخوان ياخي ساكنين في بيت واحد وناكل من نفس الماعون ..لا يمكن نزعل من بعض ..
عاطف : المهم الامور انشاء الله تكون مشت تمام .ز( عاطف لازال يقتله الفضول )
عصام : في نفسه ( معقولة عاطف هو يخلي شمشرته)
عصام : لا كل شئ تمام بس رحنا الصناعية لقيت عربية عمنا لسع ما جهزت قالوا راح تطلع بكرة الجمعة ..
عاطف : يعني بكرة تاني راجيك مشوار للصناعية ؟؟
عصام : بالظبط كدا يعني بكرة من بعد صلاة الجمعة حامشي اتغدا مع اختنا سلمى في العزيزية ومن هنالك العصر اروح آخد عمك ..( يريد عصام ان يقفل له فرصة يتعلق به)
عاطف يبدو انه حس بعملية التطفيش المتعمد : خير يا باشا ربنا يوفقك ..
عصام : بعدين بنات خالتنا ديل ممتحنين الشهادة ومحتاجين دروس في القيزيا والرياضيات وعمنا ما بيقدر يجيب ليهم استاذ خاص وكدا ..
( يحاول عصام ان يمهد للذهاب لهم في الايام القادمات )
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: ما عليك انا راح ابطل اي حاجة واسوقها لحد التخمة |
ابو الدرادير
انت تمها وخلي المونتاج علينا
نبقيها ليك رواية شعبية تفاخر بيها بين الدارادير
بغلافها وصورها وتنسيقها
| |
|
|
|
|
|
|
|
|
|
Re: أنت غلطان (Re: ابراهيم عبدالناصر)
|
عاطف بعد ما شعر ان عصام قفل على سرة بالضبة والمفتاح ولم يترك له فرصة ليروي فضوله المتعطش للمواضيع التي يأخذها سخرية للتريقة و ( المكاواة) كما يحدث عادة بين الشباب الذين يجمعهم سكن واحد .. قرر الانسحاب بالرغم من انه شعر ان صاحبه استوى على الآخر لكنه يريد بأي ثمن يعرف سر ومدى هذا الاستواء ( قال خالتي قال ... دا علينا نحن) قالها في سره وهو يستأذن ..
عاطف : اها تصبح على خير يا ابو الشباب ..
عصام وانت من اهله يا باشمهندس ..
خرج عاطف وعصام قفل الباب بالمفتاح من خلفه ..
وجرى ناحية سريره مرى اخرى ليتصل من جديد ..
ومثل المرة الاولى من اول رنة يفتح الخط ..
نسمه : اها شنو الحكاية اتاخرت مالك ؟؟
عصام : تاني اتأخرت دي ؟؟
نسمة : ضايقتك ؟؟
عصام : لا ضايقتني شنو .. انا قلت ليك دي احلى اتأخرت مالك سمعتها في حياتي ؟؟
نسمة : طيب من كان في الباب ..؟
عصام : دا زميلنا في السكن والعمل المهندس عاطف ..
نسمة : انت ما قلت لي انتو عايشين كيف وساكنين كيف ؟؟
عصام : هو انا لحقت اقول ليك حاجة نحن يا دوب ابتدينا ..
نسمه : انا عايزة اعرف عنك كل حاجة بس في اليوم دا ..
عصام : يعني انتي عايزة نكمل الكلام كله في يوم واحد بعدين نقعد نعاين لبعض ؟؟
نسمه : بعدين متين ؟؟
عصام : يعني انتي ما شايفه انه في بعدين يخصنا نحن الاتنين بس ..؟
نسمه : لا بس انا عايزاك تسمي الامور بمسمياتها ..
عصام : طيب نسمة تتزوجيني ..؟؟
صدر صوت شهقه من الطرف الثاني اعقبها صمت .
عصام : نسمه سكتي مالك . ولا عندك راي تاني ..
نسمه : كدا طوالي من اول يوم ؟؟ انت فاجأتني .. انا لسع ما لقيت فرصة اقيم شعوري نحوتك ؟
عصام : يابنت الناس انت هسع ما قلتي لي سمي الامور بمسياتها والله انتو بنات حوا ديل ؟؟
نسمه : مافي كلام كثير وخطوات كثيرة قبل كلمة تتزوجيتي دي ..
عصام : طيب علميني اعتبريني تلميذ في رحابك اديني الدرس الاول مفروض اقول شنو ؟
نسمه : قول لي بحبك خليني انتشي واعيش على الكلمة كم يوم وبعدين خطوبة واهل وبعدين زواج ..
عصام : نحن مجتمعاتنا عودتنا بأنه الحب شئ يختلف عن الزواج .. بمعنى الحب عادة لايؤدي للزواج ؟؟
نسمه : دا كلام شنو دا يا عصام انت كدا خوفتني ..
عصام : انت لسع صغيرة وتجربتك في الحياة كلها عمرتنمنتاشر سنة منذ اتفطمتي واتعلمتي الكلام والمشي وللحين ما خرجتي من ظل والديك ... لو دخلتي الجامعة وشفتي مجتمع تاني مختلط حا تعرفي معنى كلامي انه الحب ليس بالضرورة ان يقود للزواح .. ونحن كنا طلبة جامعيين عشنا تجارب وشفنا تجارب ..
عشان كدا نتي لامن قلتي لي سمي الامور بمسمياتها قلت الزواج عشان ابين لك لاي مدى انا مشيت بمشاعري نحوك ؟؟
نسمة .. ياااااااااااااااه تقول لي انت تلميذ وطلعت اكبر استاذ .. وانا دا اول درس في الحياة اخذته في حياتي واهم درس تقريبا
عصام : عايز اقول لك تصبحي على خير الساعة اتناشر جات ..
نسمه انت من اهله رغما عن اني ما قادرة اقفل الخط وفي وشك .
عصام : خلاص تعالي نعد لغاية تلاتة ونقفل الخط في وقت واحد ..
يلا : واحد اتنين تلاته ...
| |
|
|
|
|
|
|
|
|
|
Re: أنت غلطان (Re: درديري كباشي)
|
في بيت ابو زيد
تجتمع الاسرة كالعادة في الصالة يحضرون سهرة نجوم الغد ..
عدا طبعا البنت الكبرى نسمة ..
يلتفت ابو زيد .. ويسال .. انتو وين نسمة ؟؟
الام : نايمة جوة في لاوضتهم ..
الاخت بسمه : نايمه ؟ نايمة شنو قعد تتكلم بالتلفون ..
ابو زيد بخبث مدعيا الهبل : تتلكم في التلفون؟ .. تتكلم مع منو لغاية هسع ..؟
وينظر الى زوجته وبتبسم بخبث ولسان حاله يقول والله انت وبناتك خطرات ..
الام يقتلها الفضول لتعرف نتيجة شراكها ذهبت الى الغرفة مدعية تفقد بنتها في الظاهر ولكن في الباطن وتريد ان تعرف براعة بنتها في وضع النقاط على الحروف ..
دخلت على البنت وحتى لا تعطيها فرصة للنكران دخلت فيها مباشرة تسأل : اها قاليك شنو يا بنتي ؟؟
ارتبكت البنت وتخجلت في الاول .. ولكن وجدت نفسها اما باب واحد هو باب الاعتراف :
قالت : قال لي تتزوجيني يانسمة ؟
الام : دا الكلام .. شفتو تدبير امك كيف يلا يا بتي تعالي كملي معانا السهرة ..
تذهب بمعية بنتها الى حيث مجلس الاسرة امام التلفزيون
| |
|
|
|
|
|
|
|
|
|
Re: أنت غلطان (Re: درديري كباشي)
|
اللهم طولك يا روح
ذهبت العمرة والمدينة المنورة
وجيت الرياض ورجعنا جدة وجيت
ولس في مسلسل ( مسلسل لمعي دا )
طبعا يا الدرديري انا عارف حركتك تقيلة
مخير الله
غايتو انا حدي معاك في البوست دا ( قولة الخير) بس
| |
|
|
|
|
|
|
|
|
|
Re: أنت غلطان (Re: ود الباوقة)
|
Quote: اللهم طولك يا روح
ذهبت العمرة والمدينة المنورة
وجيت الرياض ورجعنا جدة وجيت
ولس في مسلسل ( مسلسل لمعي دا )
طبعا يا الدرديري انا عارف حركتك تقيلة
مخير الله
غايتو انا حدي معاك في البوست دا ( قولة الخير) بس
|
يا اخوي تمشي وين ؟؟
نحن محتاجين ليك للسفارة والوساطات وكدا
الولد عايزين نعقد ليه في البلد دي لو اموره مشت تمام لسع الامور ما نضجدت ؟؟؟
فخليك قريب under call يعني
| |
|
|
|
|
|
|
|
|
|
Re: أنت غلطان (Re: درديري كباشي)
|
Quote:
نحن محتاجين ليك للسفارة والوساطات وكدا
الولد عايزين نعقد ليه في البلد دي لو اموره مشت تمام لسع الامور ما نضجدت ؟؟؟ |
لانو حاسي القصة دي حا تجرجر لدي السماية
يا زول ( خير ) بحضر العقد والصبحية بس
تاني ما تقول حاجة
تشكراتي
| |
|
|
|
|
|
|
|
|
|
Re: أنت غلطان (Re: ود الباوقة)
|
ما قصرت يا بقبق والله
بس العاقبة عندكم في المسرات عبي الجزلان عشان تكشكش .. وانتو طبعا كشكوكم ما زي حق الناس المساكين من عشرة وانت طالع دا لو ماكان فاتورة من ايكيا او العبد اللطيف ..روح واستلم ...
| |
|
|
|
|
|
|
|
|
|
Re: أنت غلطان (Re: محمد على طه الملك)
|
Quote: .أنا جريت خط لبكري يقفل الربع يوم الجمعة..
عندك لحد الخميس داير تعقد اعقد ما داير خترك. |
خليني اتشاور مع الجماعة ديل اعرف قصتهم وصلت وين بعدين برجع ليكم .... يمكن ما يكون يتزوجوا ساكنت نخسر نحجز الاستراحة والسيستم والبورد كمان ؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
تحياتي يا درديري
معاك في من يوم الصدمة وإلى آخر السكة إن شاء
الله ................... يعطيك العافية ..... إبداع حقيقي .
| |
|
|
|
|
|
|
| |
فايزودالقاضي
الامين موسى البشاري
الصادق سيكا
garjah
سيف الدين محجوب
عبد الله كسلا
محمد على طه الملك
Nader Abu Kadouk
Hani Arabi Mohamed
محمد بابكر محمد
ابراهيم عبدالناصر
محمد حبيب الله
د.يوسف محمد طاهر
فيس بوك
تويتر
انستقرام
يوتيوب
بنتيريست