فجأتن كدي جاتني حالة بتاعة قعونجات وحبيت أعرِف نفسي ما عارف ليه ؟ يمكن السبب إني شايقي :) أحمل من جينات الغتاتة الكثير " حسب تعريف بني كجَه " مولود وبيني وبين النيل ميتين متر ، ورغم إني مرقت من البكان المضلِم داكـ وأنا لا أستطيع أن أنطق اسم أمي صحيحاً ، لكني وكل ما ذهبت لزيارة أهلي ، بلد بي تِحِت أحس بحنين عجيب جداً لباقي النيمة الكانت قرب باب الكُشر كتير جداً بتذكر طعم القراصة الهرونــا بيها من صغار ومديدة الحلبة المالية الحلة ريحة كلما أتى الليل وصوت الحمير لامن تهنِق بالليل والليمونة الكانت مدفونة تحت زير ناس أمي " حاجة الشاتي " والشلتها من البيت " تحت الزير " دون أن أخطر أحداً وأخذت علقة من الوالد الحبيب لأنو اعتبرني سرقتها . وسرقتي لحمار عمي على صالح " الله يرحمو " كلما أرسلني أبي لسوق مروي من أجل " الصعوت " وصوت رادي عمي الأخدر الشبع خبت بالعصاية كلما شخشخ صوتو آخر مرَة مشيت سنة 2008 جيت شايل معاي بوست :
Quote: لم تعطنا تربية المدينة كل دسم ( البلد ) الذي افتقدناه ... والبلد هي مصطلح (مسقط الرأس) عند أهلي الشايقية .. فإن ذهب (الشايقي) إلى أقرب المُدن كان الأمر سفـــــراً خارج (البلد) .. رغم أن الأمر تمَ من غير " زوادة " ** والبلد دائماً لها ذات الصفات والتصرفات (واللمَات ) والمشاوير اليومية ... البهايم ومشوار (حش القش العصراوي) يتشابه في كل البيوت ... صوت النعاج وهي تنتظر وجبة العشاء ( البرسيمي الطازجة) .. يتشابه في كل البيوت (والحريم ) في طريقهن إلى البيوت "والشمس إلى زوال تقريباً " (والواقود) أعلى الرأس ( يتمخطر ) في ذات الهيبة إلى أجله المحتوم وقوداً ( لقُرَاصة ) العشاء.... ريحة لبن شاي المغرب (المقنن) والذي أيضاً يتشابه في كل البيوت ....
Quote: أنا زول مولود في الضلمه جنب البحر وسط النخيل (أبو دوم مركز مروي ) وأمي بت عم أبوي ما يجي واحد من شايقية لندن ديل يغالطني
..... هو الموضوع كان شنو ؟؟ أيوا اتذكرت بس بسأل إنتو قرابة " أو معرفة " رسولنا العظيم صلى الله عليه وسلم لكفار مكة قللت من شأنه عند الله ، ومن آمنوا به ، شيئاً ؟
01-27-2013, 12:16 PM
أيمن محمود أيمن محمود
تاريخ التسجيل: 01-14-2013
مجموع المشاركات: 4940
شكرا ليك يا عمران على الكلام المشلخ السمح ده ... وصدقنى (بلود ) بى تحت وبى فوق كلها قاعد تتشابه فى ديارنا الجميلة ديك بى بناتها خدارها وواقودها ونخيلها وبناتها السمحات المفرزعات وسط الجروف ينافسن وبقوة اجمل حسان العالم بهاء واناقة ..... واب دوم مركز مروى دى ذكرتنى حبوباتنا والواحدة تلقاها حاضنة الرادى من الساعة اتنين ونص فى انتظار نشرة تلاتة وخصوصا نشرة الوفيات زمن ماكان فى جوال وفجاتن تسمع وووووب على فلان مات !!!! توفى فلان الفلانى اخو فلان وولد فلان وودعم علان من ( ...... ) مركز مروى ...... الكلام ده زمن ( الصائح ) كان اتنين من الشباب الاقوياء من اصحاب الحمير الفارهة التى تستطيع عبور عدد من القرى لنشر خبر وفاة او عودة غائب ...... من الزومة احلى سلام يا قريبى ....
01-27-2013, 01:43 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
أها يا خالد متل الريدة والاحترام البنشيلو لبعض ده هو الهارد فشفاش بعض " الأشقياء " زينا زي أيِ مجتمع فينا الطالح والصالح والغتيت والخربان كلو كلو . بس بينا المحنَة والاحترام أنا على مستواي الشخصي لا يهمني كثيراً أن أكون شايقي أو حلبي :) ، يهمني أن لا يعيرني أحد بأني شايقي وأننا أهل غل وغبائن وغتاتات وكلام كتير فارغ في تلكـ اللحظة سأرفع الإعلان عالياً : أنا شايقي
01-27-2013, 01:12 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
ده ما ياهو الجايب لينا الهوا يا فايز ، بقت الحكاية مربوطة حسي بالنضم الفارغ ده ، لكن بيني وبينكـ زولنا اسماعيل حسن بيديكـ الإحساس ده لامن يقول :
Quote: يوم تموت ينعوك في كل الجرايد ويكتبوا عنك قصائد والخطيب واقف يوصف كان وكان كان وحيد هذا الزمان بس تصور ..يا فلان وينسبوك لي كم قبيلة بي فروعك وبي اصولك ويصبحوا أهلك كتار وكلهم ناس سمان بس تصور يا فلان لو قبيل اتلموا فوقك وأنت حي وكل زول أداك ريال كنت واثق...كنت لي أسع دا..حي ياحليلك يافلان
01-27-2013, 12:49 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
أها يا صبري إنت كمان جيتني بالحتة الفيها الحديدة صوت الطنبور تصدق بيخليني زي العايز ( أبكي ) رغم إنو تربيتي كانت وسط ناس ود القاضي الحبشي مرات بجيني إحساس إنو شعري بالشايقي كان ممكن يكون حسي مالي قنوات النيل الأزرق والشروق :) كان اتربيت وسط الناس الحنان نضال حسن الحاج دي فايتانا بشنو ؟
01-27-2013, 12:53 PM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 28172
وفي وسط كم هائل من الدعاية السلبية ليس فقط من صاحب لفظة (العواليق) وافاعيله في الأبرياء طالبي الحقوق ولكن أيضاً النكات التي أصبحت ممضوغة بهبل شديد وأفاعيل غيرهم مثل صاحب (الحقنة) الشهيرة ...
هذه الكراهية تمشي على قدمين لم يجلبها أحد لاسم قبيلته مثلما جلبها هؤلاء رغم استمرار تأكيدنا بأن قبيلة هؤلاء هي معتقدهم السياسي وليس غير
تحياتي
أحمد الشايقي
01-29-2013, 05:22 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
يا حيدر كيفنكـ في زمن فات كنا موظفين منظمات بأحد معسكرات جنوب القضارف ، وبحكم تواجدنا وسط اللاجئين الأثيوبين كنا قريبين منهم جداً بالليل جات مرة داخلة علينا تكوركـ الحقو الراجل ، مشينا لقينا كم واحد متلمين عايزين يقلعو الراجل رجلو الصناعية المليانة قروش قالو هم أقاربو والراجل من عرفو أيِ خمسمية جنيه تتلم يشيله ويحشره في رجلو وهو حسي قرب يفارق وعايزين يلمو منو اللماهو أها أنا " كشايقي " قربت اتم الخمستاشر سنة وسط أعراب نجد أكان سويت سواة الحبشي ده حسي أكان أكون جار المشير في كافوري
يا زول يعنى لصراحه كده بيعجبنى فيهم الشعر الناعم واللون الغامض امتزاج جمالى عججججججججججججججججججججيب والعيون السوده البتخلى الطير يقع من سماه وملامح الما دشنه لكن يعنى لصراحه كده مخهم فى الحريم كعب شدددددددددددددددددددديد برغم انهم رومانسيين قادر الله وغيورين غيرة اخنق فطس لكن يعنى لصراحه كده الشكك دا ماااااااااااااااا حلو وان الانثى مفروض تكون مفعوصه طوالى معاهم المهم حمشين ودمهم حار لكن بالجنبه كده عينهم زايغه ويحبوا الهبطرش لكن مع ناس البيت العين قويه زى الصقر ودا انفصال فى الشخوصه ما جميل :)))))
01-27-2013, 01:36 PM
osman righeem osman righeem
تاريخ التسجيل: 06-21-2007
مجموع المشاركات: 10872
يا عمران الشوابقة في محلية مروي 87000 نسمة في ريفي ومدينة الحصاحبصا 68000 نسمة في الحاج يوسف و شرق النيل 400,000 نسمة في ولاية الخرطوم عموم قريب 2 مليون
شوفولنا الوطن البديل
01-27-2013, 01:42 PM
فايزودالقاضي فايزودالقاضي
تاريخ التسجيل: 11-27-2007
مجموع المشاركات: 10091
Quote: يا عمران الشوابقة في محلية مروي 87000 نسمة في ريفي ومدينة الحصاحبصا 68000 نسمة في الحاج يوسف و شرق النيل 400,000 نسمة في ولاية الخرطوم عموم قريب 2 مليون شوفولنا الوطن البديل
قبل فترة كان في خبر بتاع مظاهرات في مروي دعما لي قوش
نزلت الخبر ومعاه صور وانا متأكد انه مافي اي زول قبلي نزل الخبر هنا
جوني ليك كمية من الناس ناطين وشبكوني ليك عشان قريبك وما عارف شنو وشنو وقدر ما طولت بالي ما وصلت معاهم لي نتيجة ... المهم خليت ليهم البوست ومشيت ... بعد يومي جاء واحد اسمه الدومة حنضل منو كده ما عارف ... عمل كوبي بست للخبر ... جو نفس الناس شبكوه النضال والنصال وهلمجرا .... حينها تحسرت على سودان كان بين يدينا ....
احبك ياقريبي واحب الشوايقة من اولهم لي اخرهم وكان ما جيت من زي ديل يا اسفاي يا ماساتي يا زلي
02-03-2013, 05:18 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
نهديك قول اخونا حاتم حسن الدابي الفنان فيموجة الدهب
ياحليل الحريم دمعن انسكب قالن الرجال فاتو الدهب فرحن اول شى والخيال كضب الواحدة تتلقاك تضحك باسطة تب تحلم بالقروش وتحلم بالدهب كملن الصبر والكلام وجب لامن الفرح فيهن اتقلب والضحك الكتير الليلة صار غضب شكوي للكريم وقدمن الطلب قالن الرجال كايسين السبب شردو من البيوت والوضع صعب لا رجعو للبيوت لا جابو الدهب المعرس والعذب قام فات الدهب والبي السنين اغترب قال ماشى الدهب اصحاب الرتب فاتو الدهب يااهل الترب قومو للدهب اللقى السبب من البيت هرب قالو مشى الدهب قعدن الحريم وحرسن البيوت وسافر اب شنب الخلة العروس فى شهر العسلوساق ابو النسب وفاتو الدهب قولو للشيوخ الشراد وجب والحقو الدهب ملوك الطرب بطلو الغنا وفاتو الدهب المعلمين الواحد كان كتب يكتب الدهب طلاب المدارس فارقو الكتاب وبقرو فى الدهب أئمة المساجد وجهو الخطب لى خير الدهب حتى الاطفال اتخيلو اللعب مصنوعة من دهب ياهيثم والعجب بطلو الكفر وقومو للدهب الناس فى تعب والتعب كعب حايمين بالهجير زي كلاب لهب الدماغ يفور ويحرق العصب والمرض خطير ونحن فى مطب بي سبب الدهب الحقو الاسر من مرض الدهب دة خلى المجتمع للريح فى مهب والرجع عيان بي وجع ركب والنصيح يئن قاعد فوق لهب الكريم رازق ورزقو ما اتحجب بس الزمو اليقين دون ضجيج وسب يااهلنا الفى البيوت كان غاب اب شنب بيلعب اب ضنب وكان لعب اب ضنب الوضع اضطرب ولو الوضع اضطرب يبقى كل شى ذهب والسبب الدهب
01-27-2013, 01:44 PM
فايزودالقاضي فايزودالقاضي
تاريخ التسجيل: 11-27-2007
مجموع المشاركات: 10091
قولة ازيك وكيف الحال واهلاً ياخى حبابك عشرة من دون كشرة والف سلام وين القاها بعيد عن بلدى ولقمة كسرى ولو بى مويه مع ست ريدى وين القاها بعيد عن بلدى آه يا بلدى ومليون آهة وحاتك غيرك مالى عزة ومافى وجاهة *** وقع ما سمى قلبى وحاتك مما فاتك يوم ما انجم آه يا بلدى يا زول قادل جلابيى فرد ويحيدى قديمى نضيفى سيف كاويها قانع بيها وبارم العمى نفس غنيانى جيوبك فاضى بس للمحتاجين دايماً مليانى عليك عوافى يا المابتعرف قولة مافى وما بديك ما عندك ضمة وساعة الحارة وكت تتلم ديوش وديوش ما بتندس حرم فى الحوش جفير سكينك تجدعو غادى دمك يغلى تفور وتهوش تبشر زين تنطط زين تقول فى دارك عندك بوش وعدوك لى بعضو يصيح حوش مسور يا بلدى ومابتنحاش يا المتل الغيم للفى بيوضة يجيبلو رذاذ ومعاهو دعاش يا الذكرك دايماً فى قلبى يا الزارع الورد على دربى انا ابنك عاق جافيت حبى وجيت هنا فى الغربة متكرن طاش بكيت وبكيت والشوف من عينى بقالى طشاش قروش الجن دى اريت يا وطنى بعيد عن ارضك ما تتلم
01-27-2013, 02:25 PM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
انا شوفت ارضنا قبل سنوات بس.. وفرحانة ببلدي وبشايقيتي كأني عشت فيها من ساعة ولدوني.. ومابيأثر في حبي الكلام الفاضي نوع دي عنصرية منكم ساكت.. واي زول ما بيحب منطقتو عنده اسبابه.. والبيحب منطقته عنده أسبابه والموضوع في نهايته حنين وتجارب وذكريات وأرض وخالات وعمات وجدود..ودم يخليك تحن لأي حاجة هناك.. زي حنينك لأمك وأبوك... ........ ........ أما بعد.. بالبتشتموا الشايقة بسبب (البعض) إنتو غلطانين.. لأنه البعض ده موجود في كل القبائل وكان دايرين ممكن نعدهم .. وإن كمان دايرين الشايقي ينكر إنه شايقي.. برضه دي ما بتلقوها.. في شان شنو ينكر محنته وحبه لاهله السمحين وأرضه؟ سلام للزومة فوق والزومة تحت..وكريمة ومروي والمقل..وشوق رهيب لنوري والبركل والحزيمة و...و..... وأنا ماشية ليهم كلهم قريب..
......... .........
شايقية وهلالابية أحمد الله
سلام يا عمران
01-27-2013, 02:33 PM
ناصر حسين محمد ناصر حسين محمد
تاريخ التسجيل: 01-09-2013
مجموع المشاركات: 5237
حرم يابت العم كمان كان قلتي كدا وختيتي معاها ريــال مدريد أمانة ما تكوني أسعدتينا أن وأخوي عمران دا !!
هييييع !!!
ياعمران بمناسبة الريــال : علي ولدي عمره خمسة سنوات مدريدي قح ، قام جلط شعرو كدا وجاني قالي لي Dadi, does it look like Christiano's ? x قلت ليه لا لا ، شعرك شين !! قما زعل قال لي : you want to say that it looks like Arbeloa's?x والله ضحكت من رباطابيتو ومن معرفتو لأسماء اللاعبين الجيدين والمكروهين من المشجعين!!
01-27-2013, 02:40 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39372
فأتي لي بقبيلة فيها ثلاث طوارق بوزن من ذكرت...من حيث الزوق والادب واللطافة والشهامة والتجرد والابداع ونكران الذات...والحنية والموهبة والرجالة....وعييييييك قل ما شئت
Quote: يا زول يعنى لصراحه كده بيعجبنى فيهم الشعر الناعم واللون الغامض امتزاج جمالى عججججججججججججججججججججيب والعيون السوده البتخلى الطير يقع من سماه وملامح الما دشنه لكن يعنى لصراحه كده مخهم فى الحريم كعب شدددددددددددددددددددديد برغم انهم رومانسيين قادر الله وغيورين غيرة اخنق فطس لكن يعنى لصراحه كده الشكك دا ماااااااااااااااا حلو وان الانثى مفروض تكون مفعوصه طوالى معاهم المهم حمشين ودمهم حار لكن بالجنبه كده عينهم زايغه ويحبوا الهبطرش لكن مع ناس البيت العين قويه زى الصقر ودا انفصال فى الشخوصه ما جميل :))))
إنتهيتي مننا غايتو رسمممممي وشعبي !!
01-27-2013, 02:43 PM
وضاحة وضاحة
تاريخ التسجيل: 01-16-2005
مجموع المشاركات: 9116
مساء جميل لكل المارين بى جاى ..... وتحية خاصة للزول الكتابتو طاعمة اخونا ( عمران ) ..... ومادام كترت سيرة انو الشوايقة ديل ناس مميزين ( وش ضاحك ) لازمن تجى سيرة التريال المميز ( معلقات الشايقية ) ( العابرات ) ( محمد احمد الحبيب ) ..... كدى شوفو الزول ده قاعد يقول شنو وحجم الجمال الداخلى الساكن الزول ده والناس الحوالينو : يا عابرة عبر الدم شايلك شرايني أنا بي لقاك مهتم بس كيف تلاقيني لو عمري يتقدم وأضمن تلاقيني أنا بعدو ما بندم لو مُتَّ في حيني دنيا العذاب والهم ماشيها وحداني لي غيري بتبسم وفي قلبي احزاني رغم الصبر علقم في صبري متفاني مع اني بتألم من جوة وجداني الطيف يزيدني اشواق في النوم يناجيني ويرحل بدون إشفاق ساعة يصحيني يا طيفا كان مشتاق لي مين مخليني طفل الغرام العاق .. ربيتو ومابيني يا عابرة دنيا الجن بي كل أعاصيرا لو سعدي ما ممكن احسن لي من غيرا أنا بي لقاك مؤمن لكني في حيره يصعب لقاك كيفن والدنيا بي خيرا نهر الاماني سراب يا عابرة ارويني غير ما السما الصباب طول مجافيني والليل يزيدني عذاب في جوفو يطويني كل ما الدمع ينساب من جفني يسقيني يا عابرة حتى الآن عينيكي آسراني سحراً ملكني زمان سكنتو اشعاري راجيك زمن عطشان ما صبت امطاري ليه في سحاب دخان يا القمرة تنضاري ؟ يا اماني لي بكرة والليلي والبارح شايلك معاي ذكرى كان واعي كان سارح بس يوم تبين سفرة يا عابرة بي الواضح في نيتي من فترة داير اجيك نازح آه لو قدرت اجيك .. رؤياك مراد عيني أكسير حياتي وشيك من حزني يشفيني من اشتياقي إليك يا عابرة دسيني ما بين رموش عينيك شيليني ختيني وأنا كنت شئ مجهول يا عابرة لولاكي مع أني أول زول من بين ضحاياكي فرشّتِي عمري الشاق اشعار من إملاكي كانت على الاطلاق أجمل هداياكي مصباحك المسحور جاهرني عاميني سايق خطاي مبهور يسوقني يوديني ما عارف المقدور بالفرقة راجيني خارج نطاق النور حايم حواليني عابرة الزمن ظلام .. في ظلمو متوالي بقت الحقيقة احلام واحزاني شيء عادي واصبح علي الزام كل ما صدح شادي اهديك مدى الايام .. ألحاني وانشادي
01-27-2013, 03:53 PM
maman maman
تاريخ التسجيل: 11-21-2002
مجموع المشاركات: 1041
حكاية (عشماني والورر) من الحكاوي الظريفة التي قرأتها.. كاتبها حسن العليش من أبناء جزيرة مساوي... (عشماني) إحدى عجائز الحلة ولكنها ما زالت متشبثة بالحياة، تصر على ممارسة حياتها كباقي الناس. تركب حمارتا و(تندلا بي تحت) عشان تجيب القش للبهائم وتلقط خدار للملاح وتفسخ القنقر.. ولكنها في ذلك اليوم لم تضع في حسبانها ما يخبؤه لها القدر.. حينما قفز ذلك (الورر) اللعين أمام الحمارة.. ولنرى ما حدث... كما صاغه (حسن العليش):
قالت عشماني لصاحباتها وهي تحكي ما حدث نهر حُمارتي والجبنة رأماني رأسي يسوي في التح ترح و بالضهاري شاققت طلعت بي دريب ود عدلان .. جيت عِند الحفير والجدول مليان والواطة شرباني والموية مدفقي في درب الساقي حُمارتي إتعدت وبي وسط العيش ماشي وأنده في الشرايف. أشوفلِك الورر المرق من الجدول الضكر وطار زي العُصار وإتقلب في حوض العيش والحمارة قالت بي كدي ورمتني علي صفحتي . البرسيم واللوبي كلو فوقي وقفيفتي بي مُلاحة إنكبت في المُوية.. كُراعي إتلوت مِن تِحت وساعةً طويلي وأنا في محلي وفي حالاً كُتُر وغالبني القومة . والورر سمع أضاني يسوي في البط بط مرقة في الدسامعة . وأنا راقدي في بِكيني نعلتو تكيتو صفحة صفحة قلتلو شكيتك علي الله ، وإنت أكان فيك فايدي ما سموك ورر يالعاطل ، حايم في الجروف وتمرُق من الحلفي تدخُل في الطرفي لا عندك شغلة ولا مشغلة ، العوم مِتل أخوانك ما قعد تعرفو تغطس زي الحجر وتبنقر في نُص البحر من خوفك . رفاقتك قاعدين وساكنين في الدالات والشلالات هِناك وسط الحجار والكير القاطِع في الحامداب.. الصغير فيهُن يشيل العروس بي عريسة فوق ضهرو ويعديهُن البحر في عِز الدميري.. أقعُد إنت هني أحبس الدروب والراكِب كُلو أهجمو وأرمو . رجيت الله يرميك في إيد الكراقنا والا التكارنة ينجضوك وياكلوك .
ولاد الحلال جابوني وصلوني لكن المخروقة والترقوي الدخلتن ما ب تمرق ومِنُو العوض وعليهُ العوض . وإتقلبت علي صفحتة وكوركت الحقوني الحقوني،، الكُراع الكُراع ، الإيد .. شكيتك علي الله يالورل ،،،،
01-27-2013, 04:14 PM
الفاتح سليمان الفاتح سليمان
تاريخ التسجيل: 09-14-2009
مجموع المشاركات: 1735
معليش يا سادة يا طيبين حا أميَز حكاية مامان دي وبي لونه الأزرق زاتو لأنها بالجد متعتني طريقة الحكي
Quote: نهر حُمارتي والجبنة رأماني رأسي يسوي في التح ترح و بالضهاري شاققت طلعت بي دريب ود عدلان .. جيت عِند الحفير والجدول مليان والواطة شرباني والموية مدفقي في درب الساقي حُمارتي إتعدت وبي وسط العيش ماشي وأنده في الشرايف. أشوفلِك الورر المرق من الجدول الضكر وطار زي العُصار وإتقلب في حوض العيش والحمارة قالت بي كدي ورمتني علي صفحتي . البرسيم واللوبي كلو فوقي وقفيفتي بي مُلاحة إنكبت في المُوية.. كُراعي إتلوت مِن تِحت وساعةً طويلي وأنا في محلي وفي حالاً كُتُر وغالبني القومة . والورر سمع أضاني يسوي في البط بط مرقة في الدسامعة . وأنا راقدي في بِكيني نعلتو تكيتو صفحة صفحة قلتلو شكيتك علي الله ، وإنت أكان فيك فايدي ما سموك ورر يالعاطل ، حايم في الجروف وتمرُق من الحلفي تدخُل في الطرفي لا عندك شغلة ولا مشغلة ، العوم مِتل أخوانك ما قعد تعرفو تغطس زي الحجر وتبنقر في نُص البحر من خوفك . رفاقتك قاعدين وساكنين في الدالات والشلالات هِناك وسط الحجار والكير القاطِع في الحامداب.. الصغير فيهُن يشيل العروس بي عريسة فوق ضهرو ويعديهُن البحر في عِز الدميري.. أقعُد إنت هني أحبس الدروب والراكِب كُلو أهجمو وأرمو . رجيت الله يرميك في إيد الكراقنا والا التكارنة ينجضوك وياكلوك . ولاد الحلال جابوني وصلوني لكن المخروقة والترقوي الدخلتن ما ب تمرق ومِنُو العوض وعليهُ العوض . وإتقلبت علي صفحتة وكوركت الحقوني الحقوني،، الكُراع الكُراع ، الإيد .. شكيتك علي الله يالورل ،،،،
عندي عماتي إتربن في البلد وما طلعن منها ، واحدة الله يرحمه " أم الخير " والتانية " النعيمة أو النعمه " إتملت شيب لامن كنت اقعد اسمع القصص كنت استغرب للحبكة وطريقته العبارات العجيبة ولو غيرناها لاختلف المعنى وراحت روح الحكاية بنضم البلد الصااااااااااح داكـ . صدق في الوصف ضافت ليهو عبارات البيئة الكثير فصار مشهدا درامتيكيا ممتعا
01-28-2013, 06:03 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
حيا الله عمران وضيوفه، من حق كل إنسان أن يعتز بذاتو وأهلو وقبيلتو! ومن حقو أيضاً أن يعتقد بأنو ناسو هم أحسن البشر! وتقريباً ده الشيء الطبيعي! ومن كان كذلك حقاً، فلن يعتدي أبداً على شعور الآخرين أيضاً بالانتماء إلى قبائلهم وأجناسهم!
وأصلاً مشكلة العنصرية لا تُحل إلا من خلال إحياء كلّ إنسان لقيم الاعتزاز بذاتو وناسو وأهلو!
فمسألة رمي قبيلة كاملة بالسوء والعنصرية، بسبب انتماء البعض ليها، ظاهرة برزت في هذا المنبر، وهي ظاهرة خطيرة وخاطئة!
+++
01-27-2013, 07:44 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
هو انفصال الشخوص ده تطير عيشتو ده معلَق في رقبة أيِ سوداني وخاصة القبائل المعنونة نفسة بأنها الأكبر طريقة التربية والتعامل بتخلق الإزدواج في شخصية الناس غصباً عنهم لكن بعد داكـ التعليم ومعاشرة باقي خلق الله بتعلم كتير لكن السؤال : هل يكون ذلكـ سبباً مباشراً لتقليل قيمة أحدهم باعتباره شايقي ؟ يفعل البعض ذلكـ للأسف الشديد علماً بأن بعض الآخرين من بني شايق وبسبب نظرة ضيقة وقلة فهم يكون رد فعلهم أسوأ وبالتالي تكون التهمة جاهزة بتعنصرهم .
... شكراً زميلة الحوش : رانية محمد الشيخ
01-28-2013, 07:25 AM
إدريس محمد إبراهيم إدريس محمد إبراهيم
تاريخ التسجيل: 03-13-2006
مجموع المشاركات: 2762
أحب الشايجية جداً وأعشق أغنياتهم وأشعارهم حتى الثمالة رغم إني من المحس ومتزوج محسيه بت خالتي وطبعاً لا مانع في مثنىً وثلاث ورباع ... (التقول عزام فرح بس وله معتز قريش بس ..) ...
وأغلب أصدقائي من الشعراء شوايجه .. عماد الدين عبد الرحيم (سو رضايا ..) .. الواثق عبد الرحمن مثالاً ....
حسع صديق الموج يجيك ناطي يقول ليك أنا شايجي ...ياخ الزول ده لو قلت ليهو أنا من أم صفقاً عراض يجي ناطي ليك في حنانك ... عالم جنها سلبطه ....عامل زي واحد قريبتنا كده كل ما يكون في بكى تلقاها ست البرش ... هههههههه ....
أعتذر لكل الأحباب عن تأخيري الرد على مداخلات الأحباب والوعد بالتواصل مستمر ...... من أكبر عيوب مساحات النت الممتدة تداخل البعض في مواقع بأسماء وهمية منها يكتسبون شجاعة من شرب كأساً من العرقي التالف ثم فجأة صار أبو عرام وهذا نموذج واضح لما ذكرت : صديقنا عماد عبد الله قال كلاماً حميلاً وهو يقوم بإنزال هذا الفيديو : قال :
Quote: صباحات أواخر الشتاء عليكم يا أيها الديامة .. هذا البلد عجيب .. هجين من المسكنة ، و الفتونة ، و كسر الجناج ، و الراس الفي السما ، و الزارعنا غير الله اليجي يقلعنا ، و جبرة الخاطر ، و نحنا الساس ، و عزه التي في هواها ، و حليل موسى ، و جدك بيضبح الشايل .. و يا غِرِق يا جيت حازِما .. في بلدٍ غير هذا و في غيرما زمانٍ تأكل فيه الحرائر من أثداء عزتها .. لرعت الدولة مبدعيها .. مبدعيها من طرف . لكن ( سبايا نحنُ في هذا الزمانِ الرخو ) .. هذا الزول عجيب .. فنان شعبي بديع .. ايقاعه مضبوط حد الإذهال .. الجرس الموسيقي الذي نضم به هذه الكلمات المجغمسه و دوزنها على الغنا .. ثم حال الحزن الذي يطلع من نظراته فيوجع القلب .. ثم الكواريك التي يطلقها حرى فكأنما ينفث نار قهره و غبنه الكبير . هذه كوميديا سوداء .. ملهاة غاية في البؤس و الجمال في آن .. أعتذر لمن سوف يألمه هذا الغناء و يوجع .. لكن - و أنا القادم من أتون الخرطوم - حال هذا الزول الجميل أفضل أفضل أفضل من أحوال الخلايق هناك .. الخلايق التي أقعدها الفساد و الظلم و الفقر و الإهمال و الحوجة و انعدام الوجيع . الخرطوم التي حولها النظام الإسلاموي الفطيس لمكان ينضح بالعفونة و المسكنة و نقص المروة و الدين و النخوة و مخافة الحساب في يوم الدينونة ، الدينونة لكل هذا الخراء الذي أفرزه النظام الشيطاني هذا و ولغت فيه المخاليق التعاسى ، فريدي الجمال .. ما من حي و لا طريق فيك يا خرطوم إلا و به درويش أو مجنون أو متسول أو من ذهل فكضم و سكت .. لكن ، الحساب ولد يا عصبة السؤ .. الحساب بعدين ولد .
... تفاجأت بداخل تعليقات الفيديو المرفق بموقعة الأصلي بتعليق لا يأتي إلا من صاحب اسم وهمي يقول : غير السكر وسرقة البلد وشبق نساءكم واصواتكم النكرة ماشفنا ليكم حاجة فى البلد دى أدناه صورة للتعليق من الموقع :
01-30-2013, 05:15 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
اكيد اخى عمران مافى اى سبب بيدى اى عذر لاى انسان يقلل من قيمة انسان حتى لو فيه السبعه وذمتها حتى لو الانسان غلط ما معنى كده انه سيىء احنا بشر فينا الصح وفينا الغلط مافى زول فينا كامل اصلااااااااااااااااا ولا بيعيب الزول انه غلط طول ماهو بيسعى انه يصلح من شأنه ردى الاول كان هزار بحت ما جادى
01-29-2013, 11:10 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
فأتي لي بقبيلة فيها ثلاث طوارق بوزن من ذكرت...من حيث الزوق والادب واللطافة والشهامة والتجرد والابداع ونكران الذات...والحنية والموهبة والرجالة....وعييييييك قل ما شئت
نزار حسين يا حبيب الله يجبر بي خاطرك ياخ اعطيتني اكثر مما استحق
01-30-2013, 02:51 AM
nazar hussien nazar hussien
تاريخ التسجيل: 09-04-2002
مجموع المشاركات: 10490
اعتذاري وتقديري لكل متداخل لم أجد ما يكفي من الزمن للترحيب بمروره لكم العتبى أصدقاء الفضاء الواسع ..... الحمد لله أن عاد إنسان إلى إنسانيته وتركـ عنه الســوء
Quote: الشايقية وتاريخهم الأسود في السودان.. هؤلاء من نصر الإنجليز ضد المهدية.. هؤلاء رقيق الإنجليز.. هؤلاء من لا صلة أو رابط لهم بهذا الوطن.. العياذ بالله أن تكون شايقيا..
كن أي شئ كان.. كن إنسانا.. لا لا لا تقل لي أنك شايقيا.. خاصة بعد الإنقاذ.. وصدق أهلنا قديما وقبل زمان طويل قبل الإنقاذ عندما كانوا يقولون: لو وجدت الدبيب وولد الشايقي.. أقتل ولد الشايقي وأترك ولد الدبيب.. سبحان الله.. إنهم كانوا يقرأون لنا المستقبل.. العياذ بالله أن تكون شايقيا.. كوزا.. شيوعيا.. أو بوذيا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمران حسن صالح
أيمن محمود
فايزودالقاضي
وضاحة
Elsanosi Badr
خالد احمد محمد
حيدر حسن ميرغني
هجو الأقرع
أحمد الشايقي
osman righeem
saidahmed shami
Muna Khugali
ناصر حسين محمد
ABUHUSSEIN
خالد عبد الله محمود
maman
الفاتح سليمان
طارق جبريل
المسافر
إدريس محمد إبراهيم
عمار محمد ادريس
حمد عبد الغفار عمر
ismeil abbas
مزمل خيرى
haroon diyab
حسين ديقول
فيس بوك
تويتر
انستقرام
يوتيوب
بنتيريست