الشهادة السودانية ...وتابعها مكتب القبول الموحّد في ظني انهما مؤسستان يجب ان يتطورا الجامعات السودانية الان ..تموت موتا بطيئا الدولة لم تطعمها ..وبالكاد تركتها تأكل من (القبول الخاص).... الشهادة السودانية تدّر دخلا محترما....تستأثر به وزارة التعليم العام (على ما اظن) مكتب القبول ايضا مصدر جيد للدخل (شخصيا لا ادري اين يذهب)
فلماذا لا يكون لكل جامعة مكتب قبول خاص بها؟ ولماذا لا تستحدث وزارة التعليم العام شهادة خاصة بها عند تخرج الطالب من الثانوي (في امتحانات دورية لأكثر من مرة في العام الواحد) يسعى الطالب للتقديم للجامعة التي يرغب بالدراسة فيها عبر مكتب القبول الخاص ( بالجامعة)...وبالتالي يسمح للجامعات بوضع شروط الالتحاق الخاصة بكل كلية...وفق شروط قبول عامة للدخول لاي جامعة تحددها وزارة التعليم العالي؟
يمكن للوزارة ان تستحدث (Watchdog) لمراقبة الجامعات حتى لا تستغل الطلاب و اولياء الامور في موضوع رسوم التقديم و خلافه
للموضوع تبعات وملحقات
01-30-2013, 11:26 AM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
الاخ زكريا أظن وبعض الظن اثم ان المذكرين (الشهادة والمكتب) هما ماتبقى من الاشياء التي لم تصلها يدالواسطة والمحسوبية والتذوير حتى الان يتم القبول العام وفق منافسة شريفة لطلاب جلسوا لامتحان موحد كان في عمار يجب اصلاح الاخفاقات التي ذكرت وليس اتمام الناقصة ولك الود
01-31-2013, 06:23 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
أخي زول ساكت لن اجزم بإنعدام التزوير (لطالما ترددت اقاويل عن التساهل في المراقبة في بعض المراكز) ..ولكني اتفق معك في إنعدام الواسطة و المحسوبية في امتحانات الشهادة... مكتب القبول ليس له مجال او فرصة لكي يزوّر او يتعامل مع رشاوي و محسوبيات لأن قراره مبن على وثائق تقدّم له ومنطلقي ليس من باب العداوة لهذين الجهتين..... التعامل الواقعي مع التطور و الزيادة في عدد الطلاب و المؤسسات التعليمية تحتّم على هاتين الجهتين نبذ التقوقع وعدم الاعتماد على نفس الاسلوب الذي تتبعه منذ الانشاء .
01-31-2013, 06:34 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
الاخ علي ليست السعودية وحدها ..ولا اظنني اكون مبالغا أن قلت ان أكثر من 80% من دول العالم لا تتبع نظام القبول الموحّد (لا املك إحصائيات في الحقيقة) الغاية من مكتب القبول هو ايصال الطلاب لباب الجامعة .....وطالما ان الهدف هو الجامعة يجب ان تكون الجامعة هي التي يصلها (خيرات) مكتب القبول و ليست اي جهة اخرى في ظل انعدام الدعم الحكومي للجامعات (لا اظن الحكومة تقدّم شيئا للجامعات خلاف الفصل الاول من ميزانياتها) يجب ان يكون جحا هو الاولى بلحم (توره) حماية حقوق المتقدمين للقبول عبر مكاتب قبول الجامعات وضمان عدم وجود محسوبيات و رشاوي يمكن بكل سهولة ضبطها خاصو وان قرار هذه المكاتب دائما ما يبنى على وحود وثائق رسمية
فكرتك فى حاجة لمزيد من الايضاح كيف يضمن الطالب انه سوف يقبل فى الجامعة التى قدم لها؟ و هل فى الحالة سوف يقدم لاكثر من جامعة مع ما يرافق هذا من زيادة فى المصروفات يوجد شكوك كثيرة فى امانة بعض الجامعات الخاصة التى تستغل القبول الخاص و تقبل نسب متدنية جدا لتخصصات مثل الطب و الهندسة
01-31-2013, 05:08 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
انا وليد محمد المبارك احمد عبد الكريم مدير قسم النظم والتطبيقات بمركز المعلومات بوزارة التعليم العالي والبحث العلمي موظف في الوزارة من شهر مارس 1997 علاقتي مباشرة من سنة 2000 بمكتب القبول باعتبار انو ادارة تابعة لينا ومسئول عن موقعه الكتروني وشغل كتير بتاع اي تي فيه
حا اجيك برواقة وحا نفصل في الموضوع ده دعما للموضوع 2010 - 2011 كنت من الناس العملوا دراسة للكبستي بلدن مع اليونسكو عن التعليم العالي في السودان حا نستصحب معانا بعض ما دار اثناء الاجتماعات مع وفود اليونسكو
حا اجيك اكيد
01-31-2013, 06:22 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
Quote: الشهادة السودانية ...وتابعها مكتب القبول الموحّد في ظني انهما مؤسستان يجب ان يتطورا
رغم علمي التام بأن التطوير وآلياته مرتبطة ارتباط وثيق بحال البلد .. لكن مكتب القبول .. كمركز معلومات واسترجاع لقواعد السنين السابقة بالنسبة للخرجين .. وكمثال خريجي سنوات التسعينات القريبة دي .. لايملكـ أي قواعد معلومات الكترونية .. ويعتمد اعتماد كلي على الأوراق التي لديه والتي تأتي بها أنت لتثبت حقكـ في أنك خريج في السنة الفلانية .. بل وتدعم مستنداتك في حال كنت خريج خارج السودان .. ولو على نفقة حكومة السودان .. وخرجت من نفس مكتب القبول .. وتحت اشراف وزارة التعليم العالي .. يفاجؤكـ بي طلبات مدهشة وعجيبة كأن يقولوا لكـ مثلاً جيب لينا جواز السفر السافرت بيهو أول مره من السودان .. ( يمين لمن قالوا كده أصابني الذهول لأنو الجواز طلعت بعده كذا جواز ومات وشبع موت .. لكن والدي حفظه الله وجدت الجواز المعني لديه ضمن أوراق لاميها .. فانقذني .. وقالوا لي الموظف بالحرف الواحد كان ماجبت الجواز ده ما كان وثقنا ليكـ .. بالله ده كلام ده .. ) ... ده غير السلحفائية العجيبة في مراجعة الشهادات والتثبت منها .. وبرضو رغم علمي بحالات التزوير التي مرت عليهم .. مرور الكرام .. وهي تحمل توثيق إدارة التعليم العالي .. التي لم تكتشف التزوير في كثير من الشهادات .. والمصيبة يجوا يطبقوا كل اجراءاتهم السلحلفائية بعد داكـ على زول آخر يحمل شهادة صحيحة .. أدباً ليهو على حالات التزوير التي مرت عليهم والتي هم مسؤلين عنها .. والسبب عدم وجود شبكة الكترونية وقاعدة معلومات تقطع الطريق على كل حالة تزوير أو تلاعب في الشهادات الجامعية للسودانيين ... لي تجربة مريرة معاهم .. وقلت ليهم بالفم المليان يمين كان كنت عارف أنا بجيكم هناعشان تشحططوني كده .. وتوروني النجوم عز الظهر ..ما كان قريت جامعة ولا يحزنون .. ده كلو كوم والحر البتشوفو تحت المظلة الحديدية ذات الصاج المصدي ديكـ كوم تاني ...... المشكلة حلها يكمن في تأسيس قواعد معلومات الكترونية للخريجين من 20 سنة كأقل تقدير .. حتى يتم تدارك الكثير من حالات التزوير .. وكذلك يريحوا الخرجين لتوثيق الشهادات .. لكن بالطريقة الأنا شفتها السنة الفاتت ديك .. ماحنتقدم ولو بعد طرشمية سنة .. دخلت المكاتب من الداخل .. وشفت كيفية إدارة العمل .. الذي يفتقر للحوسبة في ادارته .. وهذه هي الطامة الكبري ..
ياشفت يدكـ بالله في شغلة تأسيس قواعد المعلومات الخاصة بالخريجين .. داخل وخارج السودان .. حتى تريحوا خلق الله من الجرجة ... وتكون شغلة ماتخر الموية .. والله دي ماصعبة .. لكن دايره ليها شوية قريشات .. ليكـ وللشغلانية .. واليد الناشفة مابتتلحس يا أخوي ... ...
01-31-2013, 07:42 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
Quote: لن اجزم بإنعدام التزوير (لطالما ترددت اقاويل عن التساهل في المراقبة في بعض المراكز) ..ولكني اتفق معك في إنعدام الواسطة و المحسوبية في امتحانات الشهادة... مكتب القبول ليس له مجال او فرصة لكي يزوّر او يتعامل مع رشاوي و محسوبيات لأن قراره مبن على وثائق تقدّم له
حتى وقت قريب كنت مستعداً للقسم بان مكتب القبول هو من الأماكن النظيفة جدا والتي تتمتع بكامل النزاهة والشفافية والعدالة الكلام دا قبل الانقاذ بشوية وهنا في حكاية بحكيها ليك تؤكد صدق كلامي الفوق دا بعد امتحانات الشهادة وفي موسم من مواسم مكتب القبول كانت عندي فلسفة في رأسي وقلت ما عايز أقرأ في السودان كنت أنا وصديق لي وكانت شهاداتنا عالية وسوف تدخلنا علوم اعدادي رياضيات في جامعة الخرطوم وهي السنة التحضيرية لكليات الهندسة ولكن قلنا ليه نخش معمعة الاعدادي دي نقنص ونخندق بشهادتنا ونقدم في المنح وحينها كانت المنح الى المانيا وتركيا وقبرص وسوريا ومصر المهم فكرتنا كانت اننا نمشي نقرأ بره السودان ... وفي كانت عندي مشكلة وهي انو جنسيتي ضيعتها وما لقيتها وكان في تقديم لمنحة وكان عندي صورة من الجنسية وقفت في الشباك أقدم بيها الموظف قال لي : لازم الجنسية الاصل دا كلام شنو وعشان اطلع جنسية داير أقل حاجة 5 - 7 يوم والتقديم بكون انتهى قررت اخش لمدير مكتب القبول واعتقد كان اسمه ابراهيم إن لم تخني الذاكرة اتوكلت ودخلت مكتب مدير مكتب القبول وكان في واحد قدامي جاي بخطاب في يده لاحقاً عرفت أنه خطاب توصية من وزير التعليم العالي مد الطالب الذي أمامي الخطاب لمدير مكتب القبول وعندما اكمل المدير قراءة الخطاب قام بتطبيقه واعادته الى الظرف ودفع به الى الطالب وقال له: يا ولدي أمشـــي قول للوزير نحن هنا ما عندنا محسوبية وما بنقدر نقدم زول على زول يشـــهد الله الذي لا آله الا هو هذا ما حصل أمامي وما سمعته أذناي الاثنين ديل وما رأته عيوني ياخ ما تتصور أنا في اللحظة احترمت الزول دا قدر شنو .. بعدما خرج الطالب صاحب الواسطه يجرجر أذيال الخيبة عرضت له مشكلتي فقال لي يا ولدي: لازم تجيب لينا الجنسية الأصل اها الزمن دا ما بضمن ليك نزاهة مكتب القبول نهائي ياخ
شفته كنا وين وبقينا وين؟
02-01-2013, 00:32 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
هي اسمها الادارة العامة للقبول وتقويم وتوثيق الشهادات عندها تلاته مهام كل مهمة مختلفة من الاخرى 1. القبول 2. التوثيق 3. التقويم
1. القبول : ده معروف انه محوسب من سنة 1992 موش كده وبس بل عنده موقع الكتروني يعرف عن طريقه الطلاب قبولهم منذ عام 2000 ]ده الموقع http://www.admission.gov.sd/ ومن العام الماضي تم اختبار مشروع تجريبي للتقديم الالكتروني يعني الطالب عبر الموقع ده بقدم من بيتهم ولا بجي مكتب القبول زاتو والنظام اثبت جدواه ومفروض يطبق مع العام القادم لو اتعاكس اداريا بمعنى تاني اي طالب دخل كلية في التعليم العالي من سنة 1992 بياناته محفوطة بالكامل بالتفاصيل دي
اسمو راعي ، جنسيته ، شهادته الثانوية بتفاصيلها ودرجاتها ، ولايتو الامتحن منها ، الجندر بتاعو ، السنة الامتحن منها والسنة القبلوه فيها ، الرغبات القدمها للكيات بترتيبه القدمو ، الجامعة القبلوه فيها ، الكلية القبلوه فيها، نوع القبول القدمو ، اقل نسبة دخلت للكلية الدخلها في نفس العام
بالنسبة للتوثيق وده فيه مشكلة .. مكتب القبول يرشح الطلاب والطالب يتم قبوله ويصبح طالب في الجامعة المعنية .. قرايتو جو الجامعة دي مكتب القبول ما عنده سلطة .. يفترض انو يجي لمكتب القبول تفاصيل بالخريجين من الجامعات عشان تنزل للتويق البحصل انو ماف اي فيد باك بجي نحن عارفين الزول ده دخل وين وبي كم لكن هل هو خرج فعلا ده ما قاعدة تجينا كملفات .. بتجينا الشهادة بس
طيب نحن قصرنا الشغلانة دي في التزوير كيف اي زول بجيب شهادة جامعية بندق اسمو او رقمو الجامعي بنعرف تفاصيل دخوله .. لو لقيناه اتقبل في الكلية دي في نفس الفترة الزمنية والشهادة موثقة من الجامعة بنوثق ليه بمعني نحن لسنة 2008 مثلا قبلنا 300 طالب في كلية الحاسوب جامعة السودان بياناتهم كلمة موجودة معانا خلاس في 2012 بنوثق للثلاثمائة طالب ديل فقط وطلاب السنوات التي تشبقهم واي زول ما من ضمنهم ده مزور
المشكلة ممكن يحصل تزوير ضمن الـ 300 ديل .. لنه ممكن زول يترفد او يربت او خلافه ويضرب ليه شهادة مزورة ويجينا نفتشو في الكمبيوتر نلقاه موجود ونعتبره اتخرج ده كله لانو ما بتجينا تفاصيل راجعة من الجامعات بحركة الطلاب وتسجيلهم حاولنا استطاعتنا لحدي سنة 2006 عملنا سستم وب بيز مبني على الضوت نيت للجامعات ورفعنا ليها طلابها وقلنا ليهم ادونا حركتهم داخل الجامعة ماف زول اتجاوب
المهم نحن حصرنا التزوير في نطاق المقبولين اساسا يعني زول ما تقبل في الكلية دي ما بقدر يجيب لينا شهادة عشان نوثقها ليه الا يمشي يزور توثيقنا زاتو وده ذاتو محتمل لكن دي ما مشكلتنا الدولار زاتو بتزور
المه اي خريج بصلنا بشهادة عشان يوثقها .. بنزلو في قاعدة البانات حقتنا كخريج واساسا بياناتو عندنا زي ما قلت ليك بس بنضيف عليها خريج دي
نجيك للتقويم ودي حالتك انت الشخصية انت وكل طلاب الخارج اساسا ما مفبولين عندنا قبولكم تم قبولكم تم في دول تانية وجامعات تانية بالتالي بياناتك ما معنا
طيب ما احتمال انت مزور شهادتك دي ؟ عشان كده الاجراء بالنسبة للتقويم بتم بصورة يدوية .. ونحن ما بنقدر نجيب تفاصيل شهادتك كسوفت وير لانها اساس ما عندنا عند الدولة الانت اقبلت فيها عشان كده بطالبوك بالجواز وباقي الاجراءات مطالبة الجواز عشان يضمنوا انك في الفترة بتاعة الشهادة الجبتها دي كنت داخل الدولة الجبت منها شهادتك وماف شي باكد الكلام ده غير جوازك السافرت بيه ما عندنا حاجة تانية نتاكد بيها الا تاشيرة دخولك وتاشيرة خروجك
اساسا من 20 سنة تقريبا ماف زول ببعثه التعليم العال عشان يدرس بره الا اساتذة الجامعات يعني من بعد قرار اعادة الكلاب الشهيرة في بداية التسعينات الدولة ما ابتعثت اي طالب للخارج الا يكون استاذ في جامعة عليه اي زول ما استاذ في جامعة دا قرا بطريقتو وملفوا ما عندنا ونحن ما مسؤلين منو عشان كده بنتالبة باثبات انو كان صحة شهاداتو
وبعد ما يصلوا لدرجة من المعقولية في صدقية الشهادة بقوموها
دي التلال حالات
بالنسبة لي كلامك ده
Quote: ده كلو كوم والحر البتشوفو تحت المظلة الحديدية ذات الصاج المصدي ديكـ كوم تاني ..
فشوف الصورة دي ده بدل الصاج المصدي اتفتح يوم الاحد 13 واحد 2013 دي صورو تحت صالة مكيفة بتدخل من الباب قدامك جهاز بتضغط عليه بتطلع ليك تذكرة بتستلم تذكرتك وتدخل تنظر في الكراسي وفي الوسط في مبنى من قزاز فيه 10 شبابيك قدام كل شباك شاشة بظهر فيها رقم التذكرة حقت الشخص طالب الخدمة بتنتظر لحدي ما رقمك يظهر وتمشي للشباب تقضى اجرائك
القاعة دي بدوها قبل سنة تقريبا ومفروض تنتهي في اقل من شهر وزارة المالية كانت معطلة قروشها ومعطلانا لحدي قبل اسبوعين
بالنسبة لي كلامك ده
Quote: وبرضو رغم علمي بحالات التزوير التي مرت عليهم .. مرور الكرام .. وهي تحمل توثيق إدارة التعليم العالي .. التي لم تكتشف التزوير في كثير من الشهادات ..
فانا باكد ليك زولك الشايل الشهادة ده مزور الشهادة مزور ختمنا كمان يعني ما دقاه عندنا الختم حقو زاتو مزور
تحياتي
02-01-2013, 00:28 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: الشهادة السودانية ...وتابعها مكتب القبول الموحّد في ظني انهما مؤسستان يجب ان يتطورا الجامعات السودانية الان ..تموت موتا بطيئا الدولة لم تطعمها ..وبالكاد تركتها تأكل من (القبول الخاص).... الشهادة السودانية تدّر دخلا محترما....تستأثر به وزارة التعليم العام (على ما اظن) مكتب القبول ايضا مصدر جيد للدخل (شخصيا لا ادري اين يذهب)
فلماذا لا يكون لكل جامعة مكتب قبول خاص بها؟ ولماذا لا تستحدث وزارة التعليم العام شهادة خاصة بها عند تخرج الطالب من الثانوي (في امتحانات دورية لأكثر من مرة في العام الواحد) يسعى الطالب للتقديم للجامعة التي يرغب بالدراسة فيها عبر مكتب القبول الخاص ( بالجامعة)...وبالتالي يسمح للجامعات بوضع شروط الالتحاق الخاصة بكل كلية...وفق شروط قبول عامة للدخول لاي جامعة تحددها وزارة التعليم العالي؟
يمكن للوزارة ان تستحدث (Watchdog) لمراقبة الجامعات حتى لا تستغل الطلاب و اولياء الامور في موضوع رسوم التقديم و خلافه
للموضوع تبعات وملحقات
مرحب حبيبنا
اول حاجة مكتب القبول ما تابع للشهادة الثانوية اساسا كل واحد فيهم بتبع لي وزارة مختلف الشهادة السودانية تابعة لوزارة التربية والتعليم العام والقبول تابع لوزارة التعليم العالي
قروش الشهادة الثانوية ما بعرف تفاصيلها لكن
Quote: مكتب القبول ايضا مصدر جيد للدخل (شخصيا لا ادري اين يذهب)
قروش القبول تذهب كاملة لوزارة المالية على دائر المليم واي طالب بشتري استمارة قبول بشيل اورنك 15 حق المالية محاسبين وزارة المالية بستلموا القروش هم بيدينهم وبدخلوها في جزنتهم وبمشو يسلموها لوزارة المالية نحن في القبول والتعليم العالي ما بنستلمها اساسا
تذهب وين .. ده تسال منو وزارة المالية
Quote: فلماذا لا يكون لكل جامعة مكتب قبول خاص بها؟
في دراسة عن التعليم العالي في السودان مع اليونسكو ناس اليونسكو زهلو من عدالة القبول
والعدالة ما معناتا مساواة
القبول مركز للحفاظ على حقوق الطلاب الاضعف طيب انا اشرح ليك كيف
المساواة بين اشخاص غير متساوين في الظروف عدم عدالة الطلاب كلهم بمتحنو شهادة ثانوية واحد نفس الامتحان لكل طالب شهادة سودانية
لكن نسبة لظروف البلد الفير ده ( ودي ما مشكلتنا ) اوضاع الطلاب غير متساوية بمعنى
انو الطالب الفي الخرطوم العنده مدرسة فيها فصول واساتذتها مكتملين وعنده في بيتو كهربا وموية وومكن يقرا لي 12 باليل
لا يتساوى مع طالب معسكرات دارفور والقرى البعيده في السودان من ناحية الظرف والاوضاع لانه طالب الاصقاع البعيده ما بكون عنده مدرسة مكتملة وبتكون المدرسة على بعد 7 -8 كيلو والاساتذة فيها غير مكتملين العدد والكتاب ما وصلو اساسا وما عنده كهربا في البيت يعني حدو المغرب في المذاكرة
والطالب حق الولايات ده بمتحن وبجيب لي 85% في ظل الظروف دي
طيب لو خلينا الشغلانة غير مركزية الجامعات حا تتملي باولاد الخرطوم لانو ظروفهم بتسمع ليهم يقدرو يقروا ويتحصلوا على درجات عالية .. وده ما معناتا انهم الاشطر لكن لان ظروفهم الاحسن
في حاجة اسمها القبول الولائي وفي حاجة اسمها القبول الرفي وقبول المناطق الاقل نمؤا
لولا هذه القبولات ولو تركت المفاضلة للشهادة السودانية فقط لما وجدت اي طالب من دارفور او من البحر جنوب كردفان في جامعة الخرطوم
احتمال تلقى واحد او اثنين من 1000 طالب لكن وبالقانون تخصص نسبة من مقاعد جامعة الخرطوم مثلا ليتنافي فيها ابناء الولاية لوحدهم بل كل ولا ية عندها عدد محدد من المقاعد ينتنافي عليها طلاب الولاية فقط تصل نسبة الفبول لطلاب الولايات بعض المرات الى 50% من مقاعد الجامعة القومية ( الخرطوم مثلا ) وبكون لطلاب الولاية ايضا في الجامعة الموجوده في ولايتهم 50% من مقاعد هذه الجامعة يتنافسون عليها لوحدهم والـ 50% الاخرى بتكون للمنافسة القومية
بمعني يكون لطالب اللولاية حق التقديم للجامعة دي عن طريق المنافسة القومية وعن طريق مقاعد الولايات ايضا
شوفت كيف ؟
ناس اليونسكو لمن فهمو الشغلانة دي .ز احتارو وقالوا بالحرف الواحد ده اكتر نظام عادل لدخول الجامعات قابلوه في افريقيا والدولة الاقل نمؤا
تاني في حاجة ازهلتهم مع هيصة المشروع الحضاري كانو جايين وخاتين في بالهم انو الطالبات كا يكونن مستضعفات عارف نسبة الطلاب للطالبات في القبول كم ؟
السنة الفاتت كانت 52 % تقريبا للنساء 48 % للذكور
والكلام ده من سنة 2000 ما حصل انو كانت نسبة الطلاب كان اعلى من نسبة الطالبات في القبول ودي حاجة خلعتهم واحتاروا فيها
كان في بوست انفتح هنا قبل كده بوري انو نسبة الطالبات في كليات الطب تصل الى 73% والطلاب 27 %
انا ما بقول انو القبول منزه عن العيب لكن نحن قاعدين نجتهد ونحاول نلتق العوجات الحاصلة في البلد قدر ما نقدر وفي مجالنا
02-01-2013, 01:51 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
مرحبا بك اخي وليد طبعا أنت من (آل بيت) مكتب القبول..فأي معلومة توردها لن تكون موضع شك بالنسبة لي أنا اوردت عبارة (الشهادة السودانية..وتابعها) مجاراة للعبارة الشهيرة في الرواية المصرية الاشهر كنت أعلم ان مال الشهادة السودانية تأخذه وزارة التعليم العام...والان علمت منك ان مال مكتب القبول تأخذه الحكومة وفي رأي ان مال القبول يجب ان يذهب للجامعات مباشرة
بعد قراءتي للمداخلات السابقة اتضح انني قد فشلت في توضيح رأي الذي اردت اعلانه من خلال البوست بكل وضوح ارى ان التطور الذي يجب ان يلحق بمكتب القبول ...هو الا يصير مكتب قبول موحد...بل مكاتب قبول متعددة لكل جامعة مكتب قبول الخاص بها اما تطور الشهادة السودانية...فأرى انه يكمن في انها يجب الا تكون المعيار الوحيد للدخول للجامعة
هذه الرؤية مبنية فقط على ملاحظة (ومعايشة شخصية) لمؤسسات جامعية في ثلاث بلدان مختلفة (غير السودان) وهي بريطانيا ...الولايات المتحدة...ودولة الامارات العربية حيث أعمل الان
في ظني انه تطور الانسان (التعليمي) يجب ان يمر عبر مراحل ثلاث:- * ان يكون متعلما تعليميا اساسيا (وهذا من مهام التعليم المدرسي) منوط بوزارة التعليم العام * ان يكون مكتسبالمهارة ما (وهذا من مهام التعليم الجامعي) منوط بوزارة التعليم العالي * ان يستغل مهارته في التكسب الحلال (وهذا من مهم الاجسام المهنية التي تمنح الترخيص المناسب) منو بوزارة العمل
بين كل مرحلة واخرى يجب ان يكون هناك (جسر) يربط بين المرحلتين....حاليا في السودان هذا الجسر بين المرحلة الاولى و الثانية يتمثل في الشهادة السودانية و مكتب القبول
02-01-2013, 02:20 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
اولا ...الجسر الذي يربط بين التعليم العام و العالي
في رأي يجب إلغاء الشهادة السودانية بصورتها الحالية..واستبدالها بشهادة سودانية تؤكد انك اكملت (وبنسبة تفوق محددة بعد الامتحان الذي سأورد تفاصيله لاحقا) 12 عام من التعليم العام في مدرسة (او مدارس) تتبع لوزارة التعليم العام... هذه الشهادة تمنح بعد امتحان تجريه كل مديرية او محافظة او ولاية موحدا لكل المداس التي تتبع لها.... هذه الشهادة تؤكد فقط انك انسان تلقيت تعليما اساسيا في افرع اكاديمية متعددة (مواد علمية - مواد انسانية - فنون - حاسوب...الخ) هذه الشهادة (بعد توثيقها من وزارة التعليم العام) لابد من ان تكون احدى الوثائق المطلوبة (وليست الوحيدة) في اي مجال يريد صاحب الشهادة دخوله، سواء ان كان ذلك المجال تعليميا او عمليا... إضافة لذلك ، لابد من إنشاء اجسام اكاديمية تفتح عضويتها لمنسوبي التعليم العام و العالي (من ذوي الخبرة و المؤهلات) ...متخصصة في فرع اكاديمي معين..منوط بهذا الجسم الارتقاء والدعم لهذا الفرع الاكاديمي المعين ومنح شهادات دراسية في هذا الفرع لكل من يجتاز امتحانا اكاديميا (يمكن ان يعقد هذا الامتحان اكثر من مرة في السنة).... مثلا جمعية العلوم و التكنولوجيا.... هذه الجمعية تفتح عضويتها (وفق شروط معينة) لكل اساتذة العلوم و الرياضيات و الحاسوب و الدراسات البيئية في المدارس بالتعليم العام..ولكل اساتذة هذه المواد بالجامعات.... هذه العضوية تكون مجلسا علميا منوط به تنظيم الامتحانات الدورية لهذه المواد ومنح التقديرات للجالسين لهذه الامتحانات....
بعدها (وعند التقديم للقبول للجامعة) يمكن لكل كلية بالجامعة ان تضع شرطا خاصا في الدخول للكلية بحصول المتقدم على درجة معينة في الامتحان الاكاديمي الذي نظمه المجلس المعني....إضافة للشروط العامة والتي من ضمنها حصول المتقدم على شهادة التعليم الاساسي (الموثقة من التعليم العام)
هنا يصبح الجسر الذي يربط بين التعليم العام و العالي مكون من ضلعين ....إكمال 12 عام من التعليم الاساسي و الحصول على شهادة امتياز اكاديمي في فرع معين من مجلس اكاديمي مختص
الدخل الذي يأتي من الشهادة الاساسية ...يذهب للمدارس في التعليم العام والدخل الذي يأتي من المجلس الاكاديمي يذهب لتطوير هذا الفرع الاكاديمي في مدارس التعليم العام
02-01-2013, 02:36 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
هذا الاقتراح في رأي يضمن عدة اشياء (وقد يعالج بعض عيوب الشهادة السودانية) * يضمن حق الكليات الجامعية في قبول طلاب متميزين في مجالات اكاديمية معينة (بعض الكليات قد لا تكون اللغة العربية و الدراسات الاسلامية ذات اولوية بالنسبة لها..فلماذا تكون عاملا حاسما في دخول الكلية المعنية؟) * يضمن حق الطلاب في الجلوس لامتحانات التميز الاكاديمي في علوم معينة لاكثر من مرة واحدة في العام * يضمن الاهتمام بالافرع الاكاديمية في مدارس التعليم العام..عبر توفر الدعم ووجود منبر موحد لكل المختصين بهذا الفرع الاكاديمي في التعليم العام و العالي * يقلل كثيرا من العوامل النفسية السالبة المحيطة بوجود امتحان واحد في العام هو الذي يحدد مصير الطالب
02-01-2013, 08:32 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: هذه الرؤية مبنية فقط على ملاحظة (ومعايشة شخصية) لمؤسسات جامعية في ثلاث بلدان مختلفة (غير السودان) وهي بريطانيا ...الولايات المتحدة...ودولة الامارات العربية حيث أعمل الان
بل ازيدك من الشعر بيت .. في اتجاه متبنياه مؤسسات امريكية لالغاء معيار الدخول من اساسه .. وانه الفيصل يكون الانترفيو والتست حق الجامعة للدخول
لكن شوف يا زكريا التلاته دول الانت اشرت ليها دي دول اوضاع المواطنين فيها متساوية على الاقل من ناحية الخدمات اي مواطن عنده كهرباء اي مواطن عنده موية عنده مواصلات ...... الخ
وانا بايد كلامك ده ياه الصاح لانه باعتبار انه الجامعات جهات اعتبارية .. يفترض انها هي التي تراقب المجتمع والحكومة موش تراقبها الحكومة وده باعتبار انه فيها صفوة المجتمع
لكن في ظروف زي حقت السودان اوضاع المواطنين فيها غير متساوية الموضوع بحتاج تدخل مركزي الى حين عشان ما تضيع الفيئة الضعيفة للاخر
الكلام ده بتلاحظه في الجامعات الخاصة .. بقت حقت فيئة معينة .. الفيئة القادرة
حتى لو حللت الشهادة السودانية .. ستجد انو الدرجات العالية متركز في مناطق بعينها .. مناطق الخدمات فيها متوفرة
لو سالتني انا فبقول ليك رائي الشخصي
الزول البجيب 85% في معسكر كلمة في دارفور مثلا انا بعتبره الاول على الشهادة السودانية ولو وجد ظروف مناسبة كان بجيب فوق الـ 95%
مودتي
02-01-2013, 02:16 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
ما تملأ يدك شديد كده منهم ياخ! أول حاجة نقدر إنو في تطور تم ولكن التجاوزات موجودة وفي cases محددة أنا شاهد عليها وفيها تجاوزات زي زول يقبل في جامعتين في نفس الوقت وزي زول يكون قدم السنة دي وتم قبوله في جامعة والسنة قدم وأيضاً تم قبوله من ناحية في تجاوزات فهي موجودة وبالثابته كمان .. بس ما تقول لي جيبها لينا عشان ما نفضح الناس وتدخلنا في حته ضيقة مكتب القبول يفترض يكون انزه مكان في السودان حتى لا تضيع الحقوق ومفروض يتم حوسبة القبول ليكون آلياً بدون التدخل من أحد والصلاحيات تكون عند الادمن بس أما البقية فمهمتهم تقتصر على ادخال البيانات فقط يا وليد خليها مستورة في دكاتره بدرسوا في جامعات سودانية وهم لا يملكون شهادات سودانية وفي ناس شهاداتهم مزورة وبرضو خليها مستورة ياخ!
02-02-2013, 11:26 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
ما تملأ يدك شديد كده منهم ياخ! أول حاجة نقدر إنو في تطور تم ولكن التجاوزات موجودة وفي cases محددة أنا شاهد عليها وفيها تجاوزات زي زول يقبل في جامعتين في نفس الوقت وزي زول يكون قدم السنة دي وتم قبوله في جامعة والسنة قدم وأيضاً تم قبوله من ناحية في تجاوزات فهي موجودة وبالثابته كمان .. بس ما تقول لي جيبها لينا عشان ما نفضح الناس وتدخلنا في حته ضيقة مكتب القبول يفترض يكون انزه مكان في السودان حتى لا تضيع الحقوق ومفروض يتم حوسبة القبول ليكون آلياً بدون التدخل من أحد والصلاحيات تكون عند الادمن بس أما البقية فمهمتهم تقتصر على ادخال البيانات فقط يا وليد خليها مستورة في دكاتره بدرسوا في جامعات سودانية وهم لا يملكون شهادات سودانية وفي ناس شهاداتهم مزورة وبرضو خليها مستورة ياخ!
حبيبنا الامين الكلام كده لا يستقيم يعني ما تفك الكلام ساي .. كده ما صاح يا تجيب كيساتك ونتابعها للاخر او ماف داعي للكلام بصورتو دي انا شغال في القبول والكلام ده ما بقبلو منك كده ساي
بالمناسبة انا القدامك ده قاري جامعتين .. وانا المسئول من IT وكت جيت اوثق شهاداتي اجبروني انو اتنازل من واحدة .. وشالوها من السستم ورفضو يوثقوها لي هشع انا عندي شهادتين واحدة موثقة والتانية غير موثقة من التعاليم العالي .. والتعليم العالي شالها من سستمو عديل كده
اها رايك شنو ؟ اسع انا بقول ليك
اتحداك عديل كده
نجي للكلام ده
Quote: ومفروض يتم حوسبة القبول ليكون آلياً بدون التدخل من أحد والصلاحيات تكون عند الادمن بس أما البقية فمهمتهم تقتصر على ادخال البيانات فقط
ما اساسا الكلام ده حاصل من سنة 1992 .. يعني ليه عشرين سنة عشرين سنة والقبول بتم اليا بدون تدخل من احد والصلاحيات عن الادمن فقط والباقين مدخلي بيانات ماعدا قبول الوافدين .. وشهادة لندن
بالنسبة للكلام ده
Quote: يا وليد خليها مستورة في دكاتره بدرسوا في جامعات سودانية وهم لا يملكون شهادات سودانية وفي ناس شهاداتهم مزورة وبرضو خليها مستورة ياخ!
طيب مكتب القبول علاقته بالكلام ده شنو ؟ الدولار بتزور .. يعني ده بكون مسئولية وزارة الخزانة الامريكية ؟! هسع انا بوصف ليك امشي الميدان شرق سينما الوطنية امدرمان .. لو عاوز تزور زول عديل كده بزوروه ليك اما موضوع في دكاتره بدرسوا في جامعات وهم لا يملكون شهادة ثانوية .. هل قدروا في جامعات سودانية البكلارويس بتاعهم .. ما اظن هل قروا الماستر بتاعهم .. برضو ما اظن هل قروا الدكتوراه برضو ما اظن
احكي ليك الكيس ده .. قبل سته شهور تقريبا تم القبض على دكتور مدير قسم في جامعة مزور شهادة الدكتوراه الزول ده عمل حاجة غريبة جدا هو خريج اصول دين وكان مدير قسم في تقنية المعلومات الزول ده زور شهادة من جامعة كبيرة جدا بي توثيق القبول في تقنية المعلومات .. بالمناسبة ختم التوثيق ممكن يتزور وقاعد يتزور قام قرا بشهادتو المزورة دي في جامعة تانية ماستر واتخرج فعلا من الجامعة التانية لكن لانو طماع قام زور شهادة دكتوراه من جامعة امريكية وقدم للجامعة المعنية وكانت كل شهاداتو موثقة من الخارجية والقبول ( طبعا اختام وتواقيع مزورة ) وقبلوه واشتغل قريب خمسة سنوات
جا عاوز يفتح برنامج جديد في القسم المسئول عنه .. كشفته زميلة لينا .. عن النقاش لقت انو ما ناقش حاجة وما ممكن يكون خرج تقنية معلومات قامت قالت الكلام ده للمدير طالبوه عشان ما يحس بشهادات كل الساتذة في القسم عشان يفتحو البرنامج شالو شهاداتو ومشو القبول .. ل القوبل طوالي كشفو قال الزول ده قرا اصول دين في جامعة معينة .. وما عنده اي ملف عندنا بوضح انه قرا IT قالوا ليه تعال عشان تشيل شهادات وقبضوه هسع الزول ده مزور شهادة البكالوريوس وعنده شهادة ماستر حقيقية قراها عديل وزور الدكتوراه
عارف المشكلة وين ..لانو الدراسات العليا خارج نطاق القبول .. وما تحت سلطه
الحل قدمنا قبل 6 سنوات .. شغالين فيه مع اليونسكو ببرنامج اسمو OpenEMIS انو مع التوثيق اليدوي للشهادة تكون في قاعد بيانات اون لاين للخرجين .. تدخل رقم الخريج تجيك تفاصيلو .. ما جاتك تفاصيله معناتا مزور ده بالنسبة لطلبة الجامعات السودانية بالنسبة لطلبة الخارج يجلي عشان يقيم شهادتو .. يفتح ليه ملف ويضاف للقاعدة ديك
من ناحية تقنية نحن جاهزين حتى الجامعات جاهزة لكن من ناحية ادارية لاقين معاكسة من الجامعات
مودتي
02-02-2013, 03:37 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
نعم يا وليد..هناك قدر كبير من عدم المساواة في السودان.... لذلك (وحده) يجب الا يكون امتحان الشهادة (والذي يفترض في الطلاب المساواة) وحده هو منفذ الدخول للجامعة
إذا كانت مهمة وزارة التعليم العالي تنحصر فقط في وضع شروط عامة للدخول للجامعات السودانية * ان يكون الطالب حاصلا على شهادة إكمال التعليم الاساسي السوداني (أو ما يعادلها) بنسبة تتحدد سنويا (صعودا وهبوطا مع متوسط نسبة النجاح السنوي) * أن يكون الطالب حسن السير و السلوك * أن يكون لائقا طبيا * ان يكون حاصلا على شهادة نجاح في لغة اجنبية (إن كان متقدما لكلية تدرس بتلك اللغة الاجنبية) أو اللغة العربية
ثم تطلب الوزارة من مكاتب القبول في الجامعات تطبيق هذه الشروط لكي يدخل الطالب من باب الجامعة.... ثم لكي يدخل الطالب إلى الكلية التي يرغب بالدراسة فيها...تضع الجامعة شروطها الخاصة للدخول للكليات
مثلا كلية الهندسة بالجامعة تطلب مثلا تقدير محدد يجب ان يحرزه الطالب في الامتحانات الاكاديمية التي تضعها الاجسام المختصة (A في الرياضيات...A في الفيزياء ..B+ في الكيمياء B ...في اللغة الانجليزية) كلية هندسة في جامعة مختلفة قد تطلب متوسط تقدير B مثلا في كل المواد....وهكذا
الامتحانات الاكاديمية (والتي فعليا ستحقق المساواة...لانها تجرى أكثر من مرة في العام بحيث تمكن الطالب من الاستعداد جيدا دون الخوف من عدم إكمال المقرر او غياب الاستاذ) يمكن ان تجرى في المدن الكبرى...وليس هناك اي شروط للجلوس لهذه الامتحانات (يمكن لابناء المغتربين الجلوس لها في اي وقت)....
تخيل معي وليد...لو ان مكتبكم أعفى من الاهتمام بمكتب القبول...والذي في رأي هو مهمة إنصرافية للغرض الاساسي من إنشاء قسمكم بوزارة التعليم العالي من ترقمة (ان صحت ترجمة Digitization ) كل البيانات المتعلقة بالجامعات السودانية ..من تخصصات و اساتذة و بنى تحتية...وتوثيق كل مخرجات البحوث لهذه الجامعات (إن وجدت)...والربط الالكتروني للجامعات لتبادل المنافع... أليس هذا بأجدى من صرف الجهد و المال في مراقبة وثائق التقديم للجامعات؟
02-02-2013, 08:44 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
Quote: طيب ما احتمال انت مزور شهادتك دي ؟ عشان كده الاجراء بالنسبة للتقويم بتم بصورة يدوية .. ونحن ما بنقدر نجيب تفاصيل شهادتك كسوفت وير لانها اساس ما عندنا عند الدولة الانت اقبلت فيها عشان كده بطالبوك بالجواز وباقي الاجراءات مطالبة الجواز عشان يضمنوا انك في الفترة بتاعة الشهادة الجبتها دي كنت داخل الدولة الجبت منها شهادتك وماف شي باكد الكلام ده غير جوازك السافرت بيه ما عندنا حاجة تانية نتاكد بيها الا تاشيرة دخولك وتاشيرة خروجك
اساسا من 20 سنة تقريبا ماف زول ببعثه التعليم العال عشان يدرس بره الا اساتذة الجامعات يعني من بعد قرار اعادة الكلاب الشهيرة في بداية التسعينات الدولة ما ابتعثت اي طالب للخارج الا يكون استاذ في جامعة عليه اي زول ما استاذ في جامعة دا قرا بطريقتو وملفوا ما عندنا ونحن ما مسؤلين منو عشان كده بنتالبة باثبات انو كان صحة شهاداتو
كلامك مقنع شديد .. وشاكرين على ردك الضافي الشافي .. وأفرحتني شغلة الصالات الجميلة التي أتيت لنا بصورها ... لأن الطلاب والخريجين بيعانوا في الحر .. لكن بعد الصالات الكاربة دي أخير الواحد يجيب مخدتو معاهو ..
Quote: بكل وضوح ارى ان التطور الذي يجب ان يلحق بمكتب القبول ...هو الا يصير مكتب قبول موحد...بل مكاتب قبول متعددة لكل جامعة مكتب قبول الخاص بها اما تطور الشهادة السودانية...فأرى انه يكمن في انها يجب الا تكون المعيار الوحيد للدخول للجامعة
في رأيي محاولة تعديل نظام القبول القائم واستبداله بنظام خاص بكل جامعة يفتح الباب أمام التجاوزات والمحسوبية ، أؤمن على كلام وليد وازيد عليه أن التنافس سينحصر في الفئات ميسورة الحال فلو ترك الحبل على القارب لإدارات الجامعات لصارت المسألة ربحية بحتة ضاربين بالأمانة العلمية عرض الحائط . بالاضافة الى ذلك يكون الطالب مقيد بفرصة محدودة للقبول ولجامعة معينة عكس التقديم عن طريق مكتب القبول الذي يتيح لك التقدم بعدد مقدر من الفرص . بالنسبة للتوثيق الحل الوحيد للقضاء على التزوير هو ربط التعليم العالي بقاعدة بيانات الجامعات حتى لو لم يكمل الطالب دراسته الجامعية يمكنه توثيق شهادة تفاصيله بعد تأكدهم من سنين دراسته بالجامعة المعينة . يا وليد هل من مساعدة في كيفية البحث عن سجلات قبول عام 92 مع الشكر ..
02-03-2013, 03:03 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
قفل باب المحسوبيات و الرشوة في مكاتب القبول بالجامعات...هو من اختصاص الوزراة والتي منوط بها ضبط الجودة في مؤسسات التعليم العالي برمتها ليس ذلك فقط ...ولكن - وكما ذكر اخي في المريخ الامين - حتى تجاوزات الاساتذة بالجامعات و التزوير في الشهادات هو امر يجب على الوزارة وضع القوانين المناسبة لكشف الامر و ضمان عدم حدوثه هنا في الامارات تطلب الجامعات توثيق شهادات الدكتوراة من بلد المصدر..ثم سفارة الامارات بتلك الدولة (او خارجية الامارات) ثم ترسل صور هذه الشهادة بجميع تلك التوثيقات للوزارة على تحتفظ الجامعات بالاصل....وبعد ذلك للوزراة طريقتها في التحقق من صحة الشهادة...وبالجامعة التي أعمل بها تم ضبط حالتين للتزوير كان نصيب فاعليها الطرد من الجامعة (جاء الكشف من الوزارة)
في إعتقادي ان اهتمام الوزارة بأمر قبول الطلاب للجامعات يلقي عليها بمهام غير مبررة...وجعلها تنصرف عن امور مهمة كما ان الامر ...جعل بعض الجامعات تستفيد من هذا القبول الموحد (في صيغة Since we are hard to get, then we are the best ) دون الاهتمام بالجودة التي تؤكد فعلا انهم الافضل...علاوة على انه يسحب دخلا محترما الجامعات اولى به
02-03-2013, 03:59 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Zakaria Fadel
علي محمد الفكي
زول ساكت
وليد محمد المبارك
جمال ود القوز
الامين موسى البشاري
فيس بوك
تويتر
انستقرام
يوتيوب
بنتيريست