|
|
 A new member is saying: Salam
|
خوفه اولى:
اسبوع كامل و انا احاول الكتابه لاعلن انضمامى لهذا البورد الغنى بالسودان.... فكرت فى موضوعات من كل شكل و من كل لون بس تكون جاده و هادفه و رصينه و... و.. و (خايفه من مثقفين البورد و خايفه موت من ناس العلوم الاجتماعيه) المهم أجلت الموضوع بتاع الكتابه ده لانى اكتشفت عدم أجادتى لاى لغه؟؟؟؟؟؟؟؟!!!!!!!!!
خوفة تانيه:
نفسى قالت لى يازوله ما تبدى بتعقيبات صغيره و زوغى لغاية ما تتعودى و امورك تسلك... برضه خفت من القصه دى.. شايفه فى عكاكيز جاهزه للمعقبين و المعقبات.. تانى زوقتا..
المهم قدر المخ الفضل لى ( يا ود جبرالله من الجراده) قررت ان تكون شيمتى اكتب البقدر عليهو و أكب الزوقه..
لقدر ما سعدت بهذا الزخم من الكتابات من مختلف الفصائل حتى الكوزيه منها (شفت ليكم زول بفرح لكتابة الكيزان؟!!!!) الزول ده انا...كلنا نحاول اقصاء الاخر لكن باساليب و أليات مختلفه و كمان تواقيت مختلفه ... و انا أفضل الديقراطيه كغربال (و ياحبذا الناعم منه) لاقصاء خصومى... لانو البتغربله الديمقراطيه لا مجال لعودته حتى و لو اعاد انتاج نفسه مره أخرى وأتحورب (ياخوانا/تنا دى من حرباء..أفتكر انا هيئتكم للغتى) فغرباله ح يكون راجيهو... المهم كيف نجعل من الديقراطيه غربالنا المشدود....
اعتقد ان هذا البورد تمرين جيد لنتعلم أحتمال شدة هذا الغربال ونتحرك بهدوء و نتوخى طولة البال و النفس الطويل بالموضوعيه وبهذا نقطع الطريق على من كل تحدثه نفسه بالقفز ليلا......تعالو نشيل الحوار الايجابى يا جماعة الخير و ليبق الطالح على ظهر هذا الغربال و لينزلق بهدؤ كل من يصلح أن يكون مكون لكيكه سودانيه صحيه .
خوفه تالته:
يا جماعه انا عندى تعقيبات على و تساؤلات عن بعض الموضوعات لكن البمرقنى من عكاكيز الايمان الناقص و التكفير شنو؟ يا ربى الجماعه الشايلين العكاكيز ديل لو حلفت ليهم انى مؤمنه(لاحظ/ى مؤمنه دى يعنى ما مسلمه بس) و ملتزمه بالعبادات اهىء اهىء اهىء ( ده بكاء بالمناسبه و من وهسه يا ود جبرالله اااااااى لسه بقرا ميكى انت مالك و مالى) اها بتحل منهم؟ افيدونا ايها المجربون (بضم الميم و كسر الراء)
خوفه رابعه:
الواحد كمان ما يكضب... ما كمان فى جماعه كده ممكن ما يعجبهم كلام الايمان ده و يمرقو لى عكاز التساقط و السقوط ......
لهؤلاء و اولئك لقد التزمت الزوقان كمبدأ و الخواف ربى عياله او هم ربوه فى حالتى....
الاخ ابوبكر: الواحد ما ممكن يعمل ليهو بورد للخوافين؟؟؟؟؟؟؟؟
لى و لكم الامل فى منبر تقارع فيه الحجه بالحجه و الكلمه و بالكلمه بعيدا عن جاهزية الاجابه و شخصنة المواضيع ....... و غربله معافاه من أجل الجميع
|
|
 
|
|
|
|
|
|
|
|
Re: A new member is saying: Salam (Re: Siham Elmugammar)
|
دى من اجمل المفاجات فى الايام دى
من وين جاتك الشجاعه عشان تجي خاشه توووش كده
يا جماعة الخير استقبلوا سهام دى براحه براحه والا حتطفش تانى مانلم فيها، سجيمان تر لى ورا شويه "المره" دى جنها وجن الناس اللسانم طويل وفالت
اسمعينى، خشي واكتبى العاوزاهو لا تفكرى فى يمين و لا شمال،هى فضل فيها شي!!!!!
اها جيتينا فى وقت كويس الايام دى بنجهز لى عرس صاحبتك الدكتوره و your ex-flatmate سمعت انو فى واحده عضوه سابقه عايرتا بالعزوبيه والبوره والواضح انو قرار العرس رد فعل للاستفزاز ده "ومصادرنا" (انحنا منو ذاتنا???) قالت انو صاحبنا خالد كودى تم اكل راسو واستغلال هاشميتو واقنع بتغطية قدح التحالف، اريتو قدح حبيبك. حنحتاج ليك يا سهام فى التجهيزات باعتبار خبرتك "الحريميه" موش انتى حرمه ليكى كذا سنه ؟؟
الجراده لسه حايمه فى الراس الله يطرا جبرونا بالخير
يا زوله اها قصرت معاك، نصيحه ليك كان اللبع دور فى البورد وده ممكن يحصل فى لحظه ولاى سبب قولى يا ساتر واعملى ساتر
سلمى على ابو العيال والعيال
| |
|
|
|
|
|
|
|
|
|
Re: A new member is saying: Salam (Re: Siham Elmugammar)
|
الاخ سهام
انتى الظاهر عليكى زى,,,,كل شى ولا العكاكيز.
ذمان كان عندنا حاجه اسمها المديده حاره,,وهى ان الشكله بين نفرين لا تتجاوز الكلام..كلام ساكت,, حتى يتدخل احد الشريرين و يقف بين المتشاكلين ويمد يده ممتليئه بالتراب ويصيح المديده حاره,,,عندها لا يجد المتشاكلين مخرج سوى "كتيح التراب فى وجه الخصم او الظهور بمظهر الجبان"هراش".
فى هذا البورد ناس المديده كتيرين و يجيدون فن صناعة الفتن ببن المتخاصمين.
وبرغم ذلك,,,
هذا البورد حقيقة ممتع و مفيد و لا يمكن الاستغناء عنه بسهوله
اتمنى لك اقامه طيبه بيننا ,,و اذا لقيتى العكاكيز كترت ممكن تمشى بوستات ناس سجيمان و المطر وعجب الفيا و غيرهم من المبدعين
النصرى
| |
|
|
|
|
|
|
|
|
|
ya ahlan (Re: Siham Elmugammar)
|
يا جماعة البورد مش قلت ليكم انا خوافه مالكم خالعنى كده بالترحيب ما تصبروا شو يه تشوفو مويتى شنو؟
و الله والله و الله لقد أثلجتم صدرى لم اجد الا ان اطبق على خناق ابنتىغدويه( 9 سنوات) لتحتوى معى هذا الفرح الغامر بترحيبكم الحار..........بعد ده هلا هلا هلا على العكاكيز (هوى ده كلام جعلليين ساى ما تصدقوا خصوصا انى ما جعليه)... الشكر للجميع و نتمنى نكون من الذين ينزلقون بهدؤ و روقه...
| |
|
|
|
|
|
|
|
|
|
نـــــــــــــــــــــداااااااااااااااااااااااااااااااااااااا (Re: Siham Elmugammar)
|
العزيزه ندى اهااااااا معليش اقصد العروس
اول حاجه فتشت عليك حاره حاره و سألت عنك نجمه جاره ... و فشلت
و ما صدقت لما لقيتك متللففه جو البورد ده ( اها كده كويس??) و اول ما قررت اقبض عليك و انق كالعاده فى موضوع العرس لقيت شمارك مستنينى الليله فى البورد.... اها نقتى طرشقت...
دحين كان الشمار ده صاح المحوميك فى البورد شنو... مش مفروض تكونى محبوسه للعرس(الظاهر خالتى حياة ما و صلتك لسه) عروسات اخر الزمن
للمحافظه على لسانى رسلى بسرعه عنوانك عن طريق بكرى ابوبكر (اذا سمح) فى مده اقصاها اليوم خلينى نفهم الحاصل بى و الحاصل بيك.... فعلا انا شوق و حنين ......... مشتاقين يا ندى قدر كيلو كده.........
| |
|
|
|
|
|
|
|
|
|
Re: نـــــــــــــــــــــداااااااااااااااااااااااااااااااااااااا (Re: Hussein Mallasi)
|
غايتو الله يستر على ايطاليا .....
تحياتي يا سهام و الله التسجيلات الجديدة دي شكلها كدا حتكون مكربة تمام ..
اها من ناس المجمر ديل كان في زمان ( اواخر السبعينات و اولائل التمانينات)
واحد في القاهرة كدا سياسي كبير اسمو همام طه يا ربي اخوكي
و لا ود عمك و برضو في الهندسة كان في هشام طه و محمد حسن
( او احمد – الكلام دا ليهو زي مليون سنة كدا )
اها ناس عمك طه ديل كانو في بحري المزاد ...
غايتو لو ما طلعوا قرايبك اكون بالغتا ...
اها كمان لو كان في ماسنجر كنا اديناكي باقي التفاصيل و القصص .. بس ممكن تسألي
اختنا ندى مصطفى
مرحب بيكي ... و احسن حاجة و الله الكلام القلتيهو فوق دا ؛ و انفتحي على الجميع ...
عسى ان يفتح الله عليهمو علينا و عليكم ...
و سنلتقي حتماً في ردهات البورد كثيرا ان شاء الله ....
| |
|
|
|
|
|
|
|
|
|
شكرا للكلام الحلو (Re: الجندرية)
|
اهلا بيك انتى..... و لو دى صورتك معانا انا ح اكتفى بخفة الدم...
و باريت اعرف قصة الكبده و الصران دى قريتها ليك قبل كده و باقيا لى طشاش طشاش
| |
|
|
|
|
|
|
|
|
|
Re: A new member is saying: Salam (Re: Siham Elmugammar)
|
SALAM DEAR SIHAM
WELCOME TO SUDANESEONLINE HOPE U ENJOY IT DESPITE EVERYTHING
IT HAS BEEN REALLY LOOOOOONGTIME SINCE WE MET!!!LIFE SEPERATED US BIG TIME BUT IAM GLAD NOW WE CAN CONTACT HERE ON THIS MINI SUDAN HOPE BELOVED KIDS R ALRIGHTY SALAM TO THEM AND DEAR UNCLE AND WILL CONTACT EACH OTHER SOON I HOPE UR SISTER SUHAIR SAAD
| |
|
|
|
|
|
|
|
|
|
Re: A new member is saying: Salam (Re: suhair elsheikh)
|
خبروني عنك كثيرا وتمنيت ان التقيك وهاهو البورد الوطن يجمعنا... ما تهتمي بالعكاكيز بس اختي ناس ود جبرالله شايفه افتتح شماره بناس العرس وبما انه العروس والعريس فرد وانا وزيرتهم فانا له بالمرصاد!!شفتي دي اول عكاز!!
مرحب بيك سهام ونحنا في انتظارك يلا كوني!!
غربه
| |
|
|
|
|
|
|
|
|
|
الاخ جينى يا ربى انت ياتو فيهم؟؟؟؟ (Re: Siham Elmugammar)
|
كم انا سعيده بأن هناك شخص فى هذا الزمان بعرف طه المجمر مقدم البرامج الاذاعيه و الصحفى الرياضى و رئيس تحرير صحيفة السودان الجديد...
لكن ازول ده و احد فى التلاته يا اما عنده علاقه بالصحافه الرياضيه او دار الوثائق و الا عجوز!!!!....
الاخ جينى يا ربى انت ياتو فيهم؟؟؟؟
بقدر ما اسعدنى ذكرك للوالد انا أسفه اقول ليك لا استطيع تو صيل سلامك لانه توفى من 11 سنه ... لكن دعواتك الطيبه لابد تصل... له الرحمه...... اشكرك جدا جدا جدا....
| |
|
|
|
|
|
|
|
|
|
Re: HI (Re: Siham Elmugammar)
|
سهام المجمر عدييييل كده
ازيك يا سهام ومشتاقيييين شديد
لكن حقيقى البورد الوطن
مرحب بيك واكربى نصك واتحزمى زى اخر مرة شفتك فيهافى شارع الجامعه
والف سلام لهيام
وحا نتلاقا كتير
سامية قسم
| |
|
|
|
|
|
|
|
|
|
Re: A new member is saying: Salam (Re: صديق الموج)
|
سهام بت المجمر
اولا ألف مرحب بيكي ونورتي الساحة
ومرحب بصغيرتك غدوية
ثانيا إنتي أتولدتي في البورد بأسنانك وأنيابك وإنشاء الله مافي خوف عليك
وخيرا فعلتي بإنك درستي البورد وأهله دراسة حصيفة وفرزتي الكيمان قبال ما تعتبي ومنتظرين مشاركاتك الجادة ومنتظرين غربالك المشدود
| |
|
|
|
|
|
|
| |
Siham Elmugammar
nada ali
Rawia
Nagat Mohamed Ali
zumrawi
bayan
Adil Osman
ABUHUSSEIN
Elsuhaili Magzoub
Raja
elhilayla
سجيمان
انور الطيب
Hussein Mallasi
الجندرية
sari_alail
بكرى ابوبكر
Osman Hamid
Ehab Eltayeb
محمد اشرف
jini
samia gasim
شرووم
صديق الموج
Habib_bldo
فيس بوك
تويتر
انستقرام
يوتيوب
بنتيريست