|
|
 قصيدة جميلة للشاعر الشاب عثمان عوض ضرار
|
باكر بجيك قاطع مسافات العشم
شايل معايا هوى العيون وآمالي في أجمل نغم
باكر بجيك من سكة القلب العشق ذاتك سنين
من صرخة الماضي اللي كان قاسي وضنين
خايف يكون زيف المدن غير أصالتك والحنين
جاييكي من ليل العذاب أرجيني بالصبح المبين
فتيني لليل الطويل يرميني في حضن الألم
سبتيني بين شبح الظنون وأحزان بتنبع من وهم
أرجيني فوق أرض الصبر جاييكي من زمنا سجم
مافيهو للأفراح طريق ولا فيهو للأيام طعم
باكر بجيك بي لعنة الريد الملك قلبي الجريح
بي حال بيغني عن السؤال مابوصفو الخاطر الفصيح
خايف يقصر بي العمر تحملني من الدنيا ريح
لو كان مقدر إني أروح سويلي في روحك ضريح
سافرتي ماخليتي خيت أبراه للمرسى الجديد
سافرتي ما خليتي لي غير ذكرة الزمن البعيد
علمتي روحي الإنشراح عملتي قلبي يحن شديد
فجأة إختفيتي من الدروب وأخفيتي كل زمني السعيد
لكني لي إحساس بسوق خطواتي لي أجمل عيون
باكر بتلقي خطاي معاك تتمشى مابين الغصون
ما تقولي لي وصلت كيف مين دل قلبك ياحنون
ما قلبي اصبح ليك مكان ياالناسيه إني أنا ليكي كون
باكر بينكشف الضباب وألقاكي في فرح الشباب
بتقشي في دمع الفراق وتزيلي في أثر العذاب
بكره المسافات تجتمع وتلم قلوب يوم عيده آب
ويعود شباب الفي هواك ياحلوه بي أحزانو شاب
|
|
 
|
|
|
|
yousif saeed ali
فيس بوك
تويتر
انستقرام
يوتيوب
بنتيريست