في البداية لازم اقول إنو غلبني تماماً أفهم فكرة تسويق إنو محمود عبد العزيز ربي يرحمو مادح محب للنبي صلى الله عليه وسلم ورجل إحسان وبر وأنه الان على ابواب الجنة ليتخير إحدى منازلها مع الصدقين أو الشهداء !!!؟؟ محمود عبد العزيز فناااان ..زااتس إت !! وده كللل البعرفو انا عن محمود عبد العزيز وما يهمني ويهم كتيير من محبي هذا المعجزة والظاهرة الكونية .. قناة النيل الأزرق مشاركة مع قناة خابور عفواً قناة ساهور تحاول ومنذ إعلان وفاة الظاهرة الكونية محمود عبد العزيز ربي يرحمو تحاول وبشتى السبل طمس هوية هذا الشاب النحيل المحب لفنه وتحويله بين يوم وليلة لصوفي متعبد .. انا على قناعة تاامة إنو محمود حق كللل الناس وليس حجر على أحد ..وقاعد اكون فرحان جداً وسعيييد شديد إنو (ولو متأخراً) ظهرت ناس تدعي حب محمود ربي يرحمو وإنها على علاقة وصلة به وإنها بتسمعو من زممن و و و ..ما يهمني إنو محمود حياً كان أم ميّتاً قدر وصل فكرتو ورسالتو وأجبر الكل يحترم فنو.. بالأمس شاهدت عبر قناة النيل الأزرق بالتعاون مع قناة خابور عفواً ساهور وللمرة التانية حلقة أو سهرة خاصة عن الظاهرة الكونية محمود ربي يرحم.. وللمرة التانية تخصص الحلقة بالكامل عن طرح فكرة إنو محمود كان مادح للحبيب المصطفى علية أفضل الصلاة والتسليم بعد أن كانت المرة الأولى يوم وفاة هذا الظاهرة الكونية .. هذا الخالد مصطفى ربما يكون شخص محبوب ..رجل خيير ..رجل إحسان..محب للنبي ..انا ما بعرفو وعليه ما ح أحكم عليهو وعلى البيقوم بيهو عبر القناة دي من تشويه للمديح فلكل وجهة نظره..لكن كللل البعرفو إنو البيكتب فيهو الزول ده من قصائد مستحيييل نطلق عليها مديح وفق أعراف وشروط المديح اللي كتبوها ناس الشيخ حياتي وحاج الماحي وشيخ البرعي ومع ذلك بقول ليكم برضو ده ما موضوعي.. موضوعي هو الظاهرة الكونية محمود عبد العزيز والمديح.. عن نفسي ما قادر افهم إنو زول يمدح أو يكتب بعد حاج الماحي خصوصاً في جيلنا وعصرنا الحديث ده ..وعن نفسي ورغم كل حبي للظاهرة الكونية محمود إلا إني ما حصل قدرت أكمل ليهو مدحة كاملة في قناة خابور (عفواً ساهور)..كنت فقط أستمتع بطلة هذا النحيل وبووطي صوت التلفزيون لأنو بصراحة الكان بيعمل فيهو محمود ده ما كان مديح سواء كان ضعراً او اداءً أو حتتى تصويراً .. أكرر الموضوع ليس مناقشة مدى حب محمود للنبي والقصص والنوادر التي عن نفسي لا أحتاج ان اعرفها عن مدى حب محمود للنبي فمحمود لا يحتاج لهكذا قصص للتعريف بيهو ..ومحمود بيعمل حاجاتو كللها بي تحت وما كان بيطالب زول بي إنو يبرز صفاته الدينية ولا حتتتى خصوصياته ..وهكذا معلومات لن تزيد في شعبية محمود اللي ما اظن إنها بتحتاج زيادة بي هكذا مواضيع.. أن يظهر هذا الخالد مصطفى ويتفضل علينا وهو يطرح إنه الملم والعاارف بي محمود عبد العزيز ويقول معلومة حصرية ويعلنها دااويةلما يقول ومحمود عبد العزيز الذي يغني لربع قرن ما بحن ولااا أغنية ولكنه فقط وفقط لحن مدحة فبقول ليهو عن نفسي بعرف أغغنية واحدة لحنها محمود إسمها حكاية الولد الشفت وتقريباص كاتباها بت إسمها سلمى .. كلنا بنحب نبينا وحبيبا المصطفى محمد صلى الله عليه وسلم لكن طريقة لخبتة الكيمان وتمرير الأجندات بي الطريقة دي بتشوه الحاجات وبتفقدها خصوصياتها ومتعتها في نفس الوقت.. محمود عبد العزيز وولد فنان وماات وهو فنان .. محمود عبد العزيز مات بهدوء كموت أي إنسان دون أي خصوصيات في يوم موته .. محمود مات دون أي علامات نربطها ونحللها عشان نقوم بدور الملائكة ونكتب بدلاً عنها هو في الجنة أو في النار.. مات محمود وترك علامة واااحدة ظاااهرة لا تحتاج لتحليل وشرح ..كانت هي العلامة الوحيييدة .. مات محمود ربي يرحمو وشيعته الملايين ..تبعتها دعوات المحبين ..ودموع المريدين.. محمود لم يكن مادحاً ..محمود كان فناناً ..
02-26-2013, 07:02 AM
وضاح عبدالرحمن جابر وضاح عبدالرحمن جابر
تاريخ التسجيل: 10-11-2012
مجموع المشاركات: 1986
الجماعه شافو اهتمام الناس بمحمود وقصه وفاتو وحياتو فحبو يستثمروها فى قنواتهم كلو واحد من الزاوية المهتم بيها ..........
لكن اجمالا كلها تحسب للراحل انو قدر يدخل (بتخطيط اوبدون) بين فئات المجتمع المختلفة ولشعبيتو - اصبجت كل فئه تلمح او تصرح بى انتماء الراحل ليها
خارج النص : ما كنت ولحدى الان من معجبين غناء محمود رغم جمال صوتو قدر ما حاولت اسمع ليهو زى ما بسمع اغانى الكاشف او وردى او بن البادية .. او او او ما قدرت اتفاعل مع غناهو زى ما بعمل مع الجماعة ديل وعندى قناعه غريبه والاحتمال الكبير انها غير صحيحه .. انو وقف الابداع الغنائي فى السودان واخر ما يستحق تصنيفو كابداع هو اعمال عقد الجلاد .. واعمال مصطفى سيد احمد وانو التغييرات الاجتماعية الحصلت فى السودان ما حا تنتج ابداع جديد الا اذا اتغيرت الاوضاع كلها تغيير شامل
تحياتي
02-26-2013, 07:05 AM
بكرى ابوبكر بكرى ابوبكر
تاريخ التسجيل: 02-04-2002
مجموع المشاركات: 18727
الأخ وضاح .. تحياتي.. وشكراً للمداخلة .. طبعاً قصة إنو الزول يقنعك غصباً عنك في قصة الغنا دي صعبة شدييد عشان كده حا احترم رايك .. لكن وبما إنك كررت كلمة إبداع ومن ثم ربطتها بي امثلة عقد الجلاد ومصطفى سيد أحمد فهنا خليني اسألك ما هو تعريفك للإبداع؟ وهل يمكن تصميف الصوت وحده إبداع؟؟ ولا لازم يكون كلمة ولحن وصوت ؟؟ ولا الفكرة الجديدة ؟؟ عن نفسي بشوف البون واااسع وشاااسع بين محمود ربي يرحمو وبين عقد الجلاد ومصطفى ..واكييد لي صالح محمود.. لاحظت برضو الفترة الفاتت ربط إسم محمود بي مصطفى في محاولة للمقارنة والمشابهة بينما فعل محمود وفعل مصطفى ..وفي رأيي ده برضو كلام ما صاح ..مصطفى كان فنان نخبوي وإن تغنى للكادحين ..مصطفى كان فنان مثقفاتية حتى ولو لم يرد هو ذلك أو يقصد.. مصطفى قاعدته الجماهيرية محدودة جداً رضينا أم أبينا رغم إبداعه..وكذلك الحال بالنسبة لي عقد الجلاد..
02-26-2013, 07:27 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
بكري ابوبكر يا حبوب.. شكراً للفيديو .. والمحيرني حقييقة هو ظهور خالد المصطفى كما بن لادن والظواهري عند تسجيل شريط جهادي بيكون وراهو خلفية مريبة من نوع ستاير وقماش في الغالب..ما عارف حنكو شنو من القصة دي
02-26-2013, 07:55 AM
وضاح عبدالرحمن جابر وضاح عبدالرحمن جابر
تاريخ التسجيل: 10-11-2012
مجموع المشاركات: 1986
سلام حبيبنا عمر طبعا قصة الاحساس بالغناء وتصنفيو كابداع او غيرو - كلها احاسيس شخصية ومهما حاولنا نربطها بالعلوم حا يبقى الاحساس الشخصى هو العامل الحاسم عشان كده انا كلامى طبعا (عن تفسيرى انا للابداع) واول ما بهتم بيهو فى الغناء .. الشعر ثم الصوت والموسيقى والحاجات التانية كلها مع بعض فى درجة واحده وحتى فى الشعر الناس مذاهب فيما تحب وانا ما قدرت على الاطلاق اتماشى مع كل الشباب الظهرو فى الساحة وكتير فكرت فى الحته دى .. وسألت نفسى ليه ؟ فوصلت لنتيجه انو انا بحب الشعر فى المقام الاول زى ما كتبت ليييك فوق ولقيت انو الاعمال الجديده ما فيها حلاوة وموسيقى الشِعر زى زمان ولقيت الحته دى فى اختيارات عقد الجلاد واختيارات مصطفى وبعدهم ما لقيتها عشان كده كان حكمى صعب شوية على الاعمال الجديده وطبعا نسبه الخطأ عندى كبيرة لانى ما بكون مريت على كل الشعر الغنوه الشباب الجدد .. لكن بصورة عامه ما لفت نظرى ... وبالرغم مما يقال وسمعتو فى ندوات ولقاءات فنية عن وجود ازمه فى النصوص الغنائية الا انها مسؤلية الفنان فى المقام الاول والاخير انو يغوص عشان يطلع الكلمة الحلوة وكتير اتسائلو .. عن اشعار شاعر زى الحلنقى .. هل القدمو للفناين زمان قدر يقدم زيو للفناين الحالييين . ؟ وامثله كتيره لفنانين عاصرو اجيال مختلفة لكن ما طلعو نصوص بجمال نصوصهم القديمه ؟ عشان كده انا ربطت الموضوع برضو بالواقع الاجتماعى والحياتى العام فى السودان
02-26-2013, 08:03 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24973
Quote: قناة النيل الأزرق مشاركة مع قناة خابور عفواً قناة ساهور تحاول ومنذ إعلان وفاة الظاهرة الكونية محمود عبد العزيز ربي يرحمو تحاول وبشتى السبل طمس هوية هذا الشاب النحيل المحب لفنه وتحويله بين يوم وليلة لصوفي متعبد ..
عارف يا عمر وانا بقرا في كلامك دا ما عارف خالد احمد المصطفى أوعاكف عطا دا منو .. لانو كنت عايز اقوليك في زول قبل كم يوم جابوهو بي دقن وبتكلم عن مديح محمود عبد العزيز وعن انو كان بيذيع شنو كدا ما عارف في الحج .. كنت بسمع في كلام الزول دا وانا في غاية الامتعاض .. والامعط من كدا انو كل القنوات زي كأنو بي ايعاز روجو لي فكرة انو محمود دا درويش .. ووهب نفسو لي المديح .. مما توفى عليه الرحمة والمغفرة لاحظت الترويج العكس يالعجيب دا .. حتى قناة الموسيقى الواحد فرح بيها .. مدورين لينا مديح محمود ومعجزات محمود الكونية في آخـر ايامو .. .. من زماااانك عندي فكرة سالبة جدا عن موضوع المديح بتاع الايامات دي .. بتاع ناس الصحوة والغفوة .. والناس الارغنو لينا المديح .. المديح البنعرفو غير مديح اولاد حاج الماحي .. واولاد البرعي والاتربينا بيهو .. في مديح قاعدين نمشي ليهو الشيخ حمد النيل كل يوم جمعة .. ذكر .. ونوبة وخدام ولالوووب .. وطار وبخور وناس بتبرجز وناس بتستحول .. ارفعوا يدينكم عن حب المصطفى (ص) ولا تشترطوا لنا ان نحبه بطريقتكم تلك الممجمجـة .. ارفعوا ايديكم عن محمود عبد العزيز عليه الرحمة والمغفرة .. واتركوه للواهخب الخلاق الرزاق الفتاح العليم مالك الملك .. فهو بين يديه .. واتركوه لمعجبية ومحبية فهو خالد في قلوبهم ووجدانهم .. واتركونا نحن من هذا الدجـل والزيف .. باسم سيدنا النبي عليه اتم الصلاة والتسليم ..
02-26-2013, 10:22 AM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: محمود اخر سنتين من حياته كان مركز مع المديح اكتر من الغنى ..
Quote: محمود مادح ومغني .. المشكلة وين ؟
ما مشكلة يا وليد .اصلو ماف مشكلة .. لكن البيعملو فوقو ناس ساهور وناس النيل الأزرق وتلفزيون السودان وقناة الموسيقى دا كلام فااارغ دا امتداد لي تلفزيون الطيب مصطفى الخت لينا شبكة في التلفزيون والشال اغاني العميري والبلابل .. ولما البلابل يجيبوهن يغنن بالماكسي والارتيشو كان بيخت زهور .. ادخل نفس اليوتيوب دا يا وليد وشوف محمود عندو كم اغنية وكم اغنية .. وشوف محمود دا بيغني من متين .. مشروعو الفني بداهو من متين ..؟ يعني معقولة مشروع محمود كلو يا وليد يختذلوهو في سنتين ..؟ لو حتى محمود الله يرحمو اختذل مشروعو الفني في سنتين مديح .. ما من حق الناس دي تمسح ذاكرة التلفزيون وذاكرة الاذاعـة وذاكرة الشعب السوداني من ابداعات محمود طيلة عمرو الفني دا من ما كان في حاجة اسمها بهلول وجنة الاطفال .. .. لو كان هناك ما يتفق فيه مع كلامك يا وليد .. فهي انو محمود الله يرحمو الفترة الاخيرة وخلينا نقوله بي طريقة واضحة .. حس بي انو مودع لمعرفته بي مرض عضال الم به أو بي اي سبب كان ولذلك التف من هم حوله من ناس ساهور وبعض المبشرين بالجنة .. وعملوا على غسيل مخـه الله يرحمو .. وخلقو منو الشخصية الاخيرة دي .. ولبسوها حب سيدنا النبي .. عشان الناس تجري ورا محمود في المشروع حقهم دا .. بعدين اقوله ليك صراحة تانية وانا زول بسمع محمود من التمانينات .. لما كان صوتو زي صوت الاسد .. انا شخصيا وقفته من سماع محمود الله يرحمو .. من الحلقة اياها بتاعت اغاني واغاني .. ولما عرفته انو هناك محاولات لاحتواء محمود من اجل ان يوجهوهو في ناحية محددة .. ويحصروهو في مسالة انو درويش ومادح .. واديك النجيضة المن الفرن حقها .. بالرغم من اسطورة محمود العجيبة دي .. لو كان ربنا سبحانه وتعالى امد في ايامو .. وبطل يغني وعمله لي مديح بالمزيكا بتاعت ناس ساهور دي .. صدقني لانفض من حوله الناس .. ما بي فهم انها ما بتحب المديح ولا بتحب سيدنا النبي (ص) لكــن .. بي فهم انو التوب اللبسوهو لي محمود دا ما قدرو .. ولا في طريقه ليهو انو يتعدل .. الشعب السوداني كلووووو صوفي ومتصوف والما حفظ يس من هو صغير .. حفظ البقرة وهو مراهــق .. والما عندو سبحة واوراد لي سيدنا النبي .. بيصلي عليهو كل يوم جمعة حتى ولو في سرو .. لكن الحاصل دا دجل يا وليد .. دجل راسووو عديل كدا
02-26-2013, 12:24 PM
ياسر السر ياسر السر
تاريخ التسجيل: 08-06-2010
مجموع المشاركات: 3204
لا يفتى وعمر الفاروق وعلاء تمبس في البوست ,,, ده راي شخصي يا جماعة ما تهتمو ليهو كتير .. اما عن الظاهرة الكونية المرحوم محمود عبد العزيز فانا اري ان محمود فنان في المقام الاول ومسالة مدح المصطفى دي مسالة خاصة لانو السودانيين كلهم صوفيه واي واحد بتلاقاه يحفظ ابيات من المديح لانو هذه هي البيئة التي تربى عليها السواد الاعظم من السودانيين فلذا لا ارى قضاضة في مديح محمود الله يرحمو ويحسن اليه ولكن نرجع ونقول ان محمود بدا فنانا ومات فنانا وكفى .. نسال الله ان يتقبله قبولا حسنا وان يلهمنا ويلهم كل محبيه ومعجبيه الصبر والسلوان ..
تحياتي : ياسر العيلفون .....
02-26-2013, 12:59 PM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
سلام ياناس الQNB بعيدا عن خالد المصطفى وقناة ساهور ...محمود صوتو صوت مديح (الله يعلم) ...عليه الرحمه والمغفره ...ماسمعت تجربتو مع المديح البتكلمو عنها دى ...او سمعتها طشاش كدا ...لكن ياريت لو كان ادوهو يعيد تقديم مدائح اولاد حاج الماحى بشكل جديد ... نفس شرائط الحقيبة بتاعت العود ديك ...محمود كان عايز ليهو (طارين ) كاربات وشيالين بستوعبو المديح كويس ..ويقول ليهو هاك وثق ...انا قلت طارين بس ...ولو كان بدون طار ذاتو يكون اجمل ...بعيدا عن الصخب والابتذال البتعملو ساهور فى المدائح ...المديح جمالو فى معانى كلماتو ...المعانى دى هى البتطرب ماعايز ليها ايقاعات وساكسات وغيرو ... طبعا خالد الصحافة نجح لحد ما فى القصة دى ...
وطالما دا ماحدث مع محمود..اتمنى ان يعيد التوثيق لاولاد حاج الماحى من خلال حنجرة (احمد الصادق) ...اااى احمد الصادق ... صوتو برضو صوت مديح ....
02-26-2013, 01:09 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
كلام في الصميم زي ما بيقولوا ناس الجرائد في السودان. تمام يا عمر الفاروق و تمبس و ازيد انا من عندي أن المدعو خالد احمد المصطفى ما هو الا مرتزق و تاجر شنطة بضاعته مفروشة في قناة خابور و هو يعمل على الترويج لها بكل الطرق الممكنة و غير الممكنة. فقط اسجل إعجابي بآداء محمود "لمدحة/اغنية" شعب السودان اكتر شعب بحب النبي او كما قال.
02-26-2013, 02:15 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: في مديح قاعدين نمشي ليهو الشيخ حمد النيل كل يوم جمعة .. ذكر .. ونوبة وخدام ولالوووب .. وطار وبخور وناس بتبرجز وناس بتستحول ..
أها ده التصووف العفوي زاااتو والبي طبيعتو بيأكد ليك غالبية الشعب السوداني متصوفة ..كانت لنا أيام والله يا تمبس..تحوم مع النووبة ودق دق دق وانت ماااشي بي كرعينك ومحل ما فترت تجي راجع ..ما عارف ليي ذكرتني الطريقة البيدفن بيها أهل الموردة والعباسية وابكدوك وحي الضباط موتاهم سيراً على الأقدم لحدددي حمد النيل وهم يهللون ويكبرون .. المديح ابو طار ده يا تمبس ومهما موسقنا المدايح يظل طعمو خااااص..جرب مرة تمشي مناسبة والعصرية كده بعد الغدا والضل بدا ينزل والناس مهمومة بي الغسيل من الغدا ودفع الكشف وخلي اضانك يلمسا صوت الطار؟؟ شوف الحالة البتتلبس الحضور والطمأنينة البتسكنهم والبهجة المرسومة على الناس.. مهما فعلت الموسيقى فالطار حتتو براااها ..
02-26-2013, 02:23 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: جرب مرة تمشي مناسبة والعصرية كده بعد الغدا والضل بدا ينزل والناس مهمومة بي الغسيل من الغدا ودفع الكشف وخلي اضانك يلمسا صوت الطار؟؟ شوف الحالة البتتلبس الحضور والطمأنينة البتسكنهم والبهجة المرسومة على الناس..
يا سلالالالالالالالام يااخ .عليك الله يا عمر ما تسوقني .. خليني كدي في محمود دا .. انا كان فتحت ليك في البوست دا ما بتمسك تاااني .. عارف اهم جنازتين في حياتي ما انساهم .. جنازة .. كمال محمد أحمد .. عمك همبر ابو ناس الحاج كمونية .. ومعاوية كمال وخالد الكــد .. الوكت داك كنا صغار .. الدنيا كانت بحر وخور ابوعنجة تعدى كبري الاربعين وفات بيت ناس حجوج بي هناك .. عارف نحن واقفين جمب بيتنا وشفع صغار جدا .. تصدق وتأمن بالله انو الجنازة دي لما الناس وصلت اللالوبه حقتكم .. كان الناس بتتزاحم بي هنا في نص الخور والشوارع الداخليه كلها مليانة .. ربنا يرحمو ويغفر ليهو .. والجنازة التانية حقت عمك ود القوس .. ودي طبعا بتحكي عن كلامك دا لانو عمك ود القوس هو مقدم بتاع نوبـة .. اول مرة اشوف جنازة تمشي بالنوبـة .. ويالها من تشريفه عجيبة جدا ..
02-26-2013, 02:49 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تمام يا عمر الفاروق و تمبس و ازيد انا من عندي أن المدعو خالد احمد المصطفى ما هو الا مرتزق و تاجر شنطة بضاعته مفروشة في قناة خابور و هو يعمل على الترويج
والله يا دكتور سيف انا اول مرة اشوف الزول دا في حياتي .. لكن لحظته اتضايقته ضيق شديد جدا من الكلام العجيب البقول فوقو .. وقسما بالله قلت اجي افتح فيهو نار في المكان دا اصلو ما اخليهو على فعلتو دي .. فجيت لقيت عمر دا فشاني .. واول مرة اعرف انو الزول دا بتاع قناة ساهور .. وكرهتي في الدنيا دي .. هذه القناة وهؤلاء الذين غيرو طعم موية النيل .. حتى المديح ما سلم منهم .. ودي الحاجة الوحيدة الواحد قاعد يضوق ليها طعم .. ياخ الواحد يا دكتور لما يسمع التمساح لي اولاد حاج الماحي .. والقبه البلوح قنديله .. ويسمع ابلي المشرفات لي اولاد البرعي . والشيخ التوم لي اولاد البرعي .. والكلام دا كلو بالطار .. والله تدخلو طمأنينة كدي كان قالو ليهو حسع دي النكتلك بقول اصلو ما عندي مانع .. لامين ليهم تلاتة اربعة انفار يغمضو في عيونم ويفتحو ولابسين سديريهات ... يا لابسين بدل .. وبتاع اورغـن .. ياخ اصلو ما ممكن نحن عملنا شنو في دنيتنا دي عشان يصلط علينا زي الناس ديل ؟؟
02-26-2013, 02:02 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
انت ما بتعرف محمود كويس كان كده يا تامبا ... محمود ما بنغسل مخو .. وما بعمل حاجة الا يكون مقتنع بيها .. ومحمود ولا مرضان مرض عضال ولا حاجة كل العنده قرحة ما اكتر ولا اقل
قرحة شايلنها نص الناس الشايلنها ديل
محمود دخل خلوتو دي من بعد موت الخالدي .. واكتر حاجة اثرت في محمود وفاة الخالدي .. وطبعا زي ما عارف الخالدي فنان محمود
انا زاتي في السنتين الاخيرة بطلت اسمع محمود لكن ما عشان عاوزين يحشروا ليه حاجة في راسو لانو محمود صوتو مؤخرا تعب جدا وبقى بغني من بطنو ما من حنجرتو
محمود بهمبش في حاجات كتيره من الله خلقو مره ممثل ومرة مغني ومرة رسام ( بالمناسبة برسم ) ومرة مرخابي الف احمر ومرة مرة كده بهبش السياسة ووكت الامر يتعدى الحدود ويبقى في الوطن .. طوع صوتو وغنى للجيش وغنى للاطفال وغنى حقيبة وغني تراث وغنى مديح غايتو انا محل ما غنى عجبني
اساسا محمود روح قلقة .. ما راكز على شي وهو مباري روحو دي فعليك الله يا تمبس ما تقدموا على اساس انو زول بسيط سايقنوا سواقة
محمد اتصوف مؤخرا وبقناعته الشخصية .. وهو في عز تصوفوا انتج غنى جديد يعني ما خلى الغنا للمديح
والمديج جزء من تراث محمود .. لا ينفصم منه ناس الدراما بقولوا محمود ممثل ضل طريقه للغنا وناس الغنا قالو حقهم اولاد الحلة بقولو زول ضكران اخو اخوان مريدنو بقولوا عاجبهم تواضعو المداحين بالنسبة ليهم محمود مداح
انتو شيلو العاوزنز من محمود وخلو كل زول يشيل حقو منو
كل زول عندو محمودو بشوفوا من وجة نظروا
ومحمود ديل كلهم .. بقناعته الشخصيه هو
02-26-2013, 02:15 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: المهندس وموزع الموسيقى الروسي «ميخائيل» الذي يوزع لأكبر الفنانين في روسيا سجل شهادة بحق محمود، عندما استمع لأغنية «خلي العيش حرام»، بحسب د. الفاتح حسين، حيث قال «أول مرة أسمع صوتاً موزوناً كما الآلة الموسيقية، وأتمنى ألا يسكت..» كما أن الدكتور الفاتح حسين شارك في مسيرة محمود من خلال البوم «سكت الرباب» الذي تم تسجيله بروسيا من ألحانه وتوزيعه، والأغنية التي حملت اسم الالبوم كانت من كلمات د. وجدي كامل، وقال الفاتح إن محمود له شكل أداء ممتاز ومتفرد، وقال إنه من خلال تجربته معه فإنه أدهش الروس، وكان كبير دهشتهم انه ومع هذا الابداع والتفرد لم يدرس الموسيقى.
برضو حكى على ما اعتقد الفنان والصديق شبكة الشهير بـ ( محمد عبد العزيز ) عضو فرقة عقد الجلاد سابقا ان كنت ازكر جيدا .. المهم ما متاكد لكن اظنه شبكة لانو اتناقشنا في موضوع محمود ده كتير ..
قال في احدى ايام محمود في القاهرة حضر واحد متخصص موسيقى بروفة لمحمود وفي نص البروفة مشى لي محمود وساله مقاس حزامك كم ؟ محمود استغرب وقال ليه 32
الزول قال باستغراب : موش ممكن
سالوه ليه في شنو ؟ قال الصوت ده ما ممكن يطلع من قرار بطن عرضها 32
محمود ظاهرة فعلا وحالة فريده ونادره .. محمود بنيه وتصميمو اتخلقت عشان يغني .. وعشان كده محمود شكلة زاتو مخلقن وغير متناسق يعني رقبتو الراكب فيها راسو دي .. وكانها ما حقتو .. لا في الطول ولا في العرض شكلها اساس ما ماشي مع بقيت شكله العام
Quote: لانو محمود صوتو مؤخرا تعب جدا وبقى بغني من بطنو ما من حنجرتو
يا ولي .. بديت اقرا ووقفته في الحتـة دي .. وكلام اخوان كدا وتحت تحت .. كلام زول قاري مزيكا .. اللحــق عدل كلامك دا قبال ما يجوك الشفوت حقين المزيكا .. يا وليد الغناء ما من الحلـــق ... الغناء من البطن جووووه .. يعني عكس كلامك دا بالمرة .. انت عايز تكرر لي حركة فالكون مالك ؟؟ انت مالك راسك دا قوي وما بتسمع الكلام
02-26-2013, 02:31 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: محمد عبد الرحمن انت ما عارف اظنك انو احمد الصادق واخوه اساسا كانو مداحين قبل ما يكونوا مغنيين وعندهم شرايط كاست عديل كده وشرايط ماستر
اعرف من وين ياوليد ...يادوب احمد الصادق اتصالحت مع صوتو قبل سنة كدا ....وكلمت خليل قلت ليهو الراجل دا صوتو جميل حاول تسمعو بحياد ...طقع لى طبعا ... اسى انا عايز اسمعو مديح بس ...جيبوا اللنكات ...
02-26-2013, 02:37 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: فعليك الله يا تمبس ما تقدموا على اساس انو زول بسيط سايقنوا سواقة
شفت يا وليد وقعت لي في الاتو حقي .. اها ناس ساهور .. والنيل الأزرق .. عايزين يسوقو الناس على انو محمود دا من الله خلقو مداح .. اصلو ما غنى اي حاجة في الدنيا دي .. وذلك بعد وفاتو .. مع انو التسجيلات العند النيل الأزرق من حلقات لي محمود ما ليها حد .. طيب ليه ياخ ناس النيل الأزرق ديل يروجو لي محمود كدرويش بيمدح بس .. وليه ما يجيبو الغنا حقو .. وليه نحن ياخ نتحمل يجينا زي خالد أحمد المصطفى دا ويصر انو يقول لينا كلام نحن ما لينا اي علاقـة بيهو .. واالله العظيم نحن في غنى عنو .. ياخ ليه بيشوهو لينا الحاجات الجميلة ويخلونا الحاجات المقدسة زاتو ننفر منها ..؟ انا القدامك دا الخالدي من أعز الناس لي خلاف علاقتي الشخصية بيهو الله يرحمو .. فأنا مما وعيت على الدنيا دي بحب الخالدي انا شافع وانا مراهق وانا كبيير ولحدت الآن الخالدي عندي رقم كبير جدا .. لكن اطلاقا لما توفى ما وقفته اسمع غنا واقعد اسمع فرقة الصحوة .. محمود الله يرحمو انا اقدر حزنو او قناعاتو الشخصية وتمردو دا .. ومسالة انو يبقى ناسك او عابد دي حاجة كويسة برضو .. وحسع دي بقوليك انو لو عارف انو ناس ساهور ديل وناس النيل الأزرق ح يعملو كدا بعد موتو والله بي نفس التمرد دا صدقني ما كان قاليهو حرف واحد في المديح ..
Quote: محمد اتصوف مؤخرا وبقناعته الشخصية .. وهو في عز تصوفوا انتج غنى جديد يعني ما خلى الغنا للمديح
.. والله يا وليد اصلو انا ما عندي اي مشكلة يتصوف يبقى شيوعي .. عندك الراحل خضر بشير بمدح عديل .. التلفزيون بعد وفاتو القدمو لي خضر بشير بالعدد .. دا لو ما كان انتهى من اي تسجيل ليهو .. المشكلة الاساسية في كلامك الاخير دا يا وليد عن انو محمود ما توقف عن الغنا .. دي نحن متفقين عليها ان ما قلت ليك محمود دا دروش ودخل خلوتو .. انا عااارفو قاعد يغني .. انا مشكلتي الكبيرة زي مشكلة عمر دي .. لييييه ناس النيل الأزرق وناس ساهور .. مصريين انو يقدموهو لينا كزول مداح اصلن اصلن .. ما غنا قبال كدا .. دي المشكلة يا وليد ..
02-26-2013, 02:34 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: ناس ساهور .. والنيل الأزرق .. عايزين يسوقو الناس على انو محمود دا من الله خلقو مداح .. اصلو ما غنى اي حاجة في الدنيا دي .. وذلك بعد وفاتو .. مع انو التسجيلات العند النيل الأزرق من حلقات لي محمود ما ليها حد .. طيب ليه ياخ ناس النيل الأزرق ديل يروجو لي محمود كدرويش بيمدح بس .. وليه ما يجيبو الغنا حقو .. وليه نحن ياخ نتحمل يجينا زي خالد أحمد المصطفى دا ويصر انو يقول لينا كلام نحن ما لينا اي علاقـة بيهو .. واالله العظيم نحن في غنى عنو .. ياخ ليه بيشوهو لينا الحاجات الجميلة ويخلونا الحاجات المقدسة زاتو ننفر منها ..؟
كأنما القصه طلب مغفره وانو الغنا .. (ما بودى لى قدام) فالمديح فى الوقت ده ...( قرش ابيض لليوم الاسود)
02-26-2013, 03:47 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
وليد يا حبوب: زي ما قال ليك تمبس قد يكون فكرتي ما وقعت ليك .. انا أصصصلو ما ناكر إنو محمود بقا يمدح ولااا معترض على إنو محمود يمدح .. وبرضو قبل ما أدخل ليك في فكرتي الأسسية خليني أعرج بيك على حتة مديح محمود القلت ليهو سنتين ده .. لو تقييمك لي إنو محمود بقا مادح بناءً على ما قدم عبر قناة ساهور فمحمود مادح قبل أكتر من سنتين مش؟لأنو محمود سجل لي ساهور قبل فترة ليست بالقصيرة .. النقطة الأهم يا وليد والأهممم شدييييد إنو البيسوي فيهو محمود ربي يرحمو ده ما مديييح!!! يا وليد أكيد بتكون عارف شروط المديح وكيف شيخونا زمان بيبدو المدحة ..المدحة عندها أسس..انا ما ملم شدييد بي القصة دي لكن من السماع ساااي بفرز إنو المدحة شيوخنا وأبواتنا عملو ليها قالب زييي الخطبة ..تبدا بي شنو وفي النص تقول شنو وتختم بي شنو .. يعني أييي مدحة مؤسسة لاحظ ليها بتبدا بي ذكر القبلي والبراق..وأي مدحة بتنتهي بي الصلاة على الرسول صلى الله عليه وسلم في قالب عفوي ليس مصطنع ولااا منجور ..وفي النص بتلاقي المواعظ والمعجزات .. صاح ممكن أييي زول أسة يكتب ليهو قصيدة بي الفهم ده ويقول ليك انا كتبت مدحة لكن صدقني يا وليد أضان البني ادم دي مجججرمة وفرااازة وبتفهم دي مدحة ولا نجرة وإصطناع.. يعني اسمع مدحة البوكسي والطيارة للشيخ البرعي ومع غنو من إسمها ما جادة لكن من جوة بتسمع حاجات فرق كبيير من المدحة الكان بيمدحا الولد الاسمو الجزار بتاعت العربية وفراملا وما بعرفو ليك المكانيكي.. يا وليد انا وإنت وكللل الناس عارفة مقولة شهيييرة اشتهر بيها الظاهرة الكونية محمود ربي يرحمو ..سمح الغنا في خشم محمود ..ومتتتتعة محمود وقمممة إبداعه بتتجلى في إنو محمود يختار بعناية اغاني الغير ثم يغنيها افضل منهم بي كتييير.. والما عارفينو الناس إنو معظم إختيارات محمود لي غنا الغير كان من محمود نفففسو مما يعني إنو زول عندو زوق عااالي جداً.. عليه يا وليد لما محمود يقرر يمدح فصدقني أووول حاجة كان ح يعملا محمود إنو كان ح يختار مدايح يممممسخ على اولاد الماحي واولاد البرعي يمدحوها لي ووم الدين ..وكان إختار ليهو مدايح محححنت المستمع وخلتو يقول ده جااابو من وييين المدييح ده.. لكن أن يمدح محمود مدايح ما ما معروف ليها راس من قعر ويا قول خالد المصطفى محمود مدح كلمات للمادح نزار قباني (قال لاشاعر بس المادح دي من عندي) فصدقني ده مااا ما محمود ولااا تفكير محمود ..ما بقول ليك محمود ساقوهو لأنك زييي ما قلت الحوت شفففت وود حلة ومتمممرد وماااف زول بيقدر يسوقو وإلا لكان الحوت حالياً حياً بيننا وسميين اميين ويملك العمارات والعربات والحاشيات و و و و .. بالله عليك يا وليد من بين ال 25 مدحة القلوا مدحهن محمود جيب تلاتة مدحات انت حافظ منهن اربعة مقاطع .. عايز تعرف يا وليد إنو الحوت ما كان مادح؟؟؟ شوفت التسجيل البيتفاخرو بيهو ناس ساهور إنو كان اخر ما قام به محمود في حياته هو مدحة إلا محمد وهو اخر تسجيل ؟؟؟؟ أها دي مفروض نهااائي ما يعرضوها ولا يتفاخرو بيها عارف ليي؟؟ أمشي شوفا وح اعرف.. ح تعرف إنو كللل جمهور محمود الخرااافي واللي كسسسر مسرح مدني رغما عن إنو محمود ما حضر الحفل المقام على مسرح مدني ما كلف نفسو في مهرجان مديح يقيمه محمود إنو يحضر.. شوفت المسرح الكان بيمدح فيهو محمود كان فيهو كم نفر؟؟؟شوفت حتتتى طريقة قعدة الحضور؟؟؟ الخالف رجلو وبيتونس مع زول والبينضم في تلفونو و و ..فقط وفقط جماعة ساهور هم البيبشرو وعاملين فيها منفعلين ومتاجوبين .. صدقني يا وليد محمود ده لو الناس مقتنعة بي حاجتو البيعملا لو كان بينضم ساااي كان الناس الخرافية دييك كللها مشت وقفت تسمع نضم محمود ..لكن كونو محمود يكون بيمدح وما يحضروهو إلا صفين لا يتجاوزوا ال30 نفر فدي إشارة وإشارة واااضحة ..
02-26-2013, 04:15 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
المهم احكي لي قصة ظريفة مرة عملوا ناس ساهور احتفالهم ده .. المسرح اتملى فل لمن غلق ... دقستهم خلو محمود غني في النص الناس كانت قاعد في كراسيها .. جا محمود كل الشباب وقف على حيلو ومشى قدام المسرح وخربوا الرصة
المشكلة الكبيرة ... انتهى محمود ولسع في فنانين ومداحين يا معلم تلات ارباع الجمهور اتخارج بعد ما محمود اتخارج
02-26-2013, 05:34 PM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
سلام جاكم محمود وما ادراك ما محمود، بالنسبة لي في السودان دا الفنان البيطربني حتى لو مشى في الواطة دي "النور الجيلاني" وعندي معاهو مزاج خاص، ومحمود سمعتوا بدري جداً في حفلة في كافتريا القدس (جنب سوبا) في منتصف التمانينيات، اها لفت نظري صوتوا لمن غنى (يا ريت يا ريت)، بعد داك بيقيت اسمع ليهو، لكن للحقيقة كان بيعجبني غناهو للناس وغناهو بتاعو هو اغلبوا ما عاجبني، لكن اغنية (الكنتا قايلوا) ولهيب الشوق، ديل بعملن فيني عمايل.
اها نجي لموضونا الاصلي (كما قال عمر اومو)، المتاجرة بي محمود واضحة جداً، والأسوأ يا وليد الشفت في تقديم محمود كمادح هو إنو الزول دا داير يقول إنو الكان بيعمل فيهو محمود دا كلو كلام فارغ (الفن والغنى) وإنو اهم حاجة عملها محمود هو المديح.
شفتا كيف دي القصة، هسه عاين في المنبر دا، ناس الحكومة مصرين إنو يجيبوا محمود وهو بيغني "المدفع الرزام" في موضوع هجليج، ليه في ظنك حباً في محمود، ما ظنيت ولا اظن هم بيسمعوا لي محمود من اساسو، لكن عايزين يقولوا دا حقنا. اها الناس العارفين محمود بيقولوا ليك يا خي محمود عبد العزيز دا هو "ذات نفسو" محمود الحوت الجان وبس، داير تعمل ليهو تعريف غير دا ما حيكون عندو اي طعم. حتى تعريف عمر الفاروق بتاع الظاهرة الكونية فدي وجهة نظر من عمر لا غير.
محمود عبد العزيز هو محمود عبد العزيز الشهير بالحوت او الجان إختر ما شئت، فنان حتى النخاع، داير تسمع غناو اسمعوا داير تسمع مديحوا اسمعوا، داير تلقي ليهو صفة غير دي او لقب غير الحوت او الجان، ما حتقدر لأنو الملف دا تم قفلوا خلاس
02-26-2013, 06:29 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
وكانك تنفى ان المديح نوع من انواع الفنون ... وكأن المادح ليس بفنان !! الفكرة ذاتها غريبة ... فالمادح فنان ولن يستطع ان يكون غير ذلك ... كلمات وصوت الحان واداء هى المدحه كما الاغنيات ... انت محتج فى شنو ؟؟؟ لو المادح هو الذى يؤدى المديح فان محمود يرحمو ربك قد مدح .. ومديح كتير ... كونو ما عجبك انت وما استوفى شروط المديح المتخيله فى راسك دا ما بنفى انو مدح من مديح فهو مادح ولو كره الفاروووغ ... وكونوا مادح دى ما بتنفى انو فنان .... والناس القالوا مدح ديل ما قالوا زيك انو ما كان فنان واتسلبطوا فيه وقالوا لا الزول دا ما غنى وغناه كلها من طرف نخرتو والماده الغناها دى ما بتصلح لى غنا ... ذى مديحو ابدددا .. بل هو كان مادح وليس مغنى ! ابدا ما قالوا كدا بل انا حسب فهمى هم عايزين يقولوا محمود كان راجل موسوعه ومدح كما غنى ... انت بس قصة انو المادح ممكن يكون عادى فنان وبغنى للجكس دى ما واقعة ليك انت بتفتكر انو المادح دا مفروض يكون ذى الراهب فى الكنيسة بمددح وبس !! اها جماعتك الوهابية الانت قاعد معاهم ديل قالوا المديح دا بدعه لا بتاع اولاد حاج الماحى ولا البرعى ولا وليد زاكى الدين .. كلهم عاااادى جماعة النهى عن المعروف ممكن تقيم عليهم الحد .... ! قايل شنو ؟؟ جايى انت تعمل من المديح شربات وتعمل ليه سياج وحرمة ... ياخ خلى المديح ... لك سينيما ما عنكو ؟؟ وتتكلموا عن الحرييييه ؟؟؟ محمود حر ياخ يغنى ... يمثل .. يمدح ... كلها فنون الله والرسول ... مافى زول يقدر يخت لى محمود محاذير وحدود ... طالما مدح فهو مااااادح .... الموضوع ما بقبل تسويف .....
سـلامات يا شـباب/ت.. وال آت دي عشانك يا دينا طبعاً.. وقبل كـلام عمـر، حقيقة كـلامك عن أن المديح (فن)، بل وإسمو (فن المديح) النبوي؟ ؛ يعبر عني تماماً.. أنا من أشدّ محبي الإستماع للجيلي الشيخ لامن يمدح بالموسيقى زي ما بطربوني أولاد البرعي (الأوائل) زي ما بسموهم الآن.. لأنهم الإتنين فنانين في أدائهم والجيلي استفاد جدا من خلفيتو (كفنان؟!) بتوظيف الموسيقى وفنيات الغناء الأخرى في المديح..لكن كمان زي ما الغنا مصنف لغنا راقي أو محترم مقابل الغنا الهابط، أو خلينا نقول ببساطة غنا سمح وآخر شين، فالمديح نفس الشي ينطبق عليه.. ومديح ناس خالد المصطفى ديل ـ حتى لو سار على الطريقة القالها الفاروق ـ فهو برضو يظل مديح مصطنع زي غنا هيثم عباس وأمثالو.. أو زي الغنا الهابط، وبرضو يبقى إسمو مديح زي ما جميلة ومستحيلة وزاد الشجون إسمهم أغاني، وبرضو راجل المرة، ويا السايق الباجوري أنا عايزاك ضروري برضو غنا..عشان ما نتعبك بالقراية كتير ح أرجع لكلام الفاروق بعدين.. بس أول حاجة خطرت لي لامن قريت البوست دا الصباح وما كان في طريقة للتعليق إنو حكاية تصوير محمود كمادح ودرويش لم تبدأها ساهور ولا خالد المصطفى أمبارح، لكنها بدت منذ لحظة إعلان وفاة محمود في تلفزيون السودان (الحكومي) بالذات .. والأخ الصادق إسماعيل أشار لمحاولة ناس الحكومة (تجيير) وفاة محمود لصالحهم بدءاً من إرسال (جهاز الأمن) طائرة خاصة لنقل جثمانه، و(دفن الليل) العملوه الخ.. لكـن..لم أعلق وقتها عملاً بحكمة قريبنا لامـن المطرة نزلت في البلد كلها إلا في زراعتو.. فقال بغضب: والله دا فرز عدييييل كدة.. وكان إتكلمنا يقولوا شويعية!.. --------- دينا: إنتي كاتبتي المفضلة للأربعاء وعقاب الشهر القصير دا :)..
02-26-2013, 11:31 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
Quote: Umalhassan Bashir Mohamed · الأكثر تعليقا · Jefferson City, Missouri بالتاُكيد لمن تقولوا انه المقارنه بين مصطفي سيد احمد و محمود لصالح محمود دي فيه ظلم شديد لمصطفي , من ناحيه ابداع كلمه و لحن و ثقافه فنيه و ابداع و اداء و وووووو نهائي مافي مقارنه مع احترامي لمحمود لكن انتو بتبالغو بجد بس واحد شجاع يجيب لي اغنيه واحده لمحمود يمكن ان تنافس فمر الزمان , او وضاحه, او عم عبد الرحيم ....بالطبع اللسته طويله و المقارنه ما و ارده يعني زي المقارنه بين عمر دياب و عبد الحليم حافظ.
02-27-2013, 06:05 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ياسر يا عيلفون: كيفنك يا راقي والشوق بحر يا ولدي:).. وانا مع كلامك ماف أييي غضاضة محمود يكون مادح بل ومن دواعي سروري .. ولكن..!! لكن دي بجيك ليها بعدين عشان اشمل ناس كتار في ردي..
محمود يا حبوب: وهو كذلك ينجروا لمممن الله يغفر ليهم..
مزمل يا خيري: رحمة الله تغشاه هذا الجان ..أو الصحابي كما يحلو لنا مناداته..
02-27-2013, 06:09 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
محمد عبد الرحمن .. الزول الفرحان بي قطر :) طبعاً وليد رد ليك ..لكن نكررا ليك..أولاد الصادق ديل أصصصلاً مداحين وبدو بي المديح وبعد داك بقوا فنانين ..بالمناسبة الأولاد ديل كانوا بيبيعو الموية في السوق الشعبي صدق؟؟؟ بس أولاد حلوين ومكافحين واستثمرو صوتهم على أحسن ما يكون وإصتفادوا جداً وانا أحبهم جداً وأحترمهم كتييير... هم من سكان الثورة الحارة 21 .. في واحدة من شرايط الحفلات المنتشرة وفي تسجيل لي اغنية بين سامي المغربي واحمد الصادق ..سامي المغربي معرووف بي حركتو بتاعت التعليقا اثناء الاغنية ديك ..أها قام أدا احمد الصادق يشيل معاهو في اغنية ..أحمد الصادق قطططعا ليهو في راسو بي صوت موبااالغة ...سامي الجمجار لمن رجع ليهو المايك قال ليهو : مداااح تمااااام :) ..:)
02-27-2013, 06:12 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
وليد يا مان : مع غنو الفيديو ما ظاهر عندي لكن عرففتو ح يكون ياتو ..وفعععلاً ده البقصدو محمود بيجوهو الناس عشان هو محمود وحتتتى تفاعلهم معاهو تفاعل حق غنا ما حق مديح..القصدتو ليك إنو مهرجان زي ده وفي مدني ويجي العدد القليييل ده لي محمود فده شي ما طبيعي .. ناس ساهور يا وليد مشكلتهم حاولو ينفذو فكرة الإستقطاب أكتر من التعريف بالنبي .. قلت لي الجماعة فضو الكراسي ؟؟؟
02-27-2013, 06:21 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الصادق يا سمعة : شكراً ليك ..وخليني في الأول أوضح حاجة صغيرة ..تقريباً أغنية الفات زمان تقريباً ما حقت محمود وفيها مشكلة ومنع محمود من ترديدها بي القانون هي بتاعت زول من عطبرة تقريباً ..بس محمود وبي ذوقو الرفيع نفش منها الغبار وقدما للجمهور ..وأذكر إنو محمود بعد قرار المصنفات منع من ترديد الاغنية ولو غناها يتسجن ويدفع غرامة ..وفي واحدة من حفلات محمود العامة ومعروف إنو محمود يغني بناء على رغبة الجمهور مش على كيفو ..اها الجمهور هتتتف اغنية الكاان زمااان ..الفات زمااان يا محموود ..وبدو يغنوها براهم...محمود قال ليهم نغننني الفات زمان سجن سجن غرامة غرامة جمهور زي ده يستاااهل يتسجنو عشااانو ..
Quote: وكانك تنفى ان المديح نوع من انواع الفنون ... وكأن المادح ليس بفنان !!
طبعاً كلامك ده ما صاااح نهااائي..وعليه كللل كلامك الجيتي بعد داك بنيتي عليهو وفقاً لي إفتراضك الفوق ده فهو كلام غلط .. لكن عاد ما إنتي دينا..تفكري للزول وتقرري ليهو ومن ثم تديهو الحل يات قول ابوداوود للفلاتية لا إييدو لا كراااعو.. وخطفا عيسى مننن كيبوردي ..اكتتر زول كان بيمثل لي فكرة الفنان المادح دي الجيلي الشيخ ...وده كلام نخليهو في الرد على عيسى.. يا دينا فكرتي ابداً ما كده ..فكرتي ببساطة وبعد وفاة محمود مباااشرة الإعلام في التلفزيون بدا يمرر لقب جديد على محمود ويقدمو على أساسو المـــادح محمود عبد العزيز .. يلا أدييك ليها على بلاطة وبما إنك لما تفتحي دكان عرور صعببة .. الإعلام الكيزاني عامل فيها ما عايز يتنازل عن المبادئ..وبما إنو محمود عبد العزيز زول بتاع بنقو ومسطول وصعلوق لكن فجأة إكتشفو إنو بهذه الشعبية قاموا قالوا يتلصقو فيهو ..أها يتلصقو فيهو كيييف وهم ناس بتاعين دين وتكبير وتهليل؟؟؟وهو زول صعلوق بتاع بنقو؟؟ أيوااا نحن نحول محمود ده لي زول بتاع دين..طبعاً أنصار سنة دي صعبة شوية عليهم لكن صوفي دي هاااملة وأيي زول بيتلصق فيها ..الرسام يقول لك انا صوفي..الشاعر يقول ليك انا صوفي..الربع بتاع الاورغن يقول ليك انا صوفي واصلا إيقاعتي دي من الصوفية..صلاح ولّي ينطط ويطلع راس البيت ويقول ليك جاتني لحظة صوفية وانا بغني .. اها يا دينا قصة إنو من يوم ولحظة وفاة محمود والتلفزيون بيحاول ينفي مشروع 25 سنة لي فنان ويختزلو في سنتين تلاتة ..وبقت تتكتب تحت صورة محمود عاشق النبي..المادح محمود.. عارفة اسة إنتو مش بتهيييجو لمن الإنقاذ دي بتغيير ليكم أسامي الشوارع والمعالم التاريخية وتحولها لي مشروعها الحضاري؟؟ مش بتهيجو لمن شارع السيد عبد الرحمن يسموهو ليك شارع ابوذر الغفاري؟؟ مش هيجتو لما أقترحو إسمو جامعة الخرطوم بجامعة الشهداء ؟؟؟ اها انا مشروعي الحضاري محمود عبد العزيز بصيغة الفنان محمود عبد العزيز وليس المادح محمود عبد العزيز .. ولسة بقول ليك المديح فن ..وفن ما ساهل..وأييي مادح ممكن يبقا فنان بسهوووولة ...لكن ما أي فنان ممكن يبقا مادح .. المديح أصعب دروب الفن كمان أها كيف ليك..وحسب تاريخ الغناء السوداني والروايات كللل البنستمتع بيهو من غنا أسة ده سواء حقيبة او غناء حديث مر عبر بوابة المديح والمداحين ..
تخريمة : بالمناسبة انا جدي أبو أبوي كان مدااااح وكان كل ما يشوفني يقول إنو كان بيشوف في شخصي أحلامو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
وضاح عبدالرحمن جابر
بكرى ابوبكر
حيدر حسن ميرغني
tmbis
حمد عبد الغفار عمر
وليد محمد المبارك
ياسر السر
Mahmoud Mustafa Mahmoud
مزمل خيرى
محمد عبدالرحمن
ناذر محمد الخليفة
سيف النصر محي الدين
الصادق اسماعيل
دينا خالد
زياد جعفر عبدالله
فيس بوك
تويتر
انستقرام
يوتيوب
بنتيريست