لا يخفى عليكم كرهي للمريخ أكتر من حبي للهلال وأبذل كل ما هو غالي ونفيس من أجل نصرة من هو ضد المريخ .. أها وانا في بداية حياتي الإغترابية قمت إشتريت لي تلفزيون ماركة سوني لكن من النوع البيشيلوهو 7 رجال داك وكلللو حديد وضهرو لي ورا زي تلاتة أمتار ولمن تجي ماري بي جمبو حرارة الدوائر الكهربية جواهو تلفحك بي سموم غريييب..مع العولمة والدخول السريع في مكنة المغترب القديم وفي إطار تكملة طقم الإغتراب ونسيان الماضي من نوع التلفزيونات الكنا بنديهو ضربة أو لبعة حتى يشتغل ومن نوع التلفزيونات الأريلو لو مر نسيم على بعد مييل يخلي الشاشة طرباً تميل وعااادي لمن يرجع الارسال تلقى المسلسل إنتهى إضافة لي تلفزيون زماان كان عندنا الصورة بتطلع لي فوق على التوالي ومرة تتمط ومرة تضعف..مرة تقسم ليك الزول نصين الراس فوق والكرعين بي الجمبة ومرة مقلوب ومرة الشاشة تضلم وتجيك نقطة صغييييرة في النص .. هيييه يا لها من أيام نرجع لي السوني أبو سبعة رجال وطقم الإغتراب ..قومت فجأة كده للإستمتاع بي الكورة من خلال قنوات الHD إتبوبرت وإشتريت دااك يا ال LCD الما خمج و وعلقتو في الحيطة وجبت ديك يا الكنبة وبقيت اليوم كلللو حارس ليك أييي كورة في العالم .. أها من ضمن المباريات البحضرا مباريات المريخ والتي أحرص على متابعتها أكتر من مباريات الهلال عشان أقدر أمارس فيها كل انوع الدعوات والصلوات والخزعبلات من شاكلة التفاف بالجمبة وا وبلع الريق طمنطاشر مرة عشان فرص المريخ تضيع.. أها وانا بكون بحضر في مباريات المريخ في ال LCD بلاحظ طوااالي المريخ بيكون غالب بي قوت أو إتنين أو تلاتة ..أصصصلو ماحصل درن ولا خسر .. اها مرة وانا قاعد في الغرفة اللي رحلنا فيها التلفزيون القديم وهي عبارة عن غرفة هكرة من نوع الغرفة والمخزن و واللمكن تقلبا حقت ضيوف لمن يداهموك ومرة تقلبا حقت الشفع نظام القشرة لي أصحابك وانت بتحكي لما كنت في غرفة الأطفال و و أها صدفة بحححتة لقيت ليك التلفزيون شغال قناة الشروق وكورة للمريخ شغالة قعدت حرست الكورة المريخ مغلوب ..السخانة والكتمة لفختني والمريخ مغلوب وحلللفت ما اقوم من التلفزيون القديم ..قووم يا الحكم صففر والمريخ مغلوب ..قمت بعد داك وواصلت يومي.. بعدها بي كم اسبوع المريخ تاااني كان لاعب ..كنت بحضر في الكورة في أبو LCD والمريخ غالب واحد..اها قمت اعمل حركات اختفي وأجي بعد شوية نظام أتفاجأ وكده ..مشيت الغرفة الفي الوقت داك قلبتها غرفة اطفال والتلفزيون القديم شغال ..قلبت على قناة الشروق ومع القلبة توووف اشوف ليك الفريق التاني بينطط وجاب الدرون ..حررست الكورة في القديم لحددي ما إنتهت ..أنقرو ما انتهت درون؟؟ من يومها قررت إنو تلفزيوني القديم ده سرررو باااتع ووالله يا جماعة وانا جااادي أي كورة حضرتها للمريخ في التلفزيون القديم ده فيا المريخ مضروب يا درون .. أها بقت عندي مشكلة كبييرة جداً ..المتعة والمشاهدة للدوريات الأوروبية بحبها في الLCD وغلب المريخ في التلفزيون القديم ..وكتير من الأوقات بيكون في مباريات اوروبية في نفس وقت كورة المريخ وما حصل قلبت القناة في الLCD لقيت المريخ ده مغلوب.. وما بقد كمان ما احضر ناس مانشستر وريال وتوتنغهام ديل.. كورة امبارح ضحيت بي الدوري الإنجليزي بعد ما بديت احضر فيهو والمريخ جاب قونو إضطريت اقوم امشي التلفزيون القديم لحدي ما الله اداني الفي مرادي حتى رجعت لحقت باقي الكور.. أها يا جماعة شوفو لي حل للقصة دي .. تلفزيوني الصغير ولا ال LCD??
03-18-2013, 02:32 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: هيييه يا لها من أيام نرجع لي السوني أبو سبعة رجال وطقم الإغتراب ..قومت فجأة كده للإستمتاع بي الكورة من خلال قنوات الHD إتبوبرت وإشتريت دااك يا ال LCD الما خمج و وعلقتو في الحيطة وجبت ديك يا الكنبة وبقيت اليوم كلللو حارس ليك أييي كورة في العالم ..
يا عُمر ياخ .. عشان تستمتع بالصورة الـ HD لازم يكون:-
1- جهاز التلفزيون يدعم الـ Full HD 2- جهاز الرسيفر لازم يكون بيدعم الـ HD 3- القناة الناقلة لازم تكون HD
بالنسبة للقنوات العادية التي لا تُبث على نظام الـ HD وهي تُبث بنظام الـ SD فمُشاهدتها أوضح في التلفزيون العادي من شاشة LCD التي تدعم الـ HD
النجيضة: قناة الشروق وكل القنوات السودانية تُبث على نظام الـ SD
ود البشرى يا راقي .. والله ما ح تصدق انا قاعد أعاني كيف في القصة دي ..ياخ انا تهيئة الظروف لي كورة المريخ البعملا ممكن يوم عااادي يلقوني مييت ..أولاً مع التلفزيون الصغير في طقم حاجات كده بيتعمل من نوع تقفل الشبابيك والمكيف والمروحة وتقعد ليك في درجة حرارة زي 53 كده كتمة زي الكتمة ..الغريبة بقفل الباب من الأولاد لكن عندي صلاح الصغيير ده مجهجه ليك أفكاري ..الولد ده كو كو كو يدق الباب أديهو نهرة كده تووف المريخ بيجيب قوون ..فالمعادلة بقت صعععبة وبقا في تضارب في الحاجات والشعوذات ..
تخريمة : ياخ شكراً للضحكة في المداخلة التانية فقد أوفيت
03-19-2013, 05:17 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الغفاري أبا ذر .. برشلونة ده إنت قايلني ما قعدت ليهو ؟؟ لكن غلبني عديييل والله قدر ما قلت أشربو غلبني ..تحضر ليهو في القديم في الجديد بي الجمبة في الشارع مع الجيران في الرادي غالب غااالب .. لكن أصبر ليي بحاول أتذكر القاسم المشترك العملتو في حضوري لي مبارياتو الاخيرة مع الريال وكورة ميلان الأولى شنو ..
تخريمة : أملي كان في يوفنتس في تطفيشكم ولكن خاااب ..غايتو نشوف في دوري الاربعة
03-19-2013, 05:20 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
العزيييز عزيز : ياخ انا لي اسة مخلوع خليك إنت :) وتسلم يا راقي من كل شر.. اخوك متابع غير جيد لي سودانيز والبلقهو في وشي بشوت فيهو فياريت تبصرنا بي خيط خيطين عسى ولعل نقدر نخش..
03-19-2013, 05:22 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
دينا ال خالد .. والله البطل ده إلا يحضروهو ليك في الرادي ..تلفزيون مااا بيحلك .. النصيييحة انا قلت أنتظر الصبح أليس الصبح بقريب ؟؟ لكن أظن فرق التوقيت ده بالجد مشكلة .. لكن خمسين دي ما كتيرة ؟؟ الزول ده لو قال لحدددي 47 انا كنت دعمت فكرتو
تخريمة : ربنا بريدك إنو أم كلثوم ماتت..والله لو كانت حية كان أسة شريطك مدوور في شارع الدكاترة ..
03-19-2013, 05:29 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: صبري يا حبوب.. ياخ بعد مداخلتك دي زي حا احاول اقرر تاني ما اغالطك.. وضح بما لا يدع مجالاً للشك إنك زول طييب وقلبك ابياااض كيف..
يا عُمر ياخي أنا ما قصدي أفتح معاك باب غُلاط في هذا البوست ... كل العملتو وضّحت ليك حقيقة علمية عشان ما تكون ماسك ضنب الككو وتفتكر إنّو مُشاهدة القنوات الـ SD على الـ LCD HD أفضل من مُشاهدتها على التلفزيون العادي ...
على البلازما ممكن تكون أفضل وأعتقد أنّها كذلك ...
بالنسبة لضحكة ود البُشرى .. هو الضحك بي قروش خليهو يضحك زي ما عاوز ...
03-19-2013, 05:41 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8629
Quote: يا عُمر ياخي أنا ما قصدي أفتح معاك باب غُلاط في هذا البوست ...
يا صبري ما فهمتني..غلاطي البقصدو ما عندو أييي علاقة بي مداخلتك دي نهااائي..بتكلم عن غلاط ما قبل .. ولازلت عند رأيي بعد مداخلتك الHD دي ثبت شرعاً إنك كائن بشري طيب جداً ..
03-19-2013, 05:47 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أها يا ابوذر يا صاحب النديك النصيحةدي تلحق بيها كازانوفا بن فلانوفا ده .. في زول إسمو آآقر بيلعب في ليفربول عمق دفاع حاجة كده مااا تخلص ومعاهو حاجة تانية إسمها وولكر بيلعب في توتنغهام طرف يمين زول نجااااضة .. أييي فريق يسجل الإتنين ديل على ضمااانتي ما بيتغلب قريب..
سيلفا مشيتو من الميلان كسرت ضهرهم أكتر من مشية ابراهيموفتش عشان الناس تعرف وتفهم انو الكورة مااا هجوم بس..
03-19-2013, 05:57 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8629
Quote: ولازلت عند رأيي بعد مداخلتك الHD دي ثبت شرعاً إنك كائن بشري طيب جداً ..
على كل حال سأحسن الظن بعبارة "كائن بشري طيّب جداً" وأنبّهك أنا ردّيت بحكم مروري على الجزئية التحت دي ...
Quote: ..قومت فجأة كده للإستمتاع بي الكورة من خلال قنوات الHD إتبوبرت وإشتريت دااك يا ال LCD الما خمج و وعلقتو في الحيطة وجبت ديك يا الكنبة وبقيت اليوم كلللو حارس ليك أييي كورة في العالم .. أها من ضمن المباريات البحضرا مباريات المريخ
بالمناسبة تعليقي في هذا البوست سبق وأن كتبت تعليق قريب منه وبصيغة مُختلفة هنا في المنبر ...
03-19-2013, 06:06 AM
omer osman omer osman
تاريخ التسجيل: 06-09-2007
مجموع المشاركات: 15218
Quote: بالنسبة لضحكة ود البُشرى .. هو الضحك بي قروش خليهو يضحك زي ما عاوز ...
كلموا ياصيري كلموا و.بعدين لمن يكمُل ضحكاتو ما يجي ويكورك ياحمودي نزل لي ضحكة هنا هو الوشوش دي بالساهل كدا خليهو لمّن يتزنق ليهو في وشّ نشوف اللي ح يباصيهوا ليهو منو ـ ود البشرى وشوشنا دي تاني الأ تلقاها في الشاشة الغشاشة الماااا LCD
03-19-2013, 06:39 AM
لؤى لؤى
تاريخ التسجيل: 06-01-2003
مجموع المشاركات: 14343
Quote: كورة امبارح ضحيت بي الدوري الإنجليزي بعد ما بديت احضر فيهو والمريخ جاب قونو إضطريت اقوم امشي التلفزيون القديم لحدي ما الله اداني الفي مرادي حتى رجعت لحقت باقي الكور.. أها يا جماعة شوفو لي حل للقصة دي .. تلفزيوني الصغير ولا ال LCD??
تلفزيونك الصّغيـّر طبعاً LCD شنو كـمان ؟
مشتاقيـن ياخـي
03-19-2013, 06:53 AM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
طلحة ياخ ومعليش ح ارد عليك قبل ما اواصل مع باقي الناس.. عندي طلب في شكل شحدة إسفيرية عاااجلة شعار فريق العين الأصلي بالله الهوم والأوي .. الناس ديل انا بحبهم من زمااان وبحب لبستهم أكتر .. فبالله الحقني مع أي زول جاي من الامارات بهذه اللبسات بمناسبة الفنيلة الداخلية دي..
03-19-2013, 08:02 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
Quote: معلومة صيرونة يا شباب .. ال LCD البتكلم ليكم عنو عمرو معاي 5 سنوات ..عشان ما تفهموني غلط في قصة العولمة دي
مصدقنك..مصدقنك ياعمر خمسة سنين معاك تلفزيونك الصغير البشيلوهوا سبع رجال دا في حلّك وترحالك؟؟ الحكاية شنو ..!! شكلوا نهااااائي ماقاعد ترمي حاجة في البلدية ــ لكم إفتقد أساسي ..يا أساسي لو مررت من هنا نبلغك أشواقنا ونأمل أن تكون كل أمورك كما ينبغى لها أن تكون
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
محمد البشرى الخضر
أبوذر بابكر
عزيز
waleed dawash
دينا خالد
omer osman
عمران حسن صالح
لؤى
حمد عبد الغفار عمر
طلحة عبدالله
فيس بوك
تويتر
انستقرام
يوتيوب
بنتيريست