ونسة سواقين الحريم

كسلا الوريفة يحاصرها الموت
الوضع في كسلا يحتاج وقفتنا
مواطنة من كسلا توضح حقيقة الوضع في المدينة و اسباب وباء الشكنغونيا حمي الكنكشة - فيديو
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 24-09-2018, 10:31 AM الصفحة الرئيسية

مدخل أرشيف الربع الاول للعام 2013م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
23-01-2013, 10:33 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


ونسة سواقين الحريم

    مقدمة:
    واحد ساكي القطر اجري وقع اجري وقع
    واحد من الركاب بعاين بالشباك قال ليهو كفاية ياخ قتلتنا من الضحك
    قال ليهم اصبرو بعد شوية حا تموتو من الرعب أنا سواق القطر يا اولاد ال######


    تحذير: المفترع عائلي نرجو عدم التلميح بالتعليقات الخادشة

    توجد شوارع بالرياض تم تخصيصها لرياضة المشي شوارع متعه تلقي مع كل ناصيه محلات للمثلجات والكوفي ، مواقف سيارات اماكن ،جلوس للسواقين ، مساطب اسمنتيه.
    انت بتتريض شغاله في راسك مكائن مياه البخار البارد برزازها المتعه تلفحك نسمة تشبه نهاية المطره مع الهمبريب في السودان.
    كل مره بمر بالشوارع دي بشوف غالبية الناس البتريضو نساء افتكرت النسوان ديل بمشو عشان الولاده غالبية النسوان سمان ((النوم والكبسة بتعمل عمايل عجيبه))، ما كنت بدقق في البطون للانشغال والسرعه . بعد الزواج والحياة الزوجيه لها اسرار واشياء مخفية يتم اكتشافها بعد دخول القفص ظهرت لينا حكاية التمشي والرياضة توجهنا الي شارع الحمل ((بضم الحاء)) كما كنت مسميهو سابقا مع العذابة لعدم درايتنا بطبيعة هذه الرياضة ولجهلنا عن الحياة الزوجيه كما أن بالسودان نادرا تجد حريم بتحاومن الي الواحده تكون حامل وماشة معاها كم واحده.
    الحكاية هنا التمشي للمحافظة علي جمال الجسم والرشاقه والخفه يعني نوع من الجمال.
    وقفت العربية ومرهق من الدوامات حيلي مهدود قلت اشوف لي محل اجلس فيهو مشيت علي سواقين العوائل اتونس معاهم لما جماعتي اخلصو المشي... الونسه مع الاسيويين صعبه لعدم الفهم عربي مكسر انجليزي تلاقيط الكلام يكلفك مجهود ذهني ربنا هداني علي سوداني قلت احسن شيء ولد بلد قعدنا نتونس سواء:
    سألني الاخو من وين ؟؟؟
    قلت ليهو من مدني ...
    قال لي انا من الشماليه لكن اسمع ما اكون من قري مدني تقول لي من مدني ؟؟؟
    عشان الونسه تكون ساهله قلت ليهو قول من الجزيره ...
    قال لي ... ها زول ها الجابرك علي الكذب شنو كلنا سواقين الحريم ديل الله اقبحم.... بتكلم معاي جات حرمه ماشه نحيفه سكت الراجل بعد فترة قال لي انا شغال مع الماشه دي زي الشهفوفه انا ما عارف الناس دول السمان بمشو عشان إضعفو الداهيه البتشبه السخل ماشه عايزه تبقي شنو قنايه غايتو نقول شنو رزقنا نحرسا لما تتم تنططا زي الصبره بعد داك نمشي... والله رزق..
    ثم استمر في الكلام .... نكسر الزمن يا الاخو بالونسه انت زولتك انشاءالله كويسه معاك؟؟؟
    قلت ليهوا والله يعني نص نص.. ثم فاجأته بسؤال طيب انت وقتين زهجان منها ما تخليها الجابرك شنو؟؟؟؟
    زولنا اخذ ليهو تململه او قعد كويس قال لي شوف الناس ديل عندهم مزرعه قدر ما حاولت امشي اشتغل فيها مالقيت طريقه كمان عندهم اسواق مواد غذائيه جاجيتم فيها لمن الله غفر لي مالقيت طريقه قلت لي زوجها انا زهجت من الشغله دي اديني نقل كفاله ولا اعمل لي خروج نهائي الراجل طيب بس الكلام ما عندوا عند الشهفوفه دي بعد كترت عليهو الكلام زنيت ليهو في اضانوالظاهر مشي شاور قال لي خلاص انا عندي فيزة سواق سوداني شوف لينا واحد استلم منك اكون زيك كده انا بوديك الاسواق من الفرحه قلته اطير....
    عندنا وليدا لي اخونا شغال في لوري طوب في البلد حالتو بي البلا قلت نجيبو هنا الولد مسكين ابوهو عدمان التكتحو رسلنا ليهو والحمد ليك يا الله الراجل جاء.
    مشينا استقبلنا في المطار اتقول مطلعنو من دوكه الليلت عواسه والتفه زي الشيطان مشينا البيت جيهتو بي الحمام حلقت ليهو بعد ما طلعنا ليهو الاقامه والرخصه انا ودوني الاسواق .
    عليك امان الله ما قعدته لي شهر الشهفوفه دي اتصلت بي قالت لي تعال الحين ابغاك عشان تعرف السالفة!!!
    ((قلته ليها بي قلبي انشاءالله المو فيك عشرة فحول اتغابوا فيك العرفه))...
    مشيت قلنا نشوف السالفة ((الحاصل)) الفار نقز في عبي ما اكون الوليد ده جاب لينا مصيبه مع الحرمه دي دقلا اكركب.
    وقتين قابلت الحرمه قالت لي الجبتو ده ما عايزنو!!!!
    هي يا بت الحلال استهدي بي الله الحاصل شنو قالت يلا روح استلم منوا المفتاح....
    مشيت اشوف الحاصل سألت الوليد ياولد انا عايزك تنفع اهلك تشتغل هنا المشاكل العملتها دي شنو؟؟؟؟
    الولد قال لي: بعد اديتني المفتاح كنت بمشي مع السواق الهندي في الشوارع كلامو شتر شتر المهم عرفت اسوق كيف في البلد الشوارعا تشبه لي لعبة الثعبان. انا نايم المغربيه جاتنا المرأ الذي المسواك دي قالت لي لازم تلبس ثوب؟؟؟
    قالت افو انا اخوك يا امنه انا البس ثوب عليك الله المرأ دي ما مطرطشه....
    ها البهيمة الثوب هنا يعني جلابيه يا الاصنج الما بتفهم...
    هي لكن جماعتك ديل خلوني افهم المرأ زعلت مشت مني جاني الراجل شايل جلابيه بي لياقه او معاها شيتا كدي بختو في الراس او معاهو حبل اسود قال لي البس ديل بكره قلنا طيب..........
    ثاني يوم لبستهن والله الجلابيه وقتين شفتها في المرايه قلته الجماعه في السودان كان شافوني اقولوا عثمان ود طه بقي خائب جلابيه بي لياقه ضيقه بقيت زي الصارقيلا ختيت الداهي الاحمر في الراس معاهو الحبل الاسود والله بقيت بس الطيره ام قدوما احمر قلنا طيب اكل عيش نعديها ليهم بعد يومين جابو لي الداهي ده قالوا لي إن اتصلنا عليك تشوف النمره ما ترد علينا كان انت في البيت تطلع لي بره عندنا مشوار .
    يعني الجرس وقت اسوي ررررررررننن انا ابقي لي بره اها الشهفوفه دي حمتني النوم الليل كلو ررننننننننننننننننن . عليك امان الله زهجت منو رميتو ليك في الجك الليل المويه جمبلغ جمبلغ كضم كضمت حبوبتي ديك او نمت نومي قفلت اللوضه الزي بيت الحمام دي او نمت. تاني يوم قايلني هربت اهرب وين عليك الله في بلد الطرش دي وقتين صحيت من النوم جاتني المرأ النجاضه دي تكورك وللل وللل قلت ليها ما تصني راسنا بي كوراكك ده مرقت ليها الموبايل قلت ليها الداهي ده خرب خربااااااااااااااان يا وليه والله خربان دي فهمتا ليك جري اها ساقوني مشوار بعد رجعت جاتني شايلا ليها واحد تاني قلت في سري الناس ديل نتحلا منهم كيف (( احلني الحلا بله)) لكن والله كان ارمي ليها في الجك تاني عليك امان الله ما قعدنا شويه أنا افكر في الخلاص منهم الداهي ده رن رنننننننننننننننن لمان جفلته نطيط نطه اتقول عضاني دبيب قالوا طالعين تاني.
    طلعنا لي حفله في قصر (( صالة الافراح) وقفت العربيه قدام القصر المرأ الشهفوفه دي قالت لي انزل افتح الباب قلت امكن الباب عصلج معاها نزلت فتحتو لقيتو زي الباسطه الحريم كلهن اعاين لي تاري الباب ما معصلج افو المرأ استقفلتني والله زعلت زعله انا قاعد منتظرن لي الساعة اربعه صباحا قاعد مع السواقين كاضم خشمي ده بقم ما قالا ما إتونست معاهم وقتين جو طالعين مع جوطة النسوان وقفت لي زي الصنفور قالت لي افتح الباب!!!
    قلت ليها افو انا اخوك يا امنه افتح ليك الباب انا امي دار النعيم في لوري الطوب ما بفتح ليها الباب افتح ليك انتي.........
    أها ده كلو الحصل. عليك امان الله.
    اتملم صاحبنا في القعده من الجلوس علي حجر الاسمنت او قال : الوليد طلع انجض مني والله حسي شغال في الاسواق بقي زي التور من اكل الطحنيه وأنا موكح بالمرأ الشهفوفه دي .
    فجأة ظهرت المدام بتاعتو زولنا قام فتح ليها الباب مع السلامه ما قالا لي.
                   |Articles |News |مقالات |بيانات

23-01-2013, 10:49 AM

حسين ديقول
<aحسين ديقول
تاريخ التسجيل: 17-01-2013
مجموع المشاركات: 954

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    ود جيرانا عندو مشاكل مع كفيه

    بجي بجاي فكيناهو منو

    ولقو ليه شغل في جدة سائق خاص

    بعد كم يوم كدا الزول يتصل علي

    يا حسين أنا في الرياض

    مالك الحصل شنو ، اوع تكون خليت الشغل

    رد أيوا خليته

    أها السبب شنو

    قال البت قالت ليه تفتح الباب

    قال ليها الثوب والغترة لبستهن

    لكن أفتح الباب عشان تركبي وتنزلي يمين ما بسوهين

    جاني هنا وعلى طول عمل خروج نهائي
                   |Articles |News |مقالات |بيانات

23-01-2013, 11:23 AM

سليمان القرشي
<aسليمان القرشي
تاريخ التسجيل: 12-01-2013
مجموع المشاركات: 1485

للتواصل معنا

FaceBook
تويتر Twitter
YouTube


Re: ونسة سواقين الحريم (Re: حسين ديقول)

    تحياتي عباس
    كدا افتح لينا باب البوست الندخل
    تعرف ياعباس الشغل ماعيب نحن
    ناسنا العندهم الحماقة وفي النهاية
    انا ظروفي جبرتني واشتغلت بشتغل
    بي فهم المخدم والا بسفروك وفي الف
    غيري ممكن امسك مكاني واعمل اي حاجه
    لكن زولك لي الليلة بكون قايلك شغال
    مع مدام لكن بيني وبينك كلنا شغالين
    مع النسوان بس الفرق انو نحن بنوصل
    مجان وبل بنخصر من جيبنا وديل
    اخر الشهر بقبضو الكاش.
    تسلم اخوي
                   |Articles |News |مقالات |بيانات

23-01-2013, 11:45 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: ونسة سواقين الحريم (Re: سليمان القرشي)

    والله يا عبس هبشت المسكوت عنه

    كان كدا نحن كمان نجيب المرادفات لموضوعك

    سواق الحريم مهنة من له مهنة ومهنة من لا مهنة له زي الصحافة يعني

    ما الصحافة ظلط كمان ؟؟
                   |Articles |News |مقالات |بيانات

23-01-2013, 12:56 PM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: درديري كباشي)

    حسين ديقول سلامات يا وجيه
    احكي ليك قصة طريفة صغيرة يا حبيبنا:
    المدير التنفيذي في شركتنا شغال معاهو هندى سواق في البيت الراجل امورو ماشة كويسة ومرتاح في الشغلة امشي السوق إوصل المدارس يوم ظهر ليهو واحد بي شغلة في شركة والراتب كبير وبما أن الراجل عندو علاقة خاصة معاي في بعض الخدمات حكي مشكلتو تتلخص ((عايز إترك شركتنا لانو وجد شغله كويسه براتب كويس غير كده اتفك من سواقة العائلة)).
    نصحتو قلت ليهو حلك واحد تشاكل ليك مدير من مدراء الشركة هنا عشان تتفصل.
    رد عليك ....يعني مدير انا اعما جنجال سواء انت ...
    قلت ليهو انا خليني يا الفالح شاكل الزول البتوصل ليهو بناتو المدرسة.
    تاني يوم مشي اجيب البت من المدرسة وقف ليها شرق الظلط وقعد إأشر ليها بي يدو (( يا حرمه يلا تعال هنا اركب سيارة)) .
    البت محتارة كيف تعبر شارع الظلط من زحمة السيارات بعد فترة طويلة ساعدا الخفير بتاع المدرسة مشت ركبت السيارة ومن البديهي كلمة والدها بي المشكله.
    استدعو السواق سألو والد البت ((المدير التنفيذي)) ليه ما مشيت للبت جمب الباب عشان تسوقها.
    رد ليهو السواق: هذا بنت انت فكر سيم سيم اميره أنا روح سوا سوا باب اركب. ... الترجمة ((انت بتك مفتكره نفسها اميره عشان انا امشي اشيلها من جنب الباب))
    زولن اتفصل بالمشكله
                   |Articles |News |مقالات |بيانات

23-01-2013, 01:06 PM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: لكن بيني وبينك كلنا شغالين
    مع النسوان بس الفرق انو نحن بنوصل
    مجان وبل بنخصر من جيبنا وديل
    اخر الشهر بقبضو الكاش.
    تسلم اخوي

    سليمان القرشي يا حبيب اخبارك
    في زول صاحبي عندو فلسفة عجيبه للزواج حتي الان ما اتزوج تسألو اقول ليك .... اجيب لي زول معاي في الميز وما إدفع.
    شغل المكاتب عرفناهو اما شغل سواق بعد المكاتب محيرنا لي حسي
    المشكله هنا ممنوع قيادة النساء للسيارات تعرف البغيظني شنو!!!
    حكاية الانتظار في الشارع او امشي وقت نكون عايزنك بنتصل بيك
                   |Articles |News |مقالات |بيانات

23-01-2013, 08:30 PM

هشام كمال عبادي
<aهشام كمال عبادي
تاريخ التسجيل: 30-10-2010
مجموع المشاركات: 2073

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    عباس الدسيس ..
    صدقني انت فتحت ابواب ناس تخاف تطرقا ..
    المشكلة ان ما كل من وطأت اقدامه السعودية من غير حاملي الشهادات الدراسية ..
    وبالأخص من حضر الي السعودية بفيزا (حرة) كما يقال ..
    هم اول من يسعى للعمل كسائق عائلة ..
    راتب ضعيف ولكن اكل مجاني وسكن مجاني ..
    ولكن هي مهنة هامشية لا استقرار فيها ولا ادخار ..

    شكرا لك فانت احد كتابي المفضلين في المنبر ..
                   |Articles |News |مقالات |بيانات

23-01-2013, 09:14 PM

علي محمد الفكي
<aعلي محمد الفكي
تاريخ التسجيل: 08-01-2013
مجموع المشاركات: 3700

للتواصل معنا

FaceBook
تويتر Twitter
YouTube


Re: ونسة سواقين الحريم (Re: هشام كمال عبادي)

    الشيخ ود الشيخ

    سواق العائلة دي من المهن الما عندها وقت دوام محدد

    يا اخ لو طفل عاوز بسكوت برسلو السواق وفي اي وقت ..

    عندي قريبي سافر نهائي في اسبوع بي سبب رفضو المرسال ..

    قال على اخر الزمن اترسل ....

    قدر ما حاولنا نقنعو انو كل المغتربين ديل بترسلو ما اقتنع ..
                   |Articles |News |مقالات |بيانات

23-01-2013, 09:33 PM

ابوحراز
<aابوحراز
تاريخ التسجيل: 27-06-2002
مجموع المشاركات: 5345

للتواصل معنا

FaceBook
تويتر Twitter
YouTube


Re: ونسة سواقين الحريم (Re: علي محمد الفكي)

    أعرف سائق عائلة كنت من النادر ان أقابله نهارا لانشغاله بالعائلة
    ولكن كنا نتقابل يومياً في صلاة الصبح وهي اللحظات الوحيدة التي نسال فيها عن حال بعضنا
    توفى هذا السائق في حادث نسال الله له الرحمة والمغفرة
    وكان وقت الحادث بمفرده
    حصل هذا الحاجث الأليم منذ خمس سنوات والمرحوم لديه ولد واحد
    هل تصدقوا منذ وفاته
    وحتى هذه اللحظة لم ينقطع راتبه نهائياً
    ففي كل شهر يقوم الكفيل بارسال راتب المذكور دون اي نقصان
    هذه إحدى الصور المشرقة والجميلة
    والتي نتمنى ان يرسمها الجميع { السائق والكفيل }
                   |Articles |News |مقالات |بيانات

23-01-2013, 11:45 PM

احمد سيد احمد
<aاحمد سيد احمد
تاريخ التسجيل: 23-01-2013
مجموع المشاركات: 1243

للتواصل معنا

FaceBook
تويتر Twitter
YouTube


Re: ونسة سواقين الحريم (Re: ابوحراز)

    السلام عليكم اخونا عباس....والله اقرا واضحك براي زي المجنون
    مشكلة جماعتنا الطيبين انو الواحد ما بشرحوليهو شرح كافي يعني شنو كفيل ويعنو شنو كفالة
    والناس بتجي راسمه صورة وردية شديد عن السعودية انها بلاد الدين والحرمين
    ويجي يتصدم...اقل شيء الزول يشاور الناس القاعده هنا ويسال ويعرف عن حال البلد من كل النواحي وقوانينها وطبيعة التعامل فيها وكدا
    كمان زي دا الجاب ود اختو دا مافي ليهو اي عذر....يعني هو مفروض كان يشرح ليهو الشغل بتاع سواق خاص بكل التفاصيل عشان يقرر انو بنفع معاه ولا ما بنفع وما يجي هنا يتصطدم ويدخل قريبو في حتة ضيقة

    بعرف واحد والله جا بفيزا بدون يستشير زول وخلال شهر واحد قال ما داير وخسر خسارات كبيرة باع حاجات في السودان عشان يحل نفسو....دا كلو من عدم الشوره...والمشكلة الواحد بجي قايل انو اي شي زي السودان ومافي اي فرق

    السنة الفاتت كان في بوست ظريف هنا في المنبر بحكي عن سوداني جا السعودية اول مرة اها اصحابو العزابة رسلوهو يجيب دكوة - زبدة الفول السوداني - من البقالة التحتهم...صاحبنا مشى وجا قاليهم بتاع البقالة قال ما عندو
    واحد من الجماعة نزل معاهو قاليهو ياخ نحنا كل يوم بنجيبها منو كيف يكون مافي...وصلو البقالة قام المغترب القديم قال للجديد كدي اطلب نشوفك بتقوليهو شنو
    قام صاحبنا قال للهندي بتاع البقالة عندك فول حجات ههههههههههههههه

    اها في ناس من جماعتنا بتعاملوا بالبراءة دي....بفتكروا انو المصطلحات واللغة والسيستم كلو نفس البلد هناك

    والشغل ماعيب والله بس فعلا شغلة سواق العائلة دي دوامها 24 ساعة والشافعة ممكن الساعة 4 صباحا تقول دايره شوكلاته يرسلوك تجيبها انت

    اها مفروض يكون في تنوير شامل كامل من الاول عن طبيعة المهنة....وكل زول اكيد عندو قريبو ولا صحبو في البلد دي ممكن يديهو كل المعلومات
                   |Articles |News |مقالات |بيانات

24-01-2013, 06:34 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: احمد سيد احمد)

    Quote: والله يا عبس هبشت المسكوت عنه

    كان كدا نحن كمان نجيب المرادفات لموضوعك

    سواق الحريم مهنة من له مهنة ومهنة من لا مهنة له زي الصحافة يعني

    ما الصحافة ظلط كمان ؟؟


    ابوالدر يا صديق اخبارك والاسرة الاكريمة
    الحقنا بي المترادفات عشان ناس السودان ((يأمنو)) بحكاية المغترب المرتاح
    الزول يومو كلو مكنكش في الدركسون الشقة المدارس الشغل - الشغل المدارس الشقة- الشقة الشغل - الشغل الشقة-
    بالليل اسواق بندة الشقة - العشاء الشقة غير العمل الاضافي يوم الخميس مشاوير خاصة للمدام والاولاد.
    بالله حسب كم مشوار ديل
    90% من فيز السعودية سواق خاص مالم تخلي الاسرة في السودان.
                   |Articles |News |مقالات |بيانات

24-01-2013, 08:11 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: عباس الدسيس ..
    صدقني انت فتحت ابواب ناس تخاف تطرقا ..
    المشكلة ان ما كل من وطأت اقدامه السعودية من غير حاملي الشهادات الدراسية ..
    وبالأخص من حضر الي السعودية بفيزا (حرة) كما يقال ..
    هم اول من يسعى للعمل كسائق عائلة ..
    راتب ضعيف ولكن اكل مجاني وسكن مجاني ..
    ولكن هي مهنة هامشية لا استقرار فيها ولا ادخار ..

    شكرا لك فانت احد كتابي المفضلين في المنبر ..

    حبيبنا هشام سلام
    نحاول أن نقدم بعض المساعدات للشباب بالسودان عندمل تجد فيز خاصة بالسودانيين مطلوبين للعمل هنا
    وحسب الحظوظ ونوعية العمل هذه المساعدات يفهمها البعض من الاهل بان لك الامكانية في ان تتحصل علي الفيز بسهولة
    وتخش في مرحلة كل زول عايز فيزا تسألو شغلك شنو وخبرتك وين اقول ليك ياخ اي شغله بشتغلا بس امرق من هنا
    وقت ما تلقي ليهو فيزا مجانا ابيعو الاهل الوراء والقدام عشان اشتري سائق خاص او تربية مواشي
    بعد داك تعال شوف الغلبة مع الكفيل والشغل
    لو رجع اقولو انت غشيتو واكلت قروشو ولو قعد تجدد ليهو الاقامة مع الزيادات بتاعت ال2400 شوفتا المصيبه ...
    وصلته لي قناعة مشكلة الشباب في السودان مشكلة دولة كاملة لا يمكن حلها بمجهودات فردية ....
    المؤهل وعندو خبره بنساعدو غير كده احسن الواحد اقفل الباب.
                   |Articles |News |مقالات |بيانات

24-01-2013, 08:56 AM

بدرالدين الطائف
<aبدرالدين الطائف
تاريخ التسجيل: 09-01-2013
مجموع المشاركات: 1744

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote:
    أعرف سائق عائلة كنت من النادر ان أقابله نهارا لانشغاله بالعائلة
    ولكن كنا نتقابل يومياً في صلاة الصبح وهي اللحظات الوحيدة التي نسال فيها عن حال بعضنا
    توفى هذا السائق في حادث نسال الله له الرحمة والمغفرة
    وكان وقت الحادث بمفرده
    حصل هذا الحاجث الأليم منذ خمس سنوات والمرحوم لديه ولد واحد
    هل تصدقوا منذ وفاته
    وحتى هذه اللحظة لم ينقطع راتبه نهائياً
    ففي كل شهر يقوم الكفيل بارسال راتب المذكور دون اي نقصان
    هذه إحدى الصور المشرقة والجميلة
    والتي نتمنى ان يرسمها الجميع { السائق والكفيل }

    عبس وضيوفة الكرام تحياتى.
    بوست ممتع وفيهو كمية من الحكى والطرائف .
    عارف يا ابوحراز عندنا واحد سودانى سواق عائلة الله كرمه بعائلة محترمة جداً.
    وربنا فتح على كفيلة بمساعدة ومجهود الزول ده وبقى عنده مؤسسة قدر الضربة.
    امور الشقل كلها ماشة عن طريق السواق وهو صاحب الكلمة الاولى والاخيره.
    وحتى الان العائلة لو مسافرين لاى مكان لازم يطلع معاهم اما المشاوير الصغيره لسائق خاص اخر..
    وما بينادهو الا يا عم ابراهيم .
    المسالة دى ما بتحكمة حاجه محددة غايتو بس نصيبك وفسمتك القسمة ليك ربنا.
                   |Articles |News |مقالات |بيانات

24-01-2013, 09:01 AM

طارق عمر مكاوي
<aطارق عمر مكاوي
تاريخ التسجيل: 16-10-2007
مجموع المشاركات: 720

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    عزيزنا الدسيس

    إستمتعنا بالحكي الممتع .. و فيهو فكرة .. و خاصة حوار زولك سواق الشهفوفة :-)

    أعتقد في مهن و وظائف بطبيعتنا أنحنا كسودانيين ما بتناسبنا .. لشعورنا بإنها بتقلل من قيمتنا الإنسانية .. منها مهن الخدمات و العمل في المطاعم , سائق خاص , أو تشتغل علي باب فندق (الجماعة البفتحوا ليك الباب و إنت داخل أو طالع) ..

    ودي و تقديري


    طارق
                   |Articles |News |مقالات |بيانات

24-01-2013, 09:45 AM

عبد الماجد مصطفى
<aعبد الماجد مصطفى
تاريخ التسجيل: 10-01-2013
مجموع المشاركات: 280

للتواصل معنا

FaceBook
تويتر Twitter
YouTube


Re: ونسة سواقين الحريم (Re: احمد سيد احمد)

    هههههههههههههههههههههههههههههههههههههههههههه - دي قوية شديد
    Quote: السنة الفاتت كان في بوست ظريف هنا في المنبر بحكي عن سوداني جا السعودية اول مرة اها اصحابو العزابة رسلوهو يجيب دكوة - زبدة الفول السوداني - من البقالة التحتهم...صاحبنا مشى وجا قاليهم بتاع البقالة قال ما عندو
    واحد من الجماعة نزل معاهو قاليهو ياخ نحنا كل يوم بنجيبها منو كيف يكون مافي...وصلو البقالة قام المغترب القديم قال للجديد كدي اطلب نشوفك بتقوليهو شنو
    قام صاحبنا قال للهندي بتاع البقالة عندك فول حجات ههههههههههههههه
                   |Articles |News |مقالات |بيانات

24-01-2013, 10:45 AM

رانيه محمد الشيخ

تاريخ التسجيل: 18-10-2010
مجموع المشاركات: 3696

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    غايتو يا عباس ضحكتنى بنصيحتك لراجل كويس انها حققت غايته


    موضوع شائك بالجد خصوصا لحاملين شهادات جامعيه انهم يلجؤا لوظيفه دى
                   |Articles |News |مقالات |بيانات

24-01-2013, 09:47 AM

عبد الماجد مصطفى
<aعبد الماجد مصطفى
تاريخ التسجيل: 10-01-2013
مجموع المشاركات: 280

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    الاخ عباس تحياتي لك ولضيوفك الكرام
    بوست اكثر من رائع ..
    متابعين .....
                   |Articles |News |مقالات |بيانات

24-01-2013, 10:07 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عبد الماجد مصطفى)

    Quote: الشيخ ود الشيخ

    سواق العائلة دي من المهن الما عندها وقت دوام محدد

    يا اخ لو طفل عاوز بسكوت برسلو السواق وفي اي وقت ..

    عندي قريبي سافر نهائي في اسبوع بي سبب رفضو المرسال ..

    قال على اخر الزمن اترسل ....

    قدر ما حاولنا نقنعو انو كل المغتربين ديل بترسلو ما اقتنع ..


    ود الفكي سلامات اخبارك يا زوق والاسرة الكريمة
    تعرف جزء من النص في الحكاية الفوق حزفتو
    حكاية زعل الراجل من ارساله الي الصيدلية لاحضار الفوط الصحية كان فيها نقاش معاهو ظريف المشكله فيهو خروج عن النص
    والمشكلة الاخري هنالك عوائل تستقدم سائق خاص ولا تعي مهام عمله وراحته وامكانية تنفيذ الواجبات
    شوف النكات التي تتداول عن العوائل السعودية ومستوي الفهم:


    عائلة سعودية

    راحوا لامريكا

    وهم باللغه الانجليزية مايفهمو شيء

    لماجاءوا يوقفون تاكسي

    قالوا وهم يصفرون تكسيشن

    وقف التاكسي وركبوا معاه

    وقالو للسواق ودنا لمطعميشن ناكل رزيشن ودجاجيشن

    وداهم للمطعم واكلوا وخلصوا ورجعوا للتاكسي

    وقالوا له ودنا للفندقيشن

    وداهم للفندق

    قال ابوهم من يقول ان اللغه الانجلزية صعبه والله انها تا ف ه واكثربعد

    قال السواق
    والله لو اني ماني اسعوديشن كان اكلتوا تبنيشن

    (عدل بواسطة عباس الدسيس on 24-01-2013, 10:12 AM)

                   |Articles |News |مقالات |بيانات

24-01-2013, 10:57 AM

الشفيع وراق عبد الرحمن
<aالشفيع وراق عبد الرحمن
تاريخ التسجيل: 27-04-2009
مجموع المشاركات: 11864

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    الدسيس سلامات ياخي
    بوست جيد وحكي ممتع
    و
    حصلت لي قريب لي قصتك
    والظاهر هم كلهم بيفتكروا اي زول سايق عربية سمحة سواق
    كت زماان كل جمعة صباحا بدري بمشي اجيب الحليب الطازج من مزارع جنوب الرياض بعد حي المصانع
    قابلتو قريب من بيتنا في الشمال المرسلات
    ركب وقال لي ماشي منفوحة
    ونسني بي كل احواله
    وهو جاء يادوب من 6 شهور
    حسدتو حسد شديد
    بيوصل المدارس وهي قريبة في ربع ساعة الصباح ثم الضهر
    وتاني ما عندو شغلة الا بالليل شوية اسواق وزيارات
    قلت ليهو لو بقيت زيك الا اعمل لي 3 دكتوراة
    حكيت ليهو عن شغلي
    ولو اجتهد ممكن يلقى راتب كم
    المهم
    اقترحت عليهو يستفيد من وقتو
    هو خريج ثانوي
    قلت ليهو يسجل انتساب في الفرع
    ويجيب كومبيوتر يطقش فيهو
    اقتنع وقال ح يفكر
    بعد فترة لاقيتو بالصدفة قال سجل في السفارة لكن الكومبيوتر لسه، وكفيله قال ليهو ح يديهو بونص بعد يكمل السنة
    عرضت عليهو سلفة، رفض وقال لي ابوهو محذرة من حاجة اسمها دين
    غاب ولم اسمع عنه

    بعد فترة سمعت من احد اصحابه انه خلص الدراسة
    وبي طقيش الكوميوتر اشتغل مبرمج في احد شركات ارامكو في الجبيل

    فداير اقول
    الناس ديل عندهم شيء ثمين جدا ما بيستفيدو منو
    الزمن
    الزمن

    ------------------
    بالجنبة
    انا حكاية سواق العايلة اتفكيت منها والحمد لله
    اولادي كلهم من عمر 10 ببدأ اعلمهم السواقة
    14 - 15 بركبو الشارع


    تحياتي
                   |Articles |News |مقالات |بيانات

24-01-2013, 10:42 AM

الطيب عبد الرحيم خلف الله
<aالطيب عبد الرحيم خلف الله
تاريخ التسجيل: 07-07-2006
مجموع المشاركات: 1030

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: ...كما أن بالسودان نادرا تجد حريم بتحاومن الي الواحده تكون حامل وماشة معاها كم واحده....


    عباس أخوي، الحامل دي والحريم المعاها ديل بطقوها لي آخر الحلة عشان أبكو في فلان وفي طريقهم لي آخر الحلة بكونوا غشو ليهم كم بيت كده لفواتح سابقة بعضهم ما بكوها في وكتها..

    خليك من الحوامة في الأسواق وزحمة المحلات والقفلات (متل المولد الليل أمس ده) وإنتظار المواصلات وزيارات المجاملات (كلها كداري) وكمان دخلت علينا ثقافة الجمعيات (أسرية وعائلية) وأصبحت تقام في الحدائق والأماكن العامة والبعيدة، في البجروها لي خزان جبل أوليا وكده.

    حريمنا كمان آا عباس برضهن رشيقات من الحوامه ما بقول ناقصات دسم، عشان الدسم البجيبو الطعام لم يعد سبب في النفخ .. حليل الطعام.

    متابعين..
                   |Articles |News |مقالات |بيانات

24-01-2013, 11:10 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: الطيب عبد الرحيم خلف الله)

    Quote: أعرف سائق عائلة كنت من النادر ان أقابله نهارا لانشغاله بالعائلة
    ولكن كنا نتقابل يومياً في صلاة الصبح وهي اللحظات الوحيدة التي نسال فيها عن حال بعضنا
    توفى هذا السائق في حادث نسال الله له الرحمة والمغفرة
    وكان وقت الحادث بمفرده
    حصل هذا الحاجث الأليم منذ خمس سنوات والمرحوم لديه ولد واحد
    هل تصدقوا منذ وفاته
    وحتى هذه اللحظة لم ينقطع راتبه نهائياً
    ففي كل شهر يقوم الكفيل بارسال راتب المذكور دون اي نقصان
    هذه إحدى الصور المشرقة والجميلة
    والتي نتمنى ان يرسمها الجميع { السائق والكفيل }

    ابو حراز يا وجيه سلام
    تعرف لانو ناسنا خطهم واحد ولما إشتغلو شغله مهما إكونو مجبورين عليها بخلصو لشغلهم
    يختلفو عن الجنسيات الاخري وخاصة الاسيوية دائما بكون عندهم اعمال خارجيه لو فني تلقي وقت الراحة بشتغل علي حسابو
    وكمان السواقين بتاعين العائلة مع كل مشوار تلقي الواحد عمل ليهو طرحة و ل مشوارين لجيبو الخاص
    وتم تناول هذا الموضوع بصحفهم كثيرا
    ولو ملاحظ السواق السوداني راتبو أعالي من الجنسيات الاخري
    وغالبية الذين يعملون مع الامراء سودانيين
    ومن تناولهم لظاهرة السواق الاسيوي مرفق كاركتير كان بصحيفة الرياض.

                   |Articles |News |مقالات |بيانات

24-01-2013, 11:22 AM

احمد سيد احمد
<aاحمد سيد احمد
تاريخ التسجيل: 23-01-2013
مجموع المشاركات: 1243

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)
                   |Articles |News |مقالات |بيانات

24-01-2013, 11:31 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: السنة الفاتت كان في بوست ظريف هنا في المنبر بحكي عن سوداني جا السعودية اول مرة اها اصحابو العزابة رسلوهو يجيب دكوة - زبدة الفول السوداني - من البقالة التحتهم...صاحبنا مشى وجا قاليهم بتاع البقالة قال ما عندو
    واحد من الجماعة نزل معاهو قاليهو ياخ نحنا كل يوم بنجيبها منو كيف يكون مافي...وصلو البقالة قام المغترب القديم قال للجديد كدي اطلب نشوفك بتقوليهو شنو
    قام صاحبنا قال للهندي بتاع البقالة عندك فول حجات ههههههههههههههه


    أحمد سيد احمد عليكم السلام والرحمة يا ظريف
    ياخ دي ابداع والله .....
    أنا برضو وقت وصلت جديد كان عندي مشكلة في حكاية اللبن والخدرا
    كم مرة مشيت بتاع السيوبرد ماركت وعشان اختصر زمني بسألو :
    صديق وين هذا صف لبن زولك اوجهني لي محلات الروب شربتو مرتين تلاتة حتي سألت عرفتا الروب هنا بقولو ليهو لبن
    والحلييب هواللبن عندنا هناك
    اما حكاية الخدرا كم مرة في زيارة لي اختي ترسلني محل الخضار عشان اجيب خدرا
    اقعد الاوي في اليمن واشاكل فيهم ((ياخ انا عايز خدرا تقول الدكان كلو خدرا في معناهو لو ما قلته هنا ملوخيه زول بجيب خبرك مافي
                   |Articles |News |مقالات |بيانات

24-01-2013, 12:00 PM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: عبس وضيوفة الكرام تحياتى.
    بوست ممتع وفيهو كمية من الحكى والطرائف .
    عارف يا ابوحراز عندنا واحد سودانى سواق عائلة الله كرمه بعائلة محترمة جداً.
    وربنا فتح على كفيلة بمساعدة ومجهود الزول ده وبقى عنده مؤسسة قدر الضربة.
    امور الشقل كلها ماشة عن طريق السواق وهو صاحب الكلمة الاولى والاخيره.
    وحتى الان العائلة لو مسافرين لاى مكان لازم يطلع معاهم اما المشاوير الصغيره لسائق خاص اخر..
    وما بينادهو الا يا عم ابراهيم .
    المسالة دى ما بتحكمة حاجه محددة غايتو بس نصيبك وفسمتك القسمة ليك ربنا.


    بدرالدين يا صديق اخبارك
    اولا: صورة البروفايل شرط يا الحبيب
    حكاية الحظوظ والارزاق مقسومة فعلا يا بدرالدين بس سواق خاص اصبحت من الفيز السعرها رخيص واحتمال تلقاها مجانا لو عايز تشتغل بالفعل سواق عائلة
    وهي مهنة ما بتوفر ليك مدخرات عشان تعمل حاجة في السودان الراتب لو طار ما بفوت 1800 ريال
    للمبتديء صاح معاها سكن واكل
    المشكله الخط الموازي في السودان بنظر ليك مغترب
    العم والعمه والخاله عايزين غير الاسرة
    شايف في شباب غير متزوجين وغير مؤهلين بقعو فيها بغرض الواحد اشتري ليهو عربية وارجع السودان اشتغل بيها هناك لو كده بتخارج غير كده ما انفع
    اما حملة الشهادات الواحد بعد استقر واشتغل بتواجهو مشكلة استقدام اسرة
    بعدين ايضا من المهن التي يصعب نقل كفالتها مصنفه من المهن الخاصة
    في ناس دقسو جو بيها وحسي مورطين.
                   |Articles |News |مقالات |بيانات

24-01-2013, 07:13 PM

الزبير صالح الزبير
<aالزبير صالح الزبير
تاريخ التسجيل: 16-08-2007
مجموع المشاركات: 2579

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    تعرفوا يا الحبان انا لمن حيت البلد دي كان سعر برميل البترول سبعه وتسعه دولار ودة بالتاكيد اثر علي الاقتصاد السعودي وكانت الوظائف نادرة والرواتب قليلة
    لقيت شغلانه في بيت كل مهمتي اجيب الخضار واللحم والدجاج وحاجات البقالة بيكتبوها لي في ورقة بمشي احيبها والكلام دة بيكون طائما صباحا بدري ولكن في طلبيات كدة بتكون نص اليوم او اخرة يعني لو حاجة نقصت او ما اتذكرو طلبوها واموري كانت ماشة تمام التمام راتب ضعف الكنت واضعو في راسي لمن جيت البلد دي وما اشتغلت بكلام ناس الجمعية الكان بيتريقوا علي يا زول ويتهامسو الزول دة كضاب قال انو كان شغال مدير قسم في بنك وقائم باعمال نائب مدير الفرع المهم شويتين ودوني شركة حقتهم وبعد داك سلكت براي وحتي لمن جيت اتخارج منهم من الخجل ما قدرت اصارحهم بانو انا خلاص شقيت الطريق بس ربك رب الخير نقلو زوجتي لوظيفة خارج الرياض لقيتها فرصة واتفكيت
    عاوز اقول مافي حاجة اسمها شغل مناسب لجنسيات معينة الا طبعا ان كانت مرتبطة بالتكوين الجسماني للشخص كامتياز الافغان في الحفر وهد المنازل مثلا ولكن مشكلتنا انو احنا السودانيين بننتظر اي واحد يحدر لينا حتي في الظلام عشان نرشة
    قبلت تستغل سواق عايلة دي ظروفها بتقدر عليها اهلا اقبل بيها ما بتقدر اعتذر لانك هنا بتتعامل مع اطفال وحريم ورجال يعني مختلف الاعمار وكل واحد بمزاجة واحتياجاته المختلفة عن الاخر
    وبمناسبة كلام اخونا الشفيع بتاع انو اي زول سائق عربية سمحة الناس بيفتكروة سواق عايلة زمان كان في مخبز بمشي اشتري منه العيش ولان مكان العمل في مدينة وانا ساكن في مدينه اخري فكنت بجيب عيش الاسبوع كلة يوم الخميس فالفران الهندي كان بيخت لية عيش بريال براهو في كيس ويقول لي صديق دة هدية انت، في الاول فكرت انو بيديني زيادة عشان بشتري منه كمية كبيرة كل مرة لغاية يوم كان معاي اطفالي وكانو صغار وقتها والفران كان بيبيع فطاير مع العيش فقام اليوم داك اصر يدي كل واحد منهم فطيرة ورفض احاسبة وتاني مرة قام سالني انت وين شغل صديق وكيف سواق عايلة يجيب معاة عيالة فانتبهت لتصرفاته القديمة معاي وقلت لية الكفيل مرة ممتاز وما نقشته حاجة قلت ابن ........ دة ما دام فاكرني سواق خلية يدفع ثمن اعتقادة
                   |Articles |News |مقالات |بيانات

24-01-2013, 11:08 PM

احمد سيد احمد
<aاحمد سيد احمد
تاريخ التسجيل: 23-01-2013
مجموع المشاركات: 1243

للتواصل معنا

FaceBook
تويتر Twitter
YouTube


Re: ونسة سواقين الحريم (Re: الزبير صالح الزبير)

    الاخ عباس سلامات تاني
    اللخبته دي عااااااااادي في البلد دي ونحنا كمان عندنا دارجي موغل في المحلية ياخ
    لكن انت اشتغل بنظرية انك تخش تشوف الدايرو براك اصو ما تسال الا كان تسأل عن الرفوف زي سؤالك لصف الالبان دا سؤال فاهم جدا

    الاخ الزبير
    عارف في السودان عندي صحبي شغال سواق في احدى المصالح الحكومية الكبيرة وبرضو بعانو معاناة شديدة السواقين هناك وبيشوفوا انو منسوبي تلك المصلحة الكبار مستغلنهم للاغراض العائلة ومرات بعاملوهم معاملة استعلائية
    لدرجة انو بعض هؤلاء المنسوبين ينزل من العربيه يقوم يمد للسواق الشنطة نظام يشيلها ليهو....ففعلا الزول من الاول يشوف هل الشغلة دي بتنفع معاهو ولا لا...

    والحاجات دي عادي بتحصل ياخ ههههههههه انا هسي قبل شهرين في سودانا الشقيق دا قدام وزارة ولائية كدا واحد بغسل في موتر...قلتليهو غسيل العربية بكم...قالي لا معليش دا موتري انا شوف الغسالين هناك

    عادي هنا في السعودية يقولوليك انت حبشي انت تشادي انا اول كنت بتضايق...لكن براي راجعت نفسي لقيت اننا فعلا بنشبه الحبش وبنشبه الصوماليين وبنشبه التشاديين...والله عادي الحبشي ممكن يتلخبط في السوداني والعكس الا تفرقهم اللهجة...كذلك الصومالي والتشادي...ثم انو الحبش ديل ياخ مملكة عظيمة ليها تاريخ كبير ليه نتبرا منهم كدا وهم اقرب ناس لينا؟

    ومرة في كارفور بتاع غرناطة الرياض...كنت مواعد واحد اخونا وانا منتظرو في احدى البينشات جا مصري سلم علي وقال انت برضو سواق منتظر جماعتك ولا ايه؟
    عادي المواقف دي بتحصل والزول يكون ريلاكس
                   |Articles |News |مقالات |بيانات

26-01-2013, 05:55 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: احمد سيد احمد)

    Quote: عزيزنا الدسيس

    إستمتعنا بالحكي الممتع .. و فيهو فكرة .. و خاصة حوار زولك سواق الشهفوفة :-)

    أعتقد في مهن و وظائف بطبيعتنا أنحنا كسودانيين ما بتناسبنا .. لشعورنا بإنها بتقلل من قيمتنا الإنسانية .. منها مهن الخدمات و العمل في المطاعم , سائق خاص , أو تشتغل علي باب فندق (الجماعة البفتحوا ليك الباب و إنت داخل أو طالع) ..

    ودي و تقديري


    طارق

    حبيبنا طارق عمر مكاوي سلام وتحايا
    المهن القلتها فوق وعموما كما اوضحت مهن الخدمات تحتاج الي انسان حرك وفهلوي ودمو تقيل
    هذه المهن رواتبها بسيطه تعتمد علي البقشيش وما يمنحه العملاء
    احيانا تجد دخل البقشيش اكثر من الراتب السودانيين ما حريفين في التعامل مع الزبون عشان إطلعو منو البقشيش
    تحياتي وتقديري
                   |Articles |News |مقالات |بيانات

26-01-2013, 07:31 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: الاخ عباس تحياتي لك ولضيوفك الكرام
    بوست اكثر من رائع ..
    متابعين .....


    حبيبنا عبد الماجد مصطفى
    أكيد تقديرنا للمتابعة والاشادة بالبوست
    مع خالص التقدير والتحية
                   |Articles |News |مقالات |بيانات

26-01-2013, 07:37 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: غايتو يا عباس ضحكتنى بنصيحتك لراجل كويس انها حققت غايته


    موضوع شائك بالجد خصوصا لحاملين شهادات جامعيه انهم يلجؤا لوظيفه دى


    الاستاذة/ رانيه محمد الشيخ تحياتي
    الوظائف الخاصة دائما يلجا ليها حاملين الشهادات عند اول حضورهم
    ولا تنطبق علي الكل وهي فترة مؤقته بدل الجلوس عاطل
    وتعتبر محطة الي ان تسلك امورهم بالحصول علي وظيفة في نفس المجال والتخصص
    وهي فترة معاناة يمر بها البعض.
    تقدير وشكري للمتابعة
                   |Articles |News |مقالات |بيانات

26-01-2013, 07:51 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: الدسيس سلامات ياخي
    بوست جيد وحكي ممتع
    و
    حصلت لي قريب لي قصتك
    والظاهر هم كلهم بيفتكروا اي زول سايق عربية سمحة سواق
    كت زماان كل جمعة صباحا بدري بمشي اجيب الحليب الطازج من مزارع جنوب الرياض بعد حي المصانع
    قابلتو قريب من بيتنا في الشمال المرسلات
    ركب وقال لي ماشي منفوحة
    ونسني بي كل احواله
    وهو جاء يادوب من 6 شهور
    حسدتو حسد شديد
    بيوصل المدارس وهي قريبة في ربع ساعة الصباح ثم الضهر
    وتاني ما عندو شغلة الا بالليل شوية اسواق وزيارات
    قلت ليهو لو بقيت زيك الا اعمل لي 3 دكتوراة
    حكيت ليهو عن شغلي
    ولو اجتهد ممكن يلقى راتب كم
    المهم
    اقترحت عليهو يستفيد من وقتو
    هو خريج ثانوي
    قلت ليهو يسجل انتساب في الفرع
    ويجيب كومبيوتر يطقش فيهو
    اقتنع وقال ح يفكر
    بعد فترة لاقيتو بالصدفة قال سجل في السفارة لكن الكومبيوتر لسه، وكفيله قال ليهو ح يديهو بونص بعد يكمل السنة
    عرضت عليهو سلفة، رفض وقال لي ابوهو محذرة من حاجة اسمها دين
    غاب ولم اسمع عنه

    بعد فترة سمعت من احد اصحابه انه خلص الدراسة
    وبي طقيش الكوميوتر اشتغل مبرمج في احد شركات ارامكو في الجبيل

    فداير اقول
    الناس ديل عندهم شيء ثمين جدا ما بيستفيدو منو
    الزمن
    الزمن

    ------------------
    بالجنبة
    انا حكاية سواق العايلة اتفكيت منها والحمد لله
    اولادي كلهم من عمر 10 ببدأ اعلمهم السواقة
    14 - 15 بركبو الشارع


    تحياتي


    حبيبنا الشفيع وراق عبد الرحمن سلام وتحايا
    اولا مبروك اتفكيت من حكاية السواقه وانشاءالله عقبالنا احنا لي قدام شغلة مملة جدا لول ناس البيت قالو لينا عندهم مشوار الواحد اقوم متكاسل زي الماشي المدرسة اول الاسبوع
    حكاية الاستفادة من الزمن هنا لو اي مغترب قبل الارتباط ودخوله قفص الزوجية والسواقة العائلية
    ممكن بي كمية الفراغ بعد العمل وعدم وجود زيارات كثيرة وافارق الجمعيات وبيوت العذابة
    dستفيد من الزمن بصورة مثلي.
    المشكلة الناس بتخش في برنامج الكشاتين وفي نوع بتاع مسلسلات تلقي متابع ليهو مسلسل مكسيكي اقامتو تنتهي ما اجيب ليها خبر.
                   |Articles |News |مقالات |بيانات

26-01-2013, 08:04 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: عباس أخوي، الحامل دي والحريم المعاها ديل بطقوها لي آخر الحلة عشان أبكو في فلان وفي طريقهم لي آخر الحلة بكونوا غشو ليهم كم بيت كده لفواتح سابقة بعضهم ما بكوها في وكتها..

    خليك من الحوامة في الأسواق وزحمة المحلات والقفلات (متل المولد الليل أمس ده) وإنتظار المواصلات وزيارات المجاملات (كلها كداري) وكمان دخلت علينا ثقافة الجمعيات (أسرية وعائلية) وأصبحت تقام في الحدائق والأماكن العامة والبعيدة، في البجروها لي خزان جبل أوليا وكده.

    حريمنا كمان آا عباس برضهن رشيقات من الحوامه ما بقول ناقصات دسم، عشان الدسم البجيبو الطعام لم يعد سبب في النفخ .. حليل الطعام.

    متابعين..

    الطيب عبد الرحيم خلف الله كيفنك واخبارك يا الحبيب
    نوع الحوامة بتاعت السودان بسموها حوامة الواجب وهي للمجاملات تكفي لاداء الواجب ومنها رياضة
    اما الحوامة هنا المقصوده هي التسكع لو ما مشيتو شوارع الرياضة تلقي المدام بدون سبه أو سبب تقول ليك نمشي المول الفلاني أو الحدائق العامة
    تصدق وتامن بالله مرات بنلف بالشوارع ونمشي لينا قريب 70 كيلو لو ما اكثر عشان نجيب لينا عصير من محلات متخصصه في نوعية من العصائر
    وما خفي اعظم حكاية تقطع ليك 500 كيلو عشان تمشي البحر والشاليهات.
    اكيد شكري وتقديري للمتابعة
                   |Articles |News |مقالات |بيانات

26-01-2013, 09:42 AM

garjah
<agarjah
تاريخ التسجيل: 04-05-2002
مجموع المشاركات: 4702

للتواصل معنا

FaceBook
تويتر Twitter
YouTube


Re: ونسة سواقين الحريم (Re: الطيب عبد الرحيم خلف الله)

    يا راجل كتلتنا من الضحك

    Quote: اتملم صاحبنا في القعده من الجلوس علي حجر الاسمنت او قال : الوليد طلع انجض مني والله حسي شغال في الاسواق بقي زي التور من اكل الطحنيه وأنا موكح بالمرأ الشهفوفه دي .
    فجأة ظهرت المدام بتاعتو زولنا قام فتح ليها الباب مع السلامه ما قالا لي.


    سالني الخواجة الضيف ايه بتشتغل

    قلت ليهو

    accountant day time and family driver night time
                   |Articles |News |مقالات |بيانات

26-01-2013, 11:41 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: garjah)

    Quote: جزء من مسلسل اذاعي سعودي بعنوان "صور مسموعة"
    الاخ عباس سلامات تاني


    Quote: اللخبته دي عااااااااادي في البلد دي ونحنا كمان عندنا دارجي موغل في المحلية ياخ
    لكن انت اشتغل بنظرية انك تخش تشوف الدايرو براك اصو ما تسال الا كان تسأل عن الرفوف زي سؤالك لصف الالبان دا سؤال فاهم جدا


    حبيبنا أحمد سيد احمد سلام وتحايا
    شكرا علي المسلسل الاذاعي ....
    تعرف في حكاية تخش وتشوف الدايرو لو عليك انت ممكن لو ما لقيت الدايرو تنسي الموضوع سؤال بالله؟؟؟؟
    ما حصل كتبو ليك ورقة فيها مستلزمات البيت عشان تجيبا من الاسواق؟
    أها دي المصيبه الكبري تكون شايل الورقة وتفتش كل ما تلقي حاجة ((وجدنا الكنز)) بتاعت الابتدائية تنط ليك في راسك
    واثناء ما بتفتش تطلع ليك كلمة ... نوتيلا (( Nutella)) تجهجهك جهجه تخليك تتصل البيت
    الغريبه احيانا وقت المدام ما ترد تقول المسألة مقصوده انو تحصل ليك الجهجه
    كنت مفتكر الموضوع خاص بي انا سألتا بعض الاصدقاء نفس الفلم بي حزافيرو
    وصلت لي قناعة بدل التكبس في الارفف خليها هي تجي تلقط حاجاتها وكل زول بمهنتو انتظر انا بره كسواق عائلة.
                   |Articles |News |مقالات |بيانات

27-01-2013, 06:07 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: تعرفوا يا الحبان انا لمن حيت البلد دي كان سعر برميل البترول سبعه وتسعه دولار ودة بالتاكيد اثر علي الاقتصاد السعودي وكانت الوظائف نادرة والرواتب قليلة
    لقيت شغلانه في بيت كل مهمتي اجيب الخضار واللحم والدجاج وحاجات البقالة بيكتبوها لي في ورقة بمشي احيبها والكلام دة بيكون طائما صباحا بدري ولكن في طلبيات كدة بتكون نص اليوم او اخرة يعني لو حاجة نقصت او ما اتذكرو طلبوها واموري كانت ماشة تمام التمام راتب ضعف الكنت واضعو في راسي لمن جيت البلد دي وما اشتغلت بكلام ناس الجمعية الكان بيتريقوا علي يا زول ويتهامسو الزول دة كضاب قال انو كان شغال مدير قسم في بنك وقائم باعمال نائب مدير الفرع المهم شويتين ودوني شركة حقتهم وبعد داك سلكت براي وحتي لمن جيت اتخارج منهم من الخجل ما قدرت اصارحهم بانو انا خلاص شقيت الطريق بس ربك رب الخير نقلو زوجتي لوظيفة خارج الرياض لقيتها فرصة واتفكيت
    عاوز اقول مافي حاجة اسمها شغل مناسب لجنسيات معينة الا طبعا ان كانت مرتبطة بالتكوين الجسماني للشخص كامتياز الافغان في الحفر وهد المنازل مثلا ولكن مشكلتنا انو احنا السودانيين بننتظر اي واحد يحدر لينا حتي في الظلام عشان نرشة
    قبلت تستغل سواق عايلة دي ظروفها بتقدر عليها اهلا اقبل بيها ما بتقدر اعتذر لانك هنا بتتعامل مع اطفال وحريم ورجال يعني مختلف الاعمار وكل واحد بمزاجة واحتياجاته المختلفة عن الاخر
    وبمناسبة كلام اخونا الشفيع بتاع انو اي زول سائق عربية سمحة الناس بيفتكروة سواق عايلة زمان كان في مخبز بمشي اشتري منه العيش ولان مكان العمل في مدينة وانا ساكن في مدينه اخري فكنت بجيب عيش الاسبوع كلة يوم الخميس فالفران الهندي كان بيخت لية عيش بريال براهو في كيس ويقول لي صديق دة هدية انت، في الاول فكرت انو بيديني زيادة عشان بشتري منه كمية كبيرة كل مرة لغاية يوم كان معاي اطفالي وكانو صغار وقتها والفران كان بيبيع فطاير مع العيش فقام اليوم داك اصر يدي كل واحد منهم فطيرة ورفض احاسبة وتاني مرة قام سالني انت وين شغل صديق وكيف سواق عايلة يجيب معاة عيالة فانتبهت لتصرفاته القديمة معاي وقلت لية الكفيل مرة ممتاز وما نقشته حاجة قلت ابن ........ دة ما دام فاكرني سواق خلية يدفع ثمن اعتقادة


    الزبير سلامات يا وجيه
    نسبة للظروف والضغوطات احيانا تجبر إن تشتغل أي مهنة حتي تلبي طلباتك البسيطة للاستمرارية في الحياة
    والعمل في اي مهنة بتكفيك زلة نفسك وتعيش كريم
    بخصوص تخصصات المهن وحسب التجربة هنا نجد أن التصنيف الخاص بالجنسيات فرضتو الخبرات الجات هنا اول وابداعها في مجال المهن
    مثلا مندوب مبيعات نادرا ما إنجح فيها سوداني وكذا وظيفة بتلقي لها جنسيات محددة.
    اما عن سواقين العائلة قبل فترة لو لقيت ليك سوداني سائق سيارة امريكية (( جمس - تاهو - فورد اكسبيدشن ...الخ)) كان ممكن تقول عليهو سوائق عائلة
    حاليا الامور اتلخبتت السودانيين البفضلو الكورلا والبرادو انقرضت هذه الظاهرة
    وعرفو حكاية السيارات اليابانية البتشتريها عشان ترجع بيها السودان وهمة
    والواحد اشتري عربية لما اغيريا ما افكر ارجع السودان
    وحكاية التلاجات والغسالات 220 برضو انتهت الناس بقت تركب الامريكي وتشتري المعدات الكهربائية 110 شكلا زي قنعت من السودان.
                   |Articles |News |مقالات |بيانات

27-01-2013, 06:19 AM

إدريس محمد إبراهيم
<aإدريس محمد إبراهيم
تاريخ التسجيل: 13-03-2006
مجموع المشاركات: 2671

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    عباس الدسيس

    تحية ملؤها المودة والاحترام والتجلة ....


    كتابة طاعمه جداً وسرد مشوّق لا يضاهيك به إلا الطلبه طارق جبريل ....


    مع خالص ودي وتقديري ؛؛؛؛
                   |Articles |News |مقالات |بيانات

27-01-2013, 09:36 AM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: إدريس محمد إبراهيم)

    Quote: accountant day time and family driver night time


    البقول غير كضاب

    سلام يا حبيبنا arjah تحياتي وتقديري
                   |Articles |News |مقالات |بيانات

27-01-2013, 02:25 PM

عباس الدسيس
<aعباس الدسيس
تاريخ التسجيل: 11-10-2012
مجموع المشاركات: 3363

للتواصل معنا

FaceBook
تويتر Twitter
YouTube


Re: ونسة سواقين الحريم (Re: عباس الدسيس)

    Quote: عباس الدسيس

    تحية ملؤها المودة والاحترام والتجلة ....


    كتابة طاعمه جداً وسرد مشوّق لا يضاهيك به إلا الطلبه طارق جبريل ....


    مع خالص ودي وتقديري ؛؛؛؛

    ادريس سلامات يا الحبيب
    اخجلتنا تحيتكم حتي لم نستطع ان نجاريها فصاحة وبلاغة
    الف شكر وتقدير للمتابعة والاطلاع والمساهمة الثرة
    حبيبنا طارق جبريل فات الكبار والقدرو
    انشاءالله نلحقو
    فائق شكري وتقديري
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de