عليكم الله فكونا..و ما تعكروا لينا تفاؤلنا اصلو هو قاعد على الهبشه!!!

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 16-11-2018, 05:21 PM الصفحة الرئيسية

مكتبة سهام المجمر(Siham Elmugammar)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
27-07-2005, 02:43 AM

Siham Elmugammar
<aSiham Elmugammar
تاريخ التسجيل: 18-06-2004
مجموع المشاركات: 3488

للتواصل معنا

FaceBook
تويتر Twitter
YouTube


عليكم الله فكونا..و ما تعكروا لينا تفاؤلنا اصلو هو قاعد على الهبشه!!!

    الشمس فى نص الراس...الاخلاق فى راس النخره...و النخره عرقانه و مليانه تراب سادى درب النفس.... الله ينعلك يا زمن عشان كوز واحد مخو اتلحس بالدين الجديد لنج علينا و على اهل بلدنا و على العالم كله.... دين جديد صنع خصيصا للقرن العشرين...عشان يناسب العاب القوى و القروش.... كوز واحد مخو اتربلس ( اتربلس دى من replaced و هى انتاجى الخاص عشان خاطر صديقى سيف بشير) بخط انتاج جديد من الورقه... مراكز التفكير اتلغت و استبدلت بمراكز تلقين...الذاكره محيت لتبدأ من تاريخ الانتساب... القيم الاخلاقيه البنعرفه من نبدأ نرضع حليب امهاتنا حليلها ديك ... جات بدلها قيم الجماعه كان نقدر نقول عليها قيم والاصح اللاقيم ... اوف ف المهم هسه ما تتكلمو معاى...قلت ليكم الاخلاق فى راس النخره.. انا ماشه البوليتكس ( طبعا دى من politics ) اشوف الحاصل شنو ... والحايحصل شنو... ياخوانى الواطه دى كما حقتى الكرعين ديل ما حقنى؟؟؟؟ عشان كوز واحد السنه تبقى سنتين... و بعدين ما يقل ادبو على عميد القانون ما يمكن العميد يستاهل!!!! فيها شنو يعنى ... نحن لمتين نتمسك بالرضعناهو لغايه هسه والواحد بقى باولاده يلاقى مدرسة الابتدائى فى بيت البكا يقوم ناطى ذى الضربته عقرب و يقرب يقول ليها صباح النور يا ست فلانه و يفضل و اقف عشان تقول ليهو اجلس.... و هى ذاتها جامعة شنو دى النحنا فرحانين بيها.. شنو يعنى جامعة الخرتوم ما كلها قرايتها ما بين السيخه و السيخه... المهم نتخارج مش نتخرج ...كرهتونا العيشه و الكشيشه... اها و صلنا الزفت البوليتكس ... السلام عليكم يا جماعه مكتب د. فلان وين... لفى بجاى تلقى روحك مرقتى بهناك تقومى تلفى بغادى تلقى باب فاتح بالجنبه دة المكتب... لف لف لف ازيك يا دكتور ... و انا واقفه... اتفضلى اقعدى ... فى سرى قلت انعل ابو الادب ... انا اصلو حاج ماجد دة ما بتعلم منو حاجه ... ما انا تعبانه ما اقعد اول شى و بعدين كان دايره اسلم ..اسلم و كما دايره كمان على كيفى...بركه الحاج ماجد البقى دبلوماسى اخير ليهو ينفع ناس بره... اصلو نحن السودانين ديل راسنا قوى و ما بنتعلم بسرعه... انا : يا دكتور انا سهام طه المجمر و جاياك عشان.... هو : طه المجمر الصحفى . انا: ايوه يا دكتور( ما قلتا ليكم ما بنتعلم هسه يا دكتور دى لزومها شنو ما قربت اقول ليهو سيادتك ما ايوه و خلاص) هو: انتو بالمناسبه اهلنا ما كلنا بديريه... سنه يا انا و قاربنا الدكاتره و بقينا اهل... هو : نحن اهلكم ناس باره... نااااااس باااره ...يا فرحه ما تمت قشره على الاصحاب و طارت ..لا يا دكتور انت بتكون قاصد مجمر تانى لانو نحن ما من باره نحن بديريه دهمشيه من جزيرة تنقسى... ضحك و قال لى دهمشيه دى اضافه عنصريه فقط... اصبت بواحده من هاءات بشرى الفاضل...الجاب العنصريه شنو هسه!!! اصلو نحن قبيله واحده جزء منهم استقر فى الشمال و جزء دقش لجوه و استقر فى مناطق الغرب و تزاوج مع قبائلهم قاموا الجماعه الفى الشمال حبو يتبروا من جدودنا العرسو الغارابيات قاموا قال نحن بديريه دهمشيه... الله يرحمك يا عمى سعيد لما مره جيت من البلد قلت لى هووى بت طه انتى دحين ان بقوا ساألوك قالوليك انتى جنسك شنو تردى تقولى شنو؟ قلت ليك اقول لهم بديريه قلت لى ابدا ما صاح انتى ماك بديريه انتى بديريه دهمشيه و دهمشيه قبل بديريه ذاتها... ايوووه بالله هى الحكايه كدى يعنى ... يا ارض ابلعينى كان اعترفت بأنى ما كنت عارفه ..ده اعتراف صريح بالجهل و كان ادعيت المعرفه.. ده اعتراف صريح بالعنصريه....و اتعاليت عنصريا على الدكتور فى عقر داره... اها حاج ماجد زاتو بقى ارحم منى على الاقل عميد القانون كان بره مكتبه ...ما بعرف اتخارجت كيف لله در دكاترة ذلك الزمان ... بعد طلعت من مكتبه اكتشفته انو هو الخارجنى بمنتهى الدكتره العلميه و التعليميه..
    ماشه أعزى عصام عبدالحفيظ فى امه الله يرحمها بت حلة الدناقله و جارة حبوبتى كل ما يصدف الاقيها فى حته كان لازم تستدعى ذكريات ايامها الطيبه بقصه واحده تحكيها لى لما حبوبتى عيشه ختت البطيخه فى النار بدل ما تخت حلة المويه عشان تغليها للدايه فاطمه المصريه فى ولادة واحد من اخوانى ..وانو كيف القصة جاطت و الدايه بقت تكورك فيشان اخرو المويه..والله عصام ده مشى المطار لاستقبال قرنق... و يازوله شوفى ليك سكه تانيه ترجعى بيها برى غير شارع المطار الزحمه شديده و انتى قلتى اولادك براهم و ابوهم عيان... سكه تانيه معقول؟! كان ليكم و الله الليله ما ارجع الا بالمطار.... ايييييك ده شنو ده .... رغم الكندشه الضاربه ...ضربتنى سخانه جايه من القلب و الفشفاش ...ده شنو ده.. صفوف و صفوف و جماعات تتقاطر ...غابات من الناس السود سواد لمن تشوف ابيض من سنونهم مافى...والله و ما طالبينى حليفه دمعتى فرت من عينى... فلقد رأيت السلام رأى العين.. عديل كده عينى فى عينو ....و بصرى بيطوى فى الوجوه هاجمنى وجه الباسم...ما عارفه ليه حسيت بحضوره الكثيف فى المشهد.. الوجع..الجوع..التشريد..السكن العشوائى.. و الطرد من السكن العشوائى...المرض.. و عدم العلاج من المرض...الجهل ايييييك و اللسته( طبعا من list ) طوييييييييله ...شفت الباسم بعينى دى يده فى يد السلام...و شوف العين قاسى...ضبحتونا.. سلختونا برضه مبتسمين... اصلو الزول ما يمد رقبتو شويه كدى لى بره و يفك نفسه من التفاؤل الحذر المستمر من سنة حفروا المحادثات ... قلت هذه لحظه يجب ان تعيش... ما بعرف قدرت اسوق بالسرعه دى كيف ...اخيرا البيت يا اولاد امرقو امرقو بسرعه بسرعه يا ماما ياخ دقيقه ...مافى دقيقه و لا فى ثانيه... اركبوا بس يا ماما انا حفيان ...ياولد اركب ماشيين نشوف قرنق و يمكن يكون من الضمن شايل معاهو سفنجات... و جرى على نفس الشارع ...العربات المارقه منو ياشروا لى ارجع ...الشارع مقفول من الزحمه...ارجع ارجع قال.. كان ليكم... اتلفت على و ليداتى و هم مبهورين بالمشهد كله ...ياماما ده شنو؟.. ديل منو؟.. و جو من ين؟.. و عشان شنو؟... يا اولاد املو عيونكم كان بتنملى.. فجأه تقمصتنى شخصيه بت قضيم قلت لغدويه ...عشان بعدين تقولى لى وليداتك: والله فى شنة 2005 الوكت داكعلى ما اذكر اكان عندى 11 سنه و الله امى الله يرحمها جات داخله البيت تجرى ذى المجنونه و خمتنا عشان نمشى نشوف استقبال قرنق و قالت لينا دى لحظه تاريخيه... طبعا انفجروا من الضحك من طريقة الكلام...بعدين غاده قالت لى ياماما انا ما عايزاك تموتى..قلت ليها و انا كمان ما كنت عايزه اللحظه دى تموت.. انا شفت الغرب و الشمال و الشرق الا الجنوب و الله ينعل الكان السبب كان فى الشمال والا كان فى الجنوب...الناس البعترفوا بأنهم عنصريين و بمرقو رقبتهم و ينفضوا يدينهم بحجة (هذا ما جبلنا عليه) والناس البتهموا الناس البقولو نحن ما عنصريين بتهمة الادعاء و الناس الشايلين عصايات العنصريه رايات عينى عينك و الناس الداسنها بتحت.. والناس الامبارح قالو لى اها نحن كنا تبعنا المنطق ده و اجتهدنا نتخلص من العنصريه الماكنه جوه.. اها.. هم بخلوها و بنسوها .. ...اقول ليكم حاجه..... عليكم الله فكونا كده...
                   |Articles |News |مقالات |بيانات

27-07-2005, 05:01 AM

Ahmed Omer

تاريخ التسجيل: 22-01-2003
مجموع المشاركات: 137

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    همممممم....طيب....لحظة

    اوكيييي ( من ok )،،

    شنو....؟ معليش دقيقة

    ايوة اتذكرتا

    بس كان عندي سؤال، يعني حسي عصام عبد الحفيظ طلع بديري دهمشي؟!!!

    ثم انوالدكتور مالو ومال البطيخة خاتيها في النار ، ومن اساسو الدخل البطيخ في البوليتكس ( من politics ) شنو؟!!

    لكن بس عجبتني حبوبتك العاملين ليها استقبال حاشد لامن سدوا شارع المطار

    وكلوا كوم والداية المصرية كوم ، لكن تعالي هنا ...هو بالله انت حاضرة ولادة قرنق ؟!!

    بس البركة في السلام زي ما قلت ، لأنو بصراحة الحرب الكانت دايره بين الطالب و العميد استهلكت موارد البلد سنين طويلة ، وانا باقترح في سياق فترة انتقالية انو الطالب يستلم موقع العميد ، والعميد ممكن يملى وقت فراغو ويخت الحلة في النار ( الحلة ما البطيخة )

    بس حقيقة ما عارف لو البطيخة بترضى تمسك منصب الطالب ولا لأ ، لأنو زي ما قلت ده مصير غامض ومحفوف بالمخاطر ، في زول يقدر يضمن ما تخبطها سيخه طايشة تفجخا، ولا ( سليقة ) طايرة تشقها نصين ؟!!

    بس الحقيقة في حاجه ما فاهما

    Quote: الشمس فى نص الراس...الاخلاق فى راس النخره...و النخره عرقانه و مليانه تراب سادى درب النفس


    دي نخرتك ولا نخرة الكوز المتربلس ( من replace )..؟

    ثم انو انتي من اساسووووو مشيت جامعة الخرتوم تعملي شنو ؟!!!


                   |Articles |News |مقالات |بيانات

27-07-2005, 05:02 AM

Mahmed Madni
<aMahmed Madni
تاريخ التسجيل: 12-04-2003
مجموع المشاركات: 244

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    لا حولا...ده كلو كنتي داسّاهو وين ياأم غادة..والله البشوف صرامتك وقلة حركتك في البيت أصلو ما يقول جنس(السرد) ده بيمرق منك..لكن الظاهر كنتي راقدة فوق راي..خليتنا نَنَظِّر و(نبربر) وعاملين فيها أسيادالكلام والحكي وما إليه..عفيت منك ..صدقيني أكتر من الدهشة أنا سعيد ومبسوط لكن في نفس اللحظة بتحسر وبتندم علي الأيام الحقيقتن كانت ناقصة هذا (النوع) الراقي من التواصل.
    تحياتي لك وللأسرة الكريمة...بالمناسبة أنا خليتكم مع غادة وبس..لكن ماشا الله شايف البيت عامر-حسب السرد- الله يخليهم ليكم ويخليكم ليهم.
    محمد مدني
                   |Articles |News |مقالات |بيانات

27-07-2005, 05:09 AM

هشام المجمر
<aهشام المجمر
تاريخ التسجيل: 04-12-2004
مجموع المشاركات: 9532

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    سهام

    فعلا إنها لحظات تصنع التاريخ
    والحمد لله انو غادة و محمد شافوها شوف العين وعرفوها من خلالك
    وحتما جيلهم و الأجيال القادمة سيدفنون جثة العنصرية النتنة فى عمق سحيق
                   |Articles |News |مقالات |بيانات

27-07-2005, 05:27 AM

Hussein Mallasi
<aHussein Mallasi
تاريخ التسجيل: 28-09-2003
مجموع المشاركات: 26226

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: هشام المجمر)

    Quote: تغليها للدايه فاطمه المصريه فى ولادة واحد من اخوانى ..

    لم تكن مصرية؛ و ان كانت تتحدث بلسان مصري؛
    ففاطمة - بت ام حمدي - كانت سودانية.

    و حمدالله على السلامة.
                   |Articles |News |مقالات |بيانات

27-07-2005, 07:17 AM

nada ali
<anada ali
تاريخ التسجيل: 01-10-2003
مجموع المشاركات: 5258

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    انتى كنتى غاتسة وين؟

    سلام و اشواق كثيرة

    ندى
                   |Articles |News |مقالات |بيانات

28-07-2005, 01:37 AM

Siham Elmugammar
<aSiham Elmugammar
تاريخ التسجيل: 18-06-2004
مجموع المشاركات: 3488

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: nada ali)

    احمد عمر : مالك ياخوى جاطت ليك كدى... انا جامعة الخرتوم مشيت ليها لى شنو؟؟؟ دة سؤال دايرو ليهو بوست ذى الجاطلك ده عشان يترد عليهو ....اوكى ( من نفس المصدر)
    محمد مدنى يا هلا بيك شكرا لمرورك لكن اقولك كلام والله والله انا صارمه دى عجبتنى عجب ...بالله خسمتك بالنبى كما كتبتها تانى عشان ناس ود جبرالله و عفيفى و سيف بشير تطقش اضانهم...و البركه الطقشت اضان ندى مصطفى...
    الملاسى عند ناس حلة الدناقله اسمها فاطمه المصريه..
    هشام الحبيب و الله و الله كان شفت الدهشه و البهجه فى عيون الغدويه و محمد و حتى حسام و سمعت اسئلتهم ما بتصدق...
    نداااااااااااااااااااااااااااااا مصطفى عووووووووووك عاينى لى انا غاتسه بى جاى ... كيف يا فرده و الله افتكر بعد ده ممكن نتوقع زياره للسودان نتسالم و نتقالد و نغنى لابو داوود لمن نقومه من تربته نوقفه على حيله ...و ليك على اجيب ليك عامريه شخصيا تغنى ليك لأبوها فى نفسها.... سلام مربع لخالد
                   |Articles |News |مقالات |بيانات

28-07-2005, 03:35 AM

انا بنت النيل

تاريخ التسجيل: 06-08-2003
مجموع المشاركات: 717

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    سهام ..ياعزيزة
    قبل ما احدثك عن موضوع الهبشة ..ما كنت عاوزة اباراك ليك الماستر عبر السايبر..وقلت اجي بالدرب ..وااااه من الدرب الصعيب في هذا الزمان العجيب..وفوق دا كله ليك وحشة ما عادية ..فاقبل إعتزاري ياجميل..والي ان نتلاقي..
    اما الموضوع فجا معاي في ..التنك زي ما بقولو ..وكانت الأخلاق في الطرف ذاااتو ..وفايت حبه ولمن قريته..خفف عني شوية خاصة قصةالبطيخة والله بقيت اضحك براي زي المجنونة ..وكمان اتذكرت ..حاجة عيشة الله يرحمها وينزل عليه الف رحمة ..ودعوتا لهمام ربنا يعوده بالسلامة.." ان شاء الله تتعلي ما تتدلي" يقول ليها ياحاجة شابكانا تتعلي ما تتدلي ..تتعلي ما تتدلي لمن بقينا معلقين لا فوق لا تحت ..وقصة البولتيك ..حليل الجامعة ياسهام وحليل اياما السمحة ..اتخيلتك في الشدرة الجنب النشاط " حليل" النشاط ..رغم اني كنت ما بريد الجبهة الديمقراطية "زي ما عارفاني متطرفة براي"..بس بريد كلامهم وحماسهم واركانهم ..وشكلاتهم مع الكيزان ..سهام الشدرة قاااعدة بس عملو جنبها قاعة كبييييرة سموها قاعة العقيد القزافي اظني ..وسمع اضاني وانا عندي محاضرات اليومين ديل هناك تبع قراية الكبر وكدي ..سمع اضاني صوت الساوند ما يديك الدرب وكرررو رررو لا تعرفيها مزيكة لا تعرفيها شنو جوة القاعة ..زمان ..حليلو هو..ما غنا وهيصة جنس دي والشمس حية ..والمحاضرات شغالة ..ممكن جلسات الإستماع في بعض القاعات الكبيرة وطبعا مساء غالباً..وما شفتي.. شي غريب وعجيب ادهشني بقدر الخوفة الدخلت فيني ..السنتر زي ماهو وتعالي شوفي براك اتملا " قرود" ااااي والله قرود بالكوم ..انت قاعدة لا ايدك لا كراعك يجيك قرد ناطي يهجمك ..يطير الفي يدك..غايتو حصل لي رعب في الأيام الأولي ..بس لقيت الطلبه متأقلمين معاهم ..يخيل لي دي قرود الجنينة القفلوها وسووا محلها برج الفاتح العظيم ..شردن وسكنو شجر الجامعة الظليل ..ولا ياربي ديل القردين ديك الكانو في الشجر الجنب مكتب مكتب العميد .. كترن واتكاترن كدي ..الله اعلم .
    سهام ..الله يديك العافية

    (عدل بواسطة انا بنت النيل on 28-07-2005, 03:44 AM)

                   |Articles |News |مقالات |بيانات

28-07-2005, 04:16 AM

Siham Elmugammar
<aSiham Elmugammar
تاريخ التسجيل: 18-06-2004
مجموع المشاركات: 3488

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: انا بنت النيل)

    عاد يا بت النيل عذرك اصلو ما معاكى و ما بكضب عليك لومك الجبال ابن يشيلنو و كدى نشوف السكه تجيبك متين......
    اخونا احمد عمر سألنى سٍؤال قبل شويه و انا بباصيهو( و دى من pass) ليك يا ختى و لما تردى انتى اول امكن الله يفتحها على و اهضرب بى رد من بعدك ... ما تنسى اقرى السلام لكل قردا طالع فوق شجرته
                   |Articles |News |مقالات |بيانات

28-07-2005, 04:42 AM

saif basheer
<asaif basheer
تاريخ التسجيل: 29-11-2004
مجموع المشاركات: 1426

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: انا بنت النيل)

    الأستاذة سهام

    حمدالله على السلامة بعد عودتك من الماجستير، أقصد بعد الحصول على الماجستير..
    القصة دايره ليها قراية أكثر من مرة.. عشان "تتربط".. وأجد العذر للأخ محمد مدني (aplogies, i meant ahmed omar, that is why i edited my comment) إذ فهمت ما فهمه ولا أزال أحاول تجميع الخيوط المتناثرة هنا وهناك "وبي قادي" وووو..الخ...

    حاج ماجد تكرر إسمه أكثر من مرة.. حكايتو شنو؟

    الأجزاء الخاصة بتسجيل اللحظة التاريخية تهز الوجدان ولا أجد إلاّ أن أنحني لك إجلالاً لتصويرك المشهد ورؤيتك بل وتجسيدك للسلام.. يا سلام على السلام.. نتمنى أن يعم السلام فعلاً في الجنوب والغرب والشمال والشرق، بإختصار السودان كله ينزرع سلام..

    Quote: والله و ما طالبينى حليفه دمعتى فرت من عينى... فلقد رأيت السلام رأى العين.. عديل كده عينى فى عينو ....و بصرى بيطوى فى الوجوه هاجمنى وجه الباسم...ما عارفه ليه حسيت بحضوره الكثيف فى المشهد.. الوجع..الجوع..التشريد..السكن العشوائى.. و الطرد من السكن العشوائى...المرض.. و عدم العلاج من المرض...الجهل ايييييك و اللسته( طبعا من list ) طوييييييييله ...شفت الباسم بعينى دى يده فى يد السلام...و شوف العين قاسى...ضبحتونا.. سلختونا برضه مبتسمين...


    بس..

    "الله يكضب الشينة"

    تحياتي

    (عدل بواسطة saif basheer on 28-07-2005, 07:17 AM)

                   |Articles |News |مقالات |بيانات

28-07-2005, 05:09 AM

Yasir Elsharif
<aYasir Elsharif
تاريخ التسجيل: 09-12-2002
مجموع المشاركات: 27303

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    الأخت سهام المجمر

    تحية لك وللبنات والأولاد وأبوهم، وخالهم القاعد معانا هنا دا..


    Quote: قلت هذه لحظه يجب ان تعيش... ما بعرف قدرت اسوق بالسرعه دى كيف ...اخيرا البيت يا اولاد امرقو امرقو بسرعه بسرعه يا ماما ياخ دقيقه ...مافى دقيقه و لا فى ثانيه... اركبوا بس يا ماما انا حفيان ...ياولد اركب ماشيين نشوف قرنق و يمكن يكون من الضمن شايل معاهو سفنجات...


    بكري أبو بكر قفل تحميل الفيديو في سودانيز أونلاين، والحالة أنا استعديت وسجلت 8 ساعات من التلفزيون "الناقل الوطني" الوحيد بكاميرته الوحيدة.. ولكن الله ما سهل لينا نقل اللحظات لمن لم يرها..
    قد يمر بكري من هنا ويشوف لينا حل.

    والسلام

    ياسر وإلهام قرأوا الموضوع يا هشام..
    ياسر
                   |Articles |News |مقالات |بيانات

30-07-2005, 03:00 AM

Siham Elmugammar
<aSiham Elmugammar
تاريخ التسجيل: 18-06-2004
مجموع المشاركات: 3488

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Yasir Elsharif)

    سيف ود بشير سلام مليون .. ووالله كان قلت ليك انت و احمد عمر ان بقدر افك ليكم جوطتكم دى اكون كضبت عليكم ...انا ذاتى ما لاقيه البفكها لى!!!!...
    ياسر الشريف شكرا لمرورك .. جاياك راجعه
                   |Articles |News |مقالات |بيانات

30-07-2005, 05:08 AM

Adil Al Badawi

تاريخ التسجيل: 27-07-2005
مجموع المشاركات: 1143

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)

    عزيزتي، سهام. إليك مني مليون سلام.

    أنا عادل بدوي، صديق لك وراء الباب...من عصر كلية الاقتصاد، جامعة الخرطوم (نوفمبر 1984 – نوفمبر 1989) ولا بأس إن لم تتذكريني فذلك كان قبل أكثر من خمسة عشر عاماً.

    لكنَّني أشكرك على هذا البوست وقد كان الجزء المتعلِّق بحادثة حاج ماجد (تحديداً حديثك بحرقة عن تلك الحادثة) قد وقع لي في جرح فكثيراً ما استغربت أن تلك الحادثة ما زالت شوكة بحلق وجداني لكنَّني الآن مطمئن أنَّني لست وحدي. ولأنَّ تلك الحادثة الone man show قد نتج عنها أن أصبح الآلاف من الطلاب الجامعيين "كلاباً لاحسة ****ها) ولعدَّة أشهر، فإنَّني لا أعتقد أن شوكتها يمكن أن تنزل من حلق وجدان من بلعوها "بأخوي وأخوك" مهما كان ذلك الحلق واسعاً.

    ذكرك لتلك الحادثة يجعلني أدعوك لأن تفضفضي حولها في بوست أطلقته بهدف كتابة مذكِّرات جماعية عن الفترة مارس/أبريل 1985 وما قبلها – يونيو 1989 وما بعدها وتشرِّفني مشاركتك فيه. عنوان البوست: عن "الحفلة الكتلناها من قولة أوف...أوف...أوف...واحد...نين...تلاتة لحدِّي ما الكراسي اتطايرت" ولم أورد لنك البوست لأنَّه ليس من العدل أن يأتي الزوَّار إلى بوستك فيجدوا اللنك وبرمشة كليك ينطوا السلك.

    ودمتِ إلى لقاء آخر إن شاء الله.
                   |Articles |News |مقالات |بيانات

01-09-2005, 05:24 AM

nada ali
<anada ali
تاريخ التسجيل: 01-10-2003
مجموع المشاركات: 5258

للتواصل معنا

FaceBook
تويتر Twitter
YouTube


Re: عليكم الله فكونا..و ما تعكروا لينا تفاؤلنا اصلو هو قاعد على الهبشه!!! (Re: Siham Elmugammar)
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de