|
|
|
 Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: اسيا ربيع)
|
يا الكحلتَ عيون الدنيا بلون الغنوة
ياالضفرت ضفاير إحساس الكلمة الحلوة
يالشتتَ نجوم الليل في وش النيل
عقداً فوق القمرا بيقدح فينا الضو
يالطقطقت أصابع السحب الشالن جو
دقق عسل المطرة ونقط ..كبت شو
نضمت غنت .. سكتت صنت
مرقت دخلت ..قامت قعدت
شن بتسو ..
واقفة تلملم فوق النجم اللمّ حداها
نسجت منو الضل الخته وباقي ضراها
فتقت منو الشجرة الشالت حت جناها
سوت بيهو الهدم الصُلحة وسترة غطاها
واقفة تحزم .. باقية تلزم
خيراً جاها
إيدها تسلم تدي تعلم .. ترفع جاها
تهدي تكلم .. صوتها يرنم
يزيدها وجاهة
وغنت ليك الغنوة السمحة الما بتم
وإتضارت عين القمرا
تتاوق من بينات براق الضو
تشاشق فوق الأتر الفاتنا وقبّل من عمنول
وزغرد ليك إيقاع المطر
إتلبب حضن الأرض ونام
ود سيد أحمد
دق المحلب فوق توب أحمد
وعطّر بيهو الكلمة الحنت
وهنت ورنت ..وطارت وركت
جوه القلب .. ركزت تب
وقالت شيتن ما بتوصف
ود سيد أحمد
دق المحلب جوه الفكرة وخت الذكرى
ذكرى الليلة وذكرة بكره
أبية وحرة .. مبدأ وعزة
دراية وخبرة
شموخ بيت عزة الما بتهزا برغم الصي
وليد ضكران .. هزّ ورزّ تب ما فزّ
إتقطر نزّ .. إدفق ضي
ود سيد أحمد
شال الريشة ورسم اللوحة
شتت لونها وتيرب بيهو سما السودان
نقّط ..يحضن ليلاً سوّد هجّ وهوّد
تمرق بين النيل الكسر .. إدفق وغرق
تمرق بين الوتر الصفق غنى وزغرد
تمرق بين صفقات الشجر الخدر وورق
قام إنشابا وعانق كتف الليل
إطّاول باس القمرا وقبل عين الشمس
كيف نبكيك يا راجل الليلة ..وبكرة وأمس
كيف نبكيك ونحنا بنسمع صوتك
سراً وجهراً وهمس
كيف نبكيك وإنت معانا
تشيل وتخت .. ترص وتقص
تفج السهلة وتحكي الغنوة
اللسه بصوتك
وشالت حسك ونفسك وروحك
وسمحك زي
إنت معانا .. بقيت جوانا وماك بتفوت
___________________________
صباحاتك خير يااسيا
| |
 
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: اسيا ربيع)
|
إنت معانا .. بقيت جوانا وماك بتفوت
يا الغيبت إحساسنا النمّ .. وغِبنا عديل
كتَلتَ الحيل ..هديتَ الروح بالحيل بالحيل
طفرتْ دمعة وبلتْ عين الشمس
سالتْ .. رسمتْ شلخاً فوق الأفق
ساحتْ .. سوتْ شرخاً بين النجم
خرّتْ .. كرّتْ شرّتْ حبل النار
اتعلق فينا ونقط طقْ .. طقْ
نور القمـــــرا وضي الشمس .. اتقلدن
وبين أحضانن داب النور والضي
انشغلن وبرقن
وجّ قَبَلّنا ومحا براق الشوق
سكبنْ شيتاً ما معروف .. هزنْ ود العين
اتضارى وآراهو الخوف
لهب وبقق
بقّ وبقيق
كبكب دمعو وأوقد جمرو
وردحنْ .. رتبنْ وسونْ هو
النيل الأبيض لاقى وعانق حضن الأزرق
باس الأبيض خد الزنجي
إتقلدو.. إتقادو
إتوحدو فاتو
مات العنصر وداب الفارق
من بيناتم
هجوا ودجوا وناحوا
ولجّوا وجن أماتو بنات الحور
إضّْجنْ أو جنْ متل النور
لمن ناس النيل بي جوه إتعصرتْ
قعدنْ فوق واطاتو وفرشنْ برشاً
على موجاتو إتقالد سَمَكو وعزى
ناح تمساحو إنهزّ
كَلّب شعرة جلدو وغزا
إتربط وصفّ .. شال الحفط
عقط ونزلتْ دمعتو تَََفْ
سَدر العين إتملا بالعَبرة
إتنهد نفس الكلمة المُرة
إتأوهتْ آهة القمرا
ونفختْ قلب الجمرة ..
وكبتْ فينا ضلام
يا إنسان يا فنان يا القاومتَ
الذاكرة والنسان
دخلتَ بي وين ؟
سكنتَ الدم الجاري على الشريان
لوليت جوانا أصالة الكلمة
الشرف العزة .. العايش فينا في كل زمان
جرجرتَ علينا حروف النغم
الطرب يهز .. يفرح في كل بَكان
ختيتْ الراي صريح
قولاً وفعلاً وفكر
سَجّل أكتب يا تاريخ
يا أستاذ .. ويا ممتاز
ختيتْ الدرِس ... مفيد وصريح
درساً ما دايرلو وسايلاً للتوضيح
ونحنا فِهمنا ، كتبنا دَِرسنا على الكُراس
انتهتْ الحصة وناحنْ ثكلبنْ الأجراس
مرقًًًَََََََََََََََََّتَ صحيح وماك بترجع لينا.. صحيح ؟
مشيت بي وين ؟
وكيف خليتنا بدون تصحيح !
نصحح وين ؟.. شلنا الهَم
نصحح وين ؟.. جينا الكم؟
نصحح وين ؟
وكل أقلامنا تقطر دم
..................
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: اسيا ربيع)
|
كل الأحمر دفق لونها فحــم
ونحنا كبرنا وعِينا وزدنا فهم
عرفنا أهداف الدرس .... تمام
ختينا النقطة، الشولة ، الهمـــزة والإستفهام
خلصنا وخلاص جمعنا قلمنا كتابنا مع الكراس
يا الوحدت في سفرك كل الناس
ويا مقياس .. يا ميراث وأساس
المعنى الحب المبدأ والإحساس
نِعم الإرث الباقي وأعظم ساس
يا موجود بيناتنا وعايش ماك مفقود
جرب فوت
أغشى مدنا بيوت وبيوت
تسمع صوتك شق بلـــود
تشوف الصورة عيان وشهود
مُسجل إسمك ديمة وجود
وماك بتفوت
وكيف بتفوت؟
وأفتش ليك أنا .. جاي بي جاي
وأهلك وناسك مرقوا يكوسوا عليك معاي
وفجأة بتطلع من جواي
متل النور الضوا حداي
وموية النيل الرايح وجاي
وهج العين .. الفكر الراي
ومن الشمس بريق ضواي
وصدر الأم الليك غطاي
حديثاً يناغم ليك .. هداي
وصوتاً يهدهد فيك لولاي
(هوها يا هوها )
واحد اتنين تلاتة
إبرتي الخياطة
فيها (م) وفيها (ص)
وطاء وفاء .. وفيها كل المصطفى
.. ومصطفى يا عيال .. شن قال ؟
قال هذا السودان أمانة عليكم
في الأعناق .. تشيلو لي فوق
تفوتوا جبال .. تفتلوا حبال وتموتوا عليه
تكاتلوا كتال ، تشيلوا الشيل الما بنشال
ما هو باقي عليكم محال
أكربوا ضهركم ما هو تقيل
إنتو ما عيال الماظ وفضيل
عيال المهدي أُسود
وأوعوا وفتحوا المغموت
شيلوا بلدكم فوق لي فوق
وأنا من بينكم ماني بفوت
... تفوت لي وين ؟
تفوت بي وين ؟
تفوت من وين ؟
وكيف بتفوت ؟
سلكت الدرب الغايص فينا
ولي جوانا وماليك منو تاني مروق
ركزت الباب .. سندتو .. تكلتو
وألبد جوة الكبد
إتوسد فيهو عروق
أشرب من شريان الروح الما ممحــوق
هز نخلات الجوف
اتريق رطباً ندَ
وتمراً نزّ
وريق إتبل
إشْرف وأروى وماك مريوق
مد كرعينك فوق لحاف القلب إتمهل
أغمض عينيك أرقد فوق النبض السهل
وشال اللقمة طعّم وطمّع ريقو مقوت
إتسارق سكر وعسلاً..
نقط فوق في خشيمو شرقو وعشرق
كحّ إتنحنح
جَنو بنات الحور إتسبقن
تاكن حنكو .. إتردت روحو
وفجن ضحكة عليك شروق
وقف القلب بي توبو اتلفح
مرق إتلقى الضيف المن الروح مقطوع
فرحان بيك يرحب أهلاً .. أهلاً بيك يا مرحب
قشقش لي واطاتنا ورشرش
ضاير ليك السهلة
وفرش ليك بي مهلة
فراشاً يكفي .. ويكفي يحوق
خيرو الوافي .. وزادو الكافي
لحم غيرو عليهو مضوق
حضناً دافي ونبعاً صافي عليك مدلوق
أرقد روق
بنيت جوانا بيوت وبيوت
هزمت الموت غلبت تفـــوت .
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: ناهد بشير الطيب)
|
التحية للراح العظيم الأستاذ مصطفي سيد أحمد الذي غنى للإنسان العادي، إنسان السودان الأصيل!
غنى للجمال الحاضر وللكمال المنشود، ولم يوهن له عزم حتى حين وهن الجســــــــم العليــل!
والتحية لمن يحتفلون به في يوم اشتهاده الميمون, قبل يومٍ من اشتهاد الأستاذ محمود محمد طه!
وهو يوم ميلادي الثامن والأربعين كذلك!
وقد قضيت، مثل شهيدنا الفنان العظيم، معظم سنين عددا خارج السودان العظيم ننشد الحرية التي حرمنا منها في بلدنا المكلوم!
فالتحية لكل مهاجر تألم، مثلما تألم مصطفي، "مع الطيور المابتعر ليها مرسى،" دون جواز سفر، يوم حرمنا جواز سودانيتنا من أقسى الخصوم!
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: baha eassa)
|
لإسم: مصطفى سيد أحمد المقبول مختار عمر الأمين سلفاب.
من قرية ود سلفاب ـ الجزيرة ـ عام 1953 م.
قدم جده الأمين سلفاب من شمال السودان ، منطقة الشايقية وأستقر جنوب غرب الحصاحيصا على
بعد 7 كيلومتر منها ، وغرب أربجى بحوالي 13 كيلومتر " أربجى القديمة " والتي تقع آثارها على
النيل مباشرة ، ثم تأسست أربجى الحديثة
لديه سبع شقيقات وأخ شقيق واحد توفى فى عام 1970 م ، وكان عمره سبعة وعشرين عاماً
وكان يكتب الشعر ويغنى وتنبأ منذ وقت مبكر بأنى سأكتب الشعر أيضاً وأغنى أفضل مما كان يغنى ..
وكان صوته جميلاً ..
وفى حوالى عام 1965 وفى مناسبة زواج أحد أبناء القرية من فتاة فى قرية "العيكورة "
وفى الحفل الذى أقيم فى هذا الزواج سمعت مغنياً منالقرية شارك فى الحفل يشدو بأغنية شعبية
ميزت منها فى ذلك الوقت "الفريق أصبح خلا .. جانى الخبر جانى البلا" وملامح اللحن كانت مشحونة
بالعاطفة.. وفى لحظة صفا ذكرت لشقيقى المقبول ملامح اللحن والمعانى التى تدور حولها القصيدة
وأخبرته أن هناك إحساساً قوياً يهزنى فى هذا اللحن وهذه المعانى وقد وافق ذلك فيه ظرفاً نفسياً خاص
فكتب نص أغنية " السمحة قالو مرحّلة ".
أثبت هذه المعلومة إحقاقاً للحق وتوضيحاً للغموض الذى قد يحسه من لهم صلة بالأغنية القديمة
عندما فاجأتهم الأغنية الجديدة .. كانت أول كتاباتى بعد أن توفى شقيقى "المقبول" وأول قصيدة مكتملة كانت فى رثائه .
درس الأولية والمتوسطة "المدارس الصناعية" وكان مبرزاً حيث جاء ثانى السودان
على مستوى الشهادة الفنية ...لم يواصل فى المدارس الفنية حيث إلتحق بمدرسة " بورتسودان
الثانوية " ومنها لمعهد إعداد المعلمين بأم درمان ، حيث تخرج فيه وأصبح مدرساً بالمدارس الثانوية العامة .
إلى جانب ما أشتهر عنه من ممارسته لهواية الغناء ، أيام دراسته بمدينة بورتسودان ، كان موهوباً فى مجال
الرسم وفنون التشكيل ...عندما لم يسمح له أثناء عمله بالتدريس بالإلتحاق بمعهد الموسيقى والمسرح
قدم إستقالته وعمل فترة مصمم للأقمشة بمصنع النسيج ببحرى .
إلتحق بمعهد الموسيقى والمسرح وأكمل خمس سنوات بقسم الموسيقى " قسم الصوت " إلاّ أنه لم ينتظر حتى
ينال شهادته الأكاديمية.
متزوج وله طفلان "سامر وسيد أحمد" له من الأخوات سبع وشقيق توفى عام 1970 م "المقبول "
وهو شاعر غنى له مصطفى .
عانى من المرض كثيراً فقد لازمه الفشل الكلوى مدة طويلة " 15 عاماً" أجرى خلالها
عملية زراعة كلى بروسي أواخر الثمانينات إلاّ أنه تعرض لإنتكاسة جديدة بداية عام 1993
بالقاهرة وإنتقل منها للعلاج بالدوحة حيث ظل هناك يباشر عملية الغسيل الكلوى ثلاث مرات
فى الإسبوع إلى أن توفاه الله مساء الأربعاء 17 يناير 1996م
منقول
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: tarig almakki)
|
ازهرى محمد على
(سلامات يا زول يا رائع).
ٌٌإلى مصطفى سيداحمد:
مدخل أول:
لمتين مِتْيمِّم شَطْر النيل
مُتوقِّى اليابسه ووْاَرد
متوكِّى الغُنيه عصا موسى
بِتْهِش فى غيم الإلفة الشارد
مهدودة القُدرة وفترانة
حَرداَن الضُل البارد
بِتْوجِّل لى يوسف فى البِير
يطْلَع من بَطن البير المارد!
مَدْخل ثانى:
فات الكان بدّينا إحساس بالإلفه
وكان راوينا،
فات الباكي جَرِحنا وناسي جُرحو
ولافّي ورانا مدينه..مدينه
فات الصاحي ونحن نَغِطْ
فى النومه السابعه
طالِق حِسِّو ولا حسيِّنا
حَتْحَتْ فينا غُناه الطاعِم
وفَاتْ قنعانْ من خيراً فينا
سلاماتْ يا زول يا رائع
سلاماتْ عواّفي!
سلاماتْ يا خُلاصة الخير الفى الناس
وترياق الزمن المُتْعافي
سلاماتْ يا زول يا رائع
سلاماتْ عَوَّافى
مُحاصَرْ فِيكْ
بسأل عن سكّه تطلِّع مِنَّك
أوسِكّه تودِّي عليكْ
بسأل عن مَخرج منّك وليكْ
زي نَهْر بينْبعُ
وما لاقي مَصَبْ
بِتْمدّد عِشقَكْ من أقصى ضواحي الروح
لي أقصى نواحي القلبْ
يتْكثّف بِسِعةْ إطلاق الرّب
وانا كنتَ بفلِّى القَلْب بسيرتَكْ
سمِّيتك حلاّب الغيم
من ضَرْع الجَدبْ
وظنيتَك مارستَ الفِعل السرِّي
وحَفّظت فحولة النيل
أيام الخِصب
ولمحتَك وانتَ بِتتْمشّى
وترقّص فى حَمَامَكْ
على حُمّة إيقاع الحرب
وتْكَلْكِلْ جِلد الكلمه الحافَّه
لَحبيبه بتفتَح مَجَرى الغُنا فى الدَّم
وتَفلِّس بيان القلب
فيا بنوت الشارع الطاعِم
قُومَن كَبْ!
قومَن للما قَصَّر
فى غناكن ضُمَّه
ولا إتْلوّم بِوراَكَن تبْ!
ولو تَبْقَى السِكّه الجايه ضهَب
وسلاماتْ يا زول يا رائع.
البارح عصفورتكْ
ركَّتْ في البال
رقَصَتْ
وادَتْ عصفور الريد شبَّال
وطارتْ من قولة كَرْ
ما الزول النَهرَ العصفوره
بِحرِّض فى كِلاب الحّر
لابسنى وداخِل فى اللَحم الحي
راصد كلّ البِسْأل عَنْ حالى
حرَّش ضُلّىعليَّ
ونتّف زَغب الخاطره التَّخْطُر على بالي
ومَنَع العصفُوره تَحومْ
إستْجوّب كل الناس البِجُو فى النوم
!ما تْقومْ
يا زول يا رائع ومهمومْ
يا مضيّع ضَيْ عيني وراكْ
واقف
حاحاى للنوم.
يا مْستّف رئةَ الدنيا شهيق
ومُشحتِف روح الخرطوم
كيف حال يا ابوي
كيف حال يا خال
وتعالْ!
إتْفَضَّل على باحة بيتنا الطّيب
ماعون الأطفال
ضمدَّ جراحاتك تعالْ!
من ضلامَاتكْ تعالْ!
من حافة البرزخ تعالْ!
من شرفةْ الملكوت –تعالْ!
أدّينا هينين من صبرُ
السكّه أبعد من مَشيِكْ
والجرح أعمق من حدود الإحتمالْ
السابله والاطفال هِناك
قداَّمك المشوار طويل
والريح وراك
كل البيوتْ
إتشرَّفت لى طَلْعَتَكْ
والوَنَسه ما كِمْلَت معاك
القَرقراب والقهْقَهه
مَينْ سمّى تِرحاَلك غياب!؟
والغيبه بتْزيدك بَهَا
لو يرِتق الحُزن المَصَابْ
كان بَعدك الموت إنتهى
يا أقصى حالات الحضور المُشتهى
يا مُنْتَهَى!
تعال قرِّحنا بس دهشة غُناك الحَي
وحَّيْ من جُرحك الدامي!
وفَتَر حيلَكْ
وحىّ من ضُلّك الرامي!
وحِمِل شيلَكْ
تموت مِتْل الشدر واقف
تموت واقف على حيلَكْ
فيا حْليلَكْ
يا حْليلَك..بِنستنَّاكْ
على صهوة جياد الريحْ
بنِستنَّاكَ!
فى الزمن اللديح القِيحْ
على باب الحلم فى غُناكْ
بِنِستنَّاك!
رحيلك شَلْهَت الدنيا:
ورتّب العالم البهِنَاك
بَستْنّاك!
وانا تانى وراك َشِنْ لاحِقْ؟
دَهَسَتْني فى بُعْدَك
حِدوَ الخوف
الداخله عليّض بالسَاحِقْ
أدِّينى القُدْره التمْنَحني
بِحجمْمَكْ سعةَ الشوف
لو أقدر أطِلْ من شاهق
لو أقْدر ألوّح لعيونك
تَلْمَحنِى
وأنا ضَعفي أمامك فاضحنى
سامحنى!
ما قدرت أطولَكْ
سامحنى!
شُفتَكْ من وجع طَالع
على برزخ ملتقى النيلين
كنتَ هناكَ وحّيدك
وكل الناس اتنين ..اتنين
براك واقف
فى حدْ السيف
براك الما وقف بينْ...بينْ
تغازل حلمك الفارع
فَتح بابين على الملكوتْ
تَسَلِّم على حضرة جلال الموتْ
وتفتح فى الأرِض نفّاج
إذا امتلأ الفراغ بالصوت
فيا باطن الأديم أفتح
براحات الحنين مُشْرَعْ
وأَنْدَهْ لى مُدن شاخت
أنْدَه لأطلال القرى الراحت
بيوتْ فى بيوتْ
تَمْرُق من شِبر مَسَرح
مدن فاضله
وعلم باتساع الحُلْم
بقامةَ يشتهى التابوت
فما لَفَظَ البحر يُونِس
ولا انسدّت
شهِية الحوتْ... ويا زول يا رائع تمشى
بالحسره وتموت؟
وسلاماتْ يازول يا رائع.
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: بدر الدين الأمير)
|
غنوات جواكا
من صوت أبكاكا
في غروب الالفة
وصباح المطر الرشة
لحاف مجدوع في حوشة الدهشة
كب غشاكا
ليمون بزنز
اكشاك الجامعة
داخلية التاكا
في كل حتة نلقى غناكا
كفتريات القلب
وممرات الدرب
كانو معاكا
في كل حتة
كانو معاكا
ضد احزان
بابا متاكا ..
اتمديت علي مسند ضحكة
فردت بكاكا
علي مفرش وردة
نمت شبعت
ماصحاكا
نشاذ
.........
تضحك لمن تبكي
وتبكي لمن تضحك
وفيما مابعد الضحكة
وعلي كم قميصك
تمسح عينك وتنادي فلان
كيف أصبحت
كل أتراحك تعني الفرحة
وكل أحزانك هي المنشرحة
....
لمن تقعد وحدك في منفاك ...
بتبكي عديل من جواك
وتسكت روحك بباقي جروحك
وتلبس فرحك ياقة أنيقة
من صوت المنفي
وتزرر حزنك أغاني فريدة
تردد فيها
تقول وتعيده ....
ولمن تهدا خلاص
تستغفر حزنك
بفرحة حلال
لحظة فال
بي غنوة مشاعا
بصوت ود سيد احمد
تلاقي رفاعة سقالة مشرع
تخت يديك في شرفة قيفا
وتنادي احبة وجمال الصحبة
تقعد وحدك في منفاك ...
تبكي عديل من جواك
وتسكت روحك بباقي جروحك
وتلبس فرحك ياقة أنيقة
من صوت هزاك
تذرر حزنك
بأغاني فريدة
تردد فيها
تقول وتعيده ....
يا ود سيد احمد
سلام يغشاك
سلام يغشاك
شكرا لك اخت اسيا
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: اسيا ربيع)
|
| Quote: الراحل مصطفى سيداحمد .. كيفك انت.. يا شبه ناس قلال او شبه ناس مافى |
من كان يسمع مصطفى
صن ... ووهج صوتو انطفى
ومن كان يسمع ما أصطفى
حي بي قضيتو وبس ... كفى
مرثية حميد
يا جايي مارق
من دخول الغيث
شرايين التراب السايفة ..
أوردة الوطن .
قشره اليباب ..
نشره العطش..
كلما سرت
قطرات دِرِبَّ الرحمة
في جوفو ارتعش ..
بال الشجر
حال العصافير
الخياله مع الدغش
مشدوه متل
خاطر طفل
من ضل ضهر راكوبة
فوق حافة حجر
واقع سجر ..
واقف يعد نقط المطر ...
ويتمطق إحساس السحاب
بين لهفة الطين
والشمش
لمَّت ورا طرف الحقاب
آخر رمش
باقيله في عِب الشفق
والليل ملقِّيله الطرف .
شفق المغيب ..
قفا غيم بِهِت
كان نفضة الريشة الأخيرة
حَمَاره .. فوق لُوحةْ الوكت ..
يَا كرْكُدَايْةَ الله
إترشق ناقع عصيره
من إيد ملاك
فوق المغارب بي تحت .
مراكيب حين صلاة
والترعة قِدّامن .. طشِت
ولاّ المراكب من بعيد ..
ودعات على النيل
والنخيل المتكي
دار يقرا البَخِت
قنّب يحِت ..
قلّــع زريزير غفوتو
عضَّ إنطلاقة غنوتو
وقام منحفِت ..
والكمبو ..
ينشاف .. من مسافة ..
قطر بضاعة
العربجية الطيبين ..
سبّابة والمتسببين ..
شعراء ومغنين الأنادي ..
أنصاص لصوص ..
حلب البلد ..
عرب الجبال ..
منسللين من لاتحت .
والريح يشيل
للنيل
مع هرج المغنين
الدعايات
نشرة أخبار الولايات
الوفيات
الملايات
العبايات
المرايات
التصاوير
التعابير
الحكايات
النِكــــِتْ .
عشم البنيات في الضراع
الضاع
وكت حرَّ الكفِت
زاغ الصراع
ذات جمعة
قدَّت من وطن
توب السبت .
نقد الحمام خُرج الوكِت
طارتلو نقطة لحظة
من موية الملح
في حلقو
مرّرت الهديل ..
كَمَد الجرح ..
جبد السكات ...
لكنو فات ...
وأبى يتلفت ؟
بال الطفل ..
يرقل على ضهر الحَمَار
يجمع مصابيح السما التامنة..
ويطش
ينكربش الحلم البعد
قرب يوافينا
ابتعد
لو مدّت ايد
كان إنجبد ..
يا الدنيا
بي ريحة الدعاش
لو تنعرش ...؟
أو تنفرش
تحت الفراشات
بالبَرَد ؟
فوقُو الوعد
صادق يمش .
لو يلقى راس رسن الزمان
ديك لحظة
ما كانت تمش
شان يندهش
أو ينبرش
بين نجمة الملكوت
ونسمة رضية
من رب العرش .
يا غادي منك
فوت كلام الشوق
من القلب
الخشم بابو البلد
لو خشَّ هدهد
في رماد ما فيهو
يمرق قانقرد ..
والقانقرد بابُو الحمام
راجيهو لمليم الطيور ..
ضمَّة جناح ..
صمّة عدد ..
إيدين بنيات الفريق
قادرات على
صد الحِدَيْ
جاسرات على
صقر النكد .
إيدين بنيات الفريق
بتهدهد الطفل الرضيع
بتعدي شيخ
دومة الحفير
تشلخ لبق ..
تسقي الخدير
بتعوس
وتفرك للملاح
بتورِّق اللوبي
وتحش
تمسك مراح ..
تحلب ، تخُش
تغسل هموم أيامه
في طشت الحلم
تنفض تشر الشوق
هِدِم
تنشل من البير
أم تلاتين باع
تعتِّل ..
تفزع الطيّانة
لو ما تجدع التبّانة
بتجيّه بيوت ..
تغزل خيوت ..
بتطرز المنديل
تخيِّت لي طواقي العيد ..
صبر ..
بتَتَبِبْ السجاج
مع الفجاج
تقوم
إيدين بنيات الفريق
بتحش تمر ..
تخرت سبيط
بتعتِّق الدكّاي ..
وتخبز للصفاح
بتكفّي عيزومة
وضيوف ..
بتغني قيدومة
وتطوف
بتهني ..
بتودي وتجيب
بتحني ..
بتدلك حبيب
بتولِّد الأمات ..
تربِّي على الصلاح ..
زي ماب تضمِّد للجراح
إيدين بنيات الفريق
إن داهم الحلاّل
خطر
قادرات على شيل السلاح .
يا مناحته
وبلاّله
يا ..
رجع اللي راح
يا ود عيون ..
فِرْحَن .. بكن
تِرْحَن يغطْسِن
في الدموع ..
الدنيا عامرابك تظل
وإن كان رحيلك
فرتكه
أو يا لسان نار الصراع
لهليبه بعدك لو هكَع
مين شالُّو شيلة بلا اتكَّأ ؟
مع إنو صبرك .. ما نفد
برشمت .. أو كبسلت
كيف سعة الوجود في ضيق لحد ؟
باغتنا ريح الفجعة ليل
فرنب في جوفنا مرابنات الصبر
شات سعن الجلد
صادنا الذهول ..
زي التكنو قبل دا
ما فارقنا زول بعد الرسول
واللاّ التقول أول قلوب في الدنيا
يغشاها القدر بعدن تضيع منّو الدروب
تنطمبج الساحات حريق
يدغي الطريق المحتمل
كل الفريق سوقر وراك
يا جرحنا الكيف يندمل
ما بار وراك شهد الغنا
ونحل الحناجر ما همل
صادر خلايا أبو الدبر
صاقر حناياه نمل .. نمل
... .. .... ....
وين ماشي ..
يا نبض الرحيق
سايب المشاعر ريق دقيق
نهب المغنين التِفِل
غنواتن الورطانة
أو لوطانة في الريد المقق
حُترب صفق .. في طين ذبل
أوصاف على جسد الحبيبة
بهق .. بهق
تحت احتماله مرضرضة
زي لعبة ما استهوت طفل
وين داجي يا قمر الهنا
الكرّمنا عند مغرب مرق
سايب لياليك لي نجوم
واقفات وجوم على فد رجِل
وفرع الغُناء الميَّل هنا
على مين وراكَ . . حيتِّكل
والشيل تِقِلْ ؟
قَدْر اليشيلو الشيلة في
لكِن ظروفن هل تفي ؟
تحتاج جماعة من الرجال
الليها كنت براك تقل
دارت قبيلة من الحبال
الكان بقيله فرد حبل ...
الخوف قلوبنا التشتهيك ..
تنشك في ذاته وتنقفل
من بعد ما اتوحدنا فيك
ننفك قبائل وتنكتل
وينشعنفِن مسّار بعد فتل الحبل .
حب يا خيالي الوين وصل
دُر يا لساني وماك فَسِل
أطهر وزيزيناً يعوم
في النيل ، مع الصير منشغل
ولاّ اليقوم يوم بعدِ يوم
يغسل دمومو عديل غسل ..
ولاّ الوطن قال ماب ينوم
إلاّ الفجر يا ليل يهِل
ماسك وضوهو من الغيوم
السالو سيل ساعة محِل ؟؟
كيف الدبارة ؟
و ما العمل ؟
لمّا القبيلة تشيل سيوفه السوق
تبيعه على عجل ..
تغشى الكناتين العويش
عُقُب المغارات الحشيش
تاخد بخور ، ودخان
ولفّافات سطل ؟
ورق المواثيق إنبهل
كاويق جريح
طلوحبو ريح
كيمان مقنبرة للمديح
والطار مجلّد من حشا الفي القبّة
عصب الفي الضريح ؟
حلقات قمار تحت النخل
والخيل مجهزة للرهان
آخر النهار فوق السهل
لما الجدل يبقى الدجل
والأيدولوجيا هي الملاججه
واللواجه بلا عمل
اللخبطة
الخمج
البوليس كتال كتل
ليش البلاد ما تستباح
يوماتي كل ما الليل دخل
اشمعنا يا شوفنا الرحل
ما انصدقت زرقاء غناك
ما كان حصل الحصل
والبت نصيرة سنة محل
بَنَت الدهب
بنيانه ما فات الرُكب
حزنت على التِقِي
والتِبِن وين تِبني لِبني
أبى يتلقي ..
والكيل كرب
ساعة الرجال سكنوا التُرَبْ ..
والدنيا موية وسط حريق
تصبح كُرَب تتمسى ضيق
قامت نصيرة تحِت تعب
بِرَت الفريق ..
يا اخواتي ستات البيوت
ناولني قوت
قبّال أموت
دور والعيال
ما فكُّوا ريق
طبق الدهب
بي مِدْ دقيق
دهب الجبال
صافي البريق
بي مد دقيق
أُن كان مريق
يا أخواتي ستّات البيوت
أدِّني قوت ..
عربون أموت ؟"
مطفية نيران التكول
رغم الدخان
والحلة زي المافي زول
رغم البطان ؟؟
يا اخواتي
ستات البيوت
صافي البريق ...
.. بي مد دقيق ..
أدني قوت ...
عربون أموت ...
عين الشمش زي التقول متشوشة
أو مرشوشة بي حمرة غضب..
زبد الحَمار زي رغبة المالح
بعد خجة غريق ..
والليل دخل كبت الفريق
قنعت نصيرة من البلد
قنعت نصيرة من الدقيق
كشحت على كوشة الدهب
وجات صادِّي بي نفس الطريق
لا رحمة غير الموت قبل
لمّت عياله على عجل
اتشهدت واستغفروا
وقفلت على روحه الجبل .
كانت نصيرة
بتفتكر
جوف الجبال
أولابه من عيشـة الوبال
أولابه من حرس الرجال
ساعة يصيب البال خلل
والحال مو يا ..
كم من نصيرة بلا نصيرة
اتريحت .. وفضَّل براك
رغم الفشل والإستياء
من مسخرة هادي الحياة
بي إيد تدهده للأجل ..
وبي إيد تهدهد .. في الجراح
بي إيدين تفتِّح للدروب
في كبرياء .. ..
والسايقي لابد من تصل .
ضُلْ الصباح .. الليل ..
مُو .. يا ..
تبرد غبينتك ولوعتك ..
طول الأزل
ويا روعتك لامن تجادل دمعتك
دائماً تكون فوق العيون
مرحيبة بالداخل عليك من دنيتك
عبّيت مصابيح الصباح
ببياض ضميرك ونيتك
بعرق جبينك وبنيتك
وبالشمشِ ماروق الرجال
وجّت جنائن غنيتك
ما كان رحيلك غير دليل
للجايي ماسك سكتك
يا شدو عصفورنا البسيط
كل الخلوق إتوكتك
إن ماب تبيت فوق السبيط
طوِّل مسافة ركتك
ما صمتك مطراً غتيت
لا ريح لديح .. يوم سكتك
عذراً إذا حال الوطن
بالجاتو ذات ليل بكتك
سايقين بأيادينا الزمان
شادِّين خيوطو الفكتك
يا بئر تكلة الناس عليه
وما قطَّ ..
يي شنو دلو إنهتك ؟
يا صاحنا في الزمن الغلط
يا سابلو دمك كالغيوم
لا صرَّ وشك لا عبس
إيش يعني لو سالن نقط
من كل عابر نقطة بس
يصبح شرايين الظلط
تبقى الشوارع أوردة
وجسد البلد عافية عريس
لاف العتامير قرمصيص
لأجمل عروس النيل رحط .
والكون صحابك وإنبسط
فاتحة صحابك ولاّ موج
دا برش فراشك ولاّ شط ؟
سيل الدموع الما انحبَس
في الواطة بيقوِّم تَبَسْ ..؟
شهى المدائن تنتفض
ما تمتعض ..
موكب زفافك للأرض
شهداء الوجود تتلقى ليك
محتفية بيك ... شوقة الربط
مركب شرط .. هوجة البحار
شايل خبار الهاربين
كان البشارة لكل شط .
عِلت إبتسامتك حين هبط
ما من جواز غير راحة إيديك
لا من ربط عملة وشنط
نية رسول ..
إنسان فقط .
ما بينا بيناتك ربط
بي أسمى مبدأ .. وأقوى خط
ما جانا عشقك من فراغ
لا نحنَ غنيناك عبط
جرح الوطن خطالنا خط
ختالنا قول ما منو نط
والليلة يا موت يا حياة
خاتي البيختار الوسط . ..
ويا بلد فوق اللِمِيلِس
لا تَهِمْ
17 يناير .... الرحيل المر دوما" حين يمتزج المدي بالمآس...اوف واحتضار الاغنيات
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: محمد عبداللطيف)
|
يا ود ست الجيل
ثم ان يا مصطفى
البينا كبير
البينا عمر
البينا كتير
يا مصطفى ، يا مصطفى
الجمعة 27 ديسمبر2008
صحوت هذا اليوم ممتلئة بك ، كما تمتلئ المطامير والشونات ذرة وقمحا وتمنى ، منذ عدة ايام سابقة حلمت بك ، جئتنى فى منامى وكنت قد انقطعت عنى طويلا ، وها انت تاتينى ، تبدا فى الغناء ،كنت اراك اذ تقول
فى عيونك ضجة الشوق والهواجس
ريحة الموج البنحلم فوقو بى جية النوارس
وما اكثر هواجسى ، أولها هاجس انى لن التقيك ثانية،
لكنى التقيك كلما استمعت الى صوتك ، كلما فتحت صنبور الحياة ، اجدك مجدولا اغنية لا تمل الشدو ، تشلخ صمغ الصمت وتلصق كل الافراح الى بعضها اجدك يا صديقى فى الغناء الذى لا ينتهى باتجاه الانسان ، تمشى فى حنايا نورا ، وتضئ لها العتمة تمتد لها عكازا تمسك بك ، مسدا نشده باتجاه احدنا الاخر
لا اعرف لماذا اذكرك بكل هذه الحميمية الان ، هل لانك قلت لى مرة ذات حفل فى مسرح البالون فى القاهرة وكنت اقف معك فى الكواليس تلك الليلة وكنا نناقش اشكالات الصوت فى الفاصل الاول ، وعقب ذلك الحوار سالتنى عن احوالى وكنت باتجاه خشبة المسرح لحظتها ابتسمت فى وجهى ، وقلت لى هامسا
ـ كان نفسى اقولك من زمان
وما عرفت حتى هذه اللحظة ماذا كنت تريد ان تقول لى ، لانك سافرت الى الدوحة بعد ذلك ، وبين سفرك ومكوثك فى القاهرة كنا نلتقى فى بيتك الكان دائما ممتلئا لاتفرغ بطنه من الزوار قط
لكن اسوأ الزوار انئذ ذاك الذى خفنا عليه منك ،وهو كان قد جاء اليك حاملا رسالة من الحكومة مفادها انهم على استعداد بالتكفل بعلاجك فى السودان ، وحاول ان يجعل تلك الرسالة واقعا ، لكنك لم تجد بدا من طرده وهذا ما اخافنا عليك ، فلاول مرة منذ ان عرفتك اراك ذاك المتجهم المكروب ، الحاد المزاج ، ولكنها حدة لها ما يبررها
يا مصطفى لماذا مضيت دون وداع حتى ؟
لماذا ؟
كلما (مدينا ايدنا نلقى زهرة ريدنا بعدت ) او هكذا قال المسرحى الراحل يوسف الخليل محمد يرحمكما الله معا ، فلقد ذهب هو ايضا مفسحا للحزن فى دواخلنا اعواما طويلة ، فلقد كنت على موعد معه
ولم يخذلنى ، جاءنى ذات عام عقب الانتفاضة عقب عودته من الخليج ،وكنا بصدد التخرج فى المعهد العالى للموسيقى والمسرح ، فهو الذى كتب مسرحية الخضر ، التى ظلت ملء الساحة المسرحية
يا لتلك الزهرة التى كلما مدينا ايدينا باتجاهها تباعدت كانت الزميلة والصديقة غالية حسن رزق الله بصدد التخرج ، وكنت ايضا فى نفس الصدد لكن من قسم النقد والدراسات المسرحية وهى من التمثيل والاخراج ، وعقدت عزمها على التخرج بمسرحية ـ الخضر ـ اخراجا،ومن ناحيتى كان النقد التطبيقى هو مشروعى على تلك المسرحية ، التى كانت احد منابع بحثى ، فغدت وشيجة اتواصل بها مع رحم مسرحى كان له العديد من المساهمات التى تم ايقافها ايام الديكتاتورية الثانية ـ 1969 ـ 1985ـ مسرحية الخضر ، اولا ، وجوابات فرح ثانيا
كانت مسرحية الخضر بتصورى (تفرش ) للحلم سريرا ، وتغطيه بروح الكلمة وتوسده كل ازهار المستقبل التى ما توانى العسكر طوال حقب ولثالث مرة ان يدوسوا عليها بل ويمضون الى محاولة الاجتثاث من الجذور ؟؟ تلك الازهار التى ظلت (تفضح الكتب الجبانة ) ورحلتما معا يا صديقى ّ، وكنتما معا توعزان لنا دائما ان الغد احلى ، وان علينا ان ننتظر قليلا ، وان الغد لنا ؟؟؟
نحن ابناء الوجع والهم والسعاة المكابدين لاجل انسان الوطن بكلياته ، وهانحن الان (اقول لكما يا صديقىّ ) اننا بتنا على شفا من التشظى
نسعى جاهدين الى رتقها وردم ما اتسع منها بكل ارثكما وكلمات ابدعتموها غناءا وشعرا ومسرحا
على صعيد شخصى يا مصطفى كانت قد اعجبتنى اغنياتك خلال مسرحية اخرجها صديقنا المشترك قاسم ابوزيد ، واخرى كانت من اخراج الصديق اسامة سالم كنت استمع للاغنيات واحيلها الى (نص) مسرحى قائم بذاته ،ربما كتبت عن هاتيك المسرحيات لكنها كتابة غابت بسبب ما تعرف من قلة الحيلة فى الارشفة حينها ، وربما ايضا بسبب الانقطاع الذى اصاب الصحف عقب عام 1989وانطماس ارشيفها
يا لتلك الاعوام التالية للانتفاضة ، فلقد كانت عامرة بحب الوطن ، كنا جميعا نحاول ان نقف على ارض ديمقراطية حاولنا الى صنعها بايدينا واقلامنا بغناء مجترح للقادم وقصائد نسعى من خلالها الى ردم كل مطبات شوارع الحياة بما يدفع الوطن باتجاه افق ارحب ، كنا نحلم ونرفد الحلم بالعمل املا ، وزخما فنيا لم تشهده البلاد طولا وعرضا طوال عقود ، لكنها كانت حلما انسرب من بين ايدينا كما انسراب الماء بين الاصابع
يا مصطفى
اشجيتنى وحركتنا بسكونك ايها الملك كما كتب ذات مرة الصديق عبد الله محمد عبد الله يوم ان رحلت
هل قلت لك انك رحلت ؟
كيف ترحل ؟وانت قائم بيننا
فى الاذاعة ، كنت دائما معى منذ ان بدات العمل فيها حتى فارقتها (مرفودة ) كما اسميتنى ، كانت اغنياتك هى ما داومت علي بثها فى برنامجى (صباح الخير ، مساء الخير يا وطنى ) كانت حافز من نوع آخر ، لان فحواها كان النبض الذى يدخل كل قلب
ولكم تساءلت لماذا نظل نحتفى بك كل عام وعلى مستوى عال من الحضور ؟حضور منعقد فى كل
انحا ءالقارات فى هذا العالم ، حضور لم ينعقد لشخص غيرك ، حضور طاغ ، لعلها كاريزماك التى ما تزال تنادى من يخلفها ، لكنها عصية على من يخلفك
ليتك كنت معنا (اتمنيت لو كنت معايا ) ندخل الان الى قلب الوطن محمولين على اكتاف مكان احببناه ونبقى فيه الى الابد ، نرفد نيله ونفيض معه متى ما فاض
لكننا ياصديقى ، صرنا ضفتان متباعدتان ، انت برحيلك الابدى وكنت برحيلى الطوعى عن ضفاف احببتها
ويا مصطفى
يانا لا بنتحاشى صدك
لا بتموت فينا الاغانى
لك كل الرحمة ايها الولد البشارة
يا غنانا المشتهنو
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: سلمى الشيخ سلامة)
|
واحد جميل
سيد أحمد الحردلو
تاني قام واحد جميل في بلدنا ... ماتْ
وكان بغني للمساكين .. والمسولتين .. والحفاتْ
وكان بغنى للمنافى .. والعصافير .. والرعاتْ
وكان بغنى لى بلد في الحلم ... جاي .. أغنياتْ
وكان بطنبر .. وكان بدوبي .. للحياةْ
تاني قام واحد ملك ... روّح .. وفاتْ
وكان ملك في الريد ... وإنسان في الصفاتْ
وكان مهاجر في دموع كل البكاتْ
وكان وتر مشدود ... ومسكون دندناتْ
وكان "عليه سلام " تقول ما زول حياةْ
يا مصطفى .....
فاكر الجماعة الكانوا ساكنّك دوام
من منفى لى منفى
ومن عود ... لى سفرْ
فاكر العصافير المسافرات دون جواز
فاكر اللى داجّين في المطرْ
عبدالرحيم ... وهلم جرْ
فاكر القطر
فاكر النخيل .. فاكر الحراز
الليلة كانوا جميع هناك
قسماً يمين .. كان الجميع باكين عليك
كان المطار فارش عليك
كان الجميع مشتاق إليك
يا سلام عليك
لمّان تكون زولاً عزيزْ
عنْ ناس عزازْ
****
يعني كان لازم تفوتْ
والحزن مشرور في البيوتْ
والدنيا مازال فيها حوتْ
وفيها لسع .. عنكبوتْ !!
وتخلّي أوتارك سكوتْ
ولسه عندنا ريد جديدْ
ولسه عندنا ليك قصيدْ
يعني كان لازم تفوتْ
وتخلي هذا الحب يموتْ !
مرثية بشرى الفاضل
رطبت بالنّداوة
وغلالة الروح
سنوات الجفاف الأولى
فرقص الشعر على ناصيات الـقـوافي
في هذا العهد الكالح
عهد الصرير ...
ولف الذقون على الضحك
****
برج الغناء العالي أنت
وأنت النسيم يتردد..
يا حلو يا مستطاب
رحلت وكنت على باب الدخول
فنهض بديارنا ذلك المأتم الجمعي
ذلك الحزن .. ذلك الإنشداه
ذلك الذهول
وكانـت أشد القبائل جسارة في لقياك
وأنت عائدُ إلى الوطن ...
قبيلة الصبايا ..
ينضحن نضارةً وعافية
في زمان نقص الغذاء ...
صبايا من الحسن الصافي
كأنما جبلن من طينة أخرى
وقفنْ سداً بديعاً .. حازماً
في وجه سرقة عبيرك
بغية سكبه في الساحة الكالحة ... الغبراء
في طريق مدني ... إنبثقت عن ذاكرة الأغاني
غابةُ من المحبين
في إستفتاء مع الأغنية المشبعة
وضد سلخ جلد الأغاني
وحشوه بالغثاء
النهر أنت
ورؤا ك ... تسير الأنهار
نغمُ منك أو همهمة
فيقفز عاطف مثل درويش
من المجهول إلى الصدارة
قم .. قال صنوك الشاعر..
يا طرير الشباب
غني لنا ... غني
من عبقري الرباب
أنشودة الجن
قم يا جميل بثينة
وأشهد هذا الوله
بما أمتعت به الناس
وضوأت ليالي القرى ... والأمدان
يدلقون عليها العسس والعسف ... والأسف
فتغسلها بآهة مرسلة إليك ... حُبلى بالفرح
منذ مطلع القرن عبر كرومة ... ووردى
وصادح تلو صادح
فتـنمّي فيها التشبيب بحب الوطن
وشهقة الشعر ... وإنــدلاق الصليل
مصطفى
يا مصطفى
النهر ..... أنت
فولاذ الرقة
برج الغناء العالي ..
والنـسيم
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: Seif Elyazal Burae)
|
مرثية الشاعر صلاح حاج سعيد
ما كنت قايل نفسي يوم
أرثيك يا أصدق خليل
أنا كنت بتخيّل أكون قبلك
أسافر غنوة في الوتر الجميل
زي ما عبرت معاك صروف زمن المسافة
وجينا للحزن النبيل
أنا كنت داير الدنيا تمهلنا
ونغني الفرحة لى الزمن الخُرافي .. المستحيل
ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول زمان الشنشنة
كل المطارات والمواني
وشفع البلد الفتارى
لسة بارين القطاري
يسألوا الناس عن خبر زولاً
مسطّر إسمو في قلوب العذارى
وفى عيون كل المساكين ... الحيارى
زول بيطلع من نفس طورية ضامة الطين
تكابد طول نهارا
زول بيسكن في عيون أطفال
تأمّل ديمة يديها البشارة
يا خي والله الفرقة حارة
وفقدك أكبر من محيط الدنيا
وأكوانها ... ومدارا
طليتنا زي حلماً جميل
فجأة في غفلة أنسرق
أسطورة تحكي أماني جيل
في حب غناك كان ليهو حق
أديتو في الدنيا الأمل
وريتو كيف في الحق يقيف
من غير وجل أو إنبهار
علمتو بى حس النغم إنو الكلام
لازم يكون واضح كما شمس النهار
صدقك ملاهو حماس .. يقين
بالخير وبالحق .. والنضار والإفتخار
إنو الحبيبة هي الأرض
والتضحيات عشان عيونا هو الفرض
والدنيا ورّاثا الصغار
وعرفنا يا زول قسوة الضنا والتعب
والإرتحال في غفلة الزمن الصعب
وقولة الوداع بالضبط
والسفر الأبيد من غير رجوع
أو غير متاع
وبكت عليك كل الشوارع في المدينة
ناحت عليك كل الفواصل
في الغنيوات الرصينة
وإنكتم نبض الغُنا
جلل سواد حزنك سنا
وإتوشح المنا بالضياع
وكان بدري يا زول الوداع
لا سكة لى درب الرجوع
بعدك أغانيك إلتياع
مسكونة بالأسى .. والخشوع
لكن بريقك ما خبا
أبداً بريقك ما هو ضاع
ساطع كما نور الشعاع
منو قال هو فات
زولاً وهب كل الحياة للأغنيات
منو قال هو فات
ما أظنو زيّك يقولوا فات
يا من وهب كل الحياة للأغنيات
يا من ترك في قلوبنا أنبل ذكريات
يا من ترك أحلامو في كل الجهات
وخلّد معاني الروعة بى كل الصفات
ما أظنو زيّك يقولوا فات
يا من وهب كل الحياة للأغنيات
****
ورحلت ما كان الأوان
رحت وحرقت حشا الغنا
خليتنا لى زمن الهوان
والإرتهان لى خيول حروف الشنشنة
أمل الأغاني
كلمات: مدني النخلي
شرد الكلام مني وسكت
حس الأغاني الملهمة
لبس النغم ثوب الحداد نزف المقاطع مؤلمة
لمتنا بيك يمين ظروف في ليل رياحو ملتنا هم
أنت الأخو وبرضو الصديق والبينا كان إحساس ودم
للكل فتحت القلب دار .. ومزجت روحك بالنغم
يا حليلو زمناً كان معاك يا حليل جدارنا الأنهزم
روح الرحابة الما بتضيق
يا باهي يا دفق الرحيق
شاقي الدروب الموحشة
فارش عشم وترك طريق
دايس علي الجرح الأليم
في أحلك اللحظات رفيق
يا حليلو أملاً كان معاك
خلانا لى جرحاً عميق
نجم الحروف المرهفة
ضد الذبول والإنطفا
لكنو من بعدك رحل خلانا فات يا مصطفي
يا حليلو شدواً كان معاك
وأمل الأغاني الإنطفأ
ضرب الإبرة
مدني النخلي
ضرب الإبره .. فوق الإبره
راسم زي وشم.. فوق ساعدو
كل ما يقول قريب
تعكس ظروفو .. تباعدو
راكز .. في الزمن
ماطر سماهو ورعدو
فوق حدب الصبُر
مترجي ..زولو الواعدو
غنيلنا .. قول يا زول
بُعد المسافة براح
من جرحك النزاف
رسِّل .. غناك صداح
نوِّر مداخل الليل
بصبحك الفضاح
شِد الوتر ..دندن
وأفرد نداكَ.. وشاح
طيور القمري..
ما غنت
ولا لوّن مداك شادي
حليل ولداً بشيل همّك
شرّ غناهو في الوادي
نده مطراً سحايبو ملت
وشتت برقو عبّادي
وليد الصابره ست الجيل
رقد واقف قصاد النيل
حبيباً جرحو فينا نزيف
وفكراً فاتح التأويل
مرق من بين ضفاير البنت
حبيبتو اللونا.. كاكاوي
نهارا شمالي .. كتـّاحه
مناخاً جنوبي.. غرباوي
دخل شرق الحِلم حفيان
سند ظهراً .. حناهو الهم
حليلو الكان جميل النم
حليلو .. البينّا خوة دم
مرثية عبد العال السيد
بسمع صدى صوتك مزامير في عشيات
الشتا والريح سوافي
وأطرق على بابك أواخر الليل وألاقيك
إنت مافي
وأنشد على بابك حزين "عز المزار"
وكل السنين صارت منافي
وأهتف وأناديك في سديم الليل
يضيع حسي وهتافي
قمراً وقف مستني تال الليل
نهارات العصافير والقوافي
رجع الصدى وحس الرياح
مجنونة في الساحات تعربد
وإنت مافي
غابت نهاراتك ولكن
لسة صوتك في العروق يا صاحبي ساكن
لسة صوتك يسري في كل الأماكن
"يا قمرة أقلبي السنسنه الحمرا
وشوفي ليه ما جاء"
لسع على أفق المدى ترجاك
"صبية" جراحا نازفة
لسة واقفة
تسأل عليك مجلس صحابك في الليالي
تسأل عناقيد الدوالي
تسأل عليك عصفور مرق ينفض
نعاس عينيهو من سهر الليالي
يا صاحبي لسع جراح الفرقة صاحية
وتر الغُنا المشدود ينوح
يسأل عليك في كل ناحية
كانت ليالي " الديم" فوانيس
والعمر مغسول صبابة
وكنا ما بشغلنا غير وتر
الغُنا وحرف الكتابة
يا صاحبي .. يا ليتها الأيام تعود
أنا في منافي العمر ضيعت الوعود
يا صاحبي .. هطلت على
قبرك سحابات الخزامى
وناحت " على بابك " يمامة
وشرقت شموس ترسم على باب
النهارات إبتسامة
رحيل اليوتوبيا
مرثية الشاعر محمد طه القدال
في هذي المدينة الفاضلة
لبس الشعراء تيجان غار وهجوا
مع النشيد .. والبوح وغنوا للغُربة المتلتة
في الزمن المكان الروح
وما بين الرماد والنار
فضا الكلمات ومعناهم
بيمرقوا من هطيل النوح ومغناهم
يشقشق للحياة والموت
يغرد للمدائن الفاضلة جواهم
جزاير دوح
قدر يوتوبي
ترحل في مداين الناس ... مدينة
يندلق حسك حداهم
قطرة قطرة تعبي صوتك بى نداهم
مشدود وتر صوتك ربابة
مسنود عليك صوت الغلابة
مفرود من الزمن المفتق والمرتق بالرتابة
مولود مع الجدة المعتقة والمجرتقة بالرحابة
ينسدل من شدوهِ أنشاد المزامير
ينسمع في شجوهِ ترتيل الصحابة
زمن يوتوبي ترحل في العتامير
والمغاسل والغُنى المندلي من شطر السحابة
من عنا الأطفال وأولاد المسادير
السنينهم فوق جوازات العصافير
الحنينهم بحة الليل الطنابير
الحزينهم حزنه في الجوف المطامير
نبلهُ يطلع زي شعاع
لا ولولة لا شيل ندابة
( يا مطر عز الحريق)
( كمّل الناقص وفرضو )
( يا مشاوير الطريق )
شوفي لي حُّميد وأرضو
يا بلد ليلك غريق
طولو زي طولك .. وعرضو
إن ضلامك حر طليق
أو سلامك أهلو قِرضو
آه من هذا السليق
يشتري الراجل وعرضو
الفرج باقيلي ضيق
والصحاح العندي مرضو
كم إديريجاً حليق
شان يعيش بى دقنو برضو
يا مدد قشة غريق
)يا مشاوير الطريق(
)يا وليدات الفريق(
لملموا الصابرين تعالوا
)رقصوا البنوت أعرضوا(
****
يا نخلة المقبول ظلالك
وأصلة الشموس بى حريرة
ومجدولة من طيب شمالك
مروية في عز الجزيرة
من همي همك سمالك
كسر همومي الجبيرة
لحن الوليد الرمالك
مشرق يجبر الكسيرة
طينك مقالد رمالك
تحتك مياهك خريرة
شعرك جريدك حلالك نمة غُناه الضريرة
غنوة بتقرب منالك
رعشة جروفي الخضيرة
غنوة حبيباً شكالك
هجر البنية الأميرة
عند الترابلة القبالك
ضليلة صهد الهجيرة
يا نخلة السلفاب جمالك
في الناس غناوي المسيرة
لو جيدك الفارع بكالك
موّال دموعي العسيرة
أو نيلك السالك أمالك
جيهة المشاوير الحسيرة
أو قلبك المفجوع دنالك
روح الأناشيد المنيرة
شيليلي عِب وأمليلي شالك
من غناويهُ السميرة
شدي من صوتك حبالك
نشفي العرق الدميرة
قولي للجنيات سؤالك
يا نخلة بس متكية مالك ؟
بطنة سبايطك عضيرة ؟
جدلة سبايبك ممالك
محصورة في فد ضفيرة ؟
ولا السلام البدالك
سراب الأماني الكبيرة ؟
لو صبري بيهدم جبالك
شن تبقى غير عيني الهميرة ؟
****
قدر يوتوبي ترحل يا صديق
زمن يوتوبي ترحل في البريق
والمدينة الفاضلة نامت في العتامة
والعتامة تهاتي بالشعر الهيافة
والشعر متغطي بالكلمة السلامة
والسلام متداري في الولد الشليق
والوليد مندسّي في الحرف القيافة
والحروف الوردة تحلم بالرحيق
والحلم يتجاوز المعنى الرهافة
والمعاني تعاند الزمن الرحيل
والزمن يوتوبي يرحل في السحيق
والرحيل يوتوبي
ترحل يا صديق ؟
الرحيل الشفتو للناس العلامة
الرحيل الشفتو للمتلك قيامة
سلامات يا زول يا رائع
مرثية الشاعر أزهري محمد علي
مدخل أول:
لمتين مِتْيمِّم شَطْر النيل
مُتوقِّي اليابسه ووْاَرد
متوكِّي الغُنيه عصا موسى
بِتْهِش في غيم الإلفة الشارد
مهدودة القُدرة وفترانة
حَرداَن الضُل البارد
بِتْوجِّل لى يوسف في البِير
يطْلَع من بَطن البير المارد!
مَدْخل ثاني:
فات الكان بدّينا إحساس بالإلفه
وكان راوينا
فات الباكي جَرِحنا وناسي جُرحو
ولافّي ورانا مدينه.. مدينه
فات الصاحي ونحن نَغِطْ
في النومه السابعة
طالِق حِسِّو ولا حسيِّنا
حَتْحَتْ فينا غُناه الطاعِم
وفَاتْ قنعانْ من خيراً فينا
سلاماتْ يا زول يا رائع
سلاماتْ وعواّفي!
سلاماتْ يا خُلاصة الخير الفي الناس
وترياق الزمن المُتْعافي
سلاماتْ يا زول يا رائع
سلاماتْ وعَوَّافي
مُحاصَرْ فِيكْ
بسأل عن سكّه تطلِّع مِنَّك
أو سِكّه تودِّي عليكْ
بسأل عن مَخرج منّك وليكْ
زي نَهْر بينْبعُ
وما لاقي مَصَبْ
بِتْمدّد عِشقَكْ من أقصى ضواحي الروح
لي أقصى نواحي القلبْ
يتْكثّف بِسِعةْ إطلاق الرّب
وأنا كنتَ بفلِّي القَلْب بسيرتَكْ
سمِّيتك حلاّب الغيم
من ضَرْع الجَدبْ
وظنيتَك مارستَ الفِعل السرِّي
وحَفّظت فحولة النيل
أيام الخِصب
ولمحتَك وأنتَ بِتتْمشّى
وترقّص في حَمَامَكْ
على حُمّة إيقاع الحرب
وتْكَلْكِلْ جِلد الكلمة الحافَّه
لَحبيبه بتفتَح مَجَرى الغُنا في الدَّم
وتَفلِّس بيان القلب
فيا بنوت الشارع الطاعِم
قُومَن كَبْ!
قومَن للما قَصَّر
في غُناكنْ ضُمَّه
ولا إتْلوّم بِوراَكَنْ تبْ!
ولو تَبْقَى السِكّه الماشة طشاش
ما بتبقى السكة الجايه ضهَب
وسلاماتْ يا زول يا رائع.
البارح عصفورتكْ
ركَّتْ في البال
رقَصَتْ
وأدَتْ عصفور الريد شبَّال
وطارتْ من قولة كَرْ
ما الزول النَهرَ العصفورة
بِحرِّض في كِلاب الحّر
لابسنى وداخِل في اللَحم الحي
راصد كلّ البِسْأل عَنْ حالي
حرَّش ضُلّي عليَّ
ونتّف زَغب الخاطرة التَّخْطُر على بالي
ومَنَع العصفورة تَحومْ
إستْجوّب كل الناس البِجُو في النوم
ما تْقومْ
يا زول يا رائع ومهمومْ
يا مضيّع ضَيْ عيني وراكْ
واقف
حاحاي للنوم.
يا مْستّف رئةَ الدنيا شهيق
ومُشحتِف روح الخرطوم
كيف حال يا أبوي
كيف حال يا خال
وتعالْ!
إتْفَضَّل على باحة بيتنا الطّيب
ماعون الأطفال
ضمدَّ جراحاتك تعالْ!
من ضلامَاتكْ تعالْ!
من حافة البرزخ تعالْ!
من شرفةْ الملكوت تعالْ!
أدّينا هينين من صبرُ
السكة أبعد من مَشيِكْ
والجرح أعمق من حدود الإحتمالْ
السابله والأطفال هِناك
قداَّمك المشوار طويل
والريح وراك
كل البيوتْ
إتشرَّفت لى طَلْعَتَكْ
والوَنَسه ما كِمْلَت معاك
القَرقراب والقهْقَهه
مَينْ سمّى ترحابك غياب! ؟
والغيبه بتْزيدك بَهَا
لو يرِتق الحُزن المَصَابْ
كان بَعدك الموت إنتهى
يا أقصى حالات الحضور المُشتهى
يا مُنْتَهَى!
تعال قرِّحنا بس دهشة غُناك الحَي
وحَّيْ من جُرحك الدامي!
وفَتَر حيلَكْ
وحيّ من ضُلّك الرامي!
وحِمِل شيلَكْ
تموت مِتْل الشدر واقف
تموت واقف على حيلَكْ
فيا حْليلَكْ
يا حْليلَك .. بِنستنَّاكْ
على صهوة جياد الريحْ
بنِستنَّاكَ!
في الزمن اللديح القِيحْ
على باب الحلم في غُناكْ
بِنِستنَّاك!
رحيلك شَلْهَت الدنيا:
ورتّب العالم البهِنَاك
بَستْنّاك!
وأنا تاني وراك َشِنْ لاحِقْ ؟
دَهَسَتْني في بُعْدَك
حِدوَ الخوف
الداخله عليّك بالسَاحِقْ
أدِّيني القُدْره التمْنَحني
بِحجمْمَكْ سعةَ الشوف
لو أقدر أطِلْ من شاهق
لو أقْدر ألوّح لعيونك
تَلْمَحنِي
وأنا ضَعفي أمامك فاضحني
سامحني!
ما قدرت أطولَكْ
سامحني!
شُفتَكْ من وجع طَالع
على برزخ ملتقى النيلين
كنتَ هناكَ وحّيدك
وكل الناس أتنين .. أتنين
براك واقف
في حدْ السيف
براك الما وقف بينْ... بينْ
تغازل حلمك الفارع
فَتح بابين على الملكوتْ
تَسَلِّم على حضرة جلال الموتْ
وتفتح في الأرِض نفّاج
إذا امتلأ الفراغ بالصوت
فيا باطن الأديم أفتح
براحات الحنين مُشْرَعْ
وأَنْدَهْ لي مُدن شاخت
أنْدَه لأطلال القُرى الراحت
بيوتْ في بيوتْ
تَمْرُق من شِبر مَسَرح
مدن فاضله
وعالم باتساع الحُلْم
بقامةَ يشتهي التابوت
فما لَفَظَ البحر يُونِس
ولا أنسدّت
شهِية الحوتْ ... ويا زول يا رائع تمشي
بالحسره وتموت ؟
وسلاماتْ يازول يا رائع.
أغنية مصطفى سيد احمد
شعر : د.عفاف الصادق حمد النيل
يا الكحلت عيون الدنيا بلون الغنوه
يا الضفرت ضفاير إحساس الكلمة الحلوة
يا الشتت نجوم الليل في وش النيل
عقداً فوق القمره بيقدح فينا الضو
يا الطقطقت أصابع السُحب الشالن جو
دفق عسل المطره ونقط .. كبت شو
نضمت .. غنت .. سكتت .. صنت
مرقت .. دخلت .. قامت .. قعدت
شن بتسو ؟
تقشقش فوق رقراق الدمع الكاسي العين بهدمة دم
كل ما أتعرى يجدد توبو يضاري الريحه الكست الجو
تساسق بين تيار الموج الكسر الجدول ودفق شو
تسارق فوق نجماتا برقنْ هجنْ لجنْ ..باتنْ قو
تضاير فوق وديانا شبعن .. رضعن ضرع السحب الشالن برا ..جو
تصنت غنوة سيره عريسه مهقد .. مكسي .. مجرتك
يفوح الصندل .. وعطر المحلب منو مدفق
أمو تعدل .. وأختو الرقصت ..وخالو يبشر ...
وعمو بيعرض وسط السهله ..وخيرو مدفق
غنوه بتعزف نغم أتشتت .. رعداً صفق
برداً هز اتباطن صوتو
أتطانن حر لوح و هوا
وظهراً فارساً تب ما إتلوى
وزغرد ليك ايقاع المطر إتلبب
حضن الأرض ونام
ود سيد أحمد دق المحلب جوه الفكره
وخت الذكرى
ذكرى الليلة وذكرى بكره
أبيه و حرة
مبدأ و عزه
سيما وعبره
درايا و خبره
شموخ بيت عازه الما بتهزه
برغم الضيم
وليد ضكران
هز و رز تب ما فز
اتقطر نز
ادفق ضي
ود سيد أحمد شال الريشة
ورسم اللوحة
وشتت لونها
وتيرب بيهو سما السودان
وكانت النبتة عصارة الغنوه الفيها
ثقافة .. وحب .. وسياسة
مزيجها بلدنا وفيها ولدنا اتعطن الريد
والبت الحلوة .. الوطن الغالي
وسرج بيهو وشد ضهر سودانا القام
وكيف بتفوت
وكيف بتفوت ..
يا الولد الغنى وشنا ورنا
وخالداً حي
ما بتتضارى بشوفك قاعد بين الرمش الفوق عيني
يا الدفيت أعضاء الكلمة في ليل
البرد .. الريح.. الصي
يا النديت أغصان الحرف بصيفاً
حًرا وشد الكي
وكيف بتفوت يا الولد الضوا وشيشو قليب الوتر
الغنا وطرباً غطى فجاج الحي
تمرق بين ورتاب الزرع الفرهد
تمرق بين حبات المطر الطقطق نقط
يحضن ليلاً سود .. هج .. وهود
تمرق بين النيل الكتر ادفق و نمرق
تمرق بين الوتر الصفق غنا وزغرد
تمرق بين صفقات الشجر أخضر و ورق
قام أتشابى وعانق كتف الليل
أتطاول باس القمره وقبل عين الشمس
كيف نبكيك يا راجل الليلة و بكره وأمس
كيف نبكيك ونحنا بنسمع صوتك
سراً.. وجهراً .. ومس
كيف نبكيك و أنت معانا تشيل وتخت
ترص وتقص
تفج السهله وتحكي الغنوه اللبست صوتك
وشالت حسك .. ونفسك .. وروحك
وسمحت زي
وأنت معانا بقيت جوانا و ماك بتفوت
حتلت حنيناً جوه القلب
بصمت عليهو وجود موجود .. برغم الموج
وسفر الجسد الما محدود
غلبت تفوت
كسرت الحاجز الراكز جسرو على المسدود
رقعت الهدم الراسي خيوطو على المقدود
مسحت .. مسحت البعد الأرضي الما محدود
نسفت مسافة الزمن الروح و ما معدود
سكنت مسامة النغم المن إيقاع النبض
بقيت الدم .. والروح .. والقلب
هزمت الموج .. غلبت تفوت
تفوت لى وين ؟؟
وأنت الزول الباقي وحي
أنت النور الوج الضي
وأنت البحر الدفق ري
تفوت على وين ؟؟.. ونحنا زرعنا لسع ني
النيل الأبيض لاقى وعانق حضن الأزرق
باس الأبيض خد الزنجي
اتقلدوا .. اتقادوا
اتوحدوا .. فاتوا
مات العنصر و دأب الفارق
من بيناتن
صدر العين اتملى بالعبره
اتنهد نفس الكلمة الحلوة ..أتأوه
آهة طفت القمره و نفخت قلب الجمرة
وكبت فينا ضلام
يا إنسان .. يا فنان يا لقاومت الذاكره والنسيان
دخلت بوين ؟
سكنت الدم الجاري على الشريان
لوليت جوانا عصاية الكلمة .. الشرف .. العزه
العايش فينا في كل زمان
جرجرت علينا حروف النغم الطرباً
يهز يفرح كل مكان
ختيت الرأي صريح قولاً و فعلاً و فكراً
سجل اكتب يا تاريخ
يا أستاذ .. يا ممتاز
ختيت الدرس مفيد و صحيح
درساً ما دايرلو وسايلاً للتوضيح
ونحنا فهمنا كتبنا درسنا على الكراس
انتهت الحصة و ناحن سكلبن الأجراس
مرقت صحيح ؟؟؟
مشيت بى وين ؟؟
وكيف خليتنا بدون تصحيح ؟!؟
نصحح وين !!؟
شلنا الهم
نصحح وين
جينا الكم
نصحح وين
وكل أقلامنا تقطر دم
كمل أحمر دفق لونها فحم
ونحنا كبرنا وعينا وزدنا فهم
عرفنا أهداف الدرس تمام
ختينا النقطة الهمزة الشوله الاستفهام
خلصنا خلاص
جمعنا قلمنا حبرنا كُتابنا مع الكراس
يا الوحدت بسفرك كل الناس
يا مقياس
يا ميراث
وأساس المعنى
الحب ..المبدأ .. والإحساس
نعم الإرث الباقي وأعظم ساس
وكيف بتفوت
و أفتش ليك أنا جاي بى جاي
و أهلك و ناسك مرقوا يكوسو عليك معاي
وأنادي عليك ارتي عليا
فوت بى وشك ارجع جاي
وفجأة ... وفجأة بتطلع من جواي
متل النور الضوا حداي
وموج النيل الرايح جاي
وهج العين الفكر الرأي
ومن الشمس بريق ضواي
وصدر الأم الليك غطاي
حديثها يناغم فيك لولاي
وصوتها يهدهد فيك هداي
هوها.. يا هوها
واحد ..اتنين .. تلاته
إبرة الخياطه
فيها م وفيها ص وفيها ط
و ف
وفيها جميع المصطفى
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: اسيا ربيع)
|
شكرا حزينا آسيا
الســــــــــــــــفر الأليـــــــــــــــــم
ترانيم
المصطفى
مصطفى سيد أحمد
نوارة فى قندول بلد
نبع صافى بلا ذبد
و فى القلب راكز للأبد
يا فد .. ولد
شال كتف الغنا الميل و انهرد
**
ريدنا ليك الريح بعرفو
شافو لما كتبتا حرفو
**
يا حقل الغنا و جرفو
يا تربالو العلا سقفو
**
و أبيت الكلام المغتغت
و فاضى و خمج
**
يا مصل التوتر و الزهج
يا نار براكين النضم
شيدت الممالك من عدم
للجوعى
و
الساكى القطارات
لى راعى البهم
رؤية و نور فهم
لا زيف لا وهم
**
و أبنى فى عيون الشمس مملكتى
تناديكم
نسورا تعشق الترحال فى الآفاق
تبقى الكون حرية
**
يا مصطفى
يا نجم الغنا الحلق و اختفى
الحرف ساسق وراك لمن حفى
**
و
مطر الحزن عاود هطل
جدد عذاب الآرصفة
و ضى المصابيح البعيدة
أتعب عبونك و اختفى
**
يا بحر الصبر
قيفك غريق . لجة
سردب للالم
فارسا بالسيف ملجى
كلما نسور ألمك تشتهيك
تحضن قصايدك عليك
عودك الملجأ
و قهوة فى ضل الكمنجة
**
يا جمة حشا المغبون فى
الزمن الهلاك منجا
**
كنت تصطاد فى الظهيره
و من مناقير الكنار
بوصلة سكك الآغانى
و من قرى الليل البعيدة
تنتشل عطر الآمانى
**
و تولد كم قصيدة
و تبقى بيناتنا المسافة
و رنة الحزن البخافا
يانغما قيافة
و القلب آخر نظافة
معبا بى ناسا توارت من مخافة
أو من تجاهل
أو من جلافة
همهم همك
حلمك حلمهم
رغيفة
و كرامة
و سلآمة
و بلدا معافى
**
ماكا غرقان فى التمنى
**
و مرة طربان شلت صوتا عشان تغنى
وقلت
آه ياليل و آه
انتى أول
و انتى تانى
و انتى تالت
و انتى رابع
نافرة ذى صيد الخلا
صافية ذى نبع المنابع
**
المتلى ماعنك برافع
يا كلمة تطلع كالمدافع
و القلب فى شوقو راتع
**
و من الواسوق أبت تطلع
الآ من وترك تصارع
مغبونة و تدافع
عن أى تربال
لى أى شافع
ولى بلدا ضيق
الآ شاسع
**
كأنك من وراء صفحة زجاج مبلول( مصغول )
وراك الريح وقدامك
مدى السكة
و مدى المجهول
و انادى اليك
.
.
وجيده
وجيده
وجيده
لا اتلفتى لا لوحتى بالمنديل
**
وجيده ما زالت تتاوق
من وراء صفحة زجاج مبلول
وجيدة مليون معنى
عند كل زول
عند البعض قندول
حلم الجياع مكفول
وجيده فى قليك
حلم مغزول
حبيبة
و أرض
و بتول
**
نوبة و زنوج و بجا و حلب
رطانة عربان مو أشو و مولدين
**
فى ايدنا فاس و قلم رصاص
ريشة و كمنجة و مسطرين
و طبنجة فى خط التماس
حراسة من كيد البكيد
**
يا .. للنشيد لوطن جديد
و آه .. يا رأى سديد
يا نابغة فى الذمن البليد
يا تربال جروف الغنوة الثورة
يا خابر اسرار القصيد
صحى الموت سلام
الدنيا عيد
عيد لحونك مرة و تانى عيد
أكوينا بى نضما عنيد
لو نقدر نعيد
صياغة البلد
الهلاويس
المسيد
**
حقيقة و ما مجاز
**
عدا فات زمن العيون الألفة
و الحضن الملاذ
و رهافة الحس البلون
ضحكة الناس العزاز
**
صب فينا جاز
أحرقنا و الغث النشاز
لو فضلت وجيده وراء القزاز
أو خان وصاياك الحراز
يا
محور ارتكاز
يا
قمرية و الغابات حريق
مزمار و الكون أصم
فنار مفندر فى مضيق
فيهو النوارس تستجم
**
و يبقى بعدك فى الأسى
يا ضو حبيبين القسا
**
بالغنوة أصدق من مشى
حمرة عين
نوافير اختشى
نظافة روح
رحابة حس
و الكلمة تنزل وشوشة
همبريب انتشاء
مساج روحا من فلايت الهم
و القلب دم . دم
**
يا مطر عز الحريق
يا مصابيح الطريق
يا المراكبية البتجبد
من فك الموج الغريق
**
والله أصدق من رفيق
شدوك أطواق الغريق
بى حسك تهش شوك الطيق
ضريسة الزمن الصفيق
و تفتح كم طريق
لى جيل راضع لباك
مشبع بى رؤاك
**
جيل الشمش موكب حريق
بينانو بينات الوصول لحظة شهيق
**
وضاح
وضاح يا فجر المشارق
الحزن فى الجوف المطارق
اللى زيك ما أظن يفارق
يالساسك فينا غارق
و الارض مصلاية التراب
فجّ جموعك يا مهاب
أنزل سحاب
ما بين حضورك و الغياب
أحزان معبية فى الجراب
أحلام مشت تالا الرهاب
و الهم دخل من ألف باب
غيابك حضور
حضورك شهاب
وشدوك تساب
و شن جاب لى جاب
**
تقول لى الفراق مكتوب
ذى أول جمعنا قدر
**
قدرا وين يا ضو العين
البقصف فرعا طارح دابو
صفوف الجوعى عليهو يشابو
ما الاطفال الناشفة ضلوعا
بعدك شاخو و شابو
قدرا وين بسرق لقمة ناس مريوقة
و حارية جرابو
قدرا يتم كلمة عصية عنيدة
قدر مصابو
شرف الكلمة سلاحك
و سان حرابو
و قولا ملهم يمرق منك
لا من قبلك لامن بعدك
ما سمعنابو
و ماك مفارق بالاقدار
الذيك هو البختار
و ماك محتار
يوم اخترت قبلنا دروب النار
و غيرك يهضرب جوه خلايا الظار
يا فقير الآنبياء
يا نبى الفقراء
ألهمنا النشيد
كمل رسالتك يا مفيد
أفضح توابيت الخواء
ضلالات عرس الشهيد
شيد مدن حلمك يامجيد
لبس الحانك نشيد
**
ما طال فى بحرك فى مى
و تمرك مفدع بالجريد
شدرك أمد حد السمى
و طينك معتق بالطمى
نبنيك أكيد
نبنيك أيوا سوا سوا من أو جديد
**
ما بنقول حليلو
لى زولا مكنكش فى شليلو
لا ضلّ
لا تاه من دليلو
تسمع فى السما السابع صهيلو
قدر ما الريح تعربد
لا بتزحو و لا بتشيلو
يا موت عينك فى الضل
تطعن فى فيلو
**
و رحل صوت المغنى حزين
**
يا واحد فى الكل مصهور
أهدينا سلاحك يا المنصور
لمن غيرك خان أوتارو
و طمبر للعسكور
كت متلبب دفتر شعرك ذى عصفور
و ميمم وترك صوب النور
**
و
مكتوبة فى الممشى العريض
شيلة خطوتك للبنية
**
يوم أسرجت خيلك يا جنا
و عبيت مخاليك بالغنا
و ركز فى الساحة صقرية
و شبال أما كبارية
و مجرتق بى سماحتك زين
فوق جبينك بدل الهلال اثنين
فى ليلة الدخلة على اسمى قضية
دفق غيمك فينا مساير
تساب غناك الدافر
هدهد ألم الجوع الكافر
ماكا مسكن للآلام و مسافر
ات متوسد فهما وافر
متمترس خلف يقينك ساتر
عفت العادى لانك ثائر
وناظر تالا مشارف باكر
و لابد يوم باكر
**
مابين زمنا متمنيهو
و زمنا منك ساقنى أسية
**
نعقت بومة شوما فيا
بروس النبت الخادع حمر ليا
و محلا أجلف تاوق فى الفجرية
لفحنا همومنا و طرف أغنية
كت سادربها ذات عصرية
**
طوريتك فى الطين مرمية
كوريتك يابسة و مجدوعة
لاغيبتك كانت مطرية
و لا فوتك كانت مبلوعة
**
قريت الحاصل
و برضو مواصل
لحن حزين و طروب
**
مافى غير ترحل تسافر
شيل حقايبك و أمشى بينات الشعوب
**
أيها الراحل فى الليل وحيدا
ضائعا منفردا
أمس زارتنى تباشير الخريف
غسلتنى بالثلوج و باشراق المروج
**
شكرا ليك
شكرا ليك
ما
محرية فيك
تفجعنا فيك
يا نجامة التعب الكعب
يا دخرينا فى الزمن الصعب
الزمن البدور و يلف
و ما تحلف
اهديتنا للحزن وقف
توعدنا لية
ذى الحراز
فرتق ضفايرو للرزاز
و جيت العصافير قربت
ياضى شبابيك البيوت
تبرأ انت من الخفوت
*
لست من وهم لتفنى
أنت من وتر لتشدو
فأهدى لى لحنا
وللصغار المعدمين
**
الحزن لا يتخير الدمع ثيابا
كى يسمى بالقواميس بكاء
**
لندن مساء الاحد17 فبراير2002
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: اسيا ربيع)
|
استاذتنا الكريمة اسيا
قلت له:
يــــــــاروائع (الفنان مصطفى سيد أحمد)
يا روائع ...
حملت معانيك الطيور
ما اتحملت
نثرت أطاييبك زهور
ما اتخيلت
أنت البتسكب هالروائع
يا بدائع ...
طلت العشم
صمتك ألـم
ضقنا الندم
أنت المفصل بالنغـم
آخر مقاسات الهمم
وانت المطرز كالخليل
"عزه وهواها"يابدائع
ويا سواجع ...
سكت النغم
كمل الفـهم
زاد البـــلم
صارت أمم تتبع مسارك
والنجم عشق أنتشــارك
فى سماهو يا سواجع
ويا مزارع ...
أنت حــرثو
وأنت غرسو
وأنت درسو
تغرس الحق تروى شتلو
نجـنى ذاتنا وأنت تتلو
كل آياتو الروائع
وياروائعنا ودليلا
وياخليلا
ويانـبيلا
تشــرق الدنيا بفنك
ويشرق العالم واظنك
تشده الكل ياروائع
وياودائع ...
حـوجه ليك
وحاجه بيك
وحاجه فيك
لاتبتدى ...لاتنتــــهى
أنت النهيت أنت البدى
سيدا راجعـالو الودائع
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: الطيب شيقوق)
|
اسيا ربيع ...كنز الوفاء والمحبة ..بوركتي جمالا وسماحة ..
مصطفى سيد احمد ..(لا احب كلمة الراحل هنا فقط )فعفوا وصفحا جميلا ..
حمل العود المرنا ..
وامتطى مهرا جموحا وتغنى
بين غابات النخيل
غبت عنا
لم تعد ..
عادت عصافير الاصيل
غبت عنا ايها الطفل الجميل
وعلى الرمل ارتمى
بلبل غنى صبيات الحمى
ذات يوم بالغرام
هل ترى يجدي الكلااام ؟؟؟
بعيدا عن المزاج الشخصي وشحذ الهمم والنوازع الذاتية العارضة
بكل تاكيد مصطفى تجسيد حي وصادق وفريد لذلك الاتحاد العضوي الذي لاينفصم اي كونه محصلة
لجمع وتاريخ ثقافة امة الى جانب موهبة ابداعية فريدة ولحنا شاردا غير قابل للتكرار او الاستنساخ ...
له الرحمة ولنا العزاء
ولكم محبتي
اسيا والمتداخليين
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: الطيب شيقوق)
|
من مرثية الشاعر صلاح حاج سعيد
ماكنت قايل نفسي يوم
أرثيك يا أصدق خليل
أنا كنت بتخيّل أكون قبلك
أسافر غنوة في الوتر الجميل
زي ما عبرت معاك صروف زمن المسافة
وجينا للى الحزن النبيل
أنا كنت داير الدنيا تمهلنا
ونغني الفرحة لى الزمن الخُرافي .. المستحيل
ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول زمان الشنشنة
الشاعر صلاح حاج سعيد
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: احمد العربي)
|
سلامات يا زول يا رائع
مرثية الشاعر أزهري محمد علي
فات الكان بدّينا إحساس بالإلفه
وكان راوينا
فات الباكي جَرِحنا وناسي جُرحو
ولافّي ورانا مدينه.. مدينه
فات الصاحي ونحن نَغِطْ
في النومه السابعة
طالِق حِسِّو ولا حسيِّنا
حَتْحَتْ فينا غُناه الطاعِم
وفَاتْ قنعانْ من خيراً فينا
سلاماتْ يا زول يا رائع
سلاماتْ وعواّفي!
سلاماتْ يا خُلاصة الخير الفي الناس
وترياق الزمن المُتْعافي
سلاماتْ يا زول يا رائع
الشاعر الجميل ازهرى محمد على
| |
|
|
|
|
|
|
|
|
|
Re: 17.1 الراحل مصطفى سيداحمد .. كيفك انت.. يا شبه ناس قلال او شبه ناس مافى (Re: عاطف عبدون)
|
الأخت والصديقة الوفية والمبدعة آسيا ربيع
لك أطيب تحية
إن الجهد المبذول في هذا البوست لا يدل فقط على عظمة فناننا الخالد في كل وجدان سليم إنما على عمق الوفاء الذي تحملينه أيتها الرائعة آسيا فلك الشكر والتقدير. لدي سؤال، فعلى الرغم من أنني أعتبر الفنان الراحل مصطفى سيد أحمد هو فناني المفضل إلا أنني قد عجزت عن حصر عدد أغنياته فهل يمكنك يا آسيا أن تعطينا بالتقريب أو تحديداً عدد الأغاني التي شدا بها الراحل، أقصد أغانيه الخاصة ذات الملكية المطلقة. تحياتي لك مرة أخرى أختي آسيا.
| |
|
|
|
|
|
|
| |
اسيا ربيع
ناهد بشير الطيب
Haydar Badawi Sadig
Nader Abu Kadouk
baha eassa
فيصل محمد خليل
tarig almakki
محمد سنى دفع الله
خضر حسين خليل
احمد سردوب
Mohamed Abdelgaleel
سيف بخيت موسي
khaleel
بدر الدين الأمير
بابكر عثمان مكي
خال فاطمة
Yasier Elsayed
سلمى الشيخ سلامة
عزالدين طه
عمر صديق
خالد علي محجوب المنسي
فاروق أبوحوه
صلاح هاشم السعيد
nada ali
الطيب شيقوق
نعمات حمود
انعام حيمورة
سيد محمد احمد سيدنا
احمد العربي
عاطف عبدون
Asaad Alabbasi
abdulhalim altilib
قاسم المهداوى
فيس بوك
تويتر
انستقرام
يوتيوب
بنتيريست