لم أتأكد من شاعر القصيدة حتى أوفيه حقه الأدبي.. معذرة..
آه يا زمن الرَّكْشَه... أنّة شعر و شاعر وشعور صادق.. انة قراءة في عصور الظلام زمن الرَّكْشَه!
آه يا زمن الرَّكْشَه... زمن الفوضى العَمْيَا وطَرْشَا وزمن الوَهَم العَسْكَرْ فى البلد الغَش بلاد الناس الغَبْشَا.. الناس الجاريه الدَّاقشه شن لاحقين؟ الشُّغُل العاطل وَلَّا الأمل الطَّشَّ؟َ و ّلا سراب المليونات و رهاب العربيات الرَّقشه؟ الموهومين الما شايفين هم وين فى الهَرَم الكَشَّ الكوم الفوق اتركَّزْ و حَشَّ و هُمْ أكوام أُمْ فِتْفِتْ وعَفْشَه ماكلين ألغام و كلام يِنْدَشَّ مغشوشين فى العيش و الفول و التِبْشَه ومغشوشين بترول إنْقشَّ ومغشوشين فى حِلْماً راح و انْكَشَّ مغشوشين فى المويه الزرقا وغَبْشَا و حتى كروت الكهربا غَشَّه بيوت السكن "الشعبى" العامر غَشَّه بيوت السكن "الوطنى" الفاخر غَشَّه ومكشوشين فى الدِّين البَيِّن كَشَّه و مغشوشين فى حروب و سلام
10-11-2010, 10:08 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
ومغشوشين جامْعَات أوهام.. قارِيْن الطب فى خلوة شيخ لا معمل لا تشريح لا مرجع لا تدريب لا دَوْشه و بكره الواحد دكتور و عياده و نَفْشَه و أمسك أقطع كبده و كرشه
و فى زمن الركشه لا شايلين هَمْ لى بلد إتفرتق لا شايفين بترول بتدفق لا حاسِّين بالنار بِتْبُق لا هم ضايقين التَّشه مشغولين "رَكْشَات" و "التِيشَيْرْتات" "الدِيجِيْتالات" و مَلْهِيين "برصيد" و "شرايح" و "موبايلات" و "المِسْكولات" و "بالتشكسات" و "الكافيتيريات" و "المُنْتجَعَات" "النِسْكَافَيْه" و "النَتْ كَافَيْه" و "مسلسلات" و "باشا" "بيه" و مكتولات و مكتولين و هم ساكتين تمكين و شريعه و هَرْشَه و الناس الفوق بانين أدوار.. عاملين أسوار.. طالعين أحرار..نازلين أحرار.. لامعين أنوار خَاتِيْن الخَرْشَه خَالِّين الشارع للفايرين ذى نمل السُّكَّر.. للحايمين ذى ###### الحَر.. و للطايرين ودَّ ابْرق و عَشَّه
10-11-2010, 10:11 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
لو ماشين كدارى تقول ما راكب زول كل الدنيا كُرَاعَيْن مَاشَّه و لو راكبين بتشوف الشارع وَرْشه "الأمجاد" تتراجف ذى القشّه و "الحافلات" فى حُفر المويه قِرِنتى و قِرْشَه و تلقى "جياد" تِتَّنَّى و ناسْيَه قروض البنك الغَشَّه و الطيبين راكبين خازوق لا هم لاحقين الناس الفوق لا هم بالدخل الشهرى الممحوق تامِّين أقساط البنك الدُّقْشَه و منهوكين بى "ربا إسلامى حلال" و بنوك الناس الفوق راسمال بفتاوى شيوخ السوق يتوَشَّى مُضاربه مَرَّه و مَرَّه مُشاركه والشيكات تتطاير طاشَّه و مافيا السوق تِتْمَكَّن سرقه ولطشة آه يا زمن الركشه و ما أدراكْ ما الركشه
10-11-2010, 10:12 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
الركشه كُدُنْدَاره و عَمْشَا تطير و ترِك محل ما تدور البيت . فى راس.. فى أقرب خور.. أو فى راس الزول كان قال يِتْمَشَّى سايطه الشارع ذى الكَمْشه بتطلع داقشه و تنزل داقشه و السَّوَّاق بس كابتن طياره.. مَهَنْدَم و آخر حَشَّه و الطبلون مرصوص بالنَّدْ و فتايل ريحه و فُرشه " و مَكَوَّم سِيْدِيهات" بالدُّقشه
الغُنا مصرى و سورى و "زَفَّه" و "دَبْشه" "نانسى العجرم" و "سَيِّد طُلْبه القفْشه" "الكاشف" و "عَشَّه""حماده البت!" يا حليل و ال"رَيْقِى" و ال"راب" ضاربين الدَّوْشه
10-11-2010, 10:14 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
و ال"رَيْقِى" و ال"راب" ضاربين الدَّوْشه و العجلات تتراقش رقشه و كرسى الركاب بس أودة نوم فى أحسن فَرْشه و تنزل "فاطنه" و تركب "عشّه" و ماشين وين..اللهُ عليم و قروش من وين..اللهُ كريم لا زول سائل..لا زول مسئول.. لا دَهْشَه و رِكيشة الهنا - يا كافى البلا- لا نور قِدَّام لا وَرا خَطَرَات..لا فيها مَنَشَّه بالليل وطواط سرحان عميان فى المطره قَعُوْنْجَه تنَطِّط رَوْشَا ترُش بالطين و باللعنات.. و بالبُنْيات بتْتِم الرَّشَّه و الشارع مُوْلِد و غايب سِيْدُو لا قانون لمرور لا عمود نور لا عبد الظنبور الفالح ياخد حقو و حق الناس الهَشَّه و المسكين العُر خليهو تجيهو الكِشَّه
الراكب يلعن أم الماشِّى و يوم الماشَّه و الماشِّين قادْلِين و أضان الحامل طَرْشا و البوليس بس دَايْر يِتْعَشَّى بى عَصْرَه يخلى الترخيص فى رَمْشَه و بى ربع المبلغ يخَلِّى الدَّقشه "الإيصالات" حركات فَنِّيَّه و الشِّفِت الفاهم يِنْقُشَا نَقْشَه و الناس العَرْضِ و طول كان كتلو الزول مارقين بى بطاقه و خُمْشه
10-11-2010, 10:15 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
و لو ضابط عَنْقَد ياها الطَّفشَه و لو واحد خَرْخَرْ آخرو الطَّشه و لو أهل الميت طلبوا الدم ما بيلقوا النّتْشَه لا تار لا دِيَّه..لا الواحد قِدِر يتفَشَّى آه يا زمن الركشه.. و زمن "البيت السورى" و "مصرى" مَالا "بيوت السودان" اتمسخت قِبْلى و بحرى..عَمَاره و عُشَّه؟ خلينا "الكِسره" بناكل "بيتزا" و "كُشرى" و "طَقْشَه" وين "الشرموط" و "الوَيْكَه" .. و وين " الكَرْشه"؟ آه يا زمن الركشه و زمن "الدُّكَّان" الأصبح "سنتر" و بقى "للعنوان" إسماً أشتر و اليافطات بالصِّينى و باللاتينى فى بلداً ما فكَّ حروف العربى الطَّرْشَا "عَوْلَمَه" دى؟ أم عالَم خلوهو قُعاد على هَبْشه؟ لا معصوم من "الديجيتال" لا هُوْ حصين من "سوداتل" لا عندو وجيع لا حارس باب لا معروف المارق من الخشَّ
آه يا زمن الركشه..
10-11-2010, 10:17 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
آه يا زمن الركشه.. و زمن "السوق الليبى" و "سوق الناقه" و زمن الفاقه..زمان الفاقه و "حمَّام السوق" الدَّهْشه ياللعار! فيك الإبريق بإيجار و جُمَار الناس أسعار و حكومتك تجبى ضريبة الظرطه و تجبى ضريبة اللقمه و رَىَّ العَطْشه و تفتح دفتر للبِتْجَشَّا آه يا زمن الركشه..
10-11-2010, 10:19 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
آه يا زمن الركشه.. و زمن ال"موبيتل" و ال"سوداتل" و "أريبا" خاتياك الرّيبه.. و تخْتاك الهَبْشَه شركاتك كِتْرَتْ و "موبايلاتك" مَلَتْ الشارع دَخَلَتْ جوَّه المدرسه..جوَّه الجامع ناس تتكلم فى المليان و الفارغ و ناساً تملا جيوبا و بالمسكين تتعشَّى و الموبايل يكُورِكْ شوفونى محجَّبه شاقه الحِسْ و منقَّبه ما بتدِسْ و مكَهْرَبه لابسه الجينز
و الموبايل آخر لقطه و رقشه آه يا زمن الركشه.. و زمن العِرِس "العُرفى" و عِرْس "المتعه" و "راجل المَرَه دَه" و "بِتْ القلعه" و زمن الشِّقَق الفَرْشَه و ألف لقيط فى الشهر الواحد و ألف فضيحه و كَشَّه آه يا زمن الركشه
10-11-2010, 10:21 AM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
و زمن "المُوْل" الأجنبى و "الأوزون" زمن "الأفيون" أولادك فى "العفراء" حايمين و بناتك لا فى المدرسه لا فى البيت قاعدين يا ترى هم وين..بل وين اليَد الحِمْشَه ؟ آه يا زمن الركشه و زمن البلد الصَّبْحتْ سِتَّه جيوشا "القومى" ده واحد و "دفاعنا الشعبى" اتنين و تلاته "القوات الخاصه" و الرابعه "الشرطه" و خمسه "الحركه" و من دارفور السَّاتَّه و لِسَّه "القوات الدوليه" ده غير الميليشيات المِيَّه حكوميه و شعبيه و "شعوب" مَنسِيَّه "مَهَمَّشَه" نارا تولِّع و ألفين قنبله موقوته وجاهزه تفرقع و مليون بُعْبُع و مليون غشَّه
و آآآه يا زمن الركشه الفيك الشَّعْبِ انغشَّ..انكشَّ..انقشَّ و ساكت هَرْشَه!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdlaziz Eisa
فيس بوك
تويتر
انستقرام
يوتيوب
بنتيريست