|
دعواتكم لزميلنا المفكر د.الباقر العفيف بالشفاء العاجل
|
|
 Re: 10..10..10 .. له الرحمه (Re: اسيا ربيع)
|
له الرحمة ذلكم الولد النبيل
كنا طلابا حين عاد من البعثة فى تشيكوسلفاكيا
لكنا تصادقنا على نحو اكثر من رائع
فى بيت اهله فى السرحة كنا نلتقى وكثيرا
اول لقاء لنا كنا
صلاح العالم ،صالح عركى
واسماء السنوسى زوجته الاولى
قال ضاحكا
ـ ما بتعرفو بعض
وتعارفنا لحظتها
حدثنا عن احلامه يومها والانتفاضة فى ابريل ما تزال جمرا لاهبا
وعن امنياته فى الكتابة
الشعر ، المسرح ، الرواية
كان يوما فالتا
غنى فيه عبد اللطيف عبد الغنى من شعر الدوش
وتوالت لقاءاتنا فى امبدة
حيث حدثنا عن روايته التى لا اعرف اين هى الان
يوم رحيله
كنت فى القاهرة
داهم البيت صديقنا المشترك دكتور يوسف مدنى باكيا
وعرفنا لحظتها كم فقدنا كان كبيرا
بكيناه معا
لكنها تلك الدموع غسلتنا وما ارجعته
له الرحمة ولنا حسن العزاء
شكرا اسيا فمثل الدوش لا تكفى الكتابة لغسل الم رحيله
| |
 
|
|
|
|
|
|
|
 Re: 10..10..10 .. له الرحمه (Re: اسيا ربيع)
|
عمر الطيب الدوش.
---------------------
الـمصـدر: http://www.geocities.com/alneel_s/taha.htm
شاعر سودانى متفرد ويمتاز شعره بقوة المعنى ومتانة التعبير ويتسم شعر الدوش
بالوطنيةالكبيرة كما أن شعره يميل ويتعاطف مع السودان وشعبه المعاني وتغنى له الثكير من الفنانين السودانيين أمثال الأستاذ الراحل المقيم مصطفى سيد أحمد والأستاذ الكبير محمد وردى نسأل الله أن يمد فى عمره ويديم عليه الصحة والعافية
ألا رحم الله شاعرنا الدوش وعمه برحمته.
قصائده:
--------------
1 - ضلمت
2 - وطـــــــــن
3 - اتخيلي
4 - حــــــكاية
5 - الحفلة
6 - مرسى النجوم
7 - خطابات فى حمى الوطن
8 - بناديـــــها
9 - الود
10 - تاجوج
11 - سؤال؟
12 - الساقية
13 - سحابات الهموم ليل المغنين
14 - محمد ود حنينة
15 - الحزن القديم
16 - طه المدرس ود خدوم
17 - ضل الضحى
18 - مشوار
19 - صالح ود قنعنا
20 -العمدة جابر ود خف الفيل
***********************
***********************
طه المدرس ود خدوم
-----------------------
يا تلاميذى العُزاز
بسم الله
بسم المجد فى أحضان سُعاد
اكتبوا التاريخ
خمستاشر ربيع أول
والمُوافِق
موِلد الايقاع على خطوات سُعاد
والمُرافِق للصباحات ، المناحات
واخضرار الغيم وفقدان الشُعاع
ارتفاع الموجهْ لى صدر الشراع
اكتبوا
ارتفاع الموج إلى صدر الشراع
يا تلاميذى العُزاز
خلِّى بينك وبين زميلك
زى مسافَهْ
قَدْر أيه؟
قَدْر المسافَهْ البين عيونى وبين سُعاد
قَدْرِ آلاف الفواجع فى انهيارات الحصاد
قدْرِ مسحوق الأنين فى تواريخ البُعاد
اكتبوا
.........
ودَيَّه أيه يا اْستاذ يكون؟
دا المُجنن طه اسألأوا ودْ سكِينَهْ
اسألوا الريح المسافر فى تجاعيد السكينَهْ
شاوِرِوا الموج اللِّى ساكِن فى مسافات السفينَهْ
تسألونى عن سُعاد
اكتبوا العنوان بخط ممشوق وواضح
احذروا اللحظ البيضحك وهو جارِح
مُرْكَب على الله ويلأّ نجتاز الحدود
اكتبوا العنوان بِخَط مستور وفاضح
(رقصة الموج الأخيرَهْ جُموح نُهودِك يا سُعاد)
عنوان طويل
يا تلاميذى العزاز
كِلمَهْ..كِلمَهْ على مهلْكُم واكتبوا
والصيف طويل لمْلَم العُشاق مواعين الرحيل
نجمَهْ شاردَهْ
وغيمَهْ هاجدَهْ
ضَمَّهْ ضَمَّهْ ضَموا شرف المستحيل
جَوهَرُوا الحزن الكحيل
مُركَب على الله ويلأّ نجتاز العويل
بانت سُعاد
غامت ملامح السكَّهْ وانكتم المكان
رَقَصتْ سُعاد
فى خانَة الأصفار وميلاد الزمان
جمّعتْ من كل زهرَهْ مواجع الحُب المُهان
مُركب على الله ويلأّ نجتاز الدّثخان
يا تلاميذى العزاز
خلّوا بينكم وبين رنين الضحكة صرخَهْ
حُب مُهان والصبر أولىَ
خلُّوا بينى وبين جنون الخيبَهْ شَوْلَهْ
واكتبوا
(عاشَ فى زمن المذلًهْ المدعو طه ودْ خدوم
باع تفاصيل الكآبَهْ عشان يفرِّغ وتانى يمْلاَ
جاع وخيرِك يا سُعاد مرْدُوم رَدوم
عاش المدرِّس ود خدوم
كأنو نكْبَهْ -كأنو شُوم
عاش المدرِّس ود خدوم
تسْقُط حكايات الهموم
الأزاهِر
والدفاتِر
والمتاجِر
والمقابِر
والخافر والمشاعر والنجوم
عاش المدرِّس ود خدوم
يا تلاميذى العُزاز
من كانَ حاضِر أو تَوَلَى
يقفِل الكرّاس ويلأّ
نشوف بداية المهزلَهْ
***
يا تلاميذى العُزاز
فى صيف طويل مبطوح على صدر الزمن
منظُلمَة الشوق ابتدا
فى حضرَة الحُب اندَفن
والنيل مدامِع للنجوم
والصبر مُفتاح للشجن
والحِلَّهْ مبتورَهْ وكسيحَهْ ومُهْملَهْ
بانت بداية المهزلًهْ
بانت سعاد بانت تفاصيل الشجون
والجنون والمقصلَهْ
بانت سُعاد
وقفتْ على خِصر الجبل
فتَحت مشارع للظنون والأسئلَهْ
رقدَت على شَعَر السهل
ضفَرت ملايين القُبل
"والجو صفا والنيل هَدَا
وغاب الأتر"
وأنا يا سُعاد
فى الحِلَّهْ معجون من رماد من حسرَهْ
مقطوع من شَدَر
يا تلاميذى العُزاز
لا زوايَهْ لا قوس لا وتَر
وأنا يا سُعاد
فتّشتَ ساحات الأمانى
ناصيهْ ناصيهْ
حجر حجر ، ما لقيتْ إلاّك زمن
مالقيت إلا بِلاد
وأنا يا سُعاد
يا شهوَة الحُب للعِناد
يا شهقَة الفرح المُعَاد
خلِّينى فى بالك نغم
وأنا يا تلاميذى العُزاز
مخلوق بسيط من شوق وغَم
وأنا يا سُعاد مخلوق بسيط من شوق وغم
قامت سُعاد من رقدتهْا
الكون جميع كان انحصر مابين
قيامَهْا ووقفتَهْا
النخلَهْ والهجليجَه والسيّالَهْ
والشوق والمطر
الغابَهْ والهم القديم
الفرحَهْ والذُّل والخطر
كلُّو انْجَمَع فى كفّتهْا
قامت سُعاد من رقدتهْا
قامت قيامة العُمْدهْ مليون اتجاه
اشتَّتتْ كل الجموع
من كلِّ أنَّهْ وكلِّ آه
ومشيتْ عليكْ أنا يا سُعاد
حتَّة مُعلَّم مُبتدىء
غاوِى وبسيط
ولو ما خَدوم
كان من زمان محْسوب لقيط
ما آصلى مولود لللَقِيط
أو مُغفّل
أو مبهدَل
أو عبيط
يا زعيطاً يا معيط
ومشيت عليك أنا يا سُعاد
شُبّاك على النار انفتَح
درويش نحيل
فى صُرَّهْ شال حزنو وسَرَح
سيلاً تقيل
وسَّع خطاويهو وكَسَخ
ومشيت عليك أنا يا سُعاد
مربوطهْ عينى على خُطاك
فى عيونك اتجمّع كلام
فى صوِتك اتجمّع ظلام
حسيتو فى الحَشَا والعِظام
وقريتو فى سعف النخيل
ولمحتو فى طوق الحمام
فى العفهْ والخُصْلهْ الحنِينَهْ
اللفْتهْ والتوب والحِزام
بارَت مواعيد الغرام
ونزرْتُو حُبِّك للزنازين
والمساجين والهوام
والعُمدهْ فوق راس الفرح
جمّع جريوْاتو ونبح
(مسئول كبير زاير البلد)
قُتْ ليهو يا عمدهْ اختشى
مسئولك الزاير الكبير
يا ريتو بس لو شاف سُعاد
كان رسم للعفَّهْ
أوصافا وتقاطيعا ومقاسا
كان دخل للحِلَهْ من بابا وشبابيكا وأساسا
كان اتْوَلد برَّهْ المُتاجرهْ
والمحاورَهْ والمصاهرَهْ والخساسَهْ
كان تاب
وباع للصدقِ مجدو وذمّتو
يمرُق جديد
من حَر دهاليز النِخاسَهْ
من هدومِك يا مرازِل
يا مزابِل
يا مباخر للتعاسَهْ
يا مناكر
يا عساكر
يا ، سُعـــــاد
......
فِك علَى كلب الحراسَهْ
.....
يا تلاميذى العُزاز
فى يوم طويل مبطوح على صدر الزمن
اتلمّت الحِلَهْ
الحنينْه عشان وداعَك يا غروب
حُزن فارس
وكيف يصير فى لحظَهْ مولَى
كيف يجوز
يا عمدَهْ كيف؟
الذُّل مُصان
والحّثب مُهان
والسجن أولى؟
كيف لقيت يا عُمدهْ كيف
للمجازر
والخنازير
والخناجر
فى رموش الغيم مَحَلَّهْ؟
كيف بنيت يا عُمدهْ كيف
من رماد حزن المآتم
من تُراب غضب المآتم
ليكْ ولى ضيفَك مَظلَّهْ
حِلَّهّ حادَّه
وإنتَ تزْرع فوق ضُوع الوادي حفْلَهْ؟
كيف يجوز؟
قد يجوز وقد يجوز
يا تلاميذى العُزاز
ضَلّض مَن قَد لا يحوز
من تبتّلْ أو تيَمَمْ
أو تيتَم أو ترمّل
يا تلاميذى العُزاز
اكتبوا التاريخ
خمِستاشر سُعاد أوّل
| |
|
|
|
|
|
|
|
|
|
Re: 10..10..10 .. له الرحمه (Re: اسيا ربيع)
|
Quote: الحفلة
(1)
بداية الحفلة دلوكة
نهاية الحفلة
متروكةْ
لأي صنم يشيل كرباج
يَجِلْد الحق
يخلي الحفلةْ مرْبوكهْ
نهاية الحفلة متروكه
لاى صبي يهز السيف
ويمْضَغ حسرتو
يلوكهْا
وبين السيف
وبين كرباج
مسافة تودي
أمريكا
(2)
بداية الحفلة
بالدوباي
نهاية الحفلة
بالهبباي
ِِبتمْرُق من قلوب الناس
عقارب
لا فهم لاراي
وتزرع في سما الحفلة
جهاجه وانتباه
وبراح
وتنعش معْشر السِّراي
وتبسط جملة الأفراح
(3)
بداية الحفلة مبديه
ومن وْلَدو الوجع
قامت
وصوت المادح المبلوع
يخربش فى الفضا الممنوع
طنين الفاجعه كان
مسموع
ويبدا الكلام
حتجوع
(4)
شنو الجدّ
عشان نتجارى بين القاهرة
وجدة
بين القومه والقعده
بين الفرهْ والعقدةْ
شنو الجدْ؟
وكنا هجين خيول الريح
تنسد ولاهمَاهَا تنقد
ولا رجعت اذا انسد
اهو المشوار
َوٍكت عرَّش حدانا ندم
براهو اتمطي وامتد
(5)
نهاية الحفلةْ دلوكهْ
نهاية الحفلةْ مبروكهْ
لأنو الحوت َفتَح خشمو
لأنو الزول عِرٍف أسمو
لأنو... لأنو
.............
يأخي أقيف
أهي الأمواج
وداك القيف |
B]
الله علي شعره..ورحمة الله عليه..
الانتفاضه الحفبه البدت برح وانتهت بحسره!
مهرجان كان يا آسيا ..
مهرجان الشعب الملون بكل المشاعر..
كان فيها امل وصلوا ليه بعد غضب وعمل..
شوارع الخرطوم ولشاتك العربات المولعه والمواكب الواعيه..
الغاز والعصي والرصاص..
الفرح وذروته وشارع القصر وكل العالم فيه..
الله يا آسيا علي عمر يكاد ينتهي دون ان يبدأ حقيقه..
الله علي الحفله واناشيدها وجنوب افريقيا ترقص عليها في الخرطوم!
الله علي دار الاساتذه وكل الديار..
علي الحماس والدنيا الفاتحه حضنها وجامعانا فيه..
......
.......
الحفله انتهت بجلده..
جلده قطعت قلب الاحلام وشتتنا وضاع فرحنا!
.......
.......
بكره تتعاد الحفله ونتفادي الجلده!
| |
|
|
|
|
|
|
|
|
|
Re: 10..10..10 .. له الرحمه (Re: Muna Khugali)
|
الاخت الحبيبة منى خوجلي
تسلمى على المرور الجميل
ربنا يرحم كل المبدعين يا منوية
..
الحزن القديم
ولا الحزن القديم
إنتِ
ولا لون الفرح
إنتِ
ولا الشوق المشيتْ بيهو
وغلبْنى أقيف
وما بِنْتِ
ولا التذكار ولا كُنْتِ
بتطْلَعِى إنتِ من غابات
ومن وديان...
ومنى أنا..
ومِن صحْيَة جروف النيل
مع الموجَهْ الصباحيَّه
ومن شهقَة زهور عطشانَهْ
فوق أحزانهْا
متْكَّيهْ
بتَطْلَعى إنتِ من صوت طِفلَهْ
وسط اللمَّهْ منْسيَّهْ
تَجينى
معاكْ يجينى زمن
أمتِّع نفسى بالدهشَهْ
طبول بتْدُق
وساحات لى فرح نَوّر
وجمّل للحُزن..ممْشى
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
ولا البلْقاهو بِعْرِفنى
ولا بعرِف معاكْ ..روحى
| |
|
|
|
|
|
|
|
|
|
Re: 10..10..10 .. له الرحمه (Re: تماضر الخنساء حمزه)
|
الاخت الحبيبة تماضر
لك الحب
ربنا يرحم الشاعر الكبير عمر الطيب الدوش
...
الحزن القديم
ولا الحزن القديم
إنتِ
ولا لون الفرح
إنتِ
ولا الشوق المشيتْ بيهو
وغلبْنى أقيف
وما بِنْتِ
ولا التذكار ولا كُنْتِ
بتطْلَعِى إنتِ من غابات
ومن وديان...
ومنى أنا..
ومِن صحْيَة جروف النيل
مع الموجَهْ الصباحيَّه
ومن شهقَة زهور عطشانَهْ
فوق أحزانهْا
متْكَّيهْ
بتَطْلَعى إنتِ من صوت طِفلَهْ
وسط اللمَّهْ منْسيَّهْ
تَجينى
معاكْ يجينى زمن
أمتِّع نفسى بالدهشَهْ
طبول بتْدُق
وساحات لى فرح نَوّر
وجمّل للحُزن..ممْشى
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
ولا البلْقاهو بِعْرِفنى
ولا بعرِف معاكْ ..روحى
| |
|
|
|
|
|
|
|
|
|
Re: 10..10..10 .. له الرحمه (Re: JAD)
|
الاخ العزيز جاد
لك الاحترام والتقدير
......................
بناديها
بناديها
وبعْزِم كُلّ زول يرتاح
على ضحكَة عيون فيهَا
وأحْلم اني في أكوان
بتْرحَل من مراسيها
عصافير
نبّتَت جِنْحات
وطارت
للغيوم بيهَا
مسافرِ من فرح لس شوق
ونازِل
في حنان ليهاَ
أغنّي مع مراكب جات
وراها بلاد حتمْشيهَا
واحزَن لي سُفُن جايات
وما بْتلقَى البِلاقيه
بنادِيــــــهَا
ولمّا تغيب عن الميعاد
بفتِّش ليهَا في التاريخ
واسأل عنَّها الاجداد
واسأل عنّها المستقبل
اللسّع سنينو بُعاد
بفتِّش ليها في اللوحات
مَحَل الخاطر الما عاد
في شهقَة لون وتكيَة خط
وفي أحزان عيون الناس
وفي الضُّل الوقَف ما زاد
بناديــــــهَـا
والاقيـــــهَــا
واحِس بالُلقيا زي أحلام
حتصْدِق يوم
والاقيــــــهَــا
واحْلًم في ليالي الصيف
بَسَاهر الليل
واحجِّيـــهَــا
ادوبي ليهَا ماضيهَا
واطنْبِر ليها جاييــهَا
وارسِّل ليها غنوَة شوق
واقيف مرات واْلُوليهَا
بنادِيـــــــــهَــا
وبناديــــــــهــا
وبناديـــــهــا
| |
|
|
|
|
|
|
|
|
|
Re: 10..10..10 .. له الرحمه (Re: اسيا ربيع)
|
واسأل عن بلد مجروح
وعارف الجارحو ليه جارح
وابكى على بلد ممدوح
وعارف المادحو
ما مادح
واحلم بي حلم مسروق
لا هو الليلة
لا امبارح
أعلق في جناح سفري
خطابات لي زمن فجري
وادخل من درب سري
لكل مضاجع الأحزان
واضفِّر من شجر بلدي
بروقاً مارقة من صدري
حأسأل عن بلد غاطٍ
لحدِّ الليلهْ في الوجعة
أَنط فوق سرجي واتْحزَّم
أقوم من وقعة
لي وقعة
شكرا اسيا
| |
|
|
|
|
|
|
|
|
|
Re: 10..10..10 .. له الرحمه (Re: اسيا ربيع)
|
قــصــيــدة ســعـــاد.
------------------------------
للشاعر المبدع عمر الطيب الدوش
غناء الأستاذ الرائع الكابلي.
الـمصـدر: Sudan.Net Discussion Board -> General Discussion
*******************
*******************
دقّتْ الدَلّوُكَهْ
قُلنا الدنيا ما زالت بخير
أهو ناس تعرِّس وتنْبَسِط
تكْكَّتَ فى الراكوبة
بالحلقوبة سروالي الطويل
سويتْلُو رقعات فى الوسط
فى خشْمِى ختيت القميص
أجرى وازبد شوق وانُط
لا مَن دخلت الحفلَهْ فجيت الخلوق
وركزْتَ
شان البِتْ سُعاد
ما أصلى عارف جِنَّها
فى زول بيرْكِز وينْسَتِر
لكنِّى عارِف إنَّها
لو كلو زول فى الحلة بالسُتْرَهْ إنجَلَد
يانى الآزاها وجِنَّها
وركزْتَ للحُرقَهْ المَشَت فوق الضلوع
تِحت الجِلد
لميت مشاعري مرقتَ عِن طَرَف البلد
ووقفت جَدْ
وأنا جايىّ راجعِ مُنْتَهى لاقتْنى هِى
قالت "تعال"
تعاااااااااااااااااااال
كِبْرَتْ كُراعى من الفرح
نُص فى الأرِض نُص فى النِّعال
الله اكبر
يا معافرة يا مدافرة يا جهاد
"هيْى يا سُعاد
هى يا السكينة الكلتى فى خشمو الرماد
هى يا سعاد
وأنا بِت بلاك ملْعُون هواك ان كنتَ أرْضَى أعرِّسهْا
وأنا يا سُعاد
اه يا سعاد
وكتين تطلي سحابَهْ رقصت الدُعاش
اه يا سعاد
بفْرِش على روحى واجيكْ
زولا قلق تعبان وطاش
وكتين أشوفِك ببقى زول
فَرَشولوا فَرْش الموت وعاش)
وكتين تطلى سحابة ترقصي للدعاش
اه يا سعاد
اه يا سعاد
قالت سعاد
بطل كلام الجرسة
وانجض يا ولد
بكيّت مشاعري مرقت عن طرف البلد
ووقفت جد
اذنت فى الشوك والسلم
ووقفت للامل البكر
ورقدت فى الالم الحكر
وحلمت زى شايلنى وسط الزحمة
نبى الله الخضر
صحَّانى صوت العُمدهْ قال
(مسئول كبير زاير البلد)
قبال يهل قبال يصل
( ، لازِم تقيفوا صفوف صفوف
وتهيّجُوا الخَلا بالكفوف
وتقولوا عاش.. يحيا البطل)
سامعنى ولا اقول كمان
قُتْ ليهو يا عُمدهْ اختشى
مسئول كبير في الحلة غير الله اِنْعَدَم
ما شُفْنا زول سك الجهال
ما شفنا زول رضع بَهَم
ما شفنا زول لتخ تيابو
وجانا من طرف البلد
بكيت مشاعرى مرقت عن طرف البلد
ووقفت جد
وأنا جايى راجِع أجهجهو
لاقانى هو
سايق العساكر بالحراب
ضاقت نعالى من الزعل
من تحتهَا اتْمَلمل تُراب
وضراعي زى داير يجن
والجوف يطقْطِق بالكلام
قُبَّال يقولوا لي سلام
ختوني فى قَعَر السجن
ان شاء الله ما بدورو السجن
حصلّنى قبل اليوم يِتم
جارنا المدرِّس ودْ خدوم
قال ليَّ
لا زولاً هتف
ولا كف مشَت بتلاقِى كَف
| |
|
|
|
|
|
|
|
|
|
Re: 10..10..10 .. له الرحمه (Re: بكري الصايغ)
|
قد يكون الوفاء لحب
قد يكون الوفاء لعلاقة دم
قد يكون الوفاء لصداقة
لكن الوفاء طبعاً متأصل وجدناه فيك أختي الفاضلة أسيا الربيع
سباقة للوفاء لأناس أثروا الساحة في كل مجالاتها وتركوا بصماتهم
لهذا الشعب الممكون وصابر ... ولولآهم لماتوا كمدا
فلك الشكر أجزله وكلنا مقصرين في حق هولاء العملاقة التي نحدو ونتصبر
بما قالوا وأنشدو ونحن في غربتنا .....
فلك الشكر مرات عدد يا شبلة من ذاك الأسدُ
تحياتي ومودتي
| |
|
|
|
|
|
|
|
|
|
Re: 10..10..10 .. له الرحمه (Re: Rahma Awad)
|
الحبيبة رحمه
لك الحب
....................
اتخيلى
اتخيلى الانهار
ماصابها اى مرض
واتخيلى الاكوان
فى مهرجان مسحور
هدت النجوم للارض
واتخيلينى وحيد
وانا فاتنى يوم العرض
يانيل صبى وممشوق
من بهجة الامواج
فىزفة منسابة
طارت سحابات شوق
لمست حشا الغابة
طارت طيور بالكوم
طافت على الاشجار
لقت النخيل محموم
غنت مع الساهرين
غ
نت غنا العشاق
ياماشى فوق النيل
هاك الجمال منديل
ياجاى من النيل
هاك النخيل اكليل
واتخيلنى وحيد
انا والجروف والسيل
| |
|
|
|
|
|
|
|
|
|
Re: 10..10..10 .. له الرحمه (Re: اسيا ربيع)
|
عاش متمردا علي نفسه ، و علي واقع ملىء
بالشكليات و الاكليشيهات الفارغة
.. و من ثم ، مات ايضا متمردا علي تلك الطقوس الجنائزية
التي لا تُغني و لا تسمن من موت
.. عاش منحازا للبسطاء و عامة الناس الي درجة انه ضل
طريقه و سط بحرهم المتلاطم .. هذا ما لمسته و انا
اسمع و استفهم تعبيراته و اقواله تلك بمستشفى التجاني
الماحي بامدرمان
.. كانت تجربته الشعرية هى محاولة اصيلة لتجسيد و مزج
رسالة و مرامي الشعر بوصفه تفكير جمالي بالاساس
شحنته الذاتية - التعبيرية بالضرورة عالية ، و مستهدفا
المصير النهائي للناس و الامة
.. كان شعره فكرة و شكلا ، لونا من الواقعية الجمالية
السودانية المتجاوزة لمحدودية و عسف الواقعية - الاشتراكية
و قومسيارها المتسلط عديم الحس و الجمال ( جيدانوف )
شكرا يا آسيا ازهار الربيع علي صورة هاشم صديق الملك
اللي كتب علي دروب العشق و الجمالية :
" البريدا .. ريدا سيدي ، و ريدي سيدا !! "
فعلا الدنيا لا زالت بخير
ناسا تعرس و تنبسط .. و بكرة كمان جماهير مالية
الشوارع
| |
|
|
|
|
|
|
|
|
|
Re: 10..10..10 .. له الرحمه (Re: أحمد طراوه)
|
الاخ العزيز احمد طراوه
Quote: .. كانت تجربته الشعرية هى محاولة اصيلة لتجسيد و مزج
رسالة و مرامي الشعر بوصفه تفكير جمالي بالاساس
شحنته الذاتية - التعبيرية بالضرورة عالية ، و مستهدفا
المصير النهائي للناس و الامة
|
لك الاعزاز اخي الحبيب احمد.. والساقية لسه مدوره
..
الساقية
الساقيَهْ لسّه مدوِّرَهْ
صوت القواديس والمياه
طلَعَتْ
مَشَتْ
متْحدِّرَهْ
مدَ البصر
لفَّ الظلام
حَوْل الجدوال أسْوِرَهْ
نعْسَان خضارهْا الا نْتَكَى
ورمى الغُصون
متْكسِّرَةْ
مَدّ الخيال
غنّت مُدُن
والساقيَهْ طاحونة الأنين
طُول الليالى
مدوِّرَهْ
تحت الهجير
تحت الظلام
تحت المطر
الساقيَهْ لا زِم تستمر
***
الساقيَهْ لسَّهْ مدوِّرَهْ
وأحمد ورا التيران يَخُب
أسيان يفكّر مُنْغَلِب
ما بين بُكا الساقيَهْ
مابين طُفولَهَ بتِنْتَحِب
فى اللّى ما شين المدارس
فى المصاريف
فى الكُتُب
في اللّى ضاق عنُّو المكان
وهسَّه
سافَر
واغتَر
لِمُدُن بعيدَهْ تنوم وتصْحى
على مخدّات الطَرَب
والساقَيهْ طاحونة الأنين
طول الليالى بِتنْتَحِب
تحت الظلام
تحت المطر
عزِ الشتا
الساقيَهْ ثانيَهْ تقيف تكون
آمال عريضَهْ مُشَتّتَهْ
وأكباد صغيرَهْ مفتّتَهْ
تحت الظلام عِز الشِتَا
أحمد حكى
وسّد الراس الضُراع
والشوف
نواحى النيل تَكَا:
وصّانِى أبُوى
الموج بيهْدِم كُل رخوَهْ
على الجروف
شِد الضُراع
زى المراكبى مع الشراع
لازِم تعرفو الظلم جاي
من وين عليكْ
وافتَح عينيكْ
على زهور الغابَهْ والأدغال
على الاطفال
وعشان يكون الحقِّ ليكْ
تَعْبُر بحور
تَهْدِم جبال
الحق هو هو النضال
والحق فى ساحة مجْزرَهْ
والنصر للفاس
والرجال
ولى سواقى مدوِّرَهْ
| |
|
|
|
|
|
|
|
|
|
Re: 10..10..10 .. له الرحمه (Re: اسيا ربيع)
|
Quote: >كِبْرَتْ كُراعى من الفرح
نُص فى الأرِض نُص فى النِّعال |
رحم الله هذا اللماح وقدرته اللامتناهية في التقاط الحالة الشعرية مضى الدوش لاكن لا زالت روحه تواصل ما بيننا والفرح ..
مات الدوش وكان يحمل في داخله الما وحلما بشعب يتحسس انين غيره ,مات الدوش وحيدا إلا من عشقه وكانت عيناه تحتضن الشمس إنفة وكبرياءا .
شكرا استاذة اسيا
| |
|
|
|
|
|
|
|
|
|
Re: 10..10..10 .. له الرحمه (Re: مجاهد عيسى ادم)
|
الاخ العزيز مجاهد عيسى
لك التحية
مرة يا مجاهد, كان متمدد فى عنقريبه المصنوع من خشب (التيك )
لمح شخصا ما كان يصعد علي عمود الكهرباء والذي بقرب الباب ، كان الشخص ممسكا باشياء لا يستطيع ان يميزها وهو علي سريره ولكنه علم
تماما انه يريد ان يقطع الكهرباء.
. قال له : لو سمحت انت منو وعايز شنو ؟
الشخص : انت شايف شنو؟
- انا شايف واحد طالع في عمود بيتنا
الشخص : انا بتاع الكهرباء
- طيب يابتاع الكهرباء ممكن اعرف انت عايز شنو؟
الشخص : انا يفترض اقطع الكهرباء لانو انت عليك متاخرات
- متاخرات؟؟ متاخرات شنو ياخ انا زول قاعد في الصالح العام تقولي متاخرات ؟
الشخص : خلاص طالما انت ما عندك حق الكهرباء انا بقطعه .. يعني انت داير كهرباء من دون ما تدفع ؟
أ- : خلاص اسمع انا عندي قرشين كده موفرهم بكره من الصباح بقسمهم لي اتنين نص للكهرباء والنص التاني للنص .
الشخص : نص شنو؟ يازول هوي ماتضيع لي زمني انا لازم اقطع الكهرباء دي
- خلاص لو انت لازم تقطعها مامشكله اقطعها لكن لو سمحت خلي لي لمبة القلووز الفي نص الحوش دي لانو عندي قصيده بالليل عايز اكتبها
لم يتردد الشخص في قطع الكهرباء وانقطعت الكهرباء وانقطعت كل اماله وكانت اخر شيئ قد تبقي له في المنزل . تحسس التربيزه ثم ارتدي
خاتمه الفضي وقام (بسف ) ما تبقي من كيس تمباك الحورية للعماري الجيد
وقال ضلللللللللللللللللللللللللللللللللللللمت
| |
|
|
|
|
|
|
|
|
|
Re: 10..10..10 .. له الرحمه (Re: عبدالعظيم محمد أحمد)
|
الله يرحمو بعدد صفق الشدر
وعدد ذرات المطر
وعدد المياه الفى المحيطات واليحر
وعدد من كل حج او اعتمر
وبقدر ما زرع فينا من مفردات لا ولن يمحوها الزمن
ستظل ارث باقيا مدى الحياة
اللهم آمين يا رب العالمين
وتسلمى انتى يا اسويه يا وفيه واصيلة
| |
|
|
|
|
|
|
|
|
|
Re: 10..10..10 .. له الرحمه (Re: soma)
|
الاخت الحبيبة الرائعة
اسماء الجنيد
لك الحب وكل جميل يا جميلة
..
حكاية
في الزمن الموشّح بي سكين
وحربَهْ
والغيم المسافر
لَمّ دموعي خَبَّ
طلَّ الخوف ملفّح
بى حُزن الغلابَهْ
خلَّى الشوق مهاجِر
بين صمتي وعذابْها
اتْلاشَت مسافَهْ
مابين سيل وغابَهْ
مابين ضُل سحابَهْ
وبين وتر الربابَهْ
اتلاشت مسافَهْ
بين صمتي وعذابْها
فوق ايام حنيِنَهْ
مالتْ بي ضفيرَهْ
صَحّتْ موجَهْ نايمَهْ
زاد النيل دميرَهْ
مالت نخلَهْ
تهمس
لي موجات حسيرَهْ
عن أشواق أسيرَه
مامعروف مصيرهْا
يا غيـــم وين مسافــر؟
| |
|
|
|
|
|
|
|
|
 Re: 10..10..10 .. له الرحمه (Re: عبدالعظيم محمد أحمد)
|
الاخ العزيز عبدالعظيم محمد
لك التقدير والاحترم
فعلآ كان يوم جميل, انا حضرت بعض الكلمات عبر تلفون الاستاذ هاشم صديق
لكم جميعآ كل الاعزاز.
..
.
تاجوج
تاجوج بتكْتب بالشمال
منحوتَهْ في شكل اكتئاب
بتْكحَّل الإبل النحيلَهْ
بالمشاوير النبيلَهْ
وتعشِّي ضيفان القبيلَهْ
بالأناشيد الطويلَهْ
موهوبَهْ زي كل البنات
في الأسى المنْسُوج خيال
واتخيّلَت
إنو المُحلَّق حابَّهَا
تلجوج بتحْلِب من غيوم كسلا
المطر
وتوزِّع القش والشجر
بتفرِّق الهم والكدر
حفيانَهْ تجري ورا السراب
تاجوج بتكتٍب بالحراب
تاجوج بتكتِب بالشمال
وبتْرتِّق التوب والنعال
وتمْرُق الهم الموكّر
في قلوب كل الرجال
تاجوج سؤال
تاجوج غزال
تاجوج مُحال
تاجوج خيال
اتخيّلَتْ انّو المحلّق ساكّهَا
بي طريق شاقِي الغمام
يا يتامي
يا غلابَهْ
شوفوا لي تاجوج زمام
| |
|
|
|
|
|
|
|
|
|
Re: 10..10..10 .. له الرحمه (Re: ASHRAF TAHA)
|
تداعيات
========
يحيي فصل الله
============
تاكسي الحزن القديم
======================
مساء اليف من تلك المساءات التي كنا نتذوق فيها طعم الحرية ، مساء كان يحتفي بالشعر ، امسية شعرية بكلية الأداب
بجامعة الخرطوم ، كان ذلك في صيف 1987م من القرن الماضي ، تسللنا انا و الصديق الشاعر الراحل المقيم عمر الطيب
الدوش نشق طريقنا الي خارج الجامعة وسط جمهور محتشد من الطلاب ، أصر عمر الدوش علي خروجنا ذلك المبكر جدا عن إنتهاء
الليلة الشعرية ، هكذا هو دائما لا يحتمل المكوث فترة طويلة في مكان واحد خاصة اذا كان هذا المكان يعلن عن طقوسه
الرسمية ، عمر الدوش لا يرتاح إلا و هو في طقسه الخاص و المنفلت ، كان يجب ان نصل الي حي الموردة حيث اسكن و معي
الاصدقاء السماني لوال و عبد الله حسب الرسول ( الشماسي ) و يساكننا عمر الدوش بإنتماء حميم .
لم اكن اعرف امدرمان بتفاصيلها قبل رجوع عمر الدوش من براغ ، بعد عودته تعلمت خطواتي معه كيف تتلمس تفاصيل امدرمان
، هكذا كان عمر الدوش هو الصديق الذي وثق عندي هذه المعرفة الحميمة بامدرمان وهي معرفة تجعلني أعلن برغم عصبية
اولاد امدرمان انني امدرماني المزاج ، تري هل من الممكن ان تعرف أمزجة السوداني بالمدن و القري والارياف و اماكن
اخري لها ذلك التألف مع الذاكرة ؟ .
ها نحن قد خرجنا من الجامعة و نقف الان علي شارعها و لم يصبر عمر الدوش حتي يقلنا بوكس الي الخرطوم ومنها الي
امدرمان بل صاح بعصبية اعرفها - (( تاكسي ))
-((عمر نحنا ما عندنا قروش ))
- (( و انت مالك يا اخ.........ي ))
وقف امامنا تاكسي ودخل عمر مسرعا و جلس علي المقعد الامامي و جلست انا مترددا علي المقعد الخلفي وتحرك بنا التاكسي
بعد ان اعلن عمر الدوش بنفس تلك العصبية - (( الموردة يا اخي ))
- (( إنت مستعجل ؟ ))
- (( خالص ))
و ادخل سائق التاكسي شريط كاسيت داخل مسجل العربة و حين كنت افكر في كيفية الخروج من هذا المأزق ، مأزق إننا لا
نملك حتي شروي نقير كما تقول العرب ، إنساب صوت الفنان محمد وردي من ذاك الشريط الذي يبدو انه لم يكن في بدايته
(( بتطلعي إنت
من غابات
و من وديان
و مني أنا
و من صحية جروف النيل
مع الموجة الصباحية ))
تحولت عندها و بحرفية درامية الي الجانب الاخر من المقعد الذي هو خلف عمر الدوش مباشرة ، تحولت الي الجانب الاخر كي
اراقب وجه عمر الدوش و هو يصادف اغنيته الهارب منها دوما هكذا داخل تاكسي ، كان عمر الدوش قد خلع نظارته عن عينيه
و بدأ يعصر عينيه من دمع يلازمه عادة في حالات صحوه وحين إسترجع وردي نفس المقطع السابق بعذوبة مكثفة
(( و من شهقة زهور عطشانه
فوق احزانا متكيه
بتطلعي إنت من صوت
طفلة وسط اللمه منسيه ))
كان عمر الدوش يرتعش منه حتي الوجه و صاح في سائق التاكسي وتلك العصبية قد تكثفت اكثر
- (( اقفل المسجل ده يا ابن العم ))
- (( ليه بس ؟ ))
- (( بقول ليك اقفلو يا اخ.............ي ))
- (( اوامر يعني ؟ ))
- (( يا اخي ، انا ما عايز اسمع ))
- (( لكين انا عايز اسمع ))
اثناء هذا الجدال العجيب و الغريب كنت احاول ان استمتع بهذه المصادفة الورطة و لم احاول ان اتدخل بين عمر الدوش و
السائق المصر جدا علي الاغنية
- (( يا اخ...ي تقفل المسجل ده و لا ننزل ))
- ((جدا ، انزل ، اما انت غريب ))
و فتح عمر الدوش باب التاكسي وخرج بعد ان اوقف السائق العربة بفرامل منفعلة ، لم ارغب انا في الخروج من التاكسي
بينما وقف عمر الدوش امام التاكسي يأمرني بالخروج ، شملني سائق التاكسي بنظرة يحاول بها ان يعرف هل انا تاركه ام
مواصلا معه ذلك المشوار ، لازالت اغنية ( الحزن القديم ) متواصلة و كنت و كأنني احاول ان ادخل في خيالي نلك
الموسيقي التي تمهد للانتقال بين مقطع شعري و اخر ، ادخلها كموسيقي تصويرية تصلح تماما لهذا المشهد الدرامي
- (( انت نازل و لا اتحرك ؟ ))
قالها سائق التاكسي بينما عمر الدوش قد ترك مكانه امام التاكسي وقرر تركي ايضا و تحرك ماشيا الي الامام بخطوات
سريعة وعصبية و هنا قررت ان اتدخل و عرفت سائق التاكسي بمن هو هذا الشخص المعصلج ، عرفته بشاعر اغنية ( الحزن
القديم ) و الذي لا يحب مطلقا ان يستمع الي اغنيته هذي تحديدا ، كان عمر الدوش يهرب دائما من قصيدته هذي ، بينه
وبينها جفوة و نفور ، اذكر انه في ذات ظهيرة من يوم جمعة دخل علينا عمر الدوش حين كنا نسكن في حي ابكدوك ، دخل
علينا الدوش ووجدنا مصادقة نستمع لهذه الاغنية فتبرم بأهات واضحات و خرح منفلتا و لم يعد إلينا إلا في المساء، خرج
مرة عمر الدوش من استديو الاذاعة حين طلب منه المذيع ان يقرأ ( الحزن القديم ) خرح منفلتا وهاربا من قصيدته ولم
يعد الي الاستديو إلا بعد مفاوضات وصلت في النهاية ان ينسي المذيع امر هذا الحزن القديم.
لا استطيع ان اصور الدهشة علي وجه ذلك السائق و اتصور انه لم يصدقني في اول الامر و لكني جعلته يصدقني و انا اشرح له
موقف شاعر من قصيدة تخصه حتي جفوتها.
تحرك بي سائق التاكسي و لحقنا بعمر الدوش الذي كان يمشي بعصبية امامنا ووقفنا الي جانبه و صاح به السائق
- (( اهو قفلنا المسجل يا استاذ ، اتفضل ))
ونظر عمر الدوش نحوي نظرة توحي بأنه عرف اني قد شرحت امره للسائق و ابتسم إبتسامة خفيفة وفتح الباب الامامي وجلس
علي المقعد و نظر الي السائق نظرة فيها من الاسف و الحنية معان وقال - (( معليش ... لكن اهو ما عارف اقول شنو ))
- (( و لايهمك يا استاذ ))
ودخل عمر الدوش مع سائق التاكسي في أنس حميم جدا الي درجة ان هذا الانس قد تواصل بقية ذلك الليل ، بل حتي الصباح
وذلك حين تحول ذلك السائق الي منتج لكل تفاصيل تلك الليلة و بدلا من ان يأخذ ثمن المشوار من جامعة الخرطوم الي
الموردة فقد اخذ سهرة ممتعة و متداعية مع هذا الشاعر الذي يهرب من قصيدته.
كان علي ان انام في تلك الليلة داخل ذلك التاكسي حتي احرسه من اللصوص و حتي اوفر سريري لذلك الضيف الجميل و حين
تمددت علي المقعد الخلفي داخل التاكسي ، تذكرت و إمعانا في تحسس دراما ذلك الموقف ، تذكرت ان علي ان افعل شيئا
لذلك تحركت و دخلت البيت وحملت معي جهاز كاسيت صغير كان بحوزتي و رجعت الي التاكسي واخرجت ذاك الشريط من داخل جهاز
التسجيل بالعربة و ادخلته في المسجل الصغير و تمددت علي المقعد الخلفي مغمض العينين وضغطت علي زر التشغيل و المسجل
الصغير علي صدري
(( و تمشي معاي و تروحي
و تمشي معاي وسط روحي
و لا البلقاهو بعرفني
و لا بعرف معاك روحي ))
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: اسيا ربيع)
|
ضلمــــــــــت
أقـــول
والشمْسِ في عِزّ الامل
تُهْتَ ومشيتْ
أقول يا نحن يا انتو و
بكيتْ
يا مواعيد
يا صباح من غير وسِم
تُهْتَ ومشيت
ما ضَلّمَتْ
ما بْتَعْرِف الزول البِجِيك
ولا البِجيكَ
بيعْرِفَك
حتى الشبابيك
والزوايا الكان بِتَجْمَع
في حنايا الشكوك
ضلّمتْ
أغْشاكِ يا نفسي الغريبَهْ
من همومي اطلِّعِك
القاكِ واقْفَهْ على الطريق
أحزان بِتفْرح
وتشْتبِك
أفراح بِتحْزَن
وترْتَبِك
لمّنْ رحلتَ مع الغُنا
عِز الأماني و
ضلّمـــــت
مَدّيتْ على الأمل القريب
أشواق كتيرَه و
قَصّرَتْ
في زاويهْ من ضُل الشجون
جابتْ ظُنونا و
قيّلَتْ
كلّمتَ أشجار الخريف
عن شوق نَمَا
في الوحشَهْ والزمن الأسيف
دلّتني اْفتِّش
في المغارِب
والمشارِق
عَن علامات
أو رصيف
ترقُد الأزهار عليهو
يا بنفسج
كُحْلي غالي
وبُتقالي
امشوا انتو
أنا البقِيف
ما ضلّمَـــتْ
شكرا أسيا لهذا الوفاء وتعيشي سيدتي.
................................................................................................حجر.
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: اسيا ربيع)
|
الذكرى العاشرة في يوم 10/10 احتفى الجمع بالذكرى العاشرة لرحيل الشاعرالفذ عمر الطيب الدوش
تحدث بداية صديقه صلاح العالم في أكمل صور الوفاء
ثم الشاعر هاشم صديق والذي أكد على سمو العلاقة بين الشعراء الحقيقيين... متحدثا عن الراحلين المقيمين .. رغم وجود المقيمين الراحلين
فاضت مشاعر الأستاذ عادل حربي وهو يقاوم عبراته في تداعي ذكرياته و"ضارب الرمل"
غنى الشباب أغنيات الدوش وكان ختامها
مهما هم تأخروا فإنهم يأتون...............
فإنهم يأتون
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: اسيا ربيع)
|
Quote:
(( و تمشي معاي و تروحي
و تمشي معاي وسط روحي
و لا البلقاهو بعرفني
و لا بعرف معاك روحي ))
|
رحم الله الشاعر القامة
عمر الطيب الدوش
واسكنه فسيح الجنان
زرته مع خالي وصديقه
القاضي / بابكر مكاوي
يوماً بمدارس الدوش بأمدرمان
وكانت جلسة ما منظور مثيلة
طاف شاعرنا ومولانا بابكر بذكريات
مختلفة وكنت مستمع جيدومستمتع محظوظ
أللهم ارحم عبدك عمر الطيب الدوش
امين امين امين امين امين امين
مع جزيل ودي لأسيا ربيع
وخالص التحايا لأصدقاء ومحبي واهل شاعرنا الكبير الفقد
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: 3mk-Tango)
|
تداعيات
========
يحيي فضل الله
===========
صباح الخير ـ سلامة البيه
--------------------------
نهايات اغسطس من الثامن و الثمانين من القرن المنصرم استقبلتنا القضارف بخريفها المترع ، وصلناها عصرا ، كان عصرا تشع نداوته و يتباهي برائحة الدعاش ، استقبلنا
وفد من الاخوة المعلمين من اعضاء لجنة النقابة بالقضارف اصحاب الدعوة لاقامة ليلة شعرية في دارهم ، كان معي الشاعر الصديق عمر الطيب الدوش ، اهدتنا القضارف
بعد وصولنا الي حيث نزلنا بميز المعلمين ، اهدتنا ليلة مطيرة لها من البروق كرنفالات مضيئة و من الرعود ذلك الهدير الصخاب كان عمر الدوش في تلك الليلة في احسن حالاته و
متحالفا مع نشوته العميقة ، تلك النشوة التي يذهب بها نحو الديمومة ، يهرب عمر الدوش دائما من مغبة فعل الحياد ، كان في تلك الليلة يوزع ضحكاته الصاخبة علي الجميع ، كان
اولئك المعلمون يخصوننا بنوع من تلك الالفة و الحميمية العالية ، التفوا حولنا و حركوا فينا بإلحاحهم العذب إلفة ان ننتمي للشعر و لم يملك عمر الدوش ـ الذي كان دائما ما يهرب
من إلفته العميقة مع الشعر لانه لا يحفظ اشعاره ـ لم يملك مع ذلك الالحاح العذب الا ان ا يخرج كراسته و ينحاز الي قصيدته ، لا زلت اذكر صوت عمر الدوش و هو يقرأ علي
الحاضرين قصائده و قطرات المطر وهي تسقط علي زنك السقف و كأنها تدس اصواتها الصاخبة و الهادئة احيانا في نسيج المقاطع الشعرية التي يسربها صوت عمر الدوش
المشحون بالشجن ، اذكر ان احد المعلمين قد سأله عن قصيدة لها اثر واضح في تكوينه الشعري، فأشار عمر الدوش الي الحاردلو و قرأ علي الحاضرين هذا المقطع الشعري من ذاكرته
(( يا خالق الوجود
انا قلبي كاتم سرو
ما لقيت اليدرك المعني
بيهو ابرو
قصبة منصح الوادي
المخضر درو
راحت قلبي تطوي
و كل ساعة تفرو ))
و هكذا تحالف الليل المطير مع الشعر و الانس الجميل .
عادة ما يستيقظ عمر الدوش مبكرا جدا و كأنه علي موعد ازلي مع الفجر ، الفجر في اي مكان ، في حي الموردة عمر الدوش كان دائما يوقظني لنتابع اصوات المؤذنين لصلاة
الفجر ، كان عمر الدوش يعرف عدد المؤذنين في المنطقة و يكاد يعرف عدد الديوك و هي تتصايح معلنة قدوم الفجر و له ثلاثية مسرحية عن هذه العلائق و هي ثلاث مسرحيات
قصيرات تحت العناوين التالية ، زمن الديكة وزمن الكلاب و زمن ثالث لا اذكره لعله زمن الأذان ، للفجر مع عمر الدوش له تلك العلائق التي تشير الي بداية الحياة.
هكذا مبكرا جدا ايقظني عمر الدوش كي نتجول في صباح القضارف الندي ، عمر يتلبسه ذلك القلق الذي يبعث علي الحركة و له قدرة ان يحرك كل من و ما حوله ، قادتنا خطواتنا ذات اللاهدف الي احد احياء القضارف ، دون قصد وجدنا اننا نتجول في حي له اسم غريب ، حي ـ سلامة البيه ـ كان عمر الدوش قد سأل احد المارة عن اسم الحي الذي نحن فيه وحين اجابه الرجل بدأ عمر الدوش يتساءل عمن هو هذاـ البيه ـ و يضحك بخفوت متهكم قائلا
(( وسلامتو من شنو؟ ))
سلامة البيه ، الصباح فيه مختلف ، حركة دؤوبة ، بيوت القش تبدو و كأنا تحاول ان تنفض عنها امطار الليلة السابقة ، ازقة ضيقة يصعب فيها المشي بسبب لزوجة الطين ، خلع عمر الدوش نعليه و لم املك انا الا ان افعل ذلك ، دخلنا بيوت و خرجنا من اخري وعمر الدوش يبحث وبالحاح جميل عن نشوته الصباحية تلك التي لا تستقيم الحياة بدونها، هكذا دائما عمر الدوش منتم الي تألفه الخاص مع الحياة ، هارب من الثوابت الاخلاقية ، عاري الرغبات التي لا يكبحها كابح ، هو ككلمات قصائده حاضر في مطلق التفسيرات ، داهمتنا الظهيرة و نحن نتجول في حي ـ سلامة البيه ـ و عمر الدوش لم يجد حتي الان الاجابة عن من هو ـ البيه ـ و سلامتو من شنو ؟
بقلق خاص تجاه اصحاب دعوتنا بدأت احرض عمر الدوش علي الرجوع ، الرجوع الي ميز المعلمين و خاصة انهم لابد و قد افتقدونا و لكن عمر الدوش يصر علي البقاء متجولا
بين القطاطي و الرواكيب و الكرانك ـ حاملا نعليه بين يديه و كذلك أنا ، عمر الدوش حافيا بين الناس مصطادا حكاياتهم و احلامهم و معاناتهم و كلما الح عليه في الرجوع
يجابهني عمر بهذه الجملة ـ (( يا اخي عندك شنو هناك و بعدين لازم نعرف البيه ده منو و سلامتو من شنو يا اخ.....ي ))
و بعد الحاح شديد و ممانعة اشد رجعنا راجلين الي الميز و نحن نحمل نعلينا في ايدينا و فعلا وجدنا ذلك القلق المنطقي علي غيابنا و في المساء كانت الليلة الشعريه في دار
المعلمين و كما استقبلتنا القضارف بخريفها المترع كذلك استقبلتنا بجمهور حميم تجاه اشعارنا و بذلك النقاش الحي حول تفاصيل تجربة القصيدة الغنائية الجديدة .
في صباح اليوم التالي و علي البص المتحرك الي الخرطوم ، في الثامنة صباحا اخذنا مقاعدنا بعد ان اهدانا اولئك المعلمون ضجة من طقوس الوداع ـ قبل ذلك و مع صراع الخيط
الابيض مع الخيط الاسود من الفجر ايقظني عمر الدوش وقال لي ـ ((ما نمشي نسأل عن البيه و سلامتو من شنو ))
تحرك بنا البص و صوت مغن يدعي ـ بلال موسي ـ كان يجرح تاملات عمر الدوش الصباحية
(( القمر خالا و عمها
و الشمس تشبه امها
العزيزة عزيزة امها
في القضارف يتم سعدها ))
وحين كان عمر الدوش يتحدث لي و بمتعة عن طائر البطريق و كيف انه يختار زوجته بان يحمل حجرا و يضعه امامها فاذا اخذت الحجر فمعني ذلك انها قبلت به شريكا لحياتها و
اذا رفضت فما علي ذلك الطائر الا ان يبحث عن قصيدة يكتبها علي طريقة شعراء الخيبة العاطفية في السودان و عمر الدوش كان دائما ما يقذف في اتجاهي بذلك السؤال الحميم
(( اها يا اخوي حجرك جادعو وين الايام دي ؟ ـ))
وذلك استنادا علي مرجعية تخص طائر البطريق
كان عمر الدوش يسقط احتمالات عشقه علي طائر البطريق حين دوت صرخة حادة من داخل البص ، شابة يانعة تصرخ و تولول و هي تحتضن بعنف امها التي فارقت الحياة و هي جالسة علي مقعد بقربها ، اوقف السائق البص ، اختفي بعد ذلك صوت المغني بلال موسي، ارتبك الحضور، كنا قد اقتربنا من محطة ـ الخياري ـ ، الشابة تصرخ ثآكلة و
تعاون الجميع تجاه هذه المآساة و تم نقل الام التي ماتت بعد ان جهز بوكس كاشف لارجاع الجثمان الي القضارف كانت صرخات تلك الشابة تكثف في دواخل جميع ركاب تلك
الرحلة غرابة معاني الموت المفاجئ .
نقص عدد الركاب و خلا مقعدان في البص ، مقعدي الام وبنتها وتحرك البص ، همس لي عمر الدوش حين تحرك البص
((تفتكر السواق حيشغل المسجل ؟ ))
كنت لا املك الاجابة ولكن كان عمر الدوش يبحث عن نسيج درامي خاص لهذا الموقف ، ولم تمضي ربع ساعة علي تحرك البص حتي عاد صوت بلال موسي ممتهنا ـ عبد
العزيز داؤودـ في اغنية المنديل
(( او تذكرين حبيبتي
او ربما لا تذكرين ))
و برقت عيون عمر الدوش منحازة الي الحياة
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: اسيا ربيع)
|
إليْكَ في مرقدِكَ بعد عشرِ سنين أيُّها الأمير / عمر الطَّيِّب الدوش ..
لا دمعَ يبكيكَ ولا حِبْرَ يَعْدِلُ وصفَكَ .. يا جميل ..
غَيَّبَكَ عَنَّـا يـومٌ تأنَّقَ في المجيءِ فكانَ يومًا
أفدَعَ الرِّجْـلِ لَجُوجْ ، وإنَّ حرفَـكَ القضيَّـةَ لمْ يزلْ باقٍ فينا ؛
وشخصُكَ العارفُ بماهيَّةِ الكتابةِ لا يَحُدَّهما سقفُ
تصويرٍ بخيالِ شاعـرْ ، لكنَّها مُفارقَةُ الحروفِ التي
باتتْ فينا سنَّةً يُؤكِّدُها الرَّحيلْ ..
فترفَّقْ يا مَوتُ بِمَنْ نُحِبُّهُم فقدْ عَزَّ علينا دواؤكَ ،
ولَيْتَكَ أخذتنا نيابةً عنهم فإنَّـا لا نَملِكُ
من الأهميَّـةِ ما يَجعَلُ أحدًا يفتقدُنا بذاتِ
الهَيْجَـانِ والجَـائحـة من شـِدَّةِ
الفاجعـة وهَـوْلِ الفراغِ الَّذي تركَهُ
المَفْقُودْ ..
فلكَ المغفرَةُ ما حيينا بحرفِكَ
الميلادِ فينا ..
الأُختُ الأُستاذةُ / آسيا ربيع ..
تحيَّةٌ لكِ وللدُّوشِ في قبرهِ المَسَرَّاتُ
والرَّحماتْ ..
احترامي ..
أخوك / محمَّد زين ...
__________________--
* والتَّحيَّةُ عبرَكِ إلى العزيز / هشام حسن بدر سليمان ( هشام حجير ) .. ( من أبناءِ المتمَّة ) ..
فهوَ من أقرباءِ المرحوم الدّوش ؛ وقدْ روى لي الكثيرَ عنهُ وعن حياتِهِ الحافلةِ بالجمالْ ..
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: محمَّد زين الشفيع أحمد)
|
كنت سعيدا وفخورا بان اكون مخرجا منفذا في رحلة عبد الغفار وهي اخر مسرحيه للفنان الدوش . فمسرحيه ياعبدو رووق من اجمل المسرحيات ذات الفصلين تحكي معناة شعب بسيط في قالب استعراضي كوميدي.
الممثلون وليست حسب الظهور:
عبد الحكيم الطاهر.
ربيع طه.
طارق علي.
تهاني عبدالله.
عبد الحكيم عامر.
محمد صالحين.
نفيسه طه.
عبد السلام جلود.
واتخيل لي ناقص واحد لو اتذكرتو بكتبو ليكم.
الكتيابي مديرا للانتاج.
مساعد مخرج:مجدي عوض صديق.
الموسيقي والالحان الفنان:حمزة سليمان
المخرج المنفذ:محمد عليش
الاخراج:عادل حربي
من اجمل الالحان في المسرحيه اغنية البداية:
طلعت شمس من مرقدا
نبتت ملايين العروق
لاانت قادر توصلا
ولا هيي قادرة علي المروق
ياعبدو رووق
الدنيا شوق
لحن كان اجمل مافيهو تداخل اصوات اممثلين مع الرقص والاستعراض
ساحكي لكم كيف كان الدوش مواظبا علي المسرحبه وعادة مايحضر الي مسرح الفنون الشعبيةقبل الممثلين بي ساعه وكنت دايما بكون علي خشبة المسرح اكرر حركه الممثلين بالخشبه لااحفظها .
ساعود
محمد عليش
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: khatab)
|
(فى كسرا لتحول ..
من فراشه لى يراع..
يراعه ..لى فراش ..
ظل ا لفرا ش الذى كان ،
لى خليل فرح بدرى /
عمر ا لطيب ا لدوش/
يحلق..
فى ا لمسافه ا لتى كان يشقها ،ترام أمدرمان
من منتصف ا لسوق، حتى شاطىء ا لنيل ا لغربي
..موقع،حديقة الريفيرا لاحقآ،
التى هى ..على مرمى حجر،
من
بوابة
عبد ا لقيوم.،
هنالك تكون نهاية رحلته ،
ليعتلي ركابه المتجهين للخرطوم ،
سقالة المعديه البخاريه ، التي
مرساها المقرن، ليستقبلهم
ترام الخرطوم، الذي سيقلهم ،
إلى قلبها..
حيث تنتهى رحلته هناك ......
..إذآ ..
ظل الفراش الذي كان ..
للخليل/ الدوش ..
يحلق فى فضاء ا لمرحله التراميه - الأولى -
... وسيمة السيره ...
..........................قدله يامولاي
...حافي
..حالق
..با لطريق الشاقي
الترام..
*************
(..صباح الجمعه..داخل الترام ،
ا لخليل جا لس .. مع صافرة ا لتحرك ،
يطل ا لد وش ،..محييآ..)
عمر:..فلق ا لصباح ..
(..يقف ا لخليل ..مرحبآ..)
خليل:.صحية جروف ا لنيل ياخي
عمر:.صحية جروف النيل..أ فندينا..
خليل:.أهو نورك لاح أخيرآ..الترام كان
على وشك ا لتحرك..
عمر:.حاسبنها بالثانيه..أ فندينا..إذا كان
ابراهيم زكى.
ومستر هوكس..ممكن إستوضحوك فى
تأ خرك ثلا ث دقايق .!! أ فندينا
..معقوله نحن نفوت – زمن ا لترا م.!!
خليل:.زكى و هوكس ..معزورين يا عمر..
ليهم أ سبابهم ،
لاسع ضهرهم سوط ا لغنا..
عمر:.وا لشغل كل يوم من سته و نص..
عدا ا لجمعه،من تسعه صباحأ..
خليل:. عشان زيارة الأهل فى أم د ر...
عمر:..وا لنجبا ا لحوا زق..طبعأ !!!
خليل:..ا لشغل كان كتير..لذا ا لشغل
كان مقسم..أ فندينا..
(..يضحكا ن..)
عمر:..عشان كده
ما في طريقه يفوتنا ا لترام ،
نحنا ا لبينا تنا معاك..زمن ا لرحله..
(..يجلسا ن..)
خليل:..
كيف
لون ا لفرح!!
عمر:..وين مع ا لحزن ا لمقيم ده !!
أ فندينا ..
خليل:..يا بلادي كم فيك حازق ..
عمر:..غير إلاهك ما أ م رازق..
خليل:..من شعاره ..
د خول ا لمآ زق ...
عمر:..يتفانى وشرفك تمام ..
خليل:..ا لبطن بطرانه
عمر:..ده شعب أ وسطه..زيما قا ل محجوب..
خليل:..كلكم نجبا وفصاح ..
رؤيتكم لوطنكم ماهله..
كلكم نجبا وحوازق ....
عمر:..أ فندينا.!؟ .....
خليل:..نعم ..
عمر:..علاقتك با لصباح .!!
خليل:..جوهريه جدأ ..
ا لدهب لو ما جليته ،
..ما بصرح بجماله للعين .
عمر:..فلق ا لصباح ..
عزه
قومي ..كفا ك نوم .،
صح ا لنوم ..محبوبي نا يم ..
خليل:..صح ا لنوم..
عمر:..ا لخولي حايم..
و صباحات كتيره..لحدي ....يلاا ننظر ..
شفق ا لصباح ..!!
خليل:..ا لصباح...مرتكز أسا سي ..
لي حركتنا كلها..
ا لغشاوه ،
..التركتها هزيمة-ا لثوره-ا لمهديه ،..
و رجوع ا لمستعمر ،
أكثر شراسه..
ا لغشاوه دي ..
كان لازم تزول..
لابد تنزاح.،
ا لعيون ،..تحس با لأكلان..وتندعك ..
..درجة ا لفتيح..
عشان تقدر ،
تشوف..ا لواقع ،بوضوح وتصادم ..
عمر:..
قوم و قوم..
كفاك يا نا يم،
خليل:..
شووف
وشووف،
عمر:..
حداك..
يا لايم.
...
فنى:..شايف ا لشايفو ..أنا ده.!!!
فنى:..شايفو لكن ..ما قادر أجمع!!
ده منو ا لشايل ا لعود !؟
فنى:..ده(الأحمر)*..مراقب ا لترام يا معلم ..
فنى:..عمك قاصد ا لخليل عد ييل.!!
فنى:..وأ فندينا يا صاحب،..بستلم ا لعود..
فنى:..ا ليله هوي يا ليل..و..ديل منو يا خوي.!!
فنى:..ديل حضرة ا لركاب يا صاحب..
إنفتح ا لترام علي بعض ..يا للهول!!
فنى:..ده ..ترام وللا .. إ كروبولس.!
فنى:..علمى علمك يا فرده ..فى زمن ا لرحله..
ما علينا سوى ا لرصد ..
با لذات ،،
حقول ا لكلام..
فراشه كانت ولا يراع..
فنى:..أ فندينا بوزن فى ا لعود..ا ليله هو..
فنى:..بعدين با لمنا سبه..
فنى:..
..يا ليل
فنى:..ده..قصدي ا لمفتوح ده ..ما حقل كلام عادي
ده .. حادث في زمن ا لتحول ..
زي يوو ..وزي ا لإلتماس الطارئ واحد..فنحنا..
فنى:.. يا حبيب اللون..ا لزول ظبط ا لعود!!
حيغني فعلآ.!!
فنى:..يغنى ..ا لزول ده ..في طريقه للمكتب .!
وزمنه با لكاد أ كتر من مضغوط..
فنى:..كدي..خلينى أ نا..عاين براك!!
فنى:..كلامك صاح،
خش فعلآ..فى ا لشرف ا لبازخ ..
فنى:..خش ساكت ..ده قرب.. إمرق فى ا لمورده..
فنى:..طرب ا لركاب ..حامينى ا لشوف..
فنى:..ا نا سا مع صوت ا لدوش..
فنى:..أ خيرآ.. لميت ليك فيهو ا لخليل..
(..نسمع صوت ا لخليل منشدآآ ..
مجد ك ولى
وشرفك ضل
وإمتى تزيد..
زيا دة ا لنيل..
فنى:..كلام ا لدوش..
أكثر وضوحآ ا لآن ..
(..وكان ا لنيل آ خذآ..فعلآ
..فى ا لإزدياد..
على إثر ا لتنظيم الأول..
جمعية الإتحاد ا لسودانى..
ا لخليه ا لأولى..
..عبيد حاج الأمبن
..توفيق صالح جبريل
..جما ل محى ا لدين أبو سيف
..إ براهيم بدرى ..و سليمان كشه..
و تطرد ا لخلايا..
آ خذآ النيل كان .. فعلاً في الإزدياد
حين تكون ،..و مباشرة،
..ا للواء الأبيض..
،،
لفعل الثوره...
..حيث إلتقت أيادي ..
..عبيد حاج ا لأمين
..على عبد ا للطيف
..صالح عبد ا لقادر
..حسن ا لمطبعجى
..و حسن شريف ..كخليه أولى، لتتكاثر..بعدها ا لخلايا..
إتحادآ و لواء، وتزدهر الأغانى، على أفواه ا لمنا ضلين..
فعلآ، وهتافات
........
فنى:..القصه ربت يا معلم.!!
فنى:..( ملاحظ حاجه ..!
فنى:..( ماذا!؟؟
فنى:..(صوت ا لعود !!
فنى:..(..لا أدرى..لكن!
فنى:..( ..ماذا.!!
فنى:..(..كأنه معزوفآ يأتى..من قبل ا لترام!!لا ا لخليل.!!أو هذا ما أسمع..
...مجدك ولى ..
...وشرفك ضل،
..وإمتى تزيد !
زيادة النيل.
**********
فنى:..(..حاجه تا نيه ..دايرك ،..كدي دقيقه..أيوآآ..دا يرك تلاحظه معاي ..
فنى:..(..يا خوي كدي دقيقه..!!
فنى:..(..فى شنو..!
فنى:..(..ملاحظاتك دى يا فرده..مرقتنا من ا لدنيا و سقطه
..ما تعمل فيها..ا لود ما ناقش.!..
فنى:..(..ناقش و نص.. بس إنت .. عاجباك ا لربه.. كدي كحل بي جاي .!
فنى:.(..أكحل شنو..صوت ا لدوش طش ..ا لترا م يا هو زاتو..فى أي جمعه!
(..ا لخليل..لا بعزف..لا بغنى..
(..و ياهم..الاتنين ..
(..إ نضموا نضميهم زاتو..أ لكنا متابعنوقبيل..!
فني:.(..متأكد إنت..يا هو نضميهم.. ا لكنا متا بعنو..قبيل.!!
فنى:.(..إ يه ا لجد ..عشان نتجارى ،.. بين ا لقاهره و جده!!
فنى:.(..حلوه ..لكن دايرك تركز معاي شويه..
فنى:.(..دي علي وزن خلي قلبك معاي ولا شنو!!
فنى:.(..سربعه لا..
فنى:.(..طيب..دا يرك تعاين معاي للركاب ..
فنى:.(..منتظماهم حالة طرب خرافيه يا رجل!
فنى:.(..إ نفتاح ا لترام..الإكروبولوس زيما قلت..
(..ا لمراقب ..ا لعود..ديك لحظه بس، نحنا ا لإصطد نا ها..
(..ا لدا يرك تلا حظه ا لحين..
(..ا لآ تي.. أهو ا لترام خاشي ا لمحطه .. ركز معاي علي ا لركاب..
فنى:.
(..طيب وقف ا لترام . . الخليل | الدوش يتصافحان مودعين
خليل:.. فى ا لضواحى..
عمر:..و طرف ا لمداين..أ فندينا..
(..ينزل ا لخليل..
(..ثم ، يتوالى نزول ..و صعود ا لركاب.. )
..
*
*
كان من الجمال أيراد هذا النص .. فى مقام الصديق عمر الطيب الدوش
لما له من مكانه خاصه بالنسبة لى ..
وبما له من مقام , فى سُدة ِ
كتابة الدراما ..
أداءها .. ناصية التمثيل , وتدريب المتعلمين ,
مراتب التأدب فى تلقيهاكعلم , ناحية الإخراج ,
.
.
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: khatab)
|
اسوية
يا سر مكتوم فى جوف اصداف
قتشت عليه بقليب نزاف
لا خبير يهجى ( يهدى) لا دليل وصاااااااف
اسوية يا بت ربيع و.....انت كل الربيع ... واخضرار الزرع
وزركشه الزهور ...... !!!!!
اقرأءك ما بين السطور و.... مسافات النقاط وعلامات التعجب الاكثر عجبا ...!!!
هل تفى وتكفى مفردة مشتاق وحدها ؟؟؟؟؟؟؟؟؟؟
شكرا عميقا والدوش فى حضرتنا ....
المكلوم
قاسى المهداوى
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: قاسم المهداوى)
|
الأستاذة آسيا الربيعية:
تعجبني إلتفاتاتك الرائعة لمن هم بيننا حتى هذا النفس الطالع ونازل
يكفيه أنه جعلني أنام على الحزن القديم
وأصحو بالود
وما بينهما تنشعب كل حياواتي
وبينما يقف الدوش شامخا لم ولن يموت
لك صباحات من بلدي ندية تغشاك و
يدوم ودي لك
بهاء/طوكيو
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: اسيا ربيع)
|
الحان الربيع (في معرض الزهور)
ليك سلام وتحية
ولذكري الراحل المقيم التجلة و الاحترام
ولكل اصدفائة الذين مروا من هنا بكل هذا (الحزن القديم) النبيل...
التحية و الاحترام لهم جميعا سلمي ويحيي وخطاب والآخرين وهم يخلدون ذكراه بهذه الذكريات العطرة
ونحسدكم على خصوصية علاقتكم بالراحل العظيم...
Quote: يوم 10 شهرى 10 مصادفة غريبة فعلآ
ولد عمر الطيب الدوش في مدينة شندي1948 |
وأنا أسمي عمر
ومولود يوم 10 شهر 10
وبرضو مولود في مدينة شندي
(مصادفة أخري)
وغني يا طيور غني
(بالعجمي)
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: ALGARADABI)
|
Quote: وأنا أسمي عمر
ومولود يوم 10 شهر 10
وبرضو مولود في مدينة شندي
(مصادفة أخري) |
أتذكر يوم مولدك كأنه حصل أمس
كان الحضور ينتظرون قدوم أثنى وكانت طلتك صراح ذكر
وقرابي
لكن حسب ماأذكر أنه كان يوم الخميس 9/10/
الساعة 12 و10 دقائق
صاح والله زي ما قلت يوم أول خمسة دقائق في يوم 10 أكتوبر
تحياتي صاحبت البوست المودة لك القردابي
| |
|
|
|
|
|
|
|
|
 Re: 10..10..10 .. عمر الطيب الدوش له الرحمه (Re: خالد علي محجوب المنسي)
|
يا سلام ه
يا سلام .. الأمير الدوش هو ابننا البار .
تطول عنه الحكايات .
فهو
ينبوع الشعر الهادر .. نعم
الدوش كان يستخدم حروفا من ( كركجى النيل ) حروفا من الطين
لتقرأوها العصافير
قصائد كالطبيعة . تحمل رائحة الأرض
وأشواق الناس .. والحلم ..
ياسلام .. يا سلام ..
رحمه الله وأجزل ثوابه . لقد افادنى واعاننى كثيرا قبل خروج كتابى
( فجر الفرح )
| |
|
|
|
|
|
|
|
|
|
Re: 10..10..10 .. عمر الطيب الدوش له الرحمه (Re: khatab)
|
العزيزه اسيا ربيع
سلام واحترام
عن شاعرنا العظيم عمر الدوش
ماحكاه شاعرنا الله يديه العافية هاشم صديق
قال ضمن ماقال شيئا مهما عن " نحن نمشى فى جنازة المطر"
المسرحية مشروع تخرج الدوش من المعهد
وربما قال شيئا عن النص ومع من يمكننا ايجاده
كنت فى خيط سابق لهذا الخيط قد تسألت عن نص المسرحية اعلاه
ارجوا لوامكن اذا وجد نصها ان ترفدينى بنسخة لو وجدت
ساكون شاكرا
لوتوفرت الامكانية سيكون ذلك مذهلا
سلام
| |
|
|
|
|
|
|
| |
اسيا ربيع
سلمى الشيخ سلامة
Muna Khugali
حسين محي الدين
JAD
عصام علي أحمد
خالد علي محجوب المنسي
أحمد طراوه
مجاهد عيسى ادم
ASHRAF TAHA
Yahya Fadlalla
ريهان الريح الشاذلي
الرفاعي عبدالعاطي حجر
Ishraga Haimoura
عبدالوهاب علي الحاج
عفاف ابوكشوه
سيف بخيت موسي
Azhari Nurelhuda
رأفت ميلاد
محمَّد زين الشفيع أحمد
Mohamed Ahmaed Olyesh
khatab
قاسم المهداوى
Baha Elhadi
ALGARADABI
Osman Musa
سامى عتبانى
محمد عكاشة
فيس بوك
تويتر
انستقرام
يوتيوب
بنتيريست