دعواتكم لزميلنا المفكر د.الباقر العفيف بالشفاء العاجل
|
|
 خالنا ود شيقوق وصل يا شباب..إنتو فاكرين ساي؟؟
|
وود شيقوق هو خال سعادة اللواء عمر وخالي أيضا..
وصل ود شيقوق الي مقره سالما بعدإجازة بالوطن العزيز صرف فيها كل ما يملك من أموال وصبر..
ورجع منها وهو يحمل "حلة" محروقة لعمل اللبن المقنن الذي يعشقه كما يعشق موبايله الجديد..
إنتو ود شيقوق ده بيعمل قراء كتيرين كده كيف وهو ما قاعد يكتب الا كلمة كلمتين؟؟
ياربي السر شنو؟؟
.......
.......
|
|
  
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Muna Khugali)
|
.
.
يااااااااااااااااااااخبر ... والله يا بت الخليفة إفتقدنا الزول!
و مرّه كِده جانا خبر (شايلو النسيم) والحكاية حصلت في السلطنة !!، وعارف زولي قليبو رهيف
وعندو حبة شفقه ، إستنجدت بسعادة اللواء.... إلا طمنني.
حباب شيقا اخوي .... حباب شيخ العرب
مطر الخير دَفَقْ، من غير سِحابْةً قالعـه
حباب شيقا الأصم، من يومَه شمسك طالعه
أجواداً كريم، ما سيـد ضبيحةً ضالعـه
إن جيت في الديار، يوماتي نارك والعـه
حباب شيقا.... ألف مرحب.... شكراً بت ابوي الخليفة
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد فضل الله المكى)
|
Quote: أدفق يا شيقا أدفق بس على خفيف أنا عارفك جايي جرابك مليان !
لكن بكري شايل سيف الأرشفة
التقيله بعد الأرشفة.... أكيد عبيد الطيب في الطريق
حباب شيخ العرب.. الشكر ليك بت ابوي الخليفة |
مرحب بيك الاول في الترحيب برجعة خالنا ود شيقوق..
الراجل الطيب الضاحك دائما..
وبخته بأبيات السلام الطيب..
وترانا منتظرين جيته للبوست يحكي لينا..
أيامه كانت كيف..
وشجرة العفاريت في الدندر موجودة ولا العفاريت ماتت وماتت معاهم الشجرة..
والسبب شنو البخليه يشيل حلة اللبن المقنن معاه..ماكان يحرق ليه حلة تانية وخلاص!
منتظراه معاك ومع الجايين يا محمد فضل أخوي..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Muna Khugali)
|
Quote: إنتو ود شيقوق ده بيعمل قراء كتيرين كده كيف وهو ما قاعد يكتب الا كلمة كلمتين؟؟
ياربي السر شنو؟؟ |
سلام يا منى واريتك طيبة.
والف حمدا لله على السلامة على عودة المستشار بالجد.
انا ذاتي بتساءل زيك، وقلتا يمكن شيقا ده عنده ريتينزات وكده.
لكن أظن لانه بيكتب باريحية مطلقة من غير تكلف، عشان كده اطلقوا عليه " روح وريحان" المنبر.
مش إبن خلدون قال فيما معناه البدو أكثر اريحية من أهل الحضر؟
غايتو خليتينا نكسر تلج في الربيع!
محبتي
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الفاتح ميرغني)
|
Quote: والف حمدا لله على السلامة على عودة المستشار بالجد.
انا ذاتي بتساءل زيك، وقلتا يمكن شيقا ده عنده ريتينزات وكده.
لكن أظن لانه بيكتب باريحية مطلقة من غير تكلف، عشان كده اطلقوا عليه " روح وريحان" المنبر.
مش إبن خلدون قال فيما معناه البدو أكثر اريحية من أهل الحضر؟
غايتو خليتينا نكسر تلج في الربيع!
محبتي |
إزيك يالفاتح ود عمنا ميرغني..
نحنا من أمس التلج هاطل علينا ومن الربيع ما شوفنا الا تاريخ إعلان بدايته السنوي..
أنا غايته بخم من التلج بره وأجيب ليكم هنا..
.........
.........
غير كده الطيب فعلا زول قلبه طيب جدا وبسيط للغاية..
بس كمان ماقدر يشيل ليه حلة محروقة لمسقط..
إنت كيف أحوالك يالفاتح حضورك قليل للنادي..
لك من المحبة اضعافها..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Muna Khugali)
|
ااطيب اخوى
كنا عاوزين نسالك عن الشطة ..
الاّ اختنا منى .. قالت نسالك عن شجرة العفاريت ... ؟!!!!!
غايتو جننتونا معاكم .. مرّة منى تقول ليك خالى الطيب شيقوق ..
ومرّة انت تقول خالتى منى .....!! بالله دا نقول عليهو شنو ..؟
يا ربى الشجرة دى فى المنبر دا ولا شنو ؟؟؟ ( وجه ضاحك ) على قول اختنا زمان نادية مختار .. كج .. كج ...كج ..كج .. فى رواية اخرى
ههههههههههههههههههههههه
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Muna Khugali)
|
Quote: وصل ود شيقوق الي مقره سالما بعدإجازة بالوطن العزيز صرف فيها كل ما يملك من أموال وصبر..
ورجع منها وهو يحمل "حلة" محروقة لعمل اللبن المقنن الذي يعشقه كما يعشق موبايله الجديد.. |
أُم عروض بت الخليفة إنت بشارة خير وسحابة أُم بشَّار
ويا مراحب بأبوي الطيب وشاهيهو "أبو كتحة" المقنِّن
الشاهي أبو لبن خلاهو يمشي ينود
وعانج عنجة الصقر اللِّقالو عتود
إتنين وتلاتة ما بتمَّن المقصود
وخمسة وسته في الراس بفتحلُّو قدود
Quote: شَنَق طاقيتو فوق الهامة ود شيقوق
ؤطرا ناس أُم عروض والرَّاسي سمح الزّوق
ؤجَرَّ النَّم ؤشايل لي البِقولَن قوق
ؤقال غير عازة حَاتك مافي لي معشُوق
بريدها من جِنِي بي عُرفي تابْع النّوق
أطقِّع في الطيور بي القرجة والسَّفروق
اللَّرْنَب بَصِيدها وكان قِمحت أُم طوق
ؤبَفزع لي النَّبق والدِّفرة والدَّايوق
ؤبعد ما كِبرت بَدُخْل التِّيه بشُق العوق
رافاي لي الضَّعيف رقَّاع لي القِدود ؤشقوق
براحِم أهلي كل العِندو فوقي حقوق
ماني داير شُكر راجي الثَّواب من فوق
البلد الأهلها عزاز ؤافر خيرها مو ممحُوق
كسرو كراعو عُقبان قصُّو من الطايوق
|
محبتي
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد فضل الله المكى)
|
شركنا للطيارة بي جاي لقيناها فاتت ..كنا عايزين ننزله ليك زي ما الكوتش المرحوم نزل ليك ناس فاروق وبابكر ..
لكن ما تخافي .. بنشرك ليه تاني لامن نجيبه مشرقط .. وتعالي شوفي كان ما خليناهو براه يقول الناس ديل انا كنت تايه
عنهم كيف ؟ ..
هييييييييييع خالي الكلس .. مشيت السودان وجيت منو سالم ؟ .. عافي منك دنيا واخره ..
بي حله محروقه .. بي شنطه فاضيه .. بي سروال بلا عراقي .. بي كليقة عنكوليب .. البركة الجيت بي غضم رقبتك سالم ..
خلي ود المكي وعبيد الطيب يدقوا نحاسهم ويطمبرو قدر ما عندهم .. لكن قول لي مني بعد سؤالها
| Quote: إنتو ود شيقوق ده بيعمل قراء كتيرين كده كيف وهو ما قاعد يكتب الا كلمة كلمتين؟؟ |
مسينييييييييحه
خالكم اب راسا مقطوع ليهو شهر ..
عمر علي حسن
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عبيد الطيب)
|
العبيد اخوي
Quote: الشاهي أبو لبن خلاهو يمشي ينود
وعانج عنجة الصقر اللِّقالو عتود
إتنين وتلاتة ما بتمَّن المقصود
وخمسة وسته في الراس بفتحلُّو قدود |
هيييع كع
وحياتك جاى في الطيارة من الخرطوم وبالصدفة لقيت نفسي بجوار واحد من اهلك الكبابيش اسمه الطيب كمان لما قلت ليهو العبيد وعقبت ليهو بحنفي سلم لي في راسي يا العبيد اخوي
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عبيد الطيب)
|
Quote: أُم عروض بت الخليفة إنت بشارة خير وسحابة أُم بشَّار
ويا مراحب بأبوي الطيب وشاهيهو "أبو كتحة" المقنِّن
الشاهي أبو لبن خلاهو يمشي ينود
وعانج عنجة الصقر اللِّقالو عتود
إتنين وتلاتة ما بتمَّن المقصود
وخمسة وسته في الراس بفتحلُّو قدود
Quote: شَنَق طاقيتو فوق الهامة ود شيقوق
ؤطرا ناس أُم عروض والرَّاسي سمح الزّوق
ؤجَرَّ النَّم ؤشايل لي البِقولَن قوق
ؤقال غير عازة حَاتك مافي لي معشُوق
بريدها من جِنِي بي عُرفي تابْع النّوق
أطقِّع في الطيور بي القرجة والسَّفروق
اللَّرْنَب بَصِيدها وكان قِمحت أُم طوق
ؤبَفزع لي النَّبق والدِّفرة والدَّايوق
ؤبعد ما كِبرت بَدُخْل التِّيه بشُق العوق
رافاي لي الضَّعيف رقَّاع لي القِدود ؤشقوق
براحِم أهلي كل العِندو فوقي حقوق
ماني داير شُكر راجي الثَّواب من فوق
البلد الأهلها عزاز ؤافر خيرها مو ممحُوق
كسرو كراعو عُقبان قصُّو من الطايوق |
بركة يالشوفة يا عبيد ود الطيب خالي..
أهو خالك رجع..تاني بتغيب؟؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد فضل الله المكى)
|
Quote: مطر الخير دَفَقْ، من غير سِحابْةً قالعـه
حباب شيقا الأصم، من يومَه شمسك طالعه
أجواداً كريم، ما سيـد ضبيحةً ضالعـه
إن جيت في الديار، يوماتي نارك والعـه |
عليك النبي يا ام عروض هسه النم دا ما بستاهل خالك يسمعو ويجيك قادل ويدق كراعو تااااااااااااااااح نامن العلال يعكل ويخليك تتنفضي زى العاضاك باعوضة؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الطيب شيقوق)
|
Quote: هييييييييييع خالي الكلس .. مشيت السودان وجيت منو سالم ؟ .. عافي منك دنيا واخره ..
بي حله محروقه .. بي شنطه فاضيه .. بي سروال بلا عراقي .. بي كليقة عنكوليب .. البركة الجيت بي غضم رقبتك سالم .. |
خالي اول بالتبادي خالك كان هايبو والحين اتوازن - ات فاكر ساي ؟
جاييك احكي ليك المحن خليني انجم بس
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد على طه الملك)
|
Quote: إنتو ود شيقوق ده بيعمل قراء كتيرين كده كيف وهو ما قاعد يكتب الا كلمة كلمتين؟؟
ياربي السر شنو؟؟ |
ههههههههههههههههه
في المنبر يا منى بتلقي ود شيقوق دا زي ضبانة الإنداية من قرعة مريسة لقرعة تانية
ومابخلي زول ما بلزعو بي لسانو دا
عشان كدي انا لي شيقوق العدو الصديق لا بريدو ولا بحمل برا
ما سمعنا بي سفرو دا لكن يظهر بقى يكلم ناس ويدس من ناس
تحياتي منى
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: أبوبكر محمد عثمان)
|
Quote: إنتو ود شيقوق ده بيعمل قراء كتيرين كده كيف وهو ما قاعد يكتب الا كلمة كلمتين؟؟
ياربي السر شنو؟؟ |
الاستاذة/ منى خوجلي
سلامات
كدا اولا نقول بسم الله.. محمد معانا ما تغشانا
اها نحن استوائيون ناس رطوبة ودفء ساي لا عندنا تلج ولا برودة
لكن العنكوليب.. وده أس المشكلة لو قلنا متوفر...
الله يعينا
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Abdlaziz Eisa)
|
يا عزو
ياخ الف سلامة
| Quote: كدا اولا نقول بسم الله.. محمد معانا ما تغشانا |
اها محمد بقى راكب ليك في عنقرتك يا مسنوح
Quote: اها نحن استوائيون ناس رطوبة ودفء ساي لا عندنا تلج ولا برودة
لكن العنكوليب.. وده أس المشكلة لو قلنا متوفر... |
فصاحة لسان ساي هسه لو قلبوا عنكوليبك يلقوهو عدار ومهشر
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Abdlaziz Eisa)
|
| Quote: كدى دحين ارخي لي اضانك انسعلك - دحين الخال وين ؟ |
يا شيخ العرب حمد لله على سلامة العودة ... قلت لي شطة قبانيت من الدمازين!! يا أخي ما عندكم زول جاي علينا بي جاي عشان تبرني بي شوية كدا منها؟
قلت لي الخال وين ... غايتو إنت حرفنتك فاتت المعقول ...
الخوجلية سلام ... ايه الخصام غير المعلن دا؟ لا بتردي لا بتسالمي ..
تحياتي
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: أبوبكر محمد عثمان)
|
المسنوح ود شيقوق
حرم الشوق كيمان كيمان
جينا هنا وما لقيناك لما عرفت انك مشيت البلد
قلت قطع شك المسنوح دا بكون حسي فارش ليهو صفيحة طماطم في نص السوق
اها الجوز خليتو بي كم ؟
________________________________
مرحب أبو بكر محمد عثمان..
سؤالك عن الطماطم المفعصة ولا الطماطم السالمة الجديدة؟؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: خالد علي محجوب المنسي)
|
منسي
مسيخ لكن برضو مشتاق ليك يا مسجم
Quote: في المنبر يا منى بتلقي ود شيقوق دا زي ضبانة الإنداية من قرعة مريسة لقرعة تانية
ومابخلي زول ما بلزعو بي لسانو دا
عشان كدي انا لي شيقوق العدو الصديق لا بريدو ولا بحمل برا
ما سمعنا بي سفرو دا لكن يظهر بقى يكلم ناس ويدس من ناس |
امشي غير دلاقينك وتعال فاصح
زي ...... الشايلة .....
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: خالد علي محجوب المنسي)
|
Quote: ومابخلي زول ما بلزعو بي لسانو دا
عشان كدي انا لي شيقوق العدو الصديق لا بريدو ولا بحمل برا
ما سمعنا بي سفرو دا لكن يظهر بقى يكلم ناس ويدس من ناس |
غايتو يا خلد اخوي هو ماكتب عن سفره هنا لانه كان خايف من ناس الامن في السودان يقروا المنبر ويعرفوا بسفره ويبوظوا عليه سفريته..
مااليوم داك قال في واحد من البوستات انو الحكومة لازم تنزل الاسعار بما يتناسب مع دخل الأغلبية..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد على طه الملك)
|
مولانا الملك
كيفك وكيف اولادك
يعلم الله محل مشيت خلال اجازتي فانت الحاضر الغائب في كل مجالسنا
Quote: ماك طالبني حليفة لكين قدر ما شركنا للخال ودودرنا عشان يبيع عربكم أبا طااااااب ..
ياهو وفاء وانضباط الجنرالات الما بنقدر دا ..
:
عودا حميدا والتحية موضولة لبت خوجلي |
يا مانجل الخال كان مركب مكنتين واحدة بندرية واخرى ضهارية الاولى عرف لما تستهلك ما عندها اسبيرات ابدا والتانية يمكن يمشيها بمحجان طلح بس انت فاكر ساي ؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الطيب شيقوق)
|
| Quote: يا مانجل الخال كان مركب مكنتين واحدة بندرية واخرى ضهارية الاولى عرف لما تستهلك ما عندها اسبيرات ابدا والتانية يمكن يمشيها بمحجان طلح بس انت فاكر ساي |
عجبني محجان الطّلح والله كان سمعنك ناس "المردي" بشكنك لي شيخ العرب
وتري يا أبوي الطيب قالوا آخر الزمن بفضل راجل واحد والنسوان بطردنوا وبسكنوا وبجري بفز منهن
وبطلع في شجرة طويلة اها عندهن محجان طلح طويل "بلمسنٌّوا بيهو في راس الشجرة وبقعدن بتكرفن فوقو
اها ابقي عشرة علي محجان طلحك
حمدلله علي سلامتك وتحياتنا لسالم وصالح
اها عشان رويحة البادية اللي الليلة عاكلة فيك اقع سودانايل بتلقي
صاحبك حنفي مع "صديق النجوم وقاهر الرمال --علي ود قدال"
وبتلقا ولدك العبيد مع شيخ العرب والشّول ابو دعكاب"
محبتي
محبتي
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عبيد الطيب)
|
العبيد
Quote: عجبني محجان الطّلح والله كان سمعنك ناس "المردي" بشكنك لي شيخ العرب
وتري يا أبوي الطيب قالوا آخر الزمن بفضل راجل واحد والنسوان بطردنوا وبسكنوا وبجري بفز منهن
وبطلع في شجرة طويلة اها عندهن محجان طلح طويل "بلمسنٌّوا بيهو في راس الشجرة وبقعدن بتكرفن فوقو
اها ابقي عشرة علي محجان طلحك |
الله يجازي محنك - والله زول كاشف حالي في المنبر دا غيرك مافي
ياخ خليني اقدل واتجدع في ناس البندر ديل - هسه بيكونوا فاكرين المحجان دا فندق 5 نجوم
Quote: حمدلله علي سلامتك وتحياتنا لسالم وصالح
اها عشان رويحة البادية اللي الليلة عاكلة فيك اقع سودانايل بتلقي
صاحبك حنفي مع "صديق النجوم وقاهر الرمال --علي ود قدال"
وبتلقا ولدك العبيد مع شيخ العرب والشّول ابو دعكاب" |
يطول عمرك اها من دربي دا لسودانايل عشان اشوف بدعكم
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الطيب شيقوق)
|
Quote:
يا مانجل الخال كان مركب مكنتين واحدة بندرية واخرى ضهارية الاولى عرف لما تستهلك ما
عندها اسبيرات ابدا والتانية يمكن يمشيها بمحجان طلح بس انت فاكر ساي ؟ |
عارف يا خال اخوك في غيبتك يتدبا بشيش بشيش بي تحت الحيط .. يهبش الهبشه ويفوت .. ما عارف له بر يرسي عليه ..
قاموا اهلك الملوك اتحاوشوني .. القاضي بي جاي والفنان بي غادي .. قلت ياولد اركز ديل ملوك ..كان جريت بيجيبوك ..
.. انقر في الاخر مالقيت نصهم حلاوين ....
عيييييييك محجان الطلح بعد ده اخوك ما بحصله .. الشجر في العرضي نخل .. عشرة امتار ولي فوق .. خلي النسوان يشربن
ما يرون ..
تحياتي
عمر علي حسن
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عمر علي حسن)
|
Quote: عارف يا خال اخوك في غيبتك يتدبا بشيش بشيش بي تحت الحيط .. يهبش الهبشه ويفوت .. ما عارف له بر يرسي عليه ..
قاموا اهلك الملوك اتحاوشوني .. القاضي بي جاي والفنان بي غادي .. قلت ياولد اركز ديل ملوك ..كان جريت بيجيبوك ..
.. انقر في الاخر مالقيت نصهم حلاوين .... |
عييييييييييك اهلك الحلاويين ديل يكون كتلوك بالعوج او يكون فطروك كسرة ببصلة وموية وبس - وكمان بعد دا كلو لسانهم طويل يقولوا ليك دي لا بت###### ايديك ولا بتغلط عليك . الغلطة ال ........
تاني ياخال اتلهم الملوك واولاد الملوك بترسوك مشاوي نامن تترع
Quote: عيييييييك محجان الطلح بعد ده اخوك ما بحصله .. الشجر في العرضي نخل .. عشرة امتار ولي فوق .. خلي النسوان يشربن
ما يرون .. |
ما بيغلبن حيلة يا خال بعرفن البصارة ات فاكرهن ساي ؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: خالد علي محجوب المنسي)
|
Quote: بكون ( طـــ لـــ ح )
اخسي عليك شيلوك الطــ .......
بس ما تكون الخُــ
م
ر
ة
إندلقت في هِدومك
بتكون شايل كرتونتك وقادل في مطار الخرتوم يا المسنوح
هيييييييييييع نحن بنجي شايلين شمار بس وكمان ما مسحون عشان رائحته ما تنفذ مع الرطوبة بنسحن شوية
شوية
ودور دور دور
يا اللابس البمبي |
هههههههههههههههههههههها الله يجازيك يا مسنوح - باقي لي فلان اتحرك وجاب ليك العلوم من جبال واسو
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Alshafea Ibrahim)
|
حمدا لله على السلامة ..
الأهل والحبان هناك كيف ؟ الصيف الجو السعية والرعية العيش الأردب الكيلة عساها متاحة ومتوفرة ؟
شكرا منى
الشفيع إبراهيم
_________________________
قال ليك الحياة صعبة شديد والغنم ماتو من الجوع واللبن المقنن ذاتو ما اتوفر ليه كل يوم..
والأردب بقي فد كياو!
إنت كيف حالك الشفيع أخوي..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد الكامل عبد الحليم)
|
سعادة المستشار محمد الكامل
كيفك يا الحبيب وكيف الاولاد ؟ منك طولة والشوق غلب
Quote: تحية مني...عطرية وردية..
(طيبتو محبباهو....) يتحرك الانسان ساعات الهجير محتميا بالظل....هو الظل...والطل...
عودا حميدا مستطاب...
قراءة عن الواقع مطلوبة عن ديار ليلي... |
الله يحفظك ويخليك ويديك الصحة والعافية
جاييك الكثير من الديار ديار ليلي
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: محمد الكامل عبد الحليم)
|
تحية مني...عطرية وردية..
(طيبتو محبباهو....) يتحرك الانسان ساعات الهجير محتميا بالظل....هو الظل...والطل...
عودا حميدا مستطاب...
قراءة عن الواقع مطلوبة عن ديار ليلي...
____________________________________________
محمد الكامل كيفنك أخوي..
ما أظنو عنده قراية للواقع جديدة..
ياهو تقسيم القروش وغشوات الزراعة وعد الغنمز.
معاهم كده كم زيارة وكم فاتحة وكم عزومة..
يقعد في المغرب في الحوش الواسع يستمتع بصوت ماء وباء وكورية اللبن جنبه والحاجة تملاها ليه كل ما يخلصها..
ومرة الريسبشن كويس بتاع الموبايل ومرات كتيرة لأ..
يجي الخرطوم يلعب مع اولاده وأحفاده..برضه كام فاتحة علي كم مبروك..
يحضر الشنطة والأمانات والوصايا بتاعة الناس..جبنة..شطة..ويكة وما بعرف شنو كده..
يصل السلطنة يجي المنبر وما ينسي يوزع الامانات وخلاص!
الناس في العالم كله تسافر إجازات تلف فيها الدنيا تشوفها وتتعلم منها..
الا إحنا في السودان نمشي إجازات كل سنة لنفس المكان ونعمل نفس الحاجات ونصرف قروشنا ونرجع من الإجازة مهدودين!
غايتو قرايتي دي أكثر قراية واقعية..
يللا..عمر البشير ولا غيره كله محصل بعضه!
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الطيب شيقوق)
|
| Quote: عليك النبي يا ام عروض هسه النم دا ما بستاهل خالك يسمعو ويجيك قادل ويدق كراعو تااااااااااااااااح نامن العلال يعكل ويخليك تتنفضي زى العاضاك باعوضة؟ |
يا سلام علي الطرب ياخوانا وأوصافه..
نم نعقبه عرضه تسبب لي أنا بالذات نفضة كأنهاعضة الباعوض..ياسلام علي الجمال والفن في التعبير..
حمدلله علي السلامة يا ود شيقوق..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: رانيه محمد الشيخ)
|
Quote: الهقلل ...............
انت ياشيخنا منسي والله مشكي ؟
عمر علي حسن |
ما شفتو مسك المكرفون كيف وتكن بت خوجلي ابعدها بعيد
اصبر علي شوية طوّل زولك من النظري ( الفاقاق النضمي )
وزولك بقى ما بطرى البردانة اجازتو كلها في البندر يشرب في الحليب بالعملة
وين بت خوجلي خلت ابــ رويس متجدع يسرح ويمرح ويضرع
مودتي سيادة اللواء
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عمر علي حسن)
|
Quote: وين ياولد .. البردانه شتروها ليك بالجلاكسي بقت زي نيويورك .. الحليب ذاتو لغوه منها .. انت قايل ساي
عمر علي حسن |
ههههههههههههه
والعوض على الله
والله من يوم علق نضيضيرات عودي في بقى عود مراة
( ما تجيني الجندرية عزاز الشامي )
في الورثة عود المراة نص الرجل
ومن هنا جاء حديثي
عودي في بقى عود مراة ( مرة )
اسألوا من الدكتور الهندي وقصتو معا بينك وبينو
هههههههههههههه
مودتي يا سيادتو
وانا ماخايف منو شاري ضارعي وراجي برا في السهلا
أنا الكوكو الفجخ الطين
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: سيف الدولة كامل)
|
حباب المسنوح ,,, والله فقدناك لكن تلفونك مغلق
اتاريك بشويش مرقتها في البردانة .
شكرا يا بت الخليفة
________________________
وما تنسي كمان الحوامة في المطاعم في الخرطوم..
وبعدين شديد ما بيشغل خطه العماني ما تشوف كلامه عن جهله بالرومينق ده بس علشان ما يكلفه قروش..
كيف حالك يا سيف كامل
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عمر علي حسن)
|
| Quote: وين ياولد .. البردانه شتروها ليك بالجلاكسي بقت زي نيويورك .. الحليب ذاتو لغوه منها .. انت قايل ساي |
هههههها كلامك صاح يا سعادتك ناس البردانة دخلوا التقنيات الحديثة حتى في نظام حفر المطامير وغيرها .....
ات فاكر ساي؟
بت الخليفة اخبارها شنو البقت زى خط هيثرو ؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الطيب شيقوق)
|
| Quote: فصاحة لسان ساي هسه لو قلبوا عنكوليبك يلقوهو عدار ومهشر |
كدا اولا نقول يا كافي البلاء..
البوست ده هول منو؟
فتحت انت ولا منى خوجلي؟
ياخي انا منتظر منى خوجلي ترد علي تجي تتلحني انت..
شكيتك لشيخنا داك البتعرفو كويس..
بعدين
ومن حيث كذلك
ثم ماذا
العنكوليب ده مش فصاحة ساي
دي ياخوي امبحتي
وترميل
كديب وشلخ
كدا تعالي لي بغادي
عشان تعرف العنكوليب من صفقه!!!
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: Abdlaziz Eisa)
|
Quote: كدا اولا نقول يا كافي البلاء..
البوست ده هول منو؟
فتحت انت ولا منى خوجلي؟ |
عندى توكيل من منى خوجلي وهي بكامل اهليتها وحالتها العقلية المعتبرة شرعا يا مسنووح
Quote: ياخي انا منتظر منى خوجلي ترد علي تجي تتلحني انت..
شكيتك لشيخنا داك البتعرفو كويس.. |
دى وجبة ما مهم تكون حبوب السكري جنبك
احتفظ بحبوبك لحدى تجى بت الخليفة
Quote: العنكوليب ده مش فصاحة ساي
دي ياخوي امبحتي
وترميل
كديب وشلخ
كدا تعالي لي بغادي
عشان تعرف العنكوليب من صفقه!!! |
عندى درسة منقية . ارسلها ليك؟
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عمر علي حسن)
|
Quote: غلبنا معاك ياخ ..نقعد نفتش مداخلاتك بالبطارية وبالتاريخ والساعة ..
من فضلك ساعدينا بالتسلسل الزمني .. نحن اتعلمنا الحاجان دي علي كبر |
سألت بت الخليفة قلت ليها انت مالك بتعذبي الناس بالتفتيش لمداخلاتك ؟
قالت لي بالحرف الواااحد الحاجة الساهلة ما طاعمة - انت فاكر ساي؟
| |
|
|
|
|
|
|
|
|
 Re: خالنا ود شيقوق وصل يا شباب..إنتو فاكرين ساي؟؟ (Re: عمر علي حسن)
|
غلبنا معاك ياخ ..نقعد نفتش مداخلاتك بالبطارية وبالتاريخ والساعة ..
من فضلك ساعدينا بالتسلسل الزمني .. نحن اتعلمنا الحاجان دي علي كبر
عمر علي حسن
____________________________
وانا ياني الولدوني بعرفا؟؟
والله قدر ما حاولت واتفلسفت ياهو الحال..
بس مصيرا يوم تلفق وتجي صح!
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: الطيب شيقوق)
|
يا قطبا من اقطاب كوستى .. اخونا الطيب
انا غايتو منى بت خوجلى بت خالى دى ( نتلبّط شويّة ) هههههه
اها .. عملت لى توكيل حق سؤالا كدى لاايحلها اجابتو ..!!
قــصــّة شـــجــرة الــعــفــاريــت دى شنو ؟؟؟
انا اصلى كنت جاى اسالك عن الشطة القبانيت .. بس الاّ وصية منى ما بنرميها ..
وحبوبتنا الحاجة السرة بت العوض بت جاد الكريم جارة ناس كلتوم بت ود المرضى جارة ناس ( سعدية ) كج كج كج كج ... وجوه ضاحكة
المهم حبوبتنا دى قالت لى شجرة العفريت دى ..ياهو منبركم دا
اها الاجابة دى صاح ولا غلط لانى بصراحة كدة حبيت اخارجك من بت خوجلى
فتكم بعافية ..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: معاوية المدير)
|
الناس الزينين كيف حالكم ؟؟؟
سمِح الفال،
الحبوبة جابت لنا خبر الخال.
مودتي لكما من غير تطفيف...
_________________________________
بوست عمر الاربعين والخمسين لازم تجيب بعده الستين والسبعين..
الحياة شباب للأبد..
يا معاوية انا ما جبت خبر الخال..
والدليل إنه عايش في أمان الله..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: أنور سيد ابراهيم)
|
يا انور ود السيد إبن كوستي
Quote: يا قطبا من اقطاب كوستى .. اخونا الطيب
انا غايتو منى بت خوجلى بت خالى دى ( نتلبّط شويّة ) هههههه
اها .. عملت لى توكيل حق سؤالا كدى لاايحلها اجابتو ..!!
قــصــّة شـــجــرة الــعــفــاريــت دى شنو ؟؟؟
انا اصلى كنت جاى اسالك عن الشطة القبانيت .. بس الاّ وصية منى ما بنرميها ..
وحبوبتنا الحاجة السرة بت العوض بت جاد الكريم جارة ناس كلتوم بت ود المرضى جارة ناس ( سعدية ) كج كج كج كج ... وجوه ضاحكة
المهم حبوبتنا دى قالت لى شجرة العفريت دى ..ياهو منبركم دا
اها الاجابة دى صاح ولا غلط لانى بصراحة كدة حبيت اخارجك من بت خوجلى
فتكم بعافية .. |
مالك بقيت تلخبط الكيمان ؟ شن جاب القبانيت للشواطين وحبوبتك دي بالحيل صدقت منبرنا بمعاييرو دى فعلا عفريت .
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: أنور سيد ابراهيم)
|
آآآآه ولا نسيت ..اتاريك انت قاعد فى ضل الشجرة القالتها بت خوجلى وابيت تجاوب
عليها وخميتنى ساااااكت
___________________________________________________
أنور ود كوستي السمكنها الطاعم..
إشتغلت في كوستي علي 3 أوقات كل وقت كنت بقضي فيها إسبوع..
كل يوم بالمسا ما باكل حاجة غير السمك..
ولما ارجع الخرطوم أملا العربية بجرادل الفسيخ الذي لا أطيق سيرته..وصايا وهدايا
زي حقة ود شيقوق دي..
اصلنا في السودان متعتنا الوحيدة بتكون في الأكل والغنا!
كوستي سمحة والله والحمدلله الكبري إشتغل الناس تعبت من المعدية..
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: رانيه محمد الشيخ)
|
Quote: يا منى هو اللبن المقنن الا بحله محرووووووقه
:)))))))))))
دى معلومه جديده عليه
:)))))
ازيوووووووووووووو وتحياتى ليكى ولد شيقوق |
إزيك يا رانية..
غايتو ماما جارة زمان كان عندها حلة محروقة شديد ومكعوجة..
كانت الصباح لما تعمل الشاي ليها وللخليفة بتغلي اللبن فيها..
يختو كبايتين شاي كبار موجودات معاها من زمن إتزوجوها-ودي حقيقة- ومعاها براد ألمونيوم لامع مع لقيمات ولا كيك علي حسب الموجود..
البراد ذاتو فيه حرجل..بتعرفيه؟؟
وإحنا كلنا ما بنشرب شاي بس هم الإتنين..تلقيهم قاعدين يشربوا بمزاج نستغرب ليه لأنه ما بنطيق ريحة اللبن المحروق
ولا الحرجل ذاتو..لكن هم بمزاجهم!
المهم ..
هل تعرفين أن الصلصة تصنع من الطماطم الحمرا شديد ولا لأ؟؟
مع اكيد الحب والرغبة في الضحك..
......
......
| |
|
|
|
|
|
|
|
|
|
Re: خالنا ود شيقوق وصل يا شباب..إنتو فاكرين ساي؟؟ (Re: عمر علي حسن)
|
قال اخوي ود المنسي حفظه الله
في المنبر يا منى بتلقي ود شيقوق دا زي ضبانة الإنداية من قرعة مريسة لقرعة تانية[/B
والله ضحكتني يالمنسي صدقت تب
صحبك عامل درقه بالعنكوليب هاهاههههههها
مني ياسميه كيف حالك اول مره نتقابل فيها و انشاء الله دائما
شيقا كيف خليت الدراري
| |
|
|
|
|
|
|
| |
Muna Khugali
محمد فضل الله المكى
الفاتح ميرغني
الطيب شيقوق
عبيد الطيب
محمد على طه الملك
طارق جبريل
خالد علي محجوب المنسي
Abdlaziz Eisa
Mohammed Haroun
عماد الشبلي
محمد الكامل عبد الحليم
سيف الدولة كامل
وضاحة
علي محمد الفكي
معاوية المدير
محمد المرتضى حامد
mona altom
Ahmed al Qurashi
فيس بوك
تويتر
انستقرام
يوتيوب
بنتيريست