|
Re: قررت أمس أسوى الغدى :))))))))))) (Re: رانيه محمد الشيخ)
|
الرز اصلا وصفته سهله وسره يكمن فى ضبط مقدار الماء مع الرز البسمتى بيقولوا المقدار بيكون الضعف يعنى جردل رز قصاده جرديلن مويه لكن المصرى مره ونص فقط فى العلبه مكتوب يجب نقعه نصف ساعه ومرة اخويه قالت لى طوالى اكشحى فى المويه المغليه انا قولت ارضى الاتنين غسلته على السريع وختيته فى المصفا و اول ما المويه غليت بعد اضافه هبوبه ملح وزيت فيها دفقته فيها لمن ختيت الغطى وفرحت شديد بمنظر الحليتين مغطيات قولت اخد لى رست بعد الاجتهاد الخرافى دا وليسه ما بعدت خطوه من باب المطبخ سمعت صوت شى عايز ينفجر رجعت جاريه لقيت غطى الحله حقت الروز بيرقص براه من البخار قومت طوالى شلته ومنها مكونات الحله راق واخد نفسه قولت مخير هو ما عايز يتغطى خلى الهوا يدقه انا عملت العليه كده فاصل اخر ونواصل
| |
|
|
|
|
|
|
Re: قررت أمس أسوى الغدى :))))))))))) (Re: أيمن الفاضل)
|
Quote: وبعد صليت وتشهدت وكفكفت الاكمام ورفعت رجلين البنطلون ولبست الكمام وقفت امام باب المطبخ |
اصلو انتي دايرة تسوي غداء ولا دايرة تحرري القدس
رانية ازيك غايتو لو دي طريقة طبخك العريس برجعك بي دلالك (وش ضاحك)
| |
|
|
|
|
|
|
Re: قررت أمس أسوى الغدى :))))))))))) (Re: بشير جبريل علي)
|
بركه العرفت له يا بشير لكن حاتم اتبع سياسه المصطلحات فى سودانت المشهوره بجلبطته لغويا كل زول قاطع لغه من فاخورته براه بهناك الغريب ان الكل بيفهم بعض بعد دا كله :))))) حسى كان بدينا الغروده بهنا قال الله بقولوا بكرى بيعلن اغلاق سودانيزاونلاين لامد غير معلوم
| |
|
|
|
|
|
|
Re: قررت أمس أسوى الغدى :))))))))))) (Re: شرف الزاكي)
|
يا شرف انت قايل نص المتزوجات ديل من يوم الزفاف عاصوا الملاح ولا شنو غايتو اسئل المتزوجين كم واحد فيهم كان بيعانى فى السنه الاولى زواج غذائيا وما عيب الحياه مدرسه والتعليم متاح فى اى زمان ومكان ما عيب نكون جاهليين ونحاول نتعلم مره واتنين وثلاثه لكن العيب نستسلم للجهل وننتظر الدليفرى :)))))))))))))))))
| |
|
|
|
|
|
|
Re: قررت أمس أسوى الغدى :))))))))))) (Re: رانيه محمد الشيخ)
|
حكمة اليوم:
Quote:
ما عيب نكون جاهليين ونحاول نتعلم مره واتنين وثلاثه لكن العيب نستسلم للجهل وننتظر الدليفرى |
اوسكاااااااااار ـــــــــــــــــــــــــــــــــــــــــــــــــــــــ
التحية ليك يا رانية وعندي واحد صاحبي عندو سؤال:
قال ليك الحلة الاولى معروفة وهي (شوربة كبكبي)
بس التانية دي قدر ما قلبنا الصورة فوق تحت ما عرفناها...فبالله الطبيخ التاني دة ملاح شنو؟؟؟؟
هذا مع كل الود والتقدير
محمد مكي
| |
|
|
|
|
|
|
Re: قررت أمس أسوى الغدى :))))))))))) (Re: حمزة سيف الشريف)
|
يا حمزه الكمونيه دى مش العفشه بتاعت معدة الخروف بتذكر زمان اتشالقت وقعدت فيها مع خالتى امى لمن شافتنى قالت لى امك ما قعدت القعده دى لان لصراحه مافى زول فينا بياكلها اصلا فى بيتنا لكن البتذكره عملية الغلى وتقطيعها لشرائح ونقعها فى المويه المغليه ومنها اخراجها وتشحيطها بالسكين وبعد دا اظن تقطيعها لكن طيب البتكون زى الحبال اللايوقه دى شنو وبنقلبها بصباع القلم :)))))))))))) اظنها المصاريين مش
| |
|
|
|
|
|
|
Re: قررت أمس أسوى الغدى :))))))))))) (Re: الزنجي)
|
بعد ما قررت ان الحلل كفاها اشتعال حرارى طفيت عليهم دايما بيقولوا سر الاكل المسبك انك تخلى على نار هاديه ينجض ولازم استعمال العوازل عشان نفصل بين الحله والنار بعد التوطيه وبيقولوا كمان الطيجان بتسبك الاكل بطريقه اطعم من الحلل العاديه الطاجن ما عارفه هو دا المصطلح بتاعه ولا شى تانى لكن الاوانى المن الفخار اظن ولا الطين معموله اها نرجع للحلل الطفيت عليها النار وقررت اجرب مفعولها فى اخويه اسامه واكيد النتيجه معروفه غايتو الفشل دا احساسه مؤلم بالجد وتبقى مصيبه لو لقيت ليك زول يزيدك ألم من جراء هذا الحدث ويكويك بكلمه كلمتين كده تورمه ليك اكتر احمدالله اخويه كان دبلوماسى ما زعر فينى لكن هل الرجال المتزوجين حيتقبلوا فشل زوجاتهم فى الطبيخ بروح رياضيه وتحفيز لاعادة المحاوله ولا بتبقى نهره وتريقه يمسكلها ليها لحد ما عيالها تدخل الجامعه وتكون بقيت طباخه درجه اولى ربنا يوعدنا بالانسان البيقدر يتفهم المواقف صح وبيعالجها بحكمه الحكمه دى ماشى ساهل وياما عمرت بيوت بيها خساره اغلب الرجال ما حكيمين هم اصلا لو كانوا حكيمين كان دا بقى حالنا :((((( النسوان زااااااااااااااتهم بتاعين سواطه لو الزوجه فى بيت اهل الراجل بيكون الخبر وصل لجاره الفى الحله التانيه حاجات بالجد مافيها اى ذرة من مراعاة الشعور وبتضخم على الزول وجعته بطبعى لمن احس بالاحباط بنووووووووم دخلت غرفتى وشخرت بمزاااااااااااج لمن صحيت على دق فى الباب والشباك لانى دقست وقفلت باب البيت جوا بالمفتاح ولمن قومت لقيته اخويه بيطمئن انى ليسه عايشه ولا انتحرت النومه كانت مفيده صحيت بمزاج اروق وطلعت سرقت تليفون سمسم واتصلت بامى قولت ليها الحصل وانى عايزه اعرف سبب الفشل شنو لان اكيد لو عرفنا الخطىء وين حنصلحه فى التجربه الجايه وامى بصدر رحب بديت توصف لى الامور كيف وبرغم ان ياها المكونات ذاتها لكن ترتيب اندماجها يا سبحان الله بيقلب حالها الخلانى اكتب الموضوع ان بالجد لو عرفنا دايما اسباب فشلنا حنصلح امور كتير فى حياتنا وذاتنا المشكله ان منو البيكون صادق وبيدينا الحقيقه بلا نواقض او زوائد عدم ثقتنا فى كلام بعض افقدنا الحقيقه فى اغلب نواحى حياتنا لدرجه بقيت ما بقدر اصدق اى خبر اقراه ولا حتى اسمعه فى نشره اخباريه فى مره كنت راجعه من الشغل وداخله على مدخل الكبرى حق النيل الابيض اظن اسمه كده وفجعتا لقينا لينا الحافله حقت 24 راكب بتطوطح زى السكرانه وجاريه شديد لحظتها حسيت انى بتفرج فى فيلم بوليسى وما كنت مصدقه دا بيحصل فعلا اللى لمحته ان فى بنت كانت بتقابض فى الدلكسيون مع السواق بتاع الحافله وبتكورك الكويس ان الحافله ما دخلت الكبرى اطوطحت وجات راجعه ولبست فى عاموووووووود الناس طبعا اتلميت ونزلوا البنت وكانت فى حاله ما يعلم بيها الا الله وما تميت الشمار ومشيت تانى يوم فى الجريده الخبر ذكر بطريقه لمن شكيت انا العيونى كانت بتهلوس ولا الناس دى بقيت بتكتب كلام بره راسها فى الجرايد
| |
|
|
|
|
|
|
Re: قررت أمس أسوى الغداء :))))))))))) (Re: رانيه محمد الشيخ)
|
رانية أستمتعت جداً بالبوست بتاعك دا لأني عشت نفس التجربة فى بداية الزواج وحبيبة القلب طبعاً جاية ولاعندها أدني فكرة عن الطبخ .. بس فى النظافة والترتيب والديكور 100% أها عدينا شهر العسل جولة لعدد دول ورجعنا البيت وراحة الأسبوع الأول دعوات وأكل من بره .. المهم ..ياتبارك وياحبيبي تحب تأكل شنو من يدي اللهم أستر .. قلت ليها أي حاجة من أيدك !!! وأشوف ليك النقة فى التليفون .. ماما .. ايوه .. ماما والورقة والقلم .. عملت رايح وقتها .. شميت بعد شويه ريحة البصلة وصوت عدة المطبخ زي المنطقة الصناعية .. عرفت بعد داك الحلة كانت ملاح بطاطس وكل شويه ماشه على التليفون .. تاريها الحلة من كترة الصواطه بقت حلة عدس !! لحد ما جاطت ليك البطاطس جوطة السنين فرمتها عديل كدا يعني يستحيل تصل لجزء من بطاطساية وجابت الغداء وقالت لي عارفها ما ظبتت بس الطعم كيف ؟؟ كيف ياحبيبتي دى أحلي ملاح أكلته فى حياتي ... كضاب طبعاً ـــــــــــــــــــــ اما اليوم .. وبعد كل تلك السنين بقت مستشارة ومخترعة أكلات .. والله صحي ..
| |
|
|
|
|
|
|
Re: قررت أمس أسوى الغداء :))))))))))) (Re: معروف حمدين)
|
اخى معروف والله انت اجدع زول يشارك مافى وحده من طلعت من بطن امها كانت بتسوط فى الملاح وحتى لو سئلنا امهر طباخه وطباخ وسئلناهم هل حرقتوا حله قبال كده ولا باظت ليكم طبخه وجدعتوها فى الزباله حيقولوا اىىىىىىىىىىىىىىى وكضاب الحيقول لا لان دا طبيعى نتعلم متين نتعلم ما عيب المهم فى الاخر نتعلم ونلقى البيشجعنا للعلام دا مافى زول كامل من كل النواحى محتاجين فى حياتنا الزوجيه وخصوصا فى السنه الاولى نراعى جهلنا بامور ونجتهد نعالجها عشان السنين البعديها تكون اجمل وتبقى اللحظات دى ذكرى مضحكه لينا والحكايه دى مافى الطبيخ وبس فى اى شى اى انسان اتقن اى حاجه فى حياته عدى بالمرحله دى وغلط مره واتنين وثلاثه واربعه لحد ما وصل للمكانه دى يبقى ما مفروض نقلل من شأن بعض عشان ما عارفين وعايزين نتعلم اسعدتنى جدا مشاركتك اخى معروف وربنا يخلى ليك المدام
| |
|
|
|
|
|
|
Re: قررت أمس أسوى الغداء :))))))))))) (Re: رانيه محمد الشيخ)
|
الابنه رانيه لكن طيب البتكون زى الحبال اللايوقه دى شنو وبنقلبها بصباع القلم :)))))))))))) اظنها المصاريين مش ----------------------------------------------------------------------------------------------------------------------- 1/ فعلا دي المصارين --- يا بت مات تقطعي مصارينا من الضحك . 2 / الحله التانيه : فول س---( اي غير مكشن )-----اده و قابل ان يكون فول مصلح . بعدين الطبيخ عاوز معرفه اتوكلي علي الحي الذي لا يموت و جوطي بس ما تحرقي الاكل الكارثه هنا و احيانا بت جيب زعل ، يا ما اكلنا اكل لي يوم الليله ما عارفنو شنو .
ابن العوام
| |
|
|
|
|
|
|
Re: قررت أمس أسوى الغداء :))))))))))) (Re: الزبير بشير)
|
إزيك يا رانية..
أنا وظيفتي الكنت متبرعة بيها في البيت إني أعمل الشاي بعد الغدا.. وطبعا الشغلانة كانت مزاج .. يعني ابخر الكبايات بعد ما المعهم مع الصينية والثيرموس.. بعدين ما بخلي زول يصب الشاي ولا يشيل سكر براه.. أي فتفوتة سكر في الصينية ولا نقطة شاي بتخرب المزاج..
أما بالنسبة للطبيخ.. صح أي زول بيتعلم في مرحلة ما من حياته إنه يطبخ.. لكن أنا عندي تجربة مع الرز.. بسمع دايما كنت الكلام عن الرز المفلفل وبشوفه دايما مضبوط.. قلت يوم أعمله.. جبت رز وفلفل كتير...والباقي تميه بخيالك الغريبة ساعة ما بعمله كنت بقول لنفسي لكن ليه يا ربي الرز الباكله مافيه طعم الفلفل؟؟
الرز التاني كان رز اللبن.. أشيل الرز من شواله وأضيف ليه اللبن.. دقيايق ألقي ليك الرز قوي زي ماهو واللبن إنتهي.. اضيف اللبن بتكرار بدون فايدة.. في الآخر اللبن إنتهي والرز زي ماهو.. طبعا رميته قبل الجماعة ما يجو.. اتاريه الرز المجنون..كان عايز يتسلق في الأول!! طيب مش كان يقول؟؟
.......... .........
يارانية.. المصيبة الفي الحلة الجنب الكبكبي دي شكلها فظيع جدا.. دفقي الفيها وصوريها تاني!
هذا مع المودة الكبيرة..
| |
|
|
|
|
|
|
Re: قررت أمس أسوى الغداء :))))))))))) (Re: عمر نملة)
|
يا سلام عليك يا عممممممممممممر عارف نفسى فى حكاية المعاهد دى حقت الطبيخ والخياطه بكل انواعها بالجد الجهل ما عيب العيب هو العيب ومهما الانسان وصل مراحل كبيره فى العلم برضو بيكون ليسه بيتعلم عشان يحفظ مكانته ويوسع خبرته العلم ماله سقف يقيف حده بنتظرك تورينا المعجنات كيف نعملها وخصوصا البيتزااااااااااااااااااااااااااااا
| |
|
|
|
|
|
|
|